[١٠١]

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

چوق عزیز، چوق صدّیق و صادق قرداشلرم و رسالۀ نور جهتندە امین و خالص وارثلرم،

چوق معنیدار و قوّتلی بر توافق و شاكردلرڭ صداقتلرینە دلیل، بر ظاهر كرامت نوریەیی بیان ایتمەمە بر اخطار آلدم. شویلەكە:

بن وصیتنامەمی یازدیغم عین زماندە، كیزلی منافقلر بنم اعتماد ایتدیگم خدمتجیلریمی ضابطە طرفندن یانمە كلمكدن منع ایتدكلری عین وقتدە، فرصت بولوب طانیمادیغم بریسیلە سابق طقوز دفعەدن داها تأثیرلی بر زهری بڭا یوتدیردیلر.

هم عین زماندە تونسلی و عالم قرداشلریمزدن كچن سنە بورایە قدر بنی كورمك ایچون كلوب كوروشمدن كیدن خواجە حشمت، یوزغاتدن بورایە یازییوركە: "سعید وفات ایتمش. رسالۀ نورڭ یوز اوتوز رسالەسی محافظە ایدیلسین، تاكە ایلریدە طبع ایدەجگز."

هم عین زماندە خلیل ابراهیمڭ وفاتم حقّندە بر حزین مرثیە حكمندەكی پارلاق مكتوبی شاكردلری آغلاتدیردی. هم بو زمانە پك چوق یاقین خسروڭ كندی عادتنە مخالف، بنم وفاتمە دائر بر ایكی مكتوبندە ایكی اوچ كون عمر كبی

تعبیرلرلە اجلمە اشارتلری، بر پارچە بنی متأثّر ایتدی. "عجبا بن كیدییورمی یم؟" دییە اندیشە ایتدم. هم عین بو هنگاملردە اڭ زیادە حیات دنیویەدەكی وظیفەمی دوشونوب، "وفاتمدن صوڭرە شاكردلر بو دهشتلی زماندە بنم بدلمە دە او وظیفەیی یاپاجقلرمی؟" دییە چوق مراق ایدركن.. بردن دڭزلی، میلاس، اسپارطە، اینەبولی امیدیمڭ یوز درجە فوقندە اویلە صحابتكارانە و التزام پرورانە او وظیفەیە قوشوب، باشقەلرینی دە و معلّم و عالملری دە قوشدیردیلركە، بنی حیرتلر ایچریسندە بیراقدیلر. الحاصل، بو بش جهتدەكی توافق، ظاهر بر كرامت نوریەدر. (اَلْحَمْدُ لِلّٰهِ هٰذَا مِنْ فَضْلِ رَبّٖی)

قرداشلرم، مراق ایتمەییڭز. جوشن و اوراد بهائیە، بو دفعە دخی او دهشتلی زهرڭ تهلكەسنە غلبە ایتدی. تهلكە دورەسی كچدی، فقط خستەلق دوام ایدییور. عموم قرداشلریمە برر برر سلام و سلامتلرینە دعا ایدوب، شبهەسز مقبول اولان دعالرینی ایسترم. و اینەبولیدە و جوارندە چوق خانملرڭ، هم كوچك یاورولرینڭ رسالۀ نوری یازمغە باشلامەلرینی و قرآن درسنی چوق معصوملرڭ آلمەسنی بتون روح و جانمزلە تبریك ایدییورز.

اَلْبَاقٖی هُوَ الْبَاقٖی

دعاڭزە محتاج قرداشڭز سعید النّورسی

(١٠٢)

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

عزیز قرداشلرم،

اینەبولی صمیمی قرداشلریمز عموملری نامنە یازدقلری بو مكتوبی لاحقەیە كچیردك. سز دخی بو صارصیلماز صداقت سندینی لاحقەڭزە یازیڭز. كرچە مسلگمە مخالف و حدّیمڭ چوق فوقندە تعبیرات وار. مادام رسالۀ نورڭ خارقە قوّتنە و حقّانیتنە بر طرز حجّت و بر سبب قناعت اولویور. بن كندی ضرریمە راضی اولوب او تعبیراتە چوق ایلیشمدم

سعید النّورسی

اینەبولی عموم طلبەلرڭ مكتوبیدر

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

ای رسالۀ نورلە ایمانلری قورتاران خلاصكار استاد! ای عالملرە رحمت حجّت قرآن، خلاصة الخلاصە نور نبوّت، جانمز، استادیمز افندیمز حضرتلری!

