بر هفتەدنبری سزە كوندرمك ایچون بكلەیوردی. چونكە زیادە اوهاملرندن پوستەخانەلرە چوق دقّت ایتدكلرندن پوستە ایلە كوندرمدك. سزڭ دە محكمەجە حقیقی وضعیتڭزی مراق ایدییورز. قرداشمز برهانڭ بر كوچك مصیبتی وارمش دییە یازییور، نە ایمش؟ مراق ایتدك. جناب حق دفع ایتسین. هم رأفت بگ، هم عبد اللّٰه چاوشڭ مكتوبلرندن چوق ممنون اولدم. اونلرە خصوصًا سلام ایدییورم. عمومە سلام.

اَلْبَاقٖی هُوَ الْبَاقٖی

قرداشڭز سعید النّورسی

[٥٠٢]

[رئیس جمهورە كوندریلن استدعانڭ ذیلیدركە، مجبور اولدم یازمغە]

بڭا هجوم ایدن غرضكارلرڭ اڭ اساسلی سببی، مصطفی كمالڭ دوستلغی و طرفكیرلگی وسیلەسیلە بنی ازییورلر. بن دە او غرضكارلرە دیرمكە: ئولمش كیتمش و دنیادن و حكومتدن علاقەسی كسیلمش بر آدم حقّندە اوتوز سنە اوّل بر حدیث شریفڭ اخباریلە، قرآنە ضررلی اویلە بر آدم چیقاجق دیدیگمی و صوڭرە مصطفی كمال او آدم اولدیغنی زمان كوستردی.

بن دە بش یوز سنەدنبری قهرمانلغیلە و حقپرستلگیلە دنیایە میدان اوقویان قهرمان بر اوردونڭ شرفنی و ظفرینی، خلاف حقیقت اولارق مصطفی كمالە ویرمدیگم ایچون، غرضكار دوستلری بنی یگرمی سنەدر بهانەلرلە تعذیب ایدییورلر.

اوت -محكمەدە اثبات ایتدیگم كبی- شرفلر، مثبت خیرلر، مادّی معنوی غنیمتلر اوردویە، جماعتە ویریلیر، توزیع ایدیلیر. قصورلر، منفی اجراآتلر باشە، رئیسە ویریلیر دییە بر قاعدۀ حقیقتلە، قهرمان اوردونڭ و بالفعل عسكر و عسكر باشندە چالیشان جسور ضابطلرڭ ظفرلری و شرفلری مصطفی كمالە ویریلمز. بلكە قصورلر، خطالر یالڭز اوڭا ویریلیر دییە بنی اونی سومەمكلە اتهام ایدنلری، قهرمان اوردویی سومەمكلە و شرفلرینی قیرمقلە اتهام ایدوب اونلرە خائنِ ملّت نظریلە باقییورم. بو حقیقتی محكمەدە اثبات ایتدیگم كبی، اونڭ اڭ معنّد دوستلرینە دە اثبات ایتمەیە حاضرم. بن بو مبارك ملّتڭ بهادر اوردوسنڭ میلیونلر افراد و ضابطلرینی سَورم. حرمتلرینی، حیثیتلرینی المدن كلدیگی قدر محافظە ایدییورم. بنم قارشومدەكی غرضكار معارضلرم، بر تك آدمی سومك یولندە، میلیونلر افرادە معنًا اهانت، بلكە عداوت ایدییورلر.

اوت چوق امارەلرلە بیلدمكە، بڭا هجوم ایدنلری تحریك ایدن، مصطفی كمالە اعتراضمدر و اوڭا دوست اولمادیغمدر. باشقە سببلر بهانەدر. بونڭ ایچون مجبور اولدمكە، او معارضلریمە دیرم: او بنی تلطیف ایتمك و بتون ولایات شرقیّەیە واعظ عمومی یاپمق ایچون آنقرەیە ایستەدی. بن اورایە كیتدم. بو كلن اوچ مادّە، بنی اونڭ دوستلغندن واز كچیردی. یگرمی سنە انزوادە عذاب چكدم، دنیالرینە قاریشمدم.

