[١٤٦]

بِاسْمِهٖ سُبْحَانَهُ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ دَٓائِمًا

عزیز، صدّیق قرداشلرم،

[اوّلا] مدرسۀ نوریەنڭ اسكی معصوملرندن احمدڭ بو كوزل و خالص فقرەسنی، عموم صاوە معصوملرینڭ و قهرمانلرینڭ نامنە لاحقەیە یازدق. ما شٓاء اللّٰه، بارك اللّٰه! مبارك حاجی حافظ محمدڭ تام اوڭا بڭزر بر قیمتلی حفیدی اولدیغنی كوستردی.

[ثانیًا] زغفرانبولیدە نورڭ اهمّیتلی شاكردلرندن حفظینڭ ایكی معصوم مخدوملری بری اون بر، بری دە سكز یاشلرندە، عصای موسی مجموعەسنی یازدقلری و بیتمك اوزرە دییە او معصوملر بڭا بر مكتوب یازمەلری، بنی فوق العادە سویندیردی.

[ثالثًا] بو قیشدە بڭا ویریلن الیم صیقینتیلرڭ بر سببی: سلانیكلیلرڭ استبداد مطلقلری، سربست فرقەلرلە قیریلمەسنە یاردیمم اولماسین دییە بنی هركسدن تجرید ایتدیلر. حالبوكە رسالۀ نور، بیڭلر دیللر ایلە بنم بدلمە قونوشویور، كفری، ارتدادی قیرییور، آنارشیلگی بوزویور. عمومە سلام.

قرداشڭز سعید النّورسی

(١٤٧)

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ بِعَدَدِ حُرُوفِ رِسَالَةِ عَصَا مُوسٰٓی اٰمٖینَ

چوق عزیز، تام صدّیق، حقیقی قرداشلرم،

[اوّلا] سزڭ كوندردیگڭز عصای موسی نسخەلرینی تصحیح ایدركن كوردمكە، پك چوق معنوی باغچەلری ایچنە آلمش بر بیوك و قدسی باغچەدر. هركس هر بر حقیقتنە محتاج اولمازسە دە، هر حالدە هر طائفە اوندن استفادە ایدەبیلیر و حصّە آلیر. صوڭرە تنقید نظریلە باقدم. علمًا و عقلاً و منطقًا بر مدار اعتراض بولمدم. یالڭز بعض مشوّش حالتلردە و عجلەلكلە تألیف ایدیلمەسندن و مستنسخلرڭ سهولرندن كلن بعض قصورلر وار. فقط او قوجە جنّت باغچەسندە او قصورلری عفو ایتدیرەجك چوق پارلاق محاسنی وار. ان شٓاء اللّٰه بو رسالە یازیجیلرینە پك چوق ثوابلری و دائمی حسناتلری اونلرڭ دفتر اعماللرینە یازاجق.

[ثانیًا] علم منطقدە قضیۀ مقبولە، یعنی عوام ناس، معتمد و مقبول ذاتلرڭ بر مسئلەدە قبوللرینی حجّت و برهان یرندە او مسئلەنڭ تصدیقنە كافی كوروب ایمان ایدر. او حالدە او ذاتلرە حسن ظن قیریلمامق لازمدر. امّا رسالۀ نور و بالخاصّە بو رسالە ایسە، منطقڭ اڭ قوّتلی و اڭ یقینی اولان برهانلی و

منطقجە اوّلیات و یقینیات قضیەلرندندركە، مؤلّفنە باقماز. یالڭز حجّتلرینە باقار. اونی سویلەین آدم بوزولسە ویا چوروتولسە و نە اولسە اولسون هیچ ضرر ویرمز. و بو حقیقتە بناءًدركە، بو اهمّیتسز و چوق قصورلی شخصمی دوشمانلر طرفندن چوروتولمسی و بنم دە بلا پروا شخصًا عادیلگمی و قصورلریمی اعتراف ایتمكلە، رسالۀ نورڭ یوكسك قیمتنە بر ضرر ویرمییور.

