چویردیگندن، شكوا یرندە شكر ایتمەلری اقتضا ایدییور. و فقیر و ضعیف قسمی ایسە، ذاتًا حپسڭ خارجی دە اونلرە فائدەسز، ثوابسز، مسئولیتلی مشقّت ویردیگندن، بو خیرلی و چوق ثوابلی و مسئولیّتسز و آرقداشلرینڭ متقابل تسلّیلریلە خفیفلشن مشقّت اونلر ایچون مدار شكراندر.

سعید النّورسی

شعاعلر ٢: ٣٨٣

[ ٦]

[رسالۀ نورڭ خصوصیتلری]

لاحقە ٣٦: (رسالۀ نورلردەكی قوت و تأثیرڭ، سائر مفسّر و عارفلرڭ سوزلرندە بولونمامەسنڭ سرّی)

بندن سؤٓال ایدییورسڭ: نەدن سنڭ قرآندن یازدیغڭ سوزلردە بر قوّت، بر تأثیر واركە، مفسّرلرڭ و عارفلرڭ سوزلرندە نادرًا بولونور؟ بعضًا بر سطردە بر صحیفە قدر قوّت وار. بر صحیفەدە، بر كتاب قدر تأثیر بولونویور.

كوزل بر جوابدر [الجواب] شرف، اعجاز قرآنە عائد اولدیغندن، و بڭا عائد اولمدیغندن بلا پروا دیرم: اكثریت اعتباریلە اویلەدر. چونكە یازیلان سوزلر، تصوّر دگل، تصدیقدر. تسلیم دگل، ایماندر. معرفت دگل، شهادتدر، شهوددر. تقلید دگل، تحقیقدر.

التزام دگل، اذعاندر. تصوّف دگل، حقیقتدر. دعوا دگل، دعوا ایچندە برهاندر. شو سرّڭ حكمتی بودركە: اسكی زماندە، اساسات ایمانیە محفوظ ایدی. تسلیم قوی ایدی. تفرّعاتدە، عارفلرڭ معرفتلری دلیلسز دە اولسە، بیاناتلری مقبول ایدی، كافی ایدی. فقط شو زماندە ضلالت فنّیە، ألنی اساساتە و اركانە اوزاتمش اولدیغندن، هر دردە لایق دوایی احسان ایدن حكیم رحیم اولان ذات ذوالجلال، قرآن كریمڭ اڭ پارلاق مظهر اعجازندن اولان تمثیلاتندن بر شعلەسنی، عجز و ضعفمە، فقر و احتیاجمە مرحمتًا، خدمت قرآنە عائد یازیلریمە احسان ایتدی. فللّٰە الحمد، سرّ تمثیل دوربینیلە، اڭ اوزاق حقیقتلر غایت یاقین كوستریلدی. هم سرّ تمثیل جهت الوحدتیلە، اڭ طاغینیق مسئلەلر طوپلاتدیریلدی. هم سرّ تمثیل نردبانیلە، اڭ یوكسك حقائقە قولایلقلە یتیشدیریلدی. هم سرّ تمثیل پنجرەسیلە، حقائق غیبیەیە، اساسات اسلامیەیە شهودە یاقین بر یقین ایمانی حاصل اولدی. عقل ایلە برابر وهم و خیال، حتّی نفس و هوا تسلیمە مجبور اولدیغی كبی، شیطان دخی تسلیم سلاحە مجبور اولدی.

[الحاصل] یازیلرمدە نە قدر كوزللك و تأثیر بولونسە، آنجق تمثیلات قرآنیەنڭ لمعاتندندر. بنم حصّەم یالڭز شدّت احتیاجملە طلبدر. و غایت عجزملە تضرّعمدر. درد بنمدر، دوٓاء قرآنڭدر

سعید النّورسی

بارلە لاحقەسی: ١٣

لاحقە ٣٧: "رسالۀ نورڭ ویردیگی ذوق و شوق و ایمان و اذعانڭ سائر كتابلردن داها چوق قوّتلی اولمەسنڭ سببی نەدر؟"

