مدافعە ایدییور. البتە حدسز تحشیداتە احتیاجی واردركە، او حدسز دوشمانلرە قارشو طایانوب، اهل ایمانڭ ایماننی محافظەیە قرآن نوریلە وسیلە اولسون.

حدیث شریفدە واردركە: ” بر آدمڭ سنڭلە ایمانە كلمەسی، سڭا صحرا طولوسی قیرمیزی قویونلردن داها خیرلیدر.“ ” بعضًا بر ساعت تفكّر، بر سنە عبادتدن داها خیرلی اولور. “ حتّی نقشیلرڭ خفی ذكرە ویردكلری بیوك اهمّیت، بو نوع تفكّرە یتیشمك ایچوندر.

سعید النّورسی

امرطاغ لاحقەسی ١: ٢٠٣

[ ٣]

[رسالۀ نورڭ ماهیتی]

لاحقە ٥: (رسالۀ نور نە طرز بر تفسیردر؟)

عزیز، صدّیق قرداشلرم،

رسالۀ نور قرآنڭ چوق قوّتلی حقیقی بر تفسیریدر. تكرار ایلە دیدیگمزدن بعض دقّتسزلر تام معناسنی بیلمدكلرندن بر حقیقتی بیان ایتمەیە بر اخطار آلدم. او حقیقت شودر:

تفسیر ایكی قسمدر. بریسی: معلوم تفسیرلردركە، قرآنڭ عبارەسنی و كلمە و جملەلرینڭ معنالرینی بیان و ایضاح و اثبات ایدرلر.

ایكنجی قسم تفسیر ایسە:، قرآنڭ ایمانی اولان حقیقتلرینی قوّتلی حجّتلرلە بیان و اثبات و ایضاح ایتمكدر. بو قسمڭ پك چوق اهمّیتی وار. ظاهردەكی معلوم تفسیرلر، بو قسمی بعضًا مجمل بر طرزدە درج ایدییورلر. فقط رسالۀ نور طوغریدن طوغری یە بو ایكنجی قسمی اساس طوتمش، امثالسز بر طرزدە معنّد فیلسوفلری صوصدیران بر معنوی عالی تفسیردر.

سعید النّورسی

شعاعلر ٢: ٥٤٥

لاحقە ٦: (رسالۀ نورلرڭ یدی مثنوی قدر اهل ایمانە مرشد اولمسی)

قرداشلرم! قلبمە اخطار ایدیلدیكە، ناصلكە مثنوئ شریف، شمس قرآنیّەدن تظاهر ایدن یدی حقیقتدن بر حقیقتڭ آیینەسی اولمش، قدسی بر شرافت آلمش. مولویلردن باشقە، داها چوق اهل قلبڭ لایموت بر مرشدی اولمش. اویلە دە رسالۀ نور، شمس قرآنیّەنڭ ضیاسندەكی الوان سبعەیی و او كونشدەكی رنك رنك و چشید چشید یدی نوری بردن آیینەسندە تمثّل ایتدیردیگندن، ان شٓاء اللّٰه یدی جهتلە شریف و قدسی و یدی مثنوی قدر اهل حقیقتە باقی بر رهبر و لایموت بر مرشد اولاجق.

سعید النّورسی

لمعەلر: ٣٠٤

لاحقە ٧: (حضرت استادڭ فاش ایدیلمسی خاطرینە كلمەین بر سرّی فاش ایتمەیە مجبور اولمسی)

[فاش ایدیلمسی خاطریمە كلمەین بر سرّی، فاش ایتمەیە مجبور اولدم]

شویلەكە: رسالۀ نورڭ شخص معنویسی و او شخص معنوی یی تمثیل ایدن خاص شاكردلرینڭ شخص معنویسی فرید مقامنە مظهر اولدقلری ایچون، دگل خصوصی بر مملكتڭ قطبی، بلكە اكثریت مطلقە ایلە حجازدە بولونان قطب اعظمڭ تصرّفندن خارج اولدیغی كبی، اونڭ دە حكمی آلتنە كیرمگە مجبور دگلدر. هر زماندە بولونان ایكی امام كبی، قطب اعظمی طانیمغە دە مجبور اولمایور.

