یوقسە، اختیارلقدە اوزون زمان استثقالە معروض قالوب مأیوسانە آغلایاجق. و قبرندە، چوق كناهلری قزانان و قزاندیران او چیپلاق باجاقلری، ییلان صورتندە كورونەجك. و جهنّمدە او چركینلشمش كوزل اعضالرینڭ یانمەلرینڭ عذابلرینی چكەجك.

اگر تربیۀ اسلامیە دائرەسندە آداب قرآنیە زینتیلە او جمال كوزللشدیریلسە، او فانی حسن، معنًا باقی قالاجغی.. و جنّتدە حوریلرڭ جمالندن داها شیرین، داها پارلاق بر طرزدە كندینە ویریلەجگی حدیثدە قطعیتلە ثابتدر. اگر او كوزلڭ ذرّە مقدار عقلی وارسە، بو كوزل و پارلاق و ابدی نتیجەیی ألندن قاچیرمایاجق.

سعید النّورسی

[٥٢]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

عزیز، صدّیق قرداشلرم،

سزلرڭ امیدیمڭ پك فوقندە غیرت و فعالیتڭز، بنی آخر حیاتمە قدر مسرور و متشكّر ایدەجك بر ماهیتدەدر. بو دفعە مكتوبڭزدە، حفظ قرآنە چالیشمق و رسالۀ نوری یازمق، بو زماندە هانكیسی تقدیم ایدیلسە داها اییدر؟ سؤٓالڭزڭ جوابی بدیهیدر.

چونكە، بو كائناتدە و هر عصردە اڭ بیوك مقام قرآنڭدر. و هر حرفندە، اوندن تا بیڭلر ثواب بولونان قرآنڭ حفظی و قرائتی، هر خدمتە مقدّم و مرجّحدر. فقط رسالۀ نور دخی او قرآن عظیم الشّانڭ حقائق ایمانیەسنڭ برهانلری و حجّتلری اولدیغندن و قرآنڭ حفظ و قرائتنە واسطە و وسیلە و حقائقنی تفسیر و ایضاح اولدیغی جهتیلە، قرآن حفظیلە برابر اوڭا چالیشمق الزمدر.

نور فابریقەسی و كل فابریقەسی دوائرندە، مباركلر هیئتندە، لطفیلر نمونەلرندە، حاجی خافظلر جماعتندە، صدّیق سلیمان، حقّینڭ مقاملرندە بولونان هر بر قرداشلریمزە، خصوصًا اللی امّیدن چیقان رسالۀ نور طلبەلرینە برر برر سلام و دعا ایدییورز و دعالریڭزی ایستەیورز.

فیضیلر، نظیفلر، سزە آرقەدەكی پارچەیی كوندرمك ایستەدیلر. یگرمی بشنجی سوزڭ مدنیتە قارشو تستّر و تعدّد زوجات حقّندەكی بیاناتە بر حاشیە اولمق اوزرە لایحۀ تمییزڭ مدافعاتندن بر پارچە سزە كوندریلمشدی. باشندە بودر. [بن دە عدلیەنڭ محكمەسنە دیرمكە: (١٣٥٠) سنەدن الی آخر] آخردەكی پارچە تستّرە یازیلدقدن صوڭرە، او حاشیەیی دە آخرندە یازیلسین. مناسب ایسە یازیڭز.

قرداشڭز

سعید النّورسی

كوچك خسرو اولان فیضینڭ و امینڭ سؤٓاللرینە بر جواب و حاشا، خرافە توهّم ایدیلن بر روایتڭ بر معجزۀ غیبیەسیدر

[٥٣]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

آخر زماندە حضرت عیسی علیە السّلامڭ نزولنە و دجّالی ئولدیرمەسنە عائد احادیث صحیحەنڭ معنای حقیقیلری آڭلاشیلمادیغندن، بر قسم ظاهری علمالر، او روایت و حدیثلرڭ ظاهرینە باقوب شبهەیە دوشمشلر. ویا صحّتنی انكار ایدوب ویا خرافەواری بر معنا ویروب، عادتا محال بر صورتی بكلر بر طرزدە، عوام مسلمینە ضرر ویررلر. ملحدلر ایسە، بو كبی ظاهرجە عقلدن چوق اوزاق حدیثلری سررشتە ایدرك، حقائق اسلامیەیە تزییفكارانە باقوب تعرّض ایدییورلر. رسالۀ نور، بو كبی احادیث متشابهەنڭ حقیقی تأویللرینی قرآن فیضیلە كوسترمش. شیمدیلك نمونە اولارق بر تك مثال بیان ایدرز. شویلەكە:

حضرت عیسی علیە السّلام دجّال ایلە مجادلەسی زمانندە، حضرت عیسی علیە السّلام اونی ئولدیرەجگی وقتدە، اون آرشین یوقاری یە آتلایوب، صوڭرە قیلیجی اونڭ دیزینە یتیشدیرەبیلیر درجەسندە، وجودجە او درجە دجّالڭ هیكلی حضرت عیسیدنؑ بیوكدر دییە مأٓلندە روایت وار. دیمك دجّال حضرت عیسیدنؑ اون، بلكە یگرمی مثلی یوكسك قامتلی اولمق لازم كلیر. بو روایتڭ ظاهری افادەسی سرّ تكلیفە و سرّ امتحانە منافی اولدیغی كبی، نوع بشردە جاری اولان عادت اللّٰهە موافق دوشمەیور.

