بو عجیب احتكاری و بركتسزلك و آچلغی نتیجە ویردیگنە بزە قناعت ویردی. شیمدی یانمدەكی، امین و فیضی كبی سائر آرقداشلرم دە عین قناعتدەدرلر.

عموم قرداشلریمزە سلام و دعا و دعالرینی ایستەیورز اَلْبَاقٖی هُوَ الْبَاقٖی

قرداشڭز سعید النّورسی

[١٢٨]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ بِعَدَدِ حُرُوفِ مَا كَتَبْتُمْ وَطَبَعْتُمْ

عزیز، صدّیق، مقتدر، متیقّظ قرداشلرم،

سزڭ مبارك لیالئ عشرەڭزی و قربان بایرامڭزی تبریك ایدرز. نور فابریقەسی صاحبی حافظ علینڭ حشر جسمانی حقّندەكی خاطرینە كلن مسئلە اهمّیتلیدر. و مكتوبنڭ آخرندەكی تمثیلی، غایت كوزل و معنیداردر. او خاطرە ایلە، طوقوزنجی شعاعڭ مقدّمۀ حشریەدن صوڭرەكی طقوز برهان حشری یی ایستەیور دییە آڭلادم. فقط مع التّأسّف، بر ایكی سنەدر تألیف وظیفەسی توقّف ایتمش. رسالۀ نورڭ مسائلی علملە، فكرلە، نیّتلە و قصدی بر اختیارلە دگل.. اكثریت مطلقە ایلە سنوحات، ظهورات، اخطارات ایلە اولویور. بو طقوز براهینە شیمدی احتیاج حقیقی قالمامشكە، تألیفە سوق اولونمییورز.

اوت، ایمان باللّٰه و ایمان بالیوم الآخرت، عالم اسلامیتڭ ایكی قطبی و ایكی كونشیدر.

[برنجیسنی] رسالۀ نور، تمامیلە برهانلرینی ایضاح ایتمش.

[ایكنجی قطب ایسە] قسمًا مستقل اولارق اوننجی سوز، یگرمی طقوزنجی سوز، یگرمی سكزنجی سوز، خصوصًا جسمانی لذّتلرڭ اثباتندە و مقدّمۀ حشریە كبی رسالەلردە غایت قوّتلی حشر جسمانی یی اثبات ایتمش، معنّدلری دە صوصدیرمش. و ایمان باللّٰه كبی، بو دنیادەكی موجودات ظاهر بر صورتدە اونی كوسترمدیگندن، قسم اكثریسی ایسە سائر اركان ایمانیە ایچندە حشری قوّتلی اثبات ایدر.

ازجملە، قرآن معجز البیانڭ حقّانیتنی اثبات ایدن بتون حجّتلری، ایكنجی درجەدە حشر جسمانی یی، بیڭلر آیات قرآنیەنڭ تصویر و ایضاحاتلریلە اثبات ایدییور. عجبا قرآن معجز البیانڭ معجزانە جنّتڭ لذائذ جسمانیەسندن بحثلری و ایضاحلری درجەسندن، داها ایضاحە لزوم قالیرمی؟

هم رسول اكرم علیە الصّلاة والسّلامڭ حقّانیتنی اثبات ایدن بتون معجزەلری و حجّتلری، ایكنجی درجەدە حشر جسمانی یی و جنّت و جهنّمڭ لذائذ و آلام جسمانیەسنی خارقە بلاغتلە تصویر و ایضاح ایدییور. او ایضاحدن صوڭرە، داها ایضاحە احتیاج قالیرمی؟

هم جناب حقّڭ وجوب وجودینی و رحیمیّت و حكیمیتنی و علم و قدرتنی و عادلیّت و حفیظیتنی و صفات قدسیەسنی اثبات ایدن بتون برهانلر، حجّتلر، بر جهتدە حشری اثبات ایتدیگی كبی.. ربوبیتڭ مقتضاسی اولان اِرْسَالِ رُسُلْ و انزال كتب جهتیلە، هم رسالت محمّدیەییؐ استلزام، هم قرآن، اونڭ قونوشمەسی و كلامی اولدیغنی اثبات ایتمكلە، حشر جسمانی یی تفصیلاتیلە بو ایكی نقطەدن یینە اثبات ایدییور.

[الحاصل] رسالۀ نوردە ایمان باللّٰه و ایمان بالیوم الآخرتی اولان ایكی قطب ایمانی، تام بربرینە مساوی كلەجك بر درجەدە اثبات ایدیلمش. یالڭز بو قدر واركە، حشر جسمانی قسمًا صریحًا و قسمًا ضمنی و تبعی اثبات ایدیلمش. چونكە بو عالم شهادت، صانعنی غایت صریح و ظاهر كوسترییور. و حشری، ضمنی و پردەلی خبر ویرر. ان شٓاء اللّٰه بر زمان، رسالۀ نورڭ شاكردلرندن بریسی ویا برقاچ دانەسی، او طقوز مقامی و براهینی تألیف ایدەجك و مقدّمۀ حشریەنڭ باشندەكی آیت اعظمڭ طقوز فقرەسنڭ خزینەلرینی، رسالۀ نوردە منتشر حشر جسمانی براهینیلە و قلبلرینە كلن سنوحات و الهامات ایلە آچوب، طوقوزنجی شعاعی اوننجی سوزدن، داها قوّتلی بر طرزدە تكمیل ایدەجك.

