[٢٨٧]

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلا] چوق علاقەدار اولدیغم قسطمونی نورجیلرڭ باشی حكمندە مرحوم شیخ ضیاء الدّینڭ وفاتی، بزی چوق متأثّر أیلەدی. او ذات، اسكیدنبری خالد ضیاء الدّین، احمد ضیاء الدّین، حضرت ضیاء الدّینڭ دردنجیسی، بو شیخ ضیاء الدّین اولارق دائما، هر كون بتون معنوی قزانچلریمی اونلرە دە باغیشلایورم. ان شٓاء اللّٰه دوام دە ایدەجگم. قسطمونینڭ خسروی اولان محمد فیضی بزم بدلمزە، هم او مرحومڭ اقرباسنی تعزیە، هم قسطمونی و جوارندەكی نورجیلرڭ بایرامنی تبریك ایتدیگمزی تبلیغ ایتسین. خصوصًا حلمی، امینلر، تحسینلر، احسانلر، احمدلر، حافظلر وسائرە و نورجی همشیرەلرە هم سلام، هم بایراملرینی تبریك ایدییورم. هم اورادەكی قومشولریمە و دوستلریمە آیریجە سلام ایدرم.

[ثانیًا] مدرسة الزّهرانڭ دمیر باش شاكردلرندن كاتب عثمانڭ اورانڭ شاكردلری نامنە بایرام تبریكلری ایچندە حقّمدە و حقّمزدە غایت كوزل و تأثیرلی، ان شٓاء اللّٰه مقبول، مبارك دعالری، بنم بو صیقینتیلی خستەلغمدە سرورلی بر انشراح ویرمسی، او دعالرڭ مقبولیتنە بر امارە تلقّی ایتدم. اسپارطە خلوصیسی رأفتڭ بنم یرمدە تصحیحاتە باشلامسی و مباركلردن طاهرینڭ جدّی آرقداشی

عبد اللّٰه چاوشڭ ذوالفقارینی بنم ایچون تصحیح ایتمسی، بنی چوق ممنون و منّتدار أیلەدی.

[ثالثًا] نورلرلە علاقەسی چوق قوّتلی و آز بر زماندە چوق ایش كورن مصطفی اوسمانڭ، زغفرانبولی شاكردلری نامنە بایرام تبریكی مناسبتیلە نورڭ اخبارات غیبیەسنڭ تظاهرینە دائر اوزون مكتوبنڭ مسلگمزە مخالف اولان سیاست مادّەلرینی بیراقوب، یالڭز باشدە و آخردە بر قسمنی لاحقەیە كچیردك. هم اوڭا، هم ایكی معصومی و رفیقەسی ایلە نورلرە چالیشان حفظی یە و او جواردەكی نورجیلرە بالمقابلە بایراملرینی تبریك و موفّقیتلرینە دعا ایدییورز.

[رابعًا] آیدین طرفندە بولونان و اسكیدنبری اهمّیتلی بر قرداشمز خلیل ابراهیمڭ نور درسندە بر ذكی آرقداشی و حپسخانەدە نورلرڭ قوّتلی بر دعوا وكیلی احمد فیضینڭ سزلرە یازدیغی كوزل تبریكنامەسنی و شدّتلی علاقەسنڭ دوام ایتمەسنی كوردم، چوق مسرور اولدم. ان شٓاء اللّٰه او قوّتلی نورجی، او طرفی تنویر ایدەجك. ذاتًا اویلە بریسی اویلە بر یردە لازم ایمش. بنم طرفمدن اوڭا چوق سلام. و شدّتلی علاقەسنی و بایرامنی و اورادە نورلرلە علاقەدار اولانلرڭ بایراملرینی تبریك ایدییورز. خصوصًا، حاجی امین اقربالرینە چوق سلام ایدییورم. دڭزلی و جوارندە و حپسندە بتون قرداشلریمزە و نورجیلرە، خصوصًا دڭزلی خسروی حسن فیضی و رفقاسی و نورلری بڭا كتیرن حافظ مصطفی و یالواچلی م، ق، ی و حاكم عادل و نورڭ سربستیتنە خدمت ایدن

محرّم كبی ذاتلرە و حپسدە بزە قرداش اولوب چوق انسانیّت كوسترن ذاتلرە، هم بایراملرینی تبریك، هم چوق سلام ایدییورز. و اونلری اونوتمییورز و اونوتامییورز.

