قسمًا لاحقەیە. رأیڭزە حوالەدر.

(٣٨١)

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ بِعَدَدِ مَالَا یُحْصٰی لَهُ

عزّتلی استادم افندم حضرتلری،

تعظیمات و تكریمات فائقەمی عرض و تقدیم ایلە مبارك دست و دامن پاكلرینی بوس و توجّهات كرمكاریلرینی طلب و نیاز أیلرم.

اخیرًا اوقودیغم مؤثّر بر فقرەدە، افلانیلی، افلاطون مثال و حقیقتًا فداكار و حقیقتلی بر مقالەیی یازان احمد فؤاد افندی قرداشمز، رسالۀ نورڭ ترجمان فرید و ناشر یكتاسنە ارتحال بابندە، بقیۀ عمرینی بخش و فدا ایتمك امل خالصانەسیلە یازییورلركە، محتاج، عاجز، علیل، بیچارە، كمتر طلبە و مؤمنلرە دریندن درینە آجیلر و ألملر ایراث ایدن الوداع و الفراق اشارتلریڭزە مقابل، ای شوكتلی سلطانم و ای رهبر عالیشانم، سز عزّت و دولت و حتّی دلّالی بولوندیغڭز كتاب كریم ربّانی اولان قرآن مبین ایلە بر یاشاییڭز.

سالف العرض، رحلت میعادینڭ آجیقلی مباحثی بزلری ایچین ایچین یاقوب اریتییور. سزە بدل اولارق بنی قبول بویوریڭز، دییور. بناءً علی ذٰلك قطعی قناعت و یقینی ایمانمز واركە، اهل ایمانڭ و خصوصیلە هیئت نوریەنڭ حیات ممات یری اولان و غزوۀ احدی آڭدیران معهود وقعەنڭ پك شدّتلی و غایت

دهشتلی، هم نهایت درجەدە آتشلی زمانندە شهید مرحوم حافظ علی قرداشمز قافلۀ نوریەنڭ كشماكش و مادیونڭ مواجهەلرندە ظاهرًا بیكس قالمامسی ایچون ارتحالە وكالت آلدیغی و كیتدیگی و ایكی سنە صوڭرە دە مرحوم حسن فیضی افندی قرداشمزڭ برنجی شهیدی تردیفًا بدل كیتمەسی و اوچنجی اولارق دە احمد فؤاد افندی قرداشمزڭ نام فاضلانەلرینە اختصار و ارتحالە مأذونیت طلبندە بولونمسی، بو عبد پرقصوردە دە دردنجی اولارق بدللك آرزوسنی اویاندیردی و اخطار ایتدی. قلب و نفسمی یوقلادم. باعث حیات باقیەمز اولان استاد اشفقە بدل اولارق آخرت عالمنە نقلە مع الممنونیە رضا كوروندی. و تسلیمیت قراری وجود بولدی. بر دە دوندم، دنیا جهتنە باقدم، موجب نفرت بر چوق حالات مزعجە و وقایع كریهە رأی العین كوروندی. ایستەمییورم دییوب یوزیمی عالم بقایە چویروب مع المسار، اُولٰیدن اخری یە نقلمە قرار ویردم. هم بو اهمّیتلی امر خیردە چوق فوائد و منافع مندمج اولدیغنی كوردم.

اوّلا، بو حقیر و كناهكار، اویلە علوی و قدسی و نزیه بر شخص عدیم المثالە اجل طریقندە بدل اولسە، هم بأی حالٍ وقوعی محقّق اولاجق اولان نوبتنی احیا ایتمش اولور. هم هر بدل و وكیل، موكّل و اصیلنڭ مقام و منصبی، ترقّی و تعالیسی نسبت و درجەسندە و كیتدیگی منزلدە رغبت تسریر و تكریم و مظهر مكافات اولور. نظیرسز انیسلرە، مثیلسز رفیقلرە اقتران ایدر. معمّر اولان اصیل دخی شو فترت آنندە و فساد زمانندە ارض اوزرندەكی موحّدین زمرەسنڭ تك بر حامیسی اولمق

