سز صدّیق و سلیمانلرڭ یولداشی اولدیڭز. یا ربّنا! بزە دە او زمرەدن بر پارچەجق یر آییر اللّٰهم. آمین. آمین. آمین.

بیوك روحلی شهید حسن فیضینڭ روح مباركلریلە طواس شاكردلری نامنە چوق قصورلی و حقیر طلبەڭز محرّم

(٣٨٠)

قرداشلرم، بن رسمی خواجەلرڭ ئوركمكلرندن و نورلرە قارشو لاقیدلرندن قیزمشدم. فقط بو أدهم خواجە بنم حدّتمی ازالە ایتدی. ان شٓاء اللّٰه، ناصل مرحوم حسن فیضی، معلّملری نورلرە سوق ایتمەیە بر وسیلە اولدی. اویلە دە بو ادهم دخی بر قسم خواجەلری سوق ایدەجك. بن بو اوزون مكتوبنی هم تعدیل ایتمك، هم قیصالتمق و حقّمدە پك زیادە ثنالرینی قالدیرمق و اصلاح ایتمك حالم و وقتم مساعدە ایتمدیگندن سزە حوالە ایدرم. بو مكتوب مستقل یازیلسین. مدار عبرت اولارق قورقاقلغندن نورلردن چكینن بعض خواجەلر اوقوسون. هم مكتوبڭ بر قسمی دە لاحقەیە كچسین.

سعید النّورسی

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

چوق سوكیلی استادیمز افندیمز حضرتلری،

عن اصل روم ایلیلی یم. هجرتم بالیكسردر. جلال الدّین رومی * قدّس اللّٰه سرّه منسوبلرندنم. یگرمی سنەیە قریب كوی خواجەلغی و چوجق اوقوتمقلە مشغول اولمقدەیم.

رسالۀ نورە خدمتم بو سنە ممكن اولدیغی قدر هم كندم اوقویوب استفادە ایتمك، هم دە مملكتم اولان بالیكسر و قرە آغاچ حوالیسندەكی قرداشلریمی تنویر ایتمك مقصدیلە رسالۀ نوردن رسالە یازوب كوندرییورم.

قرق سنە، بلكە یوز سنەدنبری دینمز "نور محمّدیەؐ" نورینی سوندیرمك ایچون وار قوّتلریلە سعی و غیرتدە بولونان آوروپە فیلسوفلرینڭ و اونلرڭ سوزلرینە اعتماد ایدن بر طاقیم بدبختلرڭ دین علیهنە یاپدقلری پروپاغاندەلرلە او درجە ایلری كیدیلدیكە، دیننە تعظیم ایدوب معبود حقیقیسنە عبادت ایدن بر مؤمنە كندی نظرلری ایلە ویا باطل فكرلریلە كندیلرینە مناسب اولان سوزی او مؤمنە اسناد ایدرك، دنیانڭ فكرسزی اولدیغنە اولان اعتقادلری و كلاملری، ایمانندە نقصانیت اولانلری تعجّبدە بیراقدیلر. حتّی او زواللیلر اویلە ظن ایتدیلركە، آرتق نور ایمانیە یڭیدن پارلامق ایچون خارج امكان اولدیغنە قانع اولدیلر. ایمان حقیقی بولان نور شاكردلری ایسە، ذرّە مقداری ایمانلرینە خلل كتیرمدكلری كبی، اویلە سرسملرڭ باطل اعتقادلری و یاپدقلری پروپاغاندەلر، عادتا صولدە صفر حكمندە قالاجغنی یقینًا بیلدكلرندن، او منكرلرڭ یالڭز اهل اسلامە دگل، بتون عالم بشریتە یاپدقلری چركین عقیدەلری نە درجەیە قدر واراجغنی و هر زوالڭ بر كمالی و هر كمالڭ دە بر زوالی اولاجغنی ذوالفقار معجزات احمدیەؐ و قرآنیە ایلە بیلدكلرندن، او شاكردلر صارصیلماز ایمانلریلە تردّد و شبهە بیلە كتیرمدیلر.

