[١٠٢]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ دَٓائِمًا اَبَدًا

عزیز، صدّیق قرداشلرم،

دون امین، بو حوالی یە كلن بر قول اوردو مناسبتیلە، ایستەمدیگم و روسڭ حربە دوامنی بیلمدیگم حالدە، روسیەنڭ قفقاسلە اتّصالی كسیلمەسنی سویلەدی. بن اونڭ سوزینی كسوب صوصدیردیغم حالدە، قلبم اهمّیتلە بر علاقە كوستردی. صوڭرە، بوكون نمازدە و تسبیحاتندە ایكن، معنوی طرزدە دینیلدیكە: كرۀ ارضدە چارپیشان، مجادلە ایدن جریانلردن هر حالدە بریسی اسلامیتە و قرآنە و رسالۀ نورە و مسلگمزە طرفدار اولاجق. بو نقطەدن اوڭا قارشو مراقلە باقمق كركدر. باقمامق ایچون بر ایكی مكتوبدە یازدیغم سببلر چندان قلبە، عقلە كافیدر. فقط مراقلی و هوسلی اولان نفسە كافی كلمییور دییە قلبمە كلدی. عینًا تسبیحاتدە اخطار ایدیلدیكە:

اهمّیتلی سببی ایسە، باقمقدە بر طرفە طرفكیرلك حسّی اویانیر. طرفكیر نظری ایسە، طرفدار اولدیغی جریانڭ قصورینی كورمز، ظلمنە رضا كوستریر، بلكە آلقیشلار. حالبوكە كفرە رضا، كفر اولدیغی كبی.. ظلمە راضی اولمق دخی ظلمدر. البتە زمین یوزندە بو دهشتلی دوئللودە سماواتی آغلاتاجق ظلملر و تخریبات اولویور. چوق معصوم و مظلوملرڭ حقوقلری غائب اولویور، محو اولویور. میمسز، غدّار مدنیتڭ ظالمانە دستوری اولان، (جماعت ایچون فرد فدا ایدیلیر. ملّتڭ سلامتی ایچون جزئی حقوقلرە باقیلماز) دییە، اویلە دهشتلی بر ظلم میدانی آچمشكە، قرون اولی وحشتلرندە دە امثالی وقوع بولمامش.

قرآن معجز البیانڭ عدالت حقیقیەسی، (بر فردڭ حقّنی جماعتە فدا ایتمز. حق حقدر. كوچگە بیوگە، آزە چوغە باقیلماز) دییە قانون سماوی و حقیقی عدالت نقطەسندە رسالۀ نور شاكردلری كبی حقیقت قرآنیە ایلە مشغول آدملر، ضرورت اولمادن، لزومسز، یالڭز هوسلی بر مراق ایچون نتیجە اعتباریلە فائدەسی بولونان و نتیجە داها كلمدن اوّل لزومسز باقمق و ظالمانە تخریباتلرینی آلقیشلامق صورتیلە، اسلامیت و قرآن لهنە

خدمت ایدەجگی او جریانڭ حركاتنی فكرًا تعقیب ایتمكلە مشغول اولمق مناسب اولمدیغی ایچون، نفس دە، عقل و قلبە تابع اولوب مراقنی بیراقمش دییە آڭلادم.

[ایكنجی مسئلە] رسالۀ نورڭ اسپارطەدە قطعی غلبەسی، زندیقلری شاشیرتدی. فقط بعض متمرّد و معنّد و ئولن حریفڭ روح خبیثی حكمندە بعض زندیقلر، او مغلوبیتە قارشو كلمك فكریلە، باشدن آشاغی یە قدر قرآن و پیغمبرؐ علیهندە، فقط پردە آلتندە، عینًا مناظرۀ شیطانیە بحثندە حزب الشّیطانڭ پیغمبرؐ و قرآن حقّندە مسلكلرنجە سویلەدكلری تعبیراتی، باشقە بر طرزدە او زندیق حریف استعمال ایتمش. اونڭ كبی یهودی، متمرّد و دینسز فیلسوفلرندن و آوروپەنڭ زندیقلرینڭ اسكیدنبری قرآن و پیغمبرڭؐ حالاتندن مدار تنقید بولدقلری نقطەلری، بو اسلام اسمی آلتندەكی زندیق، قورنازجەسنە، صاف دل مسلمانلرە و رسالۀ نوری كورمەینلرە دیڭلتدیرمك و كوسترمك ایچون اویلە بر طرزدە كیتمش و كفرینی كیزلەمەیە چالیشمشكە، شیطنتدە شیطاندن ایلری كیتمش. بنی چوق متأثّر ایتدی.

قرداشمز صبرینڭ مكتوبندە، معنّد ملحدلرڭ، رسالۀ نورڭ جریاننە قارشو قوردقلری چوروك و واهی خدعەلری، اورومجك آغی و یووەسی كبی قوّتسز.. و او شیطنت پردەلری قیمتسز و مقاومتسزدر. رسالۀ نورە قارشو ییرتیلیر و ییرتیلاجقدر دیدیگی كبی، بو زندیق و معنّد و متمرّد و ئولن حریفڭ روح خبیثی اولان زندیقڭ یازدیغی و ظاهرًا مسلمانلرە توركجیلك لهندە، فقط حقیقتدە قرآن و پیغمبرڭؐ عظمت و حشمت معنویەلرینی قیرمق و هیچە ایندیرمك و عادیلشدیرمك نیّتیلە یازیلان بو مطبوع اثردە، معجزات قرآنیە و معجزات احمدیەیەؐ قارشو، اورومجك آغی دە اولاماز، پارچەلانیر. فقط بیڭلر تأسّفكە، رسالۀ نوری كورمەینلرە قطعی ضرر ویردیگی كبی، رسالۀ نوری كورنلر دە مراق ایدوب، عجبا نە وار؟ دیمكلە، صافی قلبلرینی بولاندیرر. لا اقل، وسوسە و اوهام ویرر.