حالبوكە بو روایتی، بو حدیثی، حاشا، محال و خرافە ظن ایدن زندیقلری اسكات و او ظاهری، عین حقیقت اعتقاد ایدن و او حدیثڭ بر قسم حقیقتلرینی كوزلری كوردكلری حالدە داها انتظار ایدن ظاهری خواجەلری دخی ایقاظ ایتمك ایچون، او حدیثڭ بو زماندە دە عین حقیقت و تام موافق و محض حق متعدّد معنالرندن بر معناسی چیقمشدر. شویلەكە:

عیسویلك دینی و او دیندن كلن عادات مستمرّەسنی محافظە حسابنە چالیشان بر حكومت ایلە، رسمی اعلانیلە، ظلمتلی، پیس منفعتی ایچون دینسزلگە و بولشویزمە یاردیم ایدوب ترویج ایدن دیگر بر حكومتكە، یینە خسیس منفعتی ایچون اسلاملردە و آسیەدە دینسزلگڭ انتشارینە طرفدار اولان فتنەكار و جبّار حكومتلرلە محاربە ایدن اوّلكی حكومتڭ شخص معنویسی تمثّل ایتسە و دینسزلك جریاننڭ بتون طرفدارلری دە بر شخص معنویسی تجسّم أیلەسە، اوچ جهتلە، بو متعدّد معنالری بولونان حدیثڭ، بو زمان عینًا بر معناسنی كوسترییور. اگر او غالب حكومت نتیجۀ حربی قزانسە، بو اشاری معنا دخی بر معنای صریح درجەسنە چیقار. اگر تام قزانماسە دە، یینە موافق بر معنای اشاریدر.

[برنجی جهت] دین عیسوینڭ حقیقیسنی اساس طوتان عیسوی روحانیلرڭ جماعتی و اونلرە قارشو دینسزلگی ترویجە باشلایان جماعت تجسّم ایتسەلر، بر منارە یوكسكلگندە بر انسانڭ یانندە بر چوجق قدر دە اولاماز.

[ایكنجی جهت] رسمی اعلانیلە، اللّٰهە استناد ایدوب دینسزلگی قالدیراجغم، اسلامیتی و اسلاملری حمایە ایدەجگم دیین بر حكومت یوز میلیون كسور ایكن، درت یوز میلیونە یاقین نفوسە حكم ایدن بر دیگر دولتە و درت یوز میلیون نفوسە یاقین و اونڭ متّفقی اولان چینە و آمریقەیە و اونلر ایسە ظهیر و متّفق اولدقلری اولان بولشویكلرە غالبانە، ئولدیریجی ضربە اوران او حكومتدەكی محارب جماعتڭ شخص معنویسی ایلە، محاربە ایتدیگی دینسزلرڭ و طرفدارلرینڭ شخص معنویلری تجسّم ایتسە، یینە منارە بویندە بر انسانە نسبتًا كوچك بر انسانڭ نسبتی كبی اولور. بر روایتدە، دجّال دنیایی ضبط ایدر معناسی، اكثریت مطلقە اوڭا طرفدار اولور دیمكدر. و شیمدی دە اویلە اولدی.

[اوچنجی جهت] اگر كرۀ ارضڭ درت [حاشیە]قطعەلری ایچندە اڭ كوچگی اولان آوروپەنڭ و بو قطعەنڭ دە درتدە بری

اولمایان بر حكومتڭ مملكتی.. اكثر آسیە، آفریقە، آمریقە، آووسترالیەیە قارشو غالبانە حرب ایدرك، حضرت عیسی نڭؑ وكالتنی دعوا ایدن بر دولتلە برابر دینە استناد ایدوب چوق مستبدانە اولان دینسزلك جریانلرینە قارشو سماوی پاراشوتلرلە محاربە و مجادلە ایدن او حكومت ایلە أوتەكیلرڭ شخص معنویلری انسان صورتنە كیرسە، جریدەلرڭ اسكیدنبری یاپدقلری كبی، دولتلرڭ قوّتلرینی و حكومتلرڭ درجەلرینی كوسترمك نوعندە او معنوی شخصلر دخی روی زمین جریدەسندە، بو عصر صحیفەسندە برر انسان صورتندە ترسیم و تصویرلری كبی تمثّل ایتسەلر، عینًا و تام تامنە حدیث شریفڭ معجزانە اخبار غیبی نوعندن بیان ایتدیگی حادثۀ آخر زمانڭ متعدّد معنالرندن تام بر معناسی چیقییور.