اوت، ناصلكە بر ملّتڭ باشندە غایت قورناز و مانیەتیزمە و ایسپیرتیزمە نوعندن تسخیر ایدیجی حاسّەلریلە ظالمانە، مستبدانە طبیعیّون، مادّیون مذهبلگنی كندینە رهبر ایدن عقللی، شیطان، طالعلی، استدراجلی بر قوماندان بولونور. و تحت حكمندە اولان میلیونلرلە انسانلرڭ و كندیلرینڭ سعی و غیرتیلە یاپدقلری ترقّیات، اییلكلر او ملّتڭ كندینە عائد ایكن، بر تك كوزیلە كندینی دیو آیینەسندە كورەرك و حقسز اولارق او یاپیلان قهرمانلقلر، جسارتلكلر كویا كندندن، كندیسنە و هیكلنە بر نوع ربوبیّت، عبودیتكارانە سجدە ایدرجەسنە باش اگن همپالری طرفندن اولدیغنی ظن ایتدیرن سفیانڭ ظهورینی معجزات احمدیەؐ ایلە بیلدكلرندن، او سفیانڭ یالانجیلقلرینی، حیلەكارلقلرینی و بتون ساختەكار ایشلرینی یالڭز اهل اسلامە دگل، بلكە كائناتە بیلدیرمك و نور محمّدیەؐ و شریعت احمدیەییؐ یڭیدن پارلاتاجق ان شٓاء اللّٰه.

یاقین بر زماندە چیقاجق اولان مهدئ رسول اكبرڭ ظهورینی معجزات احمدیەؐ ایلە ثابت اولدیغنی بیلدكلرندن، دین دوشمانی اولان آوروپە فیلسوفلرڭ و اونلرڭ سوزلرینی كندیلرینە دستور اتّخاذ ایدن بدبخت دینسزلرڭ، زندیقلرڭ دین علیهندە یاپدقلری پروپاغاندەلر، انتریقەلر، البت و البتە صویە دوشوب عقیم قالاجقلرینی بیلدكلرندن نور شاكردلری صارصیلمییورلر.

اوت، ناصلكە بر ملّتڭ سیاست استقامەسی حقّیلە محافظە ایدیلمز ایسە و عدالتی دە یالڭز عدلیەدە قالیرسە، او ملّتڭ عاقبتی باتاقلق اوچورومنە

كیدەجگی بدیهیدر. طبیعیّون و مادّیون دینسزلرڭ، عالم بشریتە صاچدقلری چركین عقیدە تخومی، كویا خالق اعظمڭ خلق ایتدیگی شیلری طبیعتە، مادّۀ قوّتە مال ایدوب خالق كائناتدە، حاشا ثمّ حاشا، جناب حقّڭ هیچ بر مفهومی یوقمش. اویلە چركین عقیدە انسانلری دنیانڭ آجی جلوەسنە اوغرایان كیمسەنڭ كندی كندینە تسلّی ایدەجك یرینی بیراقمدیلر.

اوت، مادامكە هر شیئی طبیعتە، مادّەیە اعتقاد ایدییورلر. مصیبت زمانلرندە باشلرینە بر فلاكت كلدیگی زمان "أمان طبیعت، بڭا امداد أیلە!" دییەمز. یاخود "نە یاپایم، دنیام بویلە كچدی ایسە، آخرتم أیی اولور." دییەمز. چونكە خالقنی انكار ایتمش. ایشتە حقیقی ایمانی اولان ذاتلر، بو دینسز طبیعیّون، مادّیونلرڭ عاقبت چكدكلری أمكلر هباءً منثورًا اولاجغنی بیلدكلرندن، البت بو ظالم دینسزلرڭ و اونلرڭ سوزلرینە اعتماد ایدوب خالقنی انكار ایدنلرڭ یالانلرینی، حیلەكارلقلرینی بتون كائناتە قارشو میدانە چیقاراجق.

سونمز و ابدی و نور محمّدی یەؐ عائد بر نور ظاهر اولاجغنی شبهە ایدیلمدیگندن، اهل اسلامڭ غایت مدهش بر بونغونلق زمانندە، شرقدن غربە قدر بر شیمشك و صاعقەسی كبی كائناتی آیدینلاتان و قرارمش قلبلری دە آن واحددە پارلاتان مبارك "رسالۀ نور" ظاهر اولنجە، عالم اسلامی آیڭ اون دردی كبی آیدینلاتدی. [مِنَ الظُّلُمَاتِ اِلَی النُّورِ] سرّینی اظهار و بر حكمتی ظاهر اولدیغی كبی، ایشتە یوزلرجە سنەدنبری دین علیهنە یاپیلان ظلماتە قارشو رسالۀ نور، او