رسالۀ نورڭ قهرمان شاكردلری بویلە شیلرە قارشو متیقّظ طاورانمق و فعالیتلرینی زیادەلشدیرمك لازم كلییور. فنا شیلە ذهنًا مشغول اولمق دە فنا اولدیغی ایچون قیصە كسییورم. صاقین اوڭا اهمّیت ویرمكلە خلقلری مراقلاندیروب باقدیریلماسین. بلكە اهمّیتسز، دینسزجەسنە، یالڭز اسمای مباركە و آیات مباركەنڭ بعض مأٓلی ایچندن خارج قالمق اعتباریلە، اهمّیتسز بر پاچاورەدر بیلینسین. بو حریفڭ نە درجە

حدّندن تجاوز ایتدیگنی بو تمثیلدن آڭلاییڭز. مثلا، چوق اوزاق بر مجلسدە، متخصّص و مدقّق عالملرڭ اوقودقلری و تدقیق ایتدكلری بر كتابە و درس آلدقلری بر ذاتە، پك اوزاق بر مسافەدە باقمق ایستەین و كورمەین بر أبله، او عالملرڭ عكسنە حكم ویروب اونلری تنقید ایدن، دیوانەجە هذیان ایدر.

جناب حق، اهل ایمانی و رسالۀ نور شاكردلرینی بویلەلرڭ شرّندن محافظە أیلەسین. آمین. عموم قرداشلریمزە برر برر سلام ایدییورز.

اَلْبَاقٖی هُوَ الْبَاقٖی

قرداشڭز سعید النّورسی

[١٠٣]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ بِعَدَدِ حُرُوفِ الْقُرْاٰنِ وَاَسْرَارِهٖ

عزیز، صدّیق قرداشلرم،

حزب القرآن الاعظمڭ طبعنە موفّقیت، رسالۀ نورڭ ان شٓاء اللّٰه فتوحاتنە و معجزەلی قرآنڭ طبعنە بر پیشداردر. سزلری تبریك ایدییورز، بو شهور مباركەدە او حزب الاعظمڭ قزاندیراجغی ثوابڭ بر مثلی، دفتر اعمالڭزە كیرەجك. بو بیوك معنوی كار، اوڭا صرف اولونان مال و وقت و خدمتدن چوق زیادەدر. قهرمان طاهری بو خدمتدە الحق موفّقیتلە تام اقتدارینی كوستردی. هر بر نسخەنڭ صاتیلدیغی وقت هدیەسی قاچ غروش ایسە بزە بیلدیریڭز. هم بو حوالی یە كوندرەجگڭز مقداری شو آدرسلە كوندریڭز. چانقیریدە قومیسیونجی مصطفی ایپك واسطەسیلە قسطمونیدە نصر اللّٰه جامعی شادروانندە چایجی امینە كوندریلەجك.

قهرمان طاهرینڭ یازدیغی طرزدەكی طبع چوق مشكلاتلی اولمش. بو قدر مشكلات ایچندە، وقوع بولمامش بر طرزدە توافقلی چیقمەسی، بر اثر عنایتدر. جناب حقّە حدسز شكر اولسون. طاهرینڭ اوننجی سوزڭ ملحقاتیلە،

كوچك علینڭ یازدیغی لاحقەلی طرزدە مناسبمیدر؟ دییە صورمەسنە دیرز: اوت، مناسبدر. یالڭز اسم حیدن آلدیغی پارچەنڭ حشرە عائد مناسب اولمایان بر پارچەسی كیرمش. هم داها باشقە رسالەلردە حشرە عائد مؤثّر پارچەلر بولسەڭز، الحاق ایدرسڭز.

هم معجزات قرآنیە اولان یگرمی بشنجی سوز آخرلری عجلەلك بلاسیلە مجمل قالدیغنە بدل، اوڭا ذیل و لاحقە اولمق ایچون صبری یە برقاچ آی اوّل یازدیغم بر مكتوبدەكی (كندی یازدیغی نسخەسنە علاوە ایت) دیمشدك. هم حسن عاطفڭ بڭا یازدیغی معجزات قرآنیەیە قرآنڭ معجزاتنە عائد بعض پارچەلری بورادە بز الحاق ایتدك. سز دە قرآنڭ اعجازیلە مناسبتدار مهم نكتەلر و یگرمنجی سوز، سورۀ فتحڭ آخر آیتی، فتحڭ و رموزات ثمانیەیە عائد فهرستەنڭ یازدیغی پارچەلری كبی تنسیب و تنسیقڭزلە الحاق ایتسەڭز أیی اولور. تاكە معجزات احمدیەؐ رسالەسی كبی اوننجی سوز، یگرمی بشنجی سوز لاحقەلریلە تام تكمّل ایتسین. و او اوچ اركان ایمانیە تام قوّتلرینی، حشمتلرینی ملحدلرە كوسترسین. اون سكزنجی لمعەنڭ تك فهرستەسی ایسە، یازمسی سزلرە عائددر. سز یازیڭز، بزە دە كوندریڭز.