بن اسكیدن، رسالۀ نورڭ شخص معنویسنی، او اماملردن بریسی ظن ایدییوردم. شیمدی آڭلایورمكە، غوث اعظمدە؈ قطبیت و غوثیتلە برابر، فردیّت دە بولوندیغندن، آخر زماندەكی شاكردلرینڭ باغلاندیغی رسالۀ نور، او فردیّت مقامنڭ مظهریدر. كیزلنمگە لایق اولان بو سرّ عظیمە بناءً، مكّۀ مكرّمەدە دخی فرض محال اولارق رسالۀ نور علیهندە بر اعتراض قطب اعظمدن دخی كلسە، رسالۀ نور شاكردلری صارصیلمایوب، او مبارك قطب اعظمڭ اعتراضنی التفات و سلام صورتندە تلقّی ایدوب، توجّهنی دە قزانمق ایچون، مدار اعتراض نقطەلری او بیوك استادلرینە قارشو ایضاح ایلە، اللرینی اوپمكدر.

سعید النّورسی

قسطمونی لاحقەسی: ٢٥٤

لاحقە ٨: (حضرت استادڭ نظرلری كندی شخصی یرینە رسالۀ نور خدمتنە توجیح اتمەسندەكی حكمتلری ایضاح ایتمەسی)

بِاسْمِهٖ سُبْحَانَهُ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

عزیز، صدّیق قرداشلرم،

(معنًا معروض قالدیغم ایكی شقلی بر سؤٓالڭ جوابیدر.)

[برنجیسی] نەدن اڭ زیادە سنڭ شخصڭ حقّندە حسن ظن ایدن و سڭا بیوك بر مقام ویرن و رسالۀ نورلە چوق قوّتلی ارتباطی بولونان و سن دە اونلری چوق سودیگڭ حالدە، خدمت نوریەنڭ خارجندە سنڭ شخصڭ ایلە تماسلرینی ایستەمییورسڭ و سنڭ حقّڭدە فضلە حسن ظن بسلەمەینی صحبتدە ترجیح ایدییورسڭ، داها زیادە التفات كوسترییورسڭ، نەدندر؟

[الجواب] اوتوز اوچنجی سوزڭ ایكنجی مكتوبندە دیدیگم كبی، بو زماندە انسانلر، احساننی محتاجلرە چوق بهالی صاتارلر. مثلا، بنم كبی بر بیچارەیی، صالح ویا ولی ظن ایدوب، صوڭرە بر اكمك ویرر و مقابلندە مقبول بر دعا ایستر. بو قدر فیئٓات ویرمكدن ایسە، بو احسانی ایستەمییورم، دییە هدیەلرڭ عدم قبولنە بر سبب كوستردیگم كبی.. رسالۀ نورڭ خاص شاكردلری مستثنا اولارق، باشقەلری بنی بیوك بر مقامدە بیلمكلە، قوّتلی بر علاقە و خدمت كوستریر. هم مقابلندە، دنیادە، اهل ولایت كبی نورانی نتیجەلری ایستر. صوڭرە بزە خدمتی ایلە و علاقەسی ایلە

معنوی احسان ایدر. بویلەلرڭ بو نوع احسانلرینە قارشو، ایستەدیگی فیئٓاتە صاحب اولامدیغم ایچون محجوب اولویورم. اونلر دە اهمّیتسزلكلریمی بیلدكلری وقت انكسار خیالە اوغرارلر، بلكە خدمتدە فتورە دوشرلر. كرچە امور اخرویەدە حرص و قناعتسزلك بر جهتدە مقبولدر. فقط مسلگمزدە و خدمتمزدە -بعض عارضەلر ایلە- انكسار خیال جهتیلە، شكر یرینە، مأیوسیتلە شكوا ایتمەیە سبب اولور.. بلكە دە خدمتدن واز كچر. اونڭ ایچون مسلگمزدە قناعت، دائما شكری و متانتی و ثباتی نتیجە ویردیگی ایچون، اخلاص دائرەسندە، خدمت نقطەسندە چوق حرص و قناعتسزلك كوستردیگمز حالدە، نتیجەلرینە و ثمراتنە قارشو قناعتلە مكلّفز.