پروپاغاندەجیلرڭ باشنە و بوزوق بینلرینە بر یانغین بومبەسی كبی پاتلادی. دین علیهنە ایتدكلری قورو دعوالر یالانجی اولدقلرینی، هر ایشلرندە ظالمانە اولدیغنی اهل اسلام ایلە برابر هیچ اسلامیتلكلە علاقەسی اولمایان، دنیانڭ اوبر اوجندەكی كوچك ملّتلر قرآنی قبول ایلە، دیگر بر اوجندە اولان و عموم دنیایە حكمنی سوردیرن و سوزینی دیڭلتدیرن عدالتپرور آمریقە دە آڭلادیكە، خالق كائنات وار اولدیغنی، كندیلرینڭ اجنبی مملكتلردە بولونان تبعەسنی حمایە ایتمك ایچون حكومت طرفندن تعیین ایدیلن بر ایلچیسی اولدیغی كبی، خالق كائناتڭ دە قوللرینە كندینڭ شفقت و مرحمتنە بناءً كندیسنڭ وحدانیتنی و عادل مطلق و رزّاق عالم اولدیغنی بیلدیرمك ایچون البتە بر ایلچیسی، بر پیغمبری اولمسی لازمدر.

ایشتە زنداندن داها قراڭلق اولان بو عصردە شیمدی یە قدر امثالی نادر دگل، بلكە هیچ امثالی اولمایان (رسالۀ نور) ڭ آیدینلغی، كائناتی باشدن باشە احاطە ایتدی. كائناتدەكی طبیعیّونلق مادّیونلق- وهامیتی آرتق كیزلەمەیە باشلادی. حتّی حقیقت كونش كبی ظاهر اولمغە یوز طوتدی. بتون دنیایی همن همن احاطە ایدەجك قدر ایلری كیدن طبیعیّونلق مادّیونلق- دینسزلگی كوكنی قازییاجق. یگانە چارە رسالۀ نورڭ بو نجیب تورك ملّتنڭ و مبارك عزیز وطنڭ ایچندە ظاهر اولمسی، اللّٰە اعلم، تورك ملّتنڭ رفاە سعادتنە اشارت و رحمت رحمانیەیە مظهر اولاجغنە بر علامتدر. طبیعیّونلق -مادّیونلق -دینسزلك

یوزندن زیادە طارلاشان عقللرڭ حكمتلی و عظمتلی مسئلەلری بر تورلی احاطە ایدەمدیگندن، كندیلرینە بر غرورلق حاصل اولارق طوغریدن طوغری یە انكارە، كفرە صاپار.

هم معنویاتدن قرارمش، حتّی ئولمش اولان قلبلر، قیلی قیلدن آییراجق قدر اینجە و كنیش و غایت درین ایمانی مسئلەلری، او معنًا قورومش و صیقیشمش قلبلر بردنبرە احاطە ایدەمدیگندن، زواللی، بدبخت، چار ناچار، چارەسز كفرە، ضلالتە یووارلانوب ابدی اعدام مجازاتنە مستحق اولور.

اوت، اگر او اوچورومدن سیلكینوب كندی كفرینڭ ایچ یوزینە دقّت ایلە نظر ایدرسە شبهەسز كورەجكدركە، بو موجودات و كائناتڭ محقّق بر خالقی وار اولدیغنی و او خالقڭ شفقتنی، مرحمتنی، عدالتنی قوللرینە تبلیغ ایتمك ایچون یینە كندی همجنسندن بر واسطە، بر ایلچیسی، بر پیغمبری واردر. و تبلیغات الٰهیەیی قوللرینە بیلدیرمك ایچون مقدّس بر كتابڭ انزالی محقّق واردر. و او كتابڭ میوەسی حكمندە اولان رسالۀ نور، بر اوجی عرش اعظمدە اولان قرآن حكیمڭ حقیقی ترجمانی اولدیغنە ذرّە مقداری شبهە كتیرمز.

