ای روحلری طالغەلاندیران و قلمندن شیمشكلر چاقدیران محترم استاد! سنڭ عظمتلی خارقەڭڭ اڭ بیوك نشانەسی اولان رسالۀ نورڭ نوری، قرارمەیە یوز طوتان ایمان افقلرینی نورلاندیردی و آیدینلاتدی. و ابدە قدر دە آیدینلاتاجقدر ان شٓاء اللّٰه.

قسطمونی رسالۀ نور شاكردلرندن محمّد فیضی

تعدیل و اصلاح ایتمكدن صوڭرە لاحقەیە كیرسین. بن وقت بولامدم، سزە حوالەدر.

بونی یازان ایكنجی بر حسن فیضی اولدیغی كبی، بزم و نورجیلرڭ برائتمزە تام چالیشان ایكنجی بر علی رضادر.

[٣٧٩]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

پك محترم و شفقتلی استادم،

نورلرڭ حقوقنی محافظە و مدافعەیی خاص شاكردلرڭ عهدەسنە بیراقدیغڭزە دائر اولان مكتوبڭزی آلدق. بیان اولونان سببلر آراسندە یاپیلان سٓوء قصد و اشكنجەلردن بحث ایدن كلمەلرینی اوقوركن جگرلریمز پارچەلاندی. و بالخاصّە "بن بر چكردك كبی چورودم" عبارەسی، هیچقیریقلرلە آغلاتدی.

استادم، شیمدی یە قدر مثلی كورولمەین و هیچ بر امام و ولی یە تطبیق ایدیلمەین بو انصافسزجە معاملەلر، حقیقتًا وجود شریفلریڭزی بر چكردك كبی چوروتدی و چوروتمكدەدر. فقط بو چورومە اسباب و شرائطڭ تكمّل ایتمەمەسندن چورومەیوب اصلنی غائب ایدن بر چورومە اولمدیغنی، بالعكس بتون انسانلرە حیات ابدیە بخش ایدن نورڭ شجرە و میوەلرینی حصولە كتیرمك ایچون ییپرانوب حقیقی وارلغە قاووشان مقدّس بر چكردك اولدیغنی دوشونەرك بر درجە كندیمزی تسلّی أیلەدك. فقط نورڭ حقوقنی محافظە وظیفەسنڭ شاكردلرە دوری، ایلك كورونوشدە بزە جگرلر یاقان بر عاقبتی دوشوندیردی. هنوز نورلرڭ لمعان ایتدیگی قلب شریفی طاشییان وجود مباركەلری میداندە ایكن وظیفەیی دور ایتمكلە دوشمانلرڭ كوزلرینی عكسی استقامتە چویرمگە امكان یوق ایكن و اساسًا نورڭ حقوقنی محافظە و مدافعە بتون شاكرد و حتّی مسلمانلرڭ اصلی وظیفەلری ایكن، ناصل اولور، یوقسە حَجّة الوداعڭ عرفەسندەیز، عجبا یاقیندە كوچمی وار؟ دییەرك، بر تورلی كندیمزی تسلّی ایدەمییوردق. بو دوشونجەلرلە قلبلریمز صیزلاركن، ذوالفقارڭ امنیت مدیری طرفندن شوقلە اوقونمسی و بعض اهمّیتلی شخصلرڭ زیارت و حسن علاقەلری، بو تور معاملەسنڭ تمامًا دگل، یینە باش منبع نور، حضرت استاد اولدیغی حالدە، تساندڭ و مشورتڭ سرّ عظیملرندن حصولە كلەجك شركت معنویە ایلە نورلرڭ تام فتوحات یاپمەسنی تأمین اولدیغنی آڭلادق

و سویندك. جناب مولادن سز استادیمزی باشمزدن اكسیك ایتمەمسی ایچون آشاغیدەكی دعا ایلە یالواروب نیاز أیلەدك.

[بِسْمِ اللّٰهِ الرَّحْمٰنِ الرَّحٖیمِ٭ رَبَّنَٓا اِنَّنَا سَمِعْنَا مُنَادِیاً یُنَادٖی لِلْاٖیمَانِ اَنْ اٰمِنُوا بِرَبِّكُمْ] ای ربّمز، بز بر منادی ایشیتدككە، بزی و بتون عالمی سڭا ایمان ایتمەیە چاغیرییور. بر دلّال دویدقكە، "ربّڭزە اینانڭ و اویڭ" دییور.

