[٣٨٦]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

مبارك و سوكیلی استادم، شفقتلی افندم حضرتلری،

بز زغفرانبولی و حوالیسی نورجیلرینە همن هر وسیلە ایلە نظر شفقت و محبّتلە باقییور و بزلرە حدسز سرورلر بخش ایدییورسڭزكە: بو شفقت و محبّتڭزڭ بالخاصّە ناحیەمزدە عظیم تأثیرلری كورولمكدەدر. نهایتسز حمد و شكر اول خالق ذوالجلالەكە، بو صوڭ آیلردە نورڭ فتوحات دائرەسی محیطمزدە چوق كنیشلەمشدر. نورلری ایستەین و اشتیاقلە یازمغە باشلایان و شاكردلگە قبوللرینی سز استادیمز افندیمزدن رجا ایدنلرڭ صاییسی هر كون براز داها آرتمقدەدر. جامعلردە قادین و اركك یوزلرلە خلق رسالۀ نورڭ حقیقت درسلرینی درین بر علاقە ایلە دیڭلەیەرك ایمانلرینی تازەلەمكدەدرلر. صوسامش بر طوپراقدە رحمت الٰهیەنڭ فیضلریلە فیشقیران سنبللر كبی، محیطمزدە ان شٓاء اللّٰه ایمانی حقیقتلری دیڭلەیوب دە أوگرنن مؤمن قرداشلریمزڭ قلبلرندە نور سنبللری انكشاف ایدەجك و ان شٓاء اللّٰه ایلریدە بوراسی اوچنجی بر اسپارطە اولاجقدر. بو مسعود نتیجەیی عرض و مبارك اللریڭزی اوپەرك تبریك ایدرم.

افلانی ناحیەسی نورجیلری نامنە چوق قصورلی پریشان و مسكین شاكردیڭز احمد فؤاد

(٣٨٧)

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

شفقتلی استادم محترم افندم،

اوزون سنەلردنبری خالصًا مخلصًا للّٰه ایچون بر دوست، بر قرداش اولارق كوروشوب طانیشدیغم شاكردیڭز احمد فؤاد، كندیسنڭ طاطایدن تأمین ایدرك استنساخ ایتدیگی رسالۀ نور اجزالرینی بو فقیرە و مسكین شاكردیڭزە دە استنساخ ایتدیرەرك بزی نور دائرەسنە چكمك ایستردی. بلآخرە قسطمونیدە ذات فاضلانەلریڭزی زیارتلە مبارك اللریڭزدن اوپمك و رسالۀ نور شاكردلگی كبی چوق شوقلی بر مسلگی احراز ایتمكلە مسرورًا قسطمونیدن عودت ایدن احمد فؤاد قرداشمز، رسالۀ نورە قارشو قلبلریمزدە عشق درجەسنە واران بر شوق اویاندیرمشدر. نە چارەكە، او زمان قدر الٰهی سزی قسطمونیدن اوزاقلاشدیرمش و بزلرە دە زیارت فرصتنی بخش ایتمەمشدر. فقط بو آرزو، اشتیاق، مبارك اللریڭزی اوپمك احتیاجی قلبلریمزدە هر كون براز داها آرتمقدەدر.

سوكیلی استادم، بو كچن آیلردە ذات فاضلانەلریڭزڭ زغفرانبولی و حوالیسنە شفقت و مرحمت نظریلە باقمەڭز اثریدركە، نور دائرەسنە آتیلان قرداشلریمزڭ صاییسی چوغالمقدەدر. بالخاصّە مولد جمعیتلری وسیلەسیلە محیطمزدە رسالۀ نورڭ ایمانی حقیقتلرینی خلقمزە دویورمغە و نور درسلرینی ایضاحە و نشرە

چالیشان احمد فؤاد قرداشمزڭ بولوندیغی جامعلردە، مجلسلردە، قادینلی ارككلی یوزلرجە خلق طوپلانارق رسالۀ نورڭ ایمان درسلرینی دیڭلەمكدەدرلر. بو درسلر محیطمزدە او قدر علاقە حاصل ایتمشدركە، هر كون و هر هفتە مختلف كویلرڭ جامعلرندە مولد جمعیتلری ترتیب ایدیلمش و یوزلرجە جماعت جامعلری طولدیرمش، قلبلر رسالۀ نورڭ ایمان تحكیم ایدن نورلریلە پارلامشدر.

