[ ٨]

[بدیع الزّمان سعید نورسی]

[آ-حضرت استادڭ تاریخچۀ حیاتی]

لاحقە ٨٥: (عبد الرّحمن صلاح الدّینڭ حضرت استادڭ تاریخچۀ حیاتندن قیصە بر خلاصەسیدر)

اینەبولی حوالیسندەكی عموم نور شاكردلری نامنە صلاح الدّینڭ، استادینڭ تاریخچۀ حیاتندن چیقاردیغی بر قیصەجق خلاصەنڭ بر پارچەسیدر.

[استادیمزڭ ترجمۀ حالنە قیصەجە بر نظر]

شرق عصیانندە شیخ سعید و عسكرلری، استادیمز بدیع الزّمانی شرقدەكی بیوك نفوذندن استفادە ایچون مجادلەیە اشتراكە دعوت ایتدكلری زمان، جوابًا دیمش: یاپدیغڭز مجادلە، قرداشی قرداشە ئولدیرتمكدر و نتیجەسزدر.

چونكە تورك ملّتی بیڭ سنەدر اسلامیتە بایراقدارلق ایتمش، دینی اوغرندە بیڭلرلە شهید ویرمش و بیڭلرلە ولی یتیشدیرمشدر. بناءً علیه قهرمان و فداكار اسلام مدافعلرینڭ طورونلرینە، یعنی تورك ملّتنە قیلیچ چكیلمز. و بن دە چكمم، دییەرك هم ردّ جواب ویرمش، هم مجادلەسندن واز كچمەسنی سویلەمشدر.

اسكی حرب عمومیدە تعرّض ایدن روس اوردولرینە قارشو بتلیس ملّی قوّتلری قوماندانی اولارق، چوق فائق قوّتلرلە هجوم ایدن روس اوردوسنە كونلرجە و قهرمانجە مدافعە ایلە، شهردەكی بتون مهمّات و ارزاق و خلقڭ و عسكرڭ جهازاتنڭ طاشینمەسنی تأمین ایتمش. یارەلاندیغی حالدە كری چكیلمەیی شخصًا ذُل صایدیغندن، غازیلك مقامیلە دە قرارگاهندە صوڭ مرمیسنە قدر شرفلە دوگوشمش، نهایت بالمجبوریە روسلرە اسیر دوشمشدر. دیننڭ و وطن و ملّتنڭ سلامتی ایچون حیاتنی فدادن چكینمەین بو قهرمان قوماندانە، اوچ روس مرمیسی اصابت ایتمش. بری قلبنڭ اوزرندەكی معدن طبقەیی دلییور، ایچ چاماشیردە قالییور. ایكنجیسی صول طرفدە خنچرڭ صاپنی دلەرك طورور. اوچنجیسی اوموزندە خفیف بر یارە آچار. نهایت بتلیسڭ حینِ سقوطندە آیاغی قیریلمش و اوموزی مجروح بر حالدە روسلرە اسیر دوشویور.

سبریادە اُسرا اقامتگاهلرندە ایكی سنە اوچ آی قالمش، بو مدّت ظرفندە

اسیر اولان طقسان ضابط قرداشلرینڭ معنویاتلرینی تقویە ایتمش، صوڭرە وارشووە یولیلە استانبولە كلمشدر. او صیرەدە اینكیلترە آنغلیقان كلیسالری باش پیسقوپوسنڭ، حرّیتدن صوڭرە پادشاه حكومتندن صوردیغی سؤٓاللرە جواب ویرن. و لمعات، قطرە، ذرّە، حبّە، قیزیل ایجاز و اشارات الاعجاز نامندە یازدیغی عربی اثرلری اوقویانلرە، موجوداتڭ طلسمنی كشف ایلە بر حقیقت یولی آچیلمەسی. او وقت مقرّ علما اولان استانبول ایلە حجاز، یمن، مصر، سوریە، عراق، ایران، افغان و هندستان علماسنڭ تماسی بولوندیغندن، بو اثرلری كندی اثرلرینە مأخذ طوتمەلری ایچون دار الحكمت الاسلامیە اعضالغندە وظیفۀ علمیە و دینیە ایلە مشغول اولمشدر.