چوق معنیدار و عجیب! استادیمز، كوز ببگمزە و رسالۀ نور طلبەلرینە ضلالتڭ احمقجە ایلیشمە نیتلرینە بر اخطار طوقادی و رسالۀ نور و آیت الكبرانڭ كرامتیلە سونن بر یانغیندن بزە خبر ویردیڭز. سوكیلی استادیمزە و چالیشقانلرە و

یاردیم ایدن دیگر نور یولجیلرینە كچمش اولسون. و جملەڭزدن اللّٰه راضی اولسون. خدمت قرآنیەدە اسپارطەدەكی قرداشلریمز كبی او قرداشلریمزڭ دە امّت محمّدیەنڭ افتخاری اولاجقلرینە اینانییورز. بالخاصّە رسالۀ نورلە تام قایناشمش اولان چالیشقان خاندانی، ابدی منّتلریمزی كندیلرینە چكییور. ان شٓاء اللّٰه سعادت ابدیەدە دە بو غبطەیە دگر موقعندە كورونمگە موفّق اولور. جدًّا كوڭللریمزدە یر بیراقان چالیشقانلرە و نور قرداشلریمزە صوڭسز سلام و دعالریمزی كوندرییورز، چوق سوكیلی مبارك استادیمز.

اسپارطە قهرمان و فداكارلری محترم قرداشلریمزڭ وظیفۀ ایمانیەمزدن اولان عصای موسی مجموعەسنە باشلامەلری كبی، نور سانترالجیسنڭ الكتریگی آڭدیرر قوّتیلە هر زمانكی كبی اوچوردیغی اشارت نوریە دلالتیلە ایچدن كلن بر سرور و هیجانلە رسالۀ نورڭ ویردیگی بر ایمان و اذعان و صارصیلماز بر شوق غیرتلە و بر چوق معنوی ایقاظ ایدیجی امارەلرڭ دە لطف بویورولمسی ایلە، نە قدر خوش و شیرین بر ذوقلە لطف باری ایلە للّٰە الحمد بورادە دە جملةً عصای موسی یە باشلادق. و خیلی دە ایلرلەدك. ان شٓاء اللّٰه بو مساعینڭ آثار فعلیەسنی یاقیندە عرض و تقدیم ایدرز. حدسز شكرلر اولسونكە، نور احمدیؐ بو مقدّس حسناتی باصیمڭ كری قالمەسیلە بزلرە دە صوندی. هم جملەمزی یڭیدن غیرتە كتیردی. رسالۀ نورە منّت و تحدیث نعمت مقصدیلە یوقاریدە عرض ایدیلن امارەلرڭ لا علی التّعیین برقاچنی ذكر ایتمدن كچەمییورز.

رسالۀ نورە یڭی طلبە اولمش، بوندن طولایی یازیسی پك عجمی اولان بر كنچ قرداشمز، دوام ایتدیگی استنساخی بیراقارق عصای موسی یە باشلامەیی تصوّر ایتمش. فقط عجمی یازی ایلە باشقەلرینڭ اوقویامایاجغنی دە ملاحظە ایدرك تردّد ایچندە ایكن، رؤیاسندە سز سوكیلی استادیمزی كورویور. "یاز!" بویورویورسڭز، او دە یازییور. حضور استاددە یازییور، یازییور. بر یازی دریاسی ایچندە قالییور. یینە كندیسی رؤیا ایلە اویانیقلق كبی بر حالدە، بر چوق كیمیاكر كبی كیمسەلر عقلە موافق اولمایان بر حاضرلق و فعّالیت كوسترییورلر. مراقلە صورویور. دییورلركە: "بو اویلە بر مؤثّر عصای موسی دركە، آطوم بومبەسنڭ یوز مثلی فضلە دنیایی تسخیر و اصلاح ایدەجك!" الٰهی یا رب! بو نە بیوك بر حقیقت!