استادم افندم، شو بر حقیقتدركە، خلقمزڭ نورڭ درسلرینە شدّتلی بر علاقەسی واردر. بو علاقە ایلە اوّلجە بر صف جماعت كورولەمەین جامعلریمز الحمد للّٰه شیمدی خینجە خینچ طولمقدەدر. احمد فؤاد قرداشمز، "بو مسعود نتیجەدە بزم هیچ بر تأثیریمز یوقدر. بو، رسالۀ نورڭ و حضرت استادڭ محیطمزە شفقتلە باقیشلرینڭ بر نتیجەسیدر" دیمەلرینی بز دە تصدیق ایدییورز.

خالق ذوالجلال سزە صحّتلی و بركتلی عمرلر احسان بویورسون. و خیرلی دعالریڭزدن بزلری داها اوزون ییللر مستفید أیلەسین. آمین. باشدە احمد فؤاد قرداشمز اولارق بورادەكی بتون نورجی قرداشلریمز سلام و دعا ایدرك مبارك ال و آیاقلریڭزی حرمتلە أوپر، خیرلی دعالریڭزی یالواریرز.

اَلْبَاقٖی هُوَ الْبَاقٖی

افلانیدە قصورلی فقیر و بیچارە شاكردیڭز خطیب ابراهیم

(٣٨٨)

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلا] سزڭ هم ماكینە، هم قلملە خدمت نوریەڭزە بیڭلر بارك اللّٰه و وَفَّقَكُمُ اللّٰه دیرز.

[ثانیًا] علم الیقینە دائر پوصلەڭز كوزلدر. مراقلی قرداشمز رأفت بگڭ، بدیع الزّمان همدانی اوچنجی عصردە وظیفە و تألیفاتی حقّندە معلومات ایستەیور. بن او ذات حقّندە، یالڭز خارقە بر ذكاوتی و قوّۀ حافظەسی بولوندیغنی بیلییورم. اللی بش سنە اوّل استادلرمدن سعردلی مرحوم ملّا فتح اللّٰه، اسكی سعیدی اوڭا بڭزتەرك اونڭ او اسمنی اوڭا ویرمش. شیمدیلك او ذاتڭ سائر شیلرینی بیلەمییورم، اونوتمشم. و اوننجی عصردە امام ربّانینڭؓ زمانندە، اونڭ مخاطبلرندن اهمّیتلی بر ذات، بدیع الزّمان اسمیلە امام؇ اوڭا ایكی مكتوب یازمش. بن امامڭ؇ كتابیلە تفأّل ایدركن عینًا او ایكی مكتوب بڭا آچیلدی. اونڭ حالی بڭا بڭزەیورمشكە، امامڭ؇ اوڭا ویردیگی درس، بڭا دە درس اولدی.

[ثالثًا] عبد الرحمن صلاح الدّینڭ سزە لفًّا كوندردیگم مكتوبنی كوزلجە تصحیح و لزوم وارسە تعدیل ایدوب، عصای موسی آخرندە سزە اوّلجە كوندردیگم خلیل ابراهیمڭ و حسن فیضینڭ و اونڭ فقرەلرینە علاوە ایدیلسین. عصای موسی نڭ

آرقەسندە یازیلسین. بن وقت بولامدم، سزە حوالە ایدییورم. عموم قرداشلریمزە و همشیرەلریمزە برر برر سلام و دعا ایدییورز. [حاشیە]

اَلْبَاقٖی هُوَ الْبَاقٖی

قرداشڭز سعید النّورسی

هم لاحقەیە، هم عصای موسی نڭ آخرندە یازیلسین.

