[٣٤٧]

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق، ثباتكار، بختیار قرداشم سلیمان رشدی، سنی و قرداشڭ قهرمان برهانی و سنڭ ایكی مبارك، معصوم اولادیڭی و سنڭ خانە خلقڭی، رسالۀ نور نامنە و عموم شاكردلری حسابنە، روح و جانمزلە سزی تبریك ایدییورز. بویلە قدسی و دائمی ثواب قزاندیراجق اخروی بر خدمتە موفّقیتڭزی، اسپارطە و بو مملكت استقبالدە چوق آلقیشلایاجقدر. سزە چوق خیرلی دعالری قزاندیراجق. ان شٓاء اللّٰه، ذوالفقار كبی داها چوق امثالنەدە موفّق اولورسڭز. بو عجیب شرائط ایچندە بو فوق العادە موفّقیت، هم ذوالفقارڭ، هم صداقتڭزڭ بر كرامتیدر. چوق مبارك اولان سنڭ رؤیاڭكە، امر الٰهی ایلە قرآنی حضرت پیغمبرەؐ ویرمەڭ، حضرت جبرائیلڭ وظیفەسنڭ بر جلوەسیدر. اشارتدركە، بو خدمتڭز، هم رضای الٰهی یە، هم رضای پیغمبری یەؐ موافقدر. معجزات قرآنیەیی، معجزات احمدیەؐ واسطەسیلە امّت محمّدیەیەؐ تبلیغ ایتمك معناسیلە سنڭ رؤیاڭ تعبیر ایدیلیر.

ناصل بر كوچك جام پارچەسندە كونشڭ بر تمثالی، ضیاسیلە او الندەكی جامی طوتانلە مناسبتدار اولور، بر نوع مخابرە ایدر. اویلە دە خصوصی بر تجلّی ایلە، رؤیالردە -سلف صالحیندە بو چشیت رؤیالر كورولمش- مقبولیت و رضا علامتیدر. حضرت پیغمبرڭؐ یانندە كوردیگڭ آدم دە، رسالۀ نور و رسالۀ نور

شاكردلرینڭ شخص معنویسیدر. عمومڭزە سلام و خانە خلقڭزە چوق دعا و بالفعل ذوالفقارڭ طبعنە چالیشانلرە بیڭلر بارك اللّٰه و ما شٓاء اللّٰه دیرز.

اَلْبَاقٖی هُوَ الْبَاقٖی قرداشڭز سعید النّورسی

[٣٤٨]

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز استادم، [حاشیە]

بو هفتە ذاتڭزە مخصوص ایكن، ترحّمًا، تلطّفًا بز زواللی و بیچارە شاكردلریڭزە هدیە ایتدیگڭز غریب بر مناظرۀ نفسیەیی آلدق. بزلرە نورلر یولندە اڭ قوّتلی،

اڭ فائدەلی حقیقت درسنی ویرن بو قیمتلی لطفنامەڭز، بزی نورلرە غرق ایتمكلە برابر قابل التیام اولمایان دهشتلی یارەلریمزی یینە دشدی. اضطراب و كدرلریمزی قات قات آرتیردی. آه، ناصل متأثّر اولمایالم، ناصل آه و فغان ایتمەیەلم؟ او عزیز نور استاد، نورلرڭ فتوحاتلر دورەسنی اللّٰهڭ بو ظفر نهائیسنی دنیا كوزیلە سیر ایدییوركن وظیفەسنڭ ختامە ایردیگنی بتون مساعی و تشبّثات معنویەسنڭ میوەلرینڭ سنبللنەرك انكشافدە اولدیغنی مشاهدە ایدرك آخر زماندە در عهدە ایتدیگی وظیفۀ اصلاحی ایفا ایتدیگندن كلن قدسی و الٰهی بر ذوق ایلە، بو حیات فانیەدن قطعیًّا چكیلەرك عالم برزخدەكی میلیونلر سوكیلیلری اولان خاندان نورە التحاق ایتمك ایستەیورلر. و بویلە بر موضوع ایلە بزم یارەلریمزە اڭ شافی مرهمی شیمدیدن سورەرك بر تسلّی قاپوسنی مرحمتلە بزە آچییورلر. و بو وسیلە ایلە دە اڭ قدسی و مسلگمزڭ اساسندن اولان اخلاصی درس ویرییورلر.

