السّلام ای شَمْعَۀِ نُورُ هِدَایَتْ، السّلام

السّلام ای مَطْلَعِ مِهْرِ سَعَادَتْ، السّلام

كُلْبُنُ توحیددە غنجۀ همراه ٭ محمد خلوصی افندی قرداش

نور توحید ایسە دلدە دل آرا ٭ بر حق نما ذاتە اولمشسڭ یولداش

طوتدیغڭ دامنی الدن بیراقما ٭ علم لَدُنْ ذاتە اولمشسڭ سرداش

كرم كریمە بو مظهریت ٭ بر قَدْرِ وَالاَیە اولدیغڭ حالداش

حمد أیلە مولایە رُوبَرْ زمین اول ٭ نا اهلە اسراری أیلەمە سن فاش

آلوارلی محمد لطفی

(٤٠٢)

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلًا] جناب حقّە حدسز شكركە، عصای موسی قیریلمدن مكمّل اولارق ختام بولدی. ضلالتدە فرعونلاشمش نفسلری مغلوب ایدەجگنە و اهل ایمانە معنوی رحمتلر یاغدیرمەیە وسیلە اولاجغنە بر امارەسی، اونڭ چیقمەسی، بزم طرفە نشرە باشلامسی، عین زمانندە یاغمورە چوق احتیاجی بولونان هم اسپارطە، هم بو حوالیدە امثالسز، دواملی بر هفتەدنبری رحمتڭ كلمەسنە توافقیدر.

[ثانیًا] بزە كوندرەجگڭز یڭیدن ذوالفقار نسخەلرینە مقابل شیمدیلك هدیەسنی كوندرەمیەجگم. چونكە اونلری محافظە ایدوب غایت لزوملی وقتدە اهمّیتلی یرلرە ویریلەجكدر. چوق فعّال و تأثیرلی نور ناشری رأفت بگڭ، قرق سنە اوّل بزملە علاقەدار و اهمّیتلی بر زماندە اسكی سعیدڭ اخلاص باشندەكی آیتە دائر خطابتنی دیڭلەیوب علاقەدارلق كوسترن، قرق سنە صوڭرە عین حقیقتی رأفت واسطەسیلە كورن و نورڭ بر كرامتی دییە نور دائرەسنە كیرن ذاتە بالخاصّە سلام ایدییورم. و مكتوبندە اسمی بولونان قهرمان برهانی اونوتمییورم. و نور حسابنە اوڭا چوق منّتدارم. مرحوم لطفینڭ وارثی و قهرمان طاهرینڭ جدّی بر قرداشی و متین بر نورجی قرداشمز آتابگلی عبد اللّٰه چاووشڭ معنیدار مكتوبنی و كندینە مخصوص تسبیحات نمازینڭ صوڭندە دعاسی كوزلدر. هم او قرداشمە، هم مكتوبندە اسملری بولونان باشدە قهرمان طاهرینڭ مبارك پدری اولارق او قرداشلرە و همشیرەلریمزە برر برر سلام و دعا ایدییورز. و مقبول دعالرینی ایستەیورز.

[ثالثًا] سكز سنە قسطمونیدەكی خدمت نوریەیی تام ثمرەدار بر صورت ویرمەسنە بر وسیلە اولان و قسطمونیدە اولمسی لازم كلن اهمّیتلی وظیفۀ نوریەیی بالفعل یاپان، زغفرانبولی، افلانی جوارندەكی نورجیلر نامنە و محمد فیضی و معلّم احسان كبی قرداشلریمزلە تشریك مساعی ایدن قهرمان مصطفی اوسمان و حفظی قرداشلریمزڭ مكتوبلری بزلری چوق مسرور أیلەدی. خصوصًا بیوك استادلرمدن