عموم نورجیلرە بیڭلر سلام

اَلْبَاقٖی هُوَ الْبَاقٖی

قرداشڭز سعید النّورسی

آلتی یدی سنە كمال صداقتلە بڭا و رسالۀ نورڭ كتابتنە حقیقتلی خدمت ایدن قسطمونی خسروی محمد فیضینڭ مكتوبی، شخصمە عائد قسمی، حدّمدن پك چوق زیادە مقام ویرمسی، كرچە مسلگمە مخالفدر. فقط اونڭ، او حسن ظنلری، حقّمدە بر مقبول دعادر دییە ایلیشمدم. اونڭ كبی دقّتلی، نورڭ سر كاتبنڭ یازیسنە ایلیشمەملی دییە عینًا لاحقەیە كیرمەسنی قبول ایتدم

س٭ع

[٢٨٨]

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

چوق سوكیلی، مشفق استادم افندم حضرتلری،

مبارك لیالئ عشرەڭزی، هم قدسی بایرامڭزی، هم رسالۀ نورڭ تنوّرینی تبریك و باشدە سوكیلی استادم اولارق عموم رسالۀ نور شاكردلری و بتون اهل ایمان حقّندە بو مبارك لیالی و ایّامڭ مژدەلی، بشارتلی و سرورلی اولمەسنی

جناب ارحم الرّاحمیندن نیاز و استرحام ایدر، سوكیلی استادیمزڭ خیرە یوكسلن نورلی مبارك اللرندن أوپر، كلّیت كسب ایتمش مقبول دعالرینی بكلر، اڭ درین حرمتلریمی تقدیم ایدرز.

بو دفعە یینە سوكیلی استادم، شاكردلریڭز حسن ظنلرینی قیرییورسڭز. و شخصمە فضلە قیمت ویرمەییڭز، بویورویورسڭز. البتە بو حال، كمال تواضع و قدسیتڭزە دلالت ایدییور. فقط سوكیلی استادم، سزڭ صورتڭز عنایت حقلە عین حقیقت، شخصڭز عین شخص معنوی اولمش. جناب حق سزی اسم اعظمنڭ تجلّیسنە مظهر [اَفَمَنْ شَرَحَ اللّٰهُ صَدْرَهُ لِلْاِسْلَامِ فَهُوَ عَلٰی نُورٍ مِنْ رَبِّهٖ] آیتنڭ سرّینە نائل بویوروب، مبارك قلبڭزە اویلە خارقە بر قدسیت و حكمت، صدریڭزە اویلە بر انشراح و وسعت احسان أیلەمشكە، ایشتە او مسعود صدر واسعڭ سیمای معنویسی اولان علوی قلبڭزدە، كلیات نوردە، رسالۀ نورڭ سوزلری نامنی آلان و هر بری غایت خارقە برر ایمان تحقیقی حجّتلری اولان اوتوز اوچ عدد سراج النّور، هم رسالۀ نورڭ مكتوباتی نامنی آلان و هر بری برر برهان وحدانیت و رسالت اولان اوتوز اوچ عدد [مَصَابٖیحُ النُّورْ] هم رسالۀ نورڭ لمعەلری نامنی آلان و نور هدایت جادّەلرینی كوسترن [لَمَعَاتُ النُّورْ]، هم رسالۀ نورڭ شعاعلری نامنی آلان و نور معرفت و محبّت الٰهی دوربینلری اولان [شُعَاعَاتُ النُّورْ]، قلبڭزدن طلوع و ظهور بولمش. اذن حقلە اولو الابصارە طریق هدایتی كوسترییور.