قولاقلریمزلە بو مبارك منادینڭ مبارك سسنی دویدق. كوزلریمزلە كوردك. كوڭللریمزلە بیلدك. و هپمز اوڭا ایمان ایتدك. هیچ شبهە یوقكە، بو منادی بدایتدە، عصر سعادتدە سنڭ اڭ برنجی محبوبڭ محمّد علیە الصّلاة والسلامدی. ویا اوڭا كوندریلن قرآن كریمدی. ویاخود هر ایكیسی ایدیكە، بری اولماسە، دیگری اولاماز. زیرا او رسول هاشمی علیە السلام عین رحمت و بركت اولان بو ندا و صداسنە، جمادات و نباتات و حیوانات و بشریت عالمی هپ ایشیتمش، (لَبَّیْكَ) دیمشدی.

یگرمی اوچ ییل بو صورتلە ندا ایدوب بتون ذرّات جهانە سنڭ امر و فرمانڭی دویوران او منادی، یالڭز باشنە جهالت و وحشت طولی اولان صیجاق و صوسز عربستان چوللرینی قرآنڭ فیضیلە صولامش و نوریلە هر طرفی آیدینلاتمشدی. حَجّة الوداعندە، عرفات تپەلرندە طوپلادیغی یوز بیڭ اصحابنە خطاب ایدرك، ارتحالنڭ یاقلاشدیغنی بیلدیرمش و قیامتە قدر كلەجك اولان

هر عصردەكی امّتلرینە سلاملر یوللامش و اونلرە سلامتلر دیلەمشدی. شان عالیەلرندە [اَصْحَابٖی كَالنُّجُومِ بِاَیِّهِمِ اقْتَدَیْتُمْ اِهْتَدَیْتُمْ] بویورولان و هانكیسنە اقتدا ایدیلسە، اهتدا ایدیلەبیلەجك اولان بو ییلدیزلر مثالی دوری كچدكدن صوڭرە، هر عصردە ظاهردە و باطندە تمامیلە او حبیبڭەؐ باغلی برر مجدّد، برر منجی كوندردڭ. و اونلری وكیل و امام یاپارق و هر برینی بر چوق ولیلر و صوفیلرلە تأیید و تقویە ایدرك، او منادیلر و دلّاللر واسطەسیلە یینە دینڭی تأیید و تقویە أیلەدڭ.

مسلك و مشربلری آیری آیری اولان و فقط هپ محمّد علیە الصّلاة والسّلام و كتاب كریمڭە باغلی بولونان بو قیمتلی رهبرلرڭ و مبارك منادیلرڭ الهامڭلە یازدقلری اثرلر، یالڭز عصرلرندەكی اسلاملرە خطاب ایدییور و اونلری اسلامیت جامعەسندە طوتویوردی. و هر بریسی اوّلجە كچمش اولان انبیادن برینڭ هویتنی طاشییوردی. اسلامیتڭ هر یردە ضعیفلایوب صارصیلدیغی، غریب و كیمسەسز قالدیغی و دیار اسلامڭ هر كوشەسنە بر بلا چوكدیگی [یَدْخُلُونَ فٖی دٖینِ اللّٰهِ اَفْوَاجاًۙ] آیتنڭ تمامیلە عكسنە تجلّی ایتدیگی و اسلام و خریستیان دیننڭ، دین عقیدەسنڭ بعض مملكتلردە بوس بتون دگیشمەیە و حتّی قالقمغە یوز طوتدیغی عصردە ایسە، بزە اویلە بر مجدّد و اویلە بر منجی و اویلە بر منادی كوندردڭكە، او دە رسالۀ نوردر. اونڭ سسنی ایشیتدك، نوری كوردك. بز اوڭا یوزلر سوردك. بز اونلرە جانلر ویردك. رؤیالریمزدە اولسون بر كرە كورەلم