احمد ضیاء الدّینڭ؈ حفیدی سیّد افندی نور دائرەسنە تام بر شرفلە كیرمسی، بزی فوق العادە سویندیردی. و او حوالیدە داها چوق حسن فیضی و احمد فؤادلرڭ چیقمەسنە امید ویرییور. حفظینڭ معصوم مخدوملرینڭ یازدقلری رسالەلری مدار عبرت ایچون دائما یانمدە بولوندیرییورم. اونلرڭ یازیلرینی كورن بورادەكی معصوملر شوقە كلییورلر. جناب حق او حوالی یی اوچنجی بر اسپارطە حكمنە كتیرسین ان شٓاء اللّٰه. آمین. كوزل قلمیلە رسالۀ نورە چوق خدمت ایدن و جدّی علاقەسیلە چوق مكتبلیلری نورلرە سوق ایدن معلّم احسان عبد الرّحمن، زغفرانبولی حوالیسنە معلّملكلە كلمەسی چوق كوزلدر. ان شٓاء اللّٰه كُورَە مدرسۀ نوریەسنڭ خدمت نوریەسنی اورادە دە یاپاجقدر. ان شٓاء اللّٰه جناب حق موفّق أیلەسین. آمین.

[رابعًا] دڭزلی حپسندە، بزلری اهمّیتلی بر جهتدە آخر حیاتە قدر منّتدار ایدن صادق بگ، حلمی بگ، بگلر بگلی سلیمان بگی چوق مراق ایدییوردم. خصوصًا حپسدە قالان سلیمان، نە حالدە اولدیغنی خبر آلمامشدم. بو دفعە چوروم حپسندن بنم ناممە بڭا بر مكتوب كلدی. كنچلك رهبری كبی بعض رسالەلری ایستەیور. مكتوبنی سزە كوندرییورم، ایستەدیگنی كوندریرسڭز. بنم طرفمدن اوڭا چوق سلام و اونی اونوتمییورز دییە یازیڭز.

[خامسًا] اعلا مسجد كویی امامی خواجە ادهمڭ اوزون مكتوبنڭ بر قسمنی طی ایدوب اهمّیتلی قسمنی لاحقەیە كچیرمك ایچون سزە كوندرییورم. بو خواجە، خواجەلر ایچندە

عینًا معلّملر ایچندە حسن فیضی كبی كورونویور. ان شٓاء اللّٰه اویلە اولاجقدر. هم او، هم طلبەلری نورڭ تام قیمتنی آڭلایورلر و تام صاریلییورلر حسّ ایدییورم. خصوصًا مكتوبندە رسالۀ نورە جدّی شاكرد اولمغە، اسملری یازیلان بو یڭی قرداشلریمز ملّا مستان، مصطفی خواجە، احمد حمدی چاووش، عبد القادر، علی شن كل، اسماعیل پالا، محمد پالا، حسن قوچاق، عبد اللّٰه چاوش، احمد قیلینچ، محمد آتماجە، ابراهیم قایغوسز، ابراهیم جاران، بكر آق طاش، احمد قوچاق، مصطفی جَوِزْ، احمد آق چای، مصطفی ییلماز، حسن اسن، خصوصًا اوّلجە عمرلرینڭ بر قسمنی بڭا هدیە ایدن اورادەكی معصوملرڭ نامنە اون درت یاشندەكی امین ییلماز ایلە برابر نورڭ دائرەسنە تمامیلە قبول ایدیلدیلر. جناب حق اونلری و استادلرینی موفّق أیلەسین. و نورڭ خدمتندە دائم أیلەسین. آمین.

فعّال و چالیشقان قرداشمز خواجە ادهم، رسالۀ نورڭ قیمتنی تقدیر ایتمەین ویا ضرر ویرن بعض خواجەلرە و بر قسم انانیتلی شیخلرە حدّت ایدییور. بعض طوقات اورویور. حالبوكە رسالۀ نورڭ مسلگی، مناقشەیی قبول ایتمییور. اهل ایمان كیم اولورسە اولسون، اونلرلە مشغول اولمایور. اونڭ ایچون بو قرداشمز حدّتلە دگل، اخطار ایلە، طوقوندیرمامق طرزدە اونلرلە نور دائرەسندە كوروشسون. حقیقتًا بو قرداشمزڭ غیرتنە و همّتنە بارك اللّٰه دیرز.