بتون قرداشلریمزە، همشیرەلریمزە برر برر سلام و بایراملرینی تبریك ایدییورز.

اَلْبَاقٖی هُوَ الْبَاقٖی

قرداشڭز سعید النّورسی

[١٢٩]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

عزیز، صدّیق قرداشلرم،

قهرمان طاهری و حافظ مصطفینڭ یاپدقلری خدمت چوق كوزلدر. اونلرڭ تدبیرلری اصابتلیدر، حقدر. نور فابریقەسنڭ دیوانندە ویردیگڭز قرارلر، نە اولسە قبولمزدر. اشارات قرآنیە، توابعلریلە برابر چوق كوزلدر. یالڭز سیّد شفیقە كیدن مكتوب، شخصنە عائد قسمی كیرمیەجكدی. لاحقەدن آلدیغڭز پارچەلر دە چوق كوزل. بیوك علی سیستمندە، كوچك و ایكنجی علینڭ معنیدار فقرەسی اییدر، فقط مختصردر.

اڭ اوّل كنچلرە عائد اوچ درت درس-كە حافظ مصطفی یە ویرمشدك- ال ماكینەسیلە ممكن ایسە اسكی حروفلە، دگلسە یڭی حروفلە [حاشیە]نور فابریقەسنڭ دیوانندەكی هیئت مناسب كورسە و حال مساعدە ایتسە، یازیلسین. بزە دە بعض نسخەلر كوندریلسین. مباركلرڭ اشارات الاعجازلرینە بدل بر نسخەمی پوستە ایلە كوندردك.

جمعە كوننە راست كلن بو بایرام، چوق قیمتدار اولان حجّ اكبر اولدیغندن، حجّە بو سنە كیدنلر چوق قزانمشلر. جناب حق بزی دە اونلرڭ خیرلی دعالرینە حصّەدار أیلەسین. آمین. تكرار بتكرار او بایرامڭزی، عموم رسالۀ نور شاكردلرینڭ بایراملرینی و نور و كل فابریقەلرینڭ هیئتلرینی و مدرسۀ نوریە شاكردلرینڭ و استادلرینڭ و بارلە صدّیقلرینڭ و معصوملرڭ و امّی اختیارلرڭ، رجالاً و نساءً عمومنڭ برر برر بایراملرینی تبریك ایدییورز.

اَلْبَاقٖی هُوَ الْبَاقٖی

قرداشڭز سعید النّورسی

[١٣٠]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

عزیز، صدّیق قرداشلرم،

[عَسٰٓی اَنْ تَكْرَهُوا شَیْئًا وَهُوَ خَیْرٌ لَكُمْ] سرّیلە چوق تجربەلرڭ نتیجەسندە، چوق دفعە ظاهری موفّقیتسزلك، حقّمزدە برر عنایت پردەسی اولدیغنە بر امارەسی، بلكە بر دلیلی دە، بو سنە بزە هر طرفدە بر نوع تعرّض و او تعرّضدن بر نوع جزئی توقّف، هم مطبعەلرڭ قاپولری شیمدیلك رسالۀ نورە، حتّی یڭی حروفلە دخی قاپانمەسی خیردر. برقاچ جهتدە عنایتدر و حمایتدر.

[اوّلا] بو سنە پردە آلتندە انسانلر، اشدّ ظلم ایلە رزق حقّندە بر دهشتلی عملیات و قدر الٰهی حكیمانە بر عدالتلە، چوقدنبری تراكم ایدن زكاتلری، جزیەلری آلمق و حددن چوق زیادە تجاوز ایدن حرص و احتكاری طوقاتلامق ایچون، عمومی بر عملیات جرّاحیە هنگامندە، البتە یالڭز ایمانە و آخرتە حصر نظر ایدن و وظیفە نقطەسندە حیات اجتماعیەیە چوق باقمایان و اخلاص تامّی قزانمق ایچون هیچ بر مقصدە آلت و هیچ بر دنیوی جریانە تابع اولمایان رسالۀ نورڭ پارلاق و قوّتلی خدمتی، تستّر پردەسی آلتندن چیقوب آشكار بر طرزدە اولسە ایدی، هر حالدە برنجی عملیات انسانیە اوڭا ایلیشەجكدی. و ایكنجی عملیات قدریە، رزق و معدە اوزرینە اولمسی جهتیلە، یا انسانلرڭ نظرلرینی او خدمتدن چویرەجكدی، معدەلریلە مشغول ایدەجكدی. ویاخود او خدمتڭ اخلاصی بر درجە قیریلوب، معیشت دردینڭ بر حصّەسی اوندە بولوناجقدی. [حاشیە]

[ثانیًا] یازیلمەسنە شیمدیلك لزوم یوق.

