بتون قرداشلریمز حرمتلە تكرار تكرار ال و آیاقلریڭزدن اشتیاقلە أوپر، سعادتلر ایچندە بركتلی عمر و عافیتلریڭزی جناب ارحم الرّاحمیندن نیاز أیلرز.

اَلْبَاقٖی هُوَ الْبَاقٖی

التفاتلریڭزە حق قازانامایان، خدمتدە قصورلی دعالریڭزە پك محتاج شاكردیڭز احمد فؤاد

[لاحقەیە كیرسین. سز تعدیل و اقتصار ایدرسڭز.]

[٤٦٠]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

چوق مشفق، چوق سوكیلی استادم افندم حضرتلری،

[اوّلًا] مبارك ال و آیاقلریڭزدن تعظیم و احتراملە أوپر، دواملی قصورلریمڭ عفوینی جناح شفقتڭزە التجا ایدرك یالوارییورم.

[ثانیًا] عزیز استادیمز، بو بایرام بز عاجز زغفرانبولیلی قرداشلر، مبارك اینەبولیلی قرداشلریمزڭ هدیە ایتدكلری عصای موسی لری جلدلەمكلە مشغول اولارق نور عائلەسنڭ و او مبارك عائلەنڭ شخص معنویسنڭ قدسی ممثّلی عزیز استادیمزڭ حضور معنویلرندە قیمتلی، بركتلی، نورلی، حضورلی بایرام یاپارق رابطۀ محبّت و رابطۀ معنویەلریمزی تقویە أیلەدك. بایرامڭ برنجی كونی، جسدم

یول اوزرندە، روحم علوی حضورلریڭزدە او كعبۀ معنویەیی طواف أیلركن، نورلرلە و ذات فضیلتمئابڭزلە علاقەلی حیواناتدن مبارك هدهد قوشنڭ یولم اوزرینە قونارق، ایكی اوچ دقیقە قدر رفاقت ایدوب اون دفعەدن فضلە قالقوب، اوتوروب، عادتا بر مژدە ویرمك ایستر كبی سلاملاشییوردی. خیردر دیدم.

اللّٰهە حدسز حمد و ثنا و شكر اولسونكە، قرداشلریمزدن عثمان و عزّت افندیلرە نورڭ سر كاتبی مبارك فیضی و صادق بگ و آرقداشلرینی زیارتی نصیب و بز خدمتلە مشغول اولانلرە دە بر اجرت عاجلە و بر اكرام و عنایت ربّانیە اولارق اینەبولیلی مباركلردن مشرب ابراهیمیەدە سرفراز كوچك ابراهیم قرداشمزلە، اسمی مسمّاسنە اویغون صالح افندی قرداشلریمزی و بر قسم افلانیلی قرداشلری كوندرەرك هم هدهدڭ خبر ویرمك ایستەدیگی مژدەیی ساحۀ ظهورە چیقارمش، هم دە بز عاجزلری نور و سرورە غرق بویورمشدر. بو مبارك قرداشلریمزڭ حضورلرندە بولوندقجە، كندیمزی عزیز استادیمزڭ حضورندە كبی صایمش و عزیز استادیمزڭ و مبارك نورجی قرداشلریمزڭ ذكر جمیلنی بر ورد زبان كبی صحبتمزدە اساس طوتارق، بو مبارك كونلردە او دائرۀ معنویەنڭ ایچندە بولونمەیە موفّق اولدق. (هٰذَا مِنْ فَضْلِ رَبّٖی)

عزیز استادم، بو فقیری سلام و حرمتلرینڭ ابلاغنە شفاهًا و تحریرًا مأمور ایدن حدسز نورجی و نور محبلرندن، باشدە عزیز قرداشم ابراهیم، صالح، حفظی

و مخدوملری و عموم زغفرانبولی و قرەبوك نورجیلری، طاطایلی حافظ حسن و آرقداشلری، افلانیلی فؤاد افندی و طلبەلری والحاصل قسطمونی، اینەبولی، طاطای، آراچ، افلانی، قرەبوك نورجیلری، برر برر تعظیم و احتراملە مبارك خاك پایڭزدن اوپرلر. سلام و دعا ایدرلر. و بزلرە وكالتًا خادملك شرفنە نائل اولان مبارك جیلان و آرقداشلرینە و اورادەكی عموم نورجی قرداشلرە دە خاصّةً سلام و دعا و منّتدارلقلریمزی عرض ایدر، اللرندن اوپرز.

