[ج-رسالۀ نور طلبەلرینڭ بربرینە قارشی صوروملیلقلری]

لاحقە ٥٦: (حضرت استادڭ تساند، اخوّت و تنقید ایتمەمك حقّندە مهم بر فقرەسیدر)

عزیز، صدّیق، وفادار، آخرت قرداشم، خدمت قرآندە آرقداشم رأفت بگ،

سنڭ كوردیگڭ وظیفۀ قرآنیەنڭ خدمتی مباركدر. جناب حق سزی موفّق ایتسین، فتور ویرمەسین، شوقڭزی آرتیرسین. سنڭ وظیفەڭ یازیدن داها مهمدر. یالڭز یازی یی ترك ایتمەییڭز.

اخوّت ایچون بر دستوری بیان ایدەجگمكە، او دستوری جدًّا نظرە آلملیسڭز: حیات، وحدت و اتّحادڭ نتیجەسیدر. امتزاجكارانە اتّحاد كیتدیگی وقت، معنوی حیات دە كیدر. [وَلَا تَنَازَعُوا فَتَفْشَلُوا وَتَذْهَبَ رٖیحُكُمْ] اشارت ایتدیگی كبی، تساند بوزولسە جماعتڭ طادی قاچار. بیلیرسڭزكە، اوچ الف آیری آیری یازیلسە قیمتی اوچدر. تساند عددی ایلە اجتماع ایتسە، یوز اون بر قیمتندە اولدیغی كبی.. سزڭ كبی اوچ درت خادم حق، آیری آیری و

تقسیم الاعمال اولمامق جهتیلە حركت ایتسەلر، قوّتلری اوچ درت آدم قدردر. اگر حقیقی بر اخوّتلە، بربرینڭ فضیلتلریلە افتخار ایدەجك بر تساندلە، بربرینڭ عینی اولمق درجەدە بر تفانی سرّیلە حركت ایتسەلر، او درت آدم، درت یوز قوّتنڭ قیمتندەدرلر.

سزلر قوجە اسپارطە دگل، بلكە بیوك بر مملكتی تنویر ایدەجك الكتریكلرڭ

ماكینیستلری حكمندەسڭز. ماكینەنڭ چرخلری بربرینە معاونتە مجبوردر. بربرینی قیصقانمق دگل، بالعكس بربرینڭ فضلە قوّتندن ممنون اولورلر. شعورلی فرض ایتدیگمز بر چرخ، داها قوّتلی بر چرخی كورسە ممنون اولور. چونكە وظیفەسنی تخفیف ایدییور. حق و حقیقتڭ، قرآن و ایمانڭ خدمتی اولان بیوك بر خزینۀ عالیەیی اوموزلرندە طاشییان ذاتلر، قوّتلی اوموزلر آلتنە كیردكجە افتخار ایدر، منّتدار اولور، شكر ایدر.

صاقین بربریڭزە تنقید قاپوسنی آچماییڭز. تنقید ایدیلەجك، قرداشلریڭزدن خارج دائرەلردە چوق وار. بن ناصل سزڭ مزیتڭزلە افتخار ایدییورم، او مزیتلردن بن محروم قالدقجە، سزدە بولوندیغندن ممنون اولویورم، كندیمڭدر تلقّی ایدییورم. سز دە استادیڭزڭ نظریلە بربریڭزە باقملیسڭز. عادتا، هر بریڭز اوتەكینڭ فضیلتلرینە ناشر اولیڭز. قرداشلریمزدن اسلام كویلی حافظ علی، كندینە رقیب اولاجق دیگر بر قرداشمز حقّندە كوستردیگی حس اخوتی، چوق قیمتدار كوردیگم ایچون سزە بیان ایدییورم:

او ذات یانمە كلدی. اوتەكینڭ خطّی، كندیسنڭ خطندن أیی اولدیغنی سویلەدم. "او داها چوق خدمت ایدر" دیدم. باقدمكە حافظ علی، كمال صمیمیت و اخلاص ایلە، او ذاتڭ تفوّقیلە افتخار ایتدی، تلذّذ أیلەدی. هم استادینڭ نظر محبّتنی جلب ایتدیگی ایچون ممنون اولدی. اونڭ قلبنە دقّت ایتدم.. كوستریش دگل، صمیمی اولدیغنی حسّ ایتدم. جناب اللّٰهە شكر ایتدمكە، قرداشلرم ایچندە بو عالی

حسّی طاشییانلر وار. ان شٓاء اللّٰه بو حسّ بیوك خدمت كورەجك. الحمد للّٰه یاواش یاواش او حسّ بو جواریمزدەكی قرداشلرە سرایت ایدییور.

