بن دە دیرم: او استاد دیدیگی و چوق قیمت ویردیگی شخص ایسە، رسالۀ نورڭ شخص معنویسی اولابیلیر. بن دە اونڭ نامنە قبول ایتدم، لاحقەیە كچیردم. هم سزە دە بر صورتنی كوندردم.

مراق ایتمەییڭز، خستەلغم كیتدكجە خفیفلشییور. اسپارطەلی مصطفی نامندە بر قرداشمزڭ صمیمی، فقط غریب بر مكتوبی، خسروڭ مكتوبی ایچندە واردی. بو ذات هانكی مصطفیدر، بیلەمدم. اوڭا دە چوق سلام ایدرم. عجیب رؤیاسی خیردر، شیمدی تعبیر ایدەمم.

عموم قرداش و همشیرەلریمزە برر برر سلام و دعا ایدرز و مقبول دعالرینی ایسترز. حسن فیضینڭ كوزل قصیدەسنی، بعض كلمەلری علاوە ایلە لاحقەیە كچیردك و سزە دە كوندردك

اَلْبَاقٖی هُوَ الْبَاقٖی

قرداشڭز سعید النّورسی

(١٠٤)

قونیەلی صبرینڭ فقرەسیدر.

صبرینڭ استاد دیدیگی بنم شخصم دگل، بلكە رسالۀ نورڭ شخص معنویسیدر. و او معنا ایلە قبول ایدرم.

١

كوڭللریمزڭ نوری، سنسڭ عزیز استادیمز.

مسلمانلغڭ سروری، سنسڭ عزیز استادیمز.

٢

هر كوچلگە كوگس كرن، سوكیسنی حقّە ویرن،

بزە نور یولی كوسترن، سنسڭ عزیز استادیمز.

٣

چالیشوب ییللردنبری، ایشیقلاتدیڭز هر یری،

بو نورلی یولڭ رهبری، سنسڭ عزیز استادیمز.

٤

اوزاغز شهرتدن شاندن، بو عشقە باغلی ییز جاندن،

بزە هر یولدە قوماندان، سنسڭ عزیز استادیمز.

٥

آدڭ ذكر اولور هر یردە، وارلغڭ علاجدر هر دردە،

شو منافقلرە پردە، سنسڭ عزیز استادیمز.

٦

مؤمنلرە تمل طاشی، ایمانلرڭ آرقداشی،

رسالۀ نورڭ باشی، سنسڭ عزیز استادیمز.

٧

سوكیڭ یانار ایچمزدە، یورورز آچدیغڭ ایزدە،

بو عشقی یرلشدیرن بزدە سنسڭ عزیز استادیمز.

٨

جانلریمز اولسون فدا، رسالۀ نور اوغرینە،

یا غازی یز، یا شهدا، رسالۀ نور اوغرینە.

٩

كوڭلمز عشق ایلە اورور، آلنمز اولدقجە نور،

آقوب كیدن صولر طورور، رسالۀ نور اوغرینە.

١٠

بز هر خیالدن كچمشز، نور شربتنی ایچمشز،

معنوی جهاد آچمشز، رسالۀ نور اوغرینە.

١١

پیریمزڭ نوریمزڭ یا رب، عمری اولسون اوزون،

بزلری أیلەمە محزون، رسالۀ نور اوغرینە.

١٢

كوڭل آیریلیرمی حقدن، نور بكلەیورز شفقدن،

قورتار بزی آغلامقدن، رسالۀ نور اوغرینە.

١٣

داها چوق یاشاسین استاد، قلبمزدە بودر مراد،

بزی غمدن أیلە آزاد، رسالۀ نور اوغرینە.

١٤

یا رب بزلری آغلاتما، درد هجرانلە چاغلاتما،

یوركلریمزی داغلاتما، رسالۀ نور اوغرینە.

چوق قصورلی، دعاڭزە محتاج طلبەڭز صبری

حسن فیضینڭ منظومە فقرەلریدر.