قرداشمز مارانغوز احمدڭ مدرسۀ نوریەنڭ باشلرندن اولان حافظ محمّدڭ تام برائتی و بتون رسالەلرینی تسلیم آلمسی، اونڭ دیدیگی كبی بر كرامت نوریەدر. بز دە تصدیق ایدییورز. رؤیاسندە حضرت علی رضی اللّٰە عنهڭ اطرافمزدەكی ییلانلری ئولدیرمسی تعبیری، پك ظاهر بر رؤیای صادقەدر. خواجەنڭ سؤٓالنە ویردیگی ظرافتلی جواب و تمثیلی بر تشبیه جهتیلە او رؤیانڭ بر معنای اشاریسی آلتنە كیرەبیلیر. یوقسە بویلە صریح شیلرە معناسی بودر دینیلسە، مناسب اولماز. اورادە بولونان عموم قرداشلریمزە سلام و دعا ایدر و دعالرینی ایسترز.

اَلْبَاقٖی هُوَ الْبَاقٖی

قرداشڭز سعید النّورسی

[١٠٤]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ دَٓائِمًا اَبَدًا

عزیز، صدّیق قرداشلرم،

سزڭ فوق العادە ثبات و اخلاصڭزڭ غلبەسی و او مصیبتی دفعندن صوڭرە، اهل دنیا جبهەیی دگیشدیردی. زندقەنڭ دسیسەلریلە، بو حوالیدە بزلرە قارشو پردە آلتندە مادّی و معنوی تحشیداتی باشلامش. غایت دقّتلە و شیطانجەسنە، شاكردلرڭ حقیقی قوّتلری اولان تساندی بوزمەیە چالیشییورلر. سزلرە رسالەلری اعادە ایتدكلری حالدە، قورنازجەسنە طولاپلر چوریلییور. بز، سزڭ بر شعبەڭز حكمندە اولدیغمز حالدە، بزی اصل و مركز تلقّی ایتدكلرندن، داها زیادە دسیسەلری بزە قارشو استعمال ایدییورلر. حافظ حقیقی جناب حقدر. ان شٓاء اللّٰه هیچ بر ضرر ایدەمەیەجكلر. فقط بو شهور مباركەنڭ ایّام و لیالئ مباركەسندە خالص دعالریڭزلە بزە یاردیم ایدیڭز. بر شی یوق. فقط ممكن اولدقجە احتیاطلی و دقّتلی اولیڭز. حضرت علیؓ و غوث كیلانی؈ كبی قهرمانلرڭ معنوی تأمیناتی [قُلْ وَلَا تَخَفْ] و [وَلَا تَخْشَ] خطابلری، بزە هر وقت جسارت و قوّۀ معنویەیی ویرییور.

كاتب عثمانڭ مكتوبندە، قهرمان رشدینڭ بهادر برادری برهانڭ، رسالەلرڭ قورتولمەسنە چوق خدمت ایتدیگنی یازییور. ذاتًا او جسور قرداشمزڭ اسكیدن دە بو چشید خدمتلری واردی. هم اوڭا، هم رسالۀ نورڭ قورتولمەسنە چالیشانلرە و مدخلی بولونانلرە، حتّی محكمە رئیسنە و انصافلی اعضالرینە هم دعا، هم تشكّر ایدییورز. مناسب كورولسە، محكمە رئیسنە خصوصی تشكّریمزی بیان ایدرسڭز. وقتمز شیمدی چوق طار اولدیغی ایچون قیصە كسییورم. قصورە باقماییڭز. اورادەكی قرداشلریڭزە برر برر سلام و سلامتلرینە دعا و دعالرینی ایستەیورز

اَلْبَاقٖی هُوَ الْبَاقٖی

قرداشڭز

سعید النّورسی

[١٠٥]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ بِعَدَدِ عَاشِرَاتِ دَقَٓائِقِ هٰذِهِ الشُّهُورِ الثَّلَاثَةِ

عزیز، صدّیق قرداشلرم،

[اوّلًا] سزڭ كچمش لیلۀ معراج و كلەجك لیلۀ براتڭزی تبریك ایدییورز و مقبول دعالریڭزی رجا ایدییورز.

[ثانیًا] یگرمی بشنجی سوز اولان معجزات قرآنیەنڭ نصف آخری، عجلەلك بلاسیلە غایت مجمل قالمەسنە بدل، سزە اوّلجە یازدیغم كبی، بعض لاحقەلری اونڭ آخرندە الحاق ایتمشدك. شیمدی اڭ مهم بر پارچە، یگرمی سنە اوّل طبع ایدیلن لمعاتدە كوردك. اونی دە معجزات قرآنیە ذیللری ایچنە درجی پك مناسب كورولدی. قهرمان طاهرینڭ بڭا كتیردیگی بر نسخە لمعاتی چوق قیمتدار كوردم. اگر بر نسخە داها او حوالیدە وارسە، سز دە او پارچەیی نسخەلریڭزڭ آخرندە یازارسڭز. ذاتًا لمعات، كندیسی دە خارقەدر. رمضان شریفدە، یگرمی كون ظرفندە، نثر بر صورتدە، تكلّفسز، بردن یازیلمش. صوڭرە باقدق، سهل ممتنع كبی بر نثر منظوم و بر نظم منثور صورتنی آلمش. ایچندە بو پارچە داها خارقەدر. لمعاتدە او پارچەنڭ سر لوحەسی [ایجاز ایلە بیان اعجاز قرآن ]

[بر زمان رؤیادە كوردمكە، اگری طاغی آلتندەیم. بردن طاغ پاتلادی، طاغ كبی طاشلری عالمە طاغیتدی، صارصدی جهانی.] بوندن، تا [نظر ایكیدر. بری ظلمتدار، دیگری ضیادار] سر لوحەسنە قدر. اگر لمعات سزڭ الڭزە كچمەمشسە، او پارچەیی بورادن سزە كوندرەجگز.

