[٥٧]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

بِعَدَدِ عَاشِرَاتِ دَقَٓائِقِ لَیَالٖی شَهْرِ رَجَبَ وَشَعْبَانَ وَرَمَضَانَ

عزیز، صدّیق قرداشلرم،

بو دفعەكی مكتوبلریڭز كلمدن اوّل، بر اخطار ایلە كندی جوابنی كرامتكارانە یازدیرمش. دیمك، مكتوب صاحبلرینڭ فوق العادە صداقتلری كرامت درجەسنە چیقمش.

قرداشلرم، مكتوبلریڭزدە چوق یوكسك دوشونجە و تقدیرات، بیڭدن بر حصّە دە بنم اولسە حدسز شكر ایدرم. بلكە رسالۀ نورڭ معنوی شخصیتی و چوق كثرتلی طلبەلری ایچندە بیلمدیگمز غایت یوكسك بر مقام صاحبی بر ذاتڭ تأثیراتی و قوماندەسی حسّ ایدیلییور. بنم كبی بیڭ درجە اوزاق بر بیچارەدە تصوّر ایدیلییور. حقّم اولمادن بڭا ویریلن زیادە اهمّیتڭز، ان شٓاء اللّٰه سزە ضرری اولماز. فقط رسالۀ نورڭ حسن جریاننە ضرر احتمالی وار. سز بر حقیقتی حس ایدییورسڭز و فوق العادە صداقت و اخلاصڭز ان شٓاء اللّٰه حق كورور. فقط صورتدە بعضًا آلدانیلیر. بز خدمتلە مكلّفز. نتیجەلری و موفّقیت، جناب حقّە عائددر.

لطفی وارثلرینڭ مكتوبندەكی [عثمان خالدینڭ] بیاناتی یالڭز رسالۀ نور حسابنە بر جهتدە قید ایدیلییور. شخصمە عائدیتی یوق. خسروڭ چوق تأثیرلی جاذبەدار مكتوبنە جواب یازمغە وقت بولامدق. باشدە بو مكتوبلردە اسملری بولونان ذاتلر اولارق عموم قرداشلریمزە برر برر سلام و ایّام مباركەدە دعا ایدرز و ایدەجگز. اونلردن بو قدسی لیالی و ایّام مباركەدە دعالرینی ایسترز.

اَلْبَاقٖی هُوَ الْبَاقٖی

قرداشڭز

سعید النّورسی

[اهمّیتلیدر]

[رسالۀ نور طلبەلرندن بر قسم قرداشلریمڭ بنم حدّیمڭ چوق فوقندە حسن ظنلرینی و افراطلرینی تعدیل ایتمك ایچون اخطار ایدیلن بر محاورەدر]

بوندن قرق اللی سنە اوّل، بیوك قرداشم ملّا عبد اللّٰهؒ ایلە بر محاورەمی حكایە ایدییورم:

او مرحوم قرداشم، اولیای عظیمەدن اولان حضرت ضیاء الدّینڭ؈ خاص مریدی ایدی. اهل طریقتجە، مرشدینڭ حقّندە مفرطانە محبّت و حسن ظن ایتسە دە مقبول كوردكلری ایچون، او مرحوم قرداشم دیدیكە: حضرت ضیاء الدّین بتون علومی بیلییور. كائناتدە، قطب اعظم كبی هر شیئە اطّلاعی وار. بنی، اونڭلە ربط ایتمك ایچون چوق خارقە مقاملرینی بیان ایتدی.

بن دە او قرداشمە دیدمكە: سن مبالغە ایدییورسڭ. بن اونی كورسەم، چوق مسئلەلردە الزام ایدەبیلیرم. هم سن، بنم قدر اونی حقیقی سومییورسڭ. چونكە كائناتدەكی علوملری بیلیر بر قطب اعظم صورتندە تخیّل ایتدیگڭ بر ضیاء الدّینی سورسڭ. یعنی او عنوان ایلە باغلیسڭ، محبّت ایدرسڭ. اگر پردۀ غیب آچیلسە و حقیقت كورونسە، سنڭ محبّتڭ یا زائل اولور ویاخود درتدن بریسنە اینر.