[٣٨٩]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا بِعَدَدِ حُرُوفَاتِ الْقُرْاٰنِ وَرَسَٓائِلِ النُّورِ

چوق مشفق، چوق وفاكار افندم و فضیلتلی، عزّتلی استادم حضرتلرینە،

رسالۀ نور، عصریمزدە قرآن حكیمڭ رسمی بر ترجمانی و ناشری اولدیغنە دائر چوق دلیللردن برقاچنی عرض ایدییورم. رسالۀ نورڭ تاریخچەسی عینًا عصر سعادتە بڭزەیور. بر چوق نقطەلردە توافق ایدییور. یگرمی اوچ سنەدە ختام بولان رسالۀ نور، آناطولی یی مادّی تهلكەلردن قورومش، معنوی ایقاظ طوقاتلریلە اوقشامشدر. و میلیونلرلە كیشینڭ ایماننی قورتارمغە وسیلە اولمشدر.

اڭ دهشتلی و قورقونچ و قراڭلقلی بر محیطدە، خونخوار دوشمانلری آراسندە، تضییق آلتندە، بیڭ بر محرومیتلر ایچندە. اختیار، خستە، غریب، حرّیتی آلینمش بر ذاتڭ قرآندن آلدیغی الهامی افادەسیلە، اڭ صیقینتیلی و تهلكەلی و قیصە وقتلردە. صبی چوجقلرڭ، عجمی فقط معصوم، بیچارە، ضعیف اختیارلرڭ، تیترك فقط توبەكار اللری حركتە كچەرك، اوصانمدن، ییلمادن بیڭلر صحیفە رسالۀ نوری عشقلە یازمەلری و عالم، جاهل، فیلسوف و مختلف دین سالكلرندن یوز بیڭلرلە انسان، ذوقلە، خشوع و خضوع ایلە بو حاسّەلی، كوزل یازیلری اوقومەلری و كوزل سوزلری دیڭلەمەلری اسكیشهر و دڭزلی آغیر جزا محكمەسی نتیجەسی، استانبول و آنقرە و سائر یرلردە پروفسورلردن، دیندار عالم و فیلسوفلردن متشكّل هیئتلر طرفندن رسالۀ نور اینجەدن اینجەیە تدقیق و تحلیل ایدیلمش، نتیجەدە، قرآنی تام بر تفسیر اولدیغنە متّفقًا قرار ویرمەلری و كیزلی دوشمانلرینڭ حقسز و یرسز اسنادلرینڭ، یالڭز سیاسی افترادن عبارت اولدیغی و علمی اعتراض ایدەمەمەلری محكمەجە قطعیتلە آڭلاشیلمش و برائتلە نتیجەلنمشدر

بیڭ درت یوز سنە اوّل، بشریت ظلمت، جهالت ایچندە وحشی عرف و عادتلرڭ بولوندیغی عربستاندە طوغان نورلی بر كونش، آلتمش اوچ سنە یوكسلمش و یگرمی اوچ سنەدە انزالی ختام بولان فرمان قرآنلە هر شی آیدینلانمش. فنا، عبث عرفلر و عادتلر آڭلاشیلمش. سعی محمّدیؐ ایلە سعادتە چوریلمش، بو سببلە بتون یبانجی نظرلر غبطە ایلە قرآنە دیكیلمشدی. عصرلر كچمش، اسلامیت اوچ یوز اللی

