رسالۀ نورڭ باشدە باش كاتبی حافظ توفیقڭ بو فقرەسی لاحقەیە كیرسین. چوق ایلیشەمدم. خاطرینی قیرمامق ایچون تعدیل ایتمدم.

(٢١٦)

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

پك سوكیلی و فضیلتمند استادم افندم حضرتلری،

حد و حدودسز و نهایتسز تحسّرلرلە سلام عاجزی یی بعد التّبلیغ مبارك اللریڭزی أوپر و بش وقت نماز بعدندە ذات فاضلانەلرینڭ صحّت و عافیتلرینڭ دوامی و عمریڭزڭ افزونیتنی خدمت قرآن و شریعت احمدیە و قرآن حكیمە مربوط بولونان رسالۀ نوریمزڭ اكمالی خصوصندە قطمیریڭز و فقیریڭز اولان قرداشڭزڭ عاجز لسانی دوندیگی قدر جناب پروردكار حضرتلرینە روز و شب یالوارمق وردمدر افندم. آه حسرت، آه حسرت استادم! بو حسرت آتشی، آرامسز جسم عاجزی یی هر آن یاقمقدەدر. هیهات، نە یاپایم افندم! ألم ایرمز، كوجم یتمز. ان شٓاء اللّٰه عن قریب الزّمان خلّاق لم یزل حضرتلری پك یاقین وقتدە سربست ملاقاتلر نصیب ایدەجكدر. ان شٓاء اللّٰه، ثمّ ان شٓاء اللّٰه و ثمّ ان شٓاء اللّٰه.

نور محمّدیؐ ایلە نورلانمش و بوی نبوی ایلە قوقولانمش و قرآن حكیمدە مذكور اولان اوزرندە جنّت رایحەسی اولان ریحان دینیلن او چیچگڭ جنّت رایحەسیلە رایحەلانمش اولان نورلی استادم افندم حضرتلری! جناب حق جلّ و علا حضرتلری، سورۀ اعرافدە نصّ قاطع ایلە نبیّ ذی شان افندیمزەؐ ارسال بویورولان شو آیت جلیلەدە، (اَللّٰهُ اَعْلَمُ بِالصَّوَابِ وَمُرَادِهٖ) رحمت الٰهیەنڭ نە قدر بیوك و یوكسك و صوڭ درجە بیوك هر ذی روحە نَفِعْلی و ئولمش ارضی احیا ایدوب ناطق و غیر ناطقلرڭ اعاشەلرینی هر جهتلە تأمینە مدار اولدیغنی قوللرینە بیلدیرمك و تبلیغ ایتمك اوزرە رسول كبریا افندیمزەؐ جبریل علیە الصّلاة والسّلام واسطەسیلە انزال بویورولمشدر.

بِسْمِ اللّٰهِ الرَّحْمٰنِ الرَّحٖیمِ ٭وَهُوَ الَّذٖی یُرْسِلُ الرِّیَاحَ بُشْرًا بَیْنَ یَدَیْ رَحْمَتِهٖطحَتّٰٓی اِذَٓا اَقَلَّتْ سَحَابًا ثِقَالًا سُقْنَاهُ لِبَلَدٍ مَیِّتٍ فَاَنْزَلْنَا بِهِ الْمَٓاءَ فَاَخْرَجْنَا بِهٖ مِنْ كُلِّ الثَّمَرَاتِطكَذٰلِكَ نُخْرِجُ الْمَوْتٰی لَعَلَّكُمْ تَذَكَّرُونَ (صَدَقَ اللّٰهُ الْعَظٖیمُ)

افندم، شو آیت جلیلەدە (اَللّٰهُ اَعْلَمُ) (لَا یَعْلَمُ الْغَیْبَ اِلَّا اللّٰهُ) خلّاق لم یزل حضرتلری اوّلا رحمتە اشارت اولان روزگاری مژدەجی اولارق كوندرییور. آرقەسندن رحمت الٰهیە اولان یاغموری ئولمش ارض اوزرینە كوندروب او ئولو بولونان ارضە یاغمورلە حیات ویروب، قوّت و قدرتیلە او ئولو ارضدە هر شیئی یتیشدیروب، قوللرینی انفاق ایدییور. بو ئولمش و هر شیدن