فقط بن او ذات مباركی، سنڭ كبی پك جدّی سَورم، تقدیر ایدرم. چونكە سنّت سنیە دائرەسندە، حقیقت مسلگندە، اهل ایمانە خالص و تأثیرلی و اهمّیتلی بر رهبردر. شخصی مقامی نە اولورسە اولسون، بو خدمتی ایچون روحمی اوڭا فدا ایدرم. پردە آچیلسە و حقیقی مقامی كورولسە، دگل كری چكیلمك، واز كچمك، محبّتدە نقصان اولمق.. بالعكس داها زیادە حرمت و تقدیر ایلە باغلاناجغم. دیمك بن حقیقی بر ضیاء الدّینی، سن دە خیالی بر ضیاء الدّینی سورسڭ. [حاشیە]

بنم او قرداشم انصافلی و مدقّق بر عالم اولدیغی ایچون، بنم نقطۀ نظریمی قبول ایدوب تقدیر ایتدی. ای رسالۀ نورڭ قیمتدار طلبەلری و بندن داها بختیار و فداكار قرداشلرم! شخصیتم اعتباریلە سزڭ زیادە حسن ظنّڭز، بلكە سزە ضرر ویرمز. فقط سزڭ كبی حقیقت بین ذاتلر وظیفەیە، خدمتە باقوب، او نقطەدە باقملیسڭز. پردە آچیلسە، بنم باشدن آشاغی یە قدر قصورات ایلە آلودە ماهیتم كورونسە، بندن قاچمغە بر وسیلە اولور. سزی قرداشلگمدن قاچیرمامق، پیشمان ایتمەمك ایچون، شخصیتمە قارشو حدّیمڭ پك فوقندە تصوّر ایتدیگڭز مقاملرە ارتباطڭزی باغلاماییڭز.

بن سزە نسبتًا قرداشم، مرشدلك حدّم دگل. استاد دە دگلم، بلكە درس آرقداشی یم. بن سزڭ، قصوراتمە قارشو شفقتكارانە دعا و همّتلریڭزە محتاجم. بندن همّت بكلەمەڭز دگل، بڭا همّت ایتمەڭزە استحقاقم وار. جناب حقّڭ احسان و كرمیلە سزلرلە غایت قدسی و غایت اهمّیتلی و غایت قیمتدار و هر اهل ایمانە منفعتلی بر خدمتدە، تقسیم المساعی قاعدەسیلە اشتراك ایتمشز. تساندیمزدن حاصل اولان بر شخص معنوینڭ فوق العادە اهمّیت و قیمتی و استادلغی و ارشادی بزە كافیدر.

هم مادام بو زماندە هر شیئڭ فوقندە خدمت ایمانیە اڭ اهمّیتلی بر وظیفەدر. هم كمیّت ایسە كیفیتە نسبتًا اهمّیتی آزدر. هم موقّت و متحوّل سیاست عالملری ابدی، دائمی، ثابت خدمات ایمانیەیە نسبتًا اهمّیتسزدر، مقیاس اولاماز، مدار دە اولاماز. رسالۀ نورڭ تعلیماتی دائرەسندە و بزلرە بخش ایتدیگی خدمت نقطەسندە فیضلی مقاملرە قناعت ایتملی ییز. حدّندن فضلە فوق العادە حسن ظن و مفرطانە عالی مقام ویرمك یرینە، فوق العادە صداقت و ثبات و مفرطانە ارتباط و اخلاص لازمدر. اوندە ترقّی ایتملی ییز.

اَلْبَاقٖی هُوَ الْبَاقٖی

قرداشڭز

سعید النّورسی

[٥٨]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ بِعَدَدِ ثَوَابَاتِ حُرُوفِ الْقُرْاٰنِ فٖی شَهْرِ رَمَضَانَ

عزیز، صدّیق قرداشلرم،

رسالۀ نورڭ قهرمانی اولان خسروڭ بو دفعەكی ایكی هدیۀ قدسیەسی و كرامتكارانە او ایكی سماوی هدیەنڭ معنوی اعجازینی كوزلرە دە كوستریر بر طرزدە بو شهور ثلاثەدە بزلرە و بو محیطە هدیە ایتمسی، رسالۀ نور نقطۀ نظرندە معجزانە بر خدمتدر. ان شٓاء اللّٰه او كل فابریقەسنڭ قلمی، بورالری دە بر كُلستانە چویرەجك. جناب حق او قلم صاحبنە، یازدیغی هر حرف قرآنە مقابل، لیلۀ قدردەكی كبی اوتوز بیڭ ثواب و رحمت و حسنە ویرسین. آمین آمین آمین.

عزیز، صدّیق قرداشلرم،

سزڭ فوق العادە صداقت و علوّ همّتڭزدن ترشّح ایدن بر هفتە اوّلكی مكتوبڭزە قارشو حسن ظنّڭزی بر درجە جرح ایدن بنم جوابمڭ حكمتی شودركە: بو زماندە اویلە فوق العادە حاكم جریانلر واركە، هر شیئی كندی حسابنە آلدیغی ایچون، فرضا حقیقی بكلنن او ذات دخی بو زماندە كلسە، حركاتنی او جریانلرە قاپدیرمامق ایچون سیاست عالمندەكی وضعیتدن فراغت ایدەجك و هدفنی دگیشدیرەجك، دییە تخمین ایدییورم.