[ثالثًا] عزیز استادیمز، شو حرمتنامەمزی تقدیم وسیلەسیلە ذات فضیلتمئابڭزی نورلر شخص معنویسنڭ اڭ عزیز، اڭ قدسی، اڭ بیوك ممثّلی صفتیلە تبریك ایتمەیی بر بورچ بیلییورز. ویریلن اخبارات غیبیەلر، بیوك دائرەلردە ظهور ایدن فتوحات نوریە ایلە عینًا چیقدیغی كبی، اڭ اهمّیتلی اولان كوچك دائرەدە دە بارز بر شكلدە كورونویور. ایشتە قهرمان اوردو، علامت كفر اولان شاپقەیی باشندن چیقاروب آتمەیە غیرت ایتمەیە باشلایالی، سلسلە حالندە فتوحاتلر ظهورە باشلادی. بوكون كوردیگم یڭی تداولە چیقاریلان بر یوز غروشلق پارەدە عادت منحوس و اونلرجە اهمّیتلی اولان رسم قویمغە موفّق اولامامشلر. بونی بر علامت قطعیە اولارق قبول ایتدمكە، سفیانڭ پرنسیبلری دە كندی كبی ئولویور. سنەلردر یانان جهنّمی سونویور، دور آرتق دونویور. ان شٓاء اللّٰه أوڭمزدەكی بایراملر بزلرە داها چوق خیرلرلە و سعادتلرلە یوكلی كلەجك.

سوكیلی استادم، سزلری چوق مشغول ایتدم. عفویڭزی بو لیاقتسز عاجزی مكتوب یازمغە مأمور ایدن قرداشلریمی شفیع طوتارق یالوارییورم. باقی اللّٰهم سز سوكیلی استادیمزی، سماوات و زمین ید بیضای اسلامە تسلیم اولمادقجە باشمزدن اكسیك ایتمەسین و وجودیڭزە صحّت و عافیت احسان بویورسون. و ابدًا سزدن و نورجیلردن راضی اولسون. آمین آمین آمین. بِحُرْمَةِ سَیِّدَ المْرُسَلٖینَ دعاسیلە ختم كلام أیلر، مبارك خاك پایڭزدن تعظیم و احتراملە اوپرم افندم. [حاشیە]

اَلْبَاقٖی هُوَ الْبَاقٖی

قسطمونی، اینەبولی، افلانی، طاطای، آراچ، زغفرانبولی نورجیلری نامنە اڭ عاصی، اڭ حقیر، اڭ لیاقتسز خدمتكاریڭز، نیاز مندیڭز مصطفی

(٤٦١)

(فَیَامُنْشِدًا نَظْمٖی) فقرەسندە (نَظْمٖی) كلمەسی مقام ابجدیسی بیڭ اولوب (رِسَالَةُ النُّورِ ایكی فرقلە [حاشیە] رَسَٓائِلُ كِتَابِ النُّورِ) ڭ (ایكی مدّە صاییلمازسە و شدّە دە لام صاییلسە) مقام ابجدیسی یینە بیڭدر. دیمك (فَیَامُنْشِدًا نَظْمٖی فَقُلْهُ وَلَا تَخَفْ) فقرەسنڭ مأٓل غیبیسی شودركە: (یَا مُؤَلِّفَ رِسَالَةِ النُّورِ رِسَالَةِ النُّورِ جَاهِدْ بِهَا فَقُلْ وَلَا تَخَفْ) الٰی آخرە..

سوكیلی استادیمز افندیمز، بو دفعەكی تصحیحی امر بویورولان كرامت غوثیەنڭ بو فقرەسنی بویلەجە تصحیح ایدوب افندیمزە عرض ایدییورز. لطفًا نظر بویورولدقدن صوڭرە، بو ورق پارەنڭ اعادەسنی استرحام أیلرز افندیمز حضرتلری.

قصورلی طلبەڭز خسرو

عزیز قرداشلرم، مادام كرامت غوثیەنڭ چوغی امضالریڭز ایلە تصدیق ایدیلمش. البتە سز كرامت غوثیەدە ایستەدیگڭز تعدیلاتی یاپارسڭز، قیصالتابیلیرسڭز، اهمّیتسز تحلیلاتی قالدیرابیلیرسڭز. هم سكّۀ غیبیەدە، هم معنوی تاریخچۀ حیاتدە كە [ صادق و فیضی چالیشییورلر] نورڭ مسلگنە و عزّتنە یاقیشمایان جملەلری ویا كچمش زمانە مخصوص احتیاطكارانە و مسامحەكارانە كلمەلری ویا مدار اعتراض اولاجق اولان ضعیف اشارتلری طی ایدوب قالدیریرسڭز. و صادق بگە دە خبر كوندریرسڭز.