[ثالثًا] رسالۀ نور باشقە كتابلرە بڭزەمز. كلمەلرندە، حتّی بعضًا حرفلر و نقطەلرندە اهمّیتلی مسئلەلر بولونور. بر حرفڭ ویا بر نقطەنڭ یاڭلیشیلە بوزولور، مسئلە دگیشیر. بونڭ ایچون تصحیحە چوق دقّت لازمدر. بلكە كتابت قدر مهمدر. بن چوق ضعیف دوشدیگمدن یورولویورم. بنم بدلمە، یازان ذات بر دفعە كوزلجە مقابلە ایتسین، صوڭرە بڭا كوندرسین.

قرداشلریمڭ خاص قسمی چوغی عربی بیلمدیگندن، هم تلفّظجە بعضًا [ح خ] اوقونمەسندن حركەلردە و [ح خ] یازیلمەسندن بن زحمت چكییورم. مثلا بر تك نسخەدە قرق دفعە محتاج ویا احتیاج احتیاط، (مختاج و اختیاج و اختیاط) یازیلمش. ح خ اولمش. عصای موسی نڭ آخرندەكی عربینڭ آخر صحیفەسندە (بِاَنَّا نَشْهَدُ بِاَنَّ مُحَمَّدًا عَبْدُكَ وَنَبِیُّكَ) دن تا (حَبٖیبُكَ وَرَسُولُكَ) یە قدر یگرمی صفتلر ضمّە ایستر. حالبوكە كسرە یازیلمش. و بو كوچوجك قصور ایلە برابر، حقیقتًا بو نور یازیجیلری پك خارقە بر شوقلە و دقّتلە اسكی زمان قهرمان مجاهدلرە اوموز اوموزە و قلملری او مجاهدلرڭ قیلیچلرینە مساوی كلەجك

بر فداكارلق كوسترییورلر، صارصیلمییورلر. جناب ارحم الرّاحمین اونلرڭ صحیفۀ حسناتلرینە یازدقلری هر بر حرف نورینڭ بدلنە بیڭ حسنە یازدیرسین. آمین.

[رابعًا] بزی تحمّل فوقندە صیقان استبداد مطلق، شیمدی خارجی تأثیریلە آیریلمش، ایكی پارچە اولمش كبیدر. نورجیلردن هم قورقویورلر، بهانەلر آرایورلر. هم یاردیمنی قزانمق فكریلە بلكە اوخشایاجقلر. فقط بز دنیایە سیاستە باقمدیغمزدن یالڭز هانكی پارچە شعائر اسلامیەنڭ تعمیرینە و دهشتلی بدعەلرڭ تخفیفنە و نورلرڭ طبعنە چالیشسە، البتە نورجیلر ایمان و قرآن خدمتی جهتیلە اوڭا یاردیمجی اولاجق. بورادە خطیئٓات نتیجەسندە بركت قالقمەسیلە چوق بیچارەلر آچ اكمكسز قالوب كیزلی بر قومیتە، بر اجنبی حسابنە اونلری بر جهتدە استعمال ایتمەلری احتمالی واركە، بورادە یوزر قادین چوجقلر طوپلامە صورتندە اكمك ایچون مصرّانە حكومتە مراجعت ایتدكلرندن آڭلادم. اونڭ ایچون تمكینلی و احتیاطلی بولونمق كركدر.

[خامسًا] احمد نظیفڭ آرقداشلرینڭ یازدقلری عصای موسی نسخەلرینی كوزلجە تصحیحدن صوڭرە سزە و سز دخی بڭا كوندریڭز. اونڭ حرارتلی و صمیمی مكتوبنڭ چیزكیلر ایچندەكی قسمنی لاحقەیە كچیردك و سزە دە كوندرییورز. عمومڭزە سلام و دعا

اَلْبَاقٖی هُوَ الْبَاقٖی

قرداشڭز سعید النّورسی

احمد نظیفڭ مكتوبیدر.