اعتباریلە قبول ربّانی و قضای یزدانی دائرەسندە بر عاجزی توكیل بویورسەلر، مصلحتە موافق اولور بیلیرم. زیرا تكیەیە كلن قربانڭ سمیز و ضعیفلغنە باقیلماز، مفهومنجە، كونا كون قصورلریمزە باقیلمایارق شایان قبول اولسەق، قرآن دلّالسز و اهل ایمان معینسز و مرشدسز، باباسز قالماز. بو خصوصدەكی ملاحظۀ عاجزانەم بالنّتیجە اهمّ و الزم اولان ذات پاك حضرت استاد و مشوّق سبیل الرّشادی خدمت نوریەدە عصرڭ صوڭ سیستم ذوالفقارینی تام تعلیم و اهللرینە تودیع و حضور تام ایلە خدایە تفویض قیلسەلر، بزلر دە [اَلدَّٓالُّ عَلَی الْخَیْرِ وَالْحَقِّ كَفَاعِلِهٖ] سرّینە عدم لیاقتمزلە برابر مظهر اولمقلە مشرّفیت كسب ایتسەك، خزینۀ رحمت الٰهیەیە نە نقیصە كلیر دییوب، بندەڭز دە بقیّۀ عمریمی رسالات الانوار ترجمان بدیع و ناشر حكیم و خادم جمیلنە فدا ایتدم. نزد فاضلانەلرندە بولونان بالجملە اخوانە بورالردەكی عموم قرداشلرم نامنە حدسز سلام و عرض تحیّات أیلركن، مبارك اللریڭزی و سوكیلی چوق قیمتدار جیلانڭ كوزلرندن اوپرم.

بارلەدە تظاهرات دینیە:

شانلی حافظ توفیق افندینڭ حلقۀ تدریسندە سلیمان افندینڭ مخدومی یوسفدن مرحوم مصطفی چاووشڭ اوغلی و نور ساقیسی احمدە قدر بر چوق طلبەلر، هر آقشام خاص یازی تعلیم و قرآن اوقومغە چالیشییورلر. هم موفّقیت دعاسنی طلب ایلە مبارك ال و اتكلریڭزی أوپویورلر.

كذا ایلامادە خلوصی و حافظ حقّی افندیلر بوكونلردە رسالە یازمغە باشلادیلر. كذا اونلر دە كمال حرمتلە ال و آیاقلریڭزی اوپرلر، افندم.

اَلْبَاقٖی هُوَ الْبَاقٖی

ئوزی سوزینە اویغون اولدیغنی قسملە تصدیق ایدن عاجز و پك چوق حقیر صبری

قسمًا لاحقەیە. سزە حوالەدر.

(٣٨٢)

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

خدمت نوریەدە عزیز و مبارك قرداشلرملە بر حسب حالدر.

بشریت تاریخندە عصریمز كندینە مخصوص خصوصیت كسب ایتمشدر. دنیوی ساحەدەكی فوق العادە كشفیات و ایلریلەمە، انسانلرڭ نظرینی تمامًا دنیایە چویرمش و چوغالان احتیاجلرینی تزییددن باشقە بر ایشە یارامامشدر. روحلرینڭ غداسنی اونوتمق ایچون كندینی سفاهت درەلرینە آتمشدر. بشرڭ بو درین یارەلرینە چارە بولابیلمك ایچون بر چوق طبیعیّون بدبختلر، بشری طبیعت باتاقلغنە دوشورمشدر.

