[ثالثًا] شیمدیلك بهار فیرطینەسی كبی معنوی بر اوهام فیرطینەسی وار اولدیغنە، استانبول خواجەلری و شمسی ذوالفقاری آلمقدن چكینمەسی و بورادە حقّمزدە تكرار آز و خفیف و عقیم قالان اهمّیتسز بر تعرّض اولمسی كوسترییور.

هیچ مراق ایتمەییڭز، یالڭز احتیاط و دقّت ایدوب تلاش ایتمەییڭز. بو مناسبتلە دیرمكە: اسپارطە شاكردلری مستثنا اولدقلری كبی، اورانڭ حكومتی دە انصاف نقطەسندە بر امتیازی وار. اونلرە و ضابطەسنە رسالۀ نور حسابنە منّتدارم.

[رابعًا] سزدن آلدیغم ذوالفقارڭ باقی فیئٓاتی اولان یوز بانقنوط پوستە ایلە كوندریلدی.

عمومڭزە بیڭلر سلام و دعا ایدن

اَلْبَاقٖی هُوَ الْبَاقٖی

قرداشڭز سعید النّورسی

(٣٧١)

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلًا] سراج النّور نامندە اولان معنوی تاریخچۀ حیات مجموعەسنڭ آخرندە یازیلاجق دڭزلی مدافعەنامەسنڭ بر نسخەسنی تصحیح ایتدم. بعض یرلرینی مناسب كورمدیگمدن چیزدم. دڭزلی اهل وقوفنە قارشو اعتراضنامەنڭ تمامنی

چیزدمكە یازیلماسین. هم آنقرە اهل وقوفنڭ اون عدد سهولرینڭ جوابلرندن درت دانە یازیلاجق. اوتەكیلرە چیزكی چكدم، یازیلماسین. حقیقتًا بو مدافعەنامە هم علمی، هم نورلی، هم قوّتلی بر رسالۀ نوریەدر. اونی هم سراج النّور اولان تاریخچۀ حیاتڭ آخرندە، هم بر قسم نسخەلری مستقل بر رسالە اولسە مناسبدر. هم بو صیرەلردە اوهام فیرطینەسی وار. اللی سنە اوّل یازیلان شیخ احمدڭ وصیتنامەسنڭ كیزلی انتشارندە بعض خواجەلرە قورقو ویرییورلر. حتّی استانبولدە ذوالفقاردن ایكی اوچ خواجە چكیندیلر، آلامدیلر. چوق دقّت و احتیاطلە برابر دوام ایتمك و تلاش ایتمەمك كركدر. [حاشیە]

[ثانیًا] یگرمی طقوزنجی مكتوبڭ برنجی مقامندە هجمات ستّەنڭ یازیلی و اشارات سبعە شیمدیلك طلسم مجموعەسنە قونولماسین. صوڭرە علاوە ایدیلەبیلیر. هم بشنجی شعاع دخی شیمدیلك تاریخچۀ حیاتڭ ایچنە قونولماسین،

فقط یازیلسین، ان شٓاء اللّٰه مدافعەنامەدەكی قوّتلی حقیقتلر بتون معترضلری صوصدیروب رسالۀ نوردەكی پارلاق و زدەلنمز و هیچ بر شیئە آلت اولماز و تام اخلاصلە یوغرولمش اولدیغنی بیلدیرەجكدر. مباركلرڭ پهلوانی، طلسم مجموعەسندە یگرمی طقوزنجی سوزڭ ایكنجی مقامنی یازسین، الفلرە باقماسین.

عموم قرداشلرە بیڭلر سلام و سلامتلرینە دعا ایدن

اَلْبَاقٖی هُوَ الْبَاقٖی

قرداشڭز سعید النّورسی

(٣٧٢)

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلا] رسالۀ نورڭ اركانندن و الماس قلملریلە خارقە بر صورتدە خدمت ایدن و ایكی حافظ علی حكمندە قهرمان طاهری و مباركلر پهلوانی كوچك علینڭ، آز زماندە سراج النّور و طلسم مجموعەلرندەكی بیوك خدمتلری ان شٓاء اللّٰه نورلرڭ بیوك فتوحاتنە بر مقدَّمەدر. و رشدی و معصوم جاودی و محمد و معصوم طلعتی و خلیلڭ و برهانڭ آز زماندە پك بیوك و چوق قدسی خدمتلری، ان شٓاء اللّٰه آناطولی و آسیەیی، بلكە زمین یوزینڭ تبریكلرینی

و آلقیشلرینی قازاناجقلر. مادام جناب حق مدرسة الزّهرادن بویلە شاكردلری احسان ایتمش، بو وظیفۀ ایمانیەدە بنم داها اندیشەلرم قالمدی. خفیف و اهمّیتسز فیرطینەلر بنی داها متأثّر ایتمز.