[١٠٥]

بِاسْمِهٖ سُبْحَانَهُ

بِسْمِ اللّٰهِ الرَّحْمٰنِ الرَّحٖیمِ ٭وَمَٓا اَرْسَلْنَاكَ اِلَّا رَحْمَةً لِلْعَالَمٖینَ

آیتنڭ وراثت احمدیەؐ جهتندە، معنای اشاری نقطەسندە، بو عصردە او رحمةً للعالمینڭ بر آیینەسی و حقیقت قرآنیەنڭ بر حقیقی تفسیری اولان رسالۀ نور، او كلّی رحمتڭ بر جلوەسی و بر نمونەسی اولمەسندن، حقیقت محمّدیەنڭؐ

بر قسم اوصافی معنای مجازی ایلە جزئی بر وارثنە ویریلەبیلیر دییە، بو پارلاق قصیدەیە ایلیشمدم. یالڭز حقیقت احمدیّەؐ ایلە آیینەسنڭ فرقنە اشارتًا بعض كلمەلر علاوە ایدیلدی

سعید النّورسی

١

حضور بولور بوكون سنڭلە عالَم

ای بو عصردە رحمت عالم رسالة النّور!

سرور بولور بوكون سنڭلە آدم

ای بر رحمت عالم رسالة النّور!

٢

بو خستە كوڭللر چوقدن پریشان

وارسە سندە اگر لقماندن نشان

بر شفا صون، كل ای محبوب ذی شان!

ای جلوۀ رحمت عالم رسالة النّور!

٣

كلمزمی صوڭی بو اوزون هجانڭ؟

كچمزمی غمی بو یاسلی كیجەنڭ؟

زاری آرتدی، صبری بیتدی نیجەنڭ

ای جلوۀ رحمت عالم رسالة النّور!

٤

فخر عالم عرشدن بو یرە ایندی

شاە ولایت كلوب دُلْدُلَە بیندی

ذوالفقار بوكون آرتق نورە دیندی

ای بو زماندە رحمت عالم رسالة النّور!

٥

یولمز بو نورڭ نورلی یولی

اولدق هپمز او نورڭ بر قولی

نور یولندە یوروین هم نە موتلی

ای نمونۀ رحمت عالم رسالة النّور!

٦

نورسڭ نور چیقان نورلی طاغندە،

بلبل أوتر باغچەسندە، باغندە

توزی اولسەق آنڭ پاك آیاغندە

ای رحمت عالم جلوەسی رسالة النّور!

٧

دردلرە درمانسڭ، محبوب جانسڭ

هم جامع الاسما والقرآنسڭ

هم دە نور حقدن بزە احسانسڭ

ای بر رحمت عالم رسالة النّور!

٨

بو عالمدە مادّە دگل، بر ئوزسڭ

هر بر ذرّەدە باقان بتون بر كوزسڭ

كائناتی حیران ایدن بتون بر یوزسڭ

ای مثال رحمت عالم رسالة النّور!

٩

اصلی اوّلیسڭ بالڭ، شكرڭ

دریاسیسڭ جملە علمڭ، هنرڭ

كلمدی، جهانە بویلە اثر بڭزرڭ

ای مرآت رحمت عالم رسالة النّور!

١٠

سن آیلردن، كونشلردن اوستونسڭ

نهایتسز، صوڭی كلمز بوتونسڭ

نور جمالڭ بتون بتون كورونسون

ای مظهر رحمت عالم رسالة النّور!

١١

بویون بوكوب آجی آجی مەلردك

كوز یاشنی قانلر ایلە سیلردك

كورسەك دییە سنی حقدن دیلردك

ای بر تمثیل رحمت عالم رسالة النّور!

١٢

چونكە سنسڭ، بو عصردە رحمةً للعالمینڭ جلوەسی

چونكە سنسڭ، شیمدی شفیع المذنبینڭ وارثی،

اَغِثْنَا یَا غِیَاثَ الْمُسْتَغٖیثٖینْ بر دعاسی

ای شعلۀ رحمت عالم رسالة النّور!