مثلا، رسالۀ نور خدمتیلە اسپارطە و جوارندە بیڭلر اهل ایمانە فوق العادە قوّت ایمانیەیی تأمین ایتمك اولان بو نتیجە، بزم فوق العادە خدمتمزە كافیدر.

اون قطب درجەسندە بری چیقسە، بیڭ آدمی درجۀ ولایتە سوق ایتسە، یینە بو نتیجەیی آشاغی یە دوشورتمز. نورڭ حقیقی شاكردلری، بو كبی نتیجەلرە قناعت ایدییورلر. او بیوك قطبڭ مریدلرینڭ قناعت قلبیەلرینی تأمین ایدن استادلرینڭ فوق العادە مقامی و مسئلەلردە حكملری یرینە، رسالۀ نورڭ صارصیلماز حجّتلری -او مریدلرینڭ قناعتلرندن چوق زیادە- شاكردلرینە قناعت ویردیگی كبی، بو حالت و اعتقاد باشقەسنە دە سرایت ایدر، منفعت ویرر. او مریدلرڭ قناعتی ایسە، خصوصی و شخصی قالیر.

حتّی علم منطقدە قضیۀ مقبولە تعبیر ایتدكلری، یعنی بیوك ذاتلرڭ دلیلسز سوزلرینی قبول ایتمكدر. منطقجە یقین و قطعیّتی افادە ایتمییور. بلكە ظنّ غالبلە قناعت ویرر. علم منطقدە برهان یقینی، حسن ظنّە و مقبول شخصلرە باقمییور، جرح ایدیلمز دلیلە باقاركە، بتون رسالۀ نور حجّتلری، بو برهان یقینی قسمندندر. چونكە اهل ولایتڭ عمل و عبادت و سلوك و ریاضتلە كوردیگی حقیقتلر و پردەلر آرقەسندە مشاهدە ایتدكلری حقائق ایمانیە، عینًا اونلر كبی رسالۀ نور عبادت یرندە، علم ایچندە حقیقتە بر یول آچمش.. و سلوك و اوراد یرندە، منطقی برهانلرلە علمی حجّتلر ایچندە حقیقت الحقائقە یول آچمش.. و علم تصوّف و طریقت یرندە، طوغریدن طوغری یە علم كلام ایچندە و علم عقیدە و اصول الدّین ایچندە بر ولایت كبرا یولنی آچمشكە، بو عصرڭ حقیقت و طریقت جریانلرینە غلبە چالان فلسفی ضلالتلرە غلبە ایدییور، میداندەدر.

تشبیهدە خطا اولماسین، ناصلكە قرآنڭ غایت قوّتلی و منطقی حقیقتی، سائر دینلری فلسفۀ طبیعیەنڭ صولتندن و غلبەسندن قورتاروب اونلرە بر نقطۀ استناد اولدی.. تقلیدی و عقلڭ خارجندەكی اصوللرینی دە بر درجە محافظە ایتدی. عینًا اویلە دە، بو زماندە اونڭ بر معجزەسی و نوری اولان رسالۀ نور دخی، فلسفۀ مادّیەدن كلن دهشتلی ضلالت علمیەیە قارشو عوام اهل ایمانڭ تقلیدی اولان ایمانلرینی، او ضلالت علمیەنڭ صولتندن قورتاروب،

عموم اهل ایمانە بر نقطۀ استناد و یاقین و اوزاقلردە اولانلرە دخی ضبط ایدیلمز بر قلعە حكمنە كچمشدركە، بو امثالسز دهشتلی ضلالتلر ایچندە، یینە عوام مؤمنینڭ ایماننی شبهەلردن و اسلامیتنی حقیقتسزلك وسوسەلرندن محافظە ایدییور.