[ثانیًا] سزە سراج النّورە كیرمك ایچون كوندردیگم مدافعاتدە چوق یرلرە چیزكی چكدم. متباقی یازیلاجق قسمی چوق اهمّیتلیدر. ان شٓاء اللّٰه سراج النّوری داها زیادە پارلاتدیراجق. بشنجی شعاعی دە بن تصحیح ایدییورم. اونی دە رأیڭزە حوالە ایدییورم. مناسب كورسەڭز شیمدیدە سراج النّوردە داخل اولسون، مناسب اولماسە یینە مستقل ایلریدە او مجموعەیە قونولمق ایچون یازیلسین.

[ثالثًا] ایكی ذوالفقاری، استانبولدە رسالۀ نورلە كندینی چوق علاقەدار بیلدیگمز و حپسدە بزە آرقداشلق ایدن خواجەلرە قورقولرینی و وضعیتلرینی تجربە ایتمك ایچون كوندرمشدم. خاطرلری قیریلمامق ایچون ایكی پوصلە دە یازمشدم. "بنم شدّتلی خستەلغمدن، نورلرە تام صاحب اولامدیغمدن، سزی دە خاص شاكردلر كبی نورلرە صاحب چیقاجغڭزی امید ایدرم" دییە بر پوصلەدە یازمشدم. او ایكی قسم دوستلر ذوالفقاردن قورقمەلری، بیچارە اونلر كبی خواجەلرڭ نە درجە آجیناجق حالە كیردكلری آڭلاشیلدی.

بوندن سز متأثّر اولماییڭز. معلّملر جسورانە و مشتاقانە نورلرە صاریلمەلری اونلر كبی خواجەلرە احتیاج بیراقمییور.

[رابعًا] قرداشم رأفت بگڭ مكتوبندە نور الدّین، محمد فیضی نامندە ایكی ذاتڭ نورلر دائرەسنە جدّی كیرمەلرینی تبریك و اونلرە سلام ایدییورز.

[خامسًا] بو مكتوبی قهرمان طاهرینڭ بر مكتوبی مناسبتیلە یازوب قهرمان طاهری یە كوندرمك نیت ایدركن عین وقتدە كلدی. بو موفّقیتلی، حقیقی و خارقە و صمیمی خدمت نوریەسی و اڭ مهم ایشلردە، خصوصًا نورڭ تكثیر و نشرندە غایت قولای یاپدیرمسی، خصوصی بر اثر عنایت اولدیغنە قناعتمز وار. بن بشنجی شعاعی اونڭ ایچون تصحیح ایدوب و بعض كلمەلرینی سٓوء تفهّمە مدار اولمامق ایچون چیزدم. اوڭا تسلیم ایتدم. مدافعاتڭ یانندە سراج النّورە كیرمسی ان شٓاء اللّٰه ضرر ویرمز. سز دە تدقیق ایدرسڭز. اگر مناسب كورمدیگڭز كلمەلر وارسە چیقارابیلیرسڭز. اگر بر ماكینە درت مستنسخە كافی كلمزسە داها بریسنی آلابیلیرسڭز.

[سادسًا] صاو قهرمانلرینڭ، امرطاغ شاكردلرینە هدیە ایتدكلری كتابلرڭ عین فیئٓاتی اولان یوز قرق بانقنوطی او قهرمانلرڭ خیرینە اولارق كاغد مصرفی ایچون بورادە قهرمان طاهری یە تسلیم ایدیلدی.