اوت استادم، تقدیر و تبریكە لایق علوی و قدسی خدمتلریڭزە بر مكافات اولارق زهرلر ویریلن، عزّت علمیەیی محافظە ایدوب، علمی مدار معیشت اتّخاذ ایتمەدیگڭزدن، زواللی رقیبلر، منفعتپرست، خودپرست رقیبلر طرفندن چوروتولمك ایستەنیلن، رسمًا محافظە وظیفەسنی اوزرینە آلانلر طرفندن دخی اڭ جانیانە اشكنجە و تحقیرلرە معروض قالان بر شخصڭ عالم نورە انتقالی، البتە و البتە ذاتی ایچون اڭ آرزو ایدیلن بر حالتدر.

فقط عزیز استادم، بز سنڭ بو قدر اضطراب و مشقّتلردن، بو قدر جفا و سٓوء قصدلردن، بو قدر اذا و اشكنجەلردن صوڭرە، آزیجق اولسون بو حیات فانیەدە هر جهتدن راحت و سعادتڭی آرزولایورز. و رحمت الٰهیەدن بیڭلر دیللرلە نیاز ایدرك بكلەیورز. نفسڭ آرزوسنە اولمایان، صرف مسافری اولاجغڭ طلبەلریڭڭ خاطری ایچون قبول ایدەجگڭ بو سعادتڭ، سعادت باقیەیە نە ضرری وار.

اوت عزیز استادم، سز فرصت بولدقجە "بنم شخصمە اهمّیت ویرمەییڭز. نورلر سزە كافیدر" بویورویورسڭز. اوت، امرلریڭزە اطاعت ایدییورز. فقط سوزدن آڭلامایان، قید آلتنە كیرمەین لطائفمزە ناصل خبر آڭلاتالم؟ اونلرڭ معنوی كوز یاشلرینی ناصل تسكین ایدەلم؟ اونلرڭ یارەلرینە ناصل مرهم سورەلم؟

اوت استادم، بز سڭا باغلی اولدیغمز قدر و عین علاقە ایلە نورلرە دە باغلی ییز. بز سڭا مفتون اولدیغمز قدر، نورلرڭ دە مفتونی یز. بز سڭا حیران اولدیغمز قدر، نورلرە دە حیرانز. قرآنڭ سمای معنویسندن طلوع ایدن او آفتاب معنوی و شمس حقیقت اولان نورلرڭ محل انعكاسی، قلب شریفڭز دگلمیدر؟ او بحر حقیقت هر نە قدر جنّت قرآندن نبعان ایدییورسە دە، سنڭ او واسع قلب عزیزیڭە دوكولوب اورادە جوش و خروشە كلەرك بر آب كوثر، بر آب حیات حالندە قلم قنالیلە قلبلریمزە آقمییورمی؟ او قرارمش قلبلردن، ظلمت كفری اخراج و او ئولمش قلب و روحلری آب حیاتیلە احیا ایدن نورلر دگل دە نەدر؟