[و ثالثًا] اظهارینە بو زماندە اذن یوق. فقط مادام شاكردلرڭ غیرت و شوق و همّتلری، شیمدی یە قدر مطبعەلرە احتیاج بیراقمامشلر. ان شٓاء اللّٰه او قدسی خدمتدە دوام ایدوب، او الماس قلملر ایلە نشر انوار ایدەجكلر. مادام بتون بتون مسلگمزە مخالف اولان یڭی حروفی، بر ایكی رسالە ایچون قبول ایتدیگمز حالدە مطبعەجیلر كندیلری او خیر عظیمی غائب ایتدیلر.

سز او ایكی رسالەیی -كە بن حافظ مصطفی یە طبع ایچون ویرمشدم- بزم حسابمزە، قهرمان قرداشلریمزدن یگرمی اوتوز ذاتە توزیع ایدرك، یگرمی اوتوز نسخەیی اسكی حروفلە یازدیریڭز. یازان قلم صاحبلرینە دائمی حسنات قزاندیران او پك بیوك خیری سز قزانیڭز. اگر یڭی حروفلە، ال ماكینەسیلە او ایكی رسالەدن یازیلمش نسخەلری وارسە، بزە بعض نسخەلری كوندریڭز. عموم قرداشلریمزە برر برر سلام ایدرز.

قرداشڭز

سعید النّورسی

لفًّا سزە كوندریلن پارچەیی بزە یازدیغڭز اشارات قرآنیە و كرامت علویە و غوثیە مجموعەسنڭ مقدّمەسندن اوّل بز باشدە یازدق. سز دە یازارسڭز.

[اشارات قرآنیە و اوچ كرامت علویە و كرامت غوثیە حقّندە بر تنبیه و اخطاردر]

بو غایت محرم رسالەلر، ناصلسە معنّد بر نامحرمڭ النە بو رسالەلردن بریسی كچمش. غایت سطحی و عناد نظریلە بر ایكی یرینە حقسز بر اعتراض ایلە اهمّیتلی بر حادثەیە سببیت ویردیگندن، بو مجموعە رسالۀ نورڭ خاص طلبەلرینە، بلكە اخصّ خواصّە مخصوص اولدیغی حالدە و بنم وفاتمدن صوڭرە انتشارینە مساعدە اولمەسیلە برابر، شیمدی مذكور حادثەنڭ سببیلە هركسە دگل، بلكە اهل انصاف و رسالۀ نورلە علاقەدار و طلبەلرندن بولونانلرە، خاصلردن برقاچ شاكردڭ تنسیبیلە كوستریلەبیلیر فكریلە یازدیردق.

[ایكنجی نقطە] بو رسالە [سكّۀ غیبیە] باشدن آشاغی یە قدر بر تك نتیجەیە باقار. بیڭە یاقین امارەلر ایلە، رسالۀ نورڭ مقبولیتنە غیبی بر امضا باصیلدیغنی اثبات ایدییور. بویلە بر تك دعوایە بو درجە كثرتلی و آیری آیری جهتلردە بیڭلر امارەلر و ایمالر اونی كوسترمسی، علم الیقین دگل، بلكە عین الیقین، بلكە حقّ الیقین درجەسندە او دعوایی اثبات ایدر.

[اوچنجی نقطە] بو رسالەیی مطالعە ایدن ذاتلر، اینجەدن اینجەیە، خصوصًا جفری حساباتنە مشغول اولمغە لزوم یوق. هم بر قسمی آڭلاشیلماسە دە ضرری یوق. هم عمومنی اوقومق دە لازم دگل. هم كرامت غوثیەنڭ آخرندەكی، شاملی حافظ توفیقڭ فقرەسندن باشلایوب آخرە قدر مطالعەدن صوڭرە، باشدەكی مقدّمەیی دە اوقودقدن صوڭرە، ایستەدیگی پارچەیی اوقوسون.

سعید النّورسی

[١٣١]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

عزیز قرداشلرم،

بیوك حافظ علینڭ خصوصی مدرسەسندە بر همشیرەمزڭ انطاق بالحق نوعندە، غالب جریاننڭ ایلری كیتمەمسنڭ بر سببنی، رسالۀ نور شاكردلرینڭ سیاستە باقمامەلری و چارپیشمەدن كلن ظلملرە حصّەدار اولمامق ایچون مراقلە حركاتلرینی اسلامیت منفعتی نقطەسندە دعالر ایلە تعقیب ایتمدكلری دیمەسی، هم حافظ علینڭ خسرو ایلە كوروشمەسی و استادیمز بزی سیاستدن منع ایدییور، ضرردر دیمەسنە مقابل، بر قرداشمز نە ایلە ثابتدر دییە استفساری و اون اوچ آیدنبری حربڭ وضعیتنی نظرە آلمدیغمڭ سببنی صوران بورادەكی قرداشلریمە ویرەجگم جوابە، حافظ علینڭ استحسانی مناسبتیلە قاعدەمزە مخالف اولارق بر ایكی دقیقە سیاستە باقوب، بر ایكی كلمە بیان ایدییورم.