حتّی شخص عیسی نڭؑ سماواتدن نزولی اشارتیلە بر معنای اشاریسی اولارق، حضرت عیسی ییؑ تمثیل ایدرك و نامنە حركت ایدن بر طائفە دخی، شیمدی یە قدر ایشیتیلمەمش و كورولمەمش بر طرزدە طیّارەلرلە، پاراشوتلرلە سمادن بر بلای سماوی كبی نزول ایتدیرییور، دوشمانلرڭ آرقەسنە ایندیرییور. حضرت عیسی نڭؑ نزولنڭ مادّةً بر مثالنی كوسترییور. اوت، او حدیث شریفڭ افادەسیلە حضرت عیسی نڭؑ سماوی نزولی قطعی اولمقلە برابر.. معنای اشاریسیلە باشقە حقیقتلری افادە ایتدیگی كبی، بو حقیقتە دە معجزانە اشارت ایدییور.

كوچك خسرو اولان فیضی و امینڭ سؤآلی و الحاحلری ایلە، بعض بیچارەلرڭ ایمانلرینی شبهاتدن محافظە نیّتیلە بو مسئلەیە دائر یالڭز بر ایكی اوچ سطر یازمق نیت ایدوب باشلاركن، اختیارم خارجندە اولارق اوزون یازدیریلدی. حكمتنی دە آڭلامادق. بلكە بر حكمتی وار دییە اویلەجە بیراقدق. قصورە باقماییڭز. بو فقرەدە تصحیحە و دقّتە وقت بولامدق، مشوّش قالدی. قرداشلرم، بورایە كوندردیگڭز مكتوبلریڭز قسمًا لاحقەیە كیرییورلر.

امین ایلە فیضی چوق سلام ایدرلر.

عزیز، صدّیق قرداشلرم، پك چوق سلام و دعا و استدعا ایلە سزە بو یاریم محرم فقرەیی كوندردك. مناسبسە لاحقەیە كیرسین.

قرداشڭز

سعید النّورسی

[٥٤]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ بِعَدَدِ حُرُوفِ الْقُرْاٰنِ

عزیز قرداشلرم و صدّیق آرقداشلرم،

وار اولیڭز، بختیار اولیڭز. سزڭ پك جدّی سعی و غیرتڭز هم بورادە، هم باشقە یرلردە شوق و غیرتی اویاندیرییور. جناب حقّە حدسز شكر اولسونكە، كیتدكجە رسالۀ نورڭ فتوحاتی زیادەلشییور. اهل ایمان یارەلرینی حسّ ایدوب علاجلرینی اوندن بولویورلر.

حافظ علینڭ مكتوبندە یازدیغی ایكی آیتڭ اشارتنە دقّت ایتدك. بز دخی نور فابریقەسنڭ صاحبی كبی چوق مسرور و مفرّح اولدق. فقط رسالۀ نورە بر اشارت غیبیە ایلە خبر ویرن اوتوز اوچ عدد آیت [شَهِدَ اللّٰهُ] آیتیلە ختام بولدیغندن، بو یڭی ایكی آیتڭ مستقل بر صورتدە اشارتلرینە قاپو آچیلمدی. هم اوتوز اوچ آیتدن هانكیسنڭ تتمّەسی اولاجق، شیمدیلك بیلینمدی.

یالڭز بو قدر آڭلاشیلدیكە، [بِاَیْدٖی سَفَرَةٍ *كِرَامٍ بَرَرَةٍ] فقرەسی، رسالۀ نورڭ ناشر و كاتبلرینە معنای اشاریلە باقییور. هم، [یَتْلُوا صُحُفًا مُطَهَّرَةً* فٖیهَا كُتُبٌ قَیِّمَةٌ] فقرەسی دخی، رسالۀ نورڭ اجزالرینە و صحفلرینە و كتابلرینە معنای اشاریلە باقییور. فقط جفر حسابیلە بیڭ اوچ یوز آلتمش كسوردن صوڭرە بو پارلاق وضعیتی كوسترەجكلر دییە، اجمالًا فهم ایتدك.

كل فابریقەسنڭ بزلرە، پارلاق بر كُل محمّدیؐ باغچەسنی هدیە ایدەجكدی. اونی بتون روح و جانمزلە بكلەیورز.

فیضی یە خطابًا بیان ایدیلن حقیقت او طرفە دە فائدەسی اولور دییە لفًّا سزە كوندریلدی. عموم قرداشلریمە برر برر سلام ایدییورم.

اَلْبَاقٖی هُوَ الْبَاقٖی

قرداشڭز

سعید النّورسی

[رسالۀ نور شاكردلرندن محمد فیضی و امثالنە خطابًا بیان ایدیلن بر حقیقتدر]

قرداشم فیضی! مادام سن، اسپارطە ولایتندەكی قهرمانلرە بڭزەمك ایستەیورسڭ، تام اونلر كبی اولمەلیسڭ. اسكیشهر حپسخانەسندە اللّٰه رحمت ایتسین، مهم بر شیخ، مرشد و جاذبەدار، نقشی اولیاسندن بر ذات، درت آی متمادیًا رسالۀ نورڭ اللی آلتمش شاكردی ایچندە جلبكارانە اونلرلە صحبت ایتدیگی حالدە، یالڭز بر تك شاكردی موقّتًا كندینە چكەبیلدی. متباقیسی، او جاذبەدار شیخە قارشو مستغنی قالدیلر. رسالۀ نورڭ یوكسك و قیمتدار خدمت ایمانیەسی اونلرە كافی كلییوردی و قناعت ویرییوردی.