١٣

شفا بولسون شیمدی براز یارەمز

رواج بولسون، كچمز اولان پارەمز

صاچ نوریڭی، آقە دونسون قرەمز

ای ضیای رحمت عالم رسالة النّور!

١٤

جرممزلە كُلخان كبی پرنارز

درد ألندن هم هر كون زار و زارز

عفو ایت بزی، مادام هپ سڭا یارز

ای نور رحمت عالم رسالة النّور!

١٥

مَیْلمز یوق، یالانجی بر دنیایە

صوڭ ویردك بز، بدعەلرە، ریایە

قاپیلماییز اویلە قورو خولیایە

ای بر حقیقت رحمت عالم رسالة النّور!

١٦

یوق بزدە جمعیّت قورمە خولیاسی

یوق باشقە بر یولە كیتمە سوداسی

اولدق آنجق نورڭ دردلی شیداسی

ای دردلیلرە رحمت عالم رسالة النّور!

١٧

یوللردە بیراقدق كچدك درویشی

آتدق كوڭللردن اویلە تشویشی

كافی بو پارلایان نورڭ كونشی

ای معكس رحمت عالم رسالة النّور!

١٨

بزدن ایراق، قوقمش دونك سیاست

ایریشمز اوڭا هیچ عقل و كیاست

نوردر هر قورقودن بزە قوی سد

ای آیینۀ رحمت عالم رسالة النّور!

١٩

كچمشز هپ مدحلردن، ثنادن

یوز چویردك ثروتلردن، غنادن

نور ایسترز، كچمدن بو فنادن

ای بو عصردە رحمت عالم رسالة النّور!

٢٠

نور ألندن ایچەلی بز شرابی

چویرمشز طاتلیلغە عذابی

بر محبوبڭ بز دە اولدق ترابی

ای بزە رحمت عالم رسالة النّور!

٢١

عاشقلرڭ عرشە چیقان فریادی

آغلاتییور او پاك روحلی اجدادی

اللّٰه ایچون أیلە بزە امدادی

ای محتاجلرە رحمت عالم رسالة النّور!

٢٢

كوكلر صالدی بلا، یر ویردی بلا

صارصدی آفاقی بر آجی واویلا

رحمت ایت عالمە، ای نور مولا!

ای جلوۀ رحمت عالم رسالة النّور!

٢٣

بر یاندە سیل وار، بر یاندە قان آقار

بو بلا آتشی، عالمی یاقار

آغلایان بو بشر هپ سڭا باقار

ای نمونۀ رحمت عالم رسالة النّور!

٢٤

چوریلدی آتشلە بو قوجە دنیا

بر جهنّم كبی قاینادی دریا

یتیش امدادە، ای شاە اولیا!

ای بو زماندە رحمت عالم رسالة النّور!

٢٥

هر یانغینی سنڭ نورڭ سوندیرر

هر بر یری بر كلشنە سنڭ نورڭ دوندیرر

دجّالی دە بر كون كلیر، البت ئولدیرر

ای نور رحمت عالم رسالة النّور!

٢٦

زندقەیە، كفرە قارشو صالدیردڭ

كوڭللردن كدرلری قالدیردڭ

بزی نورڭ دریاسنە طالدیردڭ

ای بیچارەلرە رحمت عالم رسالة النّور!

٢٧

قالدیراماز سڭا اصلا كیمسە ال

باغلایورز بزلر سڭا جاندن بل

دنیالرە سنسڭ امید و امل

ای ضیای رحمت عالم رسالة النّور!

٢٨

سن اوردو قورمازسڭ أرلە اوشاقلە

صاواشمازسڭ اویلە، طوپلە، بیچاقلە

نورڭلە شو عصری طوتوب قوجاقلا

ای شیمدی رحمت عالم رسالة النّور!

٢٩

بیتسین دە بو قورقونچ طوفان شدید

آچیلسین یپ یڭی بر دور مسعود

اون سكز بیڭ عالَم أیلەسین هپ عید

ای اهل قرآنە رحمت عالم رسالة النّور!

٣٠

كلییور شو قارشودن كرچە بر ظلمت

فقط سنسڭ بوكون عالمە رحمت

بوغاجقسڭ اونی نورڭلە البت

ای بر رحمت عالم رسالة النّور!

٣١

قیزیل اژدر یووەمزە كیرمەسین

زهرلی ألی یاقەمزە ایرمەسین

قارشو طوروب نورڭ فرصت ویرمەسین

ای سیف رحمت عالم رسالة النّور!

٣٢

قرە دومان اوستمزدن طاغیلسین

قیزیل آلو سونوب عالَم آییلسین

بو ظفرڭ حشرە قدر آڭیلسین

ای ذوالفقار رحمت عالم رسالة النّور!

٣٣

او صویدندر، نیجە جانلر یاقانلر

او صویدندر، أولر، بارقلر ییقانلر

او صویدندر، سڭا كینلە باقانلر

ای حجّت رحمت عالم رسالة النّور!

٣٤

معصوملرڭ قانلرینی ایچرلر

ابو جهللری، نمرودلری كچرلر

ئولوملردن ئولوملری سچرلر

ای شیمدی بر رحمت عالم رسالة النّور!

٣٥

بر میقروبكە، جگرلری دیشلەیور

قانمزلە كندیسنی بسلەیور

تمیز یوردی تلویث ایدوب پیسلەیور

ای بر اجزاخانۀ رحمت عالم رسالة النّور!

٣٦

غازیلرڭ، فاتحلرڭ قوناغی

سیّدلرڭ، سَرْوَرْلرڭ اوتاغی

بو وطندر، شهیدلرڭ یاتاغی

ای جلوۀ رحمت عالم رسالة النّور!

٣٧

او شهیدڭ آلە دونمش كفنی

مسكلر قوقار، كُلَە بڭزر بدنی

أوپر ملكلر دە او نورلی نعشنی

ای نمونۀ رحمت عالم رسالة النّور!

٣٨

قرآن دییور، ئولمەمشدر، دیریدر

هر بریسی حقّڭ آسلان اریدر

تربەلری، یوركلری تیترتیر

ای آیینۀ رحمت عالم رسالة النّور!

٣٩

آرماغانسڭ چونكە اصیل ملّتە

دوشمەیەلم بر كون بیلە ذلّتە،

كوتور بزی، شانلی بیوك دولتە

ای مثال رحمت عالم رسالة النّور!

٤٠

أیلەیەلر نورڭ ایلە هپ صولت

ظفرلرلە شانلر بولوب بو ملّت

شرقە، غربە ضیا صالسین بو دولت

ای بزلرە رحمت عالم رسالة النّور!

٤١

نوردن قنادڭ وار، هم صاغلام قولڭ وار

نوردن سنڭ حقّە كیدن یولڭ وار

قبول ایت، بر كمتر فیضی قولڭ وار

ای بو عصردە رحمت عالم رسالة النّور!

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

استادم، افندم حضرتلری! [وَمَٓا اَرْسَلْنَاكَ اِلَّا رَحْمَةً لِلْعَالَمٖینَ] آیتنڭ نورلرندن، نورڭ سایەسندە آلابیلدیگم بر ذرّەیی بو شكلدە یازدم و حضور عرفانڭزە صوندم. قبولنی رجا ایدر، سلاملریمزی صونار، مبارك اللریڭزی اوپرز افندیمز.

بیچارە طلبەڭز حسن فیضی

رَحْمَةُ اللّٰهِ عَلَیْهْ اَبَدًا دَٓائِمًا

(١٠٦)

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدَ الْاٰبِدٖینَ

عزیز، صدّیق قرداشلرم،

بو دفعە نورڭ لزوملی زمانندە سانترالی خلوصئ ثانی، تام بر عبد المجید، صبرینڭ برنجی مخاطبی، خلوصینڭ قارصە كیتمەسنی یازییور. بن او قرداشمزڭ نورڭ بر معنوی قوماندانی اولارق اهمّیتلی جبهەلرە بر دست حكمت طرفندن چوق یرلرە كوندریلدیگنی كورییوردم. شیمدی اڭ اهمّیتلی جبهە كیتدیگی یردر.

صبری یازدیغی عصای موسی مجموعەسنی اوڭا كوندرمك ایستەیور. سز مناسب كورسەڭز، خلوصیلە مخابرەدن صوڭرە او دە لزوم كورسە، هم احتیاط ایتمك شرطیلە كوندریرسڭز. بنم طرفمدن اوڭا چوق سلاملە دائما اونی نور خدمتندە بیلییورم. برنجی صفدە مخاطبلردندر. عبد المجیدڭ اوغلی نهاد دخی اورادە عسكردر ایشیتدم. صبرینڭ مكتوبیلە برابر كوك درە مصطفی نڭ بر مكتوبی وار. رسالۀ نورە تام علاقەدار و چالیشدیغنی یازییور.

هم كوچك تنەكەجی محمد نامندە بریسنڭ خیرلی بر رؤیاسی وار. ایكیسنە دە سلام ایدرم. مصطفی یی تبریك ایدر، او محمدە خیردر ان شٓاء اللّٰه دیرم.

نظیف بڭا كوندریلەجك اولان عصای موسی مجموعەسنی هانكی واسطە ایلە كوندرەیم دیر. سز اوڭا یازڭكە، سزە كوندرسین. سز دە بڭا كوندریڭز.

اَلْبَاقٖی هُوَ الْبَاقٖی

عمومڭزە برر برر سلام و سلامتلریڭزە دعا ایدوب دعالریڭزڭ تأثیرینی هر وقت كورن قرداشڭز سعید النّورسی

(١٠٧)

بِاسْمِهٖ سُبْحَانَهُ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

عزیز، صدّیق، خالص قرداشلرم،

للّٰە الحمد دعاڭزڭ بركاتیلە زهرلی خستەلغڭ تهلكەسی كچدی. كرچە چوق صیقینتی ویرییور. فقط هم دعاڭز، هم مكتوبلریڭز تام بر تریاق و مكمّل بر مرهم اولویور. ویردیگی سرور او صیقینتیلری هیچە ایندیرییور. بو دفعە نور كل فابریقەسنڭ اڭ اسكی اركانلرندن اولان كاتب عثمانڭ حقیقی استادی اولان رسالۀ نور شخص معنویسنە خطابًا و آرا صیرە بو بیچارە قرداشنی ایچنە آلدیغی بو مكتوبنی لاحقەیە و سكّۀ غیبیەیە كچیردك. و سزە دە صورتنی كوندردك. هم فوق العادە صداقتیلە و غیرتیلە اینەبولی یی بر كوچك اسپارطە حكمنە كتیرمگە اهمّیتلی بر وسیلە اولان احمد نظیفڭ مكتوبی بزی چوق مسرور أیلەدی.

اورادە هم رسالۀ نورڭ، هم عصای موسی مجموعەسنڭ فتوحاتی و ترقّیسی ایلری كیتدیگنی بیلدیرییور. او مكتوبڭ اهمّیتلی پارچەسنی اورادە صارصیلمایان ثباتكار قرداشلریمزڭ نامنە لاحقەیە قید ایتدك. سزە دە صورتنی كوندردك. هم كاتب عثمانڭ و صبرینڭ و فیضینڭ یڭی فقرەلری بورادەكی شاكردلری شوقە كتیردكلرندن، بری مصطفی، بری جیلان بورانڭ طلبەلری نامنە ایكی قصیدەجك یازدیلر. سزە دە كوندردك.

اَلْبَاقٖی هُوَ الْبَاقٖی

عموم قرداشلریمە سلام و دعا و استدعا ایدن سعید النّورسی

كاتب عثمانڭ مكتوبیدر.

بو مكتوبدە مخاطب رسالۀ نورڭ شاكردلرینڭ شخص معنویسی اولارق قبول ایتدم. یوقسە اهمّیتسز شخصم اعتباریلە حدّم دگل

سعید النّورسی

(١٠٨)

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

ای سماوات و ارضڭ خلیفەسنڭ سوكیلیسی! و ای نبیّ ذیشان علیە الصّلاة والسّلام افندیمز حضرتلرینڭ وكیلی! و ای حضرت قرآن عظیم الشّانڭ دلّالی!

و ای رسالۀ نورڭ ترجمانی! و ای صحابۀ كزین افندیلریمزڭ یارانی! و ای بتون اهل ایمان و اسلامە یاردیمجی! و ای بتون اموات مسلمینڭ روحلرینە دعاجی! و ای جمال اللّٰهی مشاهدە ایدوب فانی دنیانڭ باشقە حسنلرینە پرستش ایتمەین!

و ای جنّت الفردوس نعمتلرینی كوروب دنیانڭ نعمتلرینە آلدانمایان! و ای باقی و نورانی بر عالمی سیر ایدوب فانی و دغدغەلی فیرطینەلی ظلمتلی ألملی فراقلی دنیا عالمنە هیچ اهمّیت ویرمەین! و ای شو فانی دنیادە آچلقدن ئولمەیەجك قدر بر رزق و صوغوقدن متأثّر اولمایاجق قدر بر البسەدن باشقە بر شیئە تنزّل ایتمەین!

و ای بتون عمرینی اهل ایمان و اسلامڭ دنیا و آخرتدە سلامتلری ایچون رسالۀ نورە فدا ایدن! و ای شو عالم اسلام دیاری اولان آناطولیمزی شو دغدغەلی فیرطینەلی زماندە مبارك دعاسی ایلە و یازدیغی مبارك اثرلری اولان رسالۀ نور ایلە بر سفینۀ نوح كبی سماوی و ارضی آفاتدن اذن الٰهی و همّت پیغمبری ایلە قورتاران چوق مبارك، چوق سوكیلی، چوق قیمتدار، چوق حمیّتلی، چوق مرحمتلی، چوق شفقتلی استادم افندم حضرتلری!

ارسال بویورمش اولدیغڭز وصیتنامەڭز، بز عاجز، قصورلی، كناهكار طلبەڭزڭ كوزلرینی قانلی یاشلر ایلە طولدیرارق آغلاتدی. و ألآن كیجە

كوندوز آغلامقدەیم. و بو وصیتنامەڭز، قلبمزە بر مفارقت آتشی صاچدیكە، آرتق بو آتش قلبمزدە قیامتە قدر سونمەیوب یاناجقدر. و جناب ارحم الرّاحمین بو دنیادە پك چوق قصور و كناهلریمز اولدیغی حالدە، رسالۀ نور كبی پك بیوك اثرلری المزە ویرەرك سز مبارك استادیمزە طلبە یاپدیغنە حدسز شكرلر ایدرك، باشدە حضرت قرآن عظیم الشّان ایلە پیغمبریمز حضرت محمّد مصطفی صلّی اللّە علیە و سلّم افندیمزی و رسالۀ نوری شفاعتجی یاپارق، آخرتدە دە عموم قرداشلریمز ایلە برلكدە نبیّ ذی شان افندیمز حضرتلرینڭ مبارك لواء الحمد صانجاق شریفی آلتندە طوپلانمقلغمزی جناب حقدن تمنّی و نیاز ایدرم.

و جناب حق، عمریڭزە لطفندن و كرمندن داها پك چوق سنەلر علاوە ایدرك، قرآنڭ نورندن یر یوزینە داها بر چوق نورلر صاچمەڭزی احسان بویورسون. آمین آمین آمین.

و بز عاجز قصورلی طلبەلریڭزدە اولان حقّڭزی حلال ایتمەڭزی كوز یاشلریمزلە تمنّی ایدرك مبارك ال و اتكلریڭزدن اوپرم افندیمز حضرتلری.

دائما حسرت و مفارقت آتشیلە قلبی یانان

قصورلی طلبەڭز كاتب عثمان