عزیز و صدّیق و فداكار و وفاكار قرداشلرم و خدمت قرآنیە و ایمانیەدە قوّتلی و قیمتلی و چالیشقان و مقتدر آرقداشلرم،

اوت، بو عصرڭ اهمّیتلی و معنوی و علمی بر مرشدی اولان رسالۀ نورڭ هیئت مجموعەسی، سائر شخصی بیوك مرشدلر كبی، كندینە موافق و حقیقت علمیەیە مناسب اولارق، برقاچ نوعدە و بالخاصّە حقائق ایمانیەنڭ

اظهارندە، انتشارندە عظیم كرامتلری اولدیغی كبی.. اوچ كرامت ظاهرەسی بولونان معجزات احمدیەؐ، اوننجی سوز و یگرمی طقوزنجی سوز و آیت الكبرا كبی چوق رسالەلری دخی، هر بری كندینە مخصوص كرامتلری بولوندیغنی چوق امارەلر و واقعەلر بڭا قطعی بر قناعت ویرمش. حتّی سكراتدە بولونان طلبەلرینە ایماننی قورتارمق ایچون بر مرشد كبی یتیشدیگنە، متعدّد واقعەلر شبهە بیراقمییور.

هم كذا هر بری، بر ساعت تفكّر، بر سنە عبادت نافلە حكمندە.. بر مثالی، حزب الاكبردر دییە مشاهدە ایتدم و قناعت كتیردم. [حاشیە]

سزلرە رسالۀ نورڭ حزب اكبرینی و قرآنڭ حزب اعظمنی كوندرمك ایستردم. فقط حزب اعظم چوق اوزون اولدیغندن داها یازدیرامدم. حزب اكبر ایسە، ترجمە ایتمك ایستەدم، شیمدیلك واز كچدم. سزڭ كبی قرداشلرم ترجمەیە محتاج اولمدیغنی دوشونوب، یالڭز عربی صورتنی كوندرەجگم، ان شٓاء اللّٰه.

سزلرە اوّلجە آیت الكبرانڭ برنجی مقامنڭ خلاصەسی نامیلە كوندردیگم پارچە، او حزبڭ اساسیدر. اختیارسز، او اساسە كوچك فقرەلر و بعض قیدلر علاوە ایدیلدیگی وقت، بردن باشقە بر شكل آلدی. انكشاف و انبساط ایدرك آیت الكبرانڭ مثال مصغّری كبی شهادت توحیدیەسی پارلادی، معنالری ضیالاندی. روحمە، قلبمە، فكریمە بیوك بر انشراح ویرمگە باشلادی. بن دە اڭ یورغونلق و اوصانچ زمانمدە اونی متفكّرانە اوقودم، بیوك ذوق و شوق حسّ ایتدم.

[بر سؤٓالە جواب اولارق] یازدیغم بر فقرەیی، سزە دە فائدەسی اولور احتمالیلە بیان ایدییورم. شویلەكە: اولیا دیوانلرینی و علمانڭ كتابلرینی چوق مطالعە ایدن بر قسم ذاتلر طرفندن صورولدی: رسالۀ نورڭ ویردیگی ذوق و شوق و ایمان و اذعان، اونلردن چوق قوّتلی اولمەسنڭ سببی نەدر؟

[الجواب] اسكی مبارك ذاتلرڭ اكثری دیوانلری و علمانڭ بر قسم رسالەلری، ایمانڭ و معرفتڭ نتیجەلرندن و میوەلرندن و فیضلرندن بحث ایدرلر.

اونلرڭ زمانلرندە ایمانڭ اساساتنە و كوكلرینە هجوم یوقدی و اركان ایمانیە صارصیلمایوردی. شیمدی ایسە، ایمان و معرفتڭ كوكلرینە و اركاننە شدّتلی و جماعتلی بر صورتدە تعرّض ایدیلییور. و او دیوانلرڭ و رسالەلرڭ چوغی، خاص مؤمنلرە و فردلرە خطاب ایدییورلر. بو زمانڭ شدّتلی تعرّضنی دفع ایدەمییورلر.