ان شٓاء اللّٰه یاقیندە عقلنی باشنە آلارق، قرآن حكیمڭ اجزاخانۀ كبراسندە تداوی اولارق انسان اولاجقدر. بشریت عالمندە وقوع بولان بو عجیب انقلابلرڭ چارپیشمەلرندن حصولە كلن بو بی قرار حالڭ، طبقی بر حوضە آتیلان بر طاشڭ میدانە كتیردیگی طالغەلر كبی اسلامیت عالمندە دە تأثیرینی كوسترەجگی محقّقدی. نیتەكیم عالم اسلام دنیادە وقوعە كلن بو بیوك دگیشیكلكلردن، بالخاصّە عصریمزدە داها زیادە متأثّر اولمشدر. مع التّأسّف ایچمزدە یتیشن بعض فرنك مشرب بدبختلر، عالم اسلامڭ وحدتنی پارچەلایارق مملكتمزی فرنك مشرب بر حالە كتیرمك ایچون چالیشدیلر. فرنكلرڭ بد نظریەلرینە بعض بدبختلری مفتون ایتدیلر. فقط بشریتی حقیقی سعادت و سلامتە اولاشدیراجق و بو دین جلیل اسلامی تا قیامتە قدر محافظە ایدەجك اولان حافظ حقیقی، كفر مطلق حسابنە قرآن و ایمان حقیقتلرینە هجوم ایدن اهل الحادە یینە قرآن كریمڭ معنوی اعجازندن سوزولمش و اونڭ بر نوع لمعەلری اولان رسالۀ نورلە جواب ویردی.

اوت، فلسفە و ضلالتدن كلن شكلرە و اهل الحادڭ كفرینە قارشو آنجق قرآن نامنە درس ویرن، قرآن و ایمان حقیقتلرینڭ مدافعی و كفر مطلقی زیر و زبر ایدن رسالۀ نورە صاحب چیقمقلە قارشو قونولابیلیر. زیرا اهل كفرڭ سلاحلرینە قارشو بر نوع آطوم بومبەسی حكمندە اولان نور بومبەسی ایلە مقابلە ایدیلیر. نور بومبەسی تخریب دگل، تعمیر ایدر. هپمز حق و حقیقت یولجیسی اولمەمز حسبیلە

بو قدسی خدمت یولنە جانمز فدا اولسون. زیرا حق یولندە جان ویرەبیلنلردركە، حقّە قاووشسون. حق یولندە قورقو دگل، محبّت اساسدر. قورقاقلرڭ ایچمزدە یری یوقدر. حق یولندە چالیشانلرڭ یاردیمجیلرینڭ جناب حق اولدیغنە قطعی اینانجمز واردر. او معینمز اولدقدن صوڭرە، بتون دنیا كافر اولسە قیمتی یوقدر.

ای بو دین جلیل اسلامە خدمت آرزوسندە بولونان مؤمن قرداشلرم و بو خدمتدە چالیشیر كورونن خواجەلر! بیلمش اولیڭزكە، بو زماندە عبادتڭ اڭ خیرلیسی، دینسزلرلە معنًا مجاهدە ایدرك ایمان حقیقتلرینڭ نشرینە چالیشمقدر. زیرا زمانمز أیی ایلە كوتویی آییران محك طاشی حكمندەدر. وظیفەڭز مسئولیتلیدر. اونڭ ایچون الڭزە نور مشعلەسنی آلارق عالم اسلامڭ تنویرینە چالیشیڭز. و شمس حقیقتڭ نور صانجاغی آلتندە برلشیڭز. هر حركتی بر سكونت و هر اینیشی بر یوقوش تعقیب ایتدیگی كبی، ان شٓاء اللّٰه استقبالدە اسلاملر ایچون خیرلی و مسعود كونلر امید ایدییورز. یالڭز الحمد للّٰه، بن مؤمنم دیین هر فردڭ رعایت ایتمسی ضروری و مسلمانلق مقتضاسی اولان تبارز ایتدیریلمەیە دگر نقطەلر وار. علما و خواجەلر صنفی، بونلرڭ بو عجیب زماندە وظیفەلری چوق مهم و مسئولیتلیدر. اونلرڭ وظیفەسی سادە بر دینی مقام صاحبی اولمق دگل، بو باقیمدن او مقامی تمثیل ایدەبیلمگە لیاقت كسب ایتمك، ایجابندە شریعت احمدیەنڭؐ تبلیغندە او اوغوردە فدای جان ایدەبیلمكدر.

