(حافظ علینڭ تام وارثی حسن فیضینڭ بو مكتوبی، شهنامەلی مكتوبلرندن كری قالماز. بلكە، دڭزلیدە شاكردلرڭ فعّالیتلرندن تام خبر ویردیگی ایچون، او شهنامەلردن بر جهتدە داها زیادە منفعتلیدر. و بنی چوق مسرور أیلەدی. لاحقەیە كیرسین.)

(١٢٩)

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ بِعَدَدِ اَنْفَاسِ الْخَلَٓائِقِ مِنَ الْاَزَلِ اِلَی الْاَبَدِ

ای محبّتیلە كوڭللری طولدیران، سوزلری و رسالۀ نوریلە عالملری نورلاندیران مبارك استادیمز! بو عاجز قلمم یینە سڭا بو یازیلری یازمغە فرصت بولدی. یینە كوزلرم نورڭ ایلە طولدی. یوكسك و مبارك شخصڭە، عزیز و قیمتلی ذاتڭە اقربا ایدیندیگڭ چالیشقان عائلەسندن بورایە كلن مبارك قرداشمزڭ آیینەسندە یینە سزی كوردك. یینە نوریڭزلە مشرّف اولدق.

صحّت و عافیت خبریڭزی بزە كتیرن بو سویملی قرداشمز، یوسفڭ كوملگنی یعقوبە كوتورن و حضرتە یپ یڭی بر چفت كوز ویرن بشیردن داها بشارتلی، داها نشاطلی و داها سعادتلی كلدی. بزە سكون و سرور ویردی. بزە صفالر و شفالر كتیردی. یوسفڭ نَفَسنی یعقوبڭ حسرتلە یانان قلبنە قاتدی.

وقتیلە چوق عاشق قرداشلرڭ وار دییە تلطیف بویوردیغڭز بورادەكی

قرداشلریمز، همن اونی كورنجە اطرافنە طوپلاندیلر. سزە كوستردكلری عشق و علاقەیی، عینًا اوڭا دە كوستردیلر. یاری كیجەلرە قدر اونڭلە اوتوردیلر. عاشق دییە بخش ایتدیگڭز عشقڭ اری اولدقلرینی كوستردیلر. اوت، استادم، بونلر حقیقتًا عاشقدرلر. آرالرندە مأمور، معلّم، اصناف و ایشجی اولارق هر صنف خلقدن بولونان بو عاشق و صادق قرداشلریمز، رسالۀ نوری هر كون یازمقلە و اوقومقلە و اوقوتمقلە بو عشق و محبّتی هم آرتیرییور و هم اثبات ایدییورلر. اسكی یازی یی یازامایان بعض كنچلر دە یڭی حرفلرلە و بعضیلری دە بونی ماكینەلرلە یازوب چالیشییورلر. چالیشان بو قرداشلرڭ صاییسی و مقداری هر كون آرتییور.

بو عاجز طلبەڭز دە، شیمدی هر ایشی ترك ایدرك سادە بو ایشلە مشغول بولونمقدەدر. أوگلەیە قدر هر كون یازمقلە وقتمی كچیرییورم. اوگلەدن صوڭرە دە برر برر قرداشلریمزڭ یانلرینە اوغرایوب المدن كلدیگی قدر اونلرە یازی خصوصندە تعریفلر و ایضاحلر یاپارق همّتڭزلە یاردیم ایدییورم. لازم اولان اثرلری، سوزلری، دفترلری بولوب ویرەرك و دگیشدیرەرك خدمت ایدییورم. كچنلردە مطبوع یدنجی شعاعلردن خسرو قرداشمزدن كتیرتمش و اولمایانلرە ویرمشدم. بو سفر اورادن اون بش داها ایستەدم. بونلری دە مراقلیلرینە و یازابیلەجك اولانلرە ویرەجگم. بو كرامتلی آیت الكبرا رسالەسنی هر آرقداش آیری آیری برر دانە یازییور. بیتیرنلری دە شیمدی میوە رسالەسنی

یازمغە باشلادیلر. میوەیی بولامایان یازیجیلر دە، بوش طورمامق ایچون اقتصاد، شكر، خستەلر و اختیارلر رسالەلرینی و باشقە رسالەلری یازییورلر.

یاقین زماندە بو خدمتە كیرن بیلدیگڭز احمدلردن باشقە بر احمد قرداشمز، قیصە بر زماندە هم آیت الكبرا، هم میوە، هم شكر و هم دە اقتصاد رسالەلرینی غایت كوزل اولان كندی ال یازیسیلە یازمش و بیتیرمشدر. رؤیاسندە دخی سزی كوروب قونوشان و حضوریڭزدە قرە صقاللی بر ولی ذاتڭ [لَا یُكَلِّفُ اللّٰهُ] دیمەسیلە و سزڭ آغلامەڭزلە آغلایان و ییمكلر ییین و التفاتڭزە مظهر اولان بو احمدە سویلەدم. بیوك درت دانە دفتر آلاجق. برینە سوزلری، برینە لمعەلری، برینە شعاعلری و برینە دە كاملاً مكتوبلری یازاجق. و كندیسی دە سوز ویردیكە، رسالۀ نورڭ هر نسخەسنی و تمامنی یازاجق. چونكە یازیسی هم كوزل و هم قلمی سریعدر. بر باشقە قرداشمز دە ٦٠-٦٥ یاشلرندە اولدیغی حالدە، یینە كوزل یازیلریلە آیت الكبرا رسالەسنی ایكی دفعە یازمش و بیتیرمش. و شیمدی دە یینە اوچنجی دفعە اولارق عین رسالەیی یازمغە باشلامشدر. كوندوز آقشامە قدر نفقەسنی تدارك ایتمك ایچون یاری رسمی بر دائرەدە اوتوروب یازی یازان بو زواللی اختیار حاجی افندی قرداشمز، كیجە یاریسنە قدر دە كور قندیلی و قورو حصیری اوزرندە هیچ طورمدن ١٠-١٥ صحیفە رسالۀ نوری یازییور. هم عاشق، هم صادق، هم فقیر حالنە صابر و هم دە سز استادیمزە دعاجی و دعالریڭزی اومار و بكلر و

هم هفتەدە بر یدنجی شعاع میدانە كتیریر. و هم یازدقلرینی ترك و تبرّع ایدر. و هركسڭ یازمەسنە چالیشیر بو حاجی ددەنڭ سائر یرلرە دە ان شٓاء اللّٰه بر نمونە و بر اورنك اولمسی بكلنیر.

یدنجی شعاعلردن بریسنی دە مفتی یە ویردم. او دە یازمغە باشلادی. بریسنی بر دگرمنجی یە ویردم، او دە یازییور. هم دە مناوبە اصولیلە، نسخەلر یتمەدیگندن كیجە دگرمنجی، كوندوز بر متقاعد یازییور. حمد اولسون استادم، اویلەلری واركە، قاریسی كتابدن اوقویوب سویلەیور، قوجەسی یازییور. بر چاتی آلتندە هم قاری، هم قوجە و هم دە قاین برادر مناوبە ایلە یازییورلر. هم كیمە ویرمش و سویلەمش ایسەم قبول ایدییور. یالڭز بر آدم یازارم دییە سوز ویردیگی و كتابی آلدیغی حالدە، اهمال ایتمش و یازمامشدی. كتابی دە اعادە ایتمەمشدی. سرمایەسی اولان یوز یگرمی لیرە قیمتندە بولونان قیمتلی و یوزندن اكمك ییدیگی مدار قزانجنی، بریسی كلوب آلارق قاچمش و بولونامامشدر. آرقەسندن كندیسی دە بر چوق مصرفلر ایدرك كونلرجە آرایوب یورولدقدن و امیدینی كسدكدن صوڭرە خائب و خاسر كری دونمش و شاشقین بر حالە دوشمشدر. بو صورتلە اونڭ سیللە و طوقات ییدیگنە شاهد اولدم. كرچە او آڭلامادی، امّا بزە عبرت اولدی. بر قرداشمز دە بر یدنجی شعاعی استانبولە كوتورەرك اسكی حرفلرلە كندی نام و حسابنە برقاچ یوز دانە باصدیرمق و مجّانًا طاغیتارق بو صورتلە خدمت ایتمك تصوّرندە بولونویور.

بوراسی حقّندە [بر مدرسة الزّهرا اولاجق، بیوك بر اسلام كویی، ایكنجی بر اسپارطە اولاجق] دییە یاپدیغڭز دعالرڭ تأثیری كورولمگە و بارگاە احدیتدە مقبولە كچدیگی آرتق سزیلمگە باشلادیكە، هیچ اوقویوب یازمەسنی بیلمەین و الفی بیلە بیلمەین اولابیلدیگی قدر امّی كنچ بر قادین، قوجەسی یازاركن یورولوب قلمی ألندن بیراقوب نفس آلمەیە باشلاینجە، درحال قلمی آلارق و كتابە طالارق اورادە كوردكلرینی عینًا و حرفیًا یازوب قوپیە ایتمسی، حتّی صحیفەلر طولدیرمسی بونڭ یعنی مبارك دعاڭزڭ قبولنڭ بر دلیلی و شاهدیدر. قادین و اركك رسالۀ نوری یازان و اوقویان بتون قرداشلریمز، احمدلر و حسینلر، محرّم و محمّدلر و مفتی و رئیس عادل و بتون عائلە خلقمز و جاریەڭز رفیقۀ عاجزی و فكرت، آیری آیری سلام ایدوب سلامتڭزە دعا ایدرلر. و حرمت و تعظیملرینی عرض ایدرلر و مبارك اللریڭزی اوپرلر. و دعاڭزی رجا ایدرلر.

آیریلماز و صارصیلماز و همّتڭزلە و عون الٰهی ایلە بو یولدە یورومكدن ییلماز و یورولماز اولان بو عاجز و ادنا طلبەڭز دە، سلام، سوكی و صایغیلرینی صونار، اللریڭزی أوپر، سلامتڭزە عاجزانە دعا ایدر و دعاڭزی بكلر استادیمز افندیمز.

بیچارە و عاجز طلبەڭز حسن فیضی

اسكی طلبەلریڭزدن یعقوب بورادەدر. او دە رسالەلری یازمغە باشلادی. سلامنی و حرمتلرینی تقدیم ایدییورم. عاطف دە بورایە كلوب كیدییور افندم.

(بو چالیشقانلردن حسن، ایكی سنەدر كمال صداقتلە بڭا و رسالۀ نورە خدمت ایتمش. حسن فیضینڭ بو دفعەكی مكتوبندە باشندە اوندن بحث ایدییور. اویلە ایسە بو دە لاحقەیە كیرسین.)

(١٣٠)

بِاسْمِهٖ سُبْحَانَهُ

اَلسَّلَامُ عَلَیْكُمْ

بزم كبی میلیونلرجە اهل ضلالتی حق یولنە قویان، حمیّتلی، مرحمتلی، شفقتلی استادیمز افندیمز حضرتلری،

بو دفعە تجارتلە ازمیرە و دونوشدە آیدین و خاص قرداشلریمزڭ مملكتی اولان سلطان حصار و دڭزلی یە اوغرادم. نوردن حصار و نوردن دڭزلی اولان او حوالیلردە نورجیلر و نورانیلر و نور عمّانی اولان چوق محترم و پك صادق غایت چالیشقان اولان قرداشلریمزڭ بعضیلریلە یوز یوزە كوروشمك لَهُ الْحَمْدْ نصیب اولدی. شو عادی، جاهل، عاجز، حقیر، كناهكار بڭا كوستردكلری التفات بنی اوتاندیردی. بویلە یاشامقدن ئولمگە راضی اولدم. فقط (اَلْحَمْدُ لِلّٰهِ هٰذَا مِنْ فَضْلِ رَبّٖی) جناب ربّ العالمینە صدهزار شكرلر اولسونكە، درسڭزی دیڭلەمك و الڭزی اوپمك نصیب اولدی. ایچمدن كلن و بنی هر آن سفالتە سوروكلەمك ایستەین نفسمە "سن ئول، بنم داها تكرار تكرار اوپەجگم ال وار. خدمت ایدەجگم نور داهیسی وار" دییە كندیمی تسلّی ایدەبیلدم.

سایۀ عالیڭزدە طلبەلریڭز قلملرندن خاندانمز و اسملریمزی دوینجە، كورنجە، لایق اولمادیغمز بو شرفی شو عاجز شخصمزە مناسب كورمدیگمز كبی، جواب دە یازمغە جسارت ایدەمییورز. مادام نور داهیسیسڭز، بزلری اقربالغە قبول ایدن بابامزسڭز، مكتوبلرندە بزلری خاطرلە سطرلرە یازانلرە یریمزە سز محترم استادیمز جوابدە بولونمەڭزی رجا ایدر، ال و آیاقلریڭزی اوپەرك ذات نورانیڭز ایچون هانكی وردلری اوقورسەق شفا و مقبول اولاجغنی بیلدیرمەڭزی استرحام ایدرز افندیمز حضرتلری.

پر قصور، چوق كناهكار، چالیشقانلردن حسن كولەڭز

(صبری قرداشمزڭ بو صمیمی مكتوبندەكی غریب و ظریف دعاسنە نورڭ خاص شاكردلرینی شفاعتجی یاپمەسی كوزلدر. لاحقەیە كیرسین.)

(١٣١)

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

عزیز، صدّیق مرشدم افندم حضرتلری،

بنم كبی عاجز و كناهكار كمتر بر مخلوقە كوندرمش اولدیغڭز قیمتلی مكتوبڭزی آلدم. درجەسز ممنون اولدم. جناب اللّٰه، ناصلكە بو دنیادە بو ملعنت

آقینتیسنڭ شرّندن بزلری قورتارمق ایچون سز كبی بیوك بر استادیمزڭ حمایەسنە ویرمشسە، آخرتدە دە یینە جملە رسالۀ نور طلبەلرینی رسالۀ نور حرمتنە، بزی پیغمبر افندیمزڭ لواء الحمد صانجاغی آلتندە و سزڭ حمایەڭز آلتندە بر آرایە جمع أیلەسین. آمین آمین. بِحُرْمَةِ الْقُرْاٰنِ وَاَسْرَارِهٖ وَاَنْوَارِهٖ وَبِحُرْمَةِ سَیِّدِ الْمُرْسَلٖینَ

(وَبِحُرْمَةِ) بیڭ درت یوز سنەدنبری دنیایی ایشیقلاندیران نور قرآنی اورتەدن قالدیرمق مقصدیلە بو عزیز وطنڭ یاورولرینی كفر مطلقە چویرمك ایستەین قراڭلغە قارشو بزلری قورتاروب نور یولنە چویرن رسالۀ نورڭ ایلك تشكیلاتی.. (وَبِحُرْمَةِ) اللّٰه رضاسی ایچون دنیادە بر قرداشلك اخرویەیی تأمین مقصدیلە باشقە بر دنیوی غایەسی اولمایارق (فٖی سَبٖیلِ اللّٰهِ) آلتی آی اسكیشهر حپسخانەسندە یاتانلرڭ.. (وَبِحُرْمَةِ) دڭزلی حپسخانەسندە رسالۀ نور قهرمانی و دڭزلی حپسخانەسنڭ و قبرستاننڭ شهیدی، دنیادە رسالۀ نور اوغرینە جاننی فدا ایدرك و آخرتدە دە رسالۀ نور طلبەلرینڭ درجەلرینی مژدەلەمك ایچون و اونلرە شفاعت ایتمك ایچون رسالۀ نور اوغرینە جاننی فدا ایدن حافظ علینڭؒ (وَبِحُرْمَةِ) دڭزلی حپسخانەسندە و دڭزلی ولایتندە مدرسۀ نوریەیی وجودە كتیرن و بی كناه.. و هیچ بر جرمە مالك اولمدیغی حالدە صرف اللّٰه رضاسی ایچون طقوز آی یاتانلرڭ.. و حسن فیضی كبی رسالۀ نورڭ سرلرینە واقف اولان قرداشمزی قزانانلرڭ.. (وَبِحُرْمَةِ) آیت الكبرایی عصای موسی

نامنی ویرن، ناصلكە عصای موسی، اوّلكی فرعونڭ بتون طلسملرینی و سحرلرینی زیر و زبر ایتمشسە، شیمدیكی فرعونڭ دە بتون دینسزلگنی، مرتدلگنی اویلەجە زیر و زبر ایتمەیە سببیت ویرمك ایچون عصای موسی نڭ مجموعەسنڭ طبع اولمەسندە فوق العادە باشاری كوسترن طلبەلرڭ و باصیلمەسنە سبب اولان طاهری قرداشمزڭ.. (وَبِحُرْمَةِ) استادیمزڭ عاشقی اولان دائما عالمانە رسالۀ نور طلبەلرینی جوش و خروشە كتیرن و دائما لاحقەیە كچن خلیل ابراهیم قرداشمزڭ.. (وَبِحُرْمَةِ) رسالۀ نور تشكیلات اساسیەسندن بو كونە قدر بیوك استادیمزڭ رسالۀ نورڭ دریاسندن فیشقیران فیضنی آلوب بتون طلبەلرە كونی كوننە یتیشدیرن و بو یوزدن بتون طلبەلرڭ داها زیادە نورە چالیشمەسنە سببیت ویرن و جاننی و مالنی و كنچلگنی بو یولدە فدا ایدن عزیز و صدّیق قرداشمز خسروڭ.. (وَبِحُرْمَةِ) رسالۀ نور باشلانغیجندن بوكونە قدر فوق العادە استادیمزڭ خدمتندە بولونان و رسالۀ نور اوغرندە ایكی سفر حپسە كیرن و لاحقۀ نوریەدە اسمی یازیلان عزیز صدّیق قرداشمزدن رأفت و رشدینڭ.. (وَبِحُرْمَةِ) اصلی سینوبلی اولوب تداوی ایچون استانبولە كلوب، استانبول دوقتورلرینڭ توصیەسیلە آیدینە كلن و آیدیندە بر تجّار دكّاننە كیرمسیلە ماصەنڭ اوستندە طوران بر رسالۀ نوری اوقور اوقوماز درحال معنوی قوّتلی بر شفا كورمسیلە، بنم ایچون چارۀ نجات رسالۀ نورە خدمتدر دییەرك درحال اسپارطەیە كیدەرك و بو رسالەلرڭ صاحبی اولان استادیمزی

هیچ كورمدیگی حالدە، اسكیشهر محكمەسی حقّندە غایت معنیدار، غایت قیمتدار بر مدافعەنامە یازان و بوكونە قدر دە بتون حیات دنیویەسنی رسالۀ نور اوغرینە فدا ایدرك اَلْیَوْمْ چالیشمقدە اولان قرداشمز حسن عاطفڭ..

(وَبِحُرْمَةِ) سكز سنە قسطمونیدە استادیمز حضرتلرینە خدمت ایدن قسطمونی طلبەلرینڭ.. (وَبِحُرْمَةِ) اینەبولی قرداشلریمزڭ.. (وَبِحُرْمَةِ) امرطاغندە استادیمزە جاندن یاردیم ایدن وفاكار قرداشلریمزڭ.. (وَبِحُرْمَةِ) داها اسملرینی بیلمدیگمز بتون طلبە قرداشلریمزڭ و بوندن صوڭرە داها نە قدر كلەجك طلبە وارسە، ناصلكە رسالۀ نور صوڭرە چیقاجق اولان مهدئ رسولە باقدیغی سرّینی افشا ایتمش ایسە، شیخ محیی الدّین عربی حضرتلرینڭ بر رسالەسندە، ٣٠٩ دە طوغان چوجقلرڭ مهدئ رسولی كورەجكلرینی خبر ویرییور. ان شٓاء اللّٰه بز رسالۀ نور اوردوسی، بو اوردوی نوریە، صوڭرە كلەجك مهدئ رسولڭ عسكری یز. و اونڭ ایچون فدای جان ایتمەیە حاضرلانییورز. استادم افندم حضرتلری.

بنم كبی تحصیل و تربیەسی هیچ اولمایان سزڭ و رسالۀ نورڭ فیضی سایەسندە بوكون اوقور یازار اولدق. بز عاجزلر بویلە یازیلر ایلە سزی مشغول و راحتسز ایدییورز. بو خصوصدەكی قصوریمزڭ عفوینی دیلرم. بورادە باشدە وهبی خواجە اولمق اوزرە عموم خواجەلر بالمقابلە سلام ایلە عرض حرمت ایدرلر. و بتون طلبەلر ال و آیاقلریڭزدن أوپر، دعاڭزی بكلرز افندم.

چوق كناهكار كولەڭز محمد صبری

(بابا اوغول محمد چالیشقان، كچل كیلانڭ بر كوچوجك فقرەلریدر)

(١٣٢)

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ بِعَدَدِ حُرُوفَاتِ الْقُرْاٰنِ

چوق عزیز، چوق قیمتدار، چوق مبارك، چوق مشفق استادیمز افندیمز حضرتلری،

اوّلا استفسار خاطرلە مبارك ال و آیاقلریڭزدن اوپرز. اون دردنجی عصرڭ امثالسز ظلم و ظلماتنە قارشو چیقان رسالۀ نور و سز سوكیلی استادیمز، بوكون آرتق للّٰە الحمد موفّق اولمشدر. یگرمی سنەدنبری حروف قرآنیەنڭ سونمەسی ایچون اورولان ضربەلر تمامًا عقیم قالمشدر. بوكون آرتق نوریڭز سایەسندە، تكرار قرآن اوقومق ایچون محلّەلردە قادینلر و ارككلر طرفندن اوقوتولمەیە باشلامش، بر چوق قادین اركك، كنچ اختیار، چولوق چوجق واردر. فقط بونڭلە برابر یوركلریمزی یاقان بر شی وارسە، او دە سز سوكیلی استادیمزڭ دار بقایە بزلری بو ظلمتلی دنیادە بیراقوب دە كیتمەڭز اولاجقدر. یینە قلبلریمز آغلایارق حسن فیضی آغابگمزڭ سویلەدیگی شو مصراعلری تكرارلایورز [چكیلوب نور هدایت یینە زندان اولاجق، یینە فرقت، یینە حسرت، یینە خسران اولاجق] بو مصراعڭ معناسنی دوشوندك.

آخر زمانڭ بر رحمةً للعالمینی اولان رسالۀ نورڭ مؤلّفی سز سوكیلی استادیمز دار بقایە تشریف ایتدكدن و نور كونشی چكیلدكدن صوڭرە، بز كبی كورلر ناصل یولمزی كورەجگز دییە خاطریمە كلدی. فقط یینە حسن فیضی افندی قرداشمزڭ "جسد و بدن قینندن چیقان روح قیلینجی بتون قوّتیلە فعّالیتە كچەجكدر" جملەلری بزی براز تسلّی ایدەبیلدی. مبارك استادیمز افندیمز، یینە قلبمز آغلایور. نور چكیلدكدن صوڭرە نە اولور بزم حالمز دییە حزینانە دوشونویورز. بو خصوصدە دعالریڭزی چوق رجا ایدر. و دعا دفترندن سیلینمەمەمزی یوكسك شفقتڭزدن یالواریرز. و یینە خدمت مباركەڭزە جیلانڭ كیتمەسی ایچون لازم كلن معنوی ایشلرڭ كورولمەسنی دیلرز.

چوق قصورلی و عاجز و كناهكار طلبەلریڭز محمد چالیشقان، كچل كیلان (جیلان)

لاحقەیە كچسین (١٣٣)

بِاسْمِهٖ سُبْحَانَهُ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

پك محترم استادم،

آه، مبارك استادم، امرطاغندە ایكی جهان سَرْوری رسول اكرمڭ بر وارثیلە و قرآن عظیمڭ معزّز نوریلە قارشولاشدیغمە خلق ایدیجی رحمانە حسابسز شكرلر اولسون. یالڭز لایق اولان حرمتی ایفا ایدەمدیگمزدن عفویمزی دیلنیركن،

بتون آرقداشلر دە برلكدە بو اوغوردە جانلریمزی قربان ایتمەیە حاضرز. كچندە رؤیادە طوغاجق چوجغڭ آدینی سعید قونمەسنی امر ایتمشسڭز، مساعدەڭز وارمی؟ سٓوء قصدە جرئت كوسترن كروە ناریەنڭ اللّٰه هر بریسنڭ بلاسنی ویرسین. زهرڭ داخل بدن اولدیغنی حسّ ایدنجە عاجزڭ بیلدیگی تدبیر، بر اوقّەیە یاقین طوزلی ایلیق صو.. ویا بش اون عدد یومورطە آقی ایچملی، قوصدیرسین. آرقەسندن یعنی قی ایتدكدن صوڭرە، مسهل ایچون هند یاغی آلملی. كرچە پانزهریڭز ما شٓاء اللّٰه، بارك اللّٰه، بونلرە احتیاج بیراقمییور.

یاقیندن بتون خدمتڭزی یاپمغە و ال و آیاقلریڭزی حرمتلە أوپمەیە مفتون دعاڭزە مشتاق و محتاج عاجز زواللی طلبەڭز امرطاغلی خیری

(١٣٤)

لاحقەیە كیرسین

بِاسْمِهٖ سُبْحَانَهُ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

سوكیلی استادم،

جناب حقّە یوز بیڭلر شكر اولسونكە، هر یردە ناصلكە رسالۀ نور كرامتنی كوسترمش ایسە، بورادە دە بیوك بر جامعڭ هم خطیبی، هم دە امامی اولان حافظ محمد، ایكی سنەدنبری هر هانكی بر ایشتە و یازیدە ألی تیترەیوردی. رسالۀ نوری یازمسیلە ألنڭ تیترەمسی درحال طورمش. أویمزە كلدی. و بزی

مژدەلەدی. و بر دە ملّا فتح اللّٰه قرداشمزڭ یازمش اولدیغی اخلاص رسالەلرندن بریسنی سز استادیمزە تقدیم ایدییورز. قبولنی رجا ایدرز.

ایلغیندە كنچ بریسی اسكی یازی ایلە هیچ علاقەسی یوق، یالڭز ابتدائی تحصیلی كورمش. محمد عبد المتین اسمندە سزڭلە بر سفر اوّلجە كوروشمش اولان نبی اسمندە بر قرداشمز، او كنجی بزە كتیردی. برنجی اولارق بو ایكی قرداشلرە یالڭز رسالۀ نوردن سراج الغافلینی ویردك. بو كنچ عبد المتین اسمندەكی قرداشمز، سراج الغافلیندن یڭی حروفلە برقاچ نسخە یازارق و اونڭ فیضندن طوغان برقاچ سطرلق شعرینی برابر سز استادیمزە كوندریلمەسی ایچون بزە كوندرمش. بز دە بونی سز بیوك استادیمزە كوندرییورز. عبد المتینڭ كنچلك رهبری حقّندەكی شعرینی بورایە یازییورز.

١

سنسڭ بزە بو فانیدە طوغری یولی كوسترن

سنسڭ بتون كنچلرە او الهامی ویرن

سنی اوقویان كیمسەنڭ قلبنە كیرر كرم

سن شفاسڭ دردلرە ای سراج الغافلین.

٢

جهالتدن آیریلمق اونی اوقومق دیمكدر

اوقودقجە اوقومق آیری بر ذوق دیمكدر

سنی اوقویان كیمسە اگری یولدن چوریلیر

طوغری یولڭ اوڭدری ای سراج الغافلین.