[٤٩٠]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

بِعَدَدِ تَكْبٖیرَاتِ الْحُجَّاجِ فٖی عَرَفَاتٍ اٰمٖینَ

عزیز، صدّیق قرداشلرم،

[اوّلًا] نورڭ اهمّیتلی و چوق خیرلی بر شاكردی، چوقلرڭ نامنە بندن صوردیكە: نورڭ خالص و اهمّیتلی بر قسم شاكردلری، پك مصرّانە اولارق آخر زماندە كلن آل بیتڭ بیوك بر مرشدی سنی ظن ایدییورلر و او قدر چكیندیگڭ حالدە اونلر اصرار ایدییورلر. سن دە بو قدر مصرّانە اونلرڭ فكرلرینی قبول ایتمییورسڭ، چكینییورسڭ. البتە اونلرڭ ألندە بر حقیقت و قطعی بر حجّت وار. و سن دە بر حكمت و حقیقتە بناءً اونلرە موافقت ایتمییورسڭ. بو ایسە بر تضاددر، هر حالدە حلّنی ایستەیورز.

بن دە بو ذاتڭ تمثیل ایتدیگی چوق سائللرە جوابًا دیرمكە: او خاص نورجیلرڭ اللرندە بر حقیقت وار. فقط ایكی جهتدە بر تعبیر و تأویل لازم:

[برنجیسی] چوق دفعە مكتوبلرمدە اشارت ایتدیگم كبی، مهدئ آل رسولڭ تمثیل ایتدیگی قدسی جماعتنڭ شخص معنویسنڭ اوچ وظیفەسی وار. اگر چابوق قیامت قوپمازسە و بشر بتون بتون یولدن چیقمازسە، او وظیفەلری اونڭ جمعیتی و سیّدلر جماعتی یاپاجغنی رحمت الٰهیەدن بكلەیورز. و اونڭ اوچ بیوك وظیفەسی اولاجق:

[برنجیسی] فن و فلسفەنڭ تسلّطی ایلە و مادّیون و طبیعیّون طاعونی بشر ایچنە انتشار ایتمەسیلە، هر شیدن اوّل فلسفەیی و مادّیون فكرینی تام صوصدیراجق بر طرزدە ایمانی قورتارمقدر. اهل ایمانی ضلالتدن محافظە ایتمك و بو وظیفە هم دنیایی، هم هر شیئی بیراقمقلە، چوق زمان تدقیقات ایلە مشغولیتی اقتضا ایتدیگندن، حضرت مهدینڭ او وظیفەسنی بالذّات كندیسی كورمگە وقت و حال مساعدە ایدەمز. چونكە خلافت محمّدیەؐ جهتندەكی سلطنتی، اونڭ ایلە اشتغالە وقت بیراقمییور. هر حالدە او وظیفەیی اوندن اوّل بر طائفە بر جهتدە كورەجك. او ذات، او طائفەنڭ اوزون تدقیقاتی ایلە یازدقلری اثری كندینە حاضر بر پروغرام یاپاجق، اونڭ ایلە او برنجی وظیفەیی تام یاپمش اولاجق. بو وظیفەنڭ استناد ایتدیگی قوّت و معنوی اوردوسی، یالڭز اخلاص و صداقت و تساند صفتلرینە تام صاحب اولان بر قسم شاكردلردر. نە قدر دە آز دە اولسەلر، معنًا بر اوردو قدر قوّتلی و قیمتلی صاییلیر.

[ایكنجی وظیفەسی] خلافت محمّدیە علیە الصّلاة والسّلام عنوانی ایلە شعائر اسلامیەیی احیا ایتمكدر. عالم اسلامڭ وحدتنی نقطۀ استناد ایدوب بشریتی مادّی و معنوی تهلكەلردن و غضب الٰهیدن قورتارمقدر. بو وظیفەنڭ نقطۀ استنادی و خادملری، میلیونلرلە افرادی بولونان اوردولر لازمدر.