بو مناسبتلە قرداشم رأفت بگە دیرمكە: اصلندە توافق نقصان اولسەیدی، ذاتًا بن توصیە ایتمشدمكە، قلم قاریشدیرماسینلر. اصل وضعیت بوزولماسین. بكر آغا دە كوردیكە، اصل مسودّە دە چیقینتی اولدیغی حالدە، توافق خسروڭ طرزندە وار. اونڭ ایچون خسروڭ بر مهارتی وارسە، توافقی بوزمامش. حتّی معجزات احمدیەدەكیؐ صلوات توافقندە توصیە ایتمشدمكە، كیمسە مهارتنی قاریشدیرماسین. فقط اصل مسودّەلردە اڭ عجمی بر مستنسخڭ ستر ایدەمدیگی بر توافق، البتە قوّتلیدر. مستنسخلر بوزماسینلر، توافقی كتیرەمەین بوزویور. دیمك اڭ بیوك مهارت اودركە، توافقی بوزماسین. چونكە توافق وار. سن دە خسروە یاردیم ایتكە، حقیقتًا موجود و مطلوب توافقی دنك كتیرەبیلسین. چونكە یوقدن وار ایتمییورسڭز، حقیقی واری یوق ایتمەیڭ.

سوزلرلە علاقەدارلرە سلام و دعا.

سعید النّورسی

بارلە لاحقەسی: ١١٤

لاحقە ٥٧: (حضرت استادڭ ایكی كوچك حكایە ایلە نور طلبەلرینە تساند و اخوّت درسنی ویرمسی)

[تنبیه.. ایكی كوچك حكایە]

[برنجیسی] بوندن اون بش سنە اوّل، روسیەنڭ شمالندە اسیر اولدیغم زمان، طقسان اسیر ضابطلریمزلە برابر بیوك بر فابریقە قوغوشندە بولونویوردق. صیقینتیدن و روح طارلغندن چوق مناقشەلر، كورولتولر اولویوردی. عمومنڭ بڭا قارشو زیادە حرمتلری اولدیغندن، تسكین ایدییوردم. صوڭرە سكونتی محافظە ایچون درت بش ضابطی تعیین ایتدم. و دیدم: « هانكی كوشەدە بر كورولتو ایشیتدیڭز، همان یتیشیڭز. هانكی طرف حقسز ایسە، اوڭا یاردیم ایدیڭز!» حقیقتًا بو تدبیرلە كورولتونڭ اوڭی آلیندی. بندن صورولدی: « نە ایچون حقسزە یاردیم ایدیڭز، دییورسڭ؟»

جوابًا او زمان دیمشدمكە: « حقسز، انصافسزدر. بر درهم منفعتنی، استراحت عمومیّەنڭ قرق درهم منفعتی ایچون بیراقماز. حقلی آدم ایسە انصافلی اولور. بر درهم حقّنی، سكونت عمومیّەدەكی آرقداشنڭ قرق درهم منفعتنە فدا ایدر، بیراقیر. كورولتو قالقار، سكونت اعادە ایدیلیر. بو قوغوشدەكی طقسان ذات استراحت ایدر.»

اگر، حقلی یە معاونت ایدیلسە، كورولتو داها زیادەلشەجك. بو نوع حیات اجتماعیەدە، منفعت عمومیە اهمّیتی نظرە آلینیر.