قرداشلرم! مراق ایتمەییڭز و نورڭ فوق العادە پردە آلتندەكی فتوحاتنە قناعت ایدیڭز. شیمدی یە قدر هیچ بر اثر، بویلە آغیر شرائط آلتندە بو درجە تأثیرلی انتشارینی تاریخ كوسترمییور. هم تام سربستیت ویریلمەمەسنڭ سببی و حكمتی، نورلرڭ فوق العادە قوّتندن قورقویورلر. بلكە صارصینتی ویرەجك دییە، تام تقدیر و قبول ایتمك ایلە برابر، شیمدیلك رسمًا انتشارندن تلاش ایتدكلرینی، دیانت رئیسی بیوك رئیسلە كوروشمەسندن خبر آلینمش. اسكیسی كبی هجوم یوق، بلكە مصالحە ایستەیورلر. فقط نورلر لهندە قوّتلی جریانلر، ان شٓاء اللّٰه او تلاشی اشتیاقلە رسمًا نشرینە چویرەجك. هم چوق انانیتلیلر، اثرلرینی ترویج ایتمك ایچون، نورلرڭ میدانە چیقمەلرینە قیصقانمق طماریلە طرفدار اولمایورلر. مراق ایتمەییڭز، نور غلبە ایدەجك. عمومە سلام

اَلْبَاقٖی هُوَ الْبَاقٖی

قرداشڭز سعید النّورسی

[٤٦٢]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلًا] سراج النّورڭ بری تمام، بری دە بقیەسنی -ایكی پارچە- آلدق. یاڭلیشلری پك آز. خطا صوابڭ- كوچك جدولنی لفًّا كوندرییورز.

[ثانیًا] مادام اسپارطە، معنوی بر مدرسة الزّهرادر و مادام او مبارك درسخانەدەكی حكومتی كە - شیمدی یە قدر ممكن اولدیغی قدر مساعدەكارانە طاورانییور- و باشدە امنیت مدیری اولارق تقدیركارانە رسالۀ نورە باقییورلر، بز اورادەكی حكومتە قارشو دوست نظریلە باقییورز. نە یاپارلرسە كوجنمیەجگز. هم شیمدی یە قدر اونلرڭ بزە قارشو آز تضییقلری نتیجەسندە اهمّیتلی خیرلر اولمش. شیمدی بر مصلحت ایچون بتون بتون سربست اولارق هر طرفە نشر ایتمك، بلكە (سِرًّاتَنَوَّرَتْ) سرّینە منافی اولدیغندن، بر درجە احتیاط توصیەلرندە بر خیر وار.

[ثالثًا] طاطایلی اهمّیتلی معلّملردن و قیمتلی نور ناشرلرندن حافظ حسنڭ و نورجی ایكی مبارك مخدوملرینڭ، دوقتور حقّی و حسنی و آراچلی طاهرڭ و طاطایدەكی فؤاد كبی قیمتلی قرداشلریمزڭ بایرام تبریكلرینە مقابل، روح و جانمزلە هم كچمش بایراملرینی، هم نور خدمتندە ثباتكارانە موفّقیتلرینی تبریك ایدییورز. و مكتوبنی لاحقەیە كچمك ایچون لفًّا كوندرییورز.

[رابعًا] نور قوماندانلرندن رأفت قرداشمز، كندی سیستمندە، غایت اهمّیتلی عبد الاحد نامندە بر بیوك خواجەیی، رسالۀ نورە تام باغلی بر قرداشی استانبولدە بولمش. جناب حق ایكیسنی دە دائما موفّق أیلەسین. آمین.