بز نورلری سنڭ مبارك الڭلە بولدق. نوری و نورلری سودیگمز كبی، سنی دە سوەجگز. بوڭا كیمسە بر آد طاقاماز. بر عیب بولاماز. سڭا اڭ آغیر و دینسزجە تعبیرلرلە افترا ایدن و كندیلرینی عالم صانان فیلسوفلر، اهل ضلالتڭ باشنە ایندیردیگڭ اڭ آغیر ضربەلر قارشوسندە بیلە نورلرڭ حقیقتنی انكارە جرئت ایدەبیلدیلرمی؟ نتیجەسندە عصای انكارلرینی قیرارق عصای موسی یە تسلیم اولمدیلرمی؟ نورڭ مؤلّفنڭ و اونڭ قهرمان خادملرینڭ و نورلرڭ یوق ایدیلمك ایستەنیلدیگی بر هنگامدە، عنایت الٰهیەنڭ امدادیلە حفظ و حراستیلە چوروتولەمەین، مغلوب ایدیلەمەین نورلری چوروتمك آرتق كیمڭ حدّینە دوشمش؟ بزی یولدن چویرمك، بزی شبهەلرە دوشورمك، عنایت الٰهیە بزم ایلە اولدقدن صوڭرە هانكی منكرڭ، هانكی ملحدڭ حدّیدر؟ حیاتڭزدە دە، عالم نورە ارتحالڭزدە دە نورلر یولندن دونمەیەجگز. خدمتدە قصور ایتمەیەجگز. تصرّف معنویەڭز سایەسی آلتندە، عمریمز اولدقجە نورلری نشرە دوام ایدەجگز. دائما رسالۀ نوری پیشوامز ایدینوب هر اموریمزدە اقتدا و هر حالمزدە التجا ایدەجگز. سوزیمز یمینمزدر. فقط اللّٰهم سزی باشمزدن چوق اوزون سنەلر اكسیك ایتمەسین. رحمت الٰهیەدن نیازمند اولدیغمز نقصانلریمزی دە تماملایالم.

عزیز استادم، هم بو مناظرۀ نفسیە دییە اسم ویردیگڭ موضوع، سنڭ نفسانی آرزولرڭ سببیلە دگل، بز بیچارەلرە درس ویرمك ایچون، بزم اڭ قورقونچ و درین یارەلریمزە مرهم سورمك ایچون قلبدە طلوع ایتمشدر. زیراكە، حضرت قرآنڭ

مشرق معنویسندن اشراق ایدن حقیقت كونشنڭ معكسی اولان بر قلبە ظلمت دخول ایدەمز. نورلرڭ منبع فیضی اولان بر بحر بی پایانە بولانیق صو آقاماز.

عزیز استادم، تكلّف و خودفروشلق، تصنّع و ریا، سنی چوروتمك ایستەین بیچارە رقیبلریڭڭ حال و شانیدر. اگر بو دعوادە صادق اولماسەیدم و ادّعامدە اصابت بولونماسەیدی، نورلردەكی قطعی تأثیر اولورمی ایدی؟ بو قدر حق و حقیقت یولجیسی حیاتنی وقف ایدرك، هر آن لزوم كورولورسە جاننی دە فدایە سوز ویرەرك، او نورلرە صاریلیرلرمی ایدی؟ بو قدر كستاخ و ظالم دوشمانلر قارشوسندە خدمت نوریەدە ثبات ایدرلرمی ایدی؟ خیر! یا نیچون هر فلاكتی كوز اوڭندە طوتارق، باشلرینی قولتوق آلتنە آلارق، خدمتدە قصور ایتمەمگە چالیشییورلر؟ بو یولە بونلری سوق ایدن سائق نە؟ اوت، او سائق اوكە: بتون طلبەلرڭ، نورلردە اڭ علوی، اڭ قدسی حقیقتی ایمان و ایقانڭ یینە نورلرلە ویردیگی نور فراستلە كورویورلر. سنەلرجە طریقت برزخلرندە آلامادقلری فیض و نوری، ذوق و سروری رسالۀ نوردن آلییورلر. حضرت فخر عالم صلّی اللّٰە علیە وسلّم افندیمزدن وراثت نبوّت طریقیلە كلن نور نبوّتی رسالۀ نوردن آلدقلری بر نور ایمانلە، سنڭ ناصیۀ قدسیەڭدە و طولاییسیلە دە رسالۀ نوردە كورویورلر. ایشتە نورجیلرڭ نورلردن، نور خدمتندن بتون ظلملرە رغمًا آیریلامامەلرینڭ یگانە سائقی بودر.