[اوّلًا] بورادەكی بر قسم رسالۀ نور شاكردلری، عالم اسلامدە چوق مستملكاتی بولونان بر دولت، بو آناطولی خارجندەكی مسلمانلرە یالڭز كندی منفعتی ایچون بر درجە دینلرینە ایلیشمییور ویا ایلیشەمییور دییە، او دولتڭ خارج اسلاملرە تطبیق ایتدیگی سیاستە بتون بتون مخالف بر سیاستی تعقیب ایتدیگی بو مملكتدە فعّالیتدە بولونان پروپاغاندەسنە قاپیلوب، او جریانە طرفدارلقلە رسالۀ نورڭ صفوت و خالصیتنە ضرر ویردیگندن، او سیاسی شاكردلرە دیدم: او دولت، بو مملكتدەكی حكومتە، مستملكاتندەكی مسلمانلر ایصینمامق و التحاق ایتمەمك ایچون، اسكیدنبری بو وطندە دینسزلگی ترویج ایتمش. شیمدیكی الحاد، اونڭ افساد قومیتەسنڭ اثریدر. مادام سز بو وطنڭ اولادیسڭز، بورادە اونڭ پروپاغاندەسنە قاپیلماییڭز. و سیاستە قاریشماییڭز. اگر خارجدە اولسەڭز، اورادەكی مساعدەكار سیاستنە طرفدارلق كوسترسەڭز، اگر لزوم اولورسە و رسالۀ نور دخی مساعدە ایتسە، بلكە ضرر اولماز، یوقسە ضرر و خطر و خطادر.

امّا اوتەكی غالب جریان ایسە، نە وقت قرآنە و رسالۀ نورە و بزە و اسلاملرە یاردیم ایتسە و قرآنڭ حقیقتنە خدمتە بالفعل تشبّث أیلەسە، سز دە او وقت قرآن و رسالۀ نور حسابنە اونڭ حركاتنە مراقلە باقابیلیرسڭز. یوقسە شیمدیدن طرفكیرانە باقمق ایلە، تخریباتندەكی ظلملرە حصّەدار اولمق احتمالی وار. و خارج عالم اسلامڭ معنوی جریانلرینە مخالف اولور.

سعید النّورسی

[١٣٢]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

عزیز، صدّیق قرداشلرم،

هم كاتب عثمان، هم مباركلردن ابراهیمڭ، هم نور فابریقە صاحبنڭ، هم خلوصئ ثانینڭ مكتوبلری بر ایكی كوندە كلدیلر. مراق ایلە محزون قلبمزی مفرّح أیلەدیلر. كاتب عثمانڭ مكتوبندە، خصوصی سلاملرینی كوندردیگی ذاتلرڭ، خصوصًا قهرمان رشدی، زهدی بدوی و نوری قرداشلریمزە خاصّةً و عمومًا سلام و سلامتلرینە دعا و خسروڭ یاقیندە كلمەسنڭ تبشیری، اونڭ حقّندەكی مراقمزی ازالە ایتدی. ما شٓاء اللّٰه، كاتب عثمان دە، خسرو كبی موجب مراق نقطەلری یازییور.

اونڭ مكتوبنی كتیرن خالیجی ابراهیم دیمشكە: صدّیق سلیمان رشدی بورایە كلمك احتمالی وار. او قهرمان قرداشم یقینًا بیلسینكە، بن اوندن زیادە اوڭا مشتاقم. فقط او هر كون، خاص دائرەسنڭ برنجی صفندە معنًا یانمزدە بولونویور، معنوی قزانچلریمزە حصّەدار اولویور. بزم مسلگمزدە صحبت صوریە اهمّیتی آزدر. هم بو دهشتلی عملیات داخلیە هنگامندە و یول مصرفی چوق زیادە اولدیغندن، كلمك مناسب اولمایور. و وهّام اهل دنیا، بورادە دە زیادە بزە دقّت ایدییورلر. حتّی بو بایرامدە قاپومی زیارتجیلرە قپادق.

حافظ علینڭ مكتوبندە، رشدینڭ بر تشبّثی واركە، كنچلرە عائد درت بش پارچە درسكە، حافظ مصطفی یە ویرمشدمكە طبع ایتسین. جناب حقّە شكر، سزڭ كثرتلی قلملریڭز مطبعەیە احتیاج بیراقمییور. اگر قولایجە، اوجوزجە ممكن اولسە، اسكی ویا یڭی حروفلە یاپارسڭز.

حافظ علینڭ مكتوبندە، رسالۀ نورە قارشو كمال محویتلە كمال اخلاصی و ارتباطی، اونڭ اسكیدنبری تقدیر ایتدیگم بر خاصیت ممتازیەسنی كوسترمكلە برابر، بنم كبی بر بیچارەیی دە شفاعتجی یاپوب، بن دە اونڭ كمال صمیمیتنی شفاعتجی یاپوب، دعاسنە آمین دیرم.

مبارك كویندن، مباركلر جماعتندن، مبارك ابراهیمڭ بركتلی مكتوبنی اوقودم. بنی ممنون ایدن چوق سوزلر وار ایچندە. و بالخاصّە بنم باشمە یاغان یاغموردن رؤیادە ایچمەسی و برادرزادەسی عثمانڭ ایلریدە دە رسالۀ نورە طلبە اولمسی ایچون كندینی اوقوتمسی، بزی مسرور أیلەدی. جناب حق اویلە مباركلری او كویدە چوغالتسین. آمین. عموم قرداشلریمزە برر برر سلام ایدییورز.