[سادسًا] بورادەكی اوّلجە مصادرە ایدیلن بر نسخە ذوالفقار، آفیوندە چوقلرڭ ایماننی قورتاردیغنی و والی معاونی اونی تمامیلە اوقویوب چوق بگندیگنی سویلەمش. صوڭرە دە آنقرەیە كوندرمشلر. ان شٓاء اللّٰه اورادە دە چوقلرڭ ایماننی قورتاراجق. مادام برقاچ آی اوّل هم اسپارطەدن، هم بورادن اللرینە برر نسخە كچمش. هیچ ایلیشمك ترشّحاتی كورونمدی. البتە ذوالفقار غلبە ایتمش. شاید اهمّیتسز، ضررسز بر ایلیشمك كبی بر شی اولسە دە، هیچ مراق ایتمەییڭز. هیچ اهمّیتی یوق. عموم قرداشلریمزە بیڭلر سلام و دعا ایدییورز.

اَلْبَاقٖی هُوَ الْبَاقٖی قرداشڭز سعید النّورسی

لاحقەیە كچسین

(٤٠٣)

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

هَرْكِە دَادْ اِقْرَارْ اِینْجَا مَحْرَمِ اَبْرَارْ شُدْ

قَلْبِ آنْ اَزْ عِشْقِ رِسَالَۀِ نُورْ پُرْ اَنْوَارْ شُدْ

ایمانمزی نورٌ علی نور ایدن، جاندن سوكیلی استادیمز افندیمز حضرتلری،

محل اسكانم اولان بالیكسر، قرە آغاچ حوالیسندەكی نورجی قرداشلریمزی زیارت ایچون ایكی هفتە مأذونیتلە كیتدم. الحمد للّٰه زیارت ایتدم. اورانڭ نورجی قرداشلریمزڭ یگرمی بشە قدر بالغ اولدیغنی و شیمدیكی حال حاضردە

رسالۀ نورە هوسی، سویەلری، حضرت خالق كائناتڭ عنایت حكمتیلە و معجزات احمدیەؐ ایلە و سز استادیمزڭ دعا و همّتڭزلە رسالۀ نور او محیطدە غایت بیوك بر رغبت قزانمشدر.

عاجزانە او قرداشلریمڭ رسالۀ نورە تعظیمًا فعالیتلرینی و رسالۀ نورڭ هر واردیغی قراڭلق یرلری و قرارمش قلبلری آن واحددە آیدینلق ایچندە بیراقدیغنڭ تأثیرینی كورنجە، سرورمدن آغلامەیە باشلادم. غایت چوق افتخار أیلەدم. و ان شٓاء اللّٰە تعالی كندیلرندن و هر برینڭ قیصە كنیەسیلە طلبەلگە قبولی خصوصندە استرحامكارانە بر مكتوب كوندرەجكلر. یالڭز بن عاجزڭ قلبمدە بر اندیشە واردی. او دە عاجزانە ذات فاضلانەلرینە عرض احترامات و كولەڭزی دە نورجی قرداشلریمزڭ اڭ كری صفنە و اڭ تنبل بر شاكردی اولارق قبولی خصوصندە بر مكتوب كوندرمشدم. قبول اولاجقمی یم عجبا، چوق تردّددە ایدم. عودتمدە اعلا مسجد كوینە كلدیگمدە نورجی قرداشلرمدن مصطفی خواجە و احمد حمدی چاووش و عبد القادر قرداشلرم بنی كورنجە دیدیلر، مژدە اولسون: استادیمز افندیمز حضرتلرندن مكتوبڭ جوابی كلدی. و اوقومقلغم ایچون بڭا ویردیلر. ویردیلر امّا، او مبارك مكتوب شریفی اوقومق ایچون سرورمدن مجال قالمدی. عجائب بر حال واقع اولدی. ١٣٠ خانەلك اولان اعلا مسجد كوی عاجزانەمە طار كلدی. آرتق او مسعود كونمزڭ تاریخنی بولوندیغم اوطەمڭ باشم اوجنە یازدم. یالڭز عاجزانەمی دگل، عموم نورجی قرداشلریمزڭ قلبلرینی تنویر ایدوب

شرفلندیرن مكتوبڭزدە رسالۀ نورڭ انتشاری حقّندە چوق یوكسك فعّالیت و جسارت كوسترن مدرسة الزّهرا اركانی اولان آغابگمز خسرو و قرداشلریمزە بویورمشسڭزكە: (حقّمدە اولان ثنالری قالدیروب صوڭرە لاحقەیە كچیریڭز) كولەڭز لاحقەیە كچەجك قدر اولمادیغم كبی، عاجزانە فاضلانەلریڭزڭ شخص عالیڭزی مدح و ثنا ایتمدم. و خطا دییە بویوردیغڭزی عاجزانەم بیلمەیەرك دگل، بیلەرك و دوشونەرك یازدم. كرچە یگرمی یدنجی سوزدە بویورمشسڭزكە، صحابەلرە كیمسە ایریشەمز.