[سابعًا] چوق چالیشقان و موفّقیتلی بر قرداشمز علیل علی عثمانڭ اوزونجە و ایچندە چوق طلبەلرڭ اسملری بولونان بر مكتوبی آدرسدە چالیشقان كلمەسی بولونمامەسندن محمد نامندە باشقە بر آدمە ویرمشلر. اونلر دە او مكتوبی آچمشلر. بو صیرەدە مخابرەمە چوق دقّت ایتدكلری ایچون متأثّر

اولدم. دیمك اسپارطە واسطەسیلە اولمایان مخابرەیە معنًا اذن یوقكە، چالیشقان لفظی آدرسدە قونمامش، یاڭلیش اللرە كچمش. بو اهمّیتلی و اوزون مكتوبی جاسوسلر كورمەمسی و بر دوستڭ النە كچوب بزە ویرمسی، علیل علی عثمانڭ صداقتنڭ بر كرامتیدر. و نورلرە خدمتنڭ مقبولیتنە بر علامتدر. یوقسە اگیردیرلە مخابرەمزە و ارسالاتە اهمّیتلی ضرر اولوردی. راحتسزلغم جهتیلە خصوصی مكتوب یازامدیغمدن كوجنمەسینلر. اون طقوز -یگرمیدن زیادە اهمّیتلی نورجیلرڭ اسملرینی و خدمتلرینی و علاقەلرینی بیان ایدن و بنی پك چوق مفرّح ایدن او مكتوبندەكی ذاتلرە و او قرداشلریمزە برر برر سلام و موفّقیتلرینە دعا ایدییورز. و جناب حقّە چوق شكر ایدییورمكە، رسالۀ نورڭ برنجی مدرسەسی اولان بارلەنڭ وظیفەسنی كورویورلر. و بارلەنڭ قهرمانی بحری و اولادی و بارلە نورجیلری اگیردیرلە تشریك مساعی ایدرك، او چوق اهمّیتلی وظیفەلرینی ان شٓاء اللّٰه دوام ایتدیرەجكلر. جناب حق اونلری موفّق أیلەسین. آمین آمین. و بنم او قضادە سكز سنە نورلرڭ یازمسیلە كچن حیاتمی باشقە بر طرزدە، داها بركتلی بر طرزدە نورلرڭ نشریلە ادامە ایتدیرەجكلر.

اَلْبَاقٖی هُوَ الْبَاقٖی

عموم قرداشلریمزە بیڭلر سلام و سلامتلرینە دعا ایدن

قرداشڭز سعید النّورسی

[٣٧٣]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلًا] مدرسۀ نوریە قهرمانلرندن صالح چاووش و مصطفی كلڭ كرامتلی و مژدەلی مكتوبلرینە و اونلرڭ عموم آرقداشلرینە بارك اللّٰه و وَفَّقَكُمُ اللّٰه دیرز. و حافظ علینڭ وارثلرندن مصطفی و خلیل ابراهیمڭ مكتوبلرینە و مصطفینڭ سؤٓالنە قارشو جواب ویرمگە و دوشونمەیە حالم مساعدە ایتمدیگی ایچون كوجنمەسینلر. و خلیل ابراهیمڭ استادی حقّندە پك زیادە حسن ظنّنی كوسترن منظومەسی، میلاسلی خلیل ابراهیمڭ مكتوبی كبی كوزلدر. یالڭز سعید حقّندە حسن ظنلری حدّمدن پك چوق زیادەدر. ان شٓاء اللّٰه او ثنالری خیرلی بر دعا حكمنە كچر.

[ثانیًا] اركاندن میلاسلی خلیل ابراهیمڭ مكتوبندە، بن وفات ایتمدن اوّل بتون معنوی مالمی قرداشلریمڭ هر بریسنە تمامًا ویرمەسنی و هر بر شاكرد بر كنچ سعید اولمسی نقطەسنی تام تقدیر ایدوب شخصمڭ مدحنە عائد قسمی مستثنا اولارق چوق كوزل كوردم. بارك اللّٰه دیرم.

[ثالثًا] استانبولدەكی آمریقە سفیری واسطەسیلە آمریقەدەكی مسلمان هیئتنە ذوالفقاری و بر عصای موسی یی كوندرمەسنی ایستەین او دوستمز و قرداشمزە

دیییڭزكە: سفیرلرڭ قفاسی سیاستلە مشغول اولدیغندن و رسالۀ نور سیاستلە علاقەسی اولمدیغندن، سیاسی بر قفا چابوق تقدیر ایدەمییور. هم رسالۀ نور، مشتریلری آراماز، مشتریلر آراملی و یالوارملی. آمریقە، بورانڭ اڭ كوچك بر حوادثنی مراقلە تعقیب ایتدیگی حالدە، بورانڭ اڭ بیوك بر حادثەسی اولان رسالۀ نوری البتە آرایاجقدر.

بوندن صوڭرە هر مسئلەمزدە امر، رسالۀ نورڭ شخص معنویسنی تمثیل ایدن خاص شاكردلرڭ و سزلرڭدر. بنم دە شیمدی بر رأیم وار.