رسالۀ نور ایسە، قرآنڭ بر معنوی معجزەسی اولارق ایمانڭ اساساتنی قورتارییور. موجود و محكم ایماندن استفادە جهتنە دگل، بلكە چوق دلیللر و پارلاق برهانلرلە ایمانڭ اثباتنە و تحقّقنە و محافظەسنە و شبهاتدن قورتاریلمەسنە خدمت ایتدیگندن، هركسە بو زماندە اكمك كبی، علاج كبی لزومی وار اولدیغنی، دقّتلە باقانلر حكم ایدییورلر.

او دیوانلر دیرلركە: ولی اول، كور. مقاماتە چیق، باق. نورلری، فیضلری آل. رسالۀ نور ایسە دیر: هر كیم اولورسەڭ اول، باق، كور. یالڭز كوزیڭی آچ، حقیقتی مشاهدە ایت. سعادت ابدیەنڭ آناختاری اولان ایمانڭی قورتار.

هم رسالۀ نور، اڭ اوّل ترجماننڭ نفسنی اقناعە چالیشیر، صوڭرە باشقەلرینە باقار. البتە ترجماننڭ نفس امّارەسنی تام اقناع ایدن و وسوسەسنی تمامًا ازالە ایدن بر درس، غایت قوّتلی و خالصدركە، بو زماندە جماعت شكلنە كیرمش دهشتلی بر شخص معنوئ ضلالت قارشوسندە، تك باشیلە غالبانە مقابلە ایدر.

هم رسالۀ نور، سائر علمانڭ اثرلری كبی، یالڭز عقلڭ آیاغیلە و نظریلە درس ویرمییور. و اولیا مثللو، یالڭز قلبڭ كشف و ذوقیلە حركت ایتمییور. بلكە عقلڭ و قلبڭ اتّحاد و امتزاجی و روح و سائر لطائفڭ تعاونی آیاغیلە حركت ایدرك اَوْجِ اعلایە اوچار. تعرّض ایدن فلسفەنڭ، دگل آیاغی، بلكە كوزی یتیشەمدیگی یرلرە چیقار. حقائق ایمانیەیی كور كوزلرینە دە كوستریر.

سعید النّورسی

قسطمونی لاحقەسی: ٨

لاحقە ٣٨: (رسالۀ نورە عائد كرامتلرڭ اظهار ایدیلمەسنڭ حكمتلری)

عزیز، صدّیق، صارصیلماز، ثباتكار، فداكار، وفادار قرداشلرم،

بیلیرسڭزكە، آنقرە اهل وقوفی، رسالۀ نورە عائد كرامتلری و اشارات غیبیەلری

انكار ایدەمەمشلر. یالڭز، یاڭلیش اولارق او كرامتلردە حصّەدار اولدیغمی ظن ایدوب اعتراض ایتمشلر. و "بویلە شیلر كتابدە یازیلماملی ایدی. كرامت اظهار ایدیلمز" دیمشلر. بونلرڭ بو خفیف تنقیدلرینە مقابل مدافعاتمدە اونلرە جوابًا دیمشدمكە: "او كرامتلر بڭا عائد دگلدر. و او كرامتلرە صاحب اولمق بنم حدّم دگلدر. بلكە قرآنڭ معجزۀ معنویەسنڭ ترشّحاتی و لمعەلریدركە، حقیقی بر تفسیری اولان رسالۀ نوردە كرامتلر شكلنی آلمشدر. او كرامتلر رسالۀ نور شاكردلرینڭ قوّۀ معنویەلرینی تقویە ایتمك ایچون اكرامات الٰهیە نوعندندر. اكرام ایسە، اظهاری بر شكردر، جائزدر، هم مقبولدر."

شیمدی اهمّیتلی بر سببە بناءً جوابی بر پارچە ایضاح ایدەجگم. و نە ایچون اظهار ایدییورم و نە ایچون بو نقطەدە بو قدر تحشیدات یاپییورم و نە ایچون بو برقاچ آیدر بو موضوعدە چوق ایلری كیدییورم و نە ایچون اكثر مكتوبلر او كرامتە باقییور؟ دییە معنًا سؤٓال ایدیلدی.

