[سادسًا] بورادەكی اوّلجە مصادرە ایدیلن بر نسخە ذوالفقار، آفیوندە چوقلرڭ ایماننی قورتاردیغنی و والی معاونی اونی تمامیلە اوقویوب چوق بگندیگنی سویلەمش. صوڭرە دە آنقرەیە كوندرمشلر. ان شٓاء اللّٰه اورادە دە چوقلرڭ ایماننی قورتاراجق. مادام برقاچ آی اوّل هم اسپارطەدن، هم بورادن اللرینە برر نسخە كچمش. هیچ ایلیشمك ترشّحاتی كورونمدی. البتە ذوالفقار غلبە ایتمش. شاید اهمّیتسز، ضررسز بر ایلیشمك كبی بر شی اولسە دە، هیچ مراق ایتمەییڭز. هیچ اهمّیتی یوق. عموم قرداشلریمزە بیڭلر سلام و دعا ایدییورز.

اَلْبَاقٖی هُوَ الْبَاقٖی قرداشڭز سعید النّورسی

لاحقەیە كچسین

(٤٠٣)

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

هَرْكِە دَادْ اِقْرَارْ اِینْجَا مَحْرَمِ اَبْرَارْ شُدْ

قَلْبِ آنْ اَزْ عِشْقِ رِسَالَۀِ نُورْ پُرْ اَنْوَارْ شُدْ

ایمانمزی نورٌ علی نور ایدن، جاندن سوكیلی استادیمز افندیمز حضرتلری،

محل اسكانم اولان بالیكسر، قرە آغاچ حوالیسندەكی نورجی قرداشلریمزی زیارت ایچون ایكی هفتە مأذونیتلە كیتدم. الحمد للّٰه زیارت ایتدم. اورانڭ نورجی قرداشلریمزڭ یگرمی بشە قدر بالغ اولدیغنی و شیمدیكی حال حاضردە

رسالۀ نورە هوسی، سویەلری، حضرت خالق كائناتڭ عنایت حكمتیلە و معجزات احمدیەؐ ایلە و سز استادیمزڭ دعا و همّتڭزلە رسالۀ نور او محیطدە غایت بیوك بر رغبت قزانمشدر.

عاجزانە او قرداشلریمڭ رسالۀ نورە تعظیمًا فعالیتلرینی و رسالۀ نورڭ هر واردیغی قراڭلق یرلری و قرارمش قلبلری آن واحددە آیدینلق ایچندە بیراقدیغنڭ تأثیرینی كورنجە، سرورمدن آغلامەیە باشلادم. غایت چوق افتخار أیلەدم. و ان شٓاء اللّٰە تعالی كندیلرندن و هر برینڭ قیصە كنیەسیلە طلبەلگە قبولی خصوصندە استرحامكارانە بر مكتوب كوندرەجكلر. یالڭز بن عاجزڭ قلبمدە بر اندیشە واردی. او دە عاجزانە ذات فاضلانەلرینە عرض احترامات و كولەڭزی دە نورجی قرداشلریمزڭ اڭ كری صفنە و اڭ تنبل بر شاكردی اولارق قبولی خصوصندە بر مكتوب كوندرمشدم. قبول اولاجقمی یم عجبا، چوق تردّددە ایدم. عودتمدە اعلا مسجد كوینە كلدیگمدە نورجی قرداشلرمدن مصطفی خواجە و احمد حمدی چاووش و عبد القادر قرداشلرم بنی كورنجە دیدیلر، مژدە اولسون: استادیمز افندیمز حضرتلرندن مكتوبڭ جوابی كلدی. و اوقومقلغم ایچون بڭا ویردیلر. ویردیلر امّا، او مبارك مكتوب شریفی اوقومق ایچون سرورمدن مجال قالمدی. عجائب بر حال واقع اولدی. ١٣٠ خانەلك اولان اعلا مسجد كوی عاجزانەمە طار كلدی. آرتق او مسعود كونمزڭ تاریخنی بولوندیغم اوطەمڭ باشم اوجنە یازدم. یالڭز عاجزانەمی دگل، عموم نورجی قرداشلریمزڭ قلبلرینی تنویر ایدوب