قرداشڭز سعید النّورسی

[١٣٣]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

عزیز، صدّیق قرداشلرم،

بو زماندە، خصوصًا بو صیرەلردە، رسالۀ نورڭ شاكردلری تام بر متانت و تساند و دقّت ایتمەیە محتاجدرلر. للّٰە الحمد، اسپارطە و حوالیسی قهرمانلری دمیر كبی بر متانت كوسترمسیلە، باشقە یرلرە دە حسن مثال اولدی.

ای خسرو! تأثیرلی و كوزل مكتوبڭی آلدم. وظیفەڭڭ باشنە كچمەڭ بزی فوق العادە مسرور ایتدی. بیڭلر صفالر ایلە كلدڭ! سن بو بر بوچوق سنە مادّی قلمڭ ایشلەمدیگندن مراق ایتمە. سنڭ یریڭە و كرامتلی قلمڭڭ یادگاری اولان معجزات احمدیەنڭؐ بری ولایت شرقیەدە فعّالانە كزییور. دیگر صوڭ یازدیغڭ نسخە دە، استانبولدە سنڭ یرڭدە چالیشوب، ان شٓاء اللّٰه فتوحات یاپار. سنڭ یازدیغڭ معجزەلی ایكی قرآن عظیم الشّانڭ بو حوالیدە، خصوصًا رمضان شریفدە سڭا قزاندیردقلری ثوابلری و تحسین و تبریكلرینی، ان شٓاء اللّٰه یاقیندە طبعە كیرمسیلە عالم اسلامدن سنڭ روحڭە یاغاجق رحمت دعالرینی دوشون، اللّٰهە شكر أیلە.

حافظ علینڭ مكتوبندە، اسلام كویندەكی خواجەلرە محبّتە و دوستلغە قرار ویرمسی، بزی ممنون أیلەدی. اوت، اسلام كویی، ناصلكە رسالۀ نورە پك زیادە علاقەدارلقدە امتیاز و سبقت قزانمش. اویلە دە، بن اورادە ایكن، سائر خواجەلرە نسبتًا اسلام كویی خواجەلری دخی داها زیادە انصافلی و رسالۀ نوری تقدیر ایتدكلرینی كوردیگمدن، بو حوالیدەكی خواجەلرڭ لاقیدلقلرینە قارشو اونلری حسن مثال كوسترییورم. ان شٓاء اللّٰه اونلردن ضرر كلمز. بن اسلام كوینی، نورس كویی كبی بیلییورم. او خواجەلرە دە اقربام نظریلە باقییورم، اونلرە دە سلام ایدییورم. اوت، اونلرڭ انصافی و رسالۀ نورە قارشو دوستلقلریلە، نور فابریقەسی او كویدە دغدغەسز تأسّس ایتدی تخمین ایدییورز.

ای صبری قرداش! باشڭ صاغ اولسون. جناب حق، او والدەمزی مغفرت أیلەسین. آمین. بنملە، قرابت نسبیەیی احساس ایدن پارماقلرڭدەكی نشان و بو یدی سكز سنە عبد المجیددن داها حرارتلی، فعّالانە قرداشلق

وظیفەسنی یاپدیغڭزدن، البتە سنڭ مرحوم والدەڭ بنم دە والدەمدر. اونی دە، والدەم یاننە معنوی قزانچلریمە و دعالریمە حصّەدار ایدییورم. جناب حق سزە صبر جمیل احسان و او مرحومەیی دە غریق رحمت أیلەسین. آمین. خسروڭ مكتوبندە اسملری یازیلانلر باشدە اولارق بتون قرداشلریمزە و همشیرەلریمزە برر برر سلام و دعا ایدییورز.

قرداشڭز

سعید النّورسی

بیوك قرداشمز خسروڭ كلمەسی، بزی روح و جانلە مسرور أیلەدی. كندیمزی تبریك و اوڭا دە بیڭلر صفا كلدڭ، دیرز. و صبری قرداشمزی تعزیە ایدوب مرحومە والدەمزە رحمتلە دعا ایدییورز.

بورادەكی رسالۀ نور شاكردلری نامنە

فیضی و امین

[١٣٤]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

عزیز، صدّیق قرداشلرم،

بو دفعە چوق چالیشقان عاطفڭ مبارك قلمیلە بر ایكی نسخەیی فیضی و امینە هدیەسیلە برابر، معصوم و افەلرڭ و امّیلرڭ مبارك یازیلریلە یگرمیدن زیادە كوچك رسالەجكلر بزلرە هدیە ایدیلمش. بز دە بو حوالیدەكی انسانلرە بر واسطۀ تشویق و نمونۀ امثال اولمق ایچون، معصوملرە و امّیلرە كوسترەجگز و یازانلرڭ اسملرینی دە دعالریمزدە داخل ایدەجگز. او یازانلرڭ هم كندیلرینی، هم والدینلرینی، هم استادلرینی و بالخاصّە حسن عاطفی تبریك ایدییورز. حزب الاكبر نورینڭ عربی بیلمەینلرینڭ فهمنە مدار اولمق ایچون، اورادە یازیلان مجموعە كبی مناجات رسالەسنی، یالڭز مناجات علویەدن صوڭرەكی ترجمە قسمنی یگرمی نسخە قدر تكثیر ایدیلسە، بزە كوندریلسە، چوق أیی اولور.