هم اوچ مسئلە وار: بری حیات، بری شریعت، بری ایماندر. حقیقت نقطەسندە اڭ مهمّی و اڭ اعظمی، ایمان مسئلەسیدر. فقط شیمدی عمومڭ نظرندە و حال عالم الجاآتندە اڭ مهم مسئلە حیات و شریعت كوروندیگندن.. او ذات شیمدی اولسە دە، اوچ مسئلەیی بردن عموم روی زمیندەكی وضعیتلری دگیشدیرمسی، نوع بشردەكی جاری اولان عادت اللّٰهە موافق كلمدیگندن، هر حالدە اڭ عظیم مسئلەیی اساس یاپوب، اوتەكی مسئلەلری اساس یاپمایاجق. تاكە ایمان خدمتی صفوتنی عمومڭ نظرندە بوزماسین. و عوامڭ چابوق اغفال اولونابیلن عقللرندە، او خدمت باشقە مقصدلرە آلت اولمدیغی تحقّق ایتسین.

هم دە یگرمی سنەدنبری تخریبكارلقلە و اشدّ ظلم آلتندە او درجە اخلاق بوزولمش و او درجە متانت و صداقت غائب اولمشكە، اوندن، بلكە یگرمیدن بریسنە اعتماد ایدیلمز. بو عجیب حالاتە قارشو چوق فوق العادە ثبات و متانت و صداقت و حمیّت اسلامیّە لازمدر. یوقسە عقیم قالیر، ضرر ویرر. دیمك اڭ خالص و اڭ سلامتلی و اڭ مهم و اڭ موفّقیتلی خدمت، رسالۀ نور شاكردلرینڭ چالیشدقلری دائرە ایچندەكی قدسی خدمتدر. هر نە ایسە، شیمدیلك بو مسئلەیە بو قدر یتر.

عموم قرداشلریمزە برر برر سلام و بو ایّام مباركەدە دعا ایدرز. و مقبول دعالرینی، كلەجك ایّام و لیالئ مباركەدە ایستەیورز.

الحق، طاهرینڭ دە لمعات هدیەسنی پك چوق قیمتدار كوردك. ان شٓاء اللّٰه بو حوالیدە اوڭا چوق ثواب قزاندیراجق، تام بر لطفیدر. اللّٰه موفّق أیلەسین.

قرداشڭز سعید النّورسی

[٥٩]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ بِعَدَدِ ثَوَابَاتِ حُرُوفِ الْقُرْاٰنَیْنِ اللَّذَیْنَ اَرْسَلْتُمْ لَنَا

عزیز صدّیق قرداشلرم،

[اوّلًا] سزڭ لیلۀ براتڭزی و كلەجك رمضانڭزی تبریك ایدر و بو كلەجك لیلۀ قدری حقّڭزدە و حقّمزدە بیڭ آیدن داها خیرلی اولمەسنی و دفتر اعمالمزە بویلە كچمەسنی جناب حقدن نیاز ایدییورز. و بویلەجە، بایرامە قدر [اَللّٰهُمَّ اجْعَلْ لَیْلَةَ قَدْرِنَا فٖی هٰذَا الرَّمَضَانَ خَیْرًا مِنْ اَلْفِ شَهْرٍ لَنَا وَلِطَلَبَةِ الرَّسَٓائِلِ النُّورِ الصَّادِقٖینَ] دعاسنی ایتمەیە نیت ایتدك.

هم سزڭ ایكی معجزەلی قرآنی بزلرە بو مبارك آیلردە كوندرمەڭز، ان شٓاء اللّٰه او درجە مدار بركت و ثواب و حسنات و فتوحات اولاجقكە، حقّمزدە بو رمضانڭ هر بر كونی بر لیلۀ قدر حكمنە كچەجگنی رحمت الٰهیەدن امید ایدرز.

شیمدیدن بز تدبیر ایتدككە، ایكی قرآنی، رسالۀ نورڭ بورادەكی خاص طلبەلری رمضان شریفدە، هر بری هر كوندە بر جزؤینی سزڭ ایلە برابر اوقومق ایلە، رمضانڭ هر كونندە بر ختمۀ قرآنیە اولارق، معنوی و چوق كنیش بر مجلسدە، اسپارطە و قسطمونی یی احاطە ایدن بر دائرەدە حلقە طوتان رسالۀ نور طلبەلرینڭ و او دائرەنڭ مركزندە سزلر بولونمق جهتیلە رسالۀ نور شاكردلرینڭ اطرافڭزدە اولارق، نقشیدە ختمۀ خواجگان طرزندە، فقط چوق بیوك بر مقیاسدە رسالۀ نورڭ بتون شاكردلری معنًا حاضر و او دائرەدە بولونویور نیّتیلە، تصوّریلە اوقونمق، او قدسی ختمەیی یاپمق، جناب حقّڭ رحمتندن توفیق نیاز ایدرز.