[الجواب] رسالۀ نورڭ خدمت ایمانیەسندە، بو زماندە بیڭلر تخریباتجیلرە مقابل، یوز بیڭلر تعمیراتجی لازم كلیركن -.. هم بنملە برابر لااقل یوزر كاتب و یاردیمجی بولونمەیە احتیاج واركن -.. دگل چكینمك و تماس ایتمەمك، بلكە ملّتڭ و اهل ادارەنڭ تقدیر ایلە و تشویق ایلە یاردیم ایتمەلری و تماس ایتمەلری ضروری ایكن -.. و او خدمت ایمانیە حیات باقیەیە باقدیغی ایچون، حیات فانیەنڭ مشغلەلرینە و فائدەلرینە ترجیح ایتمك اهل ایمانە واجب ایكن -.. كندیمی مثال اولارق دیرمكە: بنی هر شیدن

و تماسدن و یاردیمجیلردن منع ایتمك ایلە برابر، علیهمزدە اولانلر بتون قوّتلریلە آرقداشلریمڭ قوّۀ معنویەلرینی قیرمق و بندن و رسالۀ نوردن صوغوتمق.. و بنم كبی اختیار، خستە، ضعیف، غریب، كیمسەسز بیچارەیە، بیڭلر آدمڭ كورەجگی وظیفەیی باشنە یوكلەمك.. و تجرید و تضییقلردە مادّی بر خستەلق نوعندن انسانلرلە تماسدن و اختلاطدن چكیلمەیە مجبور اولمقلغم..

هم او درجە تأثیرلی بر طرزدە خلقلری ئوركوتمككە، اڭ زیادە مربوط كورونن بعض دوستلرم بڭا سلام ویرمەمك، حتّی بعضی، نمازی دە ترك ایتمك درجەسندە ئوركوتمك ایلە قوّۀ معنویەیی قیرمق جهتلرندن و سببلرندن،

اختیارم خارجندە بتون او مانعلرە قارشو رسالۀ نور شاكردلرینڭ قوّۀ معنویەلرینڭ تقویەسنە مدار اكرامات الٰهیەیی بیان ایدرك رسالۀ نور اطرافندە معنوی بر تحشیدات یاپدیرمق.. و رسالۀ نور كندی كندینە، تك باشیلە باشقەلرینە محتاج اولمایارق بر اوردو قدر قوّتلی اولدیغنی كوسترمك حكمتیلە بو چشیت شیلر بڭا یازدیریلمشدر. یوقسە حاشا، كندیمزی صاتمق و بگندیرمك و تمدّح ایتمك و خودفروشلق ایتمك، رسالۀ نورڭ اهمّیتلی بر اساسی اولان اخلاص سرّینی بوزمقدر. ان شٓاء اللّٰه رسالۀ نور كندی كندینە هم كندینی مدافعە ایتدیگی، هم قیمتنی تام كوستردیگی كبی، بزی دە معنًا مدافعە ایدوب قصورلریمزی عفو ایتدیرمەیە وسیلە اولاجقدر.

سعید النّورسی

امرطاغ لاحقەسی ١: ٨١

لاحقە ٣٩: (حضرت استادڭ قرآن و رسالەدەكی تكرارلرڭ حكمتی ایلە برلكدە حضرت علینڭ رسالۀ نورە و آیت الكبرا رسالەسنە زیادە اهمّیت ویرمەسنڭ سببنی ایضاح ایتمەسی)

عزیز قرداشلرم،

سزڭلە پك چوق علاقەدارم و كوروشمەیە چوق مشتاقم. و وضعیتڭزی بو صوغوق قیشدە مراق ایدییورم. خیالًا سزڭلە كوروشوركن بر ایكی نقطە خاطرە كلدی، بیان ایدییورم:

[برنجیسی] اون طقوزنجی سوزڭ آخرندە، قرآندەكی تكراراتڭ اكثر حكمتلری رسالۀ نوردە دخی جریان ایدر. بالخاصّە ایكنجی حكمتی تام تامنە واردر.