[اوچنجی وظیفەسی] انقلابات زمانیە ایلە چوق احكام قرآنیەنڭ زدەلنمەسیلە و شریعت محمّدیەنڭؐ قانونلری بر درجە تعطیلە اوغرامسیلە، او ذات بتون اهل ایمانڭ

معنوی یاردیملریلە و اتّحاد اسلامڭ معاونتیلە و بتون علما و اولیانڭ و بالخاصّە آل بیتڭ نسلندن هر عصردە قوّتلی و كثرتلی بولونان میلیونلر فداكار سیّدلرڭ التحاقلریلە او وظیفۀ عظمایی یاپمغە چالیشیر.

شیمدی حقیقت حال بویلە اولدیغی حالدە، اڭ برنجی وظیفەسی و اڭ اهمّیتلیسی و اڭ یوكسك مسلگی اولان ایمانی قورتارمق و ایمانی تحقیقی بر صورتدە عمومە درس ویرمك، حتّی عوامڭ دە ایماننی تحقیقی یاپمق وظیفەسی ایسە، معنًا و حقیقتًا هدایت ایدیجی، ارشاد ایدیجی معناسنڭ تام صراحتنی افادە ایتدیگی ایچون، نور شاكردلری بو وظیفەیی تمامیلە رسالۀ نوردە كوردكلرندن، ایكنجی و اوچنجی وظیفەلر بوڭا نسبتًا ایكنجی و اوچنجی درجەدر دییە، رسالۀ نورڭ شخص معنویسنی حقلی اولارق بر نوع مهدی تلقّی ایدییورلر. او شخص معنوینڭ دە بر ممثّلی، نور شاكردلرینڭ تساندندن كلن بر شخص معنویسی و او شخص معنویدە بر نوع ممثّلی اولان بیچارە ترجماننی ظن ایتدكلرندن، بعضًا او اسمی اوڭا دە ویرییورلر. كرچە بو بر التباس و بر سهودر، فقط اونلر اوندە مسئول دگللر. چونكە زیادە حسن ظن، اسكیدنبری جریان ایدییور و اعتراض ایدیلمز. بن دە او قرداشلریمڭ پك زیادە حسن ظنلرینی بر نوع دعا و بر تمنّی و نور طلبەلرینڭ كمال اعتقادلرینڭ بر ترشّحی كوردیگمدن اونلرە چوق ایلیشمزدم. حتّی اسكی اولیانڭ بر قسمی، كرامت غیبیەلرندە رسالۀ نوری عین او آخر زمانڭ هدایت ایدیجیسی

اولدیغی دییە كشفلری، بو تحقیقات ایلە تأویلی آڭلاشیلیر. دیمك ایكی نقطەدە بر التباس وار، تأویل لازمدر:

[برنجیسی] آخردەكی ایكی وظیفە، كرچە حقیقت نقطەسندە برنجی وظیفە درجەسندە دگللر، فقط خلافت محمّدیە علیە الصّلاة والسّلام و اتّحاد اسلام اوردولریلە زمین یوزندە سلطنت اسلامیەیی سورمك جهتندە هركسدە، خصوصًا عوامدە، خصوصًا اهل سیاستدە، خصوصًا بو عصرڭ افكارندە او برنجی وظیفەدن بیڭ درجە كنیش كورونویور. و بو اسم بر آدمە ویریلدیگی وقت، بو ایكی وظیفە خاطرە كلییور. سیاست معناسنی احساس ایدر، بلكە دە بر خودفروشلق معناسنی خاطرە كتیریر، بلكە بر شان و شرف و مقام پرستلك و شهرتپرستلك آرزولرینی كوستریر. و اسكیدنبری و شیمدی دە چوق صاف دل و مقام پرست ذاتلر، مهدی اولاجغم دییە دعوا ایدرلر. كرچە هر عصردە هدایت ایدیجی بر نوع مهدی و مجدّد كلییور و كلمش، فقط هر بری اوچ وظیفەلردن بریسنی بر جهتدە یاپمەسی اعتباریلە، آخر زمانڭ بیوك مهدی عنواننی آلمامشلر.

