یازدیردم. فقط اخطار ایدیلدیكە، شیمدیلك بو تعمیم و نشر ایدیلمەسین. اونڭ ایچون چیزدك.

[رابعًا] مدرسۀ نوریەنڭ قهرمانلرندن اوچ قرداشمز، سزڭ عمومڭزڭ نامنە لیالیء مباركەمزی تبریك ایچون قبول ایتدك. و سزە اوچ جانلی مكتوب اولارق كوندردك. قریۀ عرفاندن اهمّیتلی قرداشلریمزدن محمد آسان ایلە حافظ حسن او جوار طلبەلری نامنە قبول ایدیلدی. عموم قرداشلریمزە بیڭلر سلام و دعا ایدییورز.

اَلْبَاقٖی هُوَ الْبَاقٖی

قرداشڭز سعید النّورسی

(٤٧٩)

رسالۀ نور طلبەلرندن بریسی، غرض و اتهام و یالان اولدیغی میداندە اولان بر بهانە ایلە محكمەیە سوق ایتدیریلمش و هیچ بر صوچ دلیلی بولونمایوب، بالعكس معصومیّتی ثابت اولارق تخلیە ایدیلمشدی. معلّملك مأموریتندە ظاهر بر قانونسزلق و آشكار بر حقسزلغە معروض قالمسی اوزرینە، باش وكالتە، معارف وكالتنە و دولت شوراسنە یازدیغی استدعانڭ بر پارچەسی آشاغی یە یازیلمشدر.

استادیمز خستەدر. محكمە و سائر ایشلرلە علاقەدار اولامدیغندن خدمتندە بولونان بز نور طلبەلری، صوڭ زمانلردەكی صوروشدیرمەلرە و بعض غزتەلرڭ

تكرار جمعیتجیلك اتهامنی ایلری سورمەلرینە قارشو تام بر جواب تشكیل ایدن و افادەسی آلینان قرق نور طلبەسندن بریسنڭ عین حقیقت بو افادەسنی برای معلومات و مدار عبرت ایچون كوندرییورز. مناسب اولان رسمی یرلرە استدعا صورتندە ویریلەبیلیر.

بن كیزلی بر جمعیّت منسوبی اولمادیغم كبی، رسالۀ نور طلبەلری دە هیچ بر جهتلە كیزلی بر جمعیّت دگلدرلر. رسالۀ نورڭ دە چوق فائدەلی بر اثر اولدیغی، اهل علم و اهل ایمانجە تصدیق و تحسین ایدیلمشدر. اوت، بو وطندە یوز بیڭلرلە رسالۀ نور طلبەسی واردر. فقط توهّم ایدیلدیگی كبی دگلدرلر.

شویلەكە: (مؤلّفنڭ بیانی وجهیلە: ) رسالۀ نور، معنوی حقیقتلری قرآن و ایمان علملرینی آوروپەنڭ فن و فلسفە علملریلە مزج ایدرك، غایت قوّتلی دلیل و برهانلرلە عقلاً و منطقًا قطعی اثبات ایدن. و حال و استقبالڭ علمی و عقلی و فكری احتیاجلرینە جواب ویرەجك بر خصوصیت و ماهیتدە اولان. و طلسم كائناتڭ معمّاسنی كشف و حلّ ایدن. و یالڭز بو وطن و بو ملّت ایچون دگل، عالم اسلام و عالم بشریت ایچون یازیلان. و شو زمانڭ یارەلرینە اڭ مناسب بر علاج و ظلماتڭ تهاجماتنە معروض هیئت اسلامیەیە اڭ نافع بر نور و ضلالت وادیلرندە حیرتە دوشنلر ایچون اڭ طوغری بر رهبردر. رسالۀ نور، تقلیدی ایمانی تحقیقی ایمانە چویرن. و بو مبارك وطن و قهرمان ملّتی دینسزلكدن

قورتاران. و قومونیستلگی كوكندن كسن. قرآن كریمڭ بو عصردە بر معجزۀ معنویەسی و حقیقی بر تفسیری اولان بر اثر كلّیاتیدر.