ایشتە ای قرداشلرم! بو اجتماعی حیاتمزدە، » بو قرداشم بڭا حقسزلق ایتدی دە كوسدم!« دیمەییڭز. بو پك خطادر. او آرقداشڭ سڭا بر درهم ضرر ویرمش ایسە، سن كوسمكلە بزلرە قرق درهم ضرر ویرییورسڭ. بلكە رسالۀ نورە قرق لیرە ضرر ویرمك احتمالی وار. فقط للّٰە الحمد پك حقلی و قوّتلی مدافعاتمز، آرقداشلرڭ مكرّر استجوابە كیتمەلرینڭ اوڭنی آلدیغندن، فسادڭ اوڭی آلیندی. یوقسە بربرندن كوسمش قرداشلر، بر سینك قنادی قدر كوچك بر چوپڭ كوزە كیرمسی كبی ویاخود بر قیغیلجیمڭ باروتە دوشمەسی كبی، آز بر غرضلە بیوك بر ضرر ویرەبیلیردی.

[ایكنجی حكایە] بر وقت اختیار بر قادینڭ سكز اوغلی وارمش. هر بریسنە موجود سكز اكمكدن برر اكمك ویرمش. كندیسنە قالمامش. صوڭرە هر بریسی اكمگنڭ یاریسنی اوڭا ویردی. اونڭ اكمگی درت اولدی، اوتەكیلر یاری یە ایندی.

ایشتە قرداشلرم.. بن دە قرقڭزڭ هر برینڭ مصیبت حصّەسنڭ معنوی ألمنڭ یاریسنی كندمدە حسّ ایدییورم. كندی شخصمە عائد ألمی آلدیرمییورم. بر كون فضلە مضطرب بولوندم، عجبا خطامڭ جزاسیمیدر، چكییورم دییە، كچمش حالتی تدقیق ایتدم. كوردمكە، بو مصیبتی قایناتمغە و تحریك ایتمەیە هیچ بر جهتدە مداخلەم یوقدر. بالعكس قاچمق ایچون ممكن اولان تدبیرلری استعمال ایدییوردم. دیمك بو بر قضای الٰهیدر. و بالالتزام بر سنەدنبری مفسدلر طرفندن علیهمزە احضار ایدیلییوردی. قاچینمق قابل دگلدی. عَلٰی كُلِّ حَالْ باشمزە كچیرەجكلردی. جناب حقّە یوز بیڭ شكرلر اولسونكە، مصیبتی یوزدن برە ایندیردی.

ایشتە بو حقیقتە بناءً، » سنڭ یوزڭدن بو بلایی چكدك!« دییە منّت ایتمەییڭز. بلكە بنی حلال ایدیڭز. و بڭا دعا ایدیڭز. هم بربریڭزی تنقید ایتمەییڭز. دیمەییڭزكە: » سن بویلە یاپماسە ایدڭ، بویلە اولمایاجقدی!« مثلا بر قرداشمز، ایكی اوچ امضا صاحبلرینی سویلەمسیلە، مفسدلرڭ پك چوق ذاتلری بلایە آتمق ایچون دوشوندكلری پلانی كوچولتوب، چوقلرینی قورتارمش. دگل ضرر، بلكە بیوك منفعت اولمش. چوق معصوملرڭ بو بلادن قورتولمەسنە بر وسیلە اولدی.

سعید النّورسی

لمعەلر: ٣٠٦

لاحقە ٥٨: "اصل هنر قرداشنی فنا كوردیگی وقت اونی ترك ایتمكدە دگل، بلكە داها زیادە اخوّتنی قوّتلشدیروب اصلاحنە چالیشمق اهل صداقتڭ شأنیدر"

عزیز صدّیق قرداشلرم

بر زمان مسلم اولمایان بر ذات، بر چارە بولمش. طریقتدن خلافت آلمش. و ارشادە باشلامش. تربیەسندەكی مریدلری ترقّی یە باشلاركن، بریسی كشفًا مرشدلرینی غایت سقوطدە كورمش. او ذات ایسە فراستیلە بیلیر. او مریدینە دیر: ایشتە بنی سن آڭلادڭ. او دە دیمش: مادام سنڭ ارشادڭلە بو مقامی بولدم. سنی بوندن صوڭرە داها زیادە باشمدە طوتاجغم دییوب جناب حقّە یالوارمش. او بیچارە شیخنی قورتارمش. او شیخ بردن ترقّی ایدوب بتون مریدلرندن

كچمش. یینە اونلرە مرشد قالمش.

دیمك بعضًا بر مرید، شیخنڭ شیخی اولویور. ایشتە اصل هنر.. قرداشنی فنا كوردیگی وقت اونی ترك ایتمكدە دگل، بلكە داها زیادە اخوّتنی قوتلشدیروب اصلاحنە چالیشمق، اهل صداقتڭ شأنیدر.