دییە آرادیغمز و حسرتلە آغلادیغمز، بزە بدیع اسم شریفڭڭ آیینەسندە آشكار كوستردڭ. حمد اولسون اللّٰهم. كیتمگە و مبارك درسنی دیڭلەمەیە كوجمز یتمدیگنی بیلدیگڭ ایچوندركە، او اوزاق مسافەلردەكی روضۀ مباركەیی بزە یاقلاشدیروب طواف و زیارت ایتدیردڭ. چوق شكر اللّٰهم، او تربەنڭ جنّت قوقولریلە و اونڭ ایچندە سوكیلیڭڭ و مثالی و قدرت الڭلە حاضرلایوب صونولان نور شریفڭلە بزلرە یایدڭ اللّٰهم. اونڭ منجیلگی خصوصی دگل، عمومیدر. بو مبارك منادینڭ نداسی یالڭز اسلامە دگل، بتون انسانەدر. او انبیادن برینڭ هویتندە دگل، اونڭ شخص معنویسی اولان رسالۀ نور، او فخر البشر، صاحب الحوض والكوثر حضرت محمّد علیە السّلامڭ بر كولكەسی اولان و شیمدی اونڭ وكیلی بولونان، منبع نوردن بزی آییرما اللّٰهم. بونڭ ایچوندركە، [قُلْ لَٓا اَسَْٔلُكُمْ عَلَیْهِ اَجْراً اِلَّا الْمَوَدَّةَ فِی الْقُرْبٰیۜ] آیتنە كورە محبّتِ وجودیڭز اوزریمزە واجب اولدی.

ای نورڭ صادق دوست و شاكردلری! [سَلْمَانُ مِنَّٓا اَهْلَ الْبَیْتِ] حدیث عالیسنە مظهر اولدیڭز. سزی تبریك ایدییورز.

محترم استادیمزە سویلەیڭ، بو عاجزلری دە شاكردلگە قبول بویورسونلر. اونڭ علماسی، محرمِ رازی و سر كاتبی و وارث علمی و عرفانی سزسڭز. شاید اورادە ارتحال بویورولور و دفن ایدیلیرلرسە، قبر طاشنە بونلری یازیڭز:

فخر عالمڭ نوردن اینجیسی، اهل اسلامڭ بیوك منجیسی، شانندە سویلەمش قرآن مجید [فَمِنْهُمْ شَقِیٌّ وَسَعٖیدٌ].

اوڭا اقربا اولمقلە بش یوز ییلدە تحصیل ایدیلەمەیەجك فضائلی، قیصە، آز بر زماندە بر ایكی سنە ظرفندە الدە ایتدیگڭز ایچون بختیارسڭز. [وَالسَّابِقُونَ السَّابِقُونَ] آیتنە داخل اولان و آخر زماندە مقدارلری پك آز و اقلّ قلیل اولان زمرەیە داخل اولدیڭز. حاشا بو حالڭزە حسد دگل، فقط غبطە ایدییورز. واصل اولدیغڭز بو پایەیی ایستەمك حدّیمز دگلدر. اونڭ بز جوار حضورندە بر پروانەسی اولمق و دائما شەنە یانمق ایسترز. نصیب أیلە اللّٰهم.

او بزم كوزیمزڭ كوزی، ایچمزڭ ایچیدر. قاتمرلشن و سنبللنن اصالتڭزڭ حیرانی یز. عالَم، خضری اوزاقلردە آرار و بولامازكن، سز اونی یانڭزدە و داها یاقینڭزدە و بلكە ایچڭزدە بولدیڭز. حتّی اویلە بر پایە قازاندیڭزكە، مَسَرّتلە طولدیڭز. هم بو سزڭ خضریڭز، جناب موسانڭ خضرینە بڭزەمز. چونكە جناب موسی خضردن اوچ شی اوگرنەبیلدی. سز و چالیشقان خاندانی ایسە، خضرڭ هم اقرباسی، هم وارثی اولدیڭز. قاووشدیغڭز بو خضر، بام باشقە بر خضردر. بو صورتلە سز بتون نور طلبەلرینڭ شرفنی كندیڭزدە كورەبیلیرسڭز. او نور اینجیسنڭ صدفنی كندیڭزدە كوسترەبیلیرسڭز. و استادڭ غیبندن صوڭرە دە خزینۀ نوریەنڭ مفتاحی و مهری كذا اركانلرە ویریلدیگی كبی، بر جهتدە دە سزلرە انتقال ایتمش دیمكدر.

سز صدّیق و سلیمانلرڭ یولداشی اولدیڭز. یا ربّنا! بزە دە او زمرەدن بر پارچەجق یر آییر اللّٰهم. آمین. آمین. آمین.