شرفلندیرن مكتوبڭزدە رسالۀ نورڭ انتشاری حقّندە چوق یوكسك فعّالیت و جسارت كوسترن مدرسة الزّهرا اركانی اولان آغابگمز خسرو و قرداشلریمزە بویورمشسڭزكە: (حقّمدە اولان ثنالری قالدیروب صوڭرە لاحقەیە كچیریڭز) كولەڭز لاحقەیە كچەجك قدر اولمادیغم كبی، عاجزانە فاضلانەلریڭزڭ شخص عالیڭزی مدح و ثنا ایتمدم. و خطا دییە بویوردیغڭزی عاجزانەم بیلمەیەرك دگل، بیلەرك و دوشونەرك یازدم. كرچە یگرمی یدنجی سوزدە بویورمشسڭزكە، صحابەلرە كیمسە ایریشەمز.

محترم استادیمز افندیمز، كرچە بر مقدار تعجیز ایدەجگز، لطفًا و حالمزە مرحمتًا عفو بویورمەڭزی كوز یاشلریمزلە یالواریرز. كولەڭز هر نرەدە اولورسە اولسون، حق حقیقتی ظاهرًا كوروب و قلبًا تصدیق ایتدكدن صوڭرە، حاشا مِنْ حضور، بر طاقیم انانیتلیلرە وار قوّتملە مدافعە ایتمەیە هر وقت هر آن حاضرم. چونكە حق حقیقتی كیزلەمك عادتًا دگل، حقیقی و قطعی بر جرمدر.

شیمدی یە قدر امثالی نادر دگل، تمامًا امثالی بولونمایان رسالۀ نور كبی تأثیرلی و دیننی ایماننی هركسڭ آڭلایاجغی بر شكلدە بر كتاب اولدیغنی انانیتلی خواجەلردن باشقە بتون اهل ایمان تقدیر ایتمكدەدر. بالخاصّە زنداندن داها قراڭلق بو فساد زماندە، حقیقی اخروی بر علاج حكمنی آلان رسالۀ نورڭ انتشاری حقّندە ییلمادن اوصانمدن و هر شیئی كوزینە آلان و هر تورلی مشقّتلرە قاتلانان، هر فداكارلغی اسیركەمەین سز استادیمز دگلمیسڭز؟ بو دە شخصڭزی

مدح و ثنامیدر، بونی دە سویلەمەیەلممی؟ بو عصردە هیچ عالم خواجە یوقمی ایدی؟ بو سفر مأذونًا بالیكسرە كیتدیگمدە، اسكی بلدیە میدانندە غزتە بایعنڭ دكّانی اوڭندن كچركن بر چوق دینی مجموعە و غزتەلر كوزیمە ایلیشدی. همن درت دانەسنی آلدم. بو مجموعە و غزتەلر بو سنە انتشار ایتمكدەدر. رسالۀ نور ایسە ٥٠-٦٠ سنەدنبریدر. بو غزتەجی، محترم، عالم، مؤلّف، خواجە افندیلر مملكتمزە بو سنەمی كلدیلر؟ داها اوّل بو مملكتدە دگلمی ایدیلر؟ خصوصًا ١٣٢٤ حرّیت اعلانندە آوروپە فیلسوفلرینڭ چركین عقیدە تخوملرینی مملكتمزە صاچمق ایستەدیگی زمان، صانجاق شریف ایلە آیاصوفیە جامع شریفندە آوروپەلیلرە قارشو بیڭلرلە خلق ایلە میتینگ یاپوب و آوروپەنڭ انكار ناشری اولان مطبعەلری حكومتڭ شرفنڭ محافظەسی و دین محمّدیەنڭؐ سلامتلگی ایچون تخریب ایدیلمدیمی؟ بونی دە سویلەمەیەلممی؟

سوكیلی استادیمز افندیمز، اهل ایمانە حقیقت یولمزی شو جملەلر ایلە عرض ایتمەیی مناسب كوردم: شمع روحمزلە جسممزی پروانە دوشوردڭ ٭ حَیْفا یولمزی كندیمزی عمّانە دوشوردڭ ٭ تقدیر ایدەمەییز درد درونمزدە الممز وار ٭ مولایی سورسەڭز سویلتمەیڭ غممز وار ٭ دیڭلەیڭ سوزیمزی ای اهل ایمان ٭ أوزكە، ادادر حقّە دوست ٭ ای منكر، بزم صحبتمزی كل كور ٭ بتون دردلرە دوادر حقّە دوست ٭ رسالۀ نورلری اوقومق، جانە صفا روحە غدا، حقّە دوست ٭ رسالۀ نورلری یازمق، قلبە جلا، عشق خدادر حقّە دوست ٭