منافقلر بویلە وضعیّتلردن قرداشلریمزڭ تساندینی و بربرلرینە قارشو حسن ظنلرینی بوزمق ایچون دیرلر: ایشتە او قدر اهمّیت ویردیگڭ ذاتلر.. عادی، عاجز انسانلردر.

هر نە ایسە.. بو مصیبتدە كرچە چوق ضرریمز وار. فقط عموم عالم اسلامی علاقەدار ایدەجك بر كیفیت و بر وضعیت اولمەسندن، پك چوق اوجوز اولارق پك بیوك قیمتی وار. بوڭا بڭزر وقوعە كلن حادثەلر، یا سیاست دینیە ویا باشقە شیلرلە عموم عالم اسلام نامنە اولمدیلر. و بو خدمتمزڭ بر نتیجەسی اولان بو فداكارلق ایسە، طوغریدن طوغری یە قرآن نامنە و حقائق ایمانیە حسابنە و سیاستسز حقّانیت و دین اسلام نیّتنە اولدیغی جهتلە عموم عالم اسلامی علاقەدار ایدن.. و بو وطندەكی ملّتڭ و خصوصًا توركڭ، اسكیدنبری فداكارانە خدمت ایتدیگی قدسی دیننە دائما صاحب و پرستشكاری بولوندیغنە قوّتلی بر حجّت كوسترن.. و استقبالدە تقدیرلر و تحسینلرلە تبریكە لایق اولان بو امتحانلی مصیبتدە و چوق معنیدار وضعیتدە نە قدر ضرر اولسە و نە قدر مصرف ایدیلسە و نە قدر زحمت چكیلسە، یینە اوجوزدر. یینە قیمتی چوق، فیئٓاتی آزدر، دییە قناعتم وار.

سعید النّورسی

شعاعلر ٢: ٣٨٨

لاحقە ٥٩: (بر قسم نور طلبەلرینڭ ایچنە دوشدكلری صیقینتیلرە قارشی اڭ تأثیرلی چارە.. بربرینە تسلّی و فرح ویرمك و قوّۀ معنویەسنی تقویە ایتمك و تام شفقتلە كدرلی قلبنی اوخشامقدر)

عزیز، صدّیق قرداشلرم،

بو دنیادە، خصوصًا بو زماندە، خصوصًا مصیبتە دوشنلرە و بالخاصّە نور شاكردلرندەكی دهشتلی صیقینتیلرە و مأیوسیّتلرە قارشو اڭ تأثیرلی چارە، بربرینە تسلّی و فرح ویرمك.. و قوّۀ معنویەسنی تقویە ایتمك.. و فداكار حقیقی قرداش كبی بربرینڭ غم و حزن و صیقینتیلرینە مرهم سورمك.. و تام شفقتلە كدرلی قلبنی اوخشامقدر. مابینڭزدەكی حقیقی و اخروی اخوّت، كوجنمك و طرفكیرلك قالدیرماز. مادام بن سزە بتون قوّتملە اعتماد ایدوب بل باغلامشم. و سزڭ ایچون، دگل یالڭز استراحتمی و حیثیتمی و شرفمی، بلكە سوینچلە روحمی دە فدا ایتمەیە قرار ویردیگمی بیلیرسڭز. بلكە دە كورویورسڭز. حتّی قسملە تأمین ایدرمكە: سكز كوندر، نورڭ ایكی ركنی ظاهری بربرینە نازلانمقلە و تسلّی یرینە حزن ویرمك اولان اهمّیتسز حادثەنڭ بو صیرەدە بنم قلبمە ویردیگی عذاب جهتیلە "ایواه ایواه.. ألأمان ألأمان یا ارحم الراحمین

مدد.. بزی محافظە أیلە. بزی جن و انسی شیطانلرڭ شرّندن قورتار. قرداشلریمڭ قلبلرینی بربرینە قارشو تام صداقتلە و محبّتلە و اخوّت و شفقتلە طولدیر "دییە، هم روحم، هم قلبم، هم عقلم فریاد ایدوب آغلادیلر.