او شاكردلرڭ غایت كسكین قلب و بصیرتلری شویلە بر حقیقتی آڭلامشكە، رسالۀ نورە خدمت ایدن، ایماننی قورتارییور. طریقت و شیخلك ایسە، ولایت مرتبەلری قزاندیرییور. بر آدمڭ ایماننی قورتارمق، اون مؤمنی ولایت درجەسنە چیقارمقدن داها مهم و داها ثوابلیدر. چونكە ایمان، سعادت ابدیەیی قزاندیردیغی ایچون، بر مؤمنە كرۀ ارض قدر بر سلطنت باقیەیی تأمین ایدر. ولایت ایسە، مؤمنڭ جنّتنی كنیشلتدیرر، پارلاتدیرر. بر آدمی سلطان یاپمق، اون نفری پاشا یاپمقدن نە قدر یوكسك ایسە، بر آدمڭ ایماننی قورتارمق، اون آدمی ولی یاپمقدن داها ثوابلیدر.

ایشتە بو دقیق سرّی، سنڭ اسپارطەلی قرداشلرڭ بر قسمنڭ عقللری كورمەسە دە، عمومنڭ كسكین قلبلری كورمشكە، بنم كبی بیچارە، كناهكار بر آدمڭ آرقداشلغنی، اولیالرە، بلكە [اگر اولسە ایدی ] مجتهدلرە ترجیح ایتدیلر. بو حقیقتە بناءً، بو شهرە بر قطب و بر غوث اعظم كلسە، دیسە: سنی اون كوندە ولایت درجەسنە چیقاراجغم. سن رسالۀ نوری بیراقوب اونڭ یاننە كیتسەڭ، اسپارطە قهرمانلرینە آرقداش اولامازسڭ!

للّٰە الحمد، بو زماندە سنّت سنیە دائرەسندە كمال ایمانی قزانان رسالۀ نور شاكردلری، اولیالرڭ، مرشدلرڭ نظر دقّتنی جلب ایدەجك وضعیتی آلدیغندن، هر زماندە بولونان حقیقی مرشدلر، هر حالدە بو زماندە رسالۀ نور شاكردلرینە مشتری اولورلر. بریسنی الدە ایتسەلر، یگرمی مرید قدر قیمت ویررلر. هم ذوقلی و جاذبەدار ولایت ترشّحاتی قارشوسندە رسالۀ نورڭ خدمتندە مشقّت، مجاهدە، كلفت بولوندیغندن، فیضی یە خطابًا بیان ایدیلن بو حقیقت قلمە آلیندی.

اَلْبَاقٖی هُوَ الْبَاقٖی

قرداشڭز سعید النّورسی

[٥٥]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰە وَبَرَكَاتُهُ بِعَدَدِ حَاصِلِ ضَرْبِ حُرُوفِ مَٓا اَرْسَلْتُمْ لَنَا مِنَ الرَّسَٓائِلِ فٖی عَاشِرَاتِ دَقَٓائِقِ هٰذِهِ اللَّیْلَةِ الرَّغَٓائِبِ وَلَیْلَةِ الْمِعْرَاجِ وَلَیْلَةِ الْبَرَٓائَةِ وَلَیْلَةِ الْقَدْرِ وَاَعْطَاكُمُ اللّٰهُ بِعَدَدِهَا ثَوَابًا وَحَسَنَاتٍ اٰمٖینَ

عزیز و صدّیق قرداشلرم و فداكار و صادق آرقداشلرم،

[اوّلًا] سزڭ بو مبارك شهور ثلاثە و ایچندەكی قیمتدار لیالئ مباركەلری تبریك ایدییورز. جناب حق، هر بر كیجەیی سزڭ حقّڭزدە بر لیلۀ رغائب و لیلۀ قدر قیمتندە سزە ثواب ویرسین. آمین.

[ثانیًا] سزڭ بو دفعە نورلی هدیەلریڭزڭ هر بر حرفنە مقابل جناب ارحم الرّاحمین دفتر اعمالڭزە بیڭ حسنە یازسین و عاصمڭ روحنە بیڭ رحمت ویرسین. آمین.

[ثالثًا] قرآن معجز البیانڭ و رسالۀ نورڭ خزینەلرینڭ كرامتلی و یالدیزلی بر آناختاری اولان قلم خسروی، الحق، معجزات احمدیەنڭؐ كیزلی كوزللگنی هر كوزە غایت پارلاق و كوزل كوسترییور. جناب حق بو قلمی، بو خدمتدە موفّق و دائم أیلەسین. آمین.

مبارك هیئتنڭ بیوك بر قهرمانی بیوك علینڭ سیستمندە كوچك علینڭ معجزات قرآنیەسی، معجزات احمدیەنڭؐ تام مطابق بر باقی پیرلانطە طرزندە موقع آلدی. ارحم الرّاحمین هر حرفنە مقابل، یازانە اون ثواب احسان أیلەسین. آمین.