سز استادیمز افندیمز حضرتلری! دین مبین حقّندە یاپمش اولدیغڭز خدمتلری، بالخاصّە فیلسوفلرڭ اڭ تضییقلری زمانلرندە بیلە بلا تردّد حقدن باشقە هیچ بر شیدن ییلمایان نور محمّدیەییؐ هركسڭ آڭلایابیلەجگی بر شكلدە اهل ایمانی آگاه ایتدیگڭزدە، او زمان مذكور مجموعە و غزتەلرڭ جسمی دگل، اسمنی آڭمق كیمڭ حدّی وار ایدی؟ عجبا بونی دە سویلەمەیەلممی؟ یوزیڭزە قارشو مدح و ثنا بن اصلا و قطعیًّا قبول ایتمەدیگڭزی چوق أیی بیلیرز. مع مافیه بر دریایە بر طرفدن دگل، برقاچ یردن بولانیق چای آقسە بولاندیرماز. صوڭرە خلق بینندە حقّڭزدە دیل اوزاتاجق كیمسە اولماز.

حتّی اهل اسلام، اهل ایمان دگل، بلكە هیچ ایمان و اسلاملق ایلە علاقەسی اولمایان غیر مسلملر بیلە حق حقیقتی كورنجە بر شی سویلەمەیە جرئت ایدەمزلر. بلكە دە تقدیر ایدرلر. رسالۀ نورڭ سیاست ایلە، پولیتیقە ایلە، فرقەجیلق ایلە علاقەسی اولمدیغنی و آنجق غایۀ فكری ابدی حیاتڭ وثیقەسی بر ترخیص تذكرەسی اولان ایمان یولی اولدیغنی، كونشدن داها عیان اولدیغنی كوردیگمز حالدە، نە ایچون بو زمانڭ اخروی اڭ الزم علاجی حكمندە اولان رسالۀ نورە ال برلگی ایلە صاریلوب بر وجود كبی، بر قرداش كبی، رسالۀ نوری هم یازالم، هم اوقویالم، هم دە دین ایمان یولندن صاپمش دین قرداشلریمزی هیچ بر شیئی مطلوب و مقصد ایتمەمك شرطیلە آگاه ایتسەك اولمازمی؟ هم بو ایمان یولی حقّندە حكومتدن

قورقاجق بر شی یوقدر. حكومتمزڭ پولیتیقەسنە و قانونلرینە آیقیری بر حركت اولمدیغی كبی، اساس حكومتدن قورقولاجق شیلردن قورقمایز.

تورك ملّتنڭ ناموس و شرفنی اجنبیلرە قارشو تحقیر ایدر درجەسندە، توركیە دینی، علمی خواجەلرینی كرك حكومت، كرك تورك ملّتی ادارە ایتدیرەمییور دە كوی كوی، قاپو قاپو كزییورلر، اجنبیلر بو سوزی بزە سویلەمزلرمی؟ ایشتە ملّتی سَون صایان اویلە هم دینڭ، هم قانونڭ امرلرینە مغایر چركین حاللردن واز كچملی یز. بز حافظ و خواجە افندیلر، بدیع الزّمانؓ نور قرآنلە یالڭز اهل اسلامە دگل، عموم انسانلرە بر اخروی سفرە قوردی. و هركسڭ اشتهاسنە كورە اخروی لذیذ ییمكلرلە تزیین أیلەدی. نصیبی اولوب ییین و دین قرداشلرینە تقدیم ایدن، فَوْز و نجات بولدی.

بیڭ اوچ یوز سنە اوّلندن، توركلر بر چوق دینلری كندیلرینە رهبر اولارق قبول ایتدیلر. دین محمّدیەؐ ظهورندە و حضرت قرآن عظیم الشاندە اولان اوامر الٰهیەیی كندیلرنجە پك طوغری و اویغون بولدقلرندن و یك دیگریلە قبیلە قبیلە آرالرندە غوغا اكسیك اولمازدی. حالبوكە حضرت قرآن بونلری دوست دوشمان، فقیر زنكین، كوچك بیوك بر صفدە حقّڭ دیواننە طورمەیی و حقّیلە اوامر الٰهیەیی یرینە كتیرنە قلبنە الهام ربّانی واقع اولدیغنی توركلر كورنجە، دین محمّدیەؐ اوغرندە هر تورلی فداكارلقلردن كندیلرینی اسیركەمدكلری كبی، اڭ عزیز اولان جانلرینی دە بلا تردّد فدا ایتدیلر. ایشتە شیمدیكی مدنی عالم، بتون