او حكمت شودر: هركس قرآنە محتاجدر. فقط هركس هر وقت بتون قرآنی اوقومغە مقتدر اولاماز. فقط بر سورەیە غالبًا مقتدر اولور. اونڭ ایچون اڭ مهم مقاصد قرآنیە اكثر اوزون سورەلردە درج ایدیلەرك، هر بر سورە بر قرآن حكمنە كچمشدر. دیمك هیچ كیمسەیی محروم ایتمەمك ایچون، حشر و توحید و قصّۀ موسیؑ كبی بعض مقصدلر تكرار ایدیلمش.

عینًا بو اهمّیتلی حكمت ایچوندركە، بعض دفعە خبرم اولمادن، اختیارم و رضام اولمدیغی حالدە، اینجە حقائق ایمانیە و قوّتلی حجّتلر متعدّد رسالەلردە تكرار ایدیلمش. بن چوق حیرت ایدییوردم. نەدن بونلر بڭا اونوتدیریلمش، تكرار یازدیریلمش؟ صوڭرە قطعی بر صورتدە بیلدمكە، هركس بو زماندە رسالۀ نورە محتاجدر. فقط عمومنی الدە ایدەمز. ایتسە دە تام اوقویاماز. فقط كوچك بر رسالۀ نور حكمنە كچمش بر رسالۀ جامعەیی

الدە ایدەبیلیر. اكثر وقتلردە محتاج اولدیغی مسئلەلری اوندن اوقویابیلیر. و غدا كبی، هر زمان احتیاج تكرار ایتدیگی كبی، او دە مطالعەسنی تكرار ایدر.

(...)

[اوچنجیسی] عزیز قرداشلرم! چوق دفعە قلبمە كلییوردی: نەدن امام علی رضی اللّٰه عنه، رسالۀ نورە و بالخاصّە آیت الكبرا رسالەسنە زیادە اهمّیت ویرمش؟ دییە سرّینی بكلەیوردم. للّٰە الحمد، او سرّ اخطار ایدیلدی. انكشاف ایدن او سرّە شیمدیلك قیصە بر اشارت ایدییورم. شویلەكە:

رسالۀ نورڭ ممتاز بر خاصیتی، ایمانڭ اڭ صوڭ و اڭ كلّی استناد نقطەسی قوی و قطعی بیان ایدیلدیگندن، بو خاصیت آیت الكبرا رسالەسندە فوق العادە پارلاق كورونویور. بو عجیب عصردە مبارزۀ كفر و ایمان اڭ صوڭ نقطۀ استنادە سرایت ایدرك طایانییور.

مثلا، ناصلكە غایت بیوك بر میدان محاربەسندە و ایكی طرفڭ بتون قوّتلری طوپلاندیغی بر صیرەدە ایكی طابور چارپیشییورلر. دوشمان طرفی اڭ بیوك اوردوسنڭ جهازات مخربەسنی كندی طابورینە امداد و قوّۀ معنویەسنی فوق العادە تقویە ایچون هر واسطەیی استعمال ایدر. اهل ایمان طابورینڭ قوّۀ معنویەسنی بوزمق و افرادینڭ تساندینی قیرمق ایچون هر وسیلەیی قوللانیر. اهمّیتلی بر استنادكاهی كندینە تمایل ایدر. احتیاط قوّتنی طاغیتیر. مسلمان طابورینڭ هر بر نفرینە قارشو، جمعیّت و قومیتەجیلك روحیلە متساند بر جماعت كوندریر. بتون بتون قوّۀ معنویەسنی محو ایتمگە چالیشدیغی بر هنگامدە، خضر كبی بری چیقار، او طابورە دیر:

مأیوس اولما! سنڭ اویلە صارصیلماز بر نقطۀ استنادڭ و اویلە مغلوب اولماز محتشم اوردولرڭ و اویلە توكنمز احتیاط قوّتلرڭ واركە، دنیا طوپلانسە قارشوسنە چیقاماز. كائناتی طاغیتامایان اونی طاغیتاماز.