[ثالثًا] هم لطیف، هم كوزل، ظریف بر حادثەیی سویلەیەجگم. بو مملكتدە رسالۀ نورە ارككلردن زیادە فداكارانە یاپیشان اختیارە خانملر و اختیارە حكمندە معصومە كنچ خانملر، اسكی زمان صیرمەلی، یالدیزلی كلینلك جهازاتنڭ ایچندە قیمتدار پارچەلری رسالۀ نورڭ اجزالرینڭ جلدلری اوستنە چكوب، بتون رسالەلر آلتون یالدیز ایلە جلدلەمش كبی بر طرزە كیردی. رسالۀ نورڭ معنًا كوزللگنە و خسرو و طاهری و علیلرڭ و حسن عاطف و عاصم كبی قرداشلریمزڭ یالدیزلی یازیلرینڭ جمالنە، جلدی اوستندە دە شیرین بر كوزللك داها علاوە ایتدیلر. حافظ علینڭ مكتوبندە یازدیغی امّهان و شاهدە دگرندە، بورادە رسالۀ نورە بتون قوّتیلە چالیشان چوق همشیرەلریمز وار. مثلا آسیە، ثانیە، علویە، لطفیە، علیە كبی رسالۀ نورڭ شاكردلری،

اورادەكی همشیرەلرینە و قرداشلرینە سلام و دعا ایدییورلر. بز دە اونلر كبی عموم قرداشلریمزە برر برر سلام و دعا ایدرز.

قرداشڭز سعید النّورسی

ما شٓاء اللّٰه! صلاح الدّین چلبی شرقدە قارصدە، غربدەكی اسپارطە قهرمانلرینە اوموز اوموزە ویروب فتوحات یاپییور، پدری نظیفە یتیشمگە چالیشییور. بو بابا اوغول، حقیقتًا رسالۀ نورڭ ایكی قهرمانیدرلر. باشدە نظیف، امین، حلمی، زهدی، صلاح الدّین، فیضی اولارق بورادە عموم قرداشلریمز اورادەكی عموم قرداشلرینە سلام ایدرلر.

[١٠٦]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ بِعَدَدِ عَاشِرَاتِ دَقَٓائِقِ شَهْرِ شَعْبَانَ وَرَمَضَانَ

عزیز، صدّیق، مبارك، متین قرداشلرم،

سزڭ لیلۀ براتڭزی و كلن رمضان مباركڭزی تبریك ایدرز. جناب حقّە یوز بیڭلر شكر اولسونكە، رسالۀ نور كندی كندینە توسّع ایدییور. هر طرفدە فتوحاتی وار. اهل ضلالتڭ حیلەلری اونی طوردیرمییور. بالعكس چوق دینسزلر تسلیم سلاح ایدییورلر. حافظ علینڭ دیدیگی كبی، قورقولری پك زیادەدر. شیمدی دینسزلك تعصّبیلە دگل، قورقو جهتیلە ایلیشییورلر. او قورقو، رسالۀ نور لهنە دونەجك ان شٓاء اللّٰه.

نور فابریقەسنڭ صاحبی، بو دفعەكی مكتوبندەكی خارقە و یوكسك دعاسی، اونڭ فوق العادە اخلاص و صداقتنڭ بر ترشّحاتی نظریلە باقدیغمزدن، بیڭ درجە حدّمدن زیادە حسن ظنّنی رسالۀ نور حسابنە قبول ایدوب، دعاسنە آمین دیرز. او نور فابریقەسنڭ مكتوبی، حسن عاطفڭ مكتوبیلە لیلۀ برات آقشامندە المزە كچدی. او كیجەمزە، بركتلی و مبارك بر تبریك نوعندە تلقّی أیلەدك. حسن عاطفڭ اوزون مكتوبلرینە اوزون بر مكتوبلە جواب ویرمك اونڭ حقّیدر. فقط اونڭ تام قناعت كتیردیگی ترك شخصیت و توجّه ایلەدیگی شخصیت معنویۀ نوریە، خصوصی مكتوبە احتیاج كوسترمییور. خالص، مخلص عاطفڭ اوزون مكتوبلرندە اوچ اهمّیتلی جهت كوردك:

[برنجیسی] بو عاجز قرداشڭز، ناصلكە اسرار غیبیۀ قرآنیەیە توافق آناختاریلە بر زمان متوجّه اولدی. قاچ دفعە قاپو آچیلدی. فقط اوندە استخدام ایدیلمدم، قاپاندی. چونكە حقائق ایمانیەیە خدمت جهتی یوز دفعە احتیاج نقطەسندە مرجّح اولدیغندن، او مراقلی، ذوقلی اولان توافقات غیبیە او وظیفۀ حقیقیەیە مانع اولمەسندن او یولی بیراقدق. عینًا اویلە دە، حسن عاطفڭ غایت صافی قلبی و غایت اینجە حسّیاتی و غایت خالص صداقتی اونی رسالۀ نورڭ خزینەسنە غریب بر توافق آناختاریلە كیرمگە چالیشییور. غایت ذوقلی بر حقیقتی حسّ ایدییور. فقط حسّیاتنی قوّتلی شیلرلە باغلایوب افادە ایدەمییور. حالبوكە اونڭ فوق العادە، هركسڭ نظر استحساننی كندینە جلب ایدن قلمی و صداقت و اخلاصی، اڭ اهمّیتلی وظیفە اولان رسالۀ نورڭ نشرندەكی خدمتنە بر درجە ضرر ویردیگندن، او دە بنم كبی او ذوقلی، مراقلی یولدە چوق مشغول اولماسە، داها زیادە اوندن استفادە ایدیلیر.