عزیز استادیمزڭ اڭ اوفاق امرلرینە اطاعت ایتمكلگمز شرط ایكن، بزلری رضاڭز خلافندە بو وادیدە طولاشدیران بر سائق دە، یینە نورلرڭ قدسی قامچیلامسیدر. چونكە سزڭ حقیقت اخلاصی درس ویرن بو متواضعانە مكتوبلریڭزی اوقویان انصافسز كیمسەلر سطحی كوروش، دوشونجەلریلە نورلری پییاسۀ عالمدن قالدیرمغە چالیشاجقلر. ایشتە بو احمقانە فكر صاحبلری بوكوندن بزە چوروتدیرولویور. رضاڭز خلافنە حركتی نورلر خدمتندە اڭ بیوك جنایت عد ایدن بزلر، بو یولدە تحمّل ایدەمەیوب رضاڭز خلافنە مؤثّر بر قوّتڭ تأثیر و تحریكیلە حركتە مجبور اولویورز. ایشتە بونڭ ایچون بزلری عفو ایت استادم.

عزیز استادم، روح و قلبنی نورلرە تسلیم و حیاتنی خدمت نوریۀ قدسیەیە وقف ایدن و نورلر یولندە یگانە صاحبنی، سیّدینی نورلر قبول ایدن و نورلری دین مبین اسلامدە بر امام ثانی و بر نمونۀ اقتدا طانییان، عین روح، عین حسّیاتی طاشییان شاكردلریڭی قصورلرندن طولایی عفو بویور. دائرۀ نوریەدن، دائرۀ تدریسڭدن اوزاقلاشدیرما. خطالرندن طولایی كلمەسی چوق محتمل شفقت طوقاتلرینە شفیع اولوب مرحمتًا سپر اول. رحمت الٰهیەدن دە بو مبارك كیجەدە نیاز ایدرزكە، كرك نورلرڭ توسّع و انتشاری، كرك امّت محمّد و نورجیلرڭ سعادت باقیەلری و اعدام ابدیدن قورتولمەلری و خصوصًا نورجی قرداشلریمزڭ اخلاص تامّە موفّق اولمەلری ایچون علی التوالی دوام ایدن كلّیت كسب ایتمش دعالریڭزی اسم اعظم حقّی ایچون، نور قرآن حرمتی ایچون، حبیب رحمان و اونڭ

طوغدیغی بو مبارك كیجەنڭ شرفی ایچون قبول بویورسون. آمین آمین آمین.

بالوسیلە مبارك اللریڭزدن، مبارك آیاقلریڭزدن اوپەرك قصورلریمڭ عفوینی تكرارًا نیاز و قرداشلریمڭ سلام و حرمتلرینی عرض ایدرم، سوكیلی افندم.

اَلْبَاقٖی هُوَ الْبَاقٖی

نورلر خدمتندە، نورلر یولندە چوق قصورلی شاكردیڭز

چوق حقیر و ذلیل نیاز مندیڭز مصطفی

لاحقەیە. [٣٤٩]

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز و قیمتلی، مشفق، صدّیق، چوق سوكیلی استادیمزە،

حكیم ذوالجمال، رحیم ذوالكمال، مقیم ذوالجلال والاكرام حضرتلرینە حسابسز و تعدادسز حمد و شكر اولسونكە، بزم كبی ضلالت چوقورینە همن همن دوشمش و طائفۀ انسانیەدن اوزاقلاشمش كبی اولان بیچارەلرە "قرداش" و "طلبە" كلمەسیلە خطاب ایدییورسڭز.