شیمدیلك مغلوبیّتڭ سببی، بر جماعتە و بر شخص معنوی یە قارشو، بر نفری كوندرمەڭزدر. چالیشكە، هر بر نفرڭ، استناد نقطەلری اولان دائرەلردن معنًا استفادە ایتدیگی قوّتلی قوّۀ معنویە ایلە بر شخص معنوی و جمعیّت حكمنە كچسین دیدی. و تام قناعت ویردی.

عینًا اویلە دە، اهل ایمانە هجوم ایدن اهل ضلالت، بو عصر جماعت زمانی اولدیغی جهتلە، جمعیّت و قومیتەجیلك مایەسیلە بر شخص معنوی و بر روح خبیث اولمش. مسلمان عالمندەكی وجدان عمومی یی و قلب كلّی یی بوزویور. و عوامڭ تقلیدی اولان اعتقادلرینی حمایە ایدن اسلامی پردۀ علوی یی ییرتییور. و حیات ایمانیەیی یاشاتان و عنعنە ایلە كلن حسّیات متوارثەیی یاقییور.

هر بر مسلمان تك باشیلە بو دهشتلی یانغیندن قورتولمغە مأیوسانە چابەلاركن، رسالۀ نور خضر كبی امدادە یتیشدی. كائناتی احاطە ایدن صوڭ اوردوسنی [حاشیە]كوستردی. و او صوڭ اوردودن مقاومتسوز مادّی و معنوی امداد كتیرمك خدمتندە خارقە بر امربر نفری اولارق آیت الكبرا رسالەسنی امام علی رضی اللّٰه عنه كشفًا كورمش، اهمّیتلە كوسترمش. تمثیلدەكی سائر نقطەلری تطبیق ایدیڭز، تا او سرّڭ بر خلاصەسی كورونسون.

سعید النّورسی

قسطمونی لاحقەسی: ٦٤

[ ٧]

[رسالۀ نور طلبەسی]

[آ-رسالۀ نور طلبەسنڭ وظیفەسی]

لاحقە ٤٠: (رسالۀ نور شاكردلرینڭ وظیفەسی خدمتدر و وظیفۀ الٓهیەیە قاریشمامقدر)

عزیز، صدّیق، مبارك قرداشلرم،

حافظ علینڭ بو دفعەكی مكتوبندە چوق مبارك دعالری، بنی و بزی اڭ درین روحمزدن مسرور ایدوب شكرە سوق ایتدی. و هر مصیبتزدەیە و حزن و كدرلرە دوشنلرە، معنای اشاریسیلە مَدَدْرَسْ و خلاصكار و شفا و مدار سرور اولان [اَلَمْ نَشْرَحْ لَكَ صَدْرَكَ] و [اِنَّ مَعَ الْعُسْرِ یُسْرًا] هر مصیبتزدەیە باقدیغی كبی، بو كچن خستەلق جهتیلە بزە دە باقییور. اوت، حافظ علی او نقطەیی تام كورمش. بن دە تصدیقًا دیرمكە: اگر او خستەلق یگرمی درجە تضاعف ایتسە ایدی، بزلرە قزاندیردیغی نتیجەیە نسبتًا یینە اوجوز دوشردی و رحمت اولوردی. فقط حافظ علینڭ كندی استادی حقّندە، بنم حدّمدن پك چوق زیادە اسناد ایتدیگی مزیت و معصومیّتی، اونڭ معصوم لسانیلە حقّمدە مدح اولارق دگل، بلكە بر نوع دعا اولارق تصوّر ایدییورز.

هم حافظ علینڭ، صاوە كبی یرلر، قریەلر و اسپارطە برر مدرسۀ نوریە حكمنە كچمەسی و رسالۀ نورڭ صادق شاكردلری خارق العادە اولارق كوندن كونە یوكسلمەلری و تنوّر ایتمەلری، بزلری، بلكە آناطولی یی، بلكە عالم اسلامی مسرور و مفرّح ایدن بر حقیقتلی خبر تلقّی ایدییورز.

آخر فقرەسندە، مخبر صادقڭؐ خبر ویردیگی، معنوی فتوحات یاپمق و ظلماتی طاغیتمق زمان و زمین همن همن كلمەسی، دییە فقرەسنە بتون روح و جانمز ایلە رحمت الٰهیەدن نیاز ایدییورز، تمنّی ایدییورز.

فقط بز رسالۀ نور شاكردلری ایسە، وظیفەمز خدمتدر. وظیفۀ الٰهیەیە قاریشمامق و خدمتمزی اونڭ وظیفەسنە بنا ایتمكلە بر نوع تجربە یاپمامق اولمقلە برابر، كمیّتە دگل، كیفیتە باقمق، هم چوقدنبری سقوط اخلاقە و حیات دنیویەیی هر جهتلە حیات اخرویەیە ترجیح ایتدیرمەیە سوق ایدن دهشتلی اسباب آلتندە رسالۀ نورڭ

شیمدی یە قدر فتوحاتی و زندقەلرڭ و ضلالتلرڭ صولتلرینی قیرمەسی و یوز بیڭلر بیچارەلرڭ ایمانلرینی قورتارمسی و هر بری یوزە و بیڭە مقابل، یوزر و بیڭلر حقیقی مؤمن طلبەلری یتیشدیرمسی، مخبر صادقڭؐ اخبارینی عینًا تصدیق ایتمش و وقوعاتلە اثبات ایتمش و ان شٓاء اللّٰه داها ایدەجك. و اویلە كوكلشمشكە، ان شٓاء اللّٰه هیچ بر قوّت آناطولینڭ سینەسندن اونی چیقاراماز. تا آخر زماندە، حیاتڭ كنیش دائرەسندە، اصل صاحبلری

اولان، یعنی مهدی و شاكردلری جناب حقّڭ اذنیلە كلیر، او دائرەیی كنیشلتدیرر و او تخوملر سنبللنیر. بزلر دە قبریمزدن سیر ایدوب اللّٰهە شكر ایدرز.

سعید النّورسی

قسطمونی لاحقەسی: ١٣٥

لاحقە ٤١: "ایمانی قورتارمق و قرآنە خدمت ایچون، مكّەدە اولسەم دە بورایە كلمك لازمدی"

عزیز، صدّیق قرداشم و بو فانی دنیادە حمیّتلی و جدّی بر آرقداشم،

[اوّلا] بتون دوستلرم و همشهریلرمدن اڭ زیادە ذاتڭز و بعض ارضروملی ذاتلر، بنم بو اشكنجەلی و مظلومیّت حالتمدە شفقتكارانە جدّی علاقەدارلغڭزە و امدادیمە فكرًا قوشمەڭزە جدًّا چوق منّتدارم و آخر عمریمە قدر اونوتمایاجغم. سزە بیڭ ما شٓاء اللّٰه و بارك اللّٰه دیرم.

[ثانیًا] مسلگمە و رسالۀ نوردن آلدیغم درسمە بتون بتون مخالف اولارق و اون سنەدنبری فانی دنیانڭ كچیجی، اهمّیتسز حادثەلرینە باقمامق اولان بر دستور حیاتمە دە منافی اولارق، صرف سنڭ خاطرڭ و مراق ایتدیگڭ و بو دفعەكی اوزون مكتوبڭ ایچون وضعیتمە و ظالملرڭ اشكنجەلرینە عائد برقاچ مادّەیی بیان ایدەجگم. [برنجیسی] اوتوز سنە اوّل دار الحكمت اعضاسی ایكن، بر كون آرقداشمزدن و دار الحكمت اعضاسندن سیّد سعد الدّین پاشا دیدیكە: قطعی بر واسطە ایلە خبر آلدم، كوكی اجنبیدە و كندیسی بورادە بولونان بر زندقە قومیتەسی،