عصای موسی نڭ یازیلمەسنی و تعریفنی بیلدیرن امر استادنامەلری حاوی مجموعە و خلاصة الخلاصەیی صالح قرداشمز كوگسنە یرلشدیرەرك دیگر بر قرداشە كتیرمسی اثناسندە و بر جمعە وقتندە و جامع یاقینندە بر سرچە قوشنڭ نرەدن كلدیگی بللی اولمادن یوزینە یاقلاشوب، متعدّدًا قنادلرینی سورەرك عادتا اوخشامەسی و كوگسنڭ اوستندە برقاچ دائرە چویروب و أوپر كبی یاپارق آیریلوب یرلرە سورونور كبی جامعە طوغری كیتمەسی و بو اثنادە اورادە آوجیلغی ایلە مشهور بر كدینڭ بو مبارك قوشە برقاچ دفعە آتلایوب طوتدی ظن ایدیلدكجە، پك غریب اولارق طوتولمامسی،

رسالۀ نورڭ پك یاقینمزدە ایكن پارلایان شعاعلرینە هدف اولمش كویلریمزدن بریسندە، چالیشقان كنچ بر طلبەڭز. بو قرداشمز سنەلردنبری، مذكور كویندە مسلگی اولان خطیبلگی و امامتیلە رسالۀ نوری هر شیئە رغمًا نشرە دوام ایتمش. اویلە زمانلر اولمشكە، بلكە برقاچ كیمسە مستثنا، كویلی بتون دوشمان كسیلمش. فقط همّت نور اورادە دە تجلّی ایدییور. مالاً زنكین اولان بو انسانلر، بوندن اوّل میخانەلری طولدیرركن، نورڭ فیضی ایلە شیمدی جامعی طولدیرییور. و اڭ عنادجی مخالفلری دە یولە كلەرك آلتمش یتمش معصوم چوجقلرڭ علم حال نوردن و قرآن اوگرنمەسی نتیجەسیلە برابر، بوكون بو مدرسۀ نوریەدە یتیشمكدە اولان نور فیدانجقلری سوزلری یازارق تحصیلە و خواجەلرینڭ تصحیحلرینە دە یاردیمە قوشویورلر. بیوكلری دە شوقە كتیرییورلر. ای یوجە استاد نور! رسالۀ نورڭ معنوی هوایە حاكم بولونمەسندن اولدیغنی كور و نانكور كوزلرە كونش كبی كوسترییور. رسالۀ نور نیجە خراب شهرلری كل كُلستان، نیجە سونمش اوجاقلری شنلندیرمش، نیجە رهبرسز، حامیسز قالمش، نور آرایان بیچارەلری منزل مقصودە ایریشدیرمش اولدیغنی عنادسز و انصافلە باقان هر عقل قبول و تصدیق ایتمەمك ممكنمی اولور؟

مثلا استانبولدە علما ایلە بر مسئلە موضوعنە سبب اولان و بو وسیلە ایلە مهمجە بر قسمی شركت معنویۀ نوریەدن تعیینلری كسیلن، جواریمز ساحل كویلرندە بریسندە او زمان ایكی اوچ آرقداشیلە قالان مبارك زكریا سائر یرلرە

نسبتلە داها چوق مدنی خلقی ایچندە بلا فتور وظیفەسنە دوام ایدركن، لحكمةٍ بر سائقۀ ربّانیە ایلە امامسز قالان جامعلرینڭ قاپانمامسی ایچون، مخالفلری آراسندە یگانە چارە اولارق مبارك زكریا بولونمش. بونڭلە برابر اللی آلتمش معصوم یاورولرڭ دە قرآن و ایماننە كیجە كوندوز چالیشارق او محیطدە نورڭ كوزلری قاماشدیران علویتنی تبارز ایتدیرمكدە دوشمانلرینی صوصدیروب تسلیمە مجبور ایتمش.

ایشتە داها مملكتمزدە شو صوڭ زمانلردە ظهور ایدن بو حاللردن دوست و دوشمانڭ دە تصدیقی و حیرتی آلتندە اینەبولی و جواری كویلرندن بتون چوجقلرڭ قرآن كریم تعلیمنە عادتا سفربر ایدیلمشجەسنە رغبتی و بونلرڭ معلّملك وظیفەسی دە مهم بر اكثریتی رسالۀ نور طلبەلرینە بر سائقۀ نور كرامتلە توجیه ایدیلمسی، ایشتە رسالۀ نور بویلەجە ممكن اولماز ظن ایدیلن، مغلوب ایدیلمز قورقوسنی ویرن، فقط حقیقتدە چورومش تملسز، بو ظاهردە صاغلام قلعەلرینی تار و مار ایدییور. اڭ اوجرا كوشەلرە قدر سعادت ابدیە حیات بخش شعلەلرینی نفوذ ایتدیرییور. معنوی فتوحاتندە خیلی ترقّی ایتمش بولونویور.