(١٤٨)

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ بِعَدَدِ حُرُوفَاتِ رِسَالَةِ النُّورِ وَعَصَا مُوسٰی

ای صبر و تحمّلدە بی مثال، شفقت و مرحمتدە یكتا، بتون عمر و حیاتنی خدمت قرآنە حصر ایتمكلە مورثلرینڭ حقیقی وارثی اولدیغنی اوننجی دفعە اولارق زهرلنمكلە فتورسز قهرمانانە اثبات ایدن بیوك استاد! بو قدسی غایە اوغرندەكی صوڭ قضاڭزڭ مبارك و ان شٓاء اللّٰه صوڭنجیسی اولمەسنی و آرتق هر نوع تجربەلرینڭ حیلە و خدعە و دسیسەلرینڭ فائدەسزلگنی آڭلایان منافق ملعونلرڭ یا اصلاح ویا هلاكنی قهّار، جبّار اولان قادر مطلق حضرتلرندن نیاز ایدییورز.

اشتیاقلە حسرتنی چكدیگم سوكیلی استادم، وصیتنامەنڭ تولید ایتدیگی تأثّر و آجیلریلە سٓوء قصدلرڭ توالیسی الم و كدرلریلە متألّم و كدرلی ایكن، یاپدقلری هر تورلی ظلم و ملعنتلری مملكتڭ هر طرفندە پردە آلتندە یاپیلمقدە و بو حوالیدە دە فعّالیتلری كورولمكدەدر. آلدیریش ایدیلمەمكلە برابر، ایكی قرداشمزلە بر آرایە كلمك امكاننی بیراقمامقدەدرلر.

زمانڭ شو ظلمتلی دورندە بر مثلی داها آغیر ظلملرینی استادیمزڭ اوموزلرینە یوكلتمەلرینە تحمّلمز قالمییور. فقط نە چارە (چارەسز دردلرە دوشدم، لقمان بی خبر ) ایشتە شو حاللر قارشوسندە استادیمزڭ یاردیمنە مادّةً قوشمق ولوكە سوزلە اولسون یارەسنە مرهم اولمق چارەسنی آنجق (یَا صَبُورُ) دە كورمكدەیز. و بو مدهش اضطرابڭ پنچەسی آلتندە ازیلمكدەیز. بوڭا بر چارە وار، آرایورز، آرایورز، امّا بولامییورز. چالیشییورز، هم درت ال، درت دیل، سكز كوزلە آرایورز، چالیشییورز. ان شٓاء اللّٰه جناب حق لطف و كرمندن احسان ایدنجەیە قدر بو اینجە خستەلغڭ تداویسنە [صبر و تحمّلی] علاج و تریاق یاپمقدن و اوصانمامقدن شیمدیلك باشقە چارەمز اولمدیغنی آڭلایورم. [یالڭز بر امیدیمز واردر، ان شٓاء اللّٰه موفّق اولورز. دعاڭزلە انتشارە چیقاریلان عصای موسی مجموعەسی و معجزات احمدیەؐ رسالەسی یاقیندە ان شٓاء اللّٰه عنایت و كرم الٰهی ایلە آیت الكبرانڭ قزاندیغی ظفردن داها بیوك ظفر معنوی یە مظهر ایدەجگنە ایمان ایتمكدەیم. او مبارك عصای موسی علیە السّلامڭ كوستردیگی او بیوك ظفری استادیمز افندیمزە دە احسان بویورمەسنی، بر هفتەدنبری كیجە كوندوز جناب حقدن دعا و نیاز ایدییورم. سز استادیمڭ دە بو قدسی خدمت اوغرندە سلامت و موفّقیت و ان شٓاء اللّٰه انجیل شریفڭ قرآن عظیم الشّانە دخالت و اتّفاقنە بیوك بر وسیلە اولمەسنی مستجاب دعالریڭزی دیلەیورم