محترم استادیمز افندیمز، كرچە بر مقدار تعجیز ایدەجگز، لطفًا و حالمزە مرحمتًا عفو بویورمەڭزی كوز یاشلریمزلە یالواریرز. كولەڭز هر نرەدە اولورسە اولسون، حق حقیقتی ظاهرًا كوروب و قلبًا تصدیق ایتدكدن صوڭرە، حاشا مِنْ حضور، بر طاقیم انانیتلیلرە وار قوّتملە مدافعە ایتمەیە هر وقت هر آن حاضرم. چونكە حق حقیقتی كیزلەمك عادتًا دگل، حقیقی و قطعی بر جرمدر.

شیمدی یە قدر امثالی نادر دگل، تمامًا امثالی بولونمایان رسالۀ نور كبی تأثیرلی و دیننی ایماننی هركسڭ آڭلایاجغی بر شكلدە بر كتاب اولدیغنی انانیتلی خواجەلردن باشقە بتون اهل ایمان تقدیر ایتمكدەدر. بالخاصّە زنداندن داها قراڭلق بو فساد زماندە، حقیقی اخروی بر علاج حكمنی آلان رسالۀ نورڭ انتشاری حقّندە ییلمادن اوصانمدن و هر شیئی كوزینە آلان و هر تورلی مشقّتلرە قاتلانان، هر فداكارلغی اسیركەمەین سز استادیمز دگلمیسڭز؟ بو دە شخصڭزی

مدح و ثنامیدر، بونی دە سویلەمەیەلممی؟ بو عصردە هیچ عالم خواجە یوقمی ایدی؟ بو سفر مأذونًا بالیكسرە كیتدیگمدە، اسكی بلدیە میدانندە غزتە بایعنڭ دكّانی اوڭندن كچركن بر چوق دینی مجموعە و غزتەلر كوزیمە ایلیشدی. همن درت دانەسنی آلدم. بو مجموعە و غزتەلر بو سنە انتشار ایتمكدەدر. رسالۀ نور ایسە ٥٠-٦٠ سنەدنبریدر. بو غزتەجی، محترم، عالم، مؤلّف، خواجە افندیلر مملكتمزە بو سنەمی كلدیلر؟ داها اوّل بو مملكتدە دگلمی ایدیلر؟ خصوصًا ١٣٢٤ حرّیت اعلانندە آوروپە فیلسوفلرینڭ چركین عقیدە تخوملرینی مملكتمزە صاچمق ایستەدیگی زمان، صانجاق شریف ایلە آیاصوفیە جامع شریفندە آوروپەلیلرە قارشو بیڭلرلە خلق ایلە میتینگ یاپوب و آوروپەنڭ انكار ناشری اولان مطبعەلری حكومتڭ شرفنڭ محافظەسی و دین محمّدیەنڭؐ سلامتلگی ایچون تخریب ایدیلمدیمی؟ بونی دە سویلەمەیەلممی؟

سوكیلی استادیمز افندیمز، اهل ایمانە حقیقت یولمزی شو جملەلر ایلە عرض ایتمەیی مناسب كوردم: شمع روحمزلە جسممزی پروانە دوشوردڭ ٭ حَیْفا یولمزی كندیمزی عمّانە دوشوردڭ ٭ تقدیر ایدەمەییز درد درونمزدە الممز وار ٭ مولایی سورسەڭز سویلتمەیڭ غممز وار ٭ دیڭلەیڭ سوزیمزی ای اهل ایمان ٭ أوزكە، ادادر حقّە دوست ٭ ای منكر، بزم صحبتمزی كل كور ٭ بتون دردلرە دوادر حقّە دوست ٭ رسالۀ نورلری اوقومق، جانە صفا روحە غدا، حقّە دوست ٭ رسالۀ نورلری یازمق، قلبە جلا، عشق خدادر حقّە دوست ٭