كیزلی دین دوشمانلری طوغریدن طوغری یە دگل دە، بر طاقیم اوهام و بهانەلرلە تعرّض ایدییورلر. بو تاقتیكلە و بو وطن و بو ملّتە تأثیرلی بر صورتدە تحقیقی ایمانی درس ویرن و قرآن و اسلامیت حقیقتلرینی اثبات ایدرك یرلشدیرن رسالۀ نوری و طلبەلرینی و مؤلّفنی جمعیتجیلكلە اتهام یایغارەسی ماسكەسی آلتندە، عدلیەیی و حكومتی و اركانلرینی اوهامە دوشوروب علیهمە كچیرمگە چالیشییورلر. یینە استادیمز بدیع الزّمان بیان ایدییوركە:

رسالۀ نور بنم مالم دگل، قرآنڭ مالیدر. قرآنڭ فیضندن كلمشدر. هیچ بر قوّت اونی آناطولینڭ سینەسندن سوكوب آتامایاجقدر. چونكە رسالۀ نور قرآنە باغلیدر. قرآن ایسە عرش اعظمە باغلانمشدر. كیمڭ حدّی واركە، اونی اورادن سوكوب آتابیلسین! رسالۀ نورلە مبارزە ایدیلمز و رسالۀ نور مغلوب اولماز. دلیلی ایسە، اوتوز سنەدر ایمان حقیقتلرینی كونش كبی كوستردیگی و اڭ معنّد دینسز فیلسوفلری دە صوصدیردیغیدر. بو مملكتە حكم ایدنلر اونڭ قوّتندن استفادە ایتمەلری كركدر.

رسالۀ نور، سوندیرمك ایچون اوفلندكجە پارلایان بر نوردر. اونی مغلوب ایدەبیلمك ایچون، كائناتی ألندە طوتاجق بر قوّت لازمدر. رسالۀ نور دنیوی ایشلرە آلت اولاماز. كونش كبی حقیقت ایمانیە و قرآنیەنڭ یردەكی موقّت

ایشیقلرڭ جاذبەسنە تابع و آلت اولمدیغی كبی، رسالۀ نور، دگل دنیا و سیاست جریانلرینە، كائناتە دە آلت ایدیلەمز. رسالۀ نورڭ وظیفەسی ایسە، حیات ابدیەیی محو ایدن و حیات دنیویّەیی دە دهشتلی بر زهرە چویرن كفر مطلقە و (قومونیستلك و دینسزلگە قارشو) ایمانی اولان حقیقتلرلە، غایت قطعی دلیللرلە اڭ متمرّد زندیق فیلسوفلری دە ایمانە كتیرن برهانلرلە قرآنە خدمت ایتمكدر.

رسالۀ نور طلبەلری دە قرآن كریمڭ شاكردلری و خدمتكارلریدر. اونڭ ایچوندركە: بز رسالۀ نور طلبەلری و قرآن خدمتكارلری، صرف ایمانی و اخروی درسلریمز اولان رسالۀ نوری و حیاتمزدن پك چوق فضلە سودیگمز دین مبینمزی هیچ بر شیئە فدا و آلت ایدەمەییز و بالفعل دە اویلەییز. كچن سنە قطعی برائتلە نتیجەلنن استانبول محكمەسندە دە بدیع الزّمان افادەسندە دیمشدركە: بزكە بش یوز بیڭ فداكار نور طلبەسی، مملكتڭ هر طرفندە آسایش و امنیّتڭ فخری و معنوی محافظلری یز.

دور سابقدە بزە او قدر ظالمانە اهانتلردە بولوندقلری حالدە، بز اصلا حسلریمزە قاپیلمایارق، كوڭللردە امنیت و آسایشی تأمین یولندە، ایمان و قرآنە خدمت یولندە، غفلتلە آنارشی یە صاپانلری فَوْضا غیّاسندن، یعنی بربرینە قاریشارق فسادە دوشمكدن قورتارمق ایچون بر آن خالی قالمدق. بو دلیلسز بر ادّعا دگلدر. بزم ظلم و منفا ساحەلریمز اولان آلتی ولایتڭ آلتی ضابطە دائرەسی و محكمەلری

اوزون اوزادی یە تدقیقات نتیجەسندە، امنیت و آسایشی اخلال یولندە هیچ بر وقوعاتمزی قید ایدەمەمەلری اثبات ایدركە، رسالۀ نور مكتب عرفاننڭ طلبەلری قلبلر اوزرندە ایشلرلر. امنیت و آسایشڭ حقیقی بكچیسی اولان (ایمان تحقیقی یی ) قلبلرە، قفالرە یرلشدیریرلر. او ایمان، صاحبنی بتون فنالقلردن منع ایدرلر.