او مقام چوق مسئولیتلی و عین زماندە چوق شرفلیدر. بونلر حق و حقیقت نامنە حقلە آمر اولملیدر. بونلردن حصّەسی اولمایانە علما دینیلمز. خواجەلر و عوام مؤمنین قسمی ایسە، بو عجیب زماندە دینسزلرڭ اتهاملرندن علیهلرندەكی سیستملی امحا پلانی و بربرینە دوشورمكدن قورتولمق و كفر مطلق نامنە ایمان حقیقتلرینە ملحدلرڭ هجومندن كندیلرینی محافظە و مدافعە ایدەبیلمك، قرآن حكیمڭ معنوی اعجازندن سوزولمش رسالۀ نورە صاحب چیقمق ایلە و اونی الدە ایتمكلە ممكنمیدر؟ اوت، رسالۀ نور اونلرڭ كفرلرینی حقیقت نامنە زیر و زبر ایدرك جانلرینی جهنّمە كوندرمگە وسیلە اولور. و اهل ایمانی حق نامنە جنّتلە تبشیر ایدر.

عاجز قرداشڭز مصطفی و ضیا

[٣٨٣]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلًا] قرداشمز، نور قوماندانلرندن رأفتڭ اون اوچ رقمیلە كوستردیگی مژدەلی توافق كرامتی بزی حقیقتًا چوق سویندیردی. ما شٓاء اللّٰه، اونڭ قلبی، فكری كبی، كوچك مكتوبلری دە لطافتلیدر.

[ثانیًا] مرحوم حافظ علی و حسن فیضینڭ تام وارثی احمد فؤادڭ فتوحات نوریەیە دائر قیمتلی مكتوبی كوسترییوركە او حوالی دە اوچنجی بر اسپارطە اولمغە باشلایور. قوّتلی بر دلیلی خطیب ابراهیمدركە احمد فؤادڭ عین سیستمندەدر. اونڭ مكتوبی و احمد فؤادڭ مكتوبی كبی نورجیلرە بیوك بر امید و مژدە ویرییور. جناب حق اونلری موفّق أیلەسین. آمین آمین. اونڭ رؤیاسی خیردر و مباركدر. طاطایلی حافظ حسنە دە سلام ایدرز.

[ثالثًا] اعلا مسجد كویی خواجەسی ابراهیم ادهمڭ خالصانە مكتوبیلە و نورڭ معصوم شاكردلرینڭ او مبارك خواجەنڭ درسندن تام حصّە آلان و نور دائرەسنە كیرن آلتی كوچوجك معصوملرڭ كندی كندیلرینە دوشونوب خواجەلرینە سویلەیەرك، آلتی پوصلە كندی قلملریلە یازارق، بو اختیار، خستە سعیدە، او معصوم مباركلر عمرلرندن هر بریسی بر قسمنی ویرمسی حقیقتًا غایت مدار حیرت و تقدیر بر حادثۀ نوریەدر. بن دخی او معصوملرڭ او مبارك هدیەلرینی قبول ایدوب، یینە او كوچوجك سعیدلرە هدیە ایدرك، بنم یرمدە چالیشمق ایچون باغیشلایورم. جناب حق اونلری موفّق أیلەسین. و استادلرندن و پدر و والدەلرندن راضی اولسون. او كوچوجك سعیدلر ایسە، ابراهیم (٩)، مصطفی طوپ (١١)، خلیل ابراهیم (١٢)، امین ییلماز (١٤)، محمد (١١)، عبد اللّٰه (١٢) یاشلرندەدرلر.

[رابعًا] مدرسۀ نوریەنڭ قهرمانلرندن و او مدرسەنڭ استاد مباركی مرحوم

حاجی حافظڭ مخدومی و وارثی حافظ محمدڭ، او مدرسەنڭ عموم شاكردلری نامنە یازدیغی مكتوبندە، "نورلە اشتغالڭ، ئولومدن باشقە هر بلایە و خستەلقلرە بر علاج اولدیغی كبی دهشتلی ئولومی دە جنّتڭ قاپوسی كوستروب، اهل ایمانی هیجانلە شوقە كتیرییور." دییە فقرەسی حقیقت اولدیغنە پك چوق حادثەلر وار. معصوم مخدومی دە حافظلغە باشلامسی، ان شٓاء اللّٰه موفّق اولاجق. جدّینڭ و پدرینڭ مبارك حافظلق عنوانلرینی دائملشدیرەجك.