سز استادیمز افندیمز حضرتلری! دین مبین حقّندە یاپمش اولدیغڭز خدمتلری، بالخاصّە فیلسوفلرڭ اڭ تضییقلری زمانلرندە بیلە بلا تردّد حقدن باشقە هیچ بر شیدن ییلمایان نور محمّدیەییؐ هركسڭ آڭلایابیلەجگی بر شكلدە اهل ایمانی آگاه ایتدیگڭزدە، او زمان مذكور مجموعە و غزتەلرڭ جسمی دگل، اسمنی آڭمق كیمڭ حدّی وار ایدی؟ عجبا بونی دە سویلەمەیەلممی؟ یوزیڭزە قارشو مدح و ثنا بن اصلا و قطعیًّا قبول ایتمەدیگڭزی چوق أیی بیلیرز. مع مافیه بر دریایە بر طرفدن دگل، برقاچ یردن بولانیق چای آقسە بولاندیرماز. صوڭرە خلق بینندە حقّڭزدە دیل اوزاتاجق كیمسە اولماز.

حتّی اهل اسلام، اهل ایمان دگل، بلكە هیچ ایمان و اسلاملق ایلە علاقەسی اولمایان غیر مسلملر بیلە حق حقیقتی كورنجە بر شی سویلەمەیە جرئت ایدەمزلر. بلكە دە تقدیر ایدرلر. رسالۀ نورڭ سیاست ایلە، پولیتیقە ایلە، فرقەجیلق ایلە علاقەسی اولمدیغنی و آنجق غایۀ فكری ابدی حیاتڭ وثیقەسی بر ترخیص تذكرەسی اولان ایمان یولی اولدیغنی، كونشدن داها عیان اولدیغنی كوردیگمز حالدە، نە ایچون بو زمانڭ اخروی اڭ الزم علاجی حكمندە اولان رسالۀ نورە ال برلگی ایلە صاریلوب بر وجود كبی، بر قرداش كبی، رسالۀ نوری هم یازالم، هم اوقویالم، هم دە دین ایمان یولندن صاپمش دین قرداشلریمزی هیچ بر شیئی مطلوب و مقصد ایتمەمك شرطیلە آگاه ایتسەك اولمازمی؟ هم بو ایمان یولی حقّندە حكومتدن

قورقاجق بر شی یوقدر. حكومتمزڭ پولیتیقەسنە و قانونلرینە آیقیری بر حركت اولمدیغی كبی، اساس حكومتدن قورقولاجق شیلردن قورقمایز.

تورك ملّتنڭ ناموس و شرفنی اجنبیلرە قارشو تحقیر ایدر درجەسندە، توركیە دینی، علمی خواجەلرینی كرك حكومت، كرك تورك ملّتی ادارە ایتدیرەمییور دە كوی كوی، قاپو قاپو كزییورلر، اجنبیلر بو سوزی بزە سویلەمزلرمی؟ ایشتە ملّتی سَون صایان اویلە هم دینڭ، هم قانونڭ امرلرینە مغایر چركین حاللردن واز كچملی یز. بز حافظ و خواجە افندیلر، بدیع الزّمانؓ نور قرآنلە یالڭز اهل اسلامە دگل، عموم انسانلرە بر اخروی سفرە قوردی. و هركسڭ اشتهاسنە كورە اخروی لذیذ ییمكلرلە تزیین أیلەدی. نصیبی اولوب ییین و دین قرداشلرینە تقدیم ایدن، فَوْز و نجات بولدی.

بیڭ اوچ یوز سنە اوّلندن، توركلر بر چوق دینلری كندیلرینە رهبر اولارق قبول ایتدیلر. دین محمّدیەؐ ظهورندە و حضرت قرآن عظیم الشاندە اولان اوامر الٰهیەیی كندیلرنجە پك طوغری و اویغون بولدقلرندن و یك دیگریلە قبیلە قبیلە آرالرندە غوغا اكسیك اولمازدی. حالبوكە حضرت قرآن بونلری دوست دوشمان، فقیر زنكین، كوچك بیوك بر صفدە حقّڭ دیواننە طورمەیی و حقّیلە اوامر الٰهیەیی یرینە كتیرنە قلبنە الهام ربّانی واقع اولدیغنی توركلر كورنجە، دین محمّدیەؐ اوغرندە هر تورلی فداكارلقلردن كندیلرینی اسیركەمدكلری كبی، اڭ عزیز اولان جانلرینی دە بلا تردّد فدا ایتدیلر. ایشتە شیمدیكی مدنی عالم، بتون

