طلبەلریڭزی "مستریح اولیڭز، مژدەلر اولسون سزە، هیچ متأثّر اولماییڭز. هپسی دە موقّتدر. بن دینسزلرڭ هر تورلی اشكنجەلرینە تحمّلە قرار ویردم. صبرە عزم ایتدم" دییەرك تسلّی ایدییورسڭزكە، بو حاللریڭز بزی داها چوق آغلاتییور. یالڭز شو اون سنە ایچندە كچن اوچ منفی و ایكی حپسخانە حیاتڭز، بو حاللریڭزە شاهد عادلدر. اوت، عزیز و محترم استادیمز، بزلر سزە باقوب آغلایورز. یوركلریمز بو حاللریڭزە تحمّل ایتمییور. مدد یا صبور

اَلْبَاقٖی هُوَ الْبَاقٖی

چوق قصورلی طلبەڭز خسرو

[٩٩]

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ اَبَدًا دَٓائِمًا

عزیز، صدّیق قرداشلرم،

صلاح الدّین اینەبولی ثباتكار طلبەلری نامنە بو مكتوبی بورایە كوندرمش. بز دە او فداكار قرداشلریمزڭ خاطرلری ایچون لاحقەیە یازدق. سز دخی اوندن مناسب كوردیگڭز پارچەیی قید ایدرسڭز. هم بڭا یازییوركە "طبع ایچون اونلرڭ ویردكلری مصرفی بزە اعادە ایتمەییڭز. رسالۀ نورڭ باشقە بر ایشنە صرف ایدیلسین." سز اوڭا یازیڭز، مادام باشقەلرڭكی اعادە ایدیلدی، سزڭكی دە سزدە قالسین. سز محافظە ایدیڭز.

قرداشلرم،

سز متأثّر اولماییڭز، هم مراق ایتمەییڭز. یالڭز دعا ایلە بڭا یاردیم ایدیڭز. چونكە برقاچ كوندر صول قولم چوق آغرییور، كیجە راحتسز ایدییور. كیمسەیی یانمە بیراقمدیغمدن، اوطە ایچندەكی ضروری ایشلریمی زحمتلە یاپابیلیرم. ظن ایدرم، اسكیدنبری بندە بولونان قولونج علّتنڭ بر شعبەسیدركە، بورانڭ مزاجمە چوق طوقونان مادّی هواسی و قیشی، او انصافسزلرڭ اوهاملی تضییقاتلری و معنوی قیشی، طماریمە طوقونویور. عادتا بر یاریم نزول اصابتی كبی اضطراب چكدم. فقط للّٰە الحمد سزڭ مقبول دعالریڭز، او تهلكەیی دە خفیف بر صورتە چویردی. ان شٓاء اللّٰه او صورتدە كچر، چوق ثوابلی فائدەسی یرندە قالیر.

قرداشلرم، صلاح الدّینڭ یازیسنە كورە، او حوالیدە دخی عصای موسی مجموعەسی چوق فعّالیّتدەدر، فتوحات یاپییور. دیمك او طرفدە او چوق اهمّیتلی وظیفۀ نوریەیی یاپییور. یوز بیڭ الحمد للّٰه و یازانلرە دە یوز ما شٓاء اللّٰه، بارك اللّٰه!

دعاڭزە محتاج و هر وقت دعاڭزدن استفادە ایدن قرداشڭز سعید النّورسی

(١٠٠)

بِاسْمِهٖ سُبْحَانَهُ

مستنسخڭ استادی حقّندە ایدیندیگی قیصە بر معلومات

اختیار، بیچارە، اشسز یاشامش، دوستسز بیراقیلمش، سنەلردر انزوایە چكیلمش اولدیغی حالدە اقامتە مأمور، دائمی ترصّد آلتندە بولوندیریلان یتمشلك بر فاطن العصر، یگرمنجی عصرڭ هم بدیع الزّمانی، هم غریب الزمانی، هم ایمان قورتاریجیسی سعید النّورسی حضرتلری.

[ترجمۀ حالنە قیصەجە بر نظر]

١-بتلیسڭ خیزان قضاسنڭ ایسپاریت ناحیەسنڭ نورس كویندە طوغمشدر. آناسی نوریە خانم، باباسی میرزا افندیدر. كرد عائلەسنە منسوب اولمقلە برابر، كندیسی اصلا توركلك كردلك-، عربلق عجملك- طانیماز. ملّیتی آنجق دین باقیمندن قبول ایدر. دنیادەكی بتون مسلمانلر و مختلف دینلردن اسلامیتە كیرنلر قرداشیدر. (بو فكریلە، دنیادەكی ایكیلكلری آزالتان و اسلام عالمندە بر وحدت قورولمەسنە كوزل بر نمونە.)

٢- تحصیل و تربیەسی امّیدر. چوجقلغندە، خستەلغنی اوقویان خواجەدن دونركن مردیوندن یووارلانییور. آغزندن بورنندن دهشتلی صورتدە آقان قاندن صوڭرە، مِنْ طَرَفِ اللّٰهْ فضیلت، عصمت، فطانت، شفقت، ذكاوت حاسّەلری پیدا اولویور. فكرًا موجوداتدن درس آلییور. علوم دینیە ایلە فنون عصریەیی

مزج، حقائق دینیەیی فنون مثبتە ایلە تأیید ایتمشدر. بو خارقە حالیلە، عصرینڭ انسانلرینە فوق البشر بر خواجە، بر معلّم اولویور.

٣-استقبالدە شرقدە جهالت یوزندن وقوع بولاجق ضررلری حسّ ایدرك اوڭلنمسی ایچون مكتب مدرسە آچدیرمق غایەسیلە استانبولە كلن ملّی قیافتلی كنچ عالمڭ مجادلەسی (معارفڭ بوكون مكتبلرە ویردیگی اهمّیت او وقت یاپیلسە ایدی، شرقدە بلكە بر حادثە بیلە چیقمازدی.)

٤-علمایی و مثبت علملر پروفسورلرینی دعوت ایلە بتون سؤٓاللرە تطمینكار جواب ویرمسی ایلە بر چوق مسائلدە عالم و فیلسوفلرڭ شبهەلرینی ازالە ایتمش اولدیغندن، بین الملل مشهور مصرلی عالم عبد العزیز، فاطن العصر نامیلە یاد و اعلان ایتمشدر. جامع الازهرە مقابل، المدرسة الزهرا نامندە واندە بر اونیورسیتە یاپیلمەسنە ارادە آلینمش ایسە دە، حرب عمومی ظهور ایتدی. (آناطولینڭ سینەسندە طوغان، بویوین و عجز مطلقلە و فقر مطلقلە و شكر مطلقلە خالقنە صیغینان.. و رضاءً للّه ایمان قورتارمق ایچون اخلاص و ثباتلە چالیشان بو ذاتدن عصرڭ مسلمانلری، بالخاصّە آناطولی خلقی افتخار ایدر.)

٥-وطنمزە، دینمزە، ناموسمزە تعرّض ایدن روس اوردولرینە قارشو بتلیس میلیس قوّتلری قوماندانی اولارق چوق فائق قوّتلرلە هجوم ایدن روس اوردوسنە كونلرجە و قهرمانجە مدافعە ایلە، شهردەكی بتون مهمّات و ارزاق

و خلقڭ و عسكرڭ كری طاشینمەسنی تأمین ایتمش. یارەلاندیغی حالدە كری چكیلمەیی شخصًا ذُل صایدیغندن، غازیلك مقامیلە دە قرارگاهندە صوڭ مرمیسنە قدر شرفلە دوگوشمش، نهایت بالمجبوریە روسلرە اسیر دوشمشدر. دیننڭ و وطن و ملّتنڭ سلامتی ایچون جاننی فدادن چكینمەین بو قهرمان قوماندانە اوچ روس مرمیسندن بری اصابتلە قلبنڭ اوزرندەكی معدن طبقەیی دلییور، ایچ چاماشیردە قالییور. ایكنجیسی، صول طرفدە خنچرڭ صاپنی دلەرك طورور. اوچنجیسی، اوموزندە خفیف بر یارە آچار. نهایت بتلیسڭ حینِ سقوطندە آیاغی قیریلمش و اوموزی مجروح بر حالدە روسلرە اسیر دوشویور

٦-سبریادە اُسرا قامپلرندە ایكی سنە اوچ آی قرداشلرینڭ معنویاتلرینی تقویە ایتمش. و وارشووە یولیلە استانبولە كلمشدر. او صیرەدە اینكیلترە آنغلیقان كلیسالری باش پیسقوپوسنڭ و ژاپون باش قومانداننڭ پادشاە حكومتندن صوردیغی سؤٓاللرە جواب ویرن.. و لمعات، قطرە، ذرّە، حبّە، قیزیل ایجاز و اشارات اعجاز نامندە یازدیغی عربی اثرلری اوقویانلرە موجوداتڭ طلسمنی كشف ایلە بر حقیقت یولی آچیلمەسی.. او وقت مقرّ علما اولان استانبول ایلە حجاز، یمن، مصر، سوریە، عراق، ایران و افغان و هندستان علماسنڭ تماسی بولوندیغندن بو اثرلری كندی اثرلرینە مأخذ طوتمەلری و دار الحكمت الاسلامیە اعضالغندە علمیە و دینیە ایلە مشغول اولمسی.

٧- استانبولدە مطنطن و شعشعەلی، محتشم سیاسی و اجتماعی حیاتە طالاركن، معنوی استادلرندن و محافظلرندن عبد القادر كیلانی قَدَّس اللّٰهُ سِرَّهُ نڭ فتوح الغیب اسمندەكی اثرینی اوقوركن [ای دیننی دنیایە صاتان خائن!] جملەسیلە باشلایان آغیر خطابی و عتابی شخصنە قبول ایدرك، او آندە جاذب و شرفلی، سیاسی و اجتماعی حیاتی ترك ایلە، اسكی سعیدلكدن یڭی سعیدلگە كچمش. بر مدّت یوشع تپەسی و ایوب مزارلقلرینی كندینە أو و طاشلرینی آرقداش یاپدیغی حالدە، صیق صیق اسكی دوستلری زیارت ایدرك دنیایە دعوت ایلە راحتسز ایتدكلرندن اوزاقلرە، ایصسز طاغلرە، آغری ماوراسنە چكیلمشدر.

٨-استقلال حربنڭ اڭ تهلكەلی آنلرندە تورك ملّتنی و اوردوسنی و قوماندانلرینی تشجیع ایچون یازدیغی خطوات ستّە نامندەكی اثریلە، ملّت مجلسنڭ و باش قوماندانڭ فوق العادە تقدیری ایلە آنقرەیە اصرارلە دعوت ایدیلمسی، هم مبعوثلق، هم واعظ عمومیلك ایلە تلطیف ایدیلمسی، فقط سیاستلە و اجتماعیاتلە علاقەسنی كسدیگندن تكرار وان قلعەسنە انزوایە كیرییور.

٩-شرق عصیانندە شیخ سعید، بدیع الزّمانە شرقدەكی بیوك نفوذندن استفادە ایچون مجادلەیە اشتراكە دعوت ایتدیگی زمان جوابًا: "یاپدیغڭز مجادلە قرداشی قرداشە ئولدیرتمكدر. و نتیجەسزدر. چونكە تورك كرد بردر، قرداشدر.

تورك ملّتی بیڭ سنەدر اسلامیتە بایراقدارلق ایتمش، دینی اوغرندە بیڭلر شهید ویرمش و بیڭلرلە ولی یتیشدیرمشدر. بناءً علیه، قهرمان و فداكار اسلام مدافعلرینڭ طورونلرینە، تورك ملّتنە قیلیچ چكیلمز. و بن دە چكمم "دییە هم رد جواب و هم مجادلەسندن واز كچمەسنی سویلەمشدر. عصیان ختامندە، شرقدە ایلری كلن نفوذلی شخصلری یوردڭ مختلف یرلرینە نقللری مناسبتیلە مشارٌ الیه دە اسپارطەیە اقامتە مأمور بیراقیلییور.

١٠-سكز سنە صوڭرە، مَنَمَنْ حادثەسی مناسبتیلە مشهور خواجە و شیخلردە یاپیلان آرامەدە، اسپارطەدە تألیف ایدیلمش رسالۀ نورڭ یوز یگرمی اثری و یوز یگرمی طلبەسی استادلریلە برلكدە (مَنَمَنْ حادثەسیلە علاقەلری اولمدیغی حالدە) داخلیە وكیلی قیا شكرینڭ سٓوء قصدە مقرون امریلە توقیف ایدیلەرك اسكیشهر محكمەسندە آلتی آی موقوف بیراقارق، بر قسمی و اثرلرڭ تمامی برائت ایتدیریلمش، استادم دە قسطمونی یە اقامتە مأمور ایدیلمشدی.

١١- سكز سنە صوڭرە، قرق سنە اوّل چكردگی یازیلان بشنجی شعاعڭ الە كچمەسی.. و آیت الكبرانڭ طبعی مناسبتیلە هر طرفدە طوپلاتدیریلان و آرانیلان بیڭلرلە رسالۀ نور اجزالرینڭ و افادەیە جلب ایدیلن یوزلرلە رسالۀ نور طلبەسندن، آنجق یوز یگرمی تمیز ناصیەلی، صاف قلبلی و دوشونجەلی، دیندار توركلرڭ طقوز آی دڭزلیدە موقوفیتی و یوز اوتوز بش پارچە رسالۀ نور اجزالرینڭ آنقرەدە تشكّل ایدن بر هیئت علمیەنڭ تدقیقندە

قرآنڭ بر تفسیری اولدیغی علمی راپورلە توثیق و تصدیق ایدیلمەسندن، اثرلرلە برابر یوز یگرمی طلبەنڭ برائتیلە نتیجەلنیر. حضرت استاد دە آفیونە اقامتە مأمور ایدیلییور.

یتمشلك بر عمرڭ اون بر مهم حادثەسی، بو تهلكەلی، مادّە، طبیعیّون، انانیت عصرندە بو عمر و وجودڭ یگانە وظیفەسی، غایەسی، املی و آرزوسی، انسانلرڭ ایمانلرینی قورتارمق اولدیغنی.. (هم مطلقیت، هم مشروطیت، هم جمهوریت دورندە) آیری آیری غایت محقِّق، مدقّق علما و حكما و فضلانڭ و غایت قورناز، شیطان و اوهاملی جاسوس و فیلسوفلرڭ اینجەدن اینجەیە یگرمی سنە تحقیق و تدقیق و تحلیلی نتیجەسندە دنیوی و سیاسی هیچ بر مقصد اولمدیغی قطعی آڭلاشیلمشدر.

قرآن كریمڭ و حدیث شریفڭ بیڭلرلە حقیقتلرینی اثبات ایدن رسالۀ نوری، هیچ بر دیندار عالم ویا دینسز بر فیلسوف بر كلمەسنی دخی جرح و نقض ایدەمەمشدر. و تصدیقە مجبور اولمشلردر. یگرمی اوچ سنەدە تماملانان رسالۀ نور، رسائل النّور، رسالة النّور آدلی یوز قرق پارچە اثرلر، قرآن عظیم و حدیث شریفڭ اوّلكی عصرلردە مشكوك و شبهەلی بیراقدیریلمش ویا رموزلی و شموللی و مجازی یازدیریلمش تفسیرلردن آلینمش دگلدر. منبع قرآندن، حدیثدن عصریمزدە ترشّح ایتمشدر. استادم دیر: "بیاناتمز قرآن حكیمڭ فیضندندر.

نفسی تسلیمە، قلبی قبولە احضاردن عبارتدر. اصل سوز ایسە قرآنڭدر. زیرا سوز اودر و سوز اونڭدر "دیر. و كندینە خاص بر اصول تدریس بولارق، بش قطعە بیوكلگندەكی مدرسة الزّهراسندە میلیونلرلە طلبەیە خواجەلق ایدر. علوم دینیە ایلە فنون عصریەیی مزج و حقائق دینیەیی فنون مثبتە ایلە تأیید و تشدید ایتمك صورتیلە طلبەنڭ فكر و ایماننڭ تنویرینە چالیشیر. ایستەدیگی آندە خواجەسندن، ایستەدیگی درسی آلابیلیر. و آلدیغی درسلە عمل ایتدیگی تقدیردە دە ایماننی محافظە ایدەبیلیر.

رسالۀ نورڭ خلاصەسی مقامندە اولان بو عصای موسی رسالەسنی دقّتلی آڭلایارق اوقویان ویا دیڭلەین بلا استثنا دینلی دینسز-، عالم جاهل- هركس، اسلامیتڭ اساسی اولان ایمانڭ آلتی شرطنی تمامًا دیلیلە اقرار و قلبیلە تصدیق ایتمكلە برابر، ایمانی محافظە اسلامڭ بناسی اولان نماز قیلمەیی، اوروچ طوتمەیی، حجّە كیتمەیی، زكات ویرمەیی، كلمۀ شهادت كتیرمەیی كندینە وظیفۀ اصلیە بیلەجكدر. رسالۀ نوری اوقومغە، یازمغە و نشر ایتمگە چالیشاجق فردلر، جمعیتلر، ملّتلر، دولتلر دنیوی و اخروی فنالقلردن قورتولاجق و ظلمدن نورە چیقاجق، سعادت و سلامت تأمین ایدەجكدر. رسالۀ نورڭ خلاصەسی اولان عصای موسی رسالەسی، آطومدن داها قوّتلی و تأثیرلی، نورلی بر سلاح و حكمتلی بر عصادر. آطوم كبی بشریتڭ و مدنیتڭ محوینە دگل، سعادت و سلامتنە چالیشییور. (هٰذَا مِنْ فَضْلِ ربّٖی)

عصای موسی ییؑ اوقویان انسان دییەجككە: "بوكونە قدر، قیصە عمر دنیوی ایچون كیجەلی كوندوزلی چالیشدق. ئولوم ئولدیریلمییور. بعدما دە اوزون اولان عمر اخرویەمز ایچون المزدن كلدیگی قدر چالیشاجغز. چونكە اللّٰهی طانییان و اطاعت ایدن زنداندە اولسە بختیاردر. اونی اونوتان سرایلردە دە اولسە زنداندەدر. بدبختدر."

عصای موسی ییؑ اوقویان جمعیتلر بیلەجككە، اگر ایمان آخرت او بیوك عائلە افرادندە حكم ایتمزسە، كوزل اخلاقڭ اساسلری اولان اخلاص، صمیمیت، فضیلت، حمیّت، فداكارلق، رضای الٰهی، ثواب اخروی یرینە.. غرض، منفعت، ساختەكارلق، خودگاملق، تصنّع، ریا، رشوت، آلداتمق كبی حاللر میدان آلیر. ظاهری آسایش، انسانیّت آلتندە آنارشیلك و وحشت معنالری حكم ایدر. او حیات شهریە زهرلنیر. چوجقلر هایلازلغە، كنچلر سرخوشلغە، قویلر ظلمە، اختیارلر آغلامەیە باشلار.

عصای موسیؑ اوقویان ملّتلر اوگرنەجكلركە، اگر ایمان آخرت او بیوك ملّتلردە حكم ایتسە، بردن صمیمی حرمت و جدّی مرحمت و رشوتسز محبّت و معاونت و حیلەسز خدمت و معاشرت و ریاسز احسان و فضیلت و انانیتسز بیوكلك و مزیت او حیاتدە انكشافە باشلار. چوجقلرە دیر: "جنّت وار، هایلازلغی بیراق!" قرآن درسیلە تمكین ویرر. كنچلرە دیر: "جهنّم وار. سرخوشلغی بیراق!" عقلی باشلرینە كتیریر. ظالمە دیر: "شدّتلی عذاب وار، طوقات یییەجكسڭ!"

عدالتە باشنی اگدیرر. اختیارلرە دیر: "سنڭ ألڭدن چیقمش بتون سعادتلرڭدن چوق یوكسك و دائمی بر اخروی سعادت و تازە باقی بر كنچلك سنی بكلەیور. اونلری قزانمغە چالیش!" آغلامەسنی كولمگە چویرر. بونلرە قیاسًا، جزؤی كلّی هر بر طائفەدە حسن تأثیرینی كوستریر، ایشیقلاندیرر.

ملّتلردن سچیلن سیاستجی و اجتماعیاتجی دنیا ادارەجیلری حكمت فلسفە ایلە حكمت قرآنیەنڭ حیات اجتماعیۀ بشریەیە ویردیگی تربیەلری مقایسە ایدیلنجە، طوتدقلری یولڭ كیجە و كوندوز كبی تمامًا ضد و ضررلی اولدیغنی، رسالۀ نوردەكی شو دستورلرلە آڭلایاجقلردر.

حكمت فلسفە ایلە حیات اجتماعیەدە نقطۀ استنادی قوّت قبول ایدر. هدفی منفعت بیلیر. دستور حیاتی جدال طانیر. جماعتلرڭ رابطەسنی عنصریت منفی ملّیتی طوتار. ثمراتی ایسە هوسات نفسانیەیی تطمین و حاجات بشریەیی تزییددر. حالبوكە قوّتڭ شأنی تجاوزدر. منفعتڭ شأنی هر آرزویە كافی كلمدیگندن، اوستندە بوغوشمقدر. دستور جدالڭ شأنی چارپیشمقدر. عنصریتڭ شأنی، باشقەسنی یوتمقلە بسلنمك اولدیغندن تجاوزدر. ایشتە بو حكمتدندركە، بشرڭ سعادتی سلب اولمشدر، داها دوزلمییور.

امّا حكمت قرآنیە ایسە، نقطۀ استنادی قوّتە بدل، حقّی قبول ایدر. غایەدە منفعتە بدل، فضیلت و رضای الٰهی یی قبول ایدر. حیاتدە دستور جدال یرینە، دستور تعاونی اساس طوتار. جماعتلرڭ رابطەلرندە عنصریت ملّیت یرینە،

رابطۀ دینی و صنفی و وطنی قبول ایدر. غایاتی، هواسات نفسانیەنڭ تجاوزاتنە سد چكوب روحی معالیاتە تشویق و حسّیات علویەسنی تطمین ایدر. و انسانی كمالات انسانیەیە سوق ایدوب انسان ایدر. حقّڭ شأنی اتّفاقدر. فضیلتڭ شأنی تسانددر. دستور تعاونڭ شأنی بربرینڭ امدادینە یتیشمكدر. دینڭ شأنی اخوّتدر، انجذابدر. نفسی كملەمكلە باغلامق، روحی كمالاتە قامچیلامقلە سربست بیراقمق شأنی، سعادت داریندر.

بشریتی سعادتە قاووشدیراجق نورلی یول بودر. بو نور قارشوسندە آرتق نە طوپ، نە توفنك، نە زرهلی، نە طیّارە، نە غاز، نە آطوم، هپسی تهلكەسز قالییور. چونكە بشریتڭ محوینە دگل، سعادتنە چالیشدیراجقدر.

هی بدبختلر! بشریتڭ دنیوی و اخروی سعادت و سلامتی ایچون خدمتندە بیڭ بر زحمتلە، مشقّتلە، محرومیتلە، خستە، بعضًا آچ و غریب اولارق، بعضًا طاغدە، بعضًا قیردە، بعضًا حپسدە، بعضًا نظارتدە حدّتلنمدن، طاریلمادن شفقتلە، اخلاصلە، غیرتلە ایمانڭزی قورتارمق ایستەین و چالیشان استادیمزدن نە ایستەیورسڭز؟ دولتی و حكومتی و ملّتی علیهنە اغفالە جرئت ایدن كیملردر؟

رسالۀ نور طلبەلرندن چوق كناهكار عبد الرّحمن صلاح الدّین

[١٠١]

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

چوق عزیز، چوق صدّیق و صادق قرداشلرم و رسالۀ نور جهتندە امین و خالص وارثلرم،

چوق معنیدار و قوّتلی بر توافق و شاكردلرڭ صداقتلرینە دلیل، بر ظاهر كرامت نوریەیی بیان ایتمەمە بر اخطار آلدم. شویلەكە:

بن وصیتنامەمی یازدیغم عین زماندە، كیزلی منافقلر بنم اعتماد ایتدیگم خدمتجیلریمی ضابطە طرفندن یانمە كلمكدن منع ایتدكلری عین وقتدە، فرصت بولوب طانیمادیغم بریسیلە سابق طقوز دفعەدن داها تأثیرلی بر زهری بڭا یوتدیردیلر.

هم عین زماندە تونسلی و عالم قرداشلریمزدن كچن سنە بورایە قدر بنی كورمك ایچون كلوب كوروشمدن كیدن خواجە حشمت، یوزغاتدن بورایە یازییوركە: "سعید وفات ایتمش. رسالۀ نورڭ یوز اوتوز رسالەسی محافظە ایدیلسین، تاكە ایلریدە طبع ایدەجگز."

هم عین زماندە خلیل ابراهیمڭ وفاتم حقّندە بر حزین مرثیە حكمندەكی پارلاق مكتوبی شاكردلری آغلاتدیردی. هم بو زمانە پك چوق یاقین خسروڭ كندی عادتنە مخالف، بنم وفاتمە دائر بر ایكی مكتوبندە ایكی اوچ كون عمر كبی

تعبیرلرلە اجلمە اشارتلری، بر پارچە بنی متأثّر ایتدی. "عجبا بن كیدییورمی یم؟" دییە اندیشە ایتدم. هم عین بو هنگاملردە اڭ زیادە حیات دنیویەدەكی وظیفەمی دوشونوب، "وفاتمدن صوڭرە شاكردلر بو دهشتلی زماندە بنم بدلمە دە او وظیفەیی یاپاجقلرمی؟" دییە چوق مراق ایدركن.. بردن دڭزلی، میلاس، اسپارطە، اینەبولی امیدیمڭ یوز درجە فوقندە اویلە صحابتكارانە و التزام پرورانە او وظیفەیە قوشوب، باشقەلرینی دە و معلّم و عالملری دە قوشدیردیلركە، بنی حیرتلر ایچریسندە بیراقدیلر. الحاصل، بو بش جهتدەكی توافق، ظاهر بر كرامت نوریەدر. (اَلْحَمْدُ لِلّٰهِ هٰذَا مِنْ فَضْلِ رَبّٖی)

قرداشلرم، مراق ایتمەییڭز. جوشن و اوراد بهائیە، بو دفعە دخی او دهشتلی زهرڭ تهلكەسنە غلبە ایتدی. تهلكە دورەسی كچدی، فقط خستەلق دوام ایدییور. عموم قرداشلریمە برر برر سلام و سلامتلرینە دعا ایدوب، شبهەسز مقبول اولان دعالرینی ایسترم. و اینەبولیدە و جوارندە چوق خانملرڭ، هم كوچك یاورولرینڭ رسالۀ نوری یازمغە باشلامەلرینی و قرآن درسنی چوق معصوملرڭ آلمەسنی بتون روح و جانمزلە تبریك ایدییورز.

اَلْبَاقٖی هُوَ الْبَاقٖی

دعاڭزە محتاج قرداشڭز سعید النّورسی