هم محكمەدە دڭزلی اهل وقوفی، بعض شاكردلرڭ بو اعتقادلرینە كورە، بڭا قارشو دیمشلركە: اگر مهدیلك دعوا ایتسە، بتون شاكردلری قبول ایدەجكلر. بن دە اونلرە دیمشدم: بن، كندیمی سیّد بیلەمییورم. بو زماندە نسللر بیلینمییور. حالبوكە آخر زمانڭ او بیوك شخصی، آل بیتدن اولاجقدر. كرچە معنًا بن حضرت علینڭؓ بر ولد معنویسی حكمندە اوندن حقیقت درسنی آلدم.

و آل محمّد علیە السّلام بر معنادە حقیقی نور شاكردلرینە شامل اولمەسندن، بن دە آل بیتدن صاییلابیلیرم. فقط بو زمان شخص معنوی زمانی اولمەسندن و نورڭ مسلگندە هیچ بر جهتدە بنلك و شخصیّت و شخصی مقاملری آرزو ایتمك و شان شرف قزانمق اولماز و سرّ اخلاصە تام مخالف اولمەسندن، جناب حقّە حدسز شكر ایدییورمكە، بنی كندیمە بگندیرمەمسندن، بن اویلە شخصی و حدّمدن حدسز درجە فضلە مقاماتە كوزیمی دیكمم و نوردەكی اخلاصی بوزمامق ایچون، اخروی مقامات دخی بڭا ویریلسە، بیراقمەیە كندیمی مجبور بیلییورم دیدم. او اهل وقوف صوصدی.

ایشتە قرداشم سنڭ سؤٓالڭە قیصە جواب! بو تعبیراتدەكی قصورلریمە باقیلماسین، پك عجلە و آنی اولارق بو جوابی یازدم. سز اصلاح ایدەبیلیرسڭز.

اَلْبَاقٖی هُوَ الْبَاقٖی

قرداشڭز سعید النّورسی

[٤٩١]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلًا] عموم نورجیلرڭ مبارك بایراملرینی و حجّ الاكبردە بولونان نور شاكردلریلە و حجدەكی نور طرفدارلرینڭ بایراملرینی تبریك ایچندە و چوق

زماندنبری اسارت آلتندە قالمش و استقلالیتنی غائب ایتمش هندستان، عربستان كبی عالم اسلامڭ بیوك مملكتلری برر دولت اسلامیە شكلندە هنددە یوز میلیون بر دولت اسلامیە، جاوەدە اللی میلیوندن زیادە بر دولت اسلامیە و عربستاندە درت بش حكومت بر جماهیر متّفقە كبی عرب برلگی ایلە اسلام برلگنی برلشدیرمەسندەكی عالم اسلامڭ بو بیوك بایرامنڭ مقدّمەسنی تبریك ایلە، بو بایرام بزە مژدە ویرییور.

[ثانیًا] استانبولدە، رأفت بگڭ و مصطفی اوروجڭ یازدقلرینە كورە، چوق زمان اسلام اوردوسنی ادارە ایدن و صوڭرە دار الفنونە انقلاب ایدن حربیە نظارتی و باب سرعسكری، او معظّم بنانڭ آلنندە [اِنَّا فَتَحْنَا لَكَ فَتْحًا مُبٖینًا] [وَیَنْصُرَكَ اللّٰهِ نَصْرًا عَزٖیزًا] خطّ قرآنی ایلە او معنیدار قرآن آیتی یازیلمشكن، صوڭرەدن مرمر طاشلرلە اوزری قپاتیلوب او نورلری كیزلەمشلردی.