میلیونە یوكسلمشدر. عبد القادر كیلانی؈، امام غزالی؈، امام ربّانی؈ مثللو سائر اسلام علّامەلری، زمانندە فن و فلسفەدن نشئت ایدن كفرە قارشو قرآن عظیمی و حدیث شریفی تفسیر ایتمشلر و كفرڭ یاییلمەسنی أوڭلەمكلە برابر، یوز بیڭلرلە كیشی اسلامیتە كیرمشلردر. هانكی اسلام دیارندە كفر چیقسە، او منطقەدە قرآن بلیروب، نورلی قیلیجی ایلە مقابلە ایدر، كفری دفع و رفع أیلر. عصریمزدە بوڭا اڭ بیوك بر نمونە رسالۀ نوردر اڭ قوّتلی شاهد، بیڭلرلە رسالۀ نور طلبەلریدر

حرب عمومیدە، عالم اسلامڭ بعض مركزلرندە استقلالیت تهلكەیە دوشەجگی زماندە، فاس، جزایر، مصر، عراق، جاوە، هندستان، توركستان علمالرینە، فن و فلسفەدن طوغاجق طبیعیّون فكرینی جرح ایدەجك حقیقت قرآنیەیی و حقائق ایمانیۀ بشریەنڭ محافظەسنی، رسالۀ نورڭ چكردگی اولان اشارات الاعجاز رسالەسیلە كوسترمش. و بونڭ نتیجەسیدركە، رسالۀ نوردە چوق اوّل تبشیر و بیان ایدیلدیگی كبی، بو مذكور ملّتلر یڭیدن استقلالیتلرینە قاووشویورلر

رسالۀ نورڭ بو وطندە اكدیگی نورلی تخوملر فیلیز ویرمگە باشلامش، بو سایەدە دینی غزتەلرڭ چیقمەسی و قرآن مكتبلرینڭ آچیلمەسنە زمین تشكیل ایتمش و میلیونلرلە معصومڭ ایمانلرینی قورتارمغە سبب اولمشدر

شرق شمالیدە چیقان، دنیا چاپندە تصوّر ایدیلن بر اژدرهادن داها قورقونچ، دهشتندن بتون بشریتی تیترتن دینسزلك جریاننڭ بش پنچەسی، دنیانڭ بش

قطعەسنە اوزانمش، ایگنەلی طیرناقلریلە زهرلەمگە چالیشییور. بو معظّم تهلكەیی بیڭ درت یوز سنە اوّل اشارت بویوران قرآن عظیم الشّان، بو عصردە بو عظیم تهلكەیە قارشو رسالۀ نوری مقابلە چیقارییور

دنیا سیاسیّونلرینڭ دینسزلگە بیلمەیەرك یاردیم ایتدكلری ییللردە، رسالۀ نور خریستیان عالمنە مسلمانلرلە اتّحاد ایتمەیی اشارت ایدییور. قاتولیك و پروتستان میسیونرلرینی، عصای موسی و ذوالفقار رسالەسیلە ایقاظ ایدییور، مادّی و معنوی مسئولیتی كوسترییوردی یر یوزندە اڭ متمدّن ملّتلردن فینلاندیە، ایسوچ، نوروچ، بو حقیقت نوریە قارشوسندە قرآن كریم و حكیمی رهبر ایتمش، اسلامیتلە بر نوع اتّحاد ایدرك، شرق شمالیدە تام دجّالڭ اڭسەسنە وحی سماوی قیلیجنی، ذوالفقاری چكمشدر. (اَلْحَمْدُلِلّٰهِ هٰذَا مِنْ فَضْلِ رَبّٖی)

اینەبولی رسالۀ نور طلبەلرندن چوق قصورلی كناهكار عبد الرحمن چلبی صلاح الدّین

(٣٩٠)

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلا] دڭزلیدەكی معجزاتلی و یالدیزلی قرآنمز، بزە ایكی خالص نورجیلرڭ و

مبارك هیئتندن ایكی ذاتڭ و دڭزلیدە نورلرلە علاقەدار چوقلرڭ نامنە بو قدسی وظیفەیی كوردیلر، كتیردیلر. یالڭز یگرمی دردنجی جزئی نقصاندر. ان شٓاء اللّٰه یاقیندە او دە بولونور ویا یازیلیر.