بزم ایمان درسلریمز، آنارشی یە و قومونیستلگە و بوزغونجیلغە قارشیدر. جمعیتڭ نظام و انتظامنی ییقمق و بوزمق ایستەین قومونیست و ماصونلرە قارشیدر. مملكتڭ بتون ضابطە دائرەلرندن صورولسون، اوتوز سنەدر بش یوز بیڭ نور مكتب عرفان طلبەسندن هیچ بریسنڭ اولسون، آسایش و امنیّتە، نظام و انتظامە آیقیری بر تك وقوعاتی، بر تك جنایتی وارمیدر؟ خیر، یوقدر. البتە اولمایاجقدر. چونكە هپسنڭ قلب و قفالرندە آسایشڭ اڭ صاغلام محافظی اولان ایمان بكچیسی واردر.

[ایكنجیسی] بتون دنیاسیلە برابر تمام حیاتنی، حتّی ایجاب ایدرسە آخرتنی دە دیننە فدا ایدن، اوتوز بش قرق سنەدر سیاستی ترك ایدن، متعدّد محكمەلرڭ او قدر اینجەلەمەلرینە رغمًا هیچ بر صوچ دلیلی بولونمایان، سكسانی آشمش، قبر قاپوسنە كلمش، دنیا متاعندن هیچ بر شیئە مالك اولمامش و اهمّیت دە ویرمەمش بر آدم حقّندە دینی سیاستە آلت ایدییور دیینلر، یردن كوگە قدر حقسزدرلر و انصافسزدرلر. بزی بویلە حقسز اسنادلرلە اتهام ایدن دَوْرِ سابقدەكی كیزلی

دین دوشمانلری شبهە یوقكە، یا سیاستی دینسزلگە آلت ایتمك ایستەدیلر. ویا بیلەرك، بیلمەیەرك بوزوق فكرلری بو مبارك وطندە یرلشدیرمك غیرتنە دوشدیلر. نظام و انتظامی، مادّی معنوی آسایش و امنیّتی اخلال ایدن بزلر دگل، اصل اونلردی.

حقیقی بر مسلمان، صمیمی بر مؤمن هیچ بر زمان آنارشی یە، بوزغونجیلغە طرفدار اولماز. چونكە دینڭ شدّتلە منع ایتدیگی شی، هیچ بر حقّی طانیمایان و انسانلق سجیّەلرینی و مدنیّت اساسلرینی جاناور حیوانلر سجیّەسنە چویرن آنارشیلكدركە، بونڭ آخر زماندە یأجوج و مأجوج قومیتەسی اولدیغنە قرآن كریم اشارت بویورمقدەدر. یگرمی سكز سنە بویلە اذا و جفالرە رغمًا بز هپسنە تحمّل ایتدك. او ظلم و جفالرڭ مسبّبلرینە دە حقوقمزی حلال ایدرك، ایمان و قرآنە خدمت یولندە دوام ایتدك. (هٰذَا مِنْ فَضْلِ رَبّٖی)

یینە رسالۀ نور مؤلّفی استادیمز بدیع الزمان سعید النّورسینڭ، ٩٥٤ ییلندە مجلس مبعوثان و هیئت وكلایە یازدیغی بر شكواسندە [مجلس مبعوثان و هیئت وكلایە اهمّیتلی بر شكوایی تضمّن ایدن بر حسب حالدر ] باشلقلی حسب حال مكتوبندە دینیلییوركە:

یگرمی سكز سنەدر یوز اوتوز كتابمدە مدار مسئولیت ایكی مسئلەدن باشقە بولونمدیغی و او ایكیسنە دە قطعی جواب ویریلدیگی حالدە. و انتشار ایدن آلتی یوز بیڭ نور نسخەلرندن هیچ كیمسەنڭ ضرر كوردیگنە دائر هیچ بر امارە بولونمدیغی،