شیمدی یڭیدن خطّ قرآنی یە بر نمونۀ مساعدە و رسالۀ نورڭ تعقیب ایتدیگی مقصدینە بر وسیلە و اونیورسیتە ایلریدە بر نور مدرسەسی اولمەسنە بر اشارت اولدیغی كبی، دڭزلی نورجیلرندن احمدلرڭ مشهور عالم و عقلجە اون طقوزنجی عصرڭ اڭ بیوگی و اجتماعی فیلسوفلرڭ اڭ ایلریسی بیسمارقڭ اثرندن آلدقلری بر فقرەدە، او یوكسك بیسمارق اثرندە دییوركە: "قرآنی هر جهتلە تدقیق ایتدم، هر كلمەسندە بیوك بر حكمت كوردم. بونڭ مثلی و بشریتی ادارە

ایدەجك هیچ بر اثر یوقدر و كلەمز. "و پیغمبرە خطابًا دیر:" یا محمّدؐ! سڭا معاصر اولامدیغمدن چوق متأثّرم. بشریت، سنڭ كبی ممتاز بر قدرتی بر دفعە كورمش، بعدما كورەمەیەجكدر. بناءً علیه، سنڭ حضورڭدە كمال حرمتلە اگیلیرم. "بیسمارق دییە امضاسنی آتمش. [حاشیە] و او فقرەسندە تحریف و نسخ اولونان كتب مُنْزَلَەیی زیادە تنقیص ایتدیگی ایچون، او جملەلر یازیلماملی. بن دە اشارت ایتدم.

او ذات اون طقوزنجی عصرڭ اڭ عقللی و اڭ بیوك بر فیلسوفی و سیاستڭ و اجتماعیات بشریەنڭ اڭ مهم بر شخصیتی اولمسی. هم عالم اسلام استقلالیتنی بر درجە الدە ایتمسی. و اجنبی حكومتلرڭ حقائق قرآنیەیی آرامسی و غرب و شمال غربیدە قرآن لهندە بیوك بر جریان بولونمسی. هم آمریقەنڭ اڭ یوكسك و مشهور فیلسوفی اولان میستر قارلایل دخی عینًا بیسمارق كبی دیمش: "باشقە كتابلر، هیچ بر جهتدە قرآنە یتیشەمز. حقیقی سوز اودر، اونی دیڭلەملی ییز" دییە قطعی قرار ویرمسی. [حاشیە] و نورلرڭ دە هر طرفدە فتوحاتی و ایلری كیتمەسی بیوك بر فال خیردركە، اجنبیدە چوق بیسمارقلر و میستر قارلایللر چیقاجقلر و امارەلری دە

وار دییە نورجیلرە بر بایرام هدیەسی اولارق تقدیم ایدییورز و بیسمارقڭ فقرەسنی لفًّا كوندرییورز. عمومە سلام.

[ثالثًا] اینەبولی قهرمانلرندن بربر علی عثمانڭ معصوم مخدومنڭ كوزل یازیسیلە كوندردیگی مكتوبە باقدم، بردن خاطریمە كلدی. اوچ مهم نور مركزندە اوچ بربر، تام بربرینە بڭزر بر طرزدە نورە بیوك خدمتلری، هم هر بریسی چوجقلریلە نورە چالیشمەلری، بنی مسرور أیلەدی. بربر برهان، بربر حفظی، بربر علی عثمان نورڭ برر قیمتلی قهرمانیدر. اللّٰه اونلری چولوق چوجقلریلە دنیادە و آخرتدە مسعود ایتسین، آمین.

[رابعًا] باشدە بارلە مدرسەسندە نورڭ باش كاتبی حافظ توفیقڭ سڭیركنددە یازدیغی مكتوبندە اسملری بولونان او قرداشلریمزە چوق سلام و بایراملرینی تبریك ایدییورم. و بارلەدە بر خالص قرداشمز، حافظ خالدڭ وفاتنی خبر ویرمكلە بنی زیادە محزون أیلەدی. بنم طرفمدن هم اونڭ اقرباسنی و هم بارلە اهالیسنی تعزیە ایتدیگمی و بارلەدەكی نور شاكردلرینە باشڭز صاغ اولسون، هم تعزیە، هم بایرام تبریكمی تبلیغ ایدیڭز.

هم استانبول و افلانی كویلرندە خطیب محمد توفیقڭ اوغوللریلە برابر نورلرە شاكرد اولمەلری، مكتوبندن كوردم. بارك اللّٰه، اللّٰه موفّق ایتسین دیدم. رؤیاسی دە معنیداردر، خیردر. افلانی قهرمانلرینڭ بایرامنی دە او مناسبتلە تبریك ایدییورز.