١٣٥٠ سنەدنبری هیچ مثلی كورولمەین و اهل حقّی حیرتە دوشوروب تیترتن بو قراڭلقلی، ظلماتلی عصر فسادیدە و مدنیت آوروپائیە و طبیعیّونڭ سنەلردنبری فرصت بكلركن، عصر مذكوردن استفادە ایدرك، بلدۀ اسلامیەیی استیلا ایدوب

بعضیسنی اوهاملە و بعضیسنی ذوقنی اوخشایان احتشام و آچیقلغیلە و كندیلرینە بند ایتدكلریلە دە قالمایارق، بشیكدەكی چوجقدن تا اڭ اختیار، چوجق حالنە كلن زواللیلری بیلە آشیلایوب سرخوش ایتدكلری بر صیرەدە، قرآن معجز البیانڭ اجزاخانۀ قدسیسندن چیقان شفای نوریە فابریقەسنڭ تزگاهندە بر خدمتجی اولارق بولونوب، سفیان قومیتەسنڭ او تعفّن ایتمش آشیسندن قورتولدیغمز بزم ایچون نە بیوك سعادت، نە یوكسك عزّت، نە طاتلی لذّت، نە اوستون بر نعمت، نە عظیم فخر، نە اعلی سرور، نە عالی بر شرف اولدیغندن، او مبارك فابریقۀ نوریەنڭ مدیرینە مفتون و تزگاهندە بر خدمتجی اولدیغمزە دە ممنون و مدیونز. چونكە عصرلردنبری مثلی كورولمەین بو كوزل اثر، شیمدی یە قدر نوش ایدیلمەین بو مبارك كوثرە جملە نورجی قرداشلریمزلە، دڭزلی قهرمانی حسن فیضینڭ وارثی صفتیلە، بالخاصّە جمعیت مباركە مال و جانمزی فدایە حاضرز.

بیوك استادیمز، او بیوك رهبر و شفیعمز اولان رسول اكرم صلّی اللّٰە علیە وسلّم افندیمزڭ [مَنْ تَمَسَّكَ بِسُنَّتٖی عِنْدَ فَسَادِ اُمَّتٖی فَلَهُٓ اَجْرُ مِائَةِ شَهٖیدٍ] فرمانندە بویوردیغی كبی، بویلە بر زماندە تمسّك اوغرندە بویلە بر شهادتلك هر انسانە میسّر اولابیلیرمی؟ استادیمز، بز بیچارەلر، خیر، خیر، هر انسانە میسّر دگلدر دییورز. چونكە بو مرتبۀ عالیەیی قزانمق، كورونوشدە او قدر تهلكەلی و او قدر قراڭلقلیكە، هركس بونی ادراكدن عاجزدر. لایقیلە یاپیشان، بو ثوابی آلاجغی

آشكار. فقط بو اوغوردە دونمەمك ایچون دە فدای جان ایتمك نور علی نور دگلمی استادیمز؟ زمان جاهلیتدە، شفیعمز، سیدیمز رسول اكرم افندیمزؐ حضرتلرینڭ دین اسلامی سرعتلە میدانە كتیرمك اوزرە ذوالفقاری امام علی كرم اللّٰە وجهە حضرتلرینڭ النە ویرەرك، او مبارك ذات دخی ایمانە كلمەینلری صالدیردیغندە، صحیحًا روایت ایدیلدیگی كبی، شیمدی دە عین اسمی طاشییان و علم كذركاهی اولان رسالۀ نورڭ كزیدۀ خلاصەسی ذوالفقار اسمنە مطابقتی ایچون بر یازیلیشندە بش یوز رسالۀ ذوالفقار نوریە یازدیغی دە بر خارقە دگلمیدر؟ بو خارقەكە، او زماندە معنًا یتمش آرشین اوزایان مبارك ذوالفقارڭ شیمدی اڭ صوڭ ذوالفقار اولان رسالۀ نورڭ زبدۀ خلاصەسی بو مبارك ایسە، بش یوز آرشین و حتّی بتون دنیایی استیلا ایتدیگنی كورویورز. بو حقیقت دگلمیدر؟ استادیمز، الحمد للّٰه و بارك اللّٰه دیرز

اَلْبَاقٖی هُوَ الْبَاقٖی

نور شاكردلری نامنە احمدلر

[٣٥٠]

عزیز، صدّیق قرداشلرم،

اسكیشهر و استانبول ایچون بڭا یگرمی دانە اونر بانقنوط فیئٓاتندە كوندریڭز. بن بعض ذاتلرە هدیە ویرمگە مجبور اولدیغمدن، اون بش فیئٓاتنی تدارك ایدەمم.