وَمِنَ اللّٰهِ التَّوْفٖیقُ

عزیز و چوق قیمتلی استادم، برادرزادەڭز استانبولدەدر. صالح افندی یی كورەجك. بالاستشارە، بلكە نامڭزە آنقرەیە بر استدعا ویرەجكلر. نقل مسئلەسنە دە چالیشاجق. فقط قیمتلی استادم، هر یر قراڭلق ان شٓاء اللّٰه بو ظلمتی آرتق عصای موسی نڭ پارچەلامەسنی تمنّی و نیاز ایدەلم ان شٓاء اللّٰه. ای شفقتلی استادم، سزڭ او مبارك پیر فانی وجودیڭزی اورتەدن قالدیرمق ایستەین احمق، شاشقین دینسزلركە، افناسنی ایستەمكلە میدانی بوش بولاجغزمی ظن ایدییورلر؟ هیهات! بهی آبداللر! كندیڭزە داها فضلە فنالق یاپییورسڭز. الڭز ایلە باشڭزە بیڭ تورلی بلایی كچیرییورسڭز. بهی ملعونلر! سعیدڭ ئولومی دیریسندن پك فضلە باشڭزە بلادر. هم فكر ملعنتڭزلە او قدسی و مبارك و یگانە و دنیاجە طانینمش اولان بدیع الزّمانڭ یڭیدن بتون دنیایە قدسیتنی، حسب و نسبنی، خدمت و قدسی وظیفەسنی جهانە اعلان ایتمش اولویورسڭز. بو ملعنتڭز سزڭ علیهڭزدەدر. لهڭزە اولان آنجق [او مباركی] تلطیف ایتمكلە، تقدیر ایتمكلە، ترضیە ویرمكلە، امرینی طوتمق شویلە طورسون، بلكە اوڭا قاریشمامقلە اولور.

اَلْبَاقٖی هُوَ الْبَاقٖی

كناهكار، قصیر الفكر، چوق قصورلی و دائما اصلاح و دعاڭزە محتاج طلبە و خدمتكاریڭز احمد نظیف چلبی

(١٤٩)

بِاسْمِهٖ سُبْحَانَهُ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

عزیز، صدّیق قرداشلرم،

[اوّلا] بو یڭی قرداشمز یشیل صالح، هم اختیار، هم خستە اولمەسندن رسالۀ نورە صمیمی بر شاكرد اولابیلیر. بنم بدلمە سز اوڭا یازیڭزكە، سنڭ بو خالص علاقەدارلغڭ ایچون، سعید سنی عموم معنوی قزانجنە خاص نور شاكردلری ایچندە هر كون متعدّد دفعە حصّەدار ایدییور. و تشكّر و سلاملریمی تبلیغ ایدیڭز. و داخلیە وكیلنە یازدیغی مكتوبڭ دنیاجە اهمّیتسز اولان استراحتم جهتندە دگل، بلكە یالڭز نورلرڭ انتشارینە و سربستیتنە خدمت نقطەسندە سز نە لازمسە دوشونورسڭز، یاپارسڭز.

[ثانیًا] ایكنجی وظیفۀ نوریەیە باشلایانلر، ایكی ذیللی معجزاتلرڭ آخرلرندە اوننجی سوزی ذیلی ایلە برابر یازسینلر. ان شٓاء اللّٰه بو ایكنجی وظیفۀ قدسیە معجزانە فتوحات یاپاجق.