اوصافیلە مدنیّتی توركلردن آلدیلر. بو عزیز نجیب تورك ملّتی و بزم اجدادیمز، بو دین مبینی طقوز یوز سنە عالم كائناتە حیرت ویریجی ادارەسنی حكومت حاضرە پك اعلی بیلیر. و بیلدیگی ایچون یالڭز خارجە قارشو لادینی اعلان ایتدی. یوقسە كندی ملّتنە توركلرڭ دینی یوقدر دینمز و دییەمز. هر نە ایسە

رسالۀ نور مؤلّفنی و شاكردلرینی محكمەیە سوق ایتمەنڭ سببی ایسە ایكی جهتدندر.

[برنجی جهت] بر قسم طریقتجی، فقط انانیتلی ذاتلر سبب اولدیلر. بو وضعیتلرینە آگاه اولان حكومت، عجبا بدیع الزّماندەؓ اویلە چركین وضعیت اولوب اولمدیغنی عدلی موازنە اولان محكمە ترازوسنە قویوب طارتدیلر. نتیجۀ محكمەدە كرك رسالۀ نور مؤلّفنی، كركسە شاكردلرینڭ برائتنی و بر اوجی عرش اعظمدە اولان رسالۀ نورڭ انتشارینە سربست اولمەسنە قرار ویردیلر.

[ایكنجی جهت] عقلدن و فكردن استعفا ایتمش بعض كوچك مأمور و ضابطە، حكومتە یوزلی كورونوب بر منصب قزانمق، یاخود باشقە بر منفعت و مطلوب سببیلە دینسزلگی سیاستە، سیاستی دینسزلگە آلت ایدرك حكومتڭ یوكسك مأمورلرینی اوهاملاندیرارق، هر احتمالە قارشو عجبا دییە محكمەیە سوق ایدیلدی. هم نتیجۀ محكمەدە، هم اهل وقوفڭ تدقیقندن صوڭرە یالڭز تورك ملّتنە دگل، بتون كائناتڭ زمانڭ اڭ زیادە كرك اخروی، كرك دنیوی احتیاجی اولان و خالق ذوالجلالڭ بالذّات كندی كلامی اولان قرآن عظیم الشّانڭ حقیقی ترجمانی اولان رسالۀ نورڭ سربست انتشارینە مساعدە ایدیلدی.

بدیع الزّمانڭؓ كوز نظارتندە بولونمقلغنڭ سببی دە شودر: بو مسئلە حكومتِ حاضرەنڭ كندیسنڭ سَرَفْ بر افكار معنویسیدر. یوقسە حكومت جمهوریە شیمدی دگل، ایلك بدایتندنبری بدیع الزّمانیؓ انسانیّت ترازوسندە موازنە ایتدی. اونڭ تمثیل ایتدیگی رسالۀ نور و شاكردلرینڭ شخص معنویسی، شیمدی عالمِ بشریتدە بتون اوصافیلە و دینڭ و انسانلغڭ بتون اخلاق ممدوحەسیلە او معنوی شخص متّصف اولارق، حقیقی قصورسز، هم ذرّە مقداری لكەسز خلق اولونمش و غایۀ فكری بشر عالمنی هیچ بر مطلوب و مقصد اولمامق شرطیلە رحمت الٰهیەیە قاووشدیرمق ایچون خلق اولونمش، یگانە دنیانڭ اڭ دیندار و اڭ بیوك مرشدیدر.

محترم استادیمز افندیمز حضرتلری، بولوندیغم اعلا مسجد كویندن زیردەكی اسامیلری یازیلی قرداشلریمڭ كندی ایستك آرزولریلە شاكردلگە قبول بویورمقلغڭزی جان و كوڭلدن كوز یاشلریلە یالواریرلر.

١- ملّا مستان ٢- مصطفی خواجە ٣- احمد حمدی چاووش ٤- عبد القادر ٥- علی شن كل ٦- اسماعیل پالا ٧- محمد پالا ٨- حسن قوچاق ٩- عبد اللّٰه چاوش ١٠- احمد قیلینچ ١١- محمد آتماجە ١٢- ابراهیم قایغوسز ١٣- ابراهیم جاران ١٤- بكر آق طاش ١٥- احمد قوچاق ١٦- مصطفی جَوِزْ ١٧- احمد آق چای ١٨- مصطفی ییلماز ١٩- حسن اسن.