اون سكز سنە صوڭرە، قرق سنە اوّل چكردگی یازیلان بشنجی شعاعڭ الە كچمەسی و آیت الكبرانڭ طبعی مناسبتیلە هر طرفدە طوپلاتدیریلان و آرانیلان بیڭلرلە رسالۀ نور اجزالرینڭ و افادەیە جلب ایدیلن یوزلرلە رسالۀ نور طلبەلرندن، آنجق یوز یگرمی تمیز ناصیەلی، صاف قلبلی و دوشونجەلی دیندار توركلرڭ طقوز آی دڭزلیدە موقوفیتی و یوز اوتوز بش پارچە رسالۀ نور اجزالرینڭ آنقرەدن بر هیئت علمیەنڭ تدقیقندە، قرآنڭ حقیقی بر تفسیری اولدیغی علمی راپورلە توثیق و تصدیق ایدیلمەسندن، اثرلرلە برابر محبوس و استنطاق ایدیلن یوز یگرمی طلبەنڭ برائتیلە نتیجەلنیر. حضرت استاد دە آفیونە اقامتە مأمور ایدیلییور.

یتمشلك بر عمرڭ اون بر مهم حادثەسی و بو تهلكەلی مادّە و طبیعت و انانیت عصرندە بو وجودڭ یگانە وظیفەسی، غایەسی، املی و آرزوسی، انسانلرڭ ایمانلرینی قورتارمق اولدیغنی. هم مطلقیت، هم مشروطیت، هم جمهوریت دورندە آیری آیری، غایت محقِّق، مدقّق علما و حكما و فضلانڭ و غایت قورناز شیطان و اوهاملی جاسوس و فیلسوفلرڭ اینجەدن اینجەیە یگرمی سنە تحقیق و تدقیق و تحلیلی نتیجەسندە، دنیوی و سیاسی هیچ بر مقصد اولمدیغی قطعی آڭلاشیلمشدر. قرآن كریمڭ و حدیث شریفڭ بیڭلرلە حقیقتلرینی اثبات ایدن رسالۀ نوری، هیچ بر دیندار عالم ویا دینسز بر فیلسوف، بر كلمەسنی دخی جرح و نقض ایدەمەمشدر. و تصدیقە مجبور اولمشلردر.

یگرمی اوچ سنەدە تماملانان رسالۀ نور، رسائل النّور، رسالة النّور آدلی یوز قرق پارچە اثرلر، قرآن عظیم و حدیث شریفڭ، اوّلكی عصرلردە مشكوك و شبهەلی بیراقدیریلمش ویا رموزلی ویا شموللی و مجازی یازدیریلمش تفسیرلردن آلینمش دگلدر. منبع، یالڭز قرآندن، حدیثدن عصریمزدە ترشّح ایتمشدر. استادیمز دیر: "بیاناتمز قرآن حكیمڭ فیضندندر. نفسی تسلیمە، قلبی قبولە احضاردن عبارتدر. اصل سوز ایسە قرآنڭدر. زیرا سوز اودر و سوز اونڭدر." و كندینە خاص بر اصول تدریس بولارق، بش ولایت بیوكلگندەكی مدرسة الزّهراسندە میلیونلرلە طلبەیە خواجەلق ایدر. علوم دینیە ایلە فنون عصریەیی مزج و حقائق دینیەیی فنون مثبتە ایلە تأیید و تشیید ایتمك صورتیلە،

طلبەنڭ فكر و ایماننڭ تنویرینە چالیشیر. ایستەدیگی آندە، خواجەسندن ایستەدیگی درسی آلابیلیر. و نوردن آلدیغی درس ایلە عمل ایتدیگی تقدیردە دە ایماننی محافظە ایدەبیلیر.

رسالۀ نورڭ بر خلاصەسی مقامندە اولان بو عصای موسی رسالەسنی، دقّتلی آڭلایارق اوقویان ویا دیڭلەین، بلا استثنا دینلی، دینسز، عالم، جاهل هركس، اسلامیتڭ اساسی اولان ایمانڭ آلتی شرطنی تمامًا دیلیلە اقرار و قلبیلە تصدیق ایتمكلە برابر، ایماننی محافظە. اسلامڭ بناسی اولان نماز قیلمەیی، اوروچ طوتمەیی، حجّە كیتمەیی، زكات ویرمەیی، كلمۀ شهادت كتیرمەیی كندینە وظیفۀ اصلیە بیلەجكدر. رسالۀ نوری اوقومغە، یازمغە و نشر ایتمگە چالیشان فردلر، جمعیتلر، ملّتلر، دولتلر دنیوی و اخروی فنالقلردن قورتولاجق و ظلمتدن نورە چیقاجق، سعادت و سلامت تأمین ایدەجكدر. رسالۀ نورڭ خلاصەسی اولان عصای موسی رسالەسی، آطومدن داها قوّتلی و تأثیرلی و نورلی بر سلاح و حكمتلی بر عصادر. آطوم كبی بشریتڭ و مدنیتڭ تخریبنە دگل، سعادت و سلامتنە چالیشیر.