اوزاقلاشمش و حتّی عادتا حیات ایلە ممات آراسندە چیرپینارق بیوك ئولومە سوروكلنمكدە اولان امّت مرحومەیی، بو پك قورقونچ اولان دینسزلكدن قورتارمق ایچون جناب حق ئولمش ارضە یاغمور ایلە حیات ویردیگی كبی، خلّاق كریم بو امّت مرحومەنڭ تخلیصی ایچون استادیمە كندی قدرت و عظمتیلە احسان بویوردیغی علم ایلە و معنوی جدّ اعلاڭز بولونان رسول اكرم علیە الصّلاة والسّلام افندیمز حضرتلرینڭ معنًا احفادی بولوندیغڭز جهتلە، نبیّ آخر زمان حضرتلری دە سز استادیمە: قالق اولادم، قرآن حكیمڭ قرق وجە اعجازی اوزرینە اعجاز ایدیلمك زمانی كلدی. اعجاز ایت و امّتمی قورتار! امر پیغمبریسیلە امر اولونوب بو وظیفەیی آلدیڭز. جناب حق و رسول اللّٰه افندیمزؐ سایەسندە قرآنە، دینە و شریعتە چوق بیوك خدمت ایتدیڭز. اللّٰه قبول ایتسین. و سعیڭز مشكور اولسون. آمین.

سوكیلی استادم، حتّی دگل مسلمانلر، بلكە عموم غیر مسلملر دخی تفسیر بویورمش اولدیغڭز رسالۀ نورڭ احكامنە جملەسی محتاج و مشتاقدرلر. و بالعموم انسان طبقاتندن اولانلرڭ صوسامش بولونانلری بو رسالۀ نورڭ نور نهرندن او شفالی صویی ایچمەیە صوڭ درجە شتاب ایدییورلر افندم.

سوكیلی استادم، سزڭ بو زمان ایچون لطف الٰهیلە كوندریلمەڭزدە جناب حقّڭ بیوك حكمتلری وار. یولنی غائب ایدن امّت مرحومە، مهلك قراڭلقدە قالمش. هیچ بر طرفنی كورەمەیوب حق و حقیقت نە اولدیغنی تمامًا شاشیردیغی

بر زماندە، جناب حقّڭ سز استادیمی بو امّت مرحومەیە غائب ایتدیگی حقیقت و شریعت یولنی و احكامنی كوسترمك خصوصندە كوندریلمەڭز، پك بیوك و چوق بیوك بر قدرتدر. بو مسئلەدە شك و شبهە یوقدر افندم. بوشە كیتمدی افندم ان شٓاء اللّٰه.

جناب حق ارضی یاغمورلە احیا ایتدیگی كبی، آخرتدە دە عموم انسانلری حیاتە ارجاع ایتدیگی كوندە سز، دنیادە یولنی و ادیاننی اونوتمش و اوزاقلاشمش بولونان و امّت مرحومەدن اولان بیچارەلرە "كلیڭز، غفلتدن كوزیڭزی آچڭ! شریعت غرّای احمدیەنڭ كتابی بولونان او نورلی رسالۀ نوری اوقویوب، حیات ابدیەنڭ یولنی اوگرنوب، ادیانڭزی محافظە ایدیڭز!" دییە یوز اوتوز كسور رسالۀ نورڭ سوزلری، كذا و اوتوز كسور مكتوبلر و كذا لمعاتلریلە بتون دنیایە جناب حقّڭ امری و رسول اللّٰه افندیمزڭؐ مساعدەسیلە او نور قیلیچلە مجاهدەیە كیردیڭز. عون حق و همّت رسول اللّٰهؐ ایلە جهاددە غلبە ایتدیڭز. ربّم آخرتدە عینًا بویلە قبول بویورسون افندم.

استادم، شو سوزلر، رسول كبریا افندیمزڭ حدیث پیغمبریسنی خطور ایتدیردی. اویلە یازدم. توفیق بڭا مقام ویرییور، دیمەییڭز. یالڭز فم سعادتدن چیقییور، حدیثدر افندم، یازمەیە دە حقّم وار ظن ایدییورم:؛ (عُلَمَٓاءُ اُمَّتٖی كَاَنْبِیَٓاءِ بَنٖٓی اِسْرَٓائٖیلَ) (صَدَقَ رَسُولُ اللّٰهِ) ان شٓاء اللّٰه افندم، استادم دە، شكسز پیغمبریمزڭ تعریف ایتدیگی علمادنسڭز اگر بویلە اولماسەیدی، سزە دنیادە بویلە وظیفەلر تحمیل

ایدیلمزدی. جناب حق كتاب اللّٰهندە و رسول اللّه افندیمز دەؐ دیگر حدیثلردە بویورمشلردر: علمای حقیقت اولانلر دە آخرتدە پیغمبرلردن صوڭرە شفاعت ایدەجكلرینی صاحب شریعت كوسترمش. بن قطمیریڭز دە او كوندە فقیر و حقیر قرداشڭز، سز افندمدن شفاعت بكلرم.