ای دمیر كبی صارصیلماز قرداشلرم! بڭا یاردیم ایدیڭز. مسئلەمز چوق نازكدر. بن سزلرە چوق كوونییوردمكە: بتون وظیفەلریمی شخص معنویڭزە بیراقمشدم. سز دە بتون قوتڭزلە بنم امدادیمە قوشمەڭز لازم كلییور. كرچە حادثە پك جزئی و كچیجی و كوچك ایدی. فقط ساعتمزڭ زنبرگنە و كوزیمزڭ حدقەسنە كلن بر صاچ و بر ذرّەجك دخی اینجیتیر. و بو نقطەدە اهمّیتلیدر. مادّی اوچ پاتلاق و معنوی اوچ مشاهدەلر، تام تامنە خبر ویردیلر.

سعید النّورسی

شعاعلر ٢: ٥٣٢

لاحقە ٦٠: (نور طلبەلرینڭ مابینلرندەكی كوسمك و كوجنمەنڭ خدمت قرآنیەیە بیوك بر ضرر و منافقلرە بیوك بر یاردیم اولاجغی)

عزیز، صدّیق قرداشم رأفت بگ،

قرآن عظیم الشّانڭ حرمتنە و علاقۀ قرآنیّەڭزڭ حقّنە و نورلر ایلە یگرمی سنە ظرفندە ایمانە خدمتڭزڭ شرفنە چابوق بو دهشتلی، ظاهرًا كوچك، فقط وضعیّتمزڭ نزاكتنە بناءً پك الیم و فجیع اولان و بزی محوە چالیشان كیزلی منافقلرە بیوك بر یاردیم اولان بربریڭزە كوسمكدن و باروتە آتش آتمق حكمندەكی كوجنمكدن واز كچیڭز. و كچیریڭز. یوقسە بر درهم شخصی حق یوزندن، بزلرە و خدمت قرآنیەیە و ایمانیەیە یوز بطمان ضرر كلمەسی، شیمدیلك احتمالی پك قویدر.

سزی قسم ایلە تأمین ایدرمكە: بریڭز بڭا اڭ بیوك بر حقارت یاپسە و شخصمڭ حیثیتنی بتون بتون

قیرسە، فقط خدمت قرآنیە و ایمانیە و نوریەدن واز كچمەسە، بن اونی حلال ایدرم، اونڭلە باریشیرم. كوجنمەمگە چالیشیرم. مادام جزئی بر یبانیلكدن دوشمانلریمزڭ استفادەیە چالیشدقلرینی بیلییورسڭز. چابوق باریشیڭز. معناسز چوق ضررلی نازلانمقدن واز كچیڭز. یوقسە بر قسممز شمسی، شفیق، توفیق كبی معارضلرە صورتًا التحاق ایدوب، خدمت ایمانیّەمزە بیوك بر ضرر و نقصانیت اولاجق. مادام عنایت الٰهیە شیمدی یە قدر بر ضایعاتە بدل چوقلرینی او سیستمدە ویرمش. ان شٓاء اللّٰه یینە امدادیمزە یتیشیر.

سعید النّورسی

شعاعلر ٢: ٥٤٣

لاحقە ٦١: (بزی اورمق و صارصمق ایچون اڭ فنا پلان.. نور طلبەلرینی بربرندن صوغوتمق، اوصاندیرمق و مشرب و فكر جهتیلە بربرندن آییرمقدر)

عزیز، صدّیق، صارصیلماز قرداشلرم،

سزی روح و جانملە تبریك ایدییورم. چابوق یارەمزی تداوی ایتدیڭز. بن دە بو كیجە شفادن تام فرحلاندم. ذاتًا مدرسة الزّهرا توسّع ایدوب، حقیقی اخلاصی و تام فداكارانە ترك انانیّتی و تواضع تامّی دائرۀ نوردە آشیلایور. نشر ایدییور. البتە غایت جزئی و موقّت حسّاسیت و تیتیزلك و نازلانمق، او قوّتلی اخوّت و علاقەیی بوزماز. و اخلاص لمعەسی بو نقطەدە مكمّل بر ناصحدر. شیمدی اڭ زیادە بزی و نورلری اورمق و صارصمق ایچون اڭ فنا پلان، نور طلبەلرینی بربرندن صوغوتمق

و اوصاندیرمق و مشرب و فكر جهتندە بربرندن آییرمقدر. كرچە غایت جزئی بر نازلانمق اولدی. فقط كوزە بر صاچ دوشسە، باشە دوشن بر طاش قدر اینجیتیركە، بیوك بر حادثە حكمندە مطرەم خبر ویردی. مرحوم حافظ علینڭ كوچوجك بویلە بر حالدن وفاتندن بر پارچە اوّل شكواسی او وقتدنبری، بلكە یوز دفعە خاطریمە كلمش. و بنی متأثّر ایتمشدر.