[خامسًا] بر مقداردر، هیچ كورمدیگم بر طرزدە پك شدّتلی بر علاقە ایلە، چوقدن كورمدكلری پدر، والدەلرینە حرارتلی بر اشتیاق ایلە اللرینە

صاریلمەلری كبی، ایكی یاشندن اون یاشنە قدر معصوم چوجقلر، فایطونلە كزدیگم وقت بنی كورنجە، عینًا اویلە اوزاقدن قوشوب بنم اللریمە صاریلدقلرینڭ نە حكمتی وار دییە حیرت ایدییوردم. بردن اخطار ایدیلدیكە: بو كوچوجك معصوملر طائفەسی، بر حسّ قبل الوقوع ایلە ایلریدە رسالۀ نورلە سعادتی بولاجقلرینی و تهلكۀ معنویەدن قورتولاجقلرینی، بلكە دە ایچندە چوقلری شاكرد اولاجقلرینی و بورانڭ مادّی-معنوی هواسنە امتزاج ایدەمدیگم ایچون منفیلرە ویریلن سربستیت مناسبتیلە بورادن كیتمەمكلگم ایچون لاقید اولان بیوكلرڭ بدلنە، "بزلر نور دائرەسندەیز، بزی بیراقما، كیتمە" كبی بر معنا وار، حسّ ایتدم.

اَلْبَاقٖی هُوَ الْبَاقٖی

قرداشڭز سعید النّورسی

عموم قرداشلریمە بیڭلر سلام و دعا ایدن اهمّیتلی معلّملردن حافظ حسنڭ بر پارچە مكتوبیدر. لاحقەیە كیرسین.

(٤٦٣)

[بِاسْمِهٖ سُبْحَانَهُ]

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ دَٓائِمًا اَبَدًا

چوق محترم، فضیلتلی استادیمز افندیمز حضرتلری،

ای حضرت استاد! جناب حقّڭ لطف و كرمیلە بز ضعیف و بیچارەلرە هدیە و امانت بویوردیغڭز نورلر فانی وجودیمزڭ داخل و خارجنی تنویر ایدرك ابدیّتە

قوّتلی بر الكتریك نوری بخش ایتمكلە برابر، نورلر چرچوەسی داخلندە بولونان بتون نورلی قرداشلری اویلە بربریمزە باغلادیكە، هیچ بر انسانی قوّت و تأثیر بو رابطەیی كسوب ازالە ایدەمییور. چونكە [اِنَّمَا الْمُؤْمِنُونَ اِخْوَةٌ] آیت جلیلەسنڭ سرّی اولان تام قرداشلق شرفنی، آنجق رسالۀ نور تأمین ایتمشدر. اویلە قرداشلقكە، بوكون و بو زماندە بر خانەدە یاشایان آنا بابا بر ایكی قرداشڭ بری برینە تأمین ایدەمدیگی محبّت و حرمت و تساندی نورلر تأمین ایتمشدر. بالذّات فقیر، ناچیز طلبەڭزڭ بو دفعەكی سیاحتمدە بو صمیمیتە شاهد اولدم.

ای اونوتولماز و اونوتمق امكانی اولمایان حضرت استاد! ناصلكە شو فانی دنیانڭ زمین و سماسندەكی حدسز مصنوعلر، جناب صانع ذوالكرمڭ طرّۀ الٰهیەسنی محافظە ایدرك بز ذی شعور قوللرینە ناصل مشاهدە ایتدیرییورلرسە، بوكون كوگسلردە طوتولان بونجە رسالۀ نور اجزالرینڭ هر بر كلمە و جملە و سطرلری دە حقیقت ایمانیە و سعادت ابدیەیی مشاهدە ایتدیرییورلر. ان شٓاء اللّٰه، سز داها چوق صحّتلە یاشارسڭز. نهایت بو فانیدن ابدە كوچ ایتدكدن صوڭرە بیلە، نورلرڭ یازیلری سیلینوب غائب اولنجەیە قدر، سز استادیمزی بتون مؤمنلرە دعالرندە مشاهدە ایتدیرەجكدر.

ان شٓاء اللّٰه، جناب حقّڭ لطف و كرمندن دیلرزكە، نورلر واسطەسیلە باغلادیغڭز بز كناهكار، ضعیف طلبە و قرداشلریڭزی، حشر زمانمزدە دە جناب ربّ كریممزڭ اذن الٰهیسیلە بر اوردو و بر تومن حالندە، لواء الحمد اسمندەكی مبارك صانجاق شریفی