رسالۀ نور، جناب حقّڭ عنایتیلە و سز استادیمزڭ دعا و همّتڭزلە و بتون نورجی قرداشلریمزڭ دعالریلە یاقین وقتدە چوق ترقّی ایدەجگنە قانع اولمەڭزی و بو خصوصدە مستریح و متسلّی اولمەڭزی و مبارك كوڭل شریفڭزی دائما مسرور بولوندیرمەڭزی استرحام أیلرز. سز استادیمز افندیمز ممنون مسرور بولوندقجە، بز دە كندیمزی بیوك بر بختیار عد ایدەجگمزە شبهە ایتمەییڭز. خیر دعاڭزی بكلرز.

هی هی، نەدر اول حَالِ مُعَنْبَرْ رُوحُ اَنْوَرْ ٭ اول ساقئ كوثر، اول رُوحُ مُصَوَّرْ

سیر ایت نیجە جمع أیلەمش اول نور ایلە ناری ٭ ذی صنعت جاری ذی قدرتِ باری

نور شاكردلرینی قطار أیلەدی طریق محمّدەؐ ٭ اول شاە مُمَجَّد، اول مَطْلَبُ و مقصدە

ای منكر سن اولسە كورسەڭ بو پٖیشِ قطاری ٭ چك عشق ایلە باری بی ورد ایلە حاری

ای واهمە، ای وَالِهْ، ای شُورٖیدَە، ای شیدا ٭ ای پستە با ای دیوانە و رسوای

درد ایلە، بلا ایلە كچور لیل و نهاری ٭ قیل نالە وزاری نوش أیلە بحاری

یا یورگمزی دیل جگریمزی كوركە نەلر وار ٭ نور شوقیلە طوغریدن طوغری یە حقّە خبر وار

یا رب! نورجیلری حضرتنە راهی باغیشلا ٭ یا درد ایلە بر آه سحر كاه باغیشلا

آلدڭ دل كمراهمزی قویدڭ بزی بی دل ٭ باری یرینە بر دل آگاه باغیشلا

اعلا مسجد كوی امامی ابراهیم ادهم طلاس

[٤٠٤]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم طاهری، صبری، صلاح الدّین، محمد، مصطفی!

[اوّلًا] بو كلن شهور ثلاثەنڭ حرمتنە و نور شاكردلرینڭ صداقت و اخلاصلرینڭ حرمتنە، چوق اهمّیتلی، حقّمدە بر سبب عتاب و طوقات بر حادثەیی تعمیرە چالیشیڭز و كوجنمەییڭز. شویلەكە: بو كیجە هیچ كورمدیگم بر عتاب، بر تعذیب صورتندە معنوی بر شدّتلی اخطار ایلە دینیلدیكە: "دنیایە، ذوقە، كیفە تنزّل ایتمەمكلە نورلردەكی اخلاصی و استغنایی محافظە ایتمەیە مكلّفدڭ. و بو عصردە [یَسْتَحِبُّونَ الْحَیٰوةَ الدُّنْیَا] سرّیلە دنیایی دینە ترجیح ایتمك و بیلەرك الماسی شیشەیە تبدیل ایتمك اولان خستەلغە، نور واسطەسیلە تداوی یە چالیشمەیە وظیفەداردڭ. یوز تجربەڭزلە دە آڭلادڭكە، انسانلرڭ هدیەلری، احسانلری، یاردیملری سڭا طوقونویور. حتّی سنی خستە ایدییور. هر كون اثرینی، تجربەسنی كورییورسڭ. سنڭ اڭ زیادە اعتماد ایتدیگڭ و رسالۀ نورڭ فداكار قهرمانلرینڭ یوزلرینی رسالۀ نورڭ خدمتندن زیادە كندی استراحتڭە چویرمگە سببیت ویردڭ" الٰی آخر. دییە داها چوق سویلەنیلدی دییە، بنی تام تكدیر ایتدی. حتّی شیمدی بر معنوی طوقاتدن دخی قورقویورم. بو حادثەنڭ چارۀ یگانەسی،