اوت، هر طرفدە، حتّی هند و چیندە اهل ایمان، بو زمانڭ چوق دهشتلی ضلالتنڭ غلبەسندن، عجبا اسلامیتدە بر حقیقتسزلكمی واركە، صارصیلمش دییە شبهەیە و وسوسەیە دوشدیگی وقت بردن ایشیتیركە، بر رسالە چیقمش، ایمانڭ بتون حقیقتلرینی قطعی اثبات ایدر، فلسفەیی مغلوب ایدوب زندقەیی صوصدیرییور، دییە آڭلار. بردن او شبهە و وسوسە زائل اولوب ایمانی قورتولور و قوّت بولور.

[سؤٓالڭ ایكنجی شقّی] سن بر مكتوبڭدە، شاعرانە بر لطیفەیی یعنی قوشلرڭ، مكتوبلری یازمق و اوقومق زمانندە یانڭزە و شاكردلرڭ یاننە كلمەلرینی

او لطیفەیی جدّی بر طرزدە قرداشلریڭە یازدڭ. حالبوكە او قوشلر، حال عالمی و رسالۀ نورڭ حادثاتە قارشو فائدەسنی بیلەجك ماهیّتندن اوزاقدرلر.

[الجواب] امر و اذن الٰهی و حول و قوّت ربّانیە ایلە، عموم حیواناتڭ ملائكەلردن بر چوبانی، بر ناظری اولدیغی كبی.. قوش طائفەسنڭ دە بر چوبانی وار. اونلر

بیلمەسە دە، امر الٰهی ایلە و الهام ربّانی ایلە چوبانلری اونلری سوق ایدر. او سوق فطری ایسە، قوشلرە كلن الهامە طایانیر. قوشلر، الهامە مظهردرلركە، یاشی بر كونلك بر آری یاوروسی، هوادە بر كون مسافەدە كیدر.. او الهام فطری ایلە، او سوق ربّانی ایلە یولنی شاشیرمادن دونوب، كلوب یووەسنە كیرر.

اوت، ناصلكە كرۀ ارض، رسالۀ نور و شاكردلرینە كلن ظلمە اعتراض ایتدی.. و جوّ هوا یاغمورسزلقلە و صوغوقلە رسالۀ نورە كلن تضییقات و مصادرەیی تنقید ایتدی.. و بلوطلر سربستیتنی یاغمورلرلە آلقیشلادی، البتە قوش نوعی دە علاقەدار اولابیلیر.

اوت، انسانڭ بر قسم صنعی قوشلرینڭ بر بومبە یومورطەسی ایلە بر كویی خراب ایدوب بیڭ آدمی محو ایدن جنایتنە و جهنّمی زقّوم یومورطەلری طاشییان او انسانٖی قوشلرڭ تخریبجی قسمی هم كرۀ ارضە، هم نوع بشرە مستبدانە، مرحمتسز تخریباتنە قارشو، بو حیوانی قوشلر، تأثیرلی بر صورتدە استقبالی تنویر ایدن رسالۀ نوری البتە معنًا تبریك ایدوب آلقیشلار، دییە صورتندەكی حادثە، كرچە چوق طاتلی بر لطیفەدر، فقط چوق اینجە بر حقیقت دخی ایچندە وار.