[برنجی مادّە] بر حدیث شریفڭ، آخر زماندە عنعنات اسلامیەنڭ ضررینە چالیشاجق دییە خبر ویردیگی آدم، بو اولدیغنی افعالیلە كوسترمسیدر. بن اوتوز آلتی سنە اوّل او حدیثی تفسیر ایتمشدم. عینًا بو آدمدە معناسی چیقمش. محكمەدەكی مدافعاتمڭ اوچنجی اساسندە ایضاحی وار.

[ایكنجی مادّە] بر شیئڭ وجودی و تعمیری و حیاتی، اوڭا عائد بتون اركان و شرائطڭ وجودیلە اولابیلمەسی. و او شیئڭ عدمی و تخریبی و ئولمسی، بر تك شرطڭ بوزولمەسیلە اولدیغی بر قاعدۀ حقیقتدر. عمومڭ دیللرندە "تخریب، تعمیردن چوق قولایدر" دییە ضرب مثل اولمشدر. بو قطعی قاعدەیە بناءً، میداندە كورونن اهمّیتلی قصورلر و تخریباتلر او قوماندانڭ خطاسندن. و اهمّیتلی شرفلر و ظفرلر ایسە اوردونڭ قهرمانلغندن كلدیگندن. او فنالقلری اوڭا، او اییلكلری اوردویە ویرمك لازم كلیركن، بتون بتون عكسنە اولارق جماعتڭ خیرینی باشدەكی بر فردە و او فردڭ شرّینی جماعتە ویرمك دهشتلی بر حقسزلق اولمسیدر.

[اوچنجی مادّە] جماعتڭ خیرینی و اوردونڭ ظفرینی باشە ویرمك و او باشڭ قصورینی جماعتە اسناد ایتمك ایسە، بیڭلر خیرلری بر تك خیرە ایندیرمك و بر تك قصوری بیڭلر قصور یاپمقدر. چونكە ناصل بر طابور بر دهشتلی دوشمانی ئولدیرسە، هر بر نفری بر غازیلك رتبەسنی آلیر و یالڭز بیڭباشیسنە ویریلسە،

بیڭدن برە اینر، بر تك غازی اولور. او بیڭباشینڭ خطاسیلە ظالمانە بر قتل یاپیلسە و اوڭا ویریلمەیوب طابورە ویریلسە، او بر تك قتل بیڭ جنایت حكمنە كچەرك بیڭ نفری مسئول ایدر و جزایە چارپار.

عینًا اویلە دە، میداندەكی كورونن اهمّیتلی قصورلر، اونلری ایشلەین ئولمش آدمە ویریلمزسە، بش یوز، بلكە بیڭ سنەدنبری غازیلگنی و حقپرستلگنی دنیایە كوسترن و فرمان شرفنی و قرآنە بایراقدارلغنی قیلیچلریلە و قانلریلە امضالایان بر اوردویە حوالەسیلە، او قصورلر بیڭلر درجە و اركانلری عددنجە زیادەلشیر. او اوردونڭ پك پارلاق ماضیسنی دهشتلی قرارتیر و بو عصرڭ اوردوسنی، كچن عصرلرڭ عین اوردولری اوڭندە محجوب و مسئول ایدر. و موجود ظفرلر، شرفلر تك بر آدمە ویریلسە بیڭلر درجە كوچولور، اركان و افراد عددنجە غازیلك و خیرلر بر تك حكمنە كچر، سونر. داها قصورلرە قارشو كفّارت الذّنوب اولماز.

ایشتە بو سببلر ایچوندركە، بن اونڭ دوستلغنی بیراقوب، اونڭ یرینە، اهمّیتلی بر زماندە ایچندە بولوندیغم و تأثیرلی خدمت ایتدیگم او اوردونڭ دوستلغنی آلدم و بیڭلر درجە داها اهمّیتلی شرفنی محافظەیە رسالۀ نور ایلە چالیشدم.

امرطاغندە سعید النّورسی

[٥٠٣]

[عدلیەنڭ شخص معنویسنە و داخلیە وكیلنە برای معلومات تقدیم ایدیلن و امرطاغندەكی استنطاقدە ویردیگم افادەنڭ حاشیە و لاحقەسیدر.]