[ثانیًا] بن حیاتی و صحّتی و دنیادە قالمەیی، یالڭز مدرسة الزّهرانڭ باشلادیغی درت مجموعەنڭ چیقمەسنە و تصحیح جهتندە بنم دە بر پارچە خدمتم اولمسی و انتشارینی كورمم ایچون ایستەیورم. یوقسە مدرسة الزّهرانڭ یتیشدیردیگی طلبەلر بڭا دە اویلە بر حیات معنویەیی تأمین ایدییورلركە، بو دنیوی حیات شخصیەمدن بیڭ دفعەدن زیادە قیمتداردر.

[ثالثًا] یاقیندە بڭا ضروری لزومی اولمایان بعض مبارك اشیامی و بڭا كوندردیگڭز بعض ذوالفقارلریمی صاتدیغمدن او مبارك فیئٓاتی اولان یوز اللی بانقنوطی سز دە یڭی چیقاجق عصای موسی نڭ نسخەلرندن آلمق ایچون كوندرەجگز.

[رابعًا] شرقدە چوق چالیشان خلوصینڭ مكتوبی ایلە، أونیورسیتەدە كنچلری اویاندیران مصطفی ایلە ضیانڭ اورادەكی نورجی كنچلر نامنە مشترك مكتوبلرینی كە - نورلرلە نفسلرینی تربیەیە باشلامەلرینە بر نمونە اولارق - لاحقەیە كیرمك ایچون لفًّا كوندریلدی. فقط سز تعدیل و اصلاح ایدرسڭز.

عموم قرداشلریمزە بیڭلر سلام و دعا ایدییورز.

اَلْبَاقٖی هُوَ الْبَاقٖی

قرداشڭز سعید النّورسی

لاحقەیە

(٣٩١)

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ تَعَالٰی وَبَرَكَاتُهُ مِلْءَ الدُّنْیَا وَمِلْءَ الْاٰخِرَةِ

عزیز و محترم و مبارك استادم،

[اوّلا] مادّی و معنوی صحّت و عافیتڭزڭ دوامنی رحمت بی نهایۀ الٰهیەدن نیاز ایدرم.

[ثانیًا] فتوحات نورانیەنڭ مژدەلی خبرلرندن طولایی (اَلْحَمْدُلِلّٰهِ هٰذَا مِنْ فَضْلِ رَبّٖی) دیرم.

[ثالثًا] فتوحات نورانیەنڭ بتون سكنۀ ارض اوزرندە فیضلی نتیجەلرینی ادراكە مظهریتی عبیدانە تضرّع أیلرم.

[رابعًا] مملكتمدە ایكی سنەیە یاقیندر نورلردن تفیّض ایدن و طلبەلگڭزە قبول بویوردیغڭز اخروی قرداشمز حافظ عمرڭ وعظلری ایلە چوق مؤثّر خدمتدە بولوندیغنی و یدی آی اوّل اذنلی كیتدیگم زمان كندیسنە بیراقدیغم نورلردن استفادە ایدرك بو فیضلی قرآنی و ایمانی خدمتە دوام ایتمكدە اولدیغنی عرض ایدرم.

[خامسًا] بو محیطدە خطبە موعظەلرینڭ چوق مؤثّر اولدیغنی و یازانلرڭ چوغالدیغنی، شیمدی یە قدر خطبە موعظەلرینڭ یگرمی دردە بالغ اولدیغنی،