محمد طاهری، كوچك لطفینڭ خیر الخلفی و آتابگڭ قهرمانی، بو حوالی یە نورلی و كوزل هدیەلری چوق قیمتداردر. رحمن الرّحیم، خزینۀ رحمتندن اوڭا و پدرینە هر حرفنە و هر كلمەیە مقابل رحمت ایتسین. آمین.

آیدینلی حسن عاطفڭ قوّتلی قلمی ان شٓاء اللّٰه مرحوم عاصمڭ نقصان بیراقدیغی وظیفۀ نوریەیی تكمیل ایدەجك. و او كوزل قلملە عاصمڭ و لطفینڭ روحلرینی شاد ایدەجك. اونڭ كوچك هدیەسی، ایلریدەكی قیمتدار خدمتلرینی احساس ایدرك بیوك بر موقع آلدی. اللّٰه اوندن راضی اولسون. آمین.

رسالۀ نورڭ اركان مهمّەسندن و رسائل ایچندە سؤآللریلە اهمّیتلی بر موقع طوتان و اونڭلە برابر معنًا یاشایان قرداشمز رأفت بگڭ مكتوبیلە و كل فابریقەسنڭ كُل محمّدیؐ باغچەسنی یتیشدیرن خسروڭ مكتوبنە آیری بر مكتوبلە جواب یازمق ایستردم. فقط شیمدیلك وقت مساعدە ایتمدی.

عموم قرداشلریمە برر برر و بالخاصّە... و بالخاصّە... بالخاصّە چوق سلام و دعا ایدرم. و اونلرڭ مبارك دعالرینی بو شهور مباركەدە و لیالئ معظّمەدە رجا ایدرز

. اَلْبَاقٖی هُوَ الْبَاقٖی

قرداشڭز و دعادن چوق استفادە ایدن

سعید النّورسی

بورادەكی عموم قرداشلریڭز نامنە، فیضی، نظیف، امین، حلمی، صلاح الدّین، توفیق سلام و عرض حرمت و شهور ثلاثەیی حقّڭزدە تبریك ایدرلر. روح و قلبمز پك چوق آرزو ایدییوردیكە، یالدیزلی قرآنمز بو دفعەكی ارسالات ایچندە بو رمضاندە اوقومق ایچون بونلر برابر اولسە ایدی.

سعید النّورسی

[٥٦]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ بِعَدَدِ عَاشِرَاتِ دَقَٓائِقِ عُمْرِكُمْ فِی الدُّنْیَا

عزیز، صدّیق قرداشلرم،

سزڭ مكتوبلریڭزدن او قدر مسرور اولدمكە، تعریف ایدەمم. خصوصًا خسروڭ چوق قیمتدار ایكی مكتوبندە، حاجی حافظڭ كویندە رسالۀ نورڭ پك فوق العادە بر صورتدە توسّعی، او ایكی مكتوبی نسخە كبی و بر حجّت قاطعە كبی صاقلایوب، بو حوالیدەكی طلبەلرە بر تازیانۀ تشویق اولارق كوستریلییور.

رسالۀ نور، قرآنڭ بر معجزۀ معنویسی اولدیغی كبی.. خسروڭ قلمی دە، رسالۀ نورڭ پك قوّتلی بر كرامتی اولدیغنی بوراجە هر كون تصدیق ایدییورز. خسروڭ مكتوبنە قارشو اوزون مكتوب یازمق ایستەیوردق، آرزومزە موفّق اولامدق.

مباركلر قهرمانلرندن كوچك علینڭ مكتوبی دە بڭا بیوك بر امید ویردی. مرحوم عبد الرحمنڭ الحق تام بر خلفی اولان قیمتدار و مبارك بیوك قرداشی اولان مصطفی خلوصینڭ، حافظ احمد اسمندە مبارك بر مخدومی، پدر و عموجەلری سیستمندە رسالۀ نورە خدمت ایتمسی، یڭیدن عبد الرحمن دنیایە كلمەسی قدر بنی مفرّح ایتدی.

آغراس آتابگدە، اسكیدە لطفی، ذكائی كبی ایكی قیمتدار شاكردلرڭ یرلرینی بوش بیراقمایان، آغراس قهرمانلری اولان طاهری و عبد اللّٰه چاوشڭ رسالۀ نورە خدمتلری، آغراس حقّندە اندیشەلریمی تمامًا ازالە ایتدی.

اسماعیل اوغلی حسینڭ خستەلغی بنی متأثّر ایتدی. ان شٓاء اللّٰه تام بر لطفی اولاجق، چوق دە خدمت ایدەجك. سزلرڭ بورایە كلن مكتوبلریڭز، قسمًا تنسیقلە لاحقەیە درج ایدیلییور. سزە بو دفعە محرم سرّ انّا اَعْطَیْنَادە استخراج غیبیدەكی مجمل حقیقتە دائر بردن قلبە اخطار ایدیلن بر فقرە ایلە تستّر رسالەسنە حاشیە كوندرییورز.