[ثالثًا] بڭا كوندردیگڭز عصای موسی دن بر نسخە جلدسز، یالڭز صاری كاغد جلد اولمش. خسروڭ یازیسنە بر پارچە بڭزر، فقط اوستندە (مصطفی) اسمی وار. او كیمدر؟ هانكی مصطفیدر؟ هم نسخەنڭ اوستندە اون اوچ یاشندە خدیجە، احمدڭ قیزی یازیلمش. بو احمد هانكی احمددر؟ هم اوڭا، هم قیزینە بیڭ بارك اللّٰه! بو یاشدە بو قوجە كتابی، هم دقّتلی، توافقلی،

هم كوزل صحّتلی یازمق، معصوملر طائفەسنڭ بر قهرمانلغیدر. كیم كورویور، ما شٓاء اللّٰه دیر. بورادەكی مكتب كورمش خانملردە بر شوق اویاندیراجق.

قرداشڭز سعید النّورسی

[١٥٠]

صالح یشیل اوغلینڭ مكتوبیدر.

اَلسَّلَامُ عَلَیْكُمْ

یا حضرت انسان معنا!

قرق كوندر یاتاقدە سزڭلە مشغولم. خیال و مسموعمە نظرًا، حضوریڭزڭ مختل اولدیغنە ذاهبم. (اَلْمُؤْمِنُ بَلَوِیٌّ) تخمینًا اون كون قدر اوّلیسی، صوقاقلردە "خالص آفیون ترەیاغم وار" دیین بریسنی پنجرەدن یانمە چاغیروب براز یاغ آلدم. مقصدم، سزی صورمقدی. آفیوندن امرطاغی قضاسنە سورولدیگڭزی، اهالینڭ سزڭلە كوروشمەسنڭ یاساق اولدیغنی دوینجە، چوق متأثّر اولدم.

محترم دین قرداشم، بو مكتوبی سزە یازان، اوتوز بر سنە اوّلیسی سزڭلە ارضرومڭ اسعد پاشا مدرسەسندە، عمومی حربدە، قفقاسڭ قارلی طاغلرندە و یگرمی درت سنە اوّل دە مبعوثلغم هنگامندە، وان والیسی حیدر بگ دوستڭزلە ملّت مجلسی صالونندە كوروشن، ارضرومڭ اسبق مبعوثلرندن یشیل اوغلی محمد صالحدر.

عزیز استاد، فقیریڭز دە شیمدی سزڭ كبی یتمشی بولمش. بر بوچوق سنە مقدّم بر خستەلق سببیلە باجاغی كسیلوب، جسمًا ئولمش بر شخصم. صحّتم، قدرتم اولایدی، زیارتڭزە كلیر، خاطریڭزی صورار، تاریخجی، حال تراجمی یازیجیسی اولدیغم ایچون بڭا پك لازم اولان "طوغوم، تحصیل و سركذشتڭزی" آغزیڭزدن دیڭلەمك ایستردم. عمرلر یار، احوال مساعدە ایدرسە، ایلریدە ان شٓاء اللّٰه بونلری مكتوبلە سزدن صورمق نیّتندەیم. بو آندە آنجق سزڭ حیات و حضوریڭزڭ خللدن محافظەسی ایچون صورتی ملفوف مكتوبلە داخلیە وكیلی بگ افندی یە مراجعتلە سزی حمایە و حیاتڭزی قورومق رجاسندە بولوناجغم. عنایت حضرت اللّٰهدن.

یا مولانا، اقامتگاهڭزی بیلەمەمكلە برابر، سزە یازیلان مكتوبلر اوّلا ادارە آمرلری طرفندن اصولاً اوقوناجغنی بیلدیگم ایچون، بو مكتوبی و داخلیە وكیلی بگ افندی یە یازدیغم استرحامنامە صورتنی قضاڭزڭ اڭ بیوك آمری وساطتیلە سزە كوندرییورم.