[ایكنجی جهت] حقیقتًا عاطف، فطرتًا رسالۀ نورە و مشربنە و خدمتنە و تام طلبە اولمەسنە و سرّ اخلاص ایلە فنا فی الاخوان دستورینە تام مساعددر. فقط پك حسّاس و اینجە دوشونجەلری واردر. حتّی بن أیی دقّتلە آنجق حس ایدەبیلییورم.

[اوچنجی] مستثنا و پارلاق خطّیلە بش اون مهم دستورلری و وجیزەلری رسالۀ نوردن انتخاب ایدوب اون پارچە كاغدلر یازوب كوندرمش. بز دە او مبارك وجیزەلری اوطەمزدە هر كلنلرە عاطفدن بر درس نوریە آلمق و عاطفە خیر قزاندیرمق ایچون دیوارە آصدق، اوطەمزی تزیین ایتدك.

عزیز قرداشلرم! بو مبارك رمضاندە دخی كچن رمضان كبی، بو عاجز و ضعیف قرداشڭزە، معنوی و اخروی سعی و چالیشمەڭزدن زكات مقدارنجە ویرمەڭزی و اونڭ حسابنە بر مقدار چالیشمەڭزی و زیادە حسن ظنّڭز ایلە اوڭا تحمیل ایتدیگڭز آغیر یوكە او جهتدە یاردیمڭزی پك چوق رجا ایدرم.

درد معیشت سرسملگیلە، اكثر خلق آخرت ایشلرینە ایكنجی درجەدە باقمەلرندن، اهل ضلالت استفادە ایدوب اونلری آولایورلر. رسالۀ نور شاكردلری قناعت و اقتصاد دستورلریلە بو معنوی خستەلغە دە مقابلە ایدرلر، ان شٓاء اللّٰه.

عموم قرداشلریمزە برر برر سلام و دعا ایدرز

قرداشڭز سعید النّورسی

[١٠٧]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

عزیز، صدّیق قرداشلرم،

سزڭ مبارك رمضان شریفڭزی تبریك ایدییورز. جناب ارحم الرّاحمین بو رمضان مباركڭ حرمتنە، رحمةً للعالمین اولان رسول اكرم علیە الصّلاة والسّلامڭ حرمتنە رحمتیلە امداد أیلەسین. آمین. آثار غضب الٰهی اولان آفات و ضلالتلردن محافظە أیلەسین. آمین. و رسالۀ نور شاكردلرینی نشر انوار قرآنیەدە موفّق أیلەسین. آمین. آمین.

حزب الاعظم قرآنینڭ كلمەسنی اشتیاقلە بكلەیورز.

[ثانیًا] حافظ علینڭ مكتوبندە، قهرمان سلیمان رشدینڭ كلمەسنی تبشیر ایدییور. بز دە اوڭا، بیڭلر صفالرلە كلدڭ دییوب و اوچ جهتلە اونی و معصوملرینی تبریك ایدییورز. و حسن عاطفڭ، دمیرجی محمد نامنی ویردیگی بدوی قرداشمزە یازدیغی اوزون مكتوبی، بورادەكی قرداشلریمزە اخلاص نقطەسندە اهمّیتلی تأثیری وار. اخلاص رسالەسنڭ سرّینی و دستورلرینی یرلشدیرمەیە چالیشمەسی، بزی چوق مسرور أیلەدی. جناب حق، اونڭ كبی خالص قرداشلری چوغالتسین. و عاطفڭ او مكتوبدە مدرسۀ نوریەدەكی قهرمانلردن قیمتدار بر ایكی یوكسك اختیارڭ، رسالۀ نورە پارلاق ارتباطلری، بزی سرور یاشیلە آغلاتدیردی.

بو دفعە، اوّلجە سزە كوندریلن كنچلر ایقاظنامەسنڭ بر تتمّەسی اولارق بو حوالیدەكی تهلكەلی وضعیتدە بولونان كنچلرە بر اخطارنامە نامندە بر فقرە كوندرییورز. تاكە رسالۀ نورڭ كنچ شاكردلرینڭ كیتدكلری استقامت و عفّت و اتّباع سنّت سنیە، كنچلك نقطەسندە نە قدر قیمتدار بولوندیغنی و حقیقی و ذوقلی كنچلك ایسە، او طرزدەكی بختیارلرڭ كنچلكلری اولدیغنی بر قات داها اثبات ایدوب، حقیقی كنچ توركلر كیملر اولدیغنی كوسترسین.

عموم قرداشلریمزە و همشیرەلریمزە سلام و دعا ایدرز. و مبارك دعالرینی بو مبارك رمضان شریفدە و برە بیڭ قزانجی قزاندیران ایّام و لیالئ مباركەدە رجا ایدییورز.

اَلْبَاقٖی هُوَ الْبَاقٖی

قرداشڭز سعید النّورسی

اوّلجە سزە كوندریلن كنچلر ایقاظنامەسنڭ بر تتمّەسی

[برقاچ بیچارە كنچلرە ویریلن بر تنبیه، بر درس و بر اخطاردر]

بر كون یانمە پارلاق برقاچ كنچ كلدیلر. حیات و كنچلك و هوسات جهتندن كلن تهلكەلردن صاقینمق ایچون تأثیرلی بر اخطار آلمق ایستەین بو كنچلرە، بن دە اسكیدن رسالۀ نوردن مدد ایستەین كنچلرە دیدیگم كبی بونلرە دخی دیدمكە: سزدەكی كنچلك قطعیًّا كیدەجك. اگر سز دائرۀ مشروعەدە قالمازسەڭز، او كنچلك ضایع اولوب باشڭزە هم دنیادە، هم قبردە، هم آخرتدە كندی لذّتندن چوق زیادە بلالر و ألملر كتیرەجك. اگر تربیۀ اسلامیە ایلە او كنچلك نعمتنە قارشو بر شكر اولارق عفّت و ناموسلیلق و طاعتدە صرف ایتسەڭز، او كنچلك معنًا باقی قالاجق. و ابدی بر كنچلك قزانمسنە سبب اولاجق.