(هٰذَامِنْ فَضْلِ رَبّٖی)

عموم اینەبولی شاكردلری نامنە نورجی عبد الرّحمن صلاح الدّین

امرطاغ لاحقەسی ٣: ٥٣

[ب-حضرت استادڭ غایەسی]

لاحقە ٨٦: (استادڭ اشرف ادیبە، استانبولە كنچلك رهبری محكمەسی ایچون كلدیگی ١٩٥٢ تاریخندە ویرمش اولدیغی بر ملاقات)

استانبول سیاحتندن مضطرب اولوب اولمدیغنی صوردم:

-بڭا اضطراب ویرن، دیدی، یالڭز اسلامڭ معروض قالدیغی تهلكەلردر. اسكیدن تهلكەلر خارجدن كلیردی، اونڭ ایچون مقاومت قولایدی. شیمدی تهلكە ایچریدن كلییور. قورت، كوگدەنڭ ایچنە كیردی. شیمدی، مقاومت كوچلشدی. قورقارمكە جمعیتڭ بُنیەسی بوڭا طایاناماز، چونكە دوشمانی سزمز. جان طمارینی قوپاران، قاننی ایچن أڭ بویوك خصمنی دوست ظن ایدر. جمعیتڭ بصیرت كوزی بویلە كورلشیرسە، ایمان قلعەسی تهلكەدەدر. ایشتە بنم اضطرابم، یگانە اضطرابم بودر. یوقسە شخصمڭ معروض قالدیغی زحمت و مشقّتلری دوشونمەیە بیلە وقتم یوقدر. كاشكە بونڭ بیڭ مثلی مشقّتە معروض قالسەم دە ایمان قلعەسنڭ استقبالی سلامتدە اولسە!

-یوز بیڭلرجە ایمانلی طلبەلریڭز سزە آتی ایچون امید و تسلّی ویرمییورمی؟

-اوت، بوس بوتون امیدسز دگلم. دنیا، بویوك بر معنوی بحران كچیرییور. معنوی تمللری صارصیلان غرب جمعیتی ایچندە طوغان بر خستەلق، بر وبا، بر طاعون

فلاكتی كیتدكجە یر یوزینە طاغیلییور. بو مدهش ساری علّتە قارشو اسلام جمعیتی نە كبی چارەلرلە قارشو قویاجق؟ غربڭ چورومش، قوقمش، تفسّخ ایتمش، باطل فورموللریلەمی؟ یوقسە اسلام جمعیتنڭ تر و تازە ایمان اساسلریلەمی؟ بویوك قفالری غفلت ایچندە كورییورم. ایمان قلعەسنی، كفرڭ چوروك دیركلری طوتاماز. اونڭ ایچون، بن یالڭز ایمان أوزرینە مساعیمی تكثیف ایتمش بولونویورم.

رسالۀ نوری آڭلامییورلر. یاخود آڭلامق ایستەمییورلر. بنی، سقولاستیك باتاقلغی ایچندە صاپلانمش بر مدرسە خواجەسی ظن ایدییورلر. بن، بوتون مثبت علملرلە، عصر حاضر فن و فلسفەسیلە مشغول اولدم. بو خصوصدە أڭ درین مسئلەلری حلّ ایتدم. حتّی بو خصوصدە دە بعض أثرلر تألیف أیلەدم. فقط بن، أویلە منطق اویونلری بیلمەیورم. فلسفە دوزن بازلقلرینە دە قولاق ویرمم. بن، جمعیتڭ ایچ حیاتنی، معنوی وارلغنی، وجدان و ایماننی ترنّم ایدییورم. یالڭز قرآنڭ تأسیس ایتدیگی توحید و ایمان اساسی أوزرندە ایشلەیورم، كە اسلام جمعیتنڭ آنا دیرگی بودر. بو صارصیلدیغی كون، جمعیت یوقدر.

بڭا، "سن شوڭا بوڭا نیچون صاتاشدڭ؟" دییورلر. فرقندە دگلم. قارشومدە مدهش بر یانغین وار. آلولری كوكلرە یوكسلییور. ایچندە اولادم یانییور، ایمانم طوتوشمش یانییور. او یانغینی سوندیرمگە، ایمانمی قورتارمەیە قوشویورم. یولدە بری بنی كوستكلەمك ایستەمش دە آیاغم اوڭا چارپمش. نە اهمیتی وار؟

او مدهش یانغین قارشوسندە بو كوچك حادثە بر قیمت افادە ایدرمی؟ طار دوشونجەلر! طار كوروشلر!

بنی، نفسنی قورتارمەیی دوشونن خودكام بر آدممی ظن ایدییورلر؟ بن، جمعیتڭ ایماننی قورتارمق یولندە دنیامی دە فدا ایتدم، آخرتمی دە. سكسان كسور سنەلك بوتون حیاتمدە دنیا ذوقی نامنە بر شی بیلمەیورم. بوتون عمرم حرب میدانلرندە، اسارت زندانلرندە، یاخود مملكت حپسخانەلرندە، مملكت محكمەلرندە كچدی. چكمدیگم جفا، كورمدیگم اذا قالمادی. دیوان حربلردە، بر جانی كبی معاملە كوردم. بر سرسری كبی مملكت مملكت سوركونە یوللاندم. مملكت زندانلرندە آیلرجە اختلاطدن منع ایدیلدم. دفعەلرجە زهرلندم. تورلی تورلی حقارتلرە معروض قالدم. زمان اولدیكە حیاتدن بیڭ دفعە زیادە ئولومی ترجیح ایتدم. اگر دینم انتحاردن بنی منع ایتمەسەیدی، بلكە بوكون سعید طوپراقلر آلتندە چورومش كیتمشدی.

بنم فطرتم، ذلّت و حقارتە تحمّل ایتمز. عزّت و شهامت اسلامیە بنی بو حالدە بولونمقدن شدتلە منع ایدر. بویلە بر وضعیّتە دوشونجە، قارشومدە كیم اولورسە اولسون، ایسترسە أڭ ظالم بر جبّار، أڭ خونخوار بر دوشمان قوماندانی اولسە تذلّل ایتمم. ظلمنی، خونخوارلغنى اونڭ صورتنە چارپارم. بنی زندانە آتار، یاخود اعدام سهپاسنە كوتورور.. هیچ اهمیتی یوقدر.-نیتەكیم أویلە اولدی-بونلرڭ هپسنی كوردم. برقاچ دقیقە داها او خونخوار قوماندانڭ قلبی، وجدانی ظلمكارلغە

طایانابیلسەیدی سعید بوكون آصیلمش و معصوملر زمرەسنە التحاق ایتمش اولاجقدی.

ایشتە بنم بوتون حیاتم بویلە زحمت و مشقّتلە، فلاكت و مصیبتلە كچدی. جمعیتڭ ایمانی، سعادت و سلامتی یولندە نفسمی، دنیامی فدا ایتدم. حلال اولسون. اونلرە بد دعا بیلە ایتمەیورم. چونكە بو سایەدە رسالۀ نور، هیچ اولمازسە برقاچ یوز بیڭ، یاخود برقاچ میلیون كیشینڭ-عددینی دە بیلمەیورم یا، أویلە دییورلر. آفیون صاوجیسی بش یوز بیڭ دیمشدی. بلكە داها زیادە-ایماننی قورتارمەیە وسیلە اولدی. ئولمكلە، یالڭز كندیمی قورتاراجقدم، فقط حیاتدە قالوب دە زحمت و مشقّتلرە تحمّل ایلە بو قدر ایمانڭ قورتولمەسنە خدمت ایتدم. اللّٰهە بیڭ كرە حمد اولسون.

صوڭرە، بن جمعیتڭ ایمان سلامتی یولندە آخرتمی دە فدا ایتدم. كوزمدە نە جنّت سوداسی وار، نە جهنّم قورقوسی. جمعیتڭ، یالڭز یگرمی میلیون تورك جمعیتنڭ دگل، یوزلرجە میلیون بتون اسلام جمعیتنڭ ایمانی نامنە بر سعید دگل، بیڭ سعید فدا اولسون. قرآنمز یر یوزندە جماعتسز قالیرسە جنّتی دە ایستەمم؛ اوراسی دە بڭا زندان اولور. ملّتمزڭ ایماننی سلامتدە كورورسەم، جهنّمڭ آلولری ایچندە یانمەیە راضےیم. چونكە وجودم یاناركن، كوڭلم كل-كلستان اولور.

سعید النّورسی

بدیع الزّمان سعید نورسی و خیر الخلفی احمد خسرو آلتون باشاق، جلد ٢ صحیفە ٩٧٨

[ج-حضرت استادڭ مجدّدلگی]

لاحقە ٨٧: (هر عصرڭ باشندە گلەجگی مژدەلنن دینڭ یوكسك خادملرینڭ أوزللكلری، رسالۀ نورڭ ماهیتی و حضرت استادڭ حیاتندن بعض خارقە حاللر)

رسالۀ نور نەدر؟ و حقیقتلر قارشوسندە رسالۀ نور و ترجمانی نە ماهیّتدەدرلر؟

دییە بر تقریضنامەدر

هر عصر باشندە حدیثجە كلەجگی تبشیر ایدیلن دینڭ یوكسك خادملری، امر دیندە مبتدع دگللر، مُتَّبعدرلر. یعنی كندیلرندن و یڭیدن بر شی احداث ایتمزلر. یڭی احكام كتیرمزلر. اساسات و احكام دینیەیە و سُنَنِ محمّدیّەیەؐ حرفیًا اتّباع یولیلە دینی تقویم و تحكیم.. و دینڭ حقیقت اصلیّتنی اظهار ایدرلر. و اوڭا قاریشدیریلمق ایستەنیلن اباطیلی رفع و ابطال.. و دینە واقع تجاوزلری رد و امحا.. و اوامر ربّانیّەیی اقامە.. و احكام الٰهیّەنڭ شرافت و علویتنی اظهار و اعلان ایدرلر. آنجق طور اساسی یی بوزمادن و روح اصلی یی رنجیدە ایتمدن یڭی ایضاح طرزلریلە، زمانڭ فهمنە اویغون یڭی اقناع اصوللریلە و یڭی توجیهات و تفصیلات ایلە ایفای وظیفە ایدرلر.

بو مأمورین ربّانیّە فعلیاتلریلە و عمللریلە دە مأموریتلرینڭ مصدِّقی اولورلر. صلابت ایمانیەلرینڭ و اخلاصلرینڭ آیینەدارلغنی بالذّات ایفا ایدرلر. مرتبۀ ایمانلرینی فعلاً اظهار ایدرلر. و اخلاق محمّدیەنڭؐ و مِشْوَار احمدیّەنڭؐ و حِلْیۀ نبویّەنڭؐ حقیقی لابِسی اولدقلرینی كوستریرلر. خلاصە عمل و اخلاق باقیمندن تام عامل.. و سنّت سنیّەیە اتّباع و تمسّك جهتندن امّت محمّدەؐ تام بر حسن مثال، نمونۀ اقتدا تشكیل ایدرلر.

فعلاً اظهار ایدرلر. و اخلاق محمّدیەنڭؐ و مِشْوَار احمدیّەنڭؐ و حِلْیۀ نبویّەنڭؐ حقیقی لابِسی اولدقلرینی كوستریرلر. خلاصە عمل و اخلاق باقیمندن تام عامل.. و سنّت سنیّەیە اتّباع و تمسّك جهتندن امّت محمّدەؐ تام بر حسن مثال، نمونۀ اقتدا تشكیل ایدرلر.

بونلرڭ كتاب اللّهڭ تفسیری و احكام دینیەنڭ ایضاحی و زمانڭ فهمنە و مرتبۀ علمنە كورە طرز توجیهی صددندە یازدقلری اثرلر، كندی تلقای نفسلرینڭ و قریحۀ علویّەلرینڭ محصولی دگلدر. و كندی ذكا و عرفانلرینڭ نتیجەسی دگلدر. بونلر، طوغریدن طوغری یە منبع وحی اولان ذات پاك رسالتڭؐ معنوی الهام و تلقیناتیدرلر. جلجلوتیە، مثنوئ شریف، فتوح الغیب و امثالی آثار، هپ بو نوعدندرلر. بو آثار قدسیّەیە او ذوات عالیشان، آنجق ترجمان حكمندەدرلر. بو ذوات مقدّسەنڭ او آثار بَرْكزیدەنڭ تنظیمندە و طرز بیانندە بر حصّەلری واردر. یعنی بو ذوات قدسیّە، او معنانڭ مظهری، مرآتی و معكسی حكمندەدرلر.

رسالۀ نور و ترجماننە كلنجە.. بو اثر عالیشاندە شیمدی یە قدر امثالنە راستلانمامش بر فیض علوی و بر كمال نامتناهی موجود اولدیغندن.. و هیچ بر اثرڭ نائل اولمدیغی بر شكلدە مشعلۀ الٰهیّە و شمس هدایت و نیّر سعادت اولان حضرت قرآنڭ فیوضاتنە وارث اولدیغی مشهود اولدیغندن، اونڭ اساسی نور محض قرآن اولدیغی و اولیاء اللّٰهڭ آثارندن زیادە فیض انوار محمّدیەییؐ حامل بولوندیغی.. و ذات پاك رسالتڭؐ اوندەكی حصّە و علاقەسی و تصرّف قدسیسی اولیاء اللّٰهڭ

آثارندن زیادە اولدیغی.. و اونڭ مظهری و ترجمانی اولان معنوی ذاتڭ مظهریتی و كمالاتی ایسە،

او نسبتدە عالی و امثالسز اولدیغی كونش كبی آشكار بر حقیقتدر.

اوت، او ذات، داها حال صباوتدە ایكن و هیچ تحصیل یاپمدن ظواهری قورتارمق اوزرە اوچ آیلق بر تحصیل مدّتی ایچندە علوم اوّلین و آخرینە و لَدُنِّیات و حقائق اشیایە و اسرار كائناتە و حكمت الٰهیەیە وارث قیلینمشدركە: شیمدی یە قدر بویلە بر مظهریّت علیایە، كیمسە نائل اولمامشدر. بو خارقۀ علمیّەنڭ أشی، اصلا مسبوق دگلدر. هیچ شبهە ایدیلەمزكە، ترجمان نور بو حالیلە باشدن باشە عفّت مجسّمە و شجاعت خارقە و استغنای مطلق تشكیل ایدن خارق العادە متانت اخلاقیّەسی ایلە بالذّات بر معجزۀ فطرتدر. و تجسّم ایتمش بر عنایتدر. و بر موهبۀ مطلقەدر.

او ذاتِ ذی خوارق، داها حدّ بلوغە ایرمدن بر علّامۀ بی عدیل حالندە بتون جهان علمە میدان اوقومش. مناظرە ایتدیگی ارباب علومی الزام و اسكات ایتمش. هر نرەدە اولورسە اولسون، واقع اولان بتون سؤٓاللرە مطلق بر اصابتلە و اصلا تردّد ایتمدن جواب ویرمش. اون درت یاشندن اعتبارًا استادلق پایەسنی طاشیمش. و متمادیًا اطرافنە فیض علم و نور حكمت صاچمش. ایضاحلرندەكی اینجەلك و درینلك و بیانلرندەكی علویت و متانت و توجیهلرندەكی درین فراست و بصیرت و نور حكمت، ارباب عرفانی شاشیرتمش و حقّیلە كندیسنە بدیع الزّمان عنوان جلیلنی بخش ایتدیرمشدر. مزایای عالیەسیلە و فضائل علمیەسیلە دە

دین محمّدینڭؐ اثبات و نشرندە بر كمال تام حالندە رُونُمَا اولمش اولان بویلە بر ذات، البتە سیّد الانبیاؐ حضرتلرینڭ اڭ یوكسك التفاتنە مظهر.. و اڭ عالی حمایە و همّتنە نائلدر. و شبهەسز او نبیّ اقدسڭؐ امر و فرمانیلە یوروین و تصرّفیلە حركت ایدن و اونڭ انوار و حقائقنە وارث و معكس اولان بر ذات كریم الصّفاتدر.

انوار محمّدیەییؐ و معارف احمدیّەییؐ و فیوضات شمع الٰهی یی اڭ مشعشع بر شكلدە پارلاتمەسی.. و قرآنی و حدیثی اولان اشارات ریاضیەنڭ كندیسندە منتهی اولمسی.. و خطابات نبویّەیی افادە ایدن آیات جلیلەنڭ ریاضی بیانلرینڭ كندی اوزرندە طوپلانمەسی دلالتلریلە او ذات، خدمت ایمانیە نقطەسندە رسالتڭ بر مرآت مجلّاسی و شجرۀ رسالتڭ بر صوڭ میوۀ منوّری و لسان رسالتڭ ارثیّت نقطەسندە صوڭ دَهانِ حقیقتی و شمع الٰهینڭ خدمت ایمانیە جهتندە بر صوڭ حامل ذی سعادتی اولدیغنە شبهە یوقدر.

اوچنجی مدرسۀ یوسفیّەنڭ الحجّة الزّهرا و زهرة النّور اولان تك درسنی دیڭلەین

نور شاكردلری نامنە

احمد فیضی احمد نظیف زبیر صلاح الدّین جیلان صونغور طبانجەلی

بنم حصّەمی حدّمدن یوز درجە زیادە ویرن بو امضا صاحبلرینڭ خاطرلرینی قیرمغە جسارت ایدەمدم. سكوت ایدوب او مدحی، رسالۀ نور شاكردلرینڭ شخص معنویسی نامنە قبول ایتدم.

سعید النّورسی

شعاعلر ٢: ٦٢٥

لاحقە ٨٨: (شاملی حافظ توفیقڭ رسالۀ نورڭ حقّانیتنە و استادیمزە دائر استخراجی)

[رسالۀ نورڭ تسوید و تبییضندە چوق خدمتی سبقت ایدن شاملی حافظ توفیقڭ رسالۀ نورڭ حقّانیتنە دائر استخراجی بر فقرەسیدر]

معلوم اولسونكە، زُبْدَةُ الرَّسَائِلْ عُمْدَةُ الْوَسَائِلْ نامندە قُطْبُ الْعَارِفٖینْ ضیَاءُ الدّٖینْ مَوْلَانَا شَیخْ خَالِدْ قُدِّسَ سِرُّهُ نڭ مكتوبات و رسائل شریفەلرندن مقتبس نصایح قدسیەنڭ ترجمەسنە دائر بر رسالەیی، اون اوچ سنە مقدّم، بروسەدە خواجە حسن افندیدن آلمشدم. ناصلسە مطالعەسنە موفّق اولامامشدم. تا بوكونلردە كتابلریمڭ ایچریسندە بر شی آراركن ألمە كچدی. دیدم: بو حضرت مولانا خالد، استادیمڭ همشهریسیدر. هم امام ربّانیدنؓ صوڭرە طریق نقشینڭ اڭ مهم قهرمانیدر، هم طریق خالدیۀ نقشیەنڭ پیریدر. رسالەیی مطالعە ایدركن حضرت مولانانڭ ترجمۀ حالندن شو فقرەیی كوردم:

اصحاب كُتُبُ سِتَّەدن اِمَامِ حَاكِمْ مُسْتَدْرَكِنْدە و اَبُو دَاوُدْ كِتَابِ سُنَنْدە، بَیْهَقٖی شُعَبِ اٖیمَانْدە تخریج بویوردقلری: [اِنَّ اللّٰهَ یَبْعَثُ لِهٰذِهِ الْاُمَّةِ عَلٰی رَأْسِ كُلِّ مِائَةِ سَنَةٍ مَنْ یُجَدِّدُ لَهَا دٖینَهَا] یعنی "هر یوز سنەدە جناب حق بر مجدّد دین كوندرییور." حدیث شریفنە مظهر و ماصدق و مظهر تام اولان مَوْلَانَا الشَّهٖیرْقُطْبُ الْعَارِفٖینْ غَوْثُ الْوَاصِلٖینْ وَارِثِ مُحَمَّدٖی كاَمِلُ الطَّرٖیقَةِ الْعَلِیَّةِ وَالْمُجَدِّدِیَّةِ خَالِدِ ذُو الْجَنَاحَینْ قُدِّسَ سِرُّهُ الٰی آخرە.. صوڭرە تاریخچۀ حیاتندە كوردمكە، تولّدی بیڭ یوز طقسان اوچ تاریخندەدر. صوڭرە كوردمكە، بیڭ ایكی یوز یگرمی درت تاریخندە سلطنت هندڭ پای تختی اولان جهان آبادە داخل اولمش، طریق نقشی سلسلەسنە كیروب مجدّدیتە باشلامش. صوڭرە بیