[٤٨٨]

اوتوز برنجی مكتوبڭ اوتوز برنجی لمعەسنڭ اوتوز بر مسئلەسندن بر مسئلەدر.

[بِسْمِ اللّٰهِ الرَّحْمٰنِ الرَّحٖیمِ]

بر تك جملە اولان غایت قیصە بو حدیثڭ بش لمعۀ اعجازیەسنە دائر بر نكتەدر. [اِنَّ الْخِلَافَةَ بَعْدٖی ثَلَاثُونَ سَنَةً] حدیث شریفنڭ اخبار غیبی نوعندن تاریخجە مصدَّق [بش لمعۀ اعجازیەسی] واردر.

[برنجیسی] خلفای راشدینڭ خلافتلری ایلە حضرت حسن رضی اللّٰە عنهڭ آلتی آیلق خلافتنڭ مدّتی اوتوز سنە اولاجغنی اخباردر. عینًا چیقمش.

[ایكنجیسی] اوتوز سنەلك خلیفەلری اولان حضرت ابو بكر رضی اللّٰه عنه، حضرت عمر رضی اللّٰه عنه، حضرت عثمان رضی اللّٰه عنه و حضرت علی رضی اللّٰە عنهڭ ابجدی و جفری حسابلری بیڭ اوچ یوز یگرمی آلتی ایدركە، او تاریخدن صوڭرە شرائط خلافت داها تقرّر ایتمدی. خلافت علیۀ عثمانیە بیتدی.

[اوچنجیسی] [ثَلَاثُونَ] كلمەسی، جفر حسابیلە بیڭ سكسان یدی ایدركە، تاریخجە خلافت عبّاسیّەنڭ انقراضیلە خلافت عثمانیەنڭ تقرّرینە قدر اولان زماندن [فترت زمانی طی ایدیلسە ] بیڭ سكسان كسور قالیر. اگر ناقص خلافتلر صاییلسە، [ثَلَاثُونَ سَنَةً] دەكی [سَنَةً] لفظی علاوە اولور. او حالدە بیڭ ایكی یوز ایكی

ایدركە، رموزات ثمانیۀ قرآنیە رسالەلرندە، هم [اِنَّا فَتَحْنَالَكَ] هم فاتحە، هم سورۀ نصر، هم سورۀ علق كبی چوق یرلردە عینًا خلافتلە برابر دولت اسلامیەنڭ هم ترقّی، هم غالبیت دورەسی اولان بیڭ ایكی یوز ایكی ( تاریخنی كوستریر. هم ناقص خلافتلە برابر بتون مدّت خلافت اسلامیە بیڭ ایكی یوز ایكی) ایدركە، تام تامنە توافقلە خبر ویرر. و ( [اِنِ اسْتَقَامَتْ اُمَّتٖی فَلَهُمْ یَوْمٌ] یعنی بیڭ سنە [وَاِلَّا فَنِصْفُ یَوْمٍ] یعنی بش یوز سنە) حدیثنڭ معجزانە اخبار غیبیسنی ایضاح ایدر. یعنی بو حدیث قیامتدن دگل، بلكە غالبانە حاكمیت اسلامیەدن خبر ویرر. اون سكزنجی لمعەدە و باشقە یردە بو حدیثڭ اوچ لمعۀ اعجازیەسنی بیان ایتدیگمزدن بورادە قیصە كسییورز.

[دردنجیسی] [اِنَّ الْخِلَافَةَ بَعْدٖی] الٰی آخرە.. شدّەلی [اِنَّ] یوز بر (، [اَلْخِلَافَةَ] بیڭ یوز قرق بر )، [بَعْدٖی] سكسان آلتی ایدر. یكونی، عربیجە بیڭ اوچ یوز یگرمی سكز)اولور و رومیجە بیڭ اوچ یوز یگرمی آلتیدركە (، خلفای راشدینڭ اسملرینڭ ایكنجی وجهدە كوستردیگی عین تاریخە و حرّیتڭ اوچنجی سنەسندەكی انقطاع خلافتڭ تاریخنە تام تامنە توافقی، البتە او لسان الغیب اولان ذاتڭؐ لسانندە تصادف اولاماز. بلكە اونی دە كورمش، اوڭا دە اشارت ایتمش.

[بشنجیسی] [اِنَّ الْخِلَافَةَ] شدّەلی نون بر نون صاییلسە، بیڭ یوز طقسان ایكی ایدركە، عینًا [ثَلَاثُونَ سَنَةً] جملەسنڭ كوستردیگی كبی، بیڭ ایكی یوز ایكی تاریخنە اون فرقلە تام توافق ایدرك، تام و ناقص بتون مدّت خلافتی كوسترمسی..

و یالڭز [خِلَافَةَ] كلمەسی بیڭ یوز اون بر ایدوب تام خلافتڭ مدّتنە تام توافقلە برابر، او مدّتە اشارت ایدر.

[ثَلَاثُونَ] كلمەسنڭ جفری حسابی اولان بیڭ سكسان یدی عددینە یگرمی درت كبی جزئی بر فرقلە موافقت ایتمسی، البتە و هر حالدە او مخبر غیبینڭؐ بر اشارت غیبیەسیدر. و بر نوع معجزات غیبیەسنڭ بر لمعەسیدر. ایشتە بو قیصەجق حدیثڭ جامعیتنە سائر جَوَامِعُ الْكَلِمْ اولان حدیثلر قیاس ایدیلسین.

[سُبْحَانَكَ لَا عِلْمَ لَنَٓا اِلَّا مَا عَلَّمْتَنَٓا اِنَّكَ اَنْتَ الْعَلٖیمُ الْحَكٖیمُ]

سعید النّورسی

[ ٤٨٩ ]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلًا] سزە هم عجیب، هم الیم، هم لطیف بر ماجرای حیاتمی، دوشمانلریمڭ شنیع، هم بیڭ احتمالدن بر تك احتمال ایلە، هیچ بر شیطان، هیچ بر كیمسەیی قاندیرامدیغی بر افترالرینی و نورە قارشو استعمال ایدیلەجك هیچ بر سلاحلری قالمدیغنی بیان ایتمەیە بر مناسبت كلدی. شویلەكە:

تاریخ حیاتمی بیلنلرە معلومدر: اللی بش سنە اوّل، بن یگرمی یاشلرندە ایكن،

بتلیسدە مرحوم والی عمر پاشا خانەسندە، ایكی سنە اونڭ اصراریلە و علمە زیادە حرمتیلە قالدم. اونڭ آلتی عدد قیزلری واردی. اوچی كوچك، اوچی بیوك. بن اوچ بیوكلری، ایكی سنە برابر بر خانەدە قالدیغمز حالدە، بربرندن تفریق ایدوب طانیمییوردم. او درجە دقّت ایتمییوردمكە بیلەیم. حتّی بر عالم مسافر یانمە كلدی، ایكی كوندە اونلری بربرندن فرق ایتدی، طانیدی. هركس و بن دە، بو حالە حیرت ایدردك. بڭا صورویوردیلر: نەدن باقمییورسڭ؟ دیردم: علمڭ عزّتنی محافظە ایتمك، بنی باقدیرمییور.

هم قرق سنە اوّل، استانبولدە، كاغدخانە شنلگنڭ یوم مخصوصندە، كوپرودن تا كاغدخانەیە قدر خلیجڭ ایكی طرفندە، بیڭلر آچیق-صاچیق، روم و ارمنی و استانبوللی قاری و قیزلر دیزیلدكلری صیرەدە، بن و مرحوم مبعوث ملّا سیّد طٰەٰ و مبعوث حاجی الیاس ایلە برابر بر قاییغە بیندك، او قادینلرڭ یانلرندن كچییوردق. بنم هیچ خبرم یوقدی. حالبوكە ملّا طٰەٰ و حاجی الیاس بنی تجربەیە قرار ویردكلرینی و نوبتلە بنی ترصّد ایتدكلرینی، بر ساعت سیاحت صوڭندە اعتراف ایتدیلر و دیدیلر: سنڭ بو حالڭە حیرت ایتدك، هیچ باقمدڭ. دیدم: لزومسز، كچیجی، كناهلی ذوقلرڭ عاقبتی ألملر، تأسّفلر اولمەسندن ایستەمییورم.