طوقوزنجی شعاع مقدّمۀ حشریە برابرجە یازیلسە، داها فائدەلی اولور. عموم قرداشلریمزە برر برر سلام و خسروە چوق صفالرلە كلدڭ دیرز.

قرداشڭز

سعید النّورسی

بو مكتوبی یازدقدن صوڭرە مصطفی كاظم امضاسیلە هم قیمتدار، اینجە حسّیاتلی و اخلاصلی چوق قوّتلی عاطفڭ غایت كوزل و داها تام اوقومدیغمز حالدە پك اهمّیتلی و لاحقەیە قسمًا كچەجك جانلی و روحلی بر مكتوبی برابر كوردك. هم عاطفی بو مكتوبدەكی كمال اخلاص و ارتباطنی و مكتوبندە بش آلتی افەلرڭ قهرمانجەسنە رسالۀ نورە كیرمەلری و قیزیل عرفان طلبەلری و شاكردلرینی بتون روح و جانمزلە تبریك ایدییورز. رسالۀ نور حسابنە جناب حقّە حدسز شكر ایدییورز. پك چوق سلام. مغرب یاقین اولدیغی ایچون قیصە كسمگە مجبور اولدق.

قرداشڭز سعید النّورسی

[١٣٥]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

عزیز، صدّیق قرداشلرم، بردن روحمە كلمش بر اندیشەیی بیان ایدییورم.

اهل ضلالت، رسالۀ نورڭ الماس قیلیچلرینە مقابلە ایدەمدكلری ایچون، شاكردلری ایچندە درد معیشت جهتندن و بهار موسمی غفلتندن استفادە ایدرك، مشربلر ویا حسّیاتلری مخالفتندن ضعیف طمارلری بولوب، شاكردلر ایچندەكی تساندی صارصمق ایستەدكلرینی حسّ ایتدم و آڭلادم.

صاقین، چوق دقّت ایدیڭز! ایچڭزە بر مباینت دوشمەسین. انسان خطادن خالی اولاماز. فقط توبە قاپوسی آچیقدر. نفس و شیطان، سزی، قرداشڭزە قارشو اعتراضە و حقلی اولارق تنقیدە سوق ایتدیگی وقت، دیییڭزكە: بز، دگل بویلە جزئی حقوقمزی، بلكە حیاتمزی و حیثیتمزی و دنیوی سعادتمزی رسالۀ نورڭ اڭ قوّتلی رابطەسی اولان تساندە فدا ایتمەیە مكلّفز. او بزە قزاندیردیغی نتیجە اعتباریلە دنیایە، انانیتە عائد هر شیئی فدا ایتمك وظیفەمزدر دییوب نفسڭزی صوصدیریڭز. مدار نزاع بر مسئلە وارسە، مشورت ایدیڭز. چوق صیقی طوتماییڭز. هركس بر مشربدە اولماز. مسامحە ایلە بربرینە باقمق شیمدی الزمدر.

عموم قرداشلریمزە برر برر سلام ایدرز. حزب الاكبر نورینڭ آخرینە الحاق ایدیلەجك اولان مناجات پارچەسی آخر قسمنڭ ترجمەسی و باشدەكی قسمڭ دە بر نوع ایضاحیدر. اونڭ ایچون عربی بیلمەینلرە چوق فائدەسی اولور. بز بر قسمنی سزدن بكلەیورز.

سعید النّورسی

[١٣٦]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

عزیز، صدّیق قرداشلرم،

جناب حقّە حدسز شكر اولسونكە، بو غفلت موسمی اولان بهاردە و درد معیشت بلاسندە، رسالۀ نور فتوحاتندە دوام ایدییور. استانبولدن یازییورلركە، اورایە كیدن، باشدە خسروڭ معجزات احمدیەسیؐ اولارق، رسالەلری هر كیم كورمش اوقومشسە، باشدە فتوا امینی علی رضا اولارق هركس حیرت و استحسان ایلە، بو طرز افادە و اثبات و بیان، هیچ بر كتابدە بولمامشز. بو شرائط ایچندە بویلە اثرلر هیچ كیمسەیە میسّر اولمامش دییوب، كمال اشتیاق ایلە قارشولایورلر. و آنقرەدە، دنیاجە یوكسك مقاملردە، عسكریە هیئتندە، كمال اشتیاق و تقدیر ایلە رسالۀ نوری یازوب اوقوتدیرییورلر. باشدە میرآلای محمد یمنی اولارق، مهم عسكری پاشالری، رسالۀ نور ایمان قورتاریجیدر دییە تقدیركارانە تام تسلیمیّتلە اوقویوب استفادە ایدییورلر.