ای دین و مسلك یولندە حافظ و خواجە افندی قرداشلرم! نفسملە برابر سزە دیرم: عنوانمز اولان وراثت الانبیا اولان علم، بزلرە یالڭز شخصمزە عائد دگلدر. بلكە بتون اهل اسلامڭ، حتّی بتون كائناتڭ بزلردە اولان علمدە حقّی و حصّەسی واردر. خلقدن، حقّڭ علمنی كتم ایتمك، بزم ایچون حرامدر، بر جنایتدر. او علم

بزلرە بر امانتدر. امانتە اهانتلك ایتمك ایسە، ایمانڭ مُنْكَرْلگنە علامتدر. علّام الغیوب جَلَّ جَلَالُهُ و تقدَّس حضرتلرندن قورقمایوب حق حقیقتی سویلەمەیوب و نە جهتلە اولورسە اولسون خاطر ایچون طالقاووقلق ایدوب قرآن عظیم الشّانڭ حقیقی احكامنی، حكمتنی بیلدیرمكدن اجتناب ایتمك ایسە بر نوع كافرلكدر.

ایشتە اصل بو زماندەدر. مالكنە قارشو عجزینی اقرار و قصورینی اعتراف ایدوب معبود حقیقیسنە عبادت ایتمك. ایشتە اصل بو زماندەدركە، سنّت سنیّەیە اتّباع ایتمك. ایشتە اصل بو زماندەدركە، اهل سنّت والجماعت مذهبنە اویمق. ایشتە اصل بو زماندەدركە، ایماننە ایمان قاتمق. ایشتە اصل بو زماندەدركە، حقیقی ایمانڭ نە اولدیغنی بیلمەین بر دین قرداشنی ایمان نوریلە تنویر ایتمك.

ایشتە اصل بو زماندەدركە، یولدن صاپمش بر اهل اسلامی یولە كتیرمك. ایشتە اصل بو زماندەدركە، دنیا متاعنە طمع ایتمەیوب حق رضاسی ایچون قرآن حكیمڭ احكامنی بیلدیگمز قدر بیلمەینلرە بیلدیرمك. ایشتە اصل بو زماندەدركە، خالق كائناتی انكار ایتمەیە جسارت ایدن طبیعیّون مادّیونلرە حقّڭ خالق و رزّاق عالم اولدیغنی اثبات ایدرك مدافعە ایتمك. ایشتە اصل بو زماندەدركە، آخرتڭ ایلك و غایت تهلكەلی قاپوسی اولان قبر عذابندن امین اولمق ایچون چارە بولمق.

ای حافظ و خواجە افندی قرداشلرم، نفسملە برابر سزە دیرم: بزە امانت اولان دین محمّدینڭؐ ترقّیسنە بزلر چالیشماز ایسەك، عادل مطلق اولان واجب الوجود جَلَّ جَلَالُهُ و تقدَّس حضرتلرینە نە یوزلە واراجغز؟ مؤكّل بولوندیغمز مقام مباركەنڭ صاحبی، سوكیلی پیغمبریمز علیە الصّلاة والسّلام افندیمزڭ سنّت سنیەسنی بزلر محافظە ایتمز ایسەك، نە یوزلە روز جزادە شفاعت بكلەیەجگز؟ هركسە نصیب اولمایان، آنجق تقدیر الٰهی اولان علمی، بالخاصّە حضرت قرآن عظیم الشّانڭ احكامنی جناب واجب الوجود و تقدَّس حضرتلرینڭ قوللرینە بلا اجرت تبلیغ ایتمز ایسەك، او حقّڭ كلامی حضرت قرآن حكیم روز جزادە بزدن دعوا ایتمزمی؟ رازقمزی ترك ایدوب دنیا متاعی ایچون خلقە بویون اگمك، حقّڭ قاپوسنی ترك ایدوب خلقڭ قاپوسنە عاجزلگمزی تشكّی ایتمك بزم ایچون روامیدر؟ اسلامیتڭ شان و شرفنی آیاقلر آلتنە آلمق دگلمیدر؟ ای نفسم، دوشون! سنی خالقڭ اولان ذو الجلال و تقدَّس حضرتلری اسلامیت اوزرینە یاراتمایوب، خالقنی انكار ایدن دینسزلردن خلق ایدەیدی، نە اولوردڭ، حالڭ نەیە واریردی؟