سعید النّورسی

شعاعلر ٢: ٥٤٨

لاحقە ٦٢: (اهل ضلالتڭ، نور طلبەلرینڭ مشرب و حسّیاتلرینڭ فرقلیلغندن استفادە ایلە آرالرندە صوغوقلق ویرمك ایستەمەلری)

عزیز، صدّیق قرداشلرم، بردن روحمە كلمش بر اندیشەیی بیان ایدییورم.

اهل ضلالت، رسالۀ نورڭ الماس قیلیچلرینە مقابلە ایدەمدكلری ایچون، شاكردلری ایچندە درد معیشت جهتندن و بهار موسمی غفلتندن استفادە ایدرك، مشربلر ویا حسّیاتلری مخالفتندن ضعیف طمارلری بولوب، شاكردلر ایچندەكی تساندی صارصمق ایستەدكلرینی حسّ ایتدم و آڭلادم.

صاقین، چوق دقّت ایدیڭز! ایچڭزە بر مباینت دوشمەسین. انسان خطادن خالی اولاماز. فقط توبە قاپوسی آچیقدر. نفس و شیطان، سزی، قرداشڭزە قارشو اعتراضە و حقلی اولارق تنقیدە سوق ایتدیگی وقت، دیییڭزكە: بز، دگل بویلە جزئی حقوقمزی، بلكە حیاتمزی و حیثیتمزی و دنیوی سعادتمزی

رسالۀ نورڭ اڭ قوّتلی رابطەسی اولان تساندە فدا ایتمەیە مكلّفز. او بزە قزاندیردیغی نتیجە اعتباریلە دنیایە، انانیتە عائد هر شیئی فدا ایتمك وظیفەمزدر دییوب نفسڭزی صوصدیریڭز. مدار نزاع بر مسئلە وارسە، مشورت ایدیڭز. چوق صیقی طوتماییڭز. هركس بر مشربدە اولماز. مسامحە ایلە بربرینە باقمق شیمدی الزمدر.

سعید النّورسی

قسطمونی لاحقەسی: ٢٧٥

لاحقە ٦٣: "كیزلی دوشمانلریمز ایكی پلانی تعقیب ایدییورلر"

عزیز، صدّیق قرداشلرم رأفت، محمد فیضی، صبری،

بن شدّتلی بر اشارت و معنوی بر اخطارلە سزڭ اوچڭزدن، رسالۀ نورڭ خاطری و بو بایرامڭ حرمتی و اسكی حقوقمزڭ حقّی ایچون چوق رجا ایدرمكە، دهشتلی یڭی بر یارەمزڭ تداویسنە چالیشیڭز. چونكە كیزلی دوشمانلریمز ایكی پلانی تعقیب ایدییورلر.

بریسی: بنی اهانتلرلە چوروتمك، ایكنجیسی: مابینمزدە بر صوغوقلق ویرمكدر. باشدە خسرو علیهندە بر تنقید و اعتراض و كوجنمك ایلە بزی بربریمزدن آییرمقدر.

بن سزە اعلان ایدرمكە: خسروڭ بیڭ قصوری اولسە، بن اونڭ علیهندە بولونمقدن قورقارم. چونكە، شیمدی اونڭ علیهندە بولونمق، طوغریدن طوغری یە رسالۀ نورڭ علیهندە و بنم علیهمدە و بزی پریشان ایدنلرڭ لهندە بر عظیم خیانتدركە، بنم صوبەمڭ پارچەلانمسی كبی عجیب سببسز بر حادثە باشمە كلدی. و بڭا یاپیلان

صوڭ اشكنجە دخی، بو معناسز و چوق ضررلی تساندسزلگڭزدن كلدیگنە قناعتم وار. دهشتلی بر پارماق بورایە، خصوصًا آلتنجی یە قاریشییور. بنی بو بایراممدە آغلاتماییڭز. چابوق قلبًا تام باریشیڭز.