اَلْبَاقٖی هُوَ الْبَاقٖی

قرداشڭز سعید النّورسی

[٤٩٢]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلا] مدرسة الزّهرانڭ اوچ شاكردینڭ خفیفجە بر آی حپس [حاشیە] جزاسی و پك حقسز و چوق معناسز و صوغوق، حاكمڭ حدّتنە معروض قالمەلرینە مقابل، قطعی بر قناعت ایلە و چوق امارەلرڭ قوّتیلە مژدە ویرییورزكە، او شاكردلر و یاردیمجیلری، او آدمڭ كوچوجك ویردیگی جزا و معناسز حدّتنە بدل، روحانیلر، ملائكەلر و استقبالدەكی نسل آتی میلیونلر آلقیشلامەلرلە اویلە شاكردلری تبریك ایدییورلر و حپس ابدینڭ میلیونلر سنە جزالرندن قورتولمغە وسیلە اولدقلری ایچون، بویلە سینك قنادی قدر اهمّیتی اولمایان بو كبی تعجیز و تعذیبلری هیچە ایندیرر، بلكە افتخارلە سویندیریر.

اوت، بر عصر اوّل دنیانڭ اڭ عقللی و اڭ مدقّقی و فیلسوفی و سلطنتلی حاكمی تلقّی ایدیلن و كندی خریستیان ایكن بتون اسكی دینلری و كتابلری هیچە ایندیرن، بلكە انكار ایتمك جرئتنی كوسترن، غایت انانیتلی و شهرتلی اولان پرنس بیسمارقڭ قرآن حكیمڭ اوڭندە كندی امضاسیلە و بتون قوّتیلە تصدیقكارانە سجدە ایتمەسنی یازان و عناد و انانیتنی و دینسزلگنی بیراقوب قرآنە تسلیم اولدیغنی عالمە اعلان ایتدیگنی جریدەلردە نشر ایدیلدیگی بر هنگامدە. و بتون أدیان سماویەیی انكار ایدن و شرق شمالیدەكی شیمدیكی دهشتلی حكومتڭ تشویقی ایلە كثرتلە ایچندەكی مسلمانلری حجّە كوندروب، عالم اسلام نظرندە دینسزلگنی و عناد و عداوتنی بیراقمق طرزندە كویا قرآنی انكار ایدەمییور و عظمتنە قارشو بر نوع تسلیمیت و دخالت طرزندە بورادەكیلردن داها زیادە قرآنی اهمّیتلی بیلییورم دییە، "بو نقطەدە اونلر بندن داها كری دوشویورلركە، بنم قدر حاجی كوندرەمییور" دیمەسنە مقابل، بورادەكیلر دخی ما شٓاء اللّٰه، تام مساعدە ایتدكلری حالدە و بویلە سیاسی پروپاغاندە ایدیلدیگی بر زماندە، مدرسة الزّهرانڭ نور شاكردلری، او ماهیت و عظمتدەكی قرآن معجز البیانڭ حقیقتلرینی ذوالفقار و عصای موسی كبی خارقە رسالەلرلە معجزەلرینی قلملریلە نشر ایدوب اڭ معنّد دینسزلری تصدیقە مجبور ایتمەلرینە مقابل، یوز بیڭلر ما شٓاء اللّٰه، بارك للّه دیمك لازم كلیركن، اویلە عادی بهانەلرلە بو مملكتڭ مدار افتخاری اولان او كنچلرە اهانت ایتمك و او قدسی خدمتلرینی بر خطا،

بر صوچ صایمق، البتە دگل یالڭز اهل حقیقت انسانلری، بلكە روحانیلری، بلكە ملكلری دە آغلاتیر و ارضی و سمایی حدّتە كتیرەبیلیر.