چوق محكمەلردە او اثرلری و شاكردلرینی تدقیق ایتدكلری، یگرمی اوچ محكمە صوچ بولامییورز دیدكلری. و درت محكمەدە بتون كتابلرڭ اعادەسنە قطعی قرار ویردكلری. و محكمۀ تمییزدە درت دفعە او برائتی تصدیق ایتدیگی. و درت امنیت دائرەسنڭ عین كتابلری اعادە ایتدكلری. و اجنبی مملكتلرندە، خصوصًا عالم اسلامدە تقدیر و تحسین و تشكّرە مظهر اولدقلری. و درت سنەدنبری آفیون محكمەسی تأخیر ایدوب شدّتلی بر تدقیقدن صوڭرە ایكی دفعە قطعی برائت ویردیگی حالدە، شیمدی قطعیًّا خبر آلدقكە، اڭ زیادە رسالۀ نوری طوپلایان بر ایكی محكمە:

[كتابلردە صوچ یوق، اعادە ایدەجگز. فقط نشر ایتمەسین ] دیمشلر. بن دە بو حكومت اسلامیەنڭ بیوكلرینە بیان ایدییورمكە: رسالۀ نور، ایمان باللّٰه و آخرت و نبوّت كبی اركان ایمانیەیی اڭ معنّد دینسزلرە قارشو دە اثبات ایتدیگی علاقەدارلرجە معلوم اولمش ایكن، دنیادە بو اساسلرە ایلیشەجك هیچ بر سیاست، هیچ بر حكومت اولاماز. ایشتە او صرف ایمانی و قرآنی حقائقدن حیات اجتماعیۀ اسلامیە و بشریەیی موضوع یاپان، نمونە ایچون سزە تقدیم ایتدیگمز بو رسالە كبی برقاچ پارچە وار. اگر اهل سیاست وطنڭ و حكومتڭ و ملّتڭ سلامتی ایچون بو رسالەنڭ حقیقتلرینڭ هركسە قطعی لزومی بولوندیغنی تصدیق ایتمزلرسە، اونلرڭ حپسلرینە و نشر ایدیلمەمسنە رضا بولونابیلیر.

ایشتە یگرمی ایكی سنە اوّل تألیف ایدیلمش اولان بو پارچەنڭ بیڭلر نسخەسی انتشار ایتمش و تأثیرینی كوسترمش و محبّت، اخوّت و مسالمت عمومیەیی دهشتلی اختلالجیلرە قارشو تأمین ایتمشدر.

حكومتڭ هیئتنە بیان ایدییورمكە: بو پارچە و امثالنڭ انتشارینی ضررلی كورنلر، آنارشیستلرڭ اڭ فنا دینسزلری و سوفسطائیلری اولابیلیر. چونكە دنیادە بو قدر زمان، معنّدلر تنقید و بهانەلرلە اعتراض ایتدكلری حالدە، بو قدر كثرت اجزا ایچندە او معنّدلرڭ بر شی بولامدقلری كوسترییوركە، تمامیلە باشقە بر حسابە بناءً بو معجزۀ قرآنیەیی وطنی قورتارمقدە استعمال ایتمەمك ایچون بر وسیلە آرایورلر. و بعض صاف دل مأمورلری و محكمەلری دە اغفال ایدییورلر.

غایت خستە سعید النّورسی

(٤٨٠)

[بر نور طلبەسنڭ محكمەدەكی مدافعاتندن بر پارچەدر]

محترم هیئت حاكمە،

بیڭ سنەدنبری قرآنڭ بایراقداری و مجاهدی اولان نجیب، مبارك و قهرمان اجدادیمزڭ أولادلرینی نور ایماندن آییرمق و اسلامیت دفترینە كچن مفاخر عالیەسنە ضد اولارق مادّی معنوی هلاكتلرە معروض بیراقمق اولان او دهشتلی سٓوء قصدلرە و او قهرمان اجدادڭ طورونلری اولان بوكونكی كنچلگی و كلەجك نسللری او شرف عالیدن محروم ایتمك اولان دهشتلی