بیوك روحلی شهید حسن فیضینڭ روح مباركلریلە طواس شاكردلری نامنە چوق قصورلی و حقیر طلبەڭز محرّم

(٣٨٠)

قرداشلرم، بن رسمی خواجەلرڭ ئوركمكلرندن و نورلرە قارشو لاقیدلرندن قیزمشدم. فقط بو أدهم خواجە بنم حدّتمی ازالە ایتدی. ان شٓاء اللّٰه، ناصل مرحوم حسن فیضی، معلّملری نورلرە سوق ایتمەیە بر وسیلە اولدی. اویلە دە بو ادهم دخی بر قسم خواجەلری سوق ایدەجك. بن بو اوزون مكتوبنی هم تعدیل ایتمك، هم قیصالتمق و حقّمدە پك زیادە ثنالرینی قالدیرمق و اصلاح ایتمك حالم و وقتم مساعدە ایتمدیگندن سزە حوالە ایدرم. بو مكتوب مستقل یازیلسین. مدار عبرت اولارق قورقاقلغندن نورلردن چكینن بعض خواجەلر اوقوسون. هم مكتوبڭ بر قسمی دە لاحقەیە كچسین.

سعید النّورسی

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

چوق سوكیلی استادیمز افندیمز حضرتلری،

عن اصل روم ایلیلی یم. هجرتم بالیكسردر. جلال الدّین رومی * قدّس اللّٰه سرّه منسوبلرندنم. یگرمی سنەیە قریب كوی خواجەلغی و چوجق اوقوتمقلە مشغول اولمقدەیم.

رسالۀ نورە خدمتم بو سنە ممكن اولدیغی قدر هم كندم اوقویوب استفادە ایتمك، هم دە مملكتم اولان بالیكسر و قرە آغاچ حوالیسندەكی قرداشلریمی تنویر ایتمك مقصدیلە رسالۀ نوردن رسالە یازوب كوندرییورم.

قرق سنە، بلكە یوز سنەدنبری دینمز "نور محمّدیەؐ" نورینی سوندیرمك ایچون وار قوّتلریلە سعی و غیرتدە بولونان آوروپە فیلسوفلرینڭ و اونلرڭ سوزلرینە اعتماد ایدن بر طاقیم بدبختلرڭ دین علیهنە یاپدقلری پروپاغاندەلرلە او درجە ایلری كیدیلدیكە، دیننە تعظیم ایدوب معبود حقیقیسنە عبادت ایدن بر مؤمنە كندی نظرلری ایلە ویا باطل فكرلریلە كندیلرینە مناسب اولان سوزی او مؤمنە اسناد ایدرك، دنیانڭ فكرسزی اولدیغنە اولان اعتقادلری و كلاملری، ایمانندە نقصانیت اولانلری تعجّبدە بیراقدیلر. حتّی او زواللیلر اویلە ظن ایتدیلركە، آرتق نور ایمانیە یڭیدن پارلامق ایچون خارج امكان اولدیغنە قانع اولدیلر. ایمان حقیقی بولان نور شاكردلری ایسە، ذرّە مقداری ایمانلرینە خلل كتیرمدكلری كبی، اویلە سرسملرڭ باطل اعتقادلری و یاپدقلری پروپاغاندەلر، عادتا صولدە صفر حكمندە قالاجغنی یقینًا بیلدكلرندن، او منكرلرڭ یالڭز اهل اسلامە دگل، بتون عالم بشریتە یاپدقلری چركین عقیدەلری نە درجەیە قدر واراجغنی و هر زوالڭ بر كمالی و هر كمالڭ دە بر زوالی اولاجغنی ذوالفقار معجزات احمدیەؐ و قرآنیە ایلە بیلدكلرندن، او شاكردلر صارصیلماز ایمانلریلە تردّد و شبهە بیلە كتیرمدیلر.