مادام ایكی سنە تدقیقدن صوڭرە، آیت الكبرا اسكی حرفلر ایلە طبع ایدیلن بیڭ نسخە و نورڭ بتون رسالەلری، اتّفاقًا برائت ایلە برابر عمومی اعادە ایدیلمش. عینًا اعادە اولونان بعض رسالەلرڭ اسكی حروف ایلە تكثیرینی بر صوچ صایوب جزا ویرمك، عدلیەلری جدًّا علاقەدار ایدوب عدالت شرفنی قیرییور.

[ثانیًا] بنم خصوصی كاتبم شیمدی یوق، باشقە كاتبلر دە بنم دیلمی أیی آڭلامییورلر. بن دە هم راحتسزم و هم دە كیچ و كوچ یازابیلییورم. حالبوكە دوندنبری یگرمی یە یاقین مكتوبلر كلدی. ایچندە دە پك چوق قرداشلریمز و همشیرەلریمزڭ اسملری وار. بز اونلرڭ عمومنڭ هم بایراملرینی تبریك ایدییورز، هم یڭی شاكرد اولمق ایستەینلری روح و جانمزلە قبول ایدییورز. و اونلری اویلە سوق ایدن ذاتلرە دە، اللّٰه راضی اولسون و قلبلرندەكی مرادلری نە ایسە جناب حق اونلری موفّق أیلەسین دیرز.

[ثالثًا] نور سانترالی صبرینڭؒ لاحقەیە كیرەجك كوزل مكتوبنی و علی عثمان و چلینكیر علینڭ نورلرڭ نشرندەكی قدسی خدمتلرینی و ابراهیم ادهمڭ بالیكسر و سائر طرفلردە تأثیرلی فعّالیتی و اونڭ ارشادیلە چوقلرڭ نور دائرەسنە كیرمسی و احمد فؤادڭ دە افلانی حوالیسندە حسن فیضی كبی فعّالیتی

و شدّتلی علاقەسی و قونیەلی صبرینڭ كنچ مكتبلیلرڭ چوقلقلە نور دائرەسنە كیرمەلرینە چالیشمەسی و باشدە مفسّر حاجی و خواجە وهبی افندی و قونیە علماسنڭ نورلرە قارشو حسن توجّهلری و تصدیقكارانە مناسبتلری و معلّم عبد الرّحمن احسانڭ حسب حال مكتوبندەكی صمیمی و جدّی نورە علاقەدارلغی و طاوشانلی واعظی عثمانڭ مكتوبندە پك صمیمی و جدّی ایكی اوچ ذاتڭ نور شاكردلگنە كمال جدّیتلە كیرمەلری و اگیردیر كویلرندە علی عثمانڭ و خلیل ابراهیمڭ تصدیقیلە چوق خالص نورجیلرڭ یتیشمەسی و آنقرە دار الفنونندە نورە اهمّیتلی خدمت ایدن و قسطمونیدە مكتب كنچلرندن اڭ اوّل نورلرە كیرن و آنقرەدەكی عبد الرّحمنڭ اوغلی وحدتی حمایە و محافظەیە چالیشان آراچلی عبد اللّٰهڭ مكتوبندەكی تام ایمانلی و دیندارانە و مژدەكارانە یازمسی و اورادە اوقویوجیلرڭ چوق اولمەسیلە اللرندەكی رسالەنڭ كافی اولمادیغنە و قونیەلی آرقداشی محمد (آتاق) ایلە برابر كنچلر ایچریسندە نور نشر ایتمەلری و آیدین طرفندە ان شٓاء اللّٰه بر ایكنجی احمد فیضی حكمندە، نورلرلە غایت علاقەدار علی آق طاغڭ كوزل و صمیمی مكتوبندەكی دعالری و توصیفلری و نورڭ تأثیرلرینی حسّ ایتمسی كبی فقرەلرڭ مأٓللری، بزی و نور دائرەسنی تمامیلە مسرور ایتدیگی كبی، بو بایرامدە دە بیوك بر معنوی هدیە اولارق قبول ایدییورز. جناب حق اونلرڭ عمومندن راضی اولسون. خصوصی و آیری آیری مكتوب یازامدیغمدن كوجنمەسینلر.