دینسزلك تلقینلرینە قارشو، قرآن كریمڭ اون دردنجی عصر محمّدیدەكیؐ دلّالی اولان بدیع الزّمان و اونڭ رسالەلری، بو عصرڭ بر هدایت سرداری و بو مدهش زمانڭ مدهش دینسزلك ظلماتنە قارشو نور قرآنلە مقابلە ایدن بر فداكاری. و رسالۀ نورڭ یوز بیڭلر نسخەلرینی میلیونلر طلبەلرینڭ قلملریلە هر طرفدە نشر ایدرك دینسزلگە، كفر مطلقە و قومونیزمە قارشو بر سدّ قرآنی تأسیس ایدن بر خادم اسلام بدیع الزّمان. و (یوز بیڭلر باشلر فدا اولدقلری بر قدسی حقیقتە باشمز دخی فدا اولسون) دییەرك نور اسلامی سوندیرمك و نور ایمانی یوق ایتمك ایچون یاپیلان دهشتلی زندقە هجوملرینە قارشو مقابلە ایدن. و استبداد و اجبارلرە قارشو عزّت اسلامیەیی محافظە و شرف ایمانیەیی پرواسزجە عالمە اعلان ایدن. و قرآن معجز البیاندن آلدیغی ایمان حقیقتلرینی كونش كبی پارلاق و جرح و انكار و اعتراض ایدیلمز دلیللر و برهانلرلە اثبات ایدن. و رسالۀ نورلە دینسزلك و ضلالت اژدرلرینە میدان اوقویان و طالقاووقلق یاپمایان بدیع الزّمان. و محكمەلردە [باشمدەكی صاچلرم عددنجە باشلرم بولونسە، هر كون بری كسیلسە، زندقەیە تسلیم سلاح ایدوب وطن و ملّت و اسلامیتە خیانت ایتمم و حقیقت قرآنیەیە فدا اولان بو باشی ظالملرە اگمەم] دیین. و خدمت ایمانیە یولندە هم دنیوی، هم لزوم اولسە اخروی حیاتنی دە فدا ایدن. و محكمەلردە دعوا ایتدیگی كبی [بر تك حقیقت ایمانیەیی بتون دنیا سلطنتی ایلە دە دگیشدیرمەین قهرمان اسلام اولان استادیمز

بدیع الزّمان و رسالۀ نوردن بزی اوزاقلاشدیراجق هیچ بر بشری قوّت یوقدر. هم رسالۀ نور، ایكی حیاتمزڭ خلاصكاری اولمقلە برابر، سرمایۀ عمریمز و غایۀ حیاتمزدر. قومونیستلر و دینسزلر كاغد و مركّبی قالدیرسەلر، بز دە ممكن اولسە دریمزی كاغد، قانمزی مركّب یاپوب یینە رسالۀ نوری یازاجغز] دیمشدر.

یینە قطعی برائتلە نتیجەلنن و تمییزڭ تصدیقندن كچەرك قضیۀ مُحكمە حالنە كلن دڭزلی محكمەسندە، استادیمز بدیع الزّمان افادەسندە دیمشدركە: [افندیلر! دقّت ایدیڭز. رسالۀ نور و شاكردلرینی محكوم ایتمك، طوغریدن طوغری یە كفر مطلق حسابنە حقیقت قرآنیەیی و حقائق ایمانیەیی محكوم ایتمك حكمنە كچمكلە برابر، بیڭ اوچ یوز سنەدنبری هر سنەدە اوچ یوز اللی میلیون اوندە یورومش اوچ یوز میلیار مسلمانلرڭ، حقیقتە و سعادت دارینە كیدن جادّۀ كبرالرینی قپامغە چالیشمقدر. و اونلرڭ نفرتلرینی و اعتراضلرینی كندیڭزە جلب ایتمكدر. چونكە او جادّەدە كلوب كیدنلر، كلمش كچمشلرە دعالریلە، حسناتلریلە یاردیم ایدییورلر. هم بو مبارك وطنڭ باشنە بر قیامت قوپمغە وسیلە اولمقدر. عجبا محكمۀ كبرای حشردە، میلیارلر اهل ایمان دعواجیلر طرفندن سزدن صورولسەكە: هیچ بر سیاستلە علاقەلری اولمایان و یالڭز ایمان و قرآن جادّۀ كبراسندە كیدن و كندیلرینی و وطن و ملّتی آنارشیلكدن، دینسزلكدن و اخلاقسزلقدن و وطنداشلرینی اعدام ابدیدن و حپس منفرددن و ضلالتدن