حیات ایسە، اگر ایمان اولمازسە ویاخود عصیان ایلە او ایمان تأثیر ایتمزسە، حیات، ظاهری و قیصەجق بر ذوق و لذّتلە برابر، بیڭلر درجە او ذوق و لذّتدن زیادە ألملر، حزنلر، كدرلر ویرر. چونكە انساندە عقل و فكر اولدیغی ایچون، حیوانڭ عكسنە اولارق حاضر زمانلە برابر كچمش و كلەجك زمانلرلە دە فطرتًا علاقەداردر. او زمانلردن دخی هم الم، هم لذّت آلابیلیر. حیوان ایسە، فكری اولمدیغی ایچون حاضر لذّتنی، كچمشدن كلن حزنلر و كلەجكدن كلن قورقولر، اندیشەلر بوزمییور.

انسان ایسە، اگر ضلالت و غفلتە دوشمش ایسە، حاضر لذّتنە كچمشدن كلن حزنلر و كلەجكدن كلن اندیشەلر، او جزئی لذّتی جدًّا آجیلاشدیرییور، بوزویور. خصوصًا غیر مشروع ایسە، بتون بتون زهرلی بر بال حكمندەدر. دیمك حیواندن یوز درجە لذّت حیات نقطەسندە آشاغی دوشر. بلكە اهل ضلالتڭ و غفلتڭ حیاتی، بلكە وجودی، بلكە كائناتی، بولوندیغی كوندر. بتون كچمش زمان و كائناتلر، اونڭ ضلالتی نقطەسندە معدومدر، ئولمشدر. عقل علاقەدارلغی ایلە اوڭا ظلماتلر، قراڭلقلر ویرییور. كلەجك زمانلر ایسە، اعتقادسزلغی جهتیلە یینە معدومدر. و عدملە حاصل اولان ابدی فراقلر، متمادیًا اونڭ فكر یولیلە حیاتنە ظلماتلر ویرییورلر.

اگر ایمان حیاتە حیات اولسە، او وقت هم كچمش، هم كلەجك زمانلر ایمانڭ نوریلە ایشیقلانیر و وجود بولور. زمان حاضر كبی، روح و قلبنە ایمان نقطەسندە علوی و معنوی اذواقی و انوار وجودیەیی ویرییور. بو حقیقتڭ اختیار رسالەسندە یدنجی رجادە ایضاحی وار. اوڭا باقملیسڭز.

ایشتە حیات بویلەدر. حیاتڭ لذّتنی و ذوقنی ایسترسەڭز، حیاتڭزی ایمان ایلە حیاتلاندیریڭز. و فرائضلە زینتلندیریڭز. و كناهلردن چكینمكلە محافظە ایدیڭز. هر كون و هر یردە و هر وقت وفیاتلرڭ كوستردكلری دهشتلی حقیقت موت ایسە، سزە باشقە كنچلرە سویلەدیگم كبی بر تمثیل ایلە بیان ایدییورم:

مثلا بورادە، كوزیمز اوڭندە بر دار آغاجی دیكیلمش. اونڭ یانندە بر پییانغو، -فقط پك بیوك بر اكرامیە بیلتلری ویرن- دائرەسی وار. بز بورادەكی اون كیشی عَلٰی كُلِّ حَالْ ایستر ایستەمز، هیچ باشقە چارە یوق، اورایە دعوت ایدیلەجگز. بزی چاغیراجقلر. و چاغیرمە زمانی كیزلی اولمەسندن، هر دقیقە یا كل، اعدام بیلتنی آل، دار آغاجنە چیق! ویاخود كل، میلیونلر آلتون قزاندیران بر اكرامیە بیلتی سڭا چیقمش. كل، آل! دیمەلرینی بكلركن، بردن قاپویە ایكی آدم كلدی. بری یاری چیپلاق، كوزل و آلداتیجی بر قادین، ألندە ظاهرًا غایت طاتلی، فقط زهرلی بر حلوا كتیروب ییدیرمك ایستەیور. دیگر بری دە آلداتماز و آلدانماز، جدّی بر آدم، او قادینڭ آرقەسندن كیردی.

دیدیكە: سزە بر طلسم، بر درس كتیردم. بونی اوقوسەڭز، او حلوایی ییمزسەڭز، او دار آغاجندن قورتولورسڭز. بو طلسم ایلە او امثالسز اكرامیە بیلتنی آلیرسڭز. ایشتە بو دار آغاجندە ذاتًا كوزیڭزلە كورییورسڭزكە، بال ییینلر اورایە كیرییورلر. و اورایە كیرنجەیە قدر دە او حلوانڭ زهرندن دهشتلی قارین صانجیسی چكییورلر. و او بیوك اكرامیە بیلتنی آلانلر، چندان كورونمییورلر. و ظاهرًا اونلر دە او دار آغاجنە چیقدقلری كورونویور. فقط اونلر آصیلمادقلرینی، بلكە اورادن قولایجە اكرامیە دائرەسنە كیرمك ایچون باصاماق یاپدقلرینی، میلیونلر شاهدلر وار، خبر ویرییورلر.