حتّی بورادە دە پك چوق، آیری آیری طرزدە رسالۀ نور علیهندە یاپدقلری دسیسەلر و تدبیرلر و شاكردلری صوغوتمق و صارصمق پلانلری، خصوصًا درد معیشت بلالری، رسالۀ نورڭ انكشافنی طوردیرمییور، كوندن كونە توسّع ایدییور. حتّی اڭ زیادە هجوم ایدنلر دخی، پردە آلتندە استفادەیە چالیشییورلر. جناب حقّە حدسز شكر اولسونكە، عنایت الٰهیە و حمایت ربّانیە دوام ایدییور. فقط یالڭز اهمّیتلی بر پلانلە، آیری بر جبهەدە، متمرّد منافقلر طرفندن بر هجوم وار. چوق احتیاط و دقّت و ثبات و تساند لازمدركە، تا اونلرڭ بو پلانی دە عقیم قالسین. پلان دە بودر:

رسالۀ نور طلبەلری ایچندە تساندی بوزمق، اون سكز سنەدنبری حقّمزدە پروغراملری، خاص طلبەلری بزدن قاچیرمق، صوغوتمق ایدی. بو پلانلری عقیم قالدی. شیمدی تساندی بوزمق و بعض منفعتپرست، فقط اهل علم و اهل دیندن، رسالۀ نورڭ جریاننە قارشو رقیب چیقارمق صورتیلە انتشارینە ضرر ویرمگە چالیشییورلر.

هم رمضان رسالەسنڭ آخرندە نفس امّارەیی، هر نوع عذابدن زیادە، آچلق ایلە تمرّدینی ترك ایتدیگی كبی.. شیمدیكی اهل نفاقڭ متمرّدانە سفاهتنڭ جزاسی اولارق، عمومە و معصوملرە دە كلن بو آچلق و درد معیشت بلاسندن اهل ضلالت استفادە ایدوب، رسالۀ نورڭ فقیر شاكردلرینڭ علیهنە استعمال ایتمك احتمالی وار. مادام شیمدی یە قدر اكثریت مطلقە ایلە رسالۀ نور شاكردلری، رسالۀ نور خدمتنی هر بلایە، هر دردە بر چارە، بر علاج بولمشلر. بز هر كون خدمت درجەسندە، معیشتدە قولایلق، قلبدە فرحلق، صیقینتیلرە كنیشلك حسّ ایدییورز، كورویورز. البتە بو دهشتلی یڭی بلالرە، مصیبتلرە قارشو دە، یینە رسالۀ نورڭ خدمتیلە مقابلە ایتمەمز لازمدر. عموم قرداشلریمزە برر برر سلام ایدییورز.

قهرمان و مبارك و قلمی كرامتلی و قرآنڭ خارقە كاتبی خسروڭ یازدیغی و بزە كوندردیگی معجزەلی ایكی قرآنڭ بر نسخەسنی، اگر اورادە عینی بولونمییورسە كوندرەجگز. حتّی بو دفعە یڭی بر قرداشمز و اسپارطە قهرمان طلبەلرینڭ استعدادندە حلمی بگلە كوندرەجكدك. فقط صوڭرەیە قالدی. ان شٓاء اللّٰه خسروڭ كرامتلی قلمی یینە چالیشییور. اگر اسپارطە شخص معنویسی طاریلماسە ایدی یانمە ایستەیەجكدم. سعید النّورسی

[١٣٧]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ بِعَدَدِ حُرُوفِ الْقُرْاٰنِ الَّذٖی كَتَبْتُمُوهُ

عزیز، صدّیق قرداشم،

مبارك قرآن معجز البیانڭ بر وجە اعجازینی خارقە قلمیلە كوسترن و متمادیًا دفتر حسناتنە، او یازدیغی قرآنلری اوقویانلرڭ ثوابلری یازیلان قیمتدار خسرو!

بڭا كوندردیگڭ ایكی مبارك نسخەدن برنجیسنی سزە حلمی بگلە كوندردم. بر حسّ قبل الوقوع ایلە، سن اسپارطەدن آیریلاجقسڭز دییە ایكیسنی بردن بزە كوندرمشدڭ. چوق دە أیی اولدی. شیمدی اسپارطە، مدرسة الزّهرای كبرا و مدرسۀ نوریۀ كبرا اولدیغندن، بو قدسی اثر اورادە، خصوصًا شهور ثلاثە كلمك اوزرە بر زماندە لازمدر. ان شٓاء اللّٰه اورادە دە، بزم كبی جزؤلری تقسیم ایلە ختمەلر اوقوناجق.

(حلمینڭ كاغدندە شیمدیلك كری قالدی) دیمشدك. فقط بر معنوی اخطار ایلە كوندریلدی. باشدە علیلر، صبری، رشدی، زهدی، نوری، علی، رأفت، طاهری، حاجی حافظ، احمدلر، محمدلر، مصطفیلر، عمومًا سلام و دعا ایدرز.