قورتارمغە چالیشان و بونڭ ایچون قرآنڭ حقیقی تفسیری اولان رسالۀ نور كبی غایت حق و حقیقت بر اثری اوقویانلرە و هیچ بر سیاسی جمعیتلە مناسبتی اولمایان او خالص دیندارلرڭ بربرلریلە اخروی دوستلق و اخوّتلرینە جمعیّت نامی ویروب ایلیشدیڭز. اونلری محكوم ایتدیڭز و ایتمك ایستەدیڭز] دیدكلری زمان نە جواب ویرەجكسڭز؟ بز دە سزلردن صورییورز.

سزی اغفال ایدن و عدلیەیی شاشیرتمق ایستەین و حكومتی بزملە وطن و ملّتە ضررلی بر صورتدە مشغول أیلەین معارضلریمز هم سزی اغفال، هم حكومتی اشغال، هم بزی پریشان ایدرك، هم حاكمیت اسلامیەیە، هم ملّتە، هم وطنە ضربەلر اورویورلر.

اثرلرمدە دائما دیدیگم بودر: هیچ بر سیاستلە علاقەمز یوقدر. بز ایمانمزی قورتارمغە چالیشییورز. عموم اهل ایمان داخل اولدقلری و اوچ یوز میلیوندن زیادە افرادی بولونان مقدّس بر جماعت اسلامیەدن باشقە مابینمزدە بر شی یوقدر. استادیمز دیگر بر افادەسندە دییوركە: [قرآن شاكردلری اولان رسالۀ نور طلبەلری، هیچ بر جهتلە سیاسی بر جمعیّت دگللر. اگر ادّعانامەدەكی جمعیتدن مقصد، ایمانی بر جماعت ایسە اوڭا قارشو دیرزكە: اگر دار الفنون طلبەلرینە و جامعلردەكی جماعتە و وعظ دیڭلەینلرە و هر نوع اصنافە بر جمعیّت نامی ویریلسە، بزە دە او نوعدن بر جمعیّت نامی ویریلەبیلیر. هم آزلق، چوقلغە قارشو جمعیّت قورار. حالبوكە بو ملّتڭ یوزدە طقسانی مسلماندر. طقسان

كیشینڭ اون آدمە قارشو جمعیّت تشكیل ایتمسی معناسز اولور. بز هر عصردە لا اقل اوچ یوز اللی میلیون افرادی بولونان مسلمانلرز. عموم مسلمانلرلە قرداشز.

اگر دینی حسّیاتلە امنیّتی اخلال ایدەجك بر جمعیّت نامی ویریلییورسە، بوڭا قارشو دیرز: اوتوز سنە ظرفندە، بو فیرطینەلی زماندە، رسالۀ نورڭ یوزلر رسالەلرندن بیڭلر نسخەلرینی میلیونلر آدملر كمال اشتیاق و مراقلە اوقودقلری حالدە، هیچ بر یردە، هیچ بریسنڭ بر وقوعاتی اولمامسی و آسایشە قطعیًّا ایلیشمەمەلری، بو ادّعا و اتهامی تمامًا چوروتویور. اگر حسّیات دینیەیی قوّتلندیرمەسندن، استقبالدە آسایشە ضرر ویرەبیلیر دییە بر جمعیّت نامی ویریلمشسە، بوڭا مقابل دیرز: اوّلا: باشدە دیانت ریاستی و بتون واعظلر عین وظیفەیی، عین خدمتی كورویورلر. ثانیًا: رسالۀ نور شاكردلری، دگل امنیت و آسایشە ضرر ویرمك، بلكە بتون قوّتلریلە و قناعتلریلە وطن و ملّتی آنارشیلكدن و قومونیزمدن محافظە ایلە امنیت و آسایشی تأمین ایتمك ایچون چالیشدقلرینە دلیل ایسە، برنجی اساسدە بیان ایدیلمش.