اوصافیلە مدنیّتی توركلردن آلدیلر. بو عزیز نجیب تورك ملّتی و بزم اجدادیمز، بو دین مبینی طقوز یوز سنە عالم كائناتە حیرت ویریجی ادارەسنی حكومت حاضرە پك اعلی بیلیر. و بیلدیگی ایچون یالڭز خارجە قارشو لادینی اعلان ایتدی. یوقسە كندی ملّتنە توركلرڭ دینی یوقدر دینمز و دییەمز. هر نە ایسە

رسالۀ نور مؤلّفنی و شاكردلرینی محكمەیە سوق ایتمەنڭ سببی ایسە ایكی جهتدندر.

[برنجی جهت] بر قسم طریقتجی، فقط انانیتلی ذاتلر سبب اولدیلر. بو وضعیتلرینە آگاه اولان حكومت، عجبا بدیع الزّماندەؓ اویلە چركین وضعیت اولوب اولمدیغنی عدلی موازنە اولان محكمە ترازوسنە قویوب طارتدیلر. نتیجۀ محكمەدە كرك رسالۀ نور مؤلّفنی، كركسە شاكردلرینڭ برائتنی و بر اوجی عرش اعظمدە اولان رسالۀ نورڭ انتشارینە سربست اولمەسنە قرار ویردیلر.

[ایكنجی جهت] عقلدن و فكردن استعفا ایتمش بعض كوچك مأمور و ضابطە، حكومتە یوزلی كورونوب بر منصب قزانمق، یاخود باشقە بر منفعت و مطلوب سببیلە دینسزلگی سیاستە، سیاستی دینسزلگە آلت ایدرك حكومتڭ یوكسك مأمورلرینی اوهاملاندیرارق، هر احتمالە قارشو عجبا دییە محكمەیە سوق ایدیلدی. هم نتیجۀ محكمەدە، هم اهل وقوفڭ تدقیقندن صوڭرە یالڭز تورك ملّتنە دگل، بتون كائناتڭ زمانڭ اڭ زیادە كرك اخروی، كرك دنیوی احتیاجی اولان و خالق ذوالجلالڭ بالذّات كندی كلامی اولان قرآن عظیم الشّانڭ حقیقی ترجمانی اولان رسالۀ نورڭ سربست انتشارینە مساعدە ایدیلدی.

بدیع الزّمانڭؓ كوز نظارتندە بولونمقلغنڭ سببی دە شودر: بو مسئلە حكومتِ حاضرەنڭ كندیسنڭ سَرَفْ بر افكار معنویسیدر. یوقسە حكومت جمهوریە شیمدی دگل، ایلك بدایتندنبری بدیع الزّمانیؓ انسانیّت ترازوسندە موازنە ایتدی. اونڭ تمثیل ایتدیگی رسالۀ نور و شاكردلرینڭ شخص معنویسی، شیمدی عالمِ بشریتدە بتون اوصافیلە و دینڭ و انسانلغڭ بتون اخلاق ممدوحەسیلە او معنوی شخص متّصف اولارق، حقیقی قصورسز، هم ذرّە مقداری لكەسز خلق اولونمش و غایۀ فكری بشر عالمنی هیچ بر مطلوب و مقصد اولمامق شرطیلە رحمت الٰهیەیە قاووشدیرمق ایچون خلق اولونمش، یگانە دنیانڭ اڭ دیندار و اڭ بیوك مرشدیدر.

محترم استادیمز افندیمز حضرتلری، بولوندیغم اعلا مسجد كویندن زیردەكی اسامیلری یازیلی قرداشلریمڭ كندی ایستك آرزولریلە شاكردلگە قبول بویورمقلغڭزی جان و كوڭلدن كوز یاشلریلە یالواریرلر.