س٭ع

[٣٥١]

١

صویون غفلت لباسنی

ییقا قلبڭ كیرلی پاسنی

بولایم دیرسڭ حق رضاسنی

اوقو صدق ایلە رسالۀ نوری

٢

بو سوزلر نورە غفراندر

بو سوزلر قلبە ایماندر

بو سوزلر دردە درماندر

اوقو صدق ایلە رسالۀ نوری

٣

بلالرە پردە اولور

قامو دردە شفا اولور

شفاعت ایدر محشردە

اوقو صدق ایلە رسالۀ نوری

٤

آرارسڭ دردیڭە درمان

اومارسڭ تاڭریدن ایمان

اولورسڭ محشردە سلطان

اوقو صدق ایلە رسالۀ نوری

٥

جنّت سڭا رزّاق اولا

بینەجگڭ براق اولا

ایكی جهاندە یوزڭ آق اولا

اوقو صدق ایلە رسالۀ نوری،

٦

رسالۀ نوری یازان قولە

دخی هم اوقویان دیلە

قبرینە نورلر اینە

اوقو صدق ایلە رسالۀ نوری

٧

بو منظومە بورادە اولدی تمام

استادیمە اولسون حدسز سلام

یا رب، استادیمزی سلامتلرە چیقار یا رب سن

اَلْبَاقٖی هُوَ الْبَاقٖی

عاجز، فقیر طلبەڭز

مارانغوز احمد

[٣٥٢]

بو ایكنجی حسن فیضی، احمد فؤادڭ بو صمیمی مكتوبی، كرچە اهمّیتسز شخصیتمە فضلە اهمّیت، فقط اونڭ فوق العادە كندینی فدا ایتمك آرزوسی لاحقەیە كیرمگە حق قزاندی.

شفقتلی استادیمز، چوق مرحمتلی افندیمز،

نور خدمتلرندە چوق كریدە قالان بر تنبل و مسكین و چوق عاجز، لیاقتسز شاكردلریڭزی ایلری صفدەكی قهرمان قرداشلریمزە یتیشدیرەرك، مجاهدۀ معنویەیە قاتیلابیلمەمز ایچون اسپارطە قهرمانلر هیئاتنڭ تنسیب و تكلیفی و سز استادیمز افندیمزڭ دە تصویبی ایلە، بیوك و شانلی شهید مرحوم حافظ علی، كبی نورانیتی، مباركیتی و قدسیتی هم بیوك نور عائلەسنڭ تاریخچەسنە، هم اسلام بیوكلری تاریخنە آلتون سطرلرلە یازیلمغە الیق بر ذاتڭ نورلی اللریلە یازدیغی رسالۀ نور كلیّاتنڭ و بتون نور خزینەلرینڭ بز بیچارەلرە تبرّعی قلبلریمزە نامتناهی بر فرح و سروری بخش ایتمشدر. حدسز منّتدارلقلریمزی، قلبلریمزدن طاشان شكران حسلریمزی حضور فاضلانەلریڭزە عرض ایدرك مبارك ال و آیاقلریڭزدن تعظیملە اوپرز. كریم و رحیم اولان خالقمز بزلردەكی بو فرح و سرورڭ بیڭلر قات فضلەسنی چوق شفقتلی و مرحمتلی قلب مباركڭزە احسان بویورسون. آمین. اوندەكی دائمی صیقینتیلری دائمی مسرّتلرە تبدیل و تحویل أیلەسین. آمین آمین آمین.