[اَللّٰهُمَّ لَا مَانِعَ لِمَٓا اَعْطَیْتَ٭ وَلَا مُعْطِیَ لِمَا مَنَعْتَ] سوكیلی استادم، ایشتە شاكردلریڭز حسن ظنلرندەكی افراط، بو حقیقتی كاه رسالۀ نورڭ، نور هدایت و نور توفیق و نورلی توافق مصابیحلریلە زینتلی سیمای معنویسی اولان نورلی صحیفەلرندە، كاه سوكیلی استادیمزڭ نور علم حقیقت و نور حكمتلە منوّر مسعود سیماسندە یینە رسالۀ نوردن آچیلان دیدۀ نور ایمان و چشم بصیرتلە تماشالرندن حاصل اولان پر صفای قلبی و متشكّرانە و تقدیركارانە و استحسانكارانە و منّتدارانە، سلسلۀ تفكّراتلرندن نشئت ایدن بر سرور روحانیتڭ تمثّل و تجسّم ایتمش برر میوەسی و صورتی وار.

چوق دفعەدر علاقەدارانە مراقلە صوردیغڭز محترم، فاضل، مرحوم شیخ ضیاء الدّین افندی، عالم نورە ارتحال أیلەدی. جناب حق، باشدە سوكیلی استادیمز اولارق بتون نورجیلری خدمت قدسیۀ نوریەدە دائم بویورسون، آمین. حقیقتًا بو مبارك ذات، آخر عمرینە قدر بورادە بتون علما و مشایخ و اشراف ایچندە رسالۀ نورە و سوكیلی استادیمزە قارشو جدّی علاقەدارلغنی كوسترمكدن كری قالمازدی.

حتّی بر بایرامدە زیارتنە كیتمشدك. جماعت حضورندە "نە غم، امّت محمّد علیە الصّلاة والسّلامەكە، رسول اكرم علیە الصّلاة والسّلام كبی شفیعلری اولا. نە قورقو، دڭزڭ طالغەسندن اول كیمسەیەكە، نوح علیه السّلام كمیجی اولا. نە حزن، نە كدر سزلرەكە، بدیع الزّمان كبی مدافعڭز، سعید النّورسی حضرتلری كبی

استادیڭز اولا. "دییەرك سعدئ شیرازینڭ (چِە غَمْ دِیوَارِ اُمَّتْ رَاكِە بَاشَدْ چُونْ تُوپُشْتِیبَانَ٭ چِە بَاكْ اَزْمَوْجِ بَحْرْآنْ رَاكِە بَاشَدْ نُوحْ كَشْتِیبَانْ) بیتلرینی اوقویوب، استادیمزی حرمتلە یاد أیلەمشدر. (رَحْمَةُ اللّٰهِ تَعَالٰی عَلَیْهِ رَحْمَةً وَاسِعَةً. اَللَّهُمَّ نَوِّرْ قَبْرَهُ بِنُورِ حَقَٓائِقِ رِسَالَةِ النُّورِ. اٰمٖینَ)

محمد فیضی

لاحقەیە كیرسین.

[٢٨٩]

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

چوق مبارك، چوق سوكیلی استادیمز، افندیمز حضرتلری،

ارسال بویورمش اولدیغڭز، برنجی مكتوبڭزدە كچن لیالئ عشرەمزڭ هر بر كیجەسی برر لیلۀ قدر و لیلۀ برات و لیلۀ معراج قدر بیوك قیمتلری اولدیغنی، قرآن عظیم الشّانڭ [وَالْفَجْرِ٭ وَلَیَالٍ عَشْرٍ] سورۀ جلیلەسیلە اثبات ایدرك و او كیجەلردە بز عاجز قصورلیلرڭ دعالریمزڭ مقبولیتی ایچون رحمت الٰهیەیە ال آچوب دعا ایتدیگڭزدن چوق ممنون و متشكّرز. جناب حقّە حدسز و حدودسز شكرلر اولسونكە، شو آخر زماندە بز عاجزلری انسان اولارق یاراتوب. كندی ذاتنە قول و حبیب ذی شان افندیمزؐ حضرتلرینە امّت اولارق خلق ایدوب و سز چوق مبارك و حق حقیقتلرڭ قهرمانی و حضرت قرآنڭ سر ترجمانی اولان

استادیمز حضرتلرینە طلبە و بو زمانە قدر بر داها مثلی كتیریلمەین رسالۀ نورە شاكرد قبول اولوندیغمزە مدیون شكرانز. و اسرار قرآنیە و ایمانیەنڭ حقیقتلرینی بزە اوگرتن سز حمیتپرور و صبر قهرمانی استادیمز افندیمز حضرتلری ایچون میلیونلر سنە عمریمز اولسە، كیجە و كوندوز خدمتڭزدە بولونسەق و دائما جناب حقّە سعادت و سلامتڭز ایچون دعالر یاپسەق، یینە حقّڭزی أودەیەمەیز.

جناب رسالتپناه حضرتلری اولان نبیّ ذیشان صلّی اللّٰە علیە وسلّم افندیمز حضرتلری دنیایە تشریفندە 《 امّتی، امّتی》 و آخرتە، دار بقایە تشریف بویوردقلرندە یینە 《 امّتی، امّتی》 دییە مولاسنە قاووشدیغی كبی، سز عزیز استادیمز دە، سكرات كبی اولان دهشتلی و آغیر خستەلق و صیقینتیلریڭزدە، بز عاجز قصورلیلرە دعا ایدییورسڭز. جناب حق، امّت محمّدڭ سعادت و سلامتی ایچون یاپدیغڭز دعالریڭزی عند الوهیتندە قبول بویورسون. آمین.

و حضرت ابراهیم علیە السّلامڭ بو یوم عرفە و بایرام كونندە كوزینڭ یاشنی دیڭدیرن و اسماعیل علیە السّلامی بیچاقدن قورتاروب سلامتە چیقاران و بتون ملائكەلری و انبیا و اولیا روحلرینی شاد و خُرّم ایدن بو مبارك كونلر حرمتنە جناب حق وجود شریفڭزە شفا ویرسین. آمین. و بو مبارك عَرَفَە و بایراملرڭ امثال كثیرەسیلە مشرّف أیلەسین. آمین. و بز عاجز قصورلیلری نورڭ فتوحاتی ایچون و دنیایە اعلانی ایچون اذن الٰهی ایلە آرقەڭزە آلوب حق و حقیقتلری میدانە چیقاردیغڭز كبی، اویلە دە، یینە دنیادە بزلری پشڭزە آلوب،

حجّە كوتوروب، نبیّ ذیشان علیە وسلَّم افندیمز حضرتلرینڭ اشیگنە یوزیمزی سورەرك كوز یاشلریمزی آقیتمقلر نصیب و میسّر أیلەسین. آمین. و آخرتدە دە، یینە اول نبیّ ذیشان افندیمز حضرتلرینڭ شفاعتنی جملەمزە احسان أیلەسین. آمین آمین آمین.

بو طرفدن جملە قرداشلریمز، قلبلر طولوسی سلام ایلە مبارك اللریڭزدن أوپر و بایرام شریفڭزی تبریك ایدرك امثال كثیرەسیلە مشرّف اولمقلغڭزی تكرار تكرار جناب واجب الوجود حضرتلرندن تمنّی و نیاز ایدرز، افندیمز حضرتلری.

قصورلی طلبەڭز و دعاڭزە محتاج عثمان كاتب

[٢٩٠]

چوق سوكیلی، چوق قیمتدار، چوق مبارك و چوق مشفق استادیمز، افندیمز حضرتلری،

مبارك ال و آیاقلریڭزدن تعظیم و احتراملە اوپەرك، عموم نورجی قرداشلریمزلە برابر عید سعید اضحاڭزی بتون روح و جانمزلە تبریك و تسعید أیلر، بو حیات فانیەدە ادراك ایتدیگڭز سنەلر بوینجە، بشر ایچون چوق اهمّیتلی و مقدّس و لزوملی اولان حیاتڭز و بو مسعود و نزیه حیاتڭ اهمّیتلی و قیمتلی و حیات و وجود قدر لزوملی اولان ثمرەسی رسالۀ نورلە عموم بشرە [ایستر بیلمەسینلر، ایستر بیلسینلر] علی التوالی نور و فیض و بركت القا ایتدیگڭزدن، یینە

روح و جانمزلە تبریك و بز نورجیلر دە خاص بر توجّهلە و رسالۀ نورڭ نفس قدر لزوملی درسلریلە هر نفسمزدە بیوك بر بایرام یاپدیران ذات فضیلت مئابڭزە صوڭسز منّتدارلقلریمزی عرض ایدركن، جناب ارحم الرّاحمین حضرتلرندن شویلە نیاز أیلرز: یا ربّی، سوكیلی استادیمزڭ عمرینی مُزداد و سعادت و سلامت دائمە ایچندە داها چوق سنەلر بزملە بو حیات فانیەدە برابر أیلە. و رسالۀ نوری، كفر و ضلالت باتاقلقلرندە چیرپینان بشرە بالذّات اوقوتمەسنی نصیب و میسّر أیلە و بز زواللیلری ابدیًا اونڭ كوستردیگی یولدن و اوندن آییرما. و اوندن و عموم نورجیلردن راضی اول. آمین.

خدمتكارلریڭز و طلبەلریڭز، زغفرانبولی و جواری قصورلی نورجیلری رسالۀ نور شاكردلری سیاستە تنزّل ایتمدكلرندن، بو مصطفی قرداشمزڭ نورڭ فتوحاتی حسابنە یازدیغی اوچ درت مادّە یازیلمدی. نورجیلرە لزومی یوق. یالڭز نتیجە و حاشیەسی یازیلدی.

نتیجة النتیجە، بو كنچلك ممثّلی اولان كنچ، بیلمەیەرك، عادتا بو حادثەنڭ دلالت و اشاراتیلە رسالۀ نورڭ حقیقتلرینی تصدیق و حق و عین حقیقت اولدیغنە بتون كنچلك نامنە امضا قویویور. و فقیر، قطعیًّا تصدیق ایدییورمكە، بز نورجیلرە مژدەلەدیگڭز عنایات و الطاف سبحانیە پیدرپی تظاهر ایدییور. و دین و ایمان و قرآن علیهنە حركتە كچمك ایستەینلرە، درحال بر مخالف و معارض كتلە ظهور و یوزلرندن سترەلری، ماسكەلری آلینارق، انظار ناسدە

تشهیر ایدیلییور. مژدەلریڭز هپ تظاهردە و رسالۀ نورڭ حقیقتلری دوشمانلری طرفندن بیلە تصدیق اولونمقدە سوكیلی استادم. [حاشیە]

[٢٩١]

لاحقەیە كیرسین

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

چوق سوكیلی، چوق مبارك، چوق معزّز، چوق قیمتلی قرداشلرم،

ایكی سنەدنبری عادتا آراڭزدن چكیلمش و عادتا رسالۀ نوری و اونڭ مبشّر افخمنی اونوتمش كبی سكوت ایتدم. رسالۀ نور بلبللری شاقیركن، عشاق حقیقت شمس هدایتڭ حوالیسندە انواع نعامات غرام آلود ایلە ترنّمساز اولوركن،

شمس محمّدیەنڭؐ آخر زماندە دفعۀ ثانیەدەكی طلوع دلفرینی قارشوسندە حیرانلغڭ اڭ یوجە تحسّساتیلە بر جماعت قدسیە، بر حزب الٰهی، او اكرام الٰهینڭ سروری ایلە اعظمی بر جوشقونلق كوستریركن، بن حسّسز، جامد بر طاش پارچەسی كبی صوصدم. استاد مبجّلڭ فراقی احتمالیلە تحسّر وولقانلری فیشقیریركن، صداقت فوّارەلری چالقانیركن، بن صویی كسیلمش بر چشمە كبی، بر دگرمن كبی صوسز، نوری سونمش بر لامبە كبی ضیاسز قالدم.

فقط عزیز، سوكیلی، مبارك قرداشلرم، هیچ محض نور رسالت محمّدیە علیە الصّلاة والسّلام اولان رسالۀ نورڭ جاذبەسنە بر دفعە معروض قالان بر انسانڭ، او جاذبۀ دل ربایی ترك ایتمەسنە، اونڭ منشر اجملندن، او معدن شفقت و كرمدن واز كچمەسنە امكان وارمیدر؟ خیر، سوكیلی قرداشلرم، دائمی بو بیچارە، بو پر قصور انسان، سزڭ دائمی و ابدی مالڭز، ئوز مملوكڭز و رحمت الٰهیەنڭ فیضیلە اونی سزدن آییراجق هیچ بر قوّت یوقدر. او محض نور قرآن اولان رسالۀ نورڭ آزاد قبول ایتمز بندەسی، اونڭ منبع اقدسنڭ لاینعزل كولەسیدر.

سوكیلی قرداشلرم، ان شٓاء اللّٰه شیمدی یە قدر سویلەمەسنە مساعدە ایدیلمەین لسانمە مساعدە ویریلەجك و مكتوبلرم كسیلمیەجكدر. بالوسیلە عید اضحیڭزی جان و یوركدن تبریك ایدر، جملەڭزە قارشو حسرت و اشتیاقمڭ حدودسزلغنی عرض ایدرم سوكیلی قرداشلرم.

پر قصور و بیچارە قرداشڭز احمد فیضی قول

[٢٩٢]

بِاسْمِهٖ سُبْحَانَهُ

ذی الحجّە (١٦)

مكتوب نو (٢)

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلا] نظیف چلبینڭ اینەبولی خالص قرداشلریمزڭ نامنە بایرام تبریكی ایلە.. و ذوالفقارڭ غایت دقّت و اهمّیت و احتیاط ایلە دوام خدمتی و معجزات قرآنیەیی دە بیتیروب ذیللرندن بر قسمنی دە تمام ایتمسی.. و عبد الرحمن صلاح الدّینڭ آمریقە میسیونرلرینە درت بش آی اوقوتدیردیغی عصای موسی و معجزات احمدیەیی امین بر واسطە ایلە بزم ناممزە جامع الازهرە هدیە ایدوب كوندرمەسنی.. و اهمّیتلی بر نور شاكردی احمد قریشینڭ اونلرڭ ماكینەسنڭ مصرفنە یوز بانقنوط ویرمەسنی بیان ایدن بر مكتوبنی آلدم. بو قهرمان نظیف قرداشمزە و غایت جدّی و ثباتكار و تام علاقەدار اینەبولی نورجیلرینە و احمد قریشی و رفقالرینە، هم بایراملرینی، هم دواملی خدمتلرینی، هم یوكسك صداقتلرینی، هم ذوالفقارڭ طبع موفّقیتنی، هم صلاح الدّینڭ جامع الازهرلە مدرسة الزّهرانڭ مناسبتنی تأمینە چالیشمەسنی روح و جانمزلە تبریك ایدییورز. جناب حق اونلری موفّق أیلەسین. آمین. و خدمتلرینی تام مقبول أیلەسین. آمین.