بو شهور ثلاثە، سكسان كسور سنە بر عمری قزاندیرییور. البتە سزلر كبی مجاهدلر، اونی قزانمغە چالیشاجقسڭز. جناب حق هر بر كیجەسنی سزڭ حقّڭزدە لیلۀ معراج و لیلۀ برات و لیلۀ قدر قدر قیمتدار أیلەسین، آمین.

دعاڭزە بو شهور ثلاثەدە چوق محتاج قرداشڭز

سعید النّورسی

بورادە عموم طلبەلری نامنە فیضی دە سلام و دعا و استدعا ایدر.

[اهمّیتلی، فقط بر درجە محرمدر]

عزیز قرداشلرم،

محرم سرّ انّا اَعْطَیْنَادە جفرلە استخراجم، عینًا مناظرات رسالەسندە بر نور چیقاجق و كورەجگز دییە غیبی مژدەلر كبی، الهامی و حق بر حقیقتی، فكرملە اولان تطبیقاتمدە بر قصور واردی. او قصور، بنی دوشوندیرییوردی. مناظرات و سنوحات كبی رسالەلردەكی مژدۀ نوریە ایسە، رسالۀ نور تام حلّ ایتدی. كنیش دائرۀ سیاسیە یرینە، یوكسك بر دائرۀ نوریە ایلە او قصوری ازالە ایتدیگی كبی، اِنَّا اَعْطَیْنَا سرّ محرمندە، اون ایكی، اون اوچ سنە

صوڭرە اسلامیتە ضربە اورانلرڭ باشلرندە اویلە مدهش بر پاتلاییش اولاجقكە، قیامتە قدر اونوتولمایاجق، مأٓلندەكی استخراج جفری چوق كنیش بر دائرەدە اولدیغی حالدە، نور مژدەسی سرّینڭ عكسنە اولارق طار بر دائرەدە، خصوصی بر حكومتدە تطبیق ایتمك صورتیلە، فكرم او كنیش دائرەیی احاطە ایدەمەیەرك او حقیقتڭ صورتنی دگیشدیرمش.

حالبوكە او استخراجڭ كوستردیگی عین تاریخدە، او رژیمڭ مؤسّسی و باشی دنیادن كوچدی، ضربەسنی ییدی. و عین سنەدە، پردە آلتندە بیلینمەین و كرۀ ارضڭ اكثرینی و نوع بشرڭ قسم اعظمنی استبدادی آلتنە آلان بر مدهش جریانڭ دوگومی و دوگمەسی و معنًا بیڭلر باشندن بر باشی و اڭ مدهشی اولان او كوچوب كیدن آدم، طوقات ییدیگی عین زماندە، داها سنە تمام اولمادن، او مدهش جریانڭ بتون باشلری و طرفدارلری اویلە سماوی مدهش طوقاتلرە و شدّتلی فیرطینەلی مصیبتلرە طوتولمەیە باشلادیلر.. قیامتە قدر عذابنی چكەجكلر و چكییورلر. و ادیان سماویەیە و اسلامیتە ایتدكلری جنایتلرڭ جزاسنی، چوق كنیش بر دائرەدە كوردیلر و كورویورلر. میمسز مدنیتڭ بوقی ایلە دنیایی ملوّث ایتدكلری ایچون، عین استخراجڭ كوستردیگی تاریخدە، او میمسز مدنیتڭ باشنە دە اویلە بر سماوی طوقات ایندیكە، اڭ قراڭلق وحشتدن داها آشاغی ایندیردی.

[الحاصل] سرّ انّا اَعْطَیْنَادە چوق كنیش بر دائرە، طار بر دائرەدە تطبیق ایدیلمش. نور مژدەسی ایسە، طار و معنوی، فقط یوكسك بر دائرەیی، كنیش و مادّی بر دائرە صورتندە تصویر ایدیلمشدی. جناب حقّە یوز بیڭ شكر ایدییورمكە، بو ایكی قصوریمی، قوّتلی بر اخطار معنوی ایلە اصلاح ایتدی. [یُبَدِّلُ اللّٰهُ سَیِّئَاتِهِمْ حَسَنَاتٍ] سرّینە مظهر أیلەدی. [اَلْحَمْدُلِلّٰهِ بِعَدَدِ ذَرّاتِ الْكَٓائِنَاتِ]

عزیز قرداشلرم! صاقین بو فقرەنڭ واسطەسیلە او سرّ محرمی فاش ایتمەیڭ و او رسالەیی دە آراشدیرمایڭ. یالڭز بو فقرەیی ضررسز كورسەڭز خاصلرە كوسترەبیلیرسڭز.

قرداشڭز

سعید النّورسی

[٥٧]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

بِعَدَدِ عَاشِرَاتِ دَقَٓائِقِ لَیَالٖی شَهْرِ رَجَبَ وَشَعْبَانَ وَرَمَضَانَ

عزیز، صدّیق قرداشلرم،

بو دفعەكی مكتوبلریڭز كلمدن اوّل، بر اخطار ایلە كندی جوابنی كرامتكارانە یازدیرمش. دیمك، مكتوب صاحبلرینڭ فوق العادە صداقتلری كرامت درجەسنە چیقمش.

قرداشلرم، مكتوبلریڭزدە چوق یوكسك دوشونجە و تقدیرات، بیڭدن بر حصّە دە بنم اولسە حدسز شكر ایدرم. بلكە رسالۀ نورڭ معنوی شخصیتی و چوق كثرتلی طلبەلری ایچندە بیلمدیگمز غایت یوكسك بر مقام صاحبی بر ذاتڭ تأثیراتی و قوماندەسی حسّ ایدیلییور. بنم كبی بیڭ درجە اوزاق بر بیچارەدە تصوّر ایدیلییور. حقّم اولمادن بڭا ویریلن زیادە اهمّیتڭز، ان شٓاء اللّٰه سزە ضرری اولماز. فقط رسالۀ نورڭ حسن جریاننە ضرر احتمالی وار. سز بر حقیقتی حس ایدییورسڭز و فوق العادە صداقت و اخلاصڭز ان شٓاء اللّٰه حق كورور. فقط صورتدە بعضًا آلدانیلیر. بز خدمتلە مكلّفز. نتیجەلری و موفّقیت، جناب حقّە عائددر.

لطفی وارثلرینڭ مكتوبندەكی [عثمان خالدینڭ] بیاناتی یالڭز رسالۀ نور حسابنە بر جهتدە قید ایدیلییور. شخصمە عائدیتی یوق. خسروڭ چوق تأثیرلی جاذبەدار مكتوبنە جواب یازمغە وقت بولامدق. باشدە بو مكتوبلردە اسملری بولونان ذاتلر اولارق عموم قرداشلریمزە برر برر سلام و ایّام مباركەدە دعا ایدرز و ایدەجگز. اونلردن بو قدسی لیالی و ایّام مباركەدە دعالرینی ایسترز.

اَلْبَاقٖی هُوَ الْبَاقٖی

قرداشڭز

سعید النّورسی

[اهمّیتلیدر]

[رسالۀ نور طلبەلرندن بر قسم قرداشلریمڭ بنم حدّیمڭ چوق فوقندە حسن ظنلرینی و افراطلرینی تعدیل ایتمك ایچون اخطار ایدیلن بر محاورەدر]

بوندن قرق اللی سنە اوّل، بیوك قرداشم ملّا عبد اللّٰهؒ ایلە بر محاورەمی حكایە ایدییورم:

او مرحوم قرداشم، اولیای عظیمەدن اولان حضرت ضیاء الدّینڭ؈ خاص مریدی ایدی. اهل طریقتجە، مرشدینڭ حقّندە مفرطانە محبّت و حسن ظن ایتسە دە مقبول كوردكلری ایچون، او مرحوم قرداشم دیدیكە: حضرت ضیاء الدّین بتون علومی بیلییور. كائناتدە، قطب اعظم كبی هر شیئە اطّلاعی وار. بنی، اونڭلە ربط ایتمك ایچون چوق خارقە مقاملرینی بیان ایتدی.

بن دە او قرداشمە دیدمكە: سن مبالغە ایدییورسڭ. بن اونی كورسەم، چوق مسئلەلردە الزام ایدەبیلیرم. هم سن، بنم قدر اونی حقیقی سومییورسڭ. چونكە كائناتدەكی علوملری بیلیر بر قطب اعظم صورتندە تخیّل ایتدیگڭ بر ضیاء الدّینی سورسڭ. یعنی او عنوان ایلە باغلیسڭ، محبّت ایدرسڭ. اگر پردۀ غیب آچیلسە و حقیقت كورونسە، سنڭ محبّتڭ یا زائل اولور ویاخود درتدن بریسنە اینر.

فقط بن او ذات مباركی، سنڭ كبی پك جدّی سَورم، تقدیر ایدرم. چونكە سنّت سنیە دائرەسندە، حقیقت مسلگندە، اهل ایمانە خالص و تأثیرلی و اهمّیتلی بر رهبردر. شخصی مقامی نە اولورسە اولسون، بو خدمتی ایچون روحمی اوڭا فدا ایدرم. پردە آچیلسە و حقیقی مقامی كورولسە، دگل كری چكیلمك، واز كچمك، محبّتدە نقصان اولمق.. بالعكس داها زیادە حرمت و تقدیر ایلە باغلاناجغم. دیمك بن حقیقی بر ضیاء الدّینی، سن دە خیالی بر ضیاء الدّینی سورسڭ. [حاشیە]

بنم او قرداشم انصافلی و مدقّق بر عالم اولدیغی ایچون، بنم نقطۀ نظریمی قبول ایدوب تقدیر ایتدی. ای رسالۀ نورڭ قیمتدار طلبەلری و بندن داها بختیار و فداكار قرداشلرم! شخصیتم اعتباریلە سزڭ زیادە حسن ظنّڭز، بلكە سزە ضرر ویرمز. فقط سزڭ كبی حقیقت بین ذاتلر وظیفەیە، خدمتە باقوب، او نقطەدە باقملیسڭز. پردە آچیلسە، بنم باشدن آشاغی یە قدر قصورات ایلە آلودە ماهیتم كورونسە، بندن قاچمغە بر وسیلە اولور. سزی قرداشلگمدن قاچیرمامق، پیشمان ایتمەمك ایچون، شخصیتمە قارشو حدّیمڭ پك فوقندە تصوّر ایتدیگڭز مقاملرە ارتباطڭزی باغلاماییڭز.

بن سزە نسبتًا قرداشم، مرشدلك حدّم دگل. استاد دە دگلم، بلكە درس آرقداشی یم. بن سزڭ، قصوراتمە قارشو شفقتكارانە دعا و همّتلریڭزە محتاجم. بندن همّت بكلەمەڭز دگل، بڭا همّت ایتمەڭزە استحقاقم وار. جناب حقّڭ احسان و كرمیلە سزلرلە غایت قدسی و غایت اهمّیتلی و غایت قیمتدار و هر اهل ایمانە منفعتلی بر خدمتدە، تقسیم المساعی قاعدەسیلە اشتراك ایتمشز. تساندیمزدن حاصل اولان بر شخص معنوینڭ فوق العادە اهمّیت و قیمتی و استادلغی و ارشادی بزە كافیدر.

هم مادام بو زماندە هر شیئڭ فوقندە خدمت ایمانیە اڭ اهمّیتلی بر وظیفەدر. هم كمیّت ایسە كیفیتە نسبتًا اهمّیتی آزدر. هم موقّت و متحوّل سیاست عالملری ابدی، دائمی، ثابت خدمات ایمانیەیە نسبتًا اهمّیتسزدر، مقیاس اولاماز، مدار دە اولاماز. رسالۀ نورڭ تعلیماتی دائرەسندە و بزلرە بخش ایتدیگی خدمت نقطەسندە فیضلی مقاملرە قناعت ایتملی ییز. حدّندن فضلە فوق العادە حسن ظن و مفرطانە عالی مقام ویرمك یرینە، فوق العادە صداقت و ثبات و مفرطانە ارتباط و اخلاص لازمدر. اوندە ترقّی ایتملی ییز.

اَلْبَاقٖی هُوَ الْبَاقٖی

قرداشڭز

سعید النّورسی

[٥٨]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ بِعَدَدِ ثَوَابَاتِ حُرُوفِ الْقُرْاٰنِ فٖی شَهْرِ رَمَضَانَ

عزیز، صدّیق قرداشلرم،

رسالۀ نورڭ قهرمانی اولان خسروڭ بو دفعەكی ایكی هدیۀ قدسیەسی و كرامتكارانە او ایكی سماوی هدیەنڭ معنوی اعجازینی كوزلرە دە كوستریر بر طرزدە بو شهور ثلاثەدە بزلرە و بو محیطە هدیە ایتمسی، رسالۀ نور نقطۀ نظرندە معجزانە بر خدمتدر. ان شٓاء اللّٰه او كل فابریقەسنڭ قلمی، بورالری دە بر كُلستانە چویرەجك. جناب حق او قلم صاحبنە، یازدیغی هر حرف قرآنە مقابل، لیلۀ قدردەكی كبی اوتوز بیڭ ثواب و رحمت و حسنە ویرسین. آمین آمین آمین.

عزیز، صدّیق قرداشلرم،

سزڭ فوق العادە صداقت و علوّ همّتڭزدن ترشّح ایدن بر هفتە اوّلكی مكتوبڭزە قارشو حسن ظنّڭزی بر درجە جرح ایدن بنم جوابمڭ حكمتی شودركە: بو زماندە اویلە فوق العادە حاكم جریانلر واركە، هر شیئی كندی حسابنە آلدیغی ایچون، فرضا حقیقی بكلنن او ذات دخی بو زماندە كلسە، حركاتنی او جریانلرە قاپدیرمامق ایچون سیاست عالمندەكی وضعیتدن فراغت ایدەجك و هدفنی دگیشدیرەجك، دییە تخمین ایدییورم.

هم اوچ مسئلە وار: بری حیات، بری شریعت، بری ایماندر. حقیقت نقطەسندە اڭ مهمّی و اڭ اعظمی، ایمان مسئلەسیدر. فقط شیمدی عمومڭ نظرندە و حال عالم الجاآتندە اڭ مهم مسئلە حیات و شریعت كوروندیگندن.. او ذات شیمدی اولسە دە، اوچ مسئلەیی بردن عموم روی زمیندەكی وضعیتلری دگیشدیرمسی، نوع بشردەكی جاری اولان عادت اللّٰهە موافق كلمدیگندن، هر حالدە اڭ عظیم مسئلەیی اساس یاپوب، اوتەكی مسئلەلری اساس یاپمایاجق. تاكە ایمان خدمتی صفوتنی عمومڭ نظرندە بوزماسین. و عوامڭ چابوق اغفال اولونابیلن عقللرندە، او خدمت باشقە مقصدلرە آلت اولمدیغی تحقّق ایتسین.