اوت، ناصلكە بر ملّتڭ باشندە غایت قورناز و مانیەتیزمە و ایسپیرتیزمە نوعندن تسخیر ایدیجی حاسّەلریلە ظالمانە، مستبدانە طبیعیّون، مادّیون مذهبلگنی كندینە رهبر ایدن عقللی، شیطان، طالعلی، استدراجلی بر قوماندان بولونور. و تحت حكمندە اولان میلیونلرلە انسانلرڭ و كندیلرینڭ سعی و غیرتیلە یاپدقلری ترقّیات، اییلكلر او ملّتڭ كندینە عائد ایكن، بر تك كوزیلە كندینی دیو آیینەسندە كورەرك و حقسز اولارق او یاپیلان قهرمانلقلر، جسارتلكلر كویا كندندن، كندیسنە و هیكلنە بر نوع ربوبیّت، عبودیتكارانە سجدە ایدرجەسنە باش اگن همپالری طرفندن اولدیغنی ظن ایتدیرن سفیانڭ ظهورینی معجزات احمدیەؐ ایلە بیلدكلرندن، او سفیانڭ یالانجیلقلرینی، حیلەكارلقلرینی و بتون ساختەكار ایشلرینی یالڭز اهل اسلامە دگل، بلكە كائناتە بیلدیرمك و نور محمّدیەؐ و شریعت احمدیەییؐ یڭیدن پارلاتاجق ان شٓاء اللّٰه.

یاقین بر زماندە چیقاجق اولان مهدئ رسول اكبرڭ ظهورینی معجزات احمدیەؐ ایلە ثابت اولدیغنی بیلدكلرندن، دین دوشمانی اولان آوروپە فیلسوفلرڭ و اونلرڭ سوزلرینی كندیلرینە دستور اتّخاذ ایدن بدبخت دینسزلرڭ، زندیقلرڭ دین علیهندە یاپدقلری پروپاغاندەلر، انتریقەلر، البت و البتە صویە دوشوب عقیم قالاجقلرینی بیلدكلرندن نور شاكردلری صارصیلمییورلر.

اوت، ناصلكە بر ملّتڭ سیاست استقامەسی حقّیلە محافظە ایدیلمز ایسە و عدالتی دە یالڭز عدلیەدە قالیرسە، او ملّتڭ عاقبتی باتاقلق اوچورومنە

كیدەجگی بدیهیدر. طبیعیّون و مادّیون دینسزلرڭ، عالم بشریتە صاچدقلری چركین عقیدە تخومی، كویا خالق اعظمڭ خلق ایتدیگی شیلری طبیعتە، مادّۀ قوّتە مال ایدوب خالق كائناتدە، حاشا ثمّ حاشا، جناب حقّڭ هیچ بر مفهومی یوقمش. اویلە چركین عقیدە انسانلری دنیانڭ آجی جلوەسنە اوغرایان كیمسەنڭ كندی كندینە تسلّی ایدەجك یرینی بیراقمدیلر.

اوت، مادامكە هر شیئی طبیعتە، مادّەیە اعتقاد ایدییورلر. مصیبت زمانلرندە باشلرینە بر فلاكت كلدیگی زمان "أمان طبیعت، بڭا امداد أیلە!" دییەمز. یاخود "نە یاپایم، دنیام بویلە كچدی ایسە، آخرتم أیی اولور." دییەمز. چونكە خالقنی انكار ایتمش. ایشتە حقیقی ایمانی اولان ذاتلر، بو دینسز طبیعیّون، مادّیونلرڭ عاقبت چكدكلری أمكلر هباءً منثورًا اولاجغنی بیلدكلرندن، البت بو ظالم دینسزلرڭ و اونلرڭ سوزلرینە اعتماد ایدوب خالقنی انكار ایدنلرڭ یالانلرینی، حیلەكارلقلرینی بتون كائناتە قارشو میدانە چیقاراجق.

سونمز و ابدی و نور محمّدی یەؐ عائد بر نور ظاهر اولاجغنی شبهە ایدیلمدیگندن، اهل اسلامڭ غایت مدهش بر بونغونلق زمانندە، شرقدن غربە قدر بر شیمشك و صاعقەسی كبی كائناتی آیدینلاتان و قرارمش قلبلری دە آن واحددە پارلاتان مبارك "رسالۀ نور" ظاهر اولنجە، عالم اسلامی آیڭ اون دردی كبی آیدینلاتدی. [مِنَ الظُّلُمَاتِ اِلَی النُّورِ] سرّینی اظهار و بر حكمتی ظاهر اولدیغی كبی، ایشتە یوزلرجە سنەدنبری دین علیهنە یاپیلان ظلماتە قارشو رسالۀ نور، او