ایشتە پنجرەلردن باقیڭز. اڭ بیوك مأمورلر و بو ایشلە علاقەدار بیوك ذاتلر، یوكسك سسلە اعلان ایدییورلر و خبر ویرییورلركە، او دار آغاجنە كیدنلری عین الیقین كوزیڭز ایلە كوردیگڭز كبی بو اكرامیە بیلتنی طلسمجیلر آلدقلرینی هیچ شك و شبهەسز كوندوز كبی قطعی بیلیڭز، دیدی.

ایشتە بو تمثیل كبی، زهرلی بر بال حكمندە اولان غیر مشروع دائرەدەكی كنچلگڭ سفاهتكارانە ذوقلری، خزینۀ ابدیەنڭ و سعادت سرمدیەنڭ بیلتی و وثیقەسی اولان ایمانی غائب ایتدیگی ایچون، دار آغاجی حكمندە اولان ئولوم و ابدی ظلمات قاپوسی اولان قبرڭ مصیبتنە، عینًا ظاهرًا كوروندیگی كبی دوشر. و اجل كیزلی

اولدیغی ایچون، كنچ اختیار، فرق ایتمەیەرك هر وقت اجل جلّادی باشڭی كسمك ایچون كلەبیلیر. اگر او زهرلی بال حكمندە اولان هوسات غیر مشروعەیی ترك ایدوب، طلسم قرآنی اولان ایمان و فرائضی الدە ایتمكلە و فوق العادە مقدّرات بشر پییانغوسندن چیقان سعادت ابدیە خزینەسی بیلتنی آلاجغنە، یوز یگرمی درت بیڭ انبیا علیهم السّلام ایلە برابر حد و حسابە كلمەین اهل ولایت و اهل حقیقت متّفقًا خبر ویرییورلر. و آثارینی كوسترییورلر.

[الحاصل] كنچلك كیدەجك. سفاهتدە كیتمش ایسە، هم دنیادە، هم آخرتدە بیڭلر بلا و ألملر نتیجە ویردیگنی.. و اویلە كنچلر اكثریتلە سٓوء استعمال ایلە، اسرافات ایلە كلن اوهاملی خستەلقلە خستەخانەلرە.. و طاشقینلقلریلە حپسخانەلرە ویا سفالتخانەلرە.. و معنوی ألملردن كلن صیقینتیلرلە میخانەلرە دوشەجكلرینی آڭلامق ایسترسەڭز، خستەخانەلردن و حپسخانەلردن و قبرستانلردن صوریڭز.

البتە خستەخانەلرڭ اكثریتلە لسان حالندن كنچلك سائقەسیلە اسرافات و سٓوء استعمالدن كلن خستەلقدن انینلر، ایواهلر ایشیتدیگڭز كبی.. حپسخانەلردن دخی اكثریتلە كنچلگڭ طاشقینلق سائقەسیلە غیر مشروع دائرەدەكی حركاتڭ طوقاتلرینی ییین بدبخت كنچلرڭ تأسّفلرینی ایشیتەجكسڭز.

و قبرستاندە و متمادیًا اورایە كیرنلر ایچون قاپولری آچیلوب قاپانان او عالم برزخدە (اهل كشف القبورڭ مشاهداتیلە و بتون اهل حقیقتڭ تصدیقیلە و شهادتیلە) اكثر عذابلر، كنچلك سٓوء استعمالاتنڭ نتیجەسی اولدیغنی بیلەجكسڭز.

هم نوع انسانڭ اكثریتنی تشكیل ایدن اختیارلردن و خستەلردن صوریڭز. البتە اكثریت مطلقە ایلە اسفلر، حسرتلر ایلە، ایواه! كنچلگمزی باد هوا، بلكە ضررلی ضایع ایتدك. صاقین بزم كبی یاپماییڭز دییەجكلر. چونكە بش اون سنەلك كنچلگڭ غیر مشروع ذوقی ایچون، دنیادە چوق سنەلر غم و كدر.. و برزخدە عذاب و ضرر.. و آخرتدە جهنّم و سقر بلاسنی چكن آدم، اڭ آجیناجق بر حالدە اولدیغی حالدە [اَلرَّاضٖی بِالضَّرَرِ لَا یُنْظَرُ لَهُ] سرّیلە هیچ آجینمەیە مستحق اولاماز. چونكە ضررە رضاسیلە كیرنە مرحمت ایدیلمز. و لایق دگلدر. جناب حق بزی و سزی، بو زمانڭ جاذبەدار فتنەسندن قورتارسین و محافظە أیلەسین. آمین.

قرداشڭز

سعید النّورسی

[١٠٨]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

عزیز، صدّیق رسالۀ نور شاكردلری قرداشلرم،

رسالۀ نورڭ شاكردلرینڭ ضعیف قسملرینە ضرر ویرن، خاطرە كلمەین اختیار بر ذات طرفندن بر اعتراض مناسبتیلە و او كبی اعتراضلرڭ اساسنی كسەجك بر حقیقتی بیان ایتمەیە مجبور اولدم. اوّلجە بریسنە دیدیگم كبی بونی تكرار ایدییورم:

هم موجب تعجّب، هم مدار تأسّفدركە، اهل حقیقت، اتّفاقدەكی فوق العادە قوّتی ضایع ایتدكلری و ضیاع سببیلە مغلوب اولدقلری حالدە، اهل نفاق و ضلالت، مشربلرینە ضد اولدیغی حالدە، اتّفاقدەكی اهمّیتلی قوّتی الدە ایتمك ایچون اتّفاق ایدییورلر. بو اتّفاقدن قزاندقلری قوّتلە یوزدە اون ایكن، طقسان اهل حقیقتی مغلوب ایدییورلر. و اڭ زیادە مدار تعجّب و مدار حیرت شودركە: اڭ زیادە معاونت و تشویق بكلەدیگمز و اونلر دە، او یاردیمە اسلامیتجە و مسلكجە و وظیفۀ دینیەجە مكلّف اولدقلری حالدە بزە یاردیمی یاپمایوب، بالعكس یاڭلیش آڭلامەسنە بناءً، رسالۀ نورڭ خدمتنە فتور ویرەجك بر طرزدە، موقع اجتماعیلرینڭ اهمّیتنە استنادًا اعتراض ایتمشلر. بر حقیقتە دائر بیاناتە اعتراض ایتمشلر.