سعید النّورسی

امرطاغ لاحقەسی ١: ١٢٣

لاحقە ٩: "رسالۀ نور حقائق اسلامیەیە دائر احتیاجلرە كافی كلییور، باشقە اثرلرە احتیاج بیراقمییور"

رسالۀ نور طلبەلرینڭ خاصلری اولان صاحب و وارثلری و خصلرینڭ خاصلری اولان اركان و اساسلری اولان قرداشلریمە بوكونلردە وقوع بولان بر حادثە مناسبتیلە بیان ایدییورمكە:

رسالۀ نور، حقائق اسلامیەیە دائر احتیاجلرە كافی كلییور، باشقە اثرلرە احتیاج بیراقمییور. قطعی و چوق تجربەلرلە آڭلاشیلمشكە، ایمانی قورتارمق و قوّتلندیرمك و تحقیقی یاپمەنڭ اڭ قیصە و اڭ قولای یولی رسالۀ نوردەدر. اوت، اون بش سنە یرینە اون بش هفتەدە رسالۀ نور او یولی كسدیرر، ایمان حقیقی یە ایصال ایدر.

بو فقیر قرداشڭز، یگرمی سنەدن اوّل كثرت مطالعە ایلە بعضًا بر كوندە بر جلد كتابی آڭلایارق مطالعە ایدركن، یگرمی سنەیە یاقیندركە، قرآن و قرآندن كلن رسالۀ نور بڭا كافی كلییورلردی. بر تك كتابە محتاج اولمدم، باشقە كتابلری یانمدە بولوندیرمدم. رسالۀ نور چوق متنوّع حقائقە دائر اولدیغی حالدە، تألیفی زمانندە، یگرمی سنەدنبری بن محتاج اولمدم. البتە سز، یگرمی درجە داها زیادە محتاج اولمامق لازم كلیر.

هم مادام بن سزلرە قناعت ایتدم و ایدییورم، باشقەلرە باقمییورم، مشغول

اولمایورم. سز دخی رسالۀ نورە قناعت ایتمەڭز لازمدر، بلكە بو زماندە الزمدر.

هم شیمدیلك بعض علمانڭ یڭی اثرلرندە مسلك و مشرب آیری و بدعتلرە مساعد كیتدیگی ایچون، رسالۀ نور زندقەیە قارشو حقائق ایمانیەیی محافظەیە چالیشمەسی كبی، بدعتە قارشو دە حروف و خطّ قرآنی محافظە ایتمك بر وظیفەسی ایكن، خاص طلبەلردن بریسی، بالفعل حروف و خطّ قرآنی یی درس ویردیگی حالدە، سرّی بیلینمز بر هوسلە، حروف و خطّ قرآنی یە، علم دین پردەسندە تأثیرلی بر صورتدە ضربە اوران بعض خواجەلرڭ ضربەدە استعمال ایتدكلری اثرلری آلمشلر. خبرم اولمادن طاغدە، شدّتلی بر طرزدە او خاص طلبەلرە قارشو بر كركینلك حسّ ایتدم، صوڭرە ایقاظ ایتدم. الحمد للّٰه آییلدیلر. ان شٓاء اللّٰه تمامًا قورتولدیلر.

ای قرداشلرم! مسلگمز تجاوز دگل، تدافعدر. هم تخریب دگل، تعمیردر. هم حاكم دگل، محكومز. بزە تجاوز ایدن، حدسزدرلر. مسلكلرندە، البتە چوق مهم و بزم دە مالمز حقیقتلر وار. او حقیقتلرڭ انتشارینە، بزە احتیاجلری یوقدر. بیڭلر او شیلری اوقور، نشر ایدر آدملری وار. اونلرڭ یاردیملرینە قوشمەمزلە، اوموزیمزدەكی چوق اهمّیتلی وظیفە زدەلنیر و محافظەسی لازم اولان و برر طائفەیە مخصوص بر قسم اساسلر و عالی حقیقتلر غائب اولمەسنە وسیلە اولور. مثلا، حادثات زمانیە بهانەسیلە وهّابیلك و ملامیلگڭ

بر نوعنە زمین احضار ایتمك طرزندە، بعض رخصت شرعیەیی پردە یاپوب اثرلر یازیلمش.

رسالۀ نور، كرچە عمومە تشمیل صورتیلە دگل، فقط هر حالدە حقیقت اسلامیەنڭ ایچندە جریان ایدوب كلن اساس ولایت و اساس تقوا و اساس عزیمت و اساسات سنت سنیە كبی اینجە، فقط اهمّیتلی اساسلری محافظە ایتمك بر وظیفۀ اصلیەسیدر. سوق ضرورتلە، حادثاتڭ فتوالریلە اونلر ترك ایدیلمز.

سعید النّورسی

قسطمونی لاحقەسی: ٩٣

لاحقە ١٠: "نەدن رسالۀ نورڭ توحید و ایمان اوزرندەكی تحشداتی كیتدكجە زیادەلشییور؟"

[بوكونلردە معنوی بر محاورەدە بر سؤٓال و جوابی دیڭلەدم. سزە بر قیصە خلاصەسنی بیان ایدەیم.]

بری دیدی: رسالۀ نورڭ ایمان و توحید ایچون بیوك تحشیداتلری و كلّی تجهیزاتلری كیتدكجە چوغالییور. و اڭ معنّد بر دینسزی صوصدیرمق ایچون او تحشیداتڭ یوزدە بریسی كافی ایكن، نەدن بو درجە حرارتلە داها یڭی تحشیدات یاپییور؟

اوڭا جوابًا دیدیلر: رسالۀ نور، یالڭز بر جزئی تخریباتی و بر كوچك خانەیی تعمیر ایتمییور. بلكە كلّی بر تخریباتی و اسلامیتی ایچنە آلان و طاغلر بیوكلگندە

طاشلری بولونان بر محیط قلعەیی تعمیر ایدییور. یالڭز خصوصی بر قلبڭ و خاص بر وجدانڭ اصلاحنە چالیشمایور. بلكە بیڭ سنەدنبری تراكم ایدن و تدارك ایدیلن مفسد آلتلرلە

دهشتلی رخنەلنن قلب عمومی و افكار عامّەیی و عمومڭ و باخصوص عوام مؤمنینڭ استنادكاهلری اولان اسلامی اساسلر و جریانلر و شعائرلر قیریلمەسیلە بوزولمەیە یوز طوتان وجدان عمومی یی، قرآنڭ اعجازیلە.. و كنیش یارەلرینی، قرآنڭ و ایمانڭ علاجلریلە تداوی ایتمەیە چالیشییور.

البتە بویلە كلّی و دهشتلی رخنەلرە و یارەلرە حقّ الیقین درجەسندە و طاغلر قوّتندە حجّتلر و جهازلر و بیڭ تریاق خاصیتندە مجرَّب علاجلر و حدسز ادویەلر بولونمق كركدركە، بو زماندە قرآن معجز البیانڭ اعجاز معنویسندن چیقان رسالۀ نور، او وظیفەیی كورمكلە برابر، ایمانڭ حدسز مرتبەلرندە ترقّیات و انكشافاتە مداردر دییەرك اوزون بر مكالمە جریان ایتدی. بن دە تمامًا ایشیتدم، حدسز شكر ایتدم.

بو حادثە مناسبتیلە یینە بو كونلردە خاطریمە كلن بر واقعەیی بیان ایدییورم. بن نماز تسبیحاتنڭ آخرندە، اوتوز اوچ دفعە كلمۀ توحید ذكر ایدركن بردن قلبە كلدیكە: حدیث شریفدە [بعضًا بر ساعت تفكّر، بر سنە عبادت حكمنە كچر.] رسالۀ نوردە او ساعت وار. چالیش، او ساعتی بول! اخطار ایدیلدی.

سعید النّورسی

قسطمونی لاحقەسی: ٣٢

لاحقە ١١: "قونوشان یالڭز حقیقتدر"

قونوشان یالڭز حقیقتدر

رسالۀ نوردە اثبات ایدیلمشدركە، بعضًا ظلم ایچندە عدالت تجلّی ایدر. یعنی انسان بر سببلە بر حقسزلغە، بر ظلمە معروض قالیر، باشنە بر فلاكت كلیر، حپسە دە محكوم اولور، زندانە دە آتیلیر. بو سبب حقسز اولور، بو حكم بر ظلم اولور. فقط بو واقعە، عدالتڭ تجلّیسنە بر وسیلە اولور. قدر الٰهی باشقە بر سببدن طولایی جزایە، محكومیتە استحقاق كسب ایتمش اولان او كیمسەیی، بو دفعە بر ظالم ألیلە جزایە چارپدیرر، فلاكتە دوشورور. بو، عدالت الٰهیەنڭ بر نوع تجلّیسیدر.

بن شیمدی دوشونویورم. یگرمی سكز سنەدر ولایت ولایت، قصبە قصبە طولاشدیریلییورم. محكمەدن محكمەیە سوروكلنییورم. بڭا بو ظالمانە اشكنجەلری یاپانلرڭ بڭا عطف ایتدكلری صوچ نەدر؟ دینی سیاستە آلت یاپمقمی؟ فقط بونی نە ایچون تحقّق ایتدیرەمییورلر؟ چونكە حقیقت حالدە بویلە بر شی یوقدر. بر محكمە آیلرجە، سنەلرجە صوچ بولوب دە بنی محكوم ایتمەیە اوغراشییور. او بیراقییور، دیگر بر محكمە عین مسئلەدن طولایی بنی تكرار محاكمە آلتنە آلییور. بر مدّت دە او اوغراشییور، بنی تضییق ایدییور، تورلی تورلی اشكنجەلرە معروض قیلییور. او دە نتیجە الدە ایدەمییور، بیراقییور. بو دفعە بر اوچنجیسی یاقەمە یاپیشییور. بویلەجە مصیبتدن مصیبتە، فلاكتدن فلاكتە سوروكلنوب

كیدییورم. یگرمی سكز سنە عمرم بویلە كچدی. بڭا اسناد ایتدكلری صوچڭ اصلی و اساسی اولمدیغنی نهایت كندیلری دە آڭلادیلر.

اونلر بو اتهامی قصدًا می یاپدیلر، یوقسە بر وهمەمی قاپیلدیلر؟ ایستر قصد اولسون، ایستر وهم اولسون، بن بویلە بر صوچلە مناسبت و علاقەم اولمدیغنی كمال قطعیتلە یقینًا و وجدانًا بیلییورم. دینی سیاستە آلت ایدەجك بر آدم اولمادیغمی بتون انصاف دنیاسی دە بیلییور. حتّی بنی بو صوچلە اتهام ایدنلر دە بیلییورلر.

او حالدە نەدن بڭا بو ظلمی یاپمقدە اصرار ایدوب طوردیلر؟ نەدن بن صوچسز و معصوم اولدیغم حالدە، بویلە دواملی بر ظلمە، معنّد بر اشكنجەیە

معروض قالدم؟ نەدن بو مصیبتلردن قورتولامدم؟ بو احوال، عدالت الٰهیەیە مخالف دوشمزمی؟

بر چیرك عصردر، بو سؤآللرڭ جوابلرینی بولامییوردم. بڭا ظلم و اشكنجە یاپدقلرینڭ حقیقی سببنی شیمدی آڭلادم. بن كمال تأثّرلە سویلەیورمكە، بنم صوچم، خدمت قرآنیەمی مادّی و معنوی ترقّیاتمە، كمالاتمە آلت یاپمقمش.

شیمدی بونی آڭلایورم، حسّ ایدییورم، اللّٰهە بیڭلرلە شكر ایدییورمكە، اوزون سنەلر اختیارم خارجندە اولارق خدمت ایمانیەمی مادّی و معنوی كمالات و ترقّیاتمە و عذابدن و جهنّمدن قورتولمەمە و حتّی سعادت ابدیەمە وسیلە یاپمقلغمە، یاخود هر هانكی بر مقصدە آلت یاپمقلغمە معنوی غایت قوّتلی مانعەلر