آلتندە، پیغمبریمز صلّی اللّٰە علیە وسلّم افندیمز حضرتلرینە تقدیم و تسلیم ایدەجگڭزی جناب حقّڭ رحمتندن محقّق امید ایدییورز. و بو تسلسل ایدن نعمتلری احسان ایدن خالقمزە، نامتناهی، لَا یُعَدْ وَلَا یُحْصٰی حمد ایدرز. (هٰذَا مِنْ فَضْلِ رَبّٖی) و سز استادیمزە دە ابدیًا منّتدار و عرض شكران أیلرز. و بو خدمتڭزدن جناب حق سزدن ابدیًا راضی اولسون دعا و فریادیلە ختم كلام أیلرز افندم حضرتلری. اوغوللرم دوقتور حقّی و حسنی و بتون افراد عائلەم و طاطایلی نور قرداشلریمزڭ جملەسی، اشتیاقلە مبارك اللریڭزدن اوپەرك، خیرلی دعالریڭزی رجا ایدرلر. و آیریجە طاطایە كلن آراچلی واعظ طاهر افندی حرمتلە اللریڭزدن أوپر. اورادەكی قرداشلریمزە، باشدە جیلان افندی اولدیغی حالدە جملەسنە سلام ایدر، ایّام و لیلۀ مباركەلرینی تبریك ایدرز. عَلٰی قَدَرِ الْاِسْتِطَاعَە المزدە موجود نور اجزالرندن اشتیاقلیلرە كوندرمگە كَمَا فِی السَّابِقْ دوام ایدییورم.

فقیر، عاجز، ناچیز، جاهل طلبەڭز طاطایلی معلّم حافظ حسن

(٤٦٤)

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

عزیز، صدّیق قرداشلرم،

[اوّلًا] مدرسۀ نوریەنڭ قهرمانلرینڭ سكّۀ غیبیەدن اللی سكز صحیفەیی

غایت كوزل و شیرین خسروڭ خطّی كبی یازمەلرینی تبریك و موفّقیتلرینە روح و جانمزلە دعا ایدییورز.

[ثانیًا] اسلام كویلی مصطفی و آرقداشنی عمومڭزڭ نامنە قبول ایتدك. و ناممزە دە سزە كوندرییورز. ما شٓاء اللّٰه، شهید حافظ علینڭ مدرسەسی قپانمایور. و شاكرد آرقداشلری اونی قبرندە مسرور ایدییورلر.

[ثالثًا] بوكون طاهرینڭ كلمەسنی بكلەیورز. ان شٓاء اللّٰه كلیر. یارین جیلانلە بر معلّم، برنجی و اون اوچنجی سوزڭ ایكنجی مقامی اولان كنچلك رهبرینی ایكی ذیلی ایلە برابر، یڭی حروفلە مطبعەدە باصمق ایچون، بورانڭ بیوك مأموری و اسكیشهرڭ امنیت مدیری مساعدە و تنسیبیلە بر مقدار باصیلاجق.

[رابعًا] مباركلرڭ پهلوانی بیوك روحلی كوچك علینڭ ذوالفقاری ایلە مصطفی كُلڭ عصای موسی سی، هم شام، هم مصر علماسنە كیتمش. اوّل كوچك علینڭ عصای موساسنی دە كوندرەجكدم. فقط اونڭ قلمنڭ صحّتنە اعتمادًا تصحیح ایتمەمشدم. اونڭ ایچون اونڭ یرندە مصطفی كُلڭكی كیتدی. علینڭ ذوالفقاری و مصطفی كُلڭ عصای موسی سی، ان شٓاء اللّٰه بر زمان عربجەیە ترجمە ایدیلەجك، عربی بر صورتدە اورادە انتشار ایدیلەجكلر. دڭزلیدەكی اهمّیتلی بر قرداشمز حافظ مصطفی حجّە كیدییور. ذوالفقار و بعض نورلری برابر آلییور. ذاتًا نورلرلە علاقەدار چوق حاجیلر، نورلری او نورانی یرلرە كوتورویورلر.

او نورلر بزم بدلمزە او مبارك یرلری و اورادەكی مبارك ذاتلرڭ اللرینی أوپەجكلر. ان شٓاء اللّٰه بزی دە او یرلرە چاغیرمەیە وسیلە اولاجقلر.

[خامسًا] آنطالیەدن محمد خلوصی اورا شاكردلری نامنە تبریكلرینە و تفنّیدەكی نور شاكردلری نامنە احمد راسخڭ تبریكلرینە مقابل، پك چوق سلام و تكرارًا بایراملرینی تبریك ایدییورز. عموم قرداشلریمزە بیڭلر سلام و دعا ایدییورز. [حاشیە]

اَلْبَاقٖی هُوَ الْبَاقٖی

سعید النّورسی

عجلەیە كلدی. سز تصحیح و اصلاح ایدەبیلیرسڭز.