بن بیلمییورم هانكی مسئلەدر، هانكی آیتە دائردر؟ اولسە اولسە، غایت محرم قسمندن اولان برنجی شعاع نامندە، اشارات قرآنیەدن بر مسئلەیە دائر اولاجقدر. بو عاجز قرداشڭز، هم اعتراض ایدن او اسكی دوست ذاتە، هم اهل دقّتە و سزلرە بیان ایدییورمكە:

قرآن معجز البیانڭ فیضیلە، یڭی سعید، حقائق ایمانیەیە دائر منطقجە و حقیقتجە او درجە قوّتلی برهانلر ذكر ایدییوركە، دگل یالڭز مسلمان علماسنی، بلكە اڭ معنّد آوروپە فیلسوفلرینی دە تسلیمە مجبور ایدییور و ایتمكدەدر. امّا رسالۀ نورڭ قیمت و اهمّیتنە اشاری و رمزی بر طرزدە، حضرت علیؓ و غوث اعظمڭ؈ اخباراتی نوعندن، قرآن معجز البیان دخی بو زماندە بر معجزۀ معنویەسی اولان رسالۀ نورە نظر دقّتی جلب ایتمسی، قرآنڭ معنای اشاری طبقەسندن رموز و ایمالری بولونمسی، اعجازینڭ شأنندندر. و او لسان غیبڭ، بلاغت معجزەكارانەسنڭ مقتضاسیدر.

اوت، اسكیشهر حپسخانەسندە، دهشتلی بر زماندە و قدسی بر تسلّی یە پك چوق محتاج اولدیغمز هنگامدە معنوی بر اخطار ایلە، "رسالۀ نورڭ مقبولیتنە دائر اسكی اولیالردن شاهدلر كتیرییورسڭ. حالبوكە [وَلَا رَطْبٍ وَلَا یَابِسٍ اِلَّا فٖی كِتَابٍ مُبٖینٍ] سرّیلە اڭ زیادە بو مسئلەدە سوز صاحبی قرآندر. عجبا قرآن، رسالۀ نوری قبول ایدرمی؟ اوڭا نە نظرلە باقییور؟" دینیلدی. بویلە عجیب سؤٓال قارشوسندە بولوندم. بن دە قرآندن استمداد أیلەدم.

بردن، اوتوز اوچ آیتڭ معنای صریحنڭ تفرّعاتی نوعندەكی طبقاتدن، معنای اشاری طبقەسندن و او معنای اشاری كلّیتندە داخل بر فردی رسالۀ نور اولدیغنی.. و دخولنە و مدار امتیازینە بر قوّتلی قرینە بولوندیغنی، بر ساعت ظرفندە حسّ ایتدم. بر قسمنی بر درجە ایضاحلی و بر قسمنی مجملاً كوردم. قناعتمدە هیچ بر شك و شبهە و وهم و وسوسە قالمدی. بن دە اهل ایمانڭ ایماننی، رسالۀ نورلە تقویە نیّتیلە او قطعی قناعتمی یازدم و خاص قرداشلریمە محرم طوتولمق شرطیلە ویردم.

هم او رسالەدە، بز دیمەیورزكە، آیاتڭ معنای صریحی بودر. تا خواجەلر [فٖیهِ نَظَرٌ] دیسین. هم دیمەمشزكە، معنای اشارینڭ كلّیتی بودر. بلكە دییورزكە، معنای صریحنڭ تحتندە متعدّد طبقەلر وار. بر طبقەسی دە، معنای اشاری و رمزیدر. و او معنای اشاری دە، بر كلّیدر. هر عصردە جزئیاتلری وار. و رسالۀ نور دخی بو عصردە او معنای اشاری طبقەسنڭ كلّیتندە بر فرددر. و او فردڭ قصدًا بر مدار نظر اولدیغنە و اهمّیتلی بر وظیفە كورەجگنە، اسكیدنبری علما مابینندەكی جاری بر دستور جفری و ریاضی ایلە قرینەلر، بلكە حجّتلر كوستریلمش ایكن، قرآنڭ آیتنی ویا صراحتنی، دگل اینجیتمك، بلكە اعجازینە و بلاغتنە خدمت ایدییور. بو نوع اشارات غیبیەیە اعتراض ایدیلمز. اهل حقیقتڭ، نهایتسز اشارات قرآنیەدن حد و حسابە كلمەین استخراجاتلرینی انكار ایدەمەین، بونی دە انكار ایتمەملی و ایدەمز.

امّا بنم كبی اهمّیتسز بر آدمڭ ألندە بویلە اهمّیتلی بر اثرڭ ظهور ایتمەسنی استغراب و استبعاد ایدوب، بویلە اعتراض ایدن ذات، اگر بوغدای دانەسی قدر چام چكردگندن طاغ كبی چام آغاجنی خلق ایتمك عظمت و قدرت الٰهیەیە دلیل اولدیغنی دوشونسە، البتە بزم كبی عجز مطلق و فقر مطلقدە بولونان بر كیمسەدن، بویلە احتیاج شدید زمانندە، بویلە بر اثرڭ ظهوری، وسعت رحمت الٰهیەیە دلیلدر دیمەیە مجبور اولور.