عزیز استادیمز افندیمز، صدّیق سلیمان و مبارك صبرینڭ زیارتڭزە كلیشلرندن بحث ایدركن، مادّی و معنوی قیشڭ ویردیگی الیم صیقینتیلری مناسبتیلە دنیادن مفارقت و بیوك نور عائلەسندن افتراق احتمالنە اشارتلە، بتون عائلەڭز منسوبلرینڭ قلبندە قییلانمش و قابوقلانمش بر یارەیی تكرار دشییور و قاناتییورسڭز. آه، بو اویلە بر یارە، اویلە بر اضطرابكە، بر یانار طاغ كبی زمان زمان فوران ایدرك قیغیلجیملری دوكولن، قلبلری داغلایور.

اوت، سزڭ مادّی و معنوی وارلغڭزدن، صحابت و حمایت قناتلریڭز آلتندە آیریلمش اولمەنڭ كوڭللریمزە دوشورەجگی فراق آتشنڭ شدّتنی تصویر ایدیجی كلمەلر بولامییورز. بوڭا تحمّل و صبریمز اولمدیغندن بدلڭزە اوچنجی بر قربان اولارق بو مسكین شاكردیڭزی فدا ایتمەڭزی، آیاقلریڭزی اوپەرك یالواریرم.

اوت، ذات فاضلانەلریڭزڭ شو فنا عالمندە بر ساعت فضلە قالمەڭز، عالم اسلام ایچون و بالخاصّە عزیز ملّتمز و مملكتمز ایچون حدسز بر رحمت و بركت اولدیغی قدر، بورادن بر ساعت اوڭجە مفارقتڭز دە تلافیسی امكانسز بیوك بر زیان و بر ضیاعدر. بو ضیاعی بر مدّت داها كجیكدیرمك بدلنە بر قربان و ایكنجی بر حسن فیضی اولارق اونڭ جانبنە بو حقیر شاكردیڭزڭ كوندریلمەسندە هیچ بر ضرر كورولمز.

یا الٰە العالمین دنیادن مفارقت احتمالندن بحث ایدن استادیمز افندیمزڭ مكتوبلرینی اوقودیغم آندە قلبە طوغان بر خالصانە دیلگی دركاە الوهیتڭە عرض ایدییورم. حضرت قرآندن فیضان أیلەین نور علم الٰهیڭی، رسالۀ نور و اونڭ مؤلّفی لسانیلە قلوب مؤمنینە آقان مجراسنی كسمە. ایمانە و قرآنە چوق شموللی خدمت ایدن او مبارك لسانی، داها اوزون مدّت صوصدیرما. او نورلی قلبی، داها چوق ییللر ایشلتمك و یاشاتمق عوضڭە لازمسە، بو مسكین و احقر الحقیر قولڭی فدیە اولارق قبول ایت. آمین. آمین. آمین.

یا ارحم الرّاحمین، آخر زماندە سوكیلی حبیبڭڭؐ شرفنی احیا یولندە فانی و جسمانی حیاتنی فدا ایدن استادیمز سعید النّورسی حضرتلرینی بو فنا عالمندە احیا أیلەكە، او مبارك وجود، یر یوزندەكی زمرۀ موحّدین ایچون باعث رحمت و بادئ مغفرتدر. سدرۀ عرش معلّا حرمتنە بو عاجزانە دعالریمزی مستجاب أیلە، یا رب! آمین آمین آمین.

بِحُرْمَةِ سَیِّدِ الْمُرْسَلٖینَ وَالْحَمْدُ لِلّٰهِ رَبِّ الْعَالَمٖینَ

حرمت و تعظیملە ال و آیاقلریڭزدن تكرار اوپرم استادیمز افندیمز.

اَلْبَاقٖی هُوَ الْبَاقٖی

افلانی ناحیەسی نورجیلری نامنە

چوق قصورلی شاكردیڭز احمد فؤاد