عموم قرداشلریمزە بیڭلر سلام و سلامتلرینە دعا ایدن و دعالرینی ایستەین

اَلْبَاقٖی هُوَ الْبَاقٖی

قرداشڭز سعید النّورسی

قونیەلی صبرینڭ مژدەلی مكتوبنڭ صورتنی لفًّا كوندرییورز.

(٣٧٤)

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

عزیز، صدّیق و اشسز استادم افندم حضرتلری،

سزڭ فیضڭزدن و ذكاڭزدن جوشان رسالۀ نور نوری ایلە بتون عالم اسلامی احاطە ایتمكدە بَرْ دوامدر. ایشتە قونیەمزدە شكری بگ قرداشمزلە

كوندردیگمز رسالەلر ایلك محصولدر. ان شٓاء اللّٰە تعالی ایكنجی پوستەدە كوندرەجگمز بونڭ برقاچ مثلی اولاجقدر. چونكە هركس یازییور. حتّی كنچلر، یازوب اوقومسی اولمایانلر، بو رسالۀ نوردەكی درس ویرمە كرامتنی كورنجە اختیارسز صاریلییورلر. سببی ایسە یگرمی سنە مدرسە كورمش، اسمنی یازمقدن عاجز چوق ذاتلر اولدیغندن، هیچ مكتب مدرسە كورمەین بیچارە بر جاهل، بر آی ظرفندە رسالۀ نوری هم یازییور و هم اوقویور. بو كرامتڭز بتون عالملری بیلە حیرتدە بیراقییور.

ایشتە شكری بگلە سز افندیمز حضرتلرینە مكتوب كوندرن زیور قرداشمز بوكون بیلە قرآن اوقومەسنی بیلمدیگی حالدە، بوكون رسالۀ نورڭ كرامتنی بتون قونیە خلقنە كوسترمشدر. دیگر قرداشمز رجب دە، عین زیور كبی كویلی چوجغیدر. و اوقور یازار اولمدیغی حالدە، او دە بتون بویلە جاهل كنچلری حیرتدە بیراقییور. بو قرداشلریمزی هركسە نمونە اولارق كوسترییورز. و دییورزكە: رسالۀ نور خواجە ایستەمییور، كیم آرزو ایدرسە بر آی بوڭا دوام ایتسین، كندی كندینە هم اوقور، هم یازار همّت و كرامتڭزڭ بركتیلە هر هانكی بر كنچ بر آی ظرفندە اوقور یازار اولویور. شیمدی اكثریتی قضالر، كویلر، یازی بیلمەین بعض خواجەلر بو كرامت نوریەیی كورنجە هركس یازی یازمغە مجبور اولویور.

عزیز استادم، سزە نە قدر بو خصوصدە یازی یازسەم یازمقدن عاجزم. چونكە رسالۀ نورە طلبە اولانلر، ایجابندە آناسنی باباسنی دیڭلەمدیگی كبی جاننی

فدا ایتمەیە حاضردرلر. حتّی متعدّد یوكسك عائلەلردن لیسەنڭ اوننجی صنفنە قدر اوقویانلر قرآن درسنە دوام ایتدكلری كبی، رسالۀ نورە دە مقناطیس كبی یاپیشمشلر. و دییورلركە: ایجابندە رسالۀ نور اوغرینە جانمزی بیلە فدا ایتمەیە حاضرز. آرتق بو بیوك مژدەنڭ تعریفنی یاپمقدن عاجزم.

[فضائینڭ شعرینڭ بعض مصراعلری]

بو مصراعلردەكی حكمتلر رسالۀ نورڭ كوستردیگی یولی آچیق اولارق كوسترییور. بورادە محمود بگ اسمندە بر قرداشمز وار. بو هم یوكسك بر عائلەیە منسوب و هم دە بر جامعنڭ خطیبیدر. بو بزدەكی رسالۀ نورڭ درتدن برینی اوقومش و یازمشدر. و بتون خواجەلری اوینە چاغیرارق رسالۀ نورڭ حكمتنی و كرامتنی اونلرە سویلەمكلە برابر و هر خطبەسندە هپ رسالۀ نوردن اوقور و خصوصی ال و آیاقلریڭزدن أوپر، دعالریڭزی دیلر. مرعشلی واعظ خواجەسی زكریا افندی ال و آیاقلریڭزدن أوپر. و ایلغین مفتیسی و ایلغیندە نبی افندی قرداشمز اللریڭزدن اوپرلر. آنقرەدە بری طبدە، بری دە مهم بر وظیفەدە بو ایكی قرداشمز رفعتلر اللریڭزدن اوپرلر. اونلرە اون دردە قدر مكتوبلری كوندردم، یازاجقلر. بو رسالەلری كوندرن قرداشمز رجب ال و آیاقلریڭزدن أوپر، خیرلی دعاڭزی دیلر. داها بورادە چوق یازان قرداشلریمز واردر. اونلرڭ رسالەلرینی كوندردیگم زمان اسملرینی بیلدیررم. بتون بورادەكی رسالۀ نورڭ كنچلری ال و آیاقلریڭزدن أوپر، دعاڭزی دیلر.

اسپارطەدن اونیورسیتەیە كوندرمك ایچون یگرمی طقوزنجی مكتوبڭ یدنجی قسمی، شیمدیلك اشارات سبعەدن یگرمی عدد، یگرمی عدد سراج الغافلین و اوتوز برنجی مكتوبڭ لمعەلری اونر عدد، اون عدد یگرمی ایكنجی سوزلر و داها باشقە اثرلردن بدلی مقابلندە ایستەدم. كنچلری بونلرلە الدە ایدییورز. علمی ایلە مغرور خواجە افندیلرە یدنجی شعاعی و اخلاص لمعەسنی ویرییورز. درحال تسلیم اولویورلر. استانبولدەكی طلبەلر ایستەدیگڭز عصای موسی دن پارچەلری ترجمە ایتدیرمك ایچون چالیشییورلرمش. جناب حق موفّق ایتسین.

حج و زیارتڭز ایچون مساعدە بویورولورسە جواب بكلەیورم.

عاجز كناهكار كولەڭز صبری

[٣٧٥]

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلا] مدرسۀ نوریە قهرمانلرینە مأخذ اولمق ایچون تصحیح ایتمك ایلە مشغول اولدیغم سكّۀ غیبیە [حاشیە] مجموعەسنڭ یگرمی دردنجی آیتڭ اخطاردن صوڭرە

[تَنْزٖیلُ الْكِتَابِ مِنَ اللّٰهِ الْعَزٖیزِ الْحَكٖیمِ] حساب جفریسندە كوچوجك بر سهو كوردم. بیڭ اوچ یوز قرق ایكی ایتدیگی حالدە، سهوًا بیڭ اوچ یوز قرق آلتی یازیلمش. قرق ایكیدە رسالۀ نورڭ بدایت انتشاری، قرق آلتیدە معجزات احمدیە، یگرمنجی و یگرمی دردنجی مكتوبلرلە پارلامسی تاریخیدر. سز نسخەلریڭزدە قرق آلتی یرندە، قرق ایكی یازیڭز. بر سطر صوڭرە "او تاریخدە معجزات احمدیە رسالەسی" یرینە "او تاریخدن آز صوڭرە معجزات احمدیە رسالەسی" یازیڭز.

[ثانیًا] سكّۀ غیبیەیی دە مدافعات كبی بعض صحیفەلرینی و بعض سطرلرینی و بعض مسئلەلرینی چوق اهمّیتلی اولمدیغندن چیزكیلر چكدم. او چیزكیلی یرلر یازیلماسە، هم مدافعات، هم سكّۀ غیبیە غایت اهمّیتلی بر رسالۀ نوریۀ علمیە اولور. هم سكّۀ غیبیەنڭ آخرندە مرحوم حسن فیضینڭ ذوالفقارە كچن اوزون مكتوبی یازیلمامق ایچون اشارت ایتدم. ایگنە ایلە قپاتدم. بو سكّۀ غیبیەنڭ آخرندە یینە مرحوم حسن فیضینڭ ایكی منظومەسی وار. اونلر دە كوزلدر. بونلردن برنجیسی، اوزون اولانی سكّۀ غیبیەدە، عنایات سبعەدن اوّل یازیلسین. ایكنجی منظومەسی یا سراج النّورڭ ویا طلسم مجموعەسنڭ آخرندە سزڭ لاحقەدن انتخاب ایتدیگڭز بعض قیصە پارچەلرلە برابر یازیلسە مناسب اولور. ایسترسەڭز سكّۀ غیبیەنڭ آخرندە دە قالسین.