ناموسلی انسانلرڭ ضرورت اولمادن قپالی ایشی اولماز. مجبور اولمادن كیزلی ایش طوتان، كیزلی قونوشان انسانلردە خیر بولونماز. بونڭلە برابر ژورنالجیلر مستثنا، ادارە آمرلری چوقلری معذور و بر قسمی ناموسلی، وجدانلی، مرحمتلی انسانلردر. البتە بو مكتوبە وساطت بویوران ذات، بو مكتوبلرڭ ادارةً

صورتلرینی آلوب، اصللرینی قانون و انسانیّت نامنە سزە ویرمەدە قصور ایتمزلر. اَلْبَاقٖی هُوَ اللّٰهُ٭ [لَا حَوْلَ وَلَا قُوَّةَ اِلَّا بِاللّٰهِ]

فاتح صوفیلر، قرە قاضی صوقاق، نومرە بشدە ارضرومڭ اسبق مبعوثلرندن م. صالح یشیل اوغلی

مكتوبمی آلدیغڭە دائر قیصە بر مكتوبلە صحّتڭی یینە قائممقام بگ دلالتیلە یازارسەڭ ممنون اولورم.

[١٥١]

(داخلیە وكیلی حلمی اوران بگە یازیلان مكتوبڭ صورتی)

[یازیلری یاڭلیش تلقّی و تفسیرلرە اوغراتیلمقلە، سنەلردنبری چنبر ایچندە یاشاتیلان و صافی، صمیمی بر انسان و مسلمانلقدن باشقە هیچ بر كناهی بولونمایان بدیع الزمان ملّا سعید نام معصومڭ، یا بولوندیغی یردە ویاخود آنقرەیە نقل ایلە اورادە حیات و حضورینڭ محافظەسی ایچون صرف انسانیّت نامنە یازیلمش اولان بو محرم رجانامەیی بالذّات اوقومق نزاكتندە بولونور و كنچ زمانندە یاپدیغی، اونوتولان خدمتلرینە مكافاتًا اختیار حالندە بو آدمی سربست بر ئولوم حیاتنە قاووشدیرمق لطفنی دریغ بویورمازسەڭز، ذات كرمكاریلرینە اڭ بیوك حرمتلریمی صونار، منّتداریڭز اولورم.]

ملّا سعید كیمدر؟

ألآن آفیونڭ امرطاغی قضاسندە اقامتە مأمور اولان ملّا سعید، طوغومندن اعتبارًا تورك قرداشلری آراسندە یاشامش، تورك سجیەسیلە پروردە اولمش، عمومی حربدە قفقاسڭ قارلی طاغلرندە قهرمان عسكرلریمز آراسندە، كوڭللی آلای قوماندانی اولارق مجاهدە و ارشاد ایچون طولاشوب بیوك بر حرب مادالیەسی آلمش، صاری قامیش تعرّضندە، بتلیسڭ سقوطندە یارەلی اولدیغی حالدە اسیر اولوب، سنەلرجە روس غارنیزونلرندە چلە چكمش، متاركەیی متعاقبًا فرار ایدوب استانبولە كلەرك، علمی قدرتنە بناءً دار الحكمة الاسلامیە اعضالغندە بولونمش، قوای ملّیە احداثندە خلقی مجاهدەیە تشویق ایتمش، بیوك ملّت مجلسنڭ ایلك سنەسندە آنقرەیە كلەرك حاجی بایرام مسافرخانەسندە بر چوق متردّد كیمسەلرە وطنڭ مدافعەسی لزومنی آڭلاتمق خدمتندە بولونمش اولان، بو حقیقی وطنپرور انسانڭ، اوّلجە عبادتە، ایمانە، اعتقادە متعلّق یازدیغی و یازاكلمكدە اولدیغی اثرلری، دین و دیندارلری سومەین بعض كیمسەلرڭ، خصوصیلە داخلیە وكالتندە بولونمش اولان منفعتپرست شكری قیانڭ مذهب و رژیمنە اویغون كلمەمكلە، اصلسز اسناد و اویدیرمە راپورلرلە بو زواللی آدم، یگرمی كسور سنەدنبری حپس و نفی جزالریلە پریشان ایدیلمش و ایكی سنە اوّلیسی یینە او یازیلری بهانەسیلە قسطمونیدەكی چلەخانەسندن قوللرینە كلبچە اورولارق

كندیسنە سلام ویرمش اولان آلتمش آلتی آدملە دڭزلی جزا أوینە سوق و اون بر آی قدر حپس ایدیلدكدن صوڭرە، مضر تلقّی ایدیلن او اثرلری، اوّلا استانبول مفتیلگندە بر هیئت طرفندن، بلآخرە آنقرەدە دیانت ریاستی و دیل تاریخ انستیتوسی مدیر و اعضالرندن مركّب بر قومیسیون معرفتیلە آیلرجە تدقیق اولوندقدن صوڭرە، بو اثرلرڭ هیچ بریسندە دولتڭ سیاستنی و آسایشی رنجیدە ایدەبیلەجك اڭ اوفاجق بر شی كورولمەمكلە، ملّا سعید و نور شاكردلری و اثرلرینی اوقویانلر، محكمە قراریلە سربست بیراقیلمش و دڭزلیدە اوتورمەسنە مساعدە اولونمش ایكن، مع الاسف بو اختیار آدم، آز زمان صوڭرە دڭزلیدن آفیونە و اورادن دە امرطاغی قضاسنە تبعید و هر هانكی بر تورك قرداشیلە دخی تماسدن منع ایدیلمش.

صایین بگم! جمهوریت سربستیتندن، تشكیلات اساسیّە قانوننڭ حرّیتندن محروم قالان بو زواللی اختیار آدم، هر صورتلە حمایەیە لایق، باقیلمەیە محتاج، اقربا و تعلّقاتی اولمایوب صرف بر اسلام حكومتنڭ حمایەسنە محتاج بر اسلام متفكّریدر. شاعر مشهور عاكف بگ مرحومڭ روایتنە نظرًا، مصرڭ اڭ معروف علماسندن اولان و غربڭ متعدّد لسان و فلسفەسنە آشنا بولونان استاد اعظم عبد العزیز چاویشڭ یگرمی كسور سنە اوّلیسی الاهرام جریدەسندەكی سعید حقّندە یازدیغی فطین العصر باشلقلی مقالەسنی اوقویان و كندیسیلە

بالذّات كوروشن علم آدملری، بو ذاتڭ فطرتًا علمی قدرتنی و الٰهی مسلگنی تقدیر ایدەبیلیرلر.

صایین بگم! كردلك سوزیلە بیڭ تورلی حقارتە هدف اولان ملّا سعید، سجیّةً تقدیرە شایان بر تورك عاشقی و اسلامیت خادمیدر. [حاشیە] بوندن مملكتمز اجتماعًا ضرر دگل، معنًا فائدە كورەجكدر. بن ناموس و شرفم نامنە شهادت ایدرمكە، ملّا سعید، قطعیًّا تمیز بر آدمدر. آنڭچون، سزڭ كبی ملّتڭ داخلاً ادارە و مقدّراتنە ال قویان درایتلی ذاتلردن انسانیّت نامنە تمنّیاتم شودر: یاڭلیش آڭلاییشلی ژورنالجیلرڭ سوزلریلە، حرّیت نعمتندن، صاف هوا تنفّسندن، هر هانكی بر تورك قرداشیلە كوروشمدن محروم قالان بو آدمی، حكومتڭ عدالتی، مقامڭزڭ اهمّیتی نامنە و عدل و احسان قضیەسنە توفیقًا، بو آدم حقّندە دخی عدالت ابراز و كندیسیلە دە هیچ اولمازسە بر دفعە اولسون حسن نیّتلە كوروشدكدن صوڭرە، آنڭ حقّندە ابقا ویا افنا قرارینی ویرمك لطفندە بولونورسەڭز، البتە اهمّیتلی وظیفەڭزی قانون دائرەسندە ایفا ایتمش اولاجغڭزدن طولایی تاریخچۀ حیاتڭزە تقدیرە دگر بر فصل درج بویورمش،