شاملی حافظ توفیق

(٢١٧)

بِاسْمِهٖ سُبْحَانَهُ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلًا] بیڭ كیجە قدر قیمتدار برات كیجەڭزی، كچن سنە مژدەجی و شیمدی عین وقتدە یانمە كلن قدّوس قوشیلە برابر تبریك ایدرز.

[ثانیًا] بو دفعە بڭا خفیف تعرّضلری و بڭا خدمت ایدن محمد نامندەكی صادق چوجغی خفیّە یاپمغە چالیشمەلری عقیم قالمسی و باشقە ولایتلردن كلن یبانیلری قبول ایتدیگمی دییە اصلسز بهانەلری ایسە، شیمدی حقیقتی آڭلاشیلدی. بڭا ایلیشن مأمورلردن بریسی دیمش: نرەدە دینجە بر حركت اولسە، اڭ اوّل بورایە و سعید خواجەیە باقارلر دییە افشا ایتمش. و آڭلادقكە، نورجی و حپس آرقداشلریمزدن و قرداشمز شمسی یشیل، سلطان احمد جامعندە نور حقیقتلرندن درس ویرمسیلە، رأفتڭ یازدیغنە كورە، بش بیڭ آدمە

او وعظدە طوپلانمەسندن نورلرڭ رقیبلری قیصقانچ آدملر [حاشیە] اونڭ درسلرینی رسالۀ نور حسابنەدر و اونڭ طلبەسیدر دییە تا آفیونە قدر اشاعە ایتمەلری، بو دفعەكی اهمّیتسز تعرّضە سبب اولمشدر. فقط تعرّض ایدنلر ندامت ایتدیلر. بزە بر ضرر اولمدی. فقط كوزل رحمت، هر كون كلن یاغمور، بردن كسیلدی، داها كلمدی. سز مراق ایتمەییڭز، عنایت دوام ایدییور.

[ثالثًا] نظیف، رأفت، مصطفی اوسمان، كوچك ابراهیمڭ مكتوبلرندەكی مسئلۀ طبع و ماكینە و بر آی قدر صبر ایتمەمز و نورلرڭ سربست طبع ایدیلەجگنی و میسیونرلرڭ یالڭز بر مستنسخڭ سهویلە، انجیل یوحنّادە (١) (٦) یازیلمەسی و طوغریسی (٦) (١) بودر دییە، او قوجە اثردە بوندن باشقە قصور بولمامەلری، بزی چوق مسرور ایتدی. فقط چوق دفعە سویلەدیگم كبی، یینە تكرار ایدییورمكە: هر شیدن اوّل صحّتنە و یاڭلیش اولمامسنە چوق دقّت ایتمك لازمدر. چونكە رسالۀ نور باشقەلرە بڭزەمز. بعضًا بر تك كلمە و بر حرف و بر نقطە یاڭلیشیلە اهمّیتلی بر مسئلە بوزولور. حقیقت صورتی دگیشیر. سزڭ اصابتلی رأیڭزە حوالە ایدییورز. هم هر حالدە ذوالفقار معجزات، اڭ اوّل اسكی حرف ایلە ماكینە ایلە

و عصای موسی مجموعەسی اڭ اوّل یڭی حرفلە تجربە ایدیلسە، مناسب كورسەڭز یاپارسڭز.

بن بو درت قرداشمزە چوق منّتدارم. رأفتڭ صحّتنی مراق ایدییورم. كوچك ابراهیم بر تصحیحلی ذوالفقاری اینەبولی ایچون ایستەیور. صوڭرە كوندریلەجك. مصطفی اوسمانڭ بزە كوندردیگی عصای موسی یی چوق بگندم. هم چوق دقّتلی و صحّتلی و كوزل. فقط توافقسز. بیڭ ما شٓاء اللّٰه، نظیف حقیقتًا قهرمانجەسنە نورلرە چالیشییور. بیڭ بارك اللّٰه.

قرداشلرم، تا بایرامە قدر استراحتە و سكونتە و صحّتە احتیاجم وار. دعالریڭزلە بڭا یاردیم ایدیڭز. مرحوم حافظ علی طلبەلرندن حسن و احمدڭ فقرەلری لاحقەیە كیرسین. عمومە سلام و دعا

اَلْبَاقٖی هُوَ الْبَاقٖی

قرداشڭز سعید النّورسی

(٢١٨)

بِاسْمِهٖ سُبْحَانَهُ

قرآندن چیقان نە كوزل كوثرسڭ

نە بیوك اثر، نە طاتلی كوثرسڭ

نورسڭ چون، سیلدڭ كائناتڭ سیسنی

ای نور قالدیردڭ منافقلرڭ شیوەسنی

طوپلادڭ اطرافڭدە مؤمن قافلەسنی

درس ویرییورسڭ، ٣٥٠ میلیون مسلمانە سن،

كلمشسڭ بو زماندە عاجزلرە ایمان حاضرلغی

ان شٓاء اللّٰه عاجزلردن سیل دنیا پاسنی

رسالۀ نور دردلرە درمان، هم مرهمسڭ

ای رسالۀ نور، وار سنڭ قاپوڭدە حكمت

طولاشدقجە زمینی اولورسڭ، هم فضلە چوق

حقّڭ رحمتیسڭ، نور كوپروسنی آشارسڭ

حكمتڭلە قصّەدن طلسملری آچارسڭ

نورلرڭ هر سوز و سكینە هر كلمەسی میزان

نورلرڭ هر نكتە و اخطاری برر فرمان

نورلرڭ آچیلمش هر سطرندە برر عالَم

نورلرڭ اوستنە دوكولمش تورلی قوقولر

یا رب، سن قادر قیّومسڭ، بزە دە لطف أیلە

نورلرڭ مكتوبلری، لمعەلری آچیلمش بر كُلدر

اول كُلڭ بلبلی استادیمز حضرتلری

یا ربّی یووەسی اولان جسمنی سن كیزلەیەسڭ

دوكولەجك یاورولری اولان طلبەلری

رسالۀ نور دائرەڭ بیوك، كزنلر بولسون تسلّی

رسالۀ نوری اوقویانلر بولاجق امثالسز حقیقتی

هر برندە قونوشدیرر موجوداتی صانعنە

هپ بر آغیزدن نطقە كلمش دعا ایدرلر آساننە

نورلرە عاشق اولانی نصیب ایتسین مقصودینە

آرزومز نور بولكەسندە خدمت ایتمكدر

قاپوسندە چوقدر خدمتجیلری خدمەلری

هپ یولندە أیلەمكدر ایمان، جان فدادر

قاپوسنە كلمشز بز ایكی بیچارە عاجزلر

ان شٓاء اللّٰه قبول ایدر، ایكی سرسری قولنی اول الٰهی

رسالۀ نور طلبەلرندن مرحوم حافظ علینڭ شاكردلرندن

اَلْیَوْمْ عسكر بولونان حسن و برادری احمد

[٢١٩]

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلا] كچن مبارك لیلۀ براتڭزی و كلەجك رمضان شریفڭزی تبریك ایدرز.

بو سنەكی برات كیجەسنڭ نورجیلر حقّندە چوق بركتلی و كرامتلی اولدیغنە بر امارەسنی حیرتلە كوردك. شویلەكە: بن برات كیجەسندن آز اوّل عصای موسی یی تصحیحیلە مشغول ایكن، بر كوگرجین پنجرەیە كلدی، بڭا باقدی. بن دیدم: "مژدەمی كتیردڭ؟" ایچری یە كیردی. كویا اسكیدن دوست ایدك كبی، هیچ ئوركمدی. عصای موسی اوستنە چیقدی، [حاشیە] اوچ ساعت اوتوردی. اكمك، پرنج ویردم، ییمەدی. تا آقشامە قدر قالدی، صوڭرە كیتدی. تكرار كلدی، برات كیجەسندە تا صباحە قدر یانمدە قالدی. بن یاتاركن باشمە كلدی، اللّٰهە ایصمارلادق نوعندن باشمی اوخشادی، صوڭرە اوچدی، كیتدی. ایكنجی كون بن تأسّف ایدركن یینە كلدی، بر كیجە داها قالدی. دیمك بو مبارك قوش، هم عصای موسی یی، هم براتمزی تبریك ایتمك ایستەدی.

[ثانیًا] اینەبولیدن كلن بر قسم عصای موسی نڭ آیت الكرسی تتمّەسنڭ نكتۀ توافقیەدە (وَاللّٰهُ سَمٖیعٌ عَلٖیمٌ) جملەسی سهوًا نقصان بیراقیلمش. [لَا انْفِصَامَ لَهَا ط وَاللّٰهُ] دن [وَلِیُّ الَّذٖینَ اٰمَنُوا] یە كچمش. تصحیح ایدیلسین. عمومە سلام.

قرداشڭز سعید النّورسی

[٢٢٠]

بِاسْمِهٖ سُبْحَانَهُ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا

عزیز، صدّیق قرداشلرم،

قسطمونی خسروی و سلیمان رشدیسی اولان محمد فیضی و امینڭ، استادلرینڭ قسطمونیدەكی حیاتنڭ بر تاریخچەسنی، حسن ظن ایلە حدّمدن چوق فضلە ثنالرینی تبدیل ایتمەیەرك قبولمڭ سببی شودركە: بوكونلردە آفیونڭ بیوك مأموری، بر چاووشی بڭا اهانتە واسطە یاپوب، كویا توجّە عامّەیی حقّمدە قیرارق، تا بو ولایت، دڭزلی، اسپارطە كبی نورلرە تام صاحب چیقماسین و نورلر پارلاماسین. كرچە بن تحمّل ایتدم، فقط بورانڭ یڭی شاكردلرینڭ تأثّرلرندن متأثّردم. دوشونوركن، محمد فیضینڭ بو صمیمانە و عالمانە، حرمتكارانە مكتوبی، او حریفڭ و او آمرینڭ اهانتلرینی یوزلرینە اوروب هیچە ایندیرەرك، تأثّراتمی تام سیلدی، سوپوردی. بیڭلر درجە او ایكی بدبختدن یوكسك اولان ایكی نورجینڭ بویلە مدح و حرمتلری، اونلرڭ قانونسز جبر و اهانتلرینە عین زماندە تام تامنە توافقی، فیضی و امینڭ صداقتلرینڭ بر كرامتی اولدیغنی قناعت ایتدیگمدر.

س٭ع

رسالۀ نورڭ غایت اهمّیتلی بر شاكردی و چوق زمان سر كاتبی محمد فیضینڭ و سكز سنە سلیمانلر كبی صداقتلە نورلرە و بزە محمد فیضی ایلە برابر خدمت ایدن امینڭ بر فقرەلریدر. اونلرڭ خاطرلری ایچون هیچ ایلیشمدم. استادلری حقّندە چوق زیادە حسن ظنلرینی قیرمدم. عینًا لاحقەیە كچەبیلیر.

(٢٢١)

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

بِعَدَدِ حُرُوفَاتِ رَسَٓائِلِ النُّورِ الْمَقْرُٓوئَةِ وَالْمَكْتُوبَةِ

چوق سوكیلی، چوق قیمتدار، چوق مشفق استادیمز افندیمز حضرتلری،

[اوّلا] لیلۀ معراجڭزی تبریك ایدر، ال و آیاقلریڭزدن أوپر، قصوریمزڭ عفوینی رجا ایدرز.

[ثانیًا] استادیمزڭ ترجمۀ حالنە مراق ایدنلرە دیرزكە: قرآن حكیم اوتوز اوچ آیاتنڭ اعجازكار اشاراتیلە، امام علی رضی اللّٰه عنه جلجلوتیە و ارجوزەسندە كرامتكار دلالاتیلە، غوث اعظم قدّس سرّە بشارتكار بیاناتیلە، استادیمزڭ حقیقی ترجمۀ حالنی و رسالۀ نورڭ حقیقی ماهیّتنی بیان ایتمشلر. استادیمزڭ شخص معنویسنی بیلمك ایستەینلر، رسالۀ نورڭ اشارات قرآنیە و كرامات علویّە و كرامت غوثیە رسالەلرینی، اگر ممكن اولورسە رسالۀ نورڭ سائر اجزالرینی دقّتلە تتبّع ایتمەلری لازمدر.

یالڭز بزم استادیمز حقّندەكی قناعت قطعیەمز شودركە: اسم نور و اسم حكیمە مظهریتلە قرآن حكیمڭ خزینەسندن نائل اولدیغی حقائق و معارفی، یگانە تحدیث نعمت مقصدیلە بشرە اعلان ایدن بو علّامۀ ذوفنون بدیع الزّمان حضرتلری اخلاق محمّدیە علیە الصّلاة والسّلام ایلە تخلّق ایتمش، نفس و هوا برزخلرندن كچمش، مكارم اخلاقڭ اڭ ممتاز و مستثنا بر تمثال مجسّمی اولارق بو عصردە بولونمش. شیمدی یە قدر بتون حیاتندە شایان حیرت بر علوّ همّت و سكینت و عفّت و محویّت ایچندە یاشامش. غنای قلبی، توكّل و قناعتی خارق العادە، معیشت و قیافتی پك سادە و مكارم اخلاقی پك فوق العادە، دنیایە ذرّە قدر میل محبّت ایتمز.

هم اویلە بر طرزدە عزّت علمیەیی حیاتندە محافظە ایتمشكە، اصلا كیمسەیە عرض افتقار ایتمەمك حیاتنڭ مهم بر دستوریدر. دنیا كندیلرینە توجّه ایتمش دە اوندن یوز چویرمش اولان استادیمز، امر معاشدە جناب حقّڭ عنایتیلە عفّت و نزاهتنی دائما محافظە ایدر. صدقە، زكات و هدیەلری آلماز. بز یقینًا بیلییورزكە، قسطمونیدە بولوندقلری زمان اوتوردقلری أوڭ ایجارینی ویرمك ایچون یورغاننی صاتدیلر دە، یینە هیچ بر صورتلە هدیە قبول ایتمدیلر.

هم استادیمز تكلّف و تعظّمدن اصلا خوشلانماز. و طلبەلرینڭ دە تكلّف قیدندن آزادە اولمەلرینی امر ایدر. و بویورورلركە، تكلّف شرعًا و حكمتًا فنادر. چونكە تكلّف سوداسی، انسانی حدّ معروفی تجاوزە سوق ایدر. متكلّف اولانلر

بعضًا خودبینانە بر تظاهر و تفاخر طوری و موقّت و صوغوق بر ریاكار وضعیتی طاقینمقدن قورتولماز. حالبوكە بونلرڭ ایكیسی دە اخلاصی زدەلر.

هم استادیمز غایت متواضع، تفوّق و تمیّز داعیەلرندن، شهرت سودالرندن زیادەسیلە صاقینیرلر. كندیلرینە مخصوص صافی مشربی، او كبی جان صیقاجق شیلردن عالیدر. هركسە هلە اختیارلرە و چوجقلرە و فقرالرە رفق و ملایمتلە، اخوّتكارانە بر معاملۀ خالصانەدە بولونورلر. مبارك یوزلرندە مهابت و بشاشتلە قاریشیق بر نور وقار لمعان ایدر. هیبتلە برابر، آثارِ اُنْسْ و الفت دخی كورونور دائما متبسّم بولونورلر. فقط بعضًا تجلّیاتڭ مقتضاسی اولارق مهابت و جلال نظری او درجە تظاهر ایدركە، آرتق او زمان یانندە بولونوب دە سوز سویلەمك ایستەین آدمڭ عادتا دیلی طوتولییور دە، نە دیمك ایستەدیگی آڭلاشیلمازدی. بو عاجزلر چوق دفعە بو حالی مشاهدە ایتدك.

استادیمزڭ آز سویلەمك عادتیدر. فقط سویلەدیگی وجیز سوزلر هر حالدە دستور حكمت اولارق پك معنیدار، پك شموللی، برر جامع الكلمدرلر. استادیمز نە كیمسەیی ذمّ ایدر و نە دە یانندە كیمسەیی غیبت ایتدیرر. بونلردن اصلا خوشلانماز. قصور و خطالری ستر ایدرلر. هم او قدر حسن ظنّە مالكدرلركە، حتّی كندیسی حقّندە بر ناسزا سوز تبلیغ ایدنە، حاشا بو یالاندر، بو سوزی سویلەدی دیدیگڭ ذات، بویلە سوزی سویلەمز بویورورلر.