بورانڭ بر كوینە بر هفتە اوّل كیتدیگمدە اطراف كویلردن طوپلانانلرە دە نورلردن بعض درسلری اوقومق میسّر اولدیغنی، بویلەلكلە بر دست رحمت و عنایتڭ شوقی ایلە خدمات و فتوحات نوریەنڭ دوام ایتمكدە اولدیغنی عرض ایدرم. بیلیرمكە، محترم استادم آنجق بو نورلی خیرلردن، نتیجەلردن ممنون اولورلر. و یینە قطعی بیلیرمكە، ایشمزدە تصادف یوق و اولاماز، دستورینی بتون خادملرە امر و تعلیم بویوران، تقریر ایدن او محترم استاددر. كونش كبی ظاهر عنایتڭ امارەلرینە برر تصدیق دیمك اولان بو كبی مظهریتلریمزی حمد و شكر آرتیرمەیە وسیلە اولور قناعتیلە یازمق لزومنی حسّ ایدییور و خصوصی مسلگمڭ قاعدەلرندن اولان وضعیتی مركزە بیلدیرمەیی ضروری كورویورم.

[سادسًا] برقاچ سنە اوّل، بو حوالیدە بولونان بر قرداشمزڭ باشلامق ایستەدیگی فقط لحكمةٍ موفّق اولامدیغی نورلی خدمتڭ بو فقیر و عاجز قصورلی قرداشڭز واسطەسیلە فیضلی و پارلاق ثمرە ویرمسی، پك عجیب و حكمتلی بر حادثەدر. او زمان مانع اولانلر بو كرە مشوِّق اولدیلر. چوق یرلردە اولدیغی كبی خلق ظن ایدییورلركە، بنم بر شخصی مزیّتم وار. اوندن صوڭرە امانتجینڭ امانتجیسنە امانت ایدیلن نورلرە باقییورلر. فسبحان اللّٰه! حكیم مطلقڭ حكمتلی تدبیرلرینە كوچوجك بر نمونەجك اولدیغمزی آڭلامییورلر. امرنامەڭزڭ ایكنجی قسمنی استنساخ ایدرك وهبی افندی قرداشمز واسطەسیلە نقشی و قادری آلوارلی محمد افندی یە كوندردم.

عزیز و محترم استادم، بو قصورلی قرداشڭزی كامل انسانلر صنفندە و حذاسندە صایمەڭزە متأثّر اولدم. بنم استادم یالڭز سزسڭز. بو فانیلرڭ هیچ برینە، بڭا باقی حیاتمی قزاندیراجق نورانی یولی كوسترن و حقائق ایمانیەیی درس ویرمكلە نهایتسز شفقتنی كوسترن عزیز استادمدن زیادە حبّ فی اللّٰه ایلە متحسّس اولامام. بنم نورلرڭ دائرەسندە عاجز بر فرد اولارق حزب اللّٰهە داخل اولدیغمی بیلمك و مبارك دعالریڭزلە نورلی شاكردلرڭ دعالرینە نائل اولمق، اڭ بیوك و مبارك اجرتمدر. ایمان ایدرمكە، [اَلْمَرْءُ مَعَ مَنْ اَحَبَّ] ابدی عالمدە بتون كوزللگی ایلە میوەسنی ویرەجكدر. قرداشلریمزلە مخابرەمز صورتًا انقطاعە اوغرامش كبیدر. محیطڭزدە و اسكی اقامت منطقەلریڭزدە و جوارلرندەكی بتون نورجیلرە علی الخصوص مخابرەمزە واسطە اولان ذاتە سلام دعا و حرمتلر ایدر، دعالرینی بكلرم.

عزیز و محترم استادیمڭ دە مبارك اللرندن كمال حرمت و تعظیملە أوپر، خیر دعالرینە شدّت احتیاجمی بر كرە داها عرض ایدرم.

اَلْبَاقِی الْحُبُّ فِی اللّٰهِ

اخروی قرداشڭز مخلص

بو حوالیدەكی بتون علاقەدارلر نامنە اونلرڭ سلام و دعالرینی دە آیریجە عرض ایدییورم.

[٣٩٢]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

برقاچ متدیّن قرداشلریمڭ روحی حالتلری آز چوق بنمكینە توافق ایتدیگندن، مشفق استادیمزڭ همّت و مبارك دعالری بنم و بزم كبی اولانلرڭ دردلرینە دوٓاء اولور امیدیلە شو حسب حالی یازییورم.