پروپاغاندەجیلرڭ باشنە و بوزوق بینلرینە بر یانغین بومبەسی كبی پاتلادی. دین علیهنە ایتدكلری قورو دعوالر یالانجی اولدقلرینی، هر ایشلرندە ظالمانە اولدیغنی اهل اسلام ایلە برابر هیچ اسلامیتلكلە علاقەسی اولمایان، دنیانڭ اوبر اوجندەكی كوچك ملّتلر قرآنی قبول ایلە، دیگر بر اوجندە اولان و عموم دنیایە حكمنی سوردیرن و سوزینی دیڭلتدیرن عدالتپرور آمریقە دە آڭلادیكە، خالق كائنات وار اولدیغنی، كندیلرینڭ اجنبی مملكتلردە بولونان تبعەسنی حمایە ایتمك ایچون حكومت طرفندن تعیین ایدیلن بر ایلچیسی اولدیغی كبی، خالق كائناتڭ دە قوللرینە كندینڭ شفقت و مرحمتنە بناءً كندیسنڭ وحدانیتنی و عادل مطلق و رزّاق عالم اولدیغنی بیلدیرمك ایچون البتە بر ایلچیسی، بر پیغمبری اولمسی لازمدر.

ایشتە زنداندن داها قراڭلق اولان بو عصردە شیمدی یە قدر امثالی نادر دگل، بلكە هیچ امثالی اولمایان (رسالۀ نور) ڭ آیدینلغی، كائناتی باشدن باشە احاطە ایتدی. كائناتدەكی طبیعیّونلق مادّیونلق- وهامیتی آرتق كیزلەمەیە باشلادی. حتّی حقیقت كونش كبی ظاهر اولمغە یوز طوتدی. بتون دنیایی همن همن احاطە ایدەجك قدر ایلری كیدن طبیعیّونلق مادّیونلق- دینسزلگی كوكنی قازییاجق. یگانە چارە رسالۀ نورڭ بو نجیب تورك ملّتنڭ و مبارك عزیز وطنڭ ایچندە ظاهر اولمسی، اللّٰە اعلم، تورك ملّتنڭ رفاە سعادتنە اشارت و رحمت رحمانیەیە مظهر اولاجغنە بر علامتدر. طبیعیّونلق -مادّیونلق -دینسزلك

یوزندن زیادە طارلاشان عقللرڭ حكمتلی و عظمتلی مسئلەلری بر تورلی احاطە ایدەمدیگندن، كندیلرینە بر غرورلق حاصل اولارق طوغریدن طوغری یە انكارە، كفرە صاپار.

هم معنویاتدن قرارمش، حتّی ئولمش اولان قلبلر، قیلی قیلدن آییراجق قدر اینجە و كنیش و غایت درین ایمانی مسئلەلری، او معنًا قورومش و صیقیشمش قلبلر بردنبرە احاطە ایدەمدیگندن، زواللی، بدبخت، چار ناچار، چارەسز كفرە، ضلالتە یووارلانوب ابدی اعدام مجازاتنە مستحق اولور.

اوت، اگر او اوچورومدن سیلكینوب كندی كفرینڭ ایچ یوزینە دقّت ایلە نظر ایدرسە شبهەسز كورەجكدركە، بو موجودات و كائناتڭ محقّق بر خالقی وار اولدیغنی و او خالقڭ شفقتنی، مرحمتنی، عدالتنی قوللرینە تبلیغ ایتمك ایچون یینە كندی همجنسندن بر واسطە، بر ایلچیسی، بر پیغمبری واردر. و تبلیغات الٰهیەیی قوللرینە بیلدیرمك ایچون مقدّس بر كتابڭ انزالی محقّق واردر. و او كتابڭ میوەسی حكمندە اولان رسالۀ نور، بر اوجی عرش اعظمدە اولان قرآن حكیمڭ حقیقی ترجمانی اولدیغنە ذرّە مقداری شبهە كتیرمز.