بو یگرمی بش سنەدنبری هیچ بر غزتەیی اوقومایوب، دیڭلەمەیوب، دونكی كون بڭا خدمت ایدن بر آدم، غزتەنڭ بر پارچەسنی بڭا اوقودی. ایچندە، آنقرە معارف دائرەسی (ایكی میلیون لیرە ضررلە)، هم یینە آنقرەدە اوطوموبیل غاراژی بناسی، عین وقتدە ازمیردە اهمّیتلی فابریقە، هم عین وقتدە آطنەدە بیوك بر بنانڭ تمامًا یاندیغنی ایشیتدیگم وقت، پك چوق تأثّر و یازیقلرلە بو فقیر ملّتە آجیمقلە، عین زماندە بتون عمرمدە چكمدیگم بر صیقینتی ایچندە و هیچ بر محكمەدە بنم كبی اختیار و خستە حالمدە درت بوچوق ساعت متمادیًا افادەمی سؤآل جوابە- مجبور اولدیغم بر زماندە، اگر بورا عدلیەسنڭ انسانیّتی و بر درجە شفقتی اولماسە ایدی، قطعیًّا طایانامدیغم كبی، قطعی قرار ویرمشدمكە، سرت بر سوز ایلە بو صوغوقدە، بو خستەلغمدە حپسە كیرمەیی كوزیمە آلمشدم. حتّی بڭا خدمت ایدنڭ برینی اوطەمدە یاتیرمق، برینە بر طوقات اوروب بنم خدمتم ایچون حپسە، یانمە كلمك ایچون قرار ویرمشدك. فقط بورا عدلیەسنڭ انسانیّتی و عنایت الٰهیە بڭا صبر ویردی، تحمّل ایتدم.

بو عجیب وضعیتڭ و اصلسز اوهامڭ سببنی مراق ایتدم. كنچلك رهبرینڭ رسمًا طبع ایدیلمسی و انتشاری ایلە، پك چوق مكتبلری تنویر ایتمش. حتّی آنقرە

دار الفنونندەكی و استانبول دار الفنونندەكی قیمتدار كنچلرڭ رسالۀ نورڭ اساساتنی، بو وطن ملّتنڭ سعادتنە بر وسیلەسی اولدیغنی بیلمەلری و پك چوق معلّملر، حمیّت ملّیّە و وطنیّە و حیثیت علمیە جهتیلە رسالۀ نورە كمال اشتیاق ایلە علاقەدار اولمەلری، معارف دائرەسنڭ نظر دقّتنی جلب ایتمش. نورلرە قارشو بر درجە بگنمەمك طرزندە بر ایلیشمك ایستەمشلر. حتّی بورادە كنچلری الدە ایدییور، مطبوع كنچلك رهبری ایلە مكتب طلبەلرینڭ نظرلرینی دینە چویرییور، دییە اخبار ایدیلمش. بونڭ اوزرینە هم بڭا، هم اكثر رسالۀ نور شاكردلرینە بعض ولایتلردە ایلیشیلمش.

حالبوكە بن، مدرسەدن چیقدیغم ایچون خواجەلردن استمداد ایتمك لازمكن، بتون قوّتملە معارف دائرەسنە و مكتبلیلرە اعتماد ایدوب اونلرە طایانمق ایستەیوردم. چونكە نور دائرەسنە كیرنلرڭ چوغی مكتبلیلردر، خواجەلر آزدر. چوغی چكیندیگی حالدە، مكتبلیلر، كمال تقدیر ایلە نورلرە صاحب چیقدیغندن، قلبمدن دیردم: ان شٓاء اللّٰه معارف دائرەسی، نور شاكردلرینی حمایە ایدەجك. و یاردیملری بكلركن، بردن بزە بو یڭی تعرّضڭ سببی، مطبوع كنچلك رهبرینڭ آخرندە "نور شاكردلری، حكومتڭ مساعدەسنە بناءً، ممكن اولدیغی قدر نور درسخانەلری آچیلمق مناسبدر دییە" بزم كیزلی دوشمانلریمز معارف دائرەسنی علیهمزە چویرمگە چالیشمەسی بر وسیلە اولدی.

شیمدی یە قدر او دوشمانلریمز، دسیسەلرلە قاچ دفعە عدلیە جهتیلە بزی پریشان ایتمك ایستەدیلر، موفّق اولامدیلر، بر شی دە چیقارامدیلر. صوڭرە متعصّب و انانیتلی و رسمی مقاملردەكی خواجەلری علیهمزە سوق ایتمەیە چالیشدیلر، اوندە دە بر شیئە موفّق اولامدیلر. شیمدی اڭ زیادە بڭا یاردیمە كووندیگمز معارف ادارەسنی علیهمزە استعمال ایتمكلە، حكومتڭ بعض مأمورلرینی اوچ محكمەدە قطعی برائت قزاندیغمز جمعیتجیلك و طریقتجیلق بهانەسیلە، كنیش بر دائرەدە بیچارە معصوم نور شاكردلرینە و بنی رسالۀ نورڭ مطالعەسندن محروم ایتمەیە چالیشدقلری بر زماندە و بنم آجیناجق درت بوچوق ساعت استنطاقمڭ عین وقتندە معارف دائرەسنڭ سببسز یانمسی و سوندیریلمەسنە هیچ امكان بولونمامەسی و تمامًا یانمسی، تصادفە بڭزەمییور، بر اثر حدّت كورونویور.

او افادەمڭ آخرندە و عین زماندە دیمشدمكە: بنی بو غربتدە، یالڭزلقدە كتابلریمڭ مطالعەسندن محروم ایتمەییڭز. یوقسە هم بڭا، هم بو وطنە یازیق اولور. [حاشیە] بلكە زمین، یینە زلزلە ایلە حدّت ایدر دیدیگمدن، اوچ دقیقە صوڭرە اوچ ثانیە دوام ایدن زلزلە و او فقرەیی محكمەدە تكرار ایتدیگم عین زماندە - یا كیجە ویا كوندوزدە- زمین آتشلە معارف دائرەسنە صالدیرمسی و محكمەجە درت دفعە اثبات ایدیلن چوق دفعە زلزلەنڭ رسالۀ نورە و شاكردلرینە تعرّضڭ

عین زمانندە كلمەسی، البتە بوندە تصادف اولاماز. دیمك بو وطنڭ و ملّتڭ و آسایشڭ بیوك بر تمل طاشی اولان رسالۀ نورڭ حقیقتلریدركە، بویلە وقوعاتلی طوقاتلرلە بو ملّتڭ نظر دقّتنی قرآنڭ حقیقی و حقیقتلی و قوّتلی بر تفسیری اولان رسالۀ نورە چویرییور. ملّتی اوڭا تشویق ایدوب معارضلرینە شفقت طوقادی اورویور.

شیمدی ناصل صدقە بلایی دفع ایدییور، اویلە دە، رسالۀ نور بو مملكتدە بلانڭ دفعنە وسیلە اولدیغی، چوق حادثەلرلە تحقّق ایتمش. بو دفعە دە رسالۀ نورە هجوم ایدیلدیگنڭ عین زمانندە بو یانغین بلاسنڭ كلمەسی، رسالۀ نور بلانڭ دفعنە وسیلە اولدیغنی اثبات ایدییور.

سعید النّورسی

[بِسْمِ اللّٰهِ الرَّحْمٰنِ الرَّحٖیمِ]

یَٓا اَللّٰهُ یَا رَحْمٰنُ یَا رَحٖیمُ یَا فَرْدُ یَا حَیُّ یَا قَیُّومُ یَا حَكَمُ یَا عَدْلُ یَا قُدُّوسُ

اسم اعظمڭ حقّنە و قرآن معجز البیانڭ حرمتنە و رسول اكرم علیە الصّلاة والسّلامڭ شرفنە، بر قلم ایلە بیڭلر نسخە یازان خسروی و مبارك یاردیمجیلرینی و نورجی آرقداشلرینی جنّت الفردوسدە سعادت ابدیەیە مظهر أیلە. آمین! و خدمت ایمانیە و قرآنیەدە دائما موفّق أیلە. آمین! و دفتر حسناتلرینە بو مجموعەنڭ هر بر حرفنە مقابل بیڭ حسنە یازدیر. آمین! و نورلرڭ نشرندە ثبات و دوام و اخلاص احسان أیلە. آمین! آمین! آمین!

یا ارحم الرّاحمین! عموم رسالۀ نور شاكردلرینی ایكی جهاندە مسعود أیلە. آمین! انسی و جنّی شیطانلرڭ شرلرندن محافظە أیلە. آمین! و بو عاجز و بیچارە سعیدڭ قصوراتنی عفو أیلە. آمین! آمین! آمین!

عموم نور شاكردلری نامنە سعید النّورسی