[ثانیًا] حاجی حافظڭ صاو كوینڭ قهرمان طلبەلرینڭ فوق العادە خدمتلری، اورالردە سبب تشویق و مدار غیرت و نمونۀ امتثال اولدیغی كبی، بو حوالیدە دخی اونلرڭ او خارق العادە سعی و غیرتلری، فوق العادە حسن مثال و نمونۀ غیرت اولارق اهمّیتلی بر انتباه و اشتیاقە سببیت ویرمش. قهرمان خسروڭ اونلرە دائر مكتوبلری، مبارك نسخەلر كبی، تنبللك، لاقیدلق خستەلقلرینە مبتلا اولانلرە شفا اولور، اللردە كزر.

[ثالثًا] سزڭ بورایە كلن قیمتدار مكتوبلریڭزی لاحقەیە یازمشز، فقط بعض كلمەلری طی ایتدك. مفرطانە حسن ظندن كلن جملەلری تعدیل ایتدك، كوجنمەییڭز.

[رابعًا] اسلام كویی، قولە أوڭی اورتەسندە اولان و صدّیق صبری و لطفی، ذكائی كبی طلبەلری یتیشدیرن آغراس [آتابگ] قریەسی، چوق دفعە خاطریمە كلییوردی. عجبا بو كوی نەدن كری قالدی، سوندی؟ دییە دوشونوب متأثّر اولویوردم. فقط جناب حقّە حدسز شكر اولسونكە، طاهری و عبد اللّٰه چاوش او اندیشەمی تمامیلە ازالە ایتدیلر، بیوك بر تسلّی بڭا ویردیلر. حتّی بو دفعە طاهرینڭ بزە هدیە ایتدیگی لمعەلر و یدنجی شعاعی بر جلد ایچندە جلدلتدكدن صوڭرە مطالعە ایتدم. او طاهریدە بر خسرو، بر لطفی، بر عاصم، بر ذكائی كوردم. جناب حق اوندن و سزلردن ابدیًا راضی اولسون. اونڭ نسخەسی، بورادە چوق ایش كورەجك ان شٓاء اللّٰه.

قرآن عظیم الشّان و معجز البیانڭ حزب الاكبر الاعظم نامندە، رسائل النّوریەنڭ منبعلری و اساسلری اولان بش یوزدن فضلە آیاتلری یازدق. بو رمضاندە سزە كوندرمگە موفّق اولامدق. ان شٓاء اللّٰه بر وقت سزە كوندریلەجك.

عموم قرداشلریمزە برر برر سلام و دعا ایدرز. و بو مبارك ایّامدە و لیالیدە دعالرینی ایسترز.

اَلْبَاقٖی هُوَ الْبَاقٖی

قرداشڭز سعید النّورسی

[٦٠]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

عزیز، صدّیق قرداشلرم،

غوث اعظمڭ؈ [فَاِنَّكَ مَحْرُوسٌ بِعَیْنِ الْعِنَایَةِ] تأمینكارانە فقرەسی، شیمدی یە قدر رسالۀ نورڭ شاكردلری حقّندە تمامًا مطابق چیقدی. ان شٓاء اللّٰه خسرو، رشدی، رأفت كبی قرداشلریمزڭ، بالخاصّە خسرو كبی چوق متین بر ركنڭ مفارقتی، صورتًا الیم و ضررلی كوروندیگی حالدە، غایت خیرلی بر صورت آلمەسنی رحمت الٰهیەدن امیدوارز.

حتّی حپسمز مصیبتی، كرچە ظاهری بر عذاب ایدی، فقط حقیقت نقطەسندە خدمتمز حقّندە بیوك بر عنایت و رحمتە چوریلدی. للّٰە الحمد، سزلرڭ غیرتڭزلە او حوالیدە چوق خسرولر وار، میدانە چیقمەیە باشلامشلر. بلكە چوق زماندنبری متمادیًا چالیشمقدن خسروە بر استراحت ویریلدی و قیمتدار قلمی یرندە مبارك لسانی و خالصانە احوالی، یینە قدسی خدمتنی ادامە ایتمەسنی عنایت الٰهیەدن امیدوارز. ناصلكە فیضی، صلاح الدّینڭ عسكرلگی دە اویلە مبارك اولدی.

قرداشلرم! بو حادثە مناسبتیلە رسالۀ نورڭ تام مطابق چیقان بر اخبار غیبیسنی بیان ایدییورم:

خسرو و خلوصی و رشدی و رأفت كبی رسالۀ نورڭ چوق شاكردلری، مسلك عسكری یە و بو ایكنجی حرب عمومی یە مناسبتدار بر صورتدە كیرمەلرینی و ایكنجی بر حرب عمومی اولاجغنی و اشتراكمزی یعنی طلبەلرڭ اشتراكنی آلتی یدی سنە اوّل خبر ویرمش. چونكە یگرمی سكزنجی لمعە اولان ایكنجی كرامت علویەنڭ ایكنجی امارەدە [فَیَا حَامِلَ الْاِسْمِ] بحثندە [فَقَاتِلْ وَلَا تَخْشَ] برابر اولسە، بیڭ طقوز یوز قرق كسور اولویور. اللّٰە اعلم، او تاریخدە، بر حرب عمومی یە اشتراكمزی اشارت ایدییور دییە خبر ویرمش. ایشتە شیمدی عین تاریخدەكی، رسالۀ نورڭ اركان مهمّەسی اشتراك ایدییور.