هم بتون تاریخ حیاتمدە هدیەلری قبول ایتمك و منّت آلتنە كیروب خلقڭ صدقە و احسانلرینی آلمقدن چكیندیگمی، بنملە آرقداشلق ایدنلر بیلیرلر.

هم نورلرڭ و خدمت ایمانیە و قرآنیەنڭ شرفنی و سلامتنی حمایە ایتمك ایچون، دنیانڭ مادّی و اجتماعی و سیاسی بتون اذواقنی و مراقنی ترك ایتدیگمی.. و اعدام كبی اهل غرضڭ بتون تهدیدلرینە بش پارە اهمّیت ویرمدیگمی، یگرمی سنە اشكنجەلی اسارتمدە ایكی دهشتلی حپسلرمدە و محكمەلرمدە قطعی كوروندی.

ایشتە یتمش بش سنە دوام ایدن بو دستور حیاتم واركن، رسالۀ نورڭ فوق العادە قیمتنی قیرمق فكریلە شیطانلرڭ بیلە خیالنە كلمەین بر افترایی، رسمی مقامی اشغال ایدن بر آدم یاپدی. و دیمش: كیجەدە طبلەلرلە باقلاوەلر و فاحشەلر و ناموسسز بر قسم كنچلر یاننە كیدییورلر. حالبوكە بنم قاپیم كیجەدە هم طیشاریدن، هم ایچریدن كلیدلی، هم صباحە قدر بر بكجی او بدبختڭ امریلە قاپومی بكلەیوردی. هم بورادەكی قومشولر و بتون دوستلر بیلیرلركە، بن عشا نمازندن صوڭرە، تا صباحە قدر هیچ كیمسەیی یانمە قبول ایتمەمشم. ایشتە بویلە بر افترایە بر سفیه، احمق انسان اشك اولسە، صوڭرە شیطان اولسە، بوڭا احتمال ویرمز. او آدم آڭلادی، او كبی پلانلردن واز كچدی، بورادن باشقە یرە جهنّم اولوب كیتدی. اونڭ رسمیت جهتیلە بنی دگل، بلكە نورجیلری لكەدار ایتمك ایچون قوردیغی پلانی ایلە، بو یڭی حادثەیی وسیلە ایدوب شاكردلرە لكە سورمك ایستەنیلدی. فقط حفظ و حمایت و عنایت الٰهیە، او پلانی دە خارقە بر طرزدە عقیم بیراقدی. بو بیانلە بن نفسمی تبرئە ایتمەیورم، بلكە قدسی

خدمت ایمانیە، او نفسی بتون هوساتندن واز كچیرمش و او خدمتدەكی معنوی ذوق اوڭا كافی كلییور، دیمك ایستەیورم و نورجیلرڭ احتیاط و دقّتە احتیاجلرینی بیان ایدییورم.

[ثانیًا] ماكینە ایشندە تجربەلی و مقتدر خصوصی كاتبمی سزە كوندرییورم. كندم زحمتلە یازدیغمدن، بوندن صوڭرە قیصەجە یازاجغم، كوجنمەییڭز.

[ثالثًا] افلانی طرفلرندە خطیب محمد توفیقە سلام ایدییورم، معنیدار رؤیاسی مباركدر.

[رابعًا] بو دقیقەدە قسطمونی خسروی محمد فیضینڭ تبریك و نور فتوحاتنڭ مژدەلرینی حاوی پارلاق، كوزل مكتوبنی آلدم و او قیمتلی قرداشمز باشدە اولارق حلمی، امین، بش قرداشلر، عُلویەلر، زهرالر، لطفیەلر، عَلِیَەلر كبی نورجی همشیرەلریمزڭ هم لیالئ عشرەلرینی، هم بایراملرینی روح و جانمزلە تبریك ایدییورز. هم خلوصینڭ، هم فیضینڭ مكتوبلرینی لفًّا كوندرییورز.

اَلْبَاقٖی هُوَ الْبَاقٖی

قرداشڭز سعید النّورسی

استادیمزە نە درجە غرضكارانە و اصلسز افترالرلە، هیچ كیمسە اینانمایاجق اتهاملرلە، اونڭ حیثیتنی قیرمق ایچون رسمی لسانلە یاپدقلری یالانلرینە بر عجیب نمونەسی، درت سنە اوّل استادیمزڭ یازدیغی و سزە دە بر صورتنی كوندردیگی مكتوبڭ بو پارچەسی او نمونەیی كوسترییور. و او اشدّ ظلمڭ بو دفعە تكرّری ایچون تكرارسز كوندریلدی.

خدمتڭزدە بولونان خلیل، صونغور

[٤٩٠]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

بِعَدَدِ تَكْبٖیرَاتِ الْحُجَّاجِ فٖی عَرَفَاتٍ اٰمٖینَ

عزیز، صدّیق قرداشلرم،

[اوّلًا] نورڭ اهمّیتلی و چوق خیرلی بر شاكردی، چوقلرڭ نامنە بندن صوردیكە: نورڭ خالص و اهمّیتلی بر قسم شاكردلری، پك مصرّانە اولارق آخر زماندە كلن آل بیتڭ بیوك بر مرشدی سنی ظن ایدییورلر و او قدر چكیندیگڭ حالدە اونلر اصرار ایدییورلر. سن دە بو قدر مصرّانە اونلرڭ فكرلرینی قبول ایتمییورسڭ، چكینییورسڭ. البتە اونلرڭ ألندە بر حقیقت و قطعی بر حجّت وار. و سن دە بر حكمت و حقیقتە بناءً اونلرە موافقت ایتمییورسڭ. بو ایسە بر تضاددر، هر حالدە حلّنی ایستەیورز.

بن دە بو ذاتڭ تمثیل ایتدیگی چوق سائللرە جوابًا دیرمكە: او خاص نورجیلرڭ اللرندە بر حقیقت وار. فقط ایكی جهتدە بر تعبیر و تأویل لازم:

[برنجیسی] چوق دفعە مكتوبلرمدە اشارت ایتدیگم كبی، مهدئ آل رسولڭ تمثیل ایتدیگی قدسی جماعتنڭ شخص معنویسنڭ اوچ وظیفەسی وار. اگر چابوق قیامت قوپمازسە و بشر بتون بتون یولدن چیقمازسە، او وظیفەلری اونڭ جمعیتی و سیّدلر جماعتی یاپاجغنی رحمت الٰهیەدن بكلەیورز. و اونڭ اوچ بیوك وظیفەسی اولاجق:

[برنجیسی] فن و فلسفەنڭ تسلّطی ایلە و مادّیون و طبیعیّون طاعونی بشر ایچنە انتشار ایتمەسیلە، هر شیدن اوّل فلسفەیی و مادّیون فكرینی تام صوصدیراجق بر طرزدە ایمانی قورتارمقدر. اهل ایمانی ضلالتدن محافظە ایتمك و بو وظیفە هم دنیایی، هم هر شیئی بیراقمقلە، چوق زمان تدقیقات ایلە مشغولیتی اقتضا ایتدیگندن، حضرت مهدینڭ او وظیفەسنی بالذّات كندیسی كورمگە وقت و حال مساعدە ایدەمز. چونكە خلافت محمّدیەؐ جهتندەكی سلطنتی، اونڭ ایلە اشتغالە وقت بیراقمییور. هر حالدە او وظیفەیی اوندن اوّل بر طائفە بر جهتدە كورەجك. او ذات، او طائفەنڭ اوزون تدقیقاتی ایلە یازدقلری اثری كندینە حاضر بر پروغرام یاپاجق، اونڭ ایلە او برنجی وظیفەیی تام یاپمش اولاجق. بو وظیفەنڭ استناد ایتدیگی قوّت و معنوی اوردوسی، یالڭز اخلاص و صداقت و تساند صفتلرینە تام صاحب اولان بر قسم شاكردلردر. نە قدر دە آز دە اولسەلر، معنًا بر اوردو قدر قوّتلی و قیمتلی صاییلیر.

[ایكنجی وظیفەسی] خلافت محمّدیە علیە الصّلاة والسّلام عنوانی ایلە شعائر اسلامیەیی احیا ایتمكدر. عالم اسلامڭ وحدتنی نقطۀ استناد ایدوب بشریتی مادّی و معنوی تهلكەلردن و غضب الٰهیدن قورتارمقدر. بو وظیفەنڭ نقطۀ استنادی و خادملری، میلیونلرلە افرادی بولونان اوردولر لازمدر.

[اوچنجی وظیفەسی] انقلابات زمانیە ایلە چوق احكام قرآنیەنڭ زدەلنمەسیلە و شریعت محمّدیەنڭؐ قانونلری بر درجە تعطیلە اوغرامسیلە، او ذات بتون اهل ایمانڭ

معنوی یاردیملریلە و اتّحاد اسلامڭ معاونتیلە و بتون علما و اولیانڭ و بالخاصّە آل بیتڭ نسلندن هر عصردە قوّتلی و كثرتلی بولونان میلیونلر فداكار سیّدلرڭ التحاقلریلە او وظیفۀ عظمایی یاپمغە چالیشیر.

شیمدی حقیقت حال بویلە اولدیغی حالدە، اڭ برنجی وظیفەسی و اڭ اهمّیتلیسی و اڭ یوكسك مسلگی اولان ایمانی قورتارمق و ایمانی تحقیقی بر صورتدە عمومە درس ویرمك، حتّی عوامڭ دە ایماننی تحقیقی یاپمق وظیفەسی ایسە، معنًا و حقیقتًا هدایت ایدیجی، ارشاد ایدیجی معناسنڭ تام صراحتنی افادە ایتدیگی ایچون، نور شاكردلری بو وظیفەیی تمامیلە رسالۀ نوردە كوردكلرندن، ایكنجی و اوچنجی وظیفەلر بوڭا نسبتًا ایكنجی و اوچنجی درجەدر دییە، رسالۀ نورڭ شخص معنویسنی حقلی اولارق بر نوع مهدی تلقّی ایدییورلر. او شخص معنوینڭ دە بر ممثّلی، نور شاكردلرینڭ تساندندن كلن بر شخص معنویسی و او شخص معنویدە بر نوع ممثّلی اولان بیچارە ترجماننی ظن ایتدكلرندن، بعضًا او اسمی اوڭا دە ویرییورلر. كرچە بو بر التباس و بر سهودر، فقط اونلر اوندە مسئول دگللر. چونكە زیادە حسن ظن، اسكیدنبری جریان ایدییور و اعتراض ایدیلمز. بن دە او قرداشلریمڭ پك زیادە حسن ظنلرینی بر نوع دعا و بر تمنّی و نور طلبەلرینڭ كمال اعتقادلرینڭ بر ترشّحی كوردیگمدن اونلرە چوق ایلیشمزدم. حتّی اسكی اولیانڭ بر قسمی، كرامت غیبیەلرندە رسالۀ نوری عین او آخر زمانڭ هدایت ایدیجیسی

اولدیغی دییە كشفلری، بو تحقیقات ایلە تأویلی آڭلاشیلیر. دیمك ایكی نقطەدە بر التباس وار، تأویل لازمدر:

[برنجیسی] آخردەكی ایكی وظیفە، كرچە حقیقت نقطەسندە برنجی وظیفە درجەسندە دگللر، فقط خلافت محمّدیە علیە الصّلاة والسّلام و اتّحاد اسلام اوردولریلە زمین یوزندە سلطنت اسلامیەیی سورمك جهتندە هركسدە، خصوصًا عوامدە، خصوصًا اهل سیاستدە، خصوصًا بو عصرڭ افكارندە او برنجی وظیفەدن بیڭ درجە كنیش كورونویور. و بو اسم بر آدمە ویریلدیگی وقت، بو ایكی وظیفە خاطرە كلییور. سیاست معناسنی احساس ایدر، بلكە دە بر خودفروشلق معناسنی خاطرە كتیریر، بلكە بر شان و شرف و مقام پرستلك و شهرتپرستلك آرزولرینی كوستریر. و اسكیدنبری و شیمدی دە چوق صاف دل و مقام پرست ذاتلر، مهدی اولاجغم دییە دعوا ایدرلر. كرچە هر عصردە هدایت ایدیجی بر نوع مهدی و مجدّد كلییور و كلمش، فقط هر بری اوچ وظیفەلردن بریسنی بر جهتدە یاپمەسی اعتباریلە، آخر زمانڭ بیوك مهدی عنواننی آلمامشلر.

هم محكمەدە دڭزلی اهل وقوفی، بعض شاكردلرڭ بو اعتقادلرینە كورە، بڭا قارشو دیمشلركە: اگر مهدیلك دعوا ایتسە، بتون شاكردلری قبول ایدەجكلر. بن دە اونلرە دیمشدم: بن، كندیمی سیّد بیلەمییورم. بو زماندە نسللر بیلینمییور. حالبوكە آخر زمانڭ او بیوك شخصی، آل بیتدن اولاجقدر. كرچە معنًا بن حضرت علینڭؓ بر ولد معنویسی حكمندە اوندن حقیقت درسنی آلدم.

و آل محمّد علیە السّلام بر معنادە حقیقی نور شاكردلرینە شامل اولمەسندن، بن دە آل بیتدن صاییلابیلیرم. فقط بو زمان شخص معنوی زمانی اولمەسندن و نورڭ مسلگندە هیچ بر جهتدە بنلك و شخصیّت و شخصی مقاملری آرزو ایتمك و شان شرف قزانمق اولماز و سرّ اخلاصە تام مخالف اولمەسندن، جناب حقّە حدسز شكر ایدییورمكە، بنی كندیمە بگندیرمەمسندن، بن اویلە شخصی و حدّمدن حدسز درجە فضلە مقاماتە كوزیمی دیكمم و نوردەكی اخلاصی بوزمامق ایچون، اخروی مقامات دخی بڭا ویریلسە، بیراقمەیە كندیمی مجبور بیلییورم دیدم. او اهل وقوف صوصدی.

ایشتە قرداشم سنڭ سؤٓالڭە قیصە جواب! بو تعبیراتدەكی قصورلریمە باقیلماسین، پك عجلە و آنی اولارق بو جوابی یازدم. سز اصلاح ایدەبیلیرسڭز.

اَلْبَاقٖی هُوَ الْبَاقٖی

قرداشڭز سعید النّورسی

[٤٩١]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلًا] عموم نورجیلرڭ مبارك بایراملرینی و حجّ الاكبردە بولونان نور شاكردلریلە و حجدەكی نور طرفدارلرینڭ بایراملرینی تبریك ایچندە و چوق

زماندنبری اسارت آلتندە قالمش و استقلالیتنی غائب ایتمش هندستان، عربستان كبی عالم اسلامڭ بیوك مملكتلری برر دولت اسلامیە شكلندە هنددە یوز میلیون بر دولت اسلامیە، جاوەدە اللی میلیوندن زیادە بر دولت اسلامیە و عربستاندە درت بش حكومت بر جماهیر متّفقە كبی عرب برلگی ایلە اسلام برلگنی برلشدیرمەسندەكی عالم اسلامڭ بو بیوك بایرامنڭ مقدّمەسنی تبریك ایلە، بو بایرام بزە مژدە ویرییور.

[ثانیًا] استانبولدە، رأفت بگڭ و مصطفی اوروجڭ یازدقلرینە كورە، چوق زمان اسلام اوردوسنی ادارە ایدن و صوڭرە دار الفنونە انقلاب ایدن حربیە نظارتی و باب سرعسكری، او معظّم بنانڭ آلنندە [اِنَّا فَتَحْنَا لَكَ فَتْحًا مُبٖینًا] [وَیَنْصُرَكَ اللّٰهِ نَصْرًا عَزٖیزًا] خطّ قرآنی ایلە او معنیدار قرآن آیتی یازیلمشكن، صوڭرەدن مرمر طاشلرلە اوزری قپاتیلوب او نورلری كیزلەمشلردی.

شیمدی یڭیدن خطّ قرآنی یە بر نمونۀ مساعدە و رسالۀ نورڭ تعقیب ایتدیگی مقصدینە بر وسیلە و اونیورسیتە ایلریدە بر نور مدرسەسی اولمەسنە بر اشارت اولدیغی كبی، دڭزلی نورجیلرندن احمدلرڭ مشهور عالم و عقلجە اون طقوزنجی عصرڭ اڭ بیوگی و اجتماعی فیلسوفلرڭ اڭ ایلریسی بیسمارقڭ اثرندن آلدقلری بر فقرەدە، او یوكسك بیسمارق اثرندە دییوركە: "قرآنی هر جهتلە تدقیق ایتدم، هر كلمەسندە بیوك بر حكمت كوردم. بونڭ مثلی و بشریتی ادارە

ایدەجك هیچ بر اثر یوقدر و كلەمز. "و پیغمبرە خطابًا دیر:" یا محمّدؐ! سڭا معاصر اولامدیغمدن چوق متأثّرم. بشریت، سنڭ كبی ممتاز بر قدرتی بر دفعە كورمش، بعدما كورەمەیەجكدر. بناءً علیه، سنڭ حضورڭدە كمال حرمتلە اگیلیرم. "بیسمارق دییە امضاسنی آتمش. [حاشیە] و او فقرەسندە تحریف و نسخ اولونان كتب مُنْزَلَەیی زیادە تنقیص ایتدیگی ایچون، او جملەلر یازیلماملی. بن دە اشارت ایتدم.

او ذات اون طقوزنجی عصرڭ اڭ عقللی و اڭ بیوك بر فیلسوفی و سیاستڭ و اجتماعیات بشریەنڭ اڭ مهم بر شخصیتی اولمسی. هم عالم اسلام استقلالیتنی بر درجە الدە ایتمسی. و اجنبی حكومتلرڭ حقائق قرآنیەیی آرامسی و غرب و شمال غربیدە قرآن لهندە بیوك بر جریان بولونمسی. هم آمریقەنڭ اڭ یوكسك و مشهور فیلسوفی اولان میستر قارلایل دخی عینًا بیسمارق كبی دیمش: "باشقە كتابلر، هیچ بر جهتدە قرآنە یتیشەمز. حقیقی سوز اودر، اونی دیڭلەملی ییز" دییە قطعی قرار ویرمسی. [حاشیە] و نورلرڭ دە هر طرفدە فتوحاتی و ایلری كیتمەسی بیوك بر فال خیردركە، اجنبیدە چوق بیسمارقلر و میستر قارلایللر چیقاجقلر و امارەلری دە

وار دییە نورجیلرە بر بایرام هدیەسی اولارق تقدیم ایدییورز و بیسمارقڭ فقرەسنی لفًّا كوندرییورز. عمومە سلام.

[ثالثًا] اینەبولی قهرمانلرندن بربر علی عثمانڭ معصوم مخدومنڭ كوزل یازیسیلە كوندردیگی مكتوبە باقدم، بردن خاطریمە كلدی. اوچ مهم نور مركزندە اوچ بربر، تام بربرینە بڭزر بر طرزدە نورە بیوك خدمتلری، هم هر بریسی چوجقلریلە نورە چالیشمەلری، بنی مسرور أیلەدی. بربر برهان، بربر حفظی، بربر علی عثمان نورڭ برر قیمتلی قهرمانیدر. اللّٰه اونلری چولوق چوجقلریلە دنیادە و آخرتدە مسعود ایتسین، آمین.

[رابعًا] باشدە بارلە مدرسەسندە نورڭ باش كاتبی حافظ توفیقڭ سڭیركنددە یازدیغی مكتوبندە اسملری بولونان او قرداشلریمزە چوق سلام و بایراملرینی تبریك ایدییورم. و بارلەدە بر خالص قرداشمز، حافظ خالدڭ وفاتنی خبر ویرمكلە بنی زیادە محزون أیلەدی. بنم طرفمدن هم اونڭ اقرباسنی و هم بارلە اهالیسنی تعزیە ایتدیگمی و بارلەدەكی نور شاكردلرینە باشڭز صاغ اولسون، هم تعزیە، هم بایرام تبریكمی تبلیغ ایدیڭز.

هم استانبول و افلانی كویلرندە خطیب محمد توفیقڭ اوغوللریلە برابر نورلرە شاكرد اولمەلری، مكتوبندن كوردم. بارك اللّٰه، اللّٰه موفّق ایتسین دیدم. رؤیاسی دە معنیداردر، خیردر. افلانی قهرمانلرینڭ بایرامنی دە او مناسبتلە تبریك ایدییورز.

اَلْبَاقٖی هُوَ الْبَاقٖی

قرداشڭز سعید النّورسی