ایشتە ای قرآن حسابنە بزلری كندیسنە قرداش و یولداش یاپان ذات فضیلتكار! ایشتە ای ابدیّت یولنڭ رهبر نجاتی! ایشتە ای دنیایی استیلا ایتمەیە اوغراشان دجّال وحشتلە، لایموت و لا یتزلزل مجاهدە ایدن رسالۀ نور! سنڭ بو قرآن

و ایمان حسابنە تفانی و شوق غیرتلریڭی، بتون عالم اسلام و ارواح و بتون فلك اجرام و ملكلر غبطە ایلە آلقیشلامییورلرمی؟ حسّیاتمزی افادەیە مادّةً هیچ بر قابلیت علمیە و قلمیەمز یوق. ذاتًا بوڭا كلمە و حرفلر كافی كلمەیەجك. سنڭ مدّاحڭ قرآن اولابیلیر.

ای نور! سنی تصویری خسرولرە، فیضیلرە، خلیللرە بیراقمقلە متسلّی اولویورز. اوت، بز دە ایستەیورز. نوریڭڭ هر بر حرفنە یونس امرەلر كبی بر بیت ایلە پروانە كبی یانمق! اوت، نطقلر طورویور، كوزلر یاشارییور، سس یوق. هركس بیكس، یالڭز نورڭ اوقونویور. كیجە قیامدە، یازی ایلە منامدە، كوندوز قرائت تعلیم و تصحیح ایلە صیامدە! بلكە حسب البشر ضرورتلە اولماسین منّت دییە نامردە چالیشیلیر.

ای جهانە رحمت اولان رسالۀ نور! و ای یولندە فدای جانی بر حجّت ایمان بیلەرك هر آن اولدیغمز ریّان استاد مباركمز! مملكتمزی زمان زمان قلملە تصویر و شرفلندیرییورسڭز. بو سببلە اوّلدنبری مرشد و نورلی نظرلریڭزلە مملكتمزدە دە قورولان خانكاە نوریە، محكمە اثناسندە دخی بو نورلی همّت عالیەڭزلە بورادە قالان قرداشلریمزی قهرمانجە محافظە و مدافعەدن آییرمامشدر. شیمدی ایسە، بعض شخصی و مادّی سببلرلە رسالۀ نورە اوّلدنبری یاپیلمق ایستەنیلن پلانلرینی دە صویە دوشورمش. و بالخاصّە طبیعت و مادّە كبی ایكی مدهش ظلمت بلوطلری مملكتمز اوزرندن صییریلمغە باشلامش.

دون مستهزی بر طورلە باقان چهرەلر، اكثریتلە بوكون پیشمان كورونمك یولنی طوتمغە یلتنییور. لكن بزدەكی احتیاط، اوندە اَنَا، اونڭ حسرتنی آرتیرییور. وجدانسزڭ نە اولاجق سؤٓالنە جواب، ایكی محكمە جریانیلە ویریلمش. فقط احمق دوە قوشی كبی باشنی قومە صوقمش، ألیلە یاپوب اللّٰه دییە طاپدیغنە یالوارییور، آغلایور. بزە یان باقانلرڭ، صاحبسز صانوب چاتانلرڭ جوابنی [وَاصْبِرْ لِحُكْمِ رَبِّكَ] الخ آیتی ویرییور. بو محیطدە نمونەلرینی كورمك ممكن. بر قسمی نزول كبی بلالرە، بر قسمی ابو جهلڭ بیت اللّٰهڭ اورتوسنی چالوب صاتمسی كبی، فویەسی صوڭرەدن كوزلرە باتییور. بش وقت اهل حق كوروندكلری حالدە، كبائر و ذلّتلری كوندن كونە میدانە چیقدیغی دیللردە كزییور. جناب حق اصلاح ایتسین.