١- ملّا مستان ٢- مصطفی خواجە ٣- احمد حمدی چاووش ٤- عبد القادر ٥- علی شن كل ٦- اسماعیل پالا ٧- محمد پالا ٨- حسن قوچاق ٩- عبد اللّٰه چاوش ١٠- احمد قیلینچ ١١- محمد آتماجە ١٢- ابراهیم قایغوسز ١٣- ابراهیم جاران ١٤- بكر آق طاش ١٥- احمد قوچاق ١٦- مصطفی جَوِزْ ١٧- احمد آق چای ١٨- مصطفی ییلماز ١٩- حسن اسن.

رسالۀ نور، جناب حقّڭ عنایتیلە و سز استادیمزڭ دعا و همّتڭزلە و بتون نورجی قرداشلریمزڭ دعالریلە یاقین وقتدە چوق ترقّی ایدەجگنە قانع اولمەڭزی و بو خصوصدە مستریح و متسلّی اولمەڭزی و مبارك كوڭل شریفڭزی دائما مسرور بولوندیرمەڭزی استرحام أیلرز. سز استادیمز افندیمز ممنون مسرور بولوندقجە، بز دە كندیمزی بیوك بر بختیار عد ایدەجگمزە شبهە ایتمەییڭز. خیر دعاڭزی بكلرز.

هی هی، نەدر اول حَالِ مُعَنْبَرْ رُوحُ اَنْوَرْ ٭ اول ساقئ كوثر، اول رُوحُ مُصَوَّرْ

سیر ایت نیجە جمع أیلەمش اول نور ایلە ناری ٭ ذی صنعت جاری ذی قدرتِ باری

نور شاكردلرینی قطار أیلەدی طریق محمّدەؐ ٭ اول شاە مُمَجَّد، اول مَطْلَبُ و مقصدە

ای منكر سن اولسە كورسەڭ بو پٖیشِ قطاری ٭ چك عشق ایلە باری بی ورد ایلە حاری

ای واهمە، ای وَالِهْ، ای شُورٖیدَە، ای شیدا ٭ ای پستە با ای دیوانە و رسوای

درد ایلە، بلا ایلە كچور لیل و نهاری ٭ قیل نالە وزاری نوش أیلە بحاری

یا یورگمزی دیل جگریمزی كوركە نەلر وار ٭ نور شوقیلە طوغریدن طوغری یە حقّە خبر وار

یا رب! نورجیلری حضرتنە راهی باغیشلا ٭ یا درد ایلە بر آه سحر كاه باغیشلا

آلدڭ دل كمراهمزی قویدڭ بزی بی دل ٭ باری یرینە بر دل آگاه باغیشلا

اعلا مسجد كوی امامی ابراهیم ادهم طلاس

[٤٠٤]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم طاهری، صبری، صلاح الدّین، محمد، مصطفی!

[اوّلًا] بو كلن شهور ثلاثەنڭ حرمتنە و نور شاكردلرینڭ صداقت و اخلاصلرینڭ حرمتنە، چوق اهمّیتلی، حقّمدە بر سبب عتاب و طوقات بر حادثەیی تعمیرە چالیشیڭز و كوجنمەییڭز. شویلەكە: بو كیجە هیچ كورمدیگم بر عتاب، بر تعذیب صورتندە معنوی بر شدّتلی اخطار ایلە دینیلدیكە: "دنیایە، ذوقە، كیفە تنزّل ایتمەمكلە نورلردەكی اخلاصی و استغنایی محافظە ایتمەیە مكلّفدڭ. و بو عصردە [یَسْتَحِبُّونَ الْحَیٰوةَ الدُّنْیَا] سرّیلە دنیایی دینە ترجیح ایتمك و بیلەرك الماسی شیشەیە تبدیل ایتمك اولان خستەلغە، نور واسطەسیلە تداوی یە چالیشمەیە وظیفەداردڭ. یوز تجربەڭزلە دە آڭلادڭكە، انسانلرڭ هدیەلری، احسانلری، یاردیملری سڭا طوقونویور. حتّی سنی خستە ایدییور. هر كون اثرینی، تجربەسنی كورییورسڭ. سنڭ اڭ زیادە اعتماد ایتدیگڭ و رسالۀ نورڭ فداكار قهرمانلرینڭ یوزلرینی رسالۀ نورڭ خدمتندن زیادە كندی استراحتڭە چویرمگە سببیت ویردڭ" الٰی آخر. دییە داها چوق سویلەنیلدی دییە، بنی تام تكدیر ایتدی. حتّی شیمدی بر معنوی طوقاتدن دخی قورقویورم. بو حادثەنڭ چارۀ یگانەسی،

بو اوطوموبیلی آلان سزلر اعلان ایدەجكسڭزكە: "بو قرداشمز سعید، بونی قبول ایدەمدی. معنوی، دهشتلی بر ضرر حسّ ایتدی."