اَلْبَاقٖی هُوَ الْبَاقٖی

سعید النّورسی

[١٣٨]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

عزیز، صدّیق قرداشلرم،

سزڭ مبارك قلملریڭزڭ مبارك و نورانی یادگارلرینی آلدق. جناب حقّە حدسز شكر ایدییورزكە، سزڭ كبی یورولماز، صارصیلماز، اوصانماز شاكردلری رسالۀ نورە احسان أیلەمش. بو آغیر شرائط و اوصاندیریجی حاللر ایچندە كمال اشتیاق ایلە اونلرڭ فعّالیتلری، شبهەسز بر عنایت ربّانیەدر. و بو خدمت قدسیەنڭ ظاهر بر كرامتیدر.

او قدسی هدیە ایچندە مرحوم عاصمڭ یادگار قلمی و رأفت و رشدی، حسن عاطف و حافظ احمد و بارلەلی مهاجر حافظ احمدڭ معصومەسنڭ هدیەسی كبی یادگارلر و خسروڭ مژدەسیلە اون بش یگرمی فداكار قرداشلریمز قلملرینی بزم حسابمزە چالیشمەسنە قرار ویردكلری، بنی و بزی و بو مملكتی منّتدار ایدوب شكرە سوق ایتدی.

حزب نورینڭ و مصباح الایمانڭ لاحقەلری اولان بو دفعە هدیەڭز بورایە كیردیگی كون، برنجی دفعە حزب نوری كلدیگی كبی تصادف اولمادیغنە قطعی قناعتمزلە، بورادەكی مدرسۀ نوریەدەكی طلبەلرڭ یڭی كلن بو درسلرڭ مفتوحانەسی نوعندە، شیمدی یە قدر امثالی وقوع بولمامش بر ضیافت رحمانیە نوعندە، طقوز آیری آیری یردن، حتّی بری قارصدن، بری دە چانقیریدن برر كوزل طعام اویلە بر طرزدە كلدیكە، هم بنی، هم فیضی یی، هم تحسینی، هم امینی حیرت ایچندە بیراقدی. قطعی قناعتمز كلدیكە، خدمت نوریەدەكی بركتڭ بر كرامتی و بورادەكی مدرسۀ نوریەنڭ عنایتندن كلن بر مفتوحانەسیدر. اوّلجە حزب نورینڭ كلمەسیلە فوق العادە مفتوحانەسنی

هم تأیید ایدییور، هم اونڭلە تأیّد ایدوب بر اثر عنایت اولدیغنی اثبات ایتدی. هم كلدیگی عین كوندە اویلە بول بر یاغمور كلدیكە، اوطەمڭ اوڭندن اهمّیتلی بر سیل آقدی.

و صبرینڭ اورادە مناجاتڭ كثرتلە یازیلمەسیلە یاغمور كلمەسنە وسیلە اولدیغی كبی، بورایە كلمەسیلە دە بورادە رحمتڭ بویلە كثرتلە یاغمەسی كوسترییوركە، مناجات بر وسیلۀ رحمتدر. هم احتیاطە بناءً درت سنەدنبری بورایە كلمەین قهرمان نظیف، هدیۀ نوریە ایلە هیچ بر سبب یوقكن قسطمونی یە یانمزە كلدی. دیمك معنوی استقبالە كوندریلدی.

خسروڭ بو دفعەكی مكتوبی بش آلتی جهتدە بزی منّتدار ایتدی. خسرو دائما خدمت نوریەدە و تدبیرندە دائما ترقّیدە و صارصیلماز بر ركن اولدیغنی كوسترییور. عاطفڭ پك زیادە اشتیاق و غیرتی شیمدیلك احتیاط و اعتدال دملە پردەلنمەسی، زمانڭ مقتضاسیدر. ذكائی، حافظ احمد رسالۀ نور خدمتندە وظیفە باشنە كچمەلری، بو كونلردە اونلرڭ حقّندە حاصل اولان مراقمی ازالە ایتدی.

عموم قرداشلریمزە و بالخاصّە ركنلرە و بو دفعەكی نسخەلری یازانلرە و خسروڭ مكتوبندە اسملری بولونانلرە و بالخاصّە قلملرینی بزم حسابمزە چالیشدیرمغە قرار ویرنلرە بیڭلر سلام و سلامتلرینە و موفّقیتلرینە دعا ایدییورز.

مادام اون بش قرداشمز قلمیلە امّیلگمە شفقتًا یاردیم ایدییورلر. اختیار و خستە و اقتصاد و شكر رسالەلری و برنجی، ایكنجی، اوچنجی لمعەلری یازسینلر. هم خسروڭ بڭا كوندردیگی اسكیدن بڭا یازدیغی اعجاز قرآنڭ قطعەسندە اونڭ ذیللری اولان اون ایكنجی، اون دردنجی، یگرمنجی سوزلر و سورۀ فتحڭ آخرندەكی آیتڭ لمعەسی و رموزات ثمانیەیە عائد فهرستەدەكی قسمی و منظوم لمعاتدن اولان پارچە كبیكە، سزە اوّلجە بو ذیللر حقّندە یازمشدق، سز دە یازمشدیڭز. خسروڭ ترتیبیلە یازدیریلسە، ممكن ایسە بو قسمی كندیسی یازسە أیی اولور. تاكە خسروڭ قلمیلە بو اسكی نسخەم تام بر ذیل اولسون.

قرداشڭز

سعید النّورسی