سوكیلی و مبارك استادیمز! بز رسالۀ نور طلبەسی اولمق یولندە دائم دعاڭزە محتاجلرز. بیلمدن بر الهام ربّانی و اكرام سبحانی و فیوضات نوریەڭزلە مظهر اولدیغمز بو فوق العادە سرورلی، ذوقلی، شوقلی، نشئەلی، مقنع، مظفّر، معنوی خدمت ایچندە.. یینە بیلمدن، ایستەمدن بر اكرام الٰهی، یعنی نورڭ بر هدیەسی اولان حسّ قبل الوقوعڭ عصای موسی باشلاندیغندنبری آرتمەسی و چوقلرینە دە حسّ ایتدیرمسی و نوری آراتدیرمەسی.. حجّت اللّٰە البالغە یازیلدقجە، ذرّات جهانڭ تابع اولدیغی پادشاە ذوالجلال حسابنە سوقیّات نتیجەسی

منكرلرڭ دیللری طوتولارق مؤمنلرڭ آرتمەسی، عین الیقین حسّ ایتمسی.. مادّی رزق عجز، افتقارە كورە ویریلدیگی كبی، طلبە اولمازدن اوّل حقیقتی عجز و افتقارلە آرانمسی و بولدیرمسی.. بیلییورز. عالمز دیین بر چوقلرینڭ هانكی ساحەدە قالدقلری دە میداندە.

ایشتە بو منوّر، بو مزیَّن، بو منقّش، بو مصنّع رسالۀ نور الٰهی كائناتڭ صاحبنی و ملكلرینی و آخرتی -تشبیهدە خطا اولماسین- ال ایلە طوتولور، كوزلە كورولور بر سینامە پردەسی كبی، سیر ایدیلیر بر حالە بر كمالە چیقارمسی و حسّ ایتدیرمسی، عجز افتقارلرندن باشقە هیچ بر شی اولمایان بو بیچارەلرە استادلرندن بر عطیە ابدیًا منّتدار بیراقان بر نعمت الٰهیەدر.

بورادە هپمزڭ و متعدّد سمتلردن حضرت استادە خصوصی بر رجامز وار. رسالۀ نوری یازمق اوزرە مینی مینی یاورولردە و آننەلردە الٰهی بر آرزو كورولدیگندن، بو آرزو و امللرینڭ تحقّقی و دوامی ایچون خصوصًا دعاڭزی منّتلە ایستەیورز. واقع قصورلریمزڭ عفوینی دیلەیورز. ای یوجە استاد وارث محمّدی صلّی اللّٰە علیە وسلَّم.

حق اوغرندە جاننی فدایە حاضر اینەبولی و حوالیسی رسالۀ نور طلبەلری

[١٠٣]

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

سزڭ بو دفعە متعدّد مكتوبلریڭزە، راحتسزلق مجبوریتیلە، بر تك مكتوبلە اكتفا ایدییورم.

[اوّلًا] رسالۀ نورڭ قهرمانی خسرو، بنم بدلمە ئولمك و بنم یرمدە خستە اولمق صمیمی و جدّی ایستەیور. بن دە دیرم: تألیف زمانی دگل، شیمدی نشر زمانیدر. سنڭ یازیڭ، بنم یازیمدن نە درجە زیادە و نشرە فائدەلی ایسە، حیاتڭ دخی خدمت نوریەدە بنم بو عذابلی حیاتمدن او درجە فائدەلیدر. اگر بنم المدن كلسەیدی، حیاتمدن و صحّتمدن سزە ممنونیتلە ویرردم.

[ثانیًا] شهید مرحوم حافظ علینڭ تام بر وارثی حسن فیضینڭ، دڭزلی حسابنە و او جواردە جدّی قرداشلریمزڭ نامنە یازدیغی پارلاق قصیدە و دردنجی شهنامەسی و اورادە دخی شاكردلرڭ فعّالیتلە نورە چالیشمەلری، بنم زهرلی، شدّتلی خستەلغمە بر مرهم اولدی. جناب ارحم الرّاحمینە حدسز شكر اولسونكە، دڭزلی یی ایكنجی بر اسپارطە و بیوك بر اسلام كویی یاپییور.

اوت، حاكم عادل و محرّم و فیضی و حافظ مصطفی، بر ایكی سنەدە، یگرمی

سنە قدر خدمت نوریەیی یاپدیلر. نورڭ شاكردلرینی ابدە قدر منّتدار أیلەدیلر. جناب حق اونلردن و برابرلرندە نورە خدمت ایدنلردن ابدًا راضی اولسون، آمین!

[ثالثًا] مدرسۀ نوریەنڭ قهرمانلرندن و بارلەلی مارانغوز مصطفی چاووش و حافظ محمدڭ تام وارثی مارانغوز احمدڭ مدرسۀ نوریە نامنە پك صمیمی و حزین تعزیەنامەسی، بنی سرورلە آغلاتدیردی. بن دە دیرم: مادام او مبارك مدرسەدە كوچك و بیوك چوق سعیدلر وار.. اختیار، عاجز، وظیفەسی بیتمش بر سعید نقصان اولسە، اهمّیتی یوق. حیات باقیەدە مادام برابرز، بر موقّت مفارقت اولسە دە، سزی متأثّر ایتمەسین.