[ایكنجیسی] اوطوموبیل، شیمدی قونیەلی صبرینڭ یاننە كوندریلملی، اورایە كیتسین. او راضی اولمازسە، مدرسة الزّهرا اركانلرینە كیتسین. صبری مراق ایتمەسین، هر آی نورلرە اونڭ خارقە خدمتی، بر اوطوموبیل فیئٓاتندن زیادەدر. اونڭ ایچون كوجنمەسین.

[ثانیًا] قطعیًّا بیلیڭزكە، بو دهشتلی عتابی كوردیگمڭ سببی، استراحت ایچون بر آرزو نوعندە و بر تمنّی طرزندە، بر اوطوموبیللە كزمگە كیتدیگم وقتدە، اوطوموبیلجی دیدیكە: كوچوجك اوطوموبیللر چیقمش، بیڭ لیرە كبی بر فیئٓاتلە صاتیلییور. بن دە تمنّی نوعندە دیدمكە: كاشكە، اویلە بر امانت كوچك اوطوموبیل المزە كچسە ایدی، سائر یرلردەكی نورجی قرداشلریمی زیارت ایتسە ایدم، دیمشدم. بوڭا حقیقی و جدّی بر قرار ویرمەمشدم. بر آرزو ایكن، بورادەكی ایكی خاص قرداشمز، بو آرزویی جدّی بر قرار ظن ایدوب بیڭ لیرە دگل، درت بیڭ لیرەیە قدر فداكارانە چالیشمشلر. بورایە كلدكلری وقت، یدی ساعت ممنونیتلە تلقّی ایدوب، او آرزویی بر دعای مقبولە ظن ایتدیگم حالدە، بردن بتون كیجەدە معنوی اعتراض و عتاب كوردم. او آرزومڭ خطاسنی آڭلادم. هیچ كورمدیگم بو طرز معنوی عتابڭ اوچ سببی وار، باشقە وقت ایضاح ایدیلەجك.

بو اوطوموبیلی آلان بش قرداشمز قطعیًّا بیلسینلركە، دگل بشنڭ بر اوطوموبیل صدقە و احسان و هدیە ایتمشلر، بلكە اونلرڭ خیرلی نیّتلری جهتندە رسالۀ نور دائرەسی خدمتندە هر بری تام بر اوطوموبیل فیئٓاتی قدر بر هدیە بالفعل یاپمشلر كبی معنًا قبول ایدیلدیگنە بڭا بر اشارت و قناعت وار. مادام قرداشلرم، سزڭ خالصانە بو خدمتڭز حقّڭزدە بویلە مقبولیت وار. سز متأثّر اولماییڭز. بنی دە بو معنوی عتابدن قورتاریڭز. هم بنم دستور حیاتمە، هم رسالۀ نورڭ سرِّ اخلاصنە كلمك احتمالی بولونان ضرری چابوق تعمیر ایدیڭز.

هم او اوطوموبیل بورادە قالماسین، اڭ بیوك حصّەیی ویرن ذاتڭ یاننە كیتسین. اوچ اهمّیتلی سببی ایضاح ایتدیگم وقت، بو تلاشمڭ حقیقتنی آڭلارسڭز. ذاتًا هم شهور ثلاثە، هم اوچ آی مهم مجموعەلرڭ چیقمەسنە قدر، بتون دنیا سلطنتی ویریلسە دە باقمامەیە مجبورم. شاید اوطوموبیلە ویردیگڭز پارە تام چیقماسە، او نقصاننی علی كل حال بن هر شیئمی صاتوب تكمیل ایتمەیە قرار ویردم. عمومڭزە سلام. حقّڭزی بڭا حلال ایدیڭز. بن دە سزی حلال ایدییورم.

اَلْبَاقٖی هُوَ الْبَاقٖی

قرداشڭز سعید النّورسی

[٤٠٥]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلًا] بتون روح و جانمزلە هم شهور ثلاثەڭزی، هم مدرسة الزّهرانڭ اركانلرینی عصای موسی نڭ مكمّلیتیلە تبریك ایدییورز. و یازانی و یاردیمجیلرینی چوق تقدیر و تحسین ایلە بارك اللّٰه دیرزكە، بو درجە كوزل و صحّتلی چیقمەسنە موفّق اولمشلر. حتّی بوكون اون برنجی مسئلەیە قدر آلتمش ایكنجی صحیفەیە قدر باقدم. معنایە ضرر ویرمەین، پك آز سونوك و نقطەلردن باشقە، یالڭز اوننجی صحیفەدە آلتنجی سطردە (غیبی بیلدیرمەمكدر) یرندە، سهوًا (بیلدیرمكدر) یازیلمش. هم اوتوز سكزنجی صحیفەدە یگرمنجی سطردە، (اون بش سنە جزادە)، سهوًا (سنە) لفظی یازیلمامش. اللی ایكنجی صحیفەنڭ طوقوزنجی سطرندە (عزّت ربّانیە ) دن اوّل، سهوًا (رحمیت) كلمەسی دە یازیلمش. (عزّت) كلمەسندن اوّلكی (رحمیت) سهودر. هم اللی دردنجی صحیفەدە طوقوزنجی سطردە (شریعت درسندن توحید درسنە) یرندە، سهوًا (درجەسنە) یازیلمش. اللی یدیدە سكزنجی سطردە (اڭ بیوك حقیقتی)، سهوًا نقصان بیراقیلارق (حقیقی) یازیلمش. اللی سكزدە ایكنجی سطردە (بر معجزۀ معنویە) سونوك چیقمشدر. یوز یگرمی طقوزنجی صحیفەدە سكزنجی سطردە (اسناد ایدیلمزسە)، سهوًا (اسناد ایدیلسە) یازیلمش. یوز اوتوز طقوزنجی صحیفەدە اون آلتنجی سطردە (خارقە موازنەلری وار)، سهوًا

(موازلری وار) یازیلمش. یوز آلتمش سكزنجی صحیفەدە اوننجی سطردە (تقدیس ایتمك نیت ایدوب)، سهوًا (تقدیس ایدوب نیت ایدوب) یازیلمش.

٢٠٨ نجی صحیفەسندە برنجی سطرندە باشندە (ویا چركینلگنی)، سهوًا نون یازیلمامش (چركینلگی) یازیلمش. ٢١٨ نجی صحیفەسنڭ صوڭ سطرندە (بزلر بر انسان كامل اسمنە)، سهوًا (اویلە بر انسان) یازیلمش. ٢٢٤ نجی صحیفەدە سكزنجی سطردە (آیینەسندە عمومی نور)، سهوًا (نور) نقصان قالمش. ٢٢٥ نجی صحیفەدە ٦ نجی سطردە (او مقامە متعدّد استعدادلر) یرندە، سهوًا (مستعد اولان استعدادلر) یازیلمش. ٢٤١ نجی صحیفە ٤ نجی سطردە (شیمدی پلانلر عقیم قالدی)، سهوًا (عقیم قالدی) نقصاندر. ٢٤٣ نجی صحیفە ١٨ نجی سطردە (و معرفت)، سهوًا (او معرفت) بر الف زیادە. ٢٤٦ نجی صحیفە ١٢ نجی سطردە (الكشفیات)، سهوًا (كشفیات) یازیلمش. ٢٤٨ نجی صحیفەدە ١٤ نجی سطر (كَوَاهٖینْ) لفظی سونوكدر. ٢٤٩ نجی صحیفەدە ١ نجی سطرڭ باشی (عَلٰی یَدَیْهِ)، سهوًا (بَدَیْهِ) یازیلمش. ٢٤٩ نجی سطردە (كَمَالَاتِ عِبَادِهٖ)، سهوًا (عبادة) یازیلمش. صوڭ سطرندە (وعجزها ونقصها) یرندە، (نقضها) یازیلمش. بر نقطە زیادەدر. ایكی یوز اوتوز دردنجی صحیفەدە اون طقوزنجی سطردە (معرفتلرندن ماللرینڭ قیمتنی دخی بیلدكلری ایچون) یرندە، سهوًا (مصرفلرندن ماللرینڭ دخی قیمتنی دخی بیلمدكلری ایچون) یازیلمش. هم عین سطردە (علمانڭ آراسندە)، سهوًا (آرقەسندە) یازیلمش.

چوق ممنون و منّتدار و مسرور قرداشڭز سعید النّورسی