سعید النّورسی

شعاعلر ٢: ٥٤٦

لاحقە ٦٤: "خسرو كبی بر نور قهرامانندن بنم یرمدە و نورڭ شخص معنویسنڭ چوق اهمّیتلی بر ممثّلی اولمەسندن هچ بر جهتلە كوجنمەمك الزمدر"

عزیز، صدّیق قرداشلرم،

صوبەمڭ و فیضیلرڭ و صبری و خسروڭ ایكی صو بارداقلرینڭ پارچە پارچە اولمسی، دهشتلی بر مصیبتڭ كلدیگنی خبر ویردیلر. اوت بزم اڭ قوّتلی نقطۀ استنادیمز اولان حقیقی تساند و بربرینڭ قصورینە باقمامق و خسرو كبی بر نور قهرمانندن بنم یرمدە و نورڭ شخص معنویسنڭ چوق اهمّیتلی بر ممثّلی اولمەسندن هیچ بر جهتلە كوجنمەمك الزمدر. بن قاچ كوندر دهشتلی بر صیقینتی و مأیوسیّت حسّ ایتدیگمدن، دوشمانلریمز بزی مغلوب ایدەجك بر چارە بولمشلر، دییە چوق تلاش ایتدم. هم صوبەم، هم خیالی عین حقیقت مشاهدەم طوغری خبر ویردیلر. صاقین صاقین صاقین! شیمدی یە قدر دمیر كبی قوّتلی تساندیڭزی چابوق تعمیر ایدیڭز. وَاللّٰهِ بو حادثە بزم حپسە كیرمەمزدن داها زیادە قرآن و ایمان خدمتمزە، خصوصًا بو صیرەدە ضرر ویرمك احتمالی قویدر.

سعید النّورسی

شعاعلر ٢: ٥٣٣

لاحقە ٦٥: (نورلرڭ یانغینە قارشی بر پردە اولدیغنە دائر مثاللر و حضرت استادڭ انشقاقە دوشمەمك ایچون اییلكلە مقابلە ایتمەیی و پردەیی ییرتمامەیی توصیە ایتمەسی)

عزیز، صدّیق قرداشلرم،

سزە معنیدار و عجیب و رسالۀ نور طلبەلریلە و رسالۀ نور و آیت الكبرانڭ كرامتیلە و اهل دنیانڭ بڭا ایلیشمك نیتلریلە علاقەدار، قارشومدە اسكیدن بلدیە بولونان حكومت دائرەلرندن بریسی، هیچ بر شی قورتولمایارق، هیچ كورمدیگمز عجیب بر پارلامقلە كیجەنڭ اڭ صوغوق بر وقتندە اوچ ساعت جهنّم كبی یاندیغی حالدە.. تام بیتیشیگندە، رسالۀ نورڭ چالیشقانلرندن بر طلبەسی و یینە ایكی قرداشنڭ و معصوم جیلانڭ سرمایەلرینڭ قسم اعظمی ایچندە بولونان بیوك

مغازەلری، او یانغین یری ایلە ایكی كوچك دكّان فاصلە ایلە او دهشتلی یانغین بتون شدّتیلە مغازەیە طوغری كلیركن بیچارە جیلان آغلایارق یانمە كلدی، دیدی: "بز یانییورز، محو اولدق!" بن دە ایكی كون اوّل مغازەلرندە بولونان آیت الكبرانڭ بر قسم مطبوع نسخەلرینی یانمە كتیرمك ایچون سویلەدم، فقط كتیرمدی. دیمك او آتشی سوندیرمك ایچون قالمشدی. بن دە رسالۀ نوری و آیت الكبرایی شفاعتجی یاپوب: "یا ربّی قورتار!" اوچ ساعت او دهشتلی یانغین هجومندە بتون او بیوك دائرەیی محو ایتدی. آلتندە و بیتیشیگندەكی دكّانلری بتون یاقدی، ییقدیردی. رسالۀ نورڭ و آیت الكبرانڭ حفظندە اولان مغازەیە قطعیًّا