مدرسۀ نوریەنڭ الماس قلملی قهرمانلرندن مصطفی ییلدیزڭ، صورتًا قیصە و معنًا اوزون و قیمتلی مكتوبندە، مدرسۀ نوریەنڭ قهرمانلرینە حوالە ایدیلن سكّۀ غیبیەنڭ یاغلی كاغدە یازیلمەسنی، اوچ درت هدهدڭ معنًا آلقیشلامسی كوسترییوركە، ان شٓاء اللّٰه سكّۀ غیبیە مدرسۀ نوریەدە پارلاق بر طرزدە چیقاجق و كوزل فتوحات یاپاجق.

[خامسًا] كوچك اسپارطەنڭ قهرمانلرندن بربر علی عثمانڭ بزە كلن مكتوبندە، قرداشمز نظیف و آرقداشلرینڭ چالیشدقلرینی و تلاشلری اولمدیغنی و اونڭ اوچ معصوم اولادلری قرآنە و رسالۀ نورە چالیشمەلری بزی سویندیردی. نظیف حقّندە مراقمی ازالە ایتدی. اینەبولیلی خلیلڭ بڭا یازدیغی مكتوبدە بر ذوالفقار ایستەیورمش. اوڭا دە سلام ایدییورم. یاقیندە ان شٓاء اللّٰه چوقلری بولاجق اینەبولی قرداشلریمزڭ صداقتلری و علاقەلری تامدر. فقط احتیاطە و تام تساندە تام موفّق اولامدقلرندن بعضًا توقّفە مجبور اولویورلر.

[سادسًا] خومەنڭ نور قهرمانلرندن و حپس آرقداشلریمزدن محمد علی واسطەسیلە نورڭ دائرەسنە جدّی بر طرزدە كیرن و بڭا مكتوب یازان قراحاللی حسین مرجانە سلام ایدییورم. ان شٓاء اللّٰه او دە حومە قهرمانلری كبی صارصیلمادن چالیشاجق. باشدە سامی و محمد علی اولارق اورادەكی قرداشلریمزە چوق سلام ایدییورم. عموم قرداشلریمزە بیڭلر سلام و دعا ایدییورز.

اَلْبَاقٖی هُوَ الْبَاقٖی

خستە قرداشڭز سعید النّورسی

[٣٨٤]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلًا] قسطمونیدە صاتیلان حزب نوریەنڭ بدلنی و كاتب عثمانڭ رسالۀ نور باغنڭ محصولی شیمدی یە قدر محافظە ایدیلن المالری و ترزی محمدڭ بش معصوم و نورجی اولادی، باشدە طلعت اولارق تبرّكلرینی آلدق. او معصوملرڭ خاطری ایچون او تبرّكی و كاتب عثمانڭ الماسنی علاج نوعندە استعمال ایدییورم. و قهرمان برهانڭ مكتوبندە ابراهیم افندینڭ رفیقەسنڭ راحتسزلغی ایچون شفا دعاسنی، بن كندی خستەلغمە شفا ایستەدیگم وقت، نادرە و شاذیەیی ایكی دفعە حصّەدار أیلەدم. جناب حق شفا ویرسین.

[ثانیًا] عصای موسی نرەیە قدر یازیلمش و اینەبولیدە یڭی حرفلە نە قدر یازمش، چیقمش؟ و نظیف و آرقداشلرینڭ فعّالیتلری وارمی، صیقینتیلری یوقمی مراق ایدییورم.

عموم قرداشلریمزە بیڭلر سلام و دعا ایدییورم.

اَلْبَاقٖی هُوَ الْبَاقٖی

قرداشڭز سعید النّورسی

[ ٣٨٥ ]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

(مادّی و معنوی بر سؤٓال مناسبتیلە خاطرە كلن بر جوابدر.)