اَلْبَاقٖی هُوَ الْبَاقٖی

خسروڭ لایحۀ تمییزە عائد مكتوبنی هیچ ایلیشمدن قبول ایتدیگم ایچون، سزدەكی عین صورتنی محكمۀ تمییزە كوندرەبیلیرسڭز. مادام سزدە بر صورتی واردر، بو مكتوبی كوندرمدك لاحقەیە دە كچسین. شیمدی كلن مكتوبدە كنچلك رهبرینڭ فیئٓاتنی سز بندن داها أیی بیلیرسڭز. بر ویا بر بوچوق بانقنوطدن آشاغی اولماسین. خسروڭ قلمی دردنجی سوزە باشلامەسنە، بیڭ بارك اللّٰه دیرز. اللّٰه موفّق أیلەسین. آمین.

زغفرانبولی قهرمانی بربر حفظی، حسنی، ییلماز، ایكی معصوم نورجی مخدوملریلە و اینەبولی قهرمانلرندن علی عثمان و ایكی نورجی مخدوملرینڭ بایرام تبریكلرینە مقابل سلام، هم موفّقیتلرینە دعا ایدرز.

سعید النّورسی

[٤٩٣]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشم رأفت بگ،

[اوّلا] بعض بزە تماس ایدن جزئی حادثەلر مناسبتیلە بر حقیقتی بیان ایتمك، شدّتلە روحمە اخطار ایدیلدی. شویلەكە:

رسالۀ نور هیچ بر شیئە آلت اولامدیغنی و رضای الٰهیدن باشقە هیچ بر مقصدە وسیلە اولامدیغنی و طوغریدن طوغری یە هر شیدن اوّل ایمان حقیقتلرینی درس

ویرمك و بیچارە ضعیفلرڭ و شبهەیە دوشنلرڭ ایمانلرینی قورتارمق اولدیغنی، البتە سزڭ كبی نورڭ خاص شاكردلری بیلییورلر.

[ثانیًا] رسالۀ نورڭ بو قدر معارضلرینە مقابل اڭ بیوك قوّتی اخلاص اولدیغندن و دنیانڭ هیچ بر شیئنە آلت اولمدیغی كبی، طرفكیرلك حسّیاتنە بنا ایدیلن جریانلرە، خصوصًا سیاستە تماس ایدن جریانلرلە علاقەدار اولماز. چونكە طرفكیرلك طماری اخلاصی قیرار، حقیقتی دگیشدیرر. حتّی بنم اوتوز سنەدن بَرٖی سیاستی ترك ایتدیگمە سبب، بر مبارك عالمڭ، تعقیب ایتدیگی جریانڭ طرفكیرلك طماری ایلە صالح و بیوك بر عالمڭ اونڭ فكرینە مخالف اولمەسندن، تفسیق درجەسندە تحقیر ایدوب و جریاننە و كندی فكرینە موافق مشهور و متجاوز بر منافقی غایت مدح و ثنا ایتدی. بن دە بتون روحملە ئوركدم. دیمك طرفكیرلك حسّنە سیاستجیلك دە قاریشسە، بویلە عجیب خطالرە سببیت ویرییور دییە (اَعُوذُ بِاللّٰهِ مِنَ الشَّیْطَانِ وَالسِّیَاسَةِ) دیدم. او زماندنبری سیاستی ترك ایتدم.

او حالم نتیجەسی اولارق، سزڭ كبی قرداشلرم بیلیرسڭزكە، یگرمی بش سنەدنبری بر غزتەیی نە اوقودم، نە دیڭلەدم و نە دە مراق ایتدم. و اون سنە حرب عمومی یە باقمدم، بیلمدم و مراق ایتمدم. و یگرمی ایكی سنە بو اشكنجەلی اسارتمدە طرفكیرلگە و سیاستە تماس ایتمەمك ایچون و نورلردەكی اخلاصە ضرر كلمەمك ایچون، مدافعاتمدن باشقە استراحتم ایچون هیچ مراجعت ایتمدیگمی