[ثانیًا] جامع الازهر علماسنە كوندریلن ایكی نسخە بنم تصحیحمدن كچمەمش. بعض حركەلر و عربی كلمەلردە سهولر البتە واردر. خصوصًا آخردەكی عربی

خلاصة الخلاصە حركەلرندە علم نحوجە، باشقە نسخەلردە متعدّد سهولر كوردم. اونڭ ایچون، تام عربی خواجەلرینڭ تدقیقندن كچمش برر نسخە عصای موسی [حاشیە] و ذوالفقاردن، مناسب كوردیگڭز زمان جامع الازهرە كوندرمكلە برابر، اونلرە یازیڭزكە: نور رسالەلرینڭ مدرسة الزّهراسی، جامع الازهرڭ شفقتنە چوق محتاج بر مخدومیدر، بر طلبەسیدر. شدّتلی دوشمانلرڭ هجومنە هدف اولمش بر شاكردیدر و بتون مدرسەلرڭ باشی و عالم اسلامی دائما تنویر ایدن او بیوك جامع الازهرڭ كوچك بر دائرە و شعبەسیدر. اونڭ ایچون، او عالی قدر استاد و مشفق پدر و حمیتكار مرشد اعظم، بیچارە اولادینە و شاكردینە تام یاردیم ایتمەسنی، اونلرڭ علوی همّتندن بكلەیورز. او پك بیوك استادیمزە تقدیم ایدیلن ایكی كتاب ایسە، بر طلبە، درسنی نە درجە آڭلامش دییە آقشامدە باباسنە و استادینە یازوب ویرمسی كبی، او ایكی درسمز، او شفقتلی علّامەلرڭ نظر مسامحەلرینە عرض ایدیلمش، دییە بر مكتوب یازارسڭز.

[ثالثًا] پك چوق علاقەدار اولدیغم و اشارت غوثیە ایلە نور شاكردلرینڭ تمل طاشلرندن بولونان بارلە، بَدْرَە، اگیردیر دائرەسندە ایكی خلوصی و امكدار صادق سلیمان ایلە برابر چوق ذاتلرڭ اسمی بولونان اوچ تبریك مكتوبلرینی برابر آلدم. یگرمی سنە اوّلكی بارلە حیاتمی تام خاطرمدە احیا ایتدی. بن باشدە او اركان ثلاثە و یڭی قهرمانلردن علی عثمان و بحری اولارق عمومڭزڭ برر برر، خصوصًا بارلەدەكی اسكی دوستلریمڭ بایراملرینی تبریك ایدییورز. اونلری اونوتامییورم. هر كون دعامدە و قزانچلرمدە حصّەداردرلر. خصوصًا مرحوم مصطفی چاووش و مهاجر حافظ احمد و اشرف بگ مرحوملری چوق دفعە حزینانە و مشتاقانە تخطّر ایدییورم. اونلرڭ اقربالرینە دە بالخاصّە سلام ایدییورم. نور سانترالی صبری [خلوصئ ثانی ]، برنجی خلوصی یە عصای موسی یی كوندرمسی، چوق كوزل اولمش. اللّٰه ایكیسنی موفّق أیلەسین. آمین.

و نورلرڭ انتشارینە چوق اهمّیتلی خدمتی بولونان بر ذاتڭ، مرحوم پدرینڭ مزارینە دائر سؤٓالنڭ جوابنی صبری یە حوالە و او ذاتە دە چوق سلام ایدییورم. و ایكی خلوصینڭ دائما دمیر باش، حقیقتلی آرقداشلری حقّی یە دە بالخاصّە سلام و نە حالدە اولدیغنی و كیفنی صورییورم. و برنجی خلوصینڭ مكتوبندە بزە و نورلرە قارشو چوق علاقە كوسترن آلوارلی محمد و ادریس افندیلرە چوق سلام ایدییورم

اَلْبَاقٖی هُوَ الْبَاقٖی

عمومڭزە بیڭلر سلام و دعا ایدن قرداشڭز سعید النّورسی