دینیلییوركە: نەدن نور شاكردلرینڭ قوّتلی حسن ظنلری و قطعی قناعتلری، سنڭ شخصڭ حقّندە نورلرە داها زیادە شوقلرینە مدار اولان بر مقامی و كمالاتی شخصڭە قبول ایتمییورسڭ؟ یالڭز رسالۀ نورە ویروب، كندیڭی چوق قصورلی بر خادم كوسترییورسڭ؟

[الجواب] حدسز حمد و شكر اولسونكە، رسالۀ نورڭ اویلە قوّتلی و صارصیلماز استناد نقطەلری و اویلە پارلاق و كسكین حجّتلری واركە، بنم شخصمدە ظن ایدیلن مزیتە، استعدادە احتیاجی یوقدر. باشقە اثرلر كبی، مؤلّفڭ

قابلیتنە باقوب، مقبولیتی و قوّتی اوندن آلمییور. ایشتە میداندە! یگرمی سنەدر قطعی حجّتلرینە طایانوب، شخصمڭ مادّی و معنوی دوشمانلرینی تسلیمە مجبور ایدییور. اگر شخصیتم اوڭا اهمّیتلی بر نقطۀ استناد اولسە ایدی، دینسز دوشمانلرم و انصافسز معارضلرم قصورلی شخصمی چوروتمكلە، نورلرە بیوك ضربە اورابیلیردیلر. حالبوكە او دوشمانلر دیوانەلكلرندن، یینە هر نوع دسیسەلرلە بنی چوروتمەیە و حقّمدە توجّە عامّەیی قیرمغە چالیشدقلری حالدە، نورلرڭ فتوحاتنە و قیمتنە ضرر ویرەمییورلر. یالڭز بعض ضعیف و یڭی مشتاقلری بولاندیرسە دە واز كچیرەمییورلر.

بو حقیقت ایچون، هم بو زماندە انانیت زیادە حكم ایتدیگی ایچون، حدّمدن چوق زیادە اولان حسن ظنلری كندیمە آلمییورم. و بن، قرداشلرم كبی، كندی نفسمە حسن ظن ایتمەیورم. هم قرداشلریمڭ بو بیچارە قرداشلرینە ویردیگی مقام اخروی، حقیقی، دینی مقام ایسە. مكتوباتدن ایكنجی مكتوبڭ آخرندەكی قاعدەیە كورە، شخصمە ویردكلری معنوی هدیە اولان كمالاتی، اگر حاشا بن كندیمی اویلە بیلسەم، اولمامسنە دلیلدر. كندیمی اویلە بیلمەسەم، اونلرڭ او هدیەسنی قبول ایتمەمك لازم كلییور. هم كندینی مقام صاحبی بیلمك جهتندە انانیت مداخلە ایدەبیلیر.

بر شی داها قالدیكە، دنیا جهتندە، حقائق ایمانیەنڭ نشرندەكی وظیفەدارلر مقام صاحبی اولسە، داها أیی تأثیر ایدر دینیلەبیلیر. بوندە دە ایكی مانع وار:

[بریسی] فرضا ولایت اولسە دە، بیلەرك، ایستەیەرك مقام یاپمق طرزندە، ولایتڭ ماهیّتندەكی اخلاص و محویّتە منافیدر. نبوّتڭ ورثەلری اولان صحابەلر كبی اظهار و دعوا ایدەمزلر، اونلرە قیاس ایدیلمز.

[ایكنجی مانع] پك چوق جهتلرلە چوروتولەبیلیر و فانی و جزئی و موقّت و قصورلی بر شخص صاحب اولسە، نورلرە و حقائق ایمانیەنڭ فتوحاتنە ضرر كلیر. فقط بر نقطە واركە، موجب شكراندر: اهل سیاستدەكی دوشمانلرم، مذكور حقیقتلری بیلمدكلری ایچون، شرفلی، عزّتلی اسكی سعیدی دوشونوب، متمادیًا نورلر بدلنە بنم شخصمە اهانت و تنقیص ایتمكلە مشغول اولویورلر. بعض متعصّب، انانیتلی خواجەلری دە شخصمڭ علیهنە چویرییورلر، كویا نورلری سوندیرمگە چالیشییورلر. حالبوكە نورلری داها زیادە پارلاتدیرمغە وسیلە اولویورلر. نورلر، عادی شخصمدن دگل، قرآن كونشنڭ منبعندن نورلری آلییور.

عموم قرداشلریمە پك چوق دعا ایدییورز. [حاشیە]

اَلْبَاقٖی هُوَ الْبَاقٖی

قرداشڭز سعید النّورسی