[رابعًا] حاكم عادلدن صوڭرە اڭ زیادە حقیقی عدالتە چالیشوب رسالۀ نورڭ سربستیتنە خدمت ایدن (م، ح، ر، م) اڭ خاص شاكردلر ایچندە و بنم ئوز قرداشم و برنجی طلبەم ملّا محمد اسمیلە اونڭ نامی، دعالرمدە و معنوی قزانچلرمدە برابردرلر.

[خامسًا] بو ساعتدە قونیەلی صبری دە -خلیل ابراهیم و حسن فیضی طرزندە وصیّتنامەم مناسبتیلە- قیصە فقط كوزل بر قصیدە یازمش، استادینە چوق زیادە قیمت ویرمش. كندی حسن ظنّنڭ پارلاق آیینەسندە، بو بیچارە قرداشنە فوق العادە اهمّیت ویرمش. و اورانڭ عالملری پك جدّی نورە چالیشمەلرینی یازییور.

بن دە دیرم: او استاد دیدیگی و چوق قیمت ویردیگی شخص ایسە، رسالۀ نورڭ شخص معنویسی اولابیلیر. بن دە اونڭ نامنە قبول ایتدم، لاحقەیە كچیردم. هم سزە دە بر صورتنی كوندردم.

مراق ایتمەییڭز، خستەلغم كیتدكجە خفیفلشییور. اسپارطەلی مصطفی نامندە بر قرداشمزڭ صمیمی، فقط غریب بر مكتوبی، خسروڭ مكتوبی ایچندە واردی. بو ذات هانكی مصطفیدر، بیلەمدم. اوڭا دە چوق سلام ایدرم. عجیب رؤیاسی خیردر، شیمدی تعبیر ایدەمم.

عموم قرداش و همشیرەلریمزە برر برر سلام و دعا ایدرز و مقبول دعالرینی ایسترز. حسن فیضینڭ كوزل قصیدەسنی، بعض كلمەلری علاوە ایلە لاحقەیە كچیردك و سزە دە كوندردك

اَلْبَاقٖی هُوَ الْبَاقٖی

قرداشڭز سعید النّورسی

(١٠٤)

قونیەلی صبرینڭ فقرەسیدر.

صبرینڭ استاد دیدیگی بنم شخصم دگل، بلكە رسالۀ نورڭ شخص معنویسیدر. و او معنا ایلە قبول ایدرم.

١

كوڭللریمزڭ نوری، سنسڭ عزیز استادیمز.

مسلمانلغڭ سروری، سنسڭ عزیز استادیمز.

٢

هر كوچلگە كوگس كرن، سوكیسنی حقّە ویرن،

بزە نور یولی كوسترن، سنسڭ عزیز استادیمز.

٣

چالیشوب ییللردنبری، ایشیقلاتدیڭز هر یری،

بو نورلی یولڭ رهبری، سنسڭ عزیز استادیمز.

٤

اوزاغز شهرتدن شاندن، بو عشقە باغلی ییز جاندن،

بزە هر یولدە قوماندان، سنسڭ عزیز استادیمز.

٥

آدڭ ذكر اولور هر یردە، وارلغڭ علاجدر هر دردە،

شو منافقلرە پردە، سنسڭ عزیز استادیمز.

٦

مؤمنلرە تمل طاشی، ایمانلرڭ آرقداشی،

رسالۀ نورڭ باشی، سنسڭ عزیز استادیمز.

٧

سوكیڭ یانار ایچمزدە، یورورز آچدیغڭ ایزدە،

بو عشقی یرلشدیرن بزدە سنسڭ عزیز استادیمز.

٨

جانلریمز اولسون فدا، رسالۀ نور اوغرینە،

یا غازی یز، یا شهدا، رسالۀ نور اوغرینە.

٩

كوڭلمز عشق ایلە اورور، آلنمز اولدقجە نور،

آقوب كیدن صولر طورور، رسالۀ نور اوغرینە.

١٠

بز هر خیالدن كچمشز، نور شربتنی ایچمشز،

معنوی جهاد آچمشز، رسالۀ نور اوغرینە.