ای نفسم، رزق ایچون معبود حقیقیدن بكلەمەیوب، كندی رزقە احتیاجی اولان بر عاجز قولە كولە اولمق قدر عادیلك وارمیدر؟ آنا رحمندە بولوندیغڭ زمان رزّاق عالم اولان قادر مطلق و تقدَّس حضرتلری، سنڭ رزقڭی باجەدن ایندیرر كبی آنا رحمندە سنی غدالاندیرمدیمی؟ عالمە عبرت نمونە اولارق عضودە

نقصانمی یاراتدی؟ بو قدر نعمتلر یتمەمش كبی، فضلە آیریجە دە هم دنیایی، هم آخرتنی پك یاقیندن آڭلامق ایچون سڭا علم ویرمدیمی؟ بونجە نعمتلرە مقابل أوامر الٰهیەیە قارشو سن نە یاپدڭ؟ ای نفسم، عادل مطلق اولان اللّٰه جَلَّ جَلَالُهُ و تقدَّس حضرتلری، سندن اوّل كلن بعض علم صاحبلری قرآن حكیمڭ احكامنی ترك ایدوب یاڭلیش یاخود یالان فتوا ویرن طالقاووقجیلرڭ داها آخرتە كیتمدن عقوبت الٰهیە باشنە كلدیگنی كورمدڭمی؟

ای نفسم، سندن اوّل كلن علمیلە عامل عالملرڭ جسملری ئولوب كندیلرینی ألآن رحمت اللّٰه علیه اسمیلە یاد ایدیلدیگنی ایشیتمدڭمی؟ هم بویلە مبارك ذاتلرڭ احواللرینە أوزنجڭ اولمایورمی؟

ای نفس، كوزڭلە كوردڭ، قولاغڭلە ایشیتدڭ، سن راحت راحت شاهانە یاشار ایكن، استادیمز حضرت بدیع الزّمان حضرتلری دین اوغرندە یالڭز اهل اسلامە دگل، بلكە عالم كائناتڭ اعدام ابدیدن حیات ابدیەیە تبدّل ایچون كندینڭ استراحتنی خاطرینە بیلە كتیرمدن، كیجەسنی كوندوزینە قاتوب چالیشمقدە ایكن متعدّد دفعەلر نیجە نیجە مشكلاتلرە، انكللرە معروض قالدی. كرچە هر یردە حقّڭ عنایتیلە مخاصملرینە قارشو غلبە چالدی. هم كندینڭ، هم دینڭ مخاصملری یقینًا آڭلادیلركە، استاد حضرتلرینە دگل كندیلری، بتون خلق باشنە هجوم ایتسە، كندیسنە قارشو مغلوب اولاجق. آرتق كندیسیلە مصالحە

ایتمكدن باشقە چارە اولمدیغنی چوق أیی بیلدیلر. كندیسنڭ اڭ زیادە شو دنیادە آلدیغی ذوق، یگانە غایەسی بشریتی ضلالتدن قورتاروب سعادتە قاووشدیرمقدر. و بوندن آلدیغی ذوقی هیچ بر شیدن آلماز. هم كندیسنە حقدن كلن مصیبتلرە او درجە افتخار ایدركە، سرورندن غایت نشئەلی بولونمسی بتون عالمی حیرت و تعجّبدە بیراقییور. هلە فقر و قناعتی او درجەدركە، بشرڭ صبر و تحمّلی امكان خارجندەدر.

ایشتە ای نفسم، بو مبارك ذات محترمی بو احوالدە و بو اخلاق حمیدەدە اولدیغنی بیلییورسڭ. او دە سنڭ كبی بر نوع بشر، انسان دگلمیدر؟ یالڭز اسلاملرە دگل، بتون بو عصردەكی انسانلرە رهبر اولدیغنی بیلییورسڭ. نە ایچون اونڭ تعقیب ایتدیگی یولدن یورومییورسڭ؟ اونڭ تعقیب ایتدیگی یولدن بو عصردە یورومەمك، بتون اهل اسلام ایچندە، بالخاصّە حافظ و خواجەلر ایچون غایت مدهش بر خطادر، بر قباحتدر، بر عقلسزلقدر.

ای نفسم، سن نەیڭە كوونوب كندی منفعتڭدن باشقە كیمسەنڭ اییلگنی دوشونمییورسڭ؟ ای نفسم، سن آز چوق علم صاحبیسڭ، اللّٰهدن قورق، علمڭ حسابنی محقّق ویرەجكسڭ.

ای نفسم، أیی دیڭلە: بتون انسانلری ضلالتدن قورتارمق ایچون چالیشان و جناب حقّڭ بویوردیغنی [وَاِذْ اَخَذَ اللّٰهُ مٖیثَاقَ الَّذٖینَ اُوتُوا الْكِتَابَ لَتُبَیِّنُنَّهُ لِلنَّاسِ وَلَا تَكْتُمُونَهُۘ] الی آخِرِ الاٰیة اوامر الٰهیەیی یرینە كتیرمك ایچون

مشكلاتلرە معروض قالاجغنی هیچ تخطّر ایتمەین. و دینی آلت ایدوب دین علیهنە هجوم ایدن پروپاغاندەجیلرە و طبیعیّونلرە، مادّیونلرە، دینسزلرە غلبە ایدن. طالقاووقلق ایتمەین. و دنیا متاعی ایچون دیننی دنیایە دگیشمەیە ارتكاب و تنزّل ایتمەیوب و یالڭز ثروت ابدیە، سعادت سرمدیە اولان حق رضاسندن باشقە بر مطلوبی اولمایان. و اسلاملر آراسندە فرقەجیلقلە علاقەسی اولمایان هلە اخلاق حمیدەسی عرش رحمانە اولاشان و عالم بشریتە شفقت و مرحمتی یتیشن.. زهرلری تریاق یاپان. بتون انس و جنّی، دوست و اغیاری، یرلی و یبانجی یی، زنكینی، فقیری ایمان نوری زنجیرلریلە صارصیلماز رابطەلرلە باغلایان. بر اوجی عرش اعظمدە اولان اللّٰه جَلَّ جَلَالُهُ كلامنڭ حقیقی ترجمانی اولان رسالۀ نور خادمی و ترجمانی. و صاحب ذوالفقارڭ معنوی اولادی. و بتون نور شاكردلرڭ سرداری. معجزات احمدیەؐ ایلە ثابت آخر زماندە رحمت اولارق كوندریلەجك حضرت بدیع الزّمان رضی اللّٰە تعالی عنه حضرتلرینڭ اڭ كوچك بر شاكردی اولمق قدر اوندن داها فرح و سرور و اخروی بر سعادت و بختیارلق وارمیدر عجبا؟

رسالۀ نور یاردیمجیلرندن، خصوصًا مدرسة الزّهرا اركان رجال كبارندن و بتون رسالۀ نور شاكردلرینی بر قرداش كبی كندینە مساوی قیاس ایدن و عقللرە حیرت ویریجی قلمیلە بش یوز نسخەیی بردن یازان و استاد حضرتلرینڭ یاری اولان و رسالۀ نورڭ قهرمان یاردیمجیسی، هیچ بر شیدن ییلمایان، جسور،

غیّور، فعّال خسرو كبی بر ذات محترمڭ بر كوچك قرداشی اولمق قدر شیمدی ممنون ایدەجك بر شی وارمیدر عجبا؟

ازجملە، مدرسة الزّهرا اركان رجالندن، رسالۀ نور اوغرندە یورولمق نە اولدیغنی بیلمەین و رسالۀ نور حقّندە اولان مشكلاتلرە كوگس كرن و رسالۀ نور انتشاری ایچون هر تورلی فداكارلغە آتیلان طاهری كبی بر محترم ذاتڭ قرداشی مقابلندە بولونمق قدر شو زماندە سویملی بر شی وارمیدر عجبا؟

ازجملە، كنچلگی ایلە برابر صارصیلماز ایمانی ایلە یوزلرلە، بلكە بیڭلرلە اهل اسلامی، رسالۀ نورڭ نوریلە مستغرق ایتمك، كیجەسنی كوندوزینە قاتان، هر جهتلە سعی و غیرت ایتمكدە اوصانچ حسّی دویمایان، باشدە استاد حضرتلری اولدیغی حالدە بتون نور شاكردلرینڭ حسن توجّهنی قزانان چالیشقان عاطف كبی قیمتلی بر ذاتە قرداش اولمق قدر شو عصردە طاتلی، لذّتلی بر شی وارمیدر عجبا؟

ازجملە، بولوندیغم اعلا مسجد كویندە، رسالۀ نور حقّندە نقدًا و بدنًا وار قوّتلری ایلە چالیشان احمد حمدی و مصطفی خواجە و قدیر قرداشلرلە برلكدە بولونمق ذوقی كبی كوزل ذوق وارمیدر؟

ازجملە، مَاجَلْ كویندە آرا پوستەسی یاپان دلی احمد چاووش و اختیارلغیلە برابر كیجە كوندوز رسالە یازمقلە مشغول اولان حسن اونباشی قرداشلر و ازجملە محیطدە اڭ زیادە رسالۀ نور شاكرد بوللغی اولان و همن همن هپسی

حافظ و خواجە اولان قریۀ عرفان قرداشلرڭ رسالۀ نوری روحلری كبی سَون، عادتا یك دیگریلە فعّالیت خصوصندە رقابت ایدن قرداشلرە قومشو اولمق قدر سوینچلی دویغو بو كائناتدە وارمیدر عجبا؟ خصوصًا عموم كائناتی، بالخاصّە زندیقلری حیرتدە بیراقان رسالۀ نورڭ ترقّیاتی ایچون نور زنجیرلریلە برابر باغلی اولان و یك دیگریلە اولان انسیّت قرداشلقدن زیادە اولان عموم رسالۀ نور شاكردلرینڭ یانندە بولونمق قدر شو كائناتدە اخروی غدا ویرەجك قیمتلی بر شی وارمیدر عجبا؟

ایشتە ای نفسم، بونلری ایشیتدڭ. بو فانی دنیانڭ وفاسی اولمدیغنی یقینًا پك اعلی بیلیرسڭ. ای نفسم، انصاف ایت. فانی دویغولر ایچون ابدی لذّتلری ترك ایتمك قدر جناب حقّڭ عندندە و رسول اللّٰه صلّی اللّٰە علیە وسلّم عندندە و بتون انبیالر و اولیالر عندندە داها چركین، داها عادیلك، داها بیوك قباحت، قصور وارمیدر؟ هایدی نفسم، آرتق طورمق دیڭلنمك زمانی دگلدر. همن چالیشملی. عنایت حقدن، همّت رسالۀ نوردن، چالیشمق دە بزدن. پاك ال و آیاقلریڭزی اوپەرك خیرلی دعالریڭزی بكلرز. و بو طرف طلبەلریڭزڭ جملەسی سلاملرلە سلامتلریڭزی جناب حقدن تمنّی أیلرلر.

بالیكسر، قرە آغاچ و حوالیسی نور شاكردلری نامنە صندیقلی اعلا مسجد كوی امامی پك قصورلی ابراهیم ادهم طلاس

قسمًا لاحقەیە. رأیڭزە حوالەدر.

(٣٨١)

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ بِعَدَدِ مَالَا یُحْصٰی لَهُ

عزّتلی استادم افندم حضرتلری،

تعظیمات و تكریمات فائقەمی عرض و تقدیم ایلە مبارك دست و دامن پاكلرینی بوس و توجّهات كرمكاریلرینی طلب و نیاز أیلرم.

اخیرًا اوقودیغم مؤثّر بر فقرەدە، افلانیلی، افلاطون مثال و حقیقتًا فداكار و حقیقتلی بر مقالەیی یازان احمد فؤاد افندی قرداشمز، رسالۀ نورڭ ترجمان فرید و ناشر یكتاسنە ارتحال بابندە، بقیۀ عمرینی بخش و فدا ایتمك امل خالصانەسیلە یازییورلركە، محتاج، عاجز، علیل، بیچارە، كمتر طلبە و مؤمنلرە دریندن درینە آجیلر و ألملر ایراث ایدن الوداع و الفراق اشارتلریڭزە مقابل، ای شوكتلی سلطانم و ای رهبر عالیشانم، سز عزّت و دولت و حتّی دلّالی بولوندیغڭز كتاب كریم ربّانی اولان قرآن مبین ایلە بر یاشاییڭز.

سالف العرض، رحلت میعادینڭ آجیقلی مباحثی بزلری ایچین ایچین یاقوب اریتییور. سزە بدل اولارق بنی قبول بویوریڭز، دییور. بناءً علی ذٰلك قطعی قناعت و یقینی ایمانمز واركە، اهل ایمانڭ و خصوصیلە هیئت نوریەنڭ حیات ممات یری اولان و غزوۀ احدی آڭدیران معهود وقعەنڭ پك شدّتلی و غایت