اوت، بز بر جماعتز. هدفمز و پروغراممز، اوّلا كندیمزی، صوڭرە -سٓوء تأثیر یاپمامق شرطیلە- ملّتمزی اعدام أبدیدن و حپس منفرددن و قومونیزم و آنارشیلكدن و سرسریلكدن محافظە ایلە، وطن و ملّتە خیرلی و نافع، حلیم،

سلیم، طوغری، درست و چالیشقان انسانلر حالنە كتیرمكدر. و ایكی حیاتمزی امحایە وسیلە اولان زندقەیە قارشو، رسالۀ نورڭ چلیك كبی حقیقتلریلە كندیمزی محافظە ایتمكدر. بونڭ دلیل و حجّتی ایسە، رسالۀ نورڭ زندقەیە قارشو معنوی مدافعەنامەسی حكمندە اولان [دڭزلی حپسنڭ میوەسی] نامندە، رسالۀ نورڭ قیصە بر خلاصەسنی و اساس مسلگنی بیان ایدن رسالەجكدركە، بر نسخەسی مدّعی عمومیلگە ویریلمشدر.

هم مادام هر شی فانیدر و كچیجیدر. و ئولوم ئولمەیور و قبر قاپوسی قپانمایور. و زحمت ایسە رحمتە قلب اولویور. البتە و البتە بونجە ظلم و حقسزلقلرە رغمًا، بز صبر و شكر ایلە توكّل ایدوب سكوت ایدرز، دیمشدر.

یوكسك مقامڭ محترم ممثّللری،

بنم طانیدیغم، اوقودیغم، سودیگم و تأمیننە چالیشدیغم و آنجق قرآن و ایمان و آخرت سعادتی ایچون باغلاندیغم و بو حقیقتلر دائرەسندە ابدیًا دە باغلی قالاجغم رسالۀ نور و طلبەلری و مؤلّف محترمی بونلردر. اگر ایمانمە معطوف اولان بو حركتم بر صوچ و مسلكدن چیقاریلمەمە بر سبب ایسە، بن دە قبول ایدرم. یوقسە البتە او قرارڭ بوزولمەسی لازم و الزمدر.

بر نور طلبەسی

(٤٨١)

[بِاسْمِهٖ سُبْحَانَهُ]

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلًا] سزڭ والی، آنقرەیە ایستەنیلدیگنی ایشیتدم. عجبا نورلرڭ فوق العادە انتشارینە بر ضرر اولماسین دییە مراق ایتدم. او والی وجدانلیدر. ان شٓاء اللّٰه ظلم یاپدیرماز. شاید بر صیقینتی ویریلسە دە تلاش ایتمەییڭز. ثبات و احتیاط و دقّت ایدیڭز. سزە كلن افادەلریمڭ دائرەسندە افادە ویریڭز.

[ثانیًا] بزی مراق ایتمەییڭز. بو كنیش تعرّضلری دە یوزدە برە ایندی. ان شٓاء اللّٰه زحمتلریمز رحمتلرە دونەجك.

هُوَ نكتەسنڭ آخرندە "هُوَ كبی هَوَا دە بر آناختار اولدی. عالم مثالە كیردم. بتون معنوی فوطوغرافلر كبی الخ." مأٓلندە یازدیغمز پارچەجقكە، اوزرندە چیزكی چكدمكە نشر اولونماسین، دیمشدم. اگر ضایع اولمامشسە اهمّیتی وار. خصوصی نسخەلریڭزە دە، ایستەینلر هُوَ نكتەسنڭ آخرندە یازابیلیر. بزە دە بر صورتنی كوندریرسڭز. بزدە صورتی یوق.

[ثالثًا] سزە كوندردیگمز بو یگرمی طقوزنجی لمعۀ عربیە اولان تفكّرنامە چوق اهمّیتلیدر. امام علینڭؓ اوڭا بر وجهدە آیت الكبرا نامنی ویرمسی، تام قیمتنی كوسترییور. نماز تسبیحاتندە عین الیقین درجەسندە قلبە كلمش، چوق رسالەلری