قرداشلریمزە برر برر سلام ایدرز. حلمی، فیضی، امین، نظیف سزلرە سلام و عرض حرمت ایدرلر.

اَلْبَاقٖی هُوَ الْبَاقٖی

قرداشڭز سعید النّورسی

[٦١]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ بِعَدَدِ حَاصِلِ ضَرْبِ عَاشِرَاتِ دَقَٓائِقِ لَیْلَةِ الْقَدْرِ فٖی حُرُوفِ الْقُرْاٰنِ

عزیز، صدّیق قرداشلرم،

[اوّلًا] بتون روح و جانملە مبارك رمضانڭزی تبریك ایدرم. و او مبارك شهردە ایتدیگڭز دعالرڭ، جناب حق یانندە مقبول اولمەسنی ارحم الرّاحمیندن نیاز ایدرم.

[ثانیًا] بو سنەكی رمضان شریف هم عالم اسلام ایچون، هم رسالۀ نور شاكردلری ایچون غایت اهمّیتلی و پك چوق قیمتلیدر. رسالۀ نورڭ شاكردلرینڭ اشتراك اعمال اخرویە دستور اساسیلری سرّنجە، هر بریسنڭ قزاندیغی مقدار، هر بر قرداشلرینە عین مقدار دفتر اعمالنە كچمەسی، او دستورڭ و رحمت الٰهیەنڭ مقتضاسی اولمق حیثیتیلە، رسالۀ نور دائرەسنە صدق و اخلاص ایلە كیرنلرڭ قزانچلری پك عظیم و كلّیدر. هر بری، بیڭلر حصّە آلیر. ان شٓاء اللّٰه اموال دنیویەنڭ اشتراكی كبی انقسام و تجزّی ایتمدن هر بریسنە عین عمل دفترینە

كچمەسی، بر آدمڭ كتیردیگی بر لامبە، بیڭلر آیینەلرڭ هر بریسنە عین لامبە انقسام ایتمدن كیرمسی كبیدر. دیمك رسالۀ نورڭ صادق شاكردلرندن بریسی، لیلۀ قدرڭ حقیقتنی و رمضانڭ یوكسك مرتبەسنی قزانسە، عموم صادق شاكردلر صاحب و حصّەدار اولمق، وسعت رحمت الٰهیەدن چوق قوّتلی امیدوارز.

[ثالثًا] فداكار و ثباتكار قرداشمز خلیل ابراهیمڭ حدّمدن بیڭ درجە زیادە حسن ظنّیلە استعمال ایتدیگی تعبیرات، مكتوبندە كوستردیگی صمیمیت، شدّت مربوطیتی و صارصیلماز علاقەسنی كوسترییور. اونڭ استادینە قارشو تعبیراتنی رسالۀ نور حقّندە موافق بولدیغمزدن استاد كلمەسنی قالدیردق. اونڭ یرینە رسالۀ نوری بیراقدق. رسالۀ نوری اونڭ مرحبالرینە مخاطب ایتدك. اویلەجە لاحقە فقرەلری ایچنە كیردی.

بنم طرفمدن اوڭا یازیڭز: شیمدی یە قدر اونی رسالۀ نورڭ اركان مهمّەسندندر دییە اركانلر ایچندە هر وقت بنم قزانجمدە اسمیلە حصّەداردر. اونڭلە تشریك مساعی ایدن اینجە محمد كبی و حپسدە كتابتیلە رسالۀ نورڭ تسویدندە چوق خدمت ایدن شفیق بگ كبی قرداشلریمە سلام ایدرم. خلیل ابراهیمڭ خسرو حقّندەكی نورلی فقرەسی بنی مسرور ایتدی.

[رابعًا] خلوصی بگڭ غایت صمیمی و دقّتلی و نكتەلی اولان صبری یە یازدیغی مكتوبی، خلوصینڭ دائما اخلاص و صداقتدە ترقّیسنی كوسترییور. بنم طرفمدن دە اوڭا یازیڭزكە: شاكردلرڭ اركانندە برنجیلگی دائما محافظە ایدییور. و بندن هیچ آیریلمامش كبی بر وضعیتدەدر.