هم باشقەلرڭ دە بعض فقرەلری وار. بر قسمنی تعدیل ایتدم. بر قسمنە چیزكی چكدم. تا سكّۀ غیبیەنڭ قوّتنە بر ضرر كلمەسین. سزە كوندردیگم بو نسخە

عجلە یازیلمش كوزل اوقونمییور. اونڭ ایچون چوق دقّت ایتمك لازمكە یاڭلیش اولماسین. هم بعض حاشیەلری صحیفەنڭ ایچندە یازیلمش، كنارندە یازیلمامش. ماكینەدە اولدیغی وقت صحیفەنڭ كنارندە یازیلسین. ان شٓاء اللّٰه، مدرسۀ نوریە بو سكّۀ غیبیە ایلە مدرسة الزّهرایی داها زیادە نورلاندیراجق.

[ثالثًا] سكّۀ غیبیەنڭ، كرامت غوثیەنڭ آخرندە شاملی حافظڭ فقرەسندن تا كاتب عثمانڭ عجیب رؤیاسنڭ نهایتنە قدر و داها كرامتلی اوندن صوڭرە كلن فقرەلردن مناسب كوردیگڭزی آلوب برابر سكّۀ غیبیەنڭ باشندە مقدَّمەسی اولارق بنم باشدەكی مكتوبلرمدن صوڭرە یازیلسە مناسب اولویور، ظن ایدرم. اوتەكی قسمی، آخرندە خاتمەسی و لاحقەسی اولارق یازیلسین. چونكە، او طرزدە هركس بردن سكّۀ غیبیەنڭ تصدیقنی و قیمتنی آڭلار. سز داها أیی بیلیرسڭز. تنسیبڭزە حوالەدر.

صوڭرە قرە طاغ میوەسی نامندە سورۀ (وَالْعَصْرِ) ڭ بر نكتۀ اعجازیەسی و آرقەسندە سورۀ (فیل) ڭ بر نكتۀ اعجازیەسی برابر سكّۀ غیبیەنڭ مقدّمەسندە یازیلسین.

خصوصًا او مقدّمەنڭ باشلرندە حافظ مصطفینڭ امرطاغندە بڭا رسالەلری كتیردیگی وقت، اونڭ مناسبتیلە یازدیغم مكتوبڭ باشندە "عزیز صدّیق قرداشلرم، بزم قطعیًّا شك و شبهەمز قالمدیكە، بو خدمتمزڭ نتیجەسی... الخ" دییە رسالۀ نورڭ برائت و تسلیمنە دائر اوچ كرامتلرینە لیلۀ معراج و لیلۀ رغائبلە

كلن یاغمورلە بیان ایدن مكتوبی دە مقدّمەدە نظر دقّتی جلب ایدەجك بر یردە یازارسڭز.

[رابعًا] بو بهارڭ معنوی فیرطینەلری و بو موسمڭ معنوی فرحلری و دنیانڭ و درد معیشتڭ مشغلەلری، اوهامجیلرڭ فتور ویرن دسیسەلری، البتە بو موسمدە بر درجە فتور ویرر. و شوق ایلە چالیشانلری بر درجە تنفّسە و استراحتە سوق ایدر. فقط قطعیًّا بیلیڭزكە، رسالۀ نور خدمتی عنایت الٰهیە و حمایت ربّانیە آلتندەدر. اونڭ ایچون هیچ تلاش ایتمەییڭز. موقّت توقّفلردە دە متأثّر اولماییڭز. بزە قارشو اولان هر شیدە بر خیر، بر حكمت وار.

مثلا، بر قسم بدبختلر ذوالفقارڭ پارلاق فتوحاتنە پردە چكمك ایچون بر ذوالفقاری پوستەخانەدن آلوب مصادرە ایدرك، بورایە كلن یڭی والی یە و یڭی امنیت مدیرینە ویردكلرینی ایشیتدم. بر ایكی دقیقە متأثّر اولدم فقط بردن تحقّق ایتدیكە، بزم طرفمزدن او ایكی آدمە بر نسخە ذوالفقار ویرمك لازم ایمشكە، اصلسز فنا اوهاملرە قاپیلماسینلر. و نورلرڭ حمایەسنە چالیشسینلر. بو صورتدە داها زیادە دقّت ایدەجكلر. هر نە ایسە، هیچ مراق ایتمەییڭز.

عموم قرداشلریمزە بیڭلر سلام و سلامتلرینە دعا ایدن

اَلْبَاقٖی هُوَ الْبَاقٖی

خستە قرداشڭز سعید النّورسی

مخلص خلوصینڭ مكتوبنی لفًّا كوندرییورز.