ای نفسم! مادام دییورسڭكە، كندیمی بگنمییورم. كناه و عصیانلە آلودە اولمشم. اللّٰهڭ أیی بر قولی اولمق برنجی دیلگم. فقط قصورلرلە طولویم. دردیمە دوٓاء اولاجق درمان ایسترم.

ای نفسم، نەدن یأس مطلق ایچندە چیرپینیرسڭ؟ نە ایچون دنیایە كلیشڭدن پیشمانسڭ. بیلیرسڭكە، ربّ رحیممزڭ رحمتی چوق كنیشدر. او یاراتان رحیم ذوالجلالڭ رحمتی حدسزدر. هم بیلییورسڭكە، بو وجود سفینەسندە سنڭ هیچ بر تصرّفڭ یوق. بتون حجیرات بدنیەڭ خلقت و فطرت حالیلە او ربّ رحیمڭی تقدیس و تسبیح ایدییور. سنڭ وظیفەڭ او سفینۀ ربّانیەدە یالڭز دومنجیلكدن عبارتدر. او حالدە سن نەدن عصیان ایلە كفران نعمت ایدییور و حیاتڭدن بیقییورسڭ؟ یوقسە قابلیتسزلگڭ ربّمڭ حضورندە بولونمەیە بر مانعەمی تشكیل ایدییور. اگر قابلیتسزلگڭی بر قصور تلقّی ایدوب بدبینلگە و عصیانە دوشویورسەڭ بیلمش اولكە، قابلیت و استعداد جناب حقّڭ بر لطف و كرمیدر.

اگر أوزرڭدەكی خالق رحیمڭ بو نعمتلرینە قارشو شكر ایدرسەڭ، او نعمت معنًا كوزللشەرك انكشاف ایدر. كفر و عصیان ایلە مقابلە ایتسەڭ: بوس بتون ألڭدن چیقمق احتمالی وار. هم بیلیرسڭكە، ای نفس امّارەم، سن انسانڭ اڭ بیوك دوشمانیسڭ. سنڭ فرعونلغڭی قیروب شرّڭدن قورتولمق، هر كیشینڭ خرجی دگلدر.

ای مرض و وسوسە ابتلاسنە معروض قالان نفسم، هم دییورسڭكە، كندینی اصلاح ایدەمەین باشقەلرینڭ اصلاحنە واسطە اولاماز. آڭلایورمكە، سن او منحوس شیطانڭ هجوملرینە معروض قالوب، قلبە ویردیگی القاآتڭ تأثیریلە اوهام و وسوسە درەلرندە ایڭلەیورسڭ. بوندن طولایی متأثّر اولوب یأسە دوشمە، زیرا بونلر سنڭ آرزوڭ خلافندە اولویور. و سنڭ مالڭ دگللردر. او جن شریرلرینە قارشو دیكە: الحمد للّٰه، بن مؤمنم. سنڭ شرّڭدن بنی بندن زیادە سَون ربّمە صیغینییورم. او، سنڭ بڭا ویرمش اولدیغڭ كدر و یأس مطلق، كافرلرڭ باشنە اولسون. اونڭ ایچون بن عجزیمی كورەرك ربّ رحیممە التجا ایدییورم. فقریمی آڭلایوب اونڭ شفقتنە كوونییورم. أوزرمدەكی نعمت و آثارینی تفكّر ایدرك حمد و ثنا ایلە لطف و كرمنە استناد ایدییورم.

رسالۀ نوردن آلدیغم بو درسی رسالۀ نورڭ بر قصورلی طلبەسی اولمقلغم حسبیلە یینە رسالۀ نوری دعاجی و شفاعتجی یاپارق اصلاحمی و اصلاحمزی رسالۀ نور حرمتنە یاراداندن نیاز ایدییورز. یا الٰهی و یا ربّی! ید قدرتڭدە طوران