ای دین و مسلك یولندە حافظ و خواجە افندی قرداشلرم! نفسملە برابر سزە دیرم: عنوانمز اولان وراثت الانبیا اولان علم، بزلرە یالڭز شخصمزە عائد دگلدر. بلكە بتون اهل اسلامڭ، حتّی بتون كائناتڭ بزلردە اولان علمدە حقّی و حصّەسی واردر. خلقدن، حقّڭ علمنی كتم ایتمك، بزم ایچون حرامدر، بر جنایتدر. او علم

بزلرە بر امانتدر. امانتە اهانتلك ایتمك ایسە، ایمانڭ مُنْكَرْلگنە علامتدر. علّام الغیوب جَلَّ جَلَالُهُ و تقدَّس حضرتلرندن قورقمایوب حق حقیقتی سویلەمەیوب و نە جهتلە اولورسە اولسون خاطر ایچون طالقاووقلق ایدوب قرآن عظیم الشّانڭ حقیقی احكامنی، حكمتنی بیلدیرمكدن اجتناب ایتمك ایسە بر نوع كافرلكدر.

ایشتە اصل بو زماندەدر. مالكنە قارشو عجزینی اقرار و قصورینی اعتراف ایدوب معبود حقیقیسنە عبادت ایتمك. ایشتە اصل بو زماندەدركە، سنّت سنیّەیە اتّباع ایتمك. ایشتە اصل بو زماندەدركە، اهل سنّت والجماعت مذهبنە اویمق. ایشتە اصل بو زماندەدركە، ایماننە ایمان قاتمق. ایشتە اصل بو زماندەدركە، حقیقی ایمانڭ نە اولدیغنی بیلمەین بر دین قرداشنی ایمان نوریلە تنویر ایتمك.

ایشتە اصل بو زماندەدركە، یولدن صاپمش بر اهل اسلامی یولە كتیرمك. ایشتە اصل بو زماندەدركە، دنیا متاعنە طمع ایتمەیوب حق رضاسی ایچون قرآن حكیمڭ احكامنی بیلدیگمز قدر بیلمەینلرە بیلدیرمك. ایشتە اصل بو زماندەدركە، خالق كائناتی انكار ایتمەیە جسارت ایدن طبیعیّون مادّیونلرە حقّڭ خالق و رزّاق عالم اولدیغنی اثبات ایدرك مدافعە ایتمك. ایشتە اصل بو زماندەدركە، آخرتڭ ایلك و غایت تهلكەلی قاپوسی اولان قبر عذابندن امین اولمق ایچون چارە بولمق.

ای حافظ و خواجە افندی قرداشلرم، نفسملە برابر سزە دیرم: بزە امانت اولان دین محمّدینڭؐ ترقّیسنە بزلر چالیشماز ایسەك، عادل مطلق اولان واجب الوجود جَلَّ جَلَالُهُ و تقدَّس حضرتلرینە نە یوزلە واراجغز؟ مؤكّل بولوندیغمز مقام مباركەنڭ صاحبی، سوكیلی پیغمبریمز علیە الصّلاة والسّلام افندیمزڭ سنّت سنیەسنی بزلر محافظە ایتمز ایسەك، نە یوزلە روز جزادە شفاعت بكلەیەجگز؟ هركسە نصیب اولمایان، آنجق تقدیر الٰهی اولان علمی، بالخاصّە حضرت قرآن عظیم الشّانڭ احكامنی جناب واجب الوجود و تقدَّس حضرتلرینڭ قوللرینە بلا اجرت تبلیغ ایتمز ایسەك، او حقّڭ كلامی حضرت قرآن حكیم روز جزادە بزدن دعوا ایتمزمی؟ رازقمزی ترك ایدوب دنیا متاعی ایچون خلقە بویون اگمك، حقّڭ قاپوسنی ترك ایدوب خلقڭ قاپوسنە عاجزلگمزی تشكّی ایتمك بزم ایچون روامیدر؟ اسلامیتڭ شان و شرفنی آیاقلر آلتنە آلمق دگلمیدر؟ ای نفسم، دوشون! سنی خالقڭ اولان ذو الجلال و تقدَّس حضرتلری اسلامیت اوزرینە یاراتمایوب، خالقنی انكار ایدن دینسزلردن خلق ایدەیدی، نە اولوردڭ، حالڭ نەیە واریردی؟

ای نفسم، رزق ایچون معبود حقیقیدن بكلەمەیوب، كندی رزقە احتیاجی اولان بر عاجز قولە كولە اولمق قدر عادیلك وارمیدر؟ آنا رحمندە بولوندیغڭ زمان رزّاق عالم اولان قادر مطلق و تقدَّس حضرتلری، سنڭ رزقڭی باجەدن ایندیرر كبی آنا رحمندە سنی غدالاندیرمدیمی؟ عالمە عبرت نمونە اولارق عضودە