محرمجە بر فقرە لفًّا كوندریلدی.

كنچلك رهبری شیمدی حاضر دگل. صوڭرە سزە تصحیحلی كوندریلەجك.

(٤٦٥)

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

مادّی معنوی بر سؤٓال مناسبتیلە غریب بر اخطار.

شویلەكە، دینیلدی: سن مدافعاتڭدە دیمشسڭ، "مسلمانلر دینی تربیەسنی ترك ایتسە آنارشی اولور. باشقە اجنبی ملّتلر كبی [قومونیست ویا صوسیالیست كبی] بر قید آلتندە قالاماز. و آنارشیلری ادارە ایتمك، یالڭز استبداد مطلق و رشوت مطلقە ایلە اولابیلیر، باشقە چارە اولاماز." هم مدافعاتدە دیمشسڭ: "رسالۀ نور، كفر مطلقی قیردیغی ایچون، كفر مطلقڭ اوستی اولان استبداد مطلق و آلتی اولان آنارشیلگی دفع ایدر. قالدیرر." عجبا بر مثال كوسترەبیلیرمیسڭ؟ بن دە دیدم:

محرم و قیصەجە بر جواب شودركە: حقیقی آنارشیلك دگل، بلكە بر توهّملە بر مقدار لادینی تربیەسی آلتندە قالان بو وطندەكی دیندار ملّتە آنارشیلك كلمش. ویا كلمەسی احتمالنە بناءً، عمومی و كلّی، عجیب بر رشوت مطلقە نوعندن مأمورلرە معاشی قدر بر علاوە و چیفتچیلردن شیمدی چوق مصلحتلی و مرحمتلی اولان عُشُرْ ویركیسنی قالدیروب پارە ایلە بوغدایی اونلردن صاتین آلمق كبی داخلی، خارجی جریانلر، آنارشیلك طمارندن استفادە ایتمەمك ایچون چوق غریب مادّی معنوی، جزئی كلّی رشوتلر كوروندیگی چوق زماندنبری حیات اجتماعیەیە باقمدیغم ایچون بیلەمدیگم و ایستەمدیگم حالدە، بردن كویلیلردن ایشیتدم.

یینە بو مناسبتلە معنًا دینیلدیكە: نورجیلر غایت بیوك بر قوّتدر. نە ایچون اونلرە دە حقّ سكوت اولارق تمام سربستیت ویرمكلە معنوی بر رشوت ویریلمییور؟ بن دە دیدم: رسالۀ نورڭ تمامًا اهمّیتنی تقدیر و قیمتنی تام تصدیق ایتدكلری حالدە، انتشارینە میدان ویرمەمسیلە، خارجدن كلن دهشتلی دینسزلك جریاننە كویا رسالۀ نوری نشر ایتدیرمەمكلە صوری، دینسزجەسنە، لزومسز، فائدەسز بر رشوت ویرییورلر كبیدر. تا او خارجی و هجوم ایتمك ایستەینلر هجوم ایتمەسینلر. حالبوكە رسالۀ نور، داخلدە قوّتلی معنوی فتوحاتی ایلە آنارشیلگە میدان ویرمدیگی كبی، خارجدن كلن و ایچمزدە آنارشیلگی یتیشدیرمگە چالیشان، شمالدن كلن دهشتلی دینسزلك جریاننە قارشو سدّ ذوالقرنین كبی بر سدّ قرآنیدر.

بو وطندەكی ملّیتپرور و وطنپرور و اهل حمیت، سیاستجە، حیات اجتماعیەجە و كندی منفعتلرنجە رسالۀ نورڭ نشرینە مجبور اولدقلرینی ادّعا ایدرز. و نورلری ایمان ایچون اوقویان ویا رسمًا تدقیق ایدن بیڭلر شاهد، بو دعوایی تصدیق ایدرلر. اگر بو یگرمی سنەدە پردە آلتندە رسالۀ نور، قرآنڭ معجزۀ معنویەسیلە یوز بیڭلر ایمان تحقیقی صاحبلرینی یتیشدیرمەسە ایدی، بو مبارك وطن و ملّت پك دهشتلی فیرطینەلرە طوتولاجقدی. و طوتولمادیغنە بر سبب دە رسالۀ نور اولدیغنە [سورۀ والعصر] اشارت ایدییور.

قرداشڭز سعید النّورسی