[خامسًا] مباركلرڭ كویندن و جماعتندن و مرحوم لطفینڭ خلفلرندن و عسكرە كیدن كوچك حسین بڭا بر ایكی مكتوب یازدی. بن جوابنی یازمشدم. شیمدی ایسە مكتوبڭ جوابنی آلمدم دییە یازییور. اویلە ایسە، مباركلر بنم طرفمدن اوڭا جواب یازسینلر. دائم قلمی ایشلەدیگی كبی یینە عسكرلگی مدّتنجە اویلەجە حصّەداردر. مكتوب یازمدیغمە كوجنمەسین. هم ترخیصدن صوڭرە بنم یانمە كلمك آرزو ایدوب یازییور. كلمك مناسب دگل.

مباركلرڭ و باشدە برنجی عبد الرحمن، بیوك مصطفی و حافظ مصطفی و قهرمان كوچك علی اولارق جماعتلرینە سلام ایدرم. اسلام كویی ایلە آغراس قهرمانی باشدە حافظ علی و لطفی وارثلری و خلفلری صاو كوینڭ،

باشدە حاجی حافظ و قهرمانلری اولارق پك چوق سلام ایدرم. و او حوالیلردە بولونان بتون قرداشلریمزە و اسپارطەدە و بالخاصّە بارلە و بدرەدە اگیردیردە بولونان قرداشلریمزە برر برر سلام و دعا و رمضانلرینی تبریك ایدرم. و دعالرینی ایسترم. بورادەكی قرداشلریڭز دە سزلرە سلام و رمضانڭزی تبریك ایدییورلر.

خسروڭ مفارقتنڭ ویردیگی هیجان، نظر دقّتی تا بورایە قدر دە جلب ایتدیگندن، احتیاط هر وقت مناسب اولدیغی كبی، شیمدی دە مناسبدر.

اَلْبَاقٖی هُوَ الْبَاقٖی

دعاڭزە چوق محتاج قرداشڭز

سعید النّورسی

[٦٢]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

عزیز، صدّیق، مبارك، قهرمان قرداشلرم،

[اوّلًا] بو مبارك رمضاندە اشتراك اعمال دستور اساسیلە، هر بر خاص قرداشمزڭ قرق بیڭ دیلی بولونان بر ملائكە حكمندە، قرق بیڭ دیللر ایلە، یعنی قرداشلرڭ عددنجە معنوی دیللر ایلە ایتدكلری و ایدەجكلری دعالر، رحمت الٰهیە نزدندە مقبول اولمەسنی، او لسانلر عددنجە، جناب ارحم الرّاحمیندن نیاز ایدییورز. بو ماهیتدەكی رمضانڭزی تبریك ایدییورز.

[ثانیًا] بو دفعەكی متعدّد تأثیرلی و سرورلی و مژدەلی مكتوبلریڭزە قارشو، بر كتاب قدر جواب ویرمك لایق ایكن، وقتڭ مساعدەسزلگیلە قیصە جوابمدن كوجنمەییڭز.

اڭ باشدە، قهرمانلر یاتاغی اولان صاوە كوینڭ اهمّیتلی بر طلبەسی اولان احمدڭ مكتوبندە اویلە بیوك بر مسئلە كوردمكە، بنی سرور یاشلریلە آغلاتدیردی.

جناب حقّە یوز بیڭلر شكر اولسون، رسالۀ نورڭ تمام قیمتنی، او كویڭ مبارك والدەلری و خانملری تام آڭلامشلر. او مبارك خانملرڭ و او قیمتدار و خالص آخرت همشیرەلریمڭ، رسالۀ نورڭ انتشارینە كوستردكلری فداكارلق، بنی و بزی كمال سروردن آغلاتدیردی.

ذاتًا رسالۀ نورڭ مسلگندەكی اڭ مهم بر اساس، شفقت اولدیغندن و شفقت معدنلری دە خانملر اولدیغندن، چوقدنبری بكلردمكە، قادینلر عالمندە رسالۀ نورڭ ماهیّتی آڭلاشیلسین. للّٰە الحمد، بو حوالیدە دە، بو یاقیندە ارككلردن زیادە بر اشتیاق و فعّالیتلە بورادەكی خانملر تام چالیشییورلر. صاوەلی مباركلرڭ همشیرەلری اولدقلرینی كوسترییورلر. بو ایكی تظاهر بو زماندە بر فال خیردركە، او شفقت معدنلرندە رسالۀ نور پارلایاجق، فتوحات یاپاجق.

هم صاو كوینڭ بهادر چوبانلری، طوربەلرندە رسالۀ نوری یازمق ایچون طاشیمەلری، عین اورادەكی خانملرڭ فداكارلقلری كبی، بو حوالیدە غایت تأثیرلی بر مدار تشویق اولاجق. او خانملرڭ و او چوبانلرڭ خصوصی اسملرینی بیلمك آرزو ایدییورز. تا خصوصی اسملرلە خاص طلبەلر ایچنە كیرسینلر.

كاتب عثمانڭ حقیقتلی رؤیاسی، الحق بیوك بر حقیقتە اشارت ویرییور. چوق مبارك و مژدەلیدر. رشدینڭ رؤیاسندە، پیغمبریمزڭؐ امریلە حضرت صدیقؓ منبردە یگرمی طقوزنجی سوزی خطبەسندە كوسترمسی كبی.. او كوگدن اینن حوری دە لاحقەیی خطبە اولارق اوقومسی، رسالۀ نورڭ مقبولیتنە كوزل بر اشارتدر.

بیوك حافظ علینڭ مكتوبی بزی چوق مسرور ایتدیگی كبی، توافقاتە دائر كشف ایتدیگی حقیقت اجمالی حقدر. كلّی اولماسە دە اكثریتجە كوردیگی معنا كورونور. بن دە آیری بر معنا حافظ علی كبی حسّ ایدییوردم. بو كونلردە بڭا قناعت كلدیكە، فطری، كندی كندینە كلن توافقات نوریە، مؤلّفڭ تعبیراتندەكی نقصانلری تكمیل و قصورلرینی تصحیح ایدییور كبی كوردم. یوز یردە فطری توافقڭ تام تامنە كلمەسی، بر كلمەیە احتیاج كوسترییور. باقییورمكە، او كلمە تألیف وقتندە نقصان بیراقمشم. اگر شیمدی یازسە ایدم، او كلمەیی یازمق لازم كلییوردی. بو واقعە پك چوق تكرّر ایتدی، یوز دفعە كوردم. دیمك بر وظیفەسی دە بڭا عبارەنڭ تام افادەسنی بیلدیرییور.

آیدینلی حسنڭ پك كوزل قلمیلە جمعیتلی مكتوبی بنی فوق العادە مسرور أیلەدی. جناب حق اویلە قلملری رسالۀ نور خدمتندە دوام ایتدیرسین. یینە صاوە كوینڭ دیگر قرداشمز احمدڭ رسالۀ نورڭ كوچوجك معصوم طلبەلرینڭ حقّندە خبر ویردیگی حادثە، او قدر مدار سرور و شكراندركە، تعریف ایدیلمز. او چوق مبارك كویڭ، باشدە حاجی حافظ محمدی، احمدلری، محمدلری كبی پك چوق رسالۀ نورە صاحب و ناشر ویرن او كوی، بزم ایچون طاشیلە طوپراغیلە مباركدر.

صوردیغڭز مسئلە، علمای شریعت جواب ویرمشدر. حیوانات برر استحالە ماكینەسی اولدیغندن، ییدكلری پیس شیئی تمیزلتدیرر. یالڭز پیس شیئڭ قوقوسی كلسە مكروه دیمشلر.

بزە اوّلجە طاهری قلمیلە كوندریلن لمعەلر، عینًا خسروڭ طرزندە غایت كوزل و شیرین یازیلمش. بورادە چوق استفادە ایدیلییور. عجبا او طاهر آتابگلی طاهریمیدر، یوقسە صاولی طاهرمیدر؟ اسپارطەنڭ حافظ علیسی اولان قرداشمز، بن اورادە ایكن یانمە كلییورلرمی ایدی؟ تخطّر ایدەمییورم. محمد زهدی یی قوّتلی حسّ ایدییورم.

هر نە ایسە، داها چوق علاقەدار اولدیغم چوقلر وار. پك چوق اولدیغندن مكتوبلر دگل، كتابلر لازم. سزە رسالۀ نورڭ منبعی، استادی، اساسلری، حقیقتلری اولان حزب الاكبر قرآنینڭ بر نسخەسنی كوندرمك ایچون یازدیرییورز. بتون قرداشلریمزە و همشیرەلریمزە رسالۀ نورڭ كوچك طلبەلرینە هم سلام، هم دعا، هم رمضانلرینی تبریك، هم دعالرینی ایسترز.

مكتوبلریڭزدن مهم پارچەلری لاحقەیە كیرەجك. بورادەكی قرداشلریڭز جملەڭزە سلام و عرض حرمت ایدرلر.

اَلْبَاقٖی هُوَ الْبَاقٖی

قرداشڭز

سعید النّورسی

[٦٣]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ بِعَدَدِ عَاشِرَاتِ دَقَٓائِقِ رَمَضَانَ

عزیز، صدّیق قرداشلرم،

لطیف و معنیدار و بشارتلی ایكی حادثەیی بیان ایدییورم:

[برنجیسی] مأیوسانە بر خاطرەدن مژدەلی بر اخطار: بوكونلردە خاطریمە كلدیكە، حیات اجتماعیەیە كیرن، هانكی شیئە تماس ایتسە، اكثریتلە كناهلرە معروض قالییور. هر جهتدە كناهلر سربستجە انسانی صارییورلر. بو قدر كناهلرە قارشو انسانڭ خصوصی عبادت و تقواسی ناصل مقابلە ایدەبیلیر؟ دییە مأیوسانە دوشوندم.

حیات اجتماعیەدەكی رسالۀ نور طلبەلرینڭ وضعیتلرینی تخطّر ایتدم. رسالۀ نور شاكردلری حقّندە نجاتلرینە و اهل سعادت اولدقلرینە دائر قوّتلی اشارات قرآنیەیی و بشارت علویەیی و غوثیەیی دوشوندم. قلبًا دیدمكە: هر بری بیڭ یردن كلن كناهلرە قارشو ناصل بر دیل ایلە مقابلە ایدر، غلبە ایدر، نجات بولور؟ دییە متحیّر قالدم. بو تحیّریمە مقابل اخطار ایدیلدیكە:

رسالۀ نورڭ حقیقی و صادق شاكردلرینڭ مابینلرندەكی دستور اساسی اولان اشتراك اعمال اخرویە قانونیلە و صمیمی و خالص تساند سرّیلە هر بر خالص، حقیقی شاكرد، بر دیل ایلە دگل، بلكە قرداشلری عددنجە دیللر ایلە عبادت ایدوب استغفار ایدرك، بیڭ طرفدن هجوم ایدن كناهلرە، بیڭلر دیل ایلە مقابلە ایدر. بعض ملائكەنڭ قرق بیڭ دیل ایلە ذكر ایتدكلری كبی.. خالص، حقیقی، متّقی بر شاكرد دخی، قرق بیڭ قرداشنڭ دیللریلە عبادت ایدر، نجاتە مستحق و ان شٓاء اللّٰه اهل سعادت اولور. رسالۀ نور دائرەسندە صداقت و خدمت و تقوا و اجتناب كبائر درجەسیلە او علوی و كلّی عبودیتە صاحب اولور. البتە بو بیوك قزانجی قاچیرمامق ایچون تقوادە، اخلاصدە، صداقتدە چالیشمق كركدر.

[ایكنجیسی] اسكی زماندە، اون درت یاشندە ایكن اجازت آلمەنڭ علامتی اولان استاد طرفندن صاریق صاردیرمق، بر جبّە بڭا كییدیرمك وضعیتنە مانعلر بولوندی. یاشمڭ كوچكلگی، مملكتمزدە بیوك خواجەلرە

مخصوص كسوەیی كییمك یاقیشمدیغی.. ثانیًا، او زماندە بیوك عالملر، بڭا قارشو استادلق وضعیتی دگل، یا رقیب ویاخود تسلیمیت درجەسنە كیردكلری ایچون، بڭا جبّە كییدیرەجك و استادلق وضعیتنی آلاجق كندیلرینە كووننلر بولونمدی. و اولیای عظیمەدن درت بش ذاتڭ وفات ایتمەلری جهتندە، اللی آلتی سنەدر اجازتڭ ظاهر علامتی اولان جبّەیی كییمك و بر استادڭ ألنی اوپمك، استادلغنی قبول ایتمك حقّمی بوكونلردە، یوز سنەلك بر مسافەدە حضرت مولانا ذوالجناحین خالد ضیاء الدّین؈، او جبّەیە صاریلان بر صاریق ایلە پك غریب بر طرزدە كندی جبّەسنی بڭا كییدیرمك ایچون كوندردیگنی بعض امارەلرلە بڭا قناعت كلدی. بن دە او مبارك و یوز یاشندە جبّەیی كیییورم. [حاشیە]جناب حقّە یوز بیڭلر شكر ایدییورم. عموم قرداشلریمزە برر برر سلام و دعا و استدعا ایدییورز. ان شٓاء اللّٰه بو كونلردە یازدیرمش اولدیغمز حزب الاعظم قرآنی یی پوستە واسطەسیلە كوندرەجگز.

اَلْبَاقٖی هُوَ الْبَاقٖی

قرداشڭز سعید النّورسی

[٦٤]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ بِعَدَدِ عَاشِرَاتِ دَقَٓائِقِ رَمَضَانَ وَعَاشِرَاتِ دَقَٓائِقِ لَیْلَةِ الْقَدْرِ

سزە كوندردیگمز الحزب الاكبر القرآنینڭ باشندە یازیلان عنوان ایچندە بر جملە نقصان قالمش. شویلەكە:

معجزاتلی بر ورد اوقومق ایستەین، بونی اوقوسون یرندە، (معجزاتلی و هر بر حرفی اون و یوز و بش یوز و بیڭ و بیڭلر قدر ثواب و میوە ویرن بر وردی اوقومق ایستەین، بو سماوی وردی اوقوسون) یازیلاجق.

[ثانیًا] بوندن اوّل مژدەلی خاطرەدە، هر بر خالص و حقیقی متّقی شاكرد، قرداشلری عددنجە دیللر ایلە عبادت ایدوب استغفار ایدر فقرەسنە، یینە بر اخطار ایلە بو كلن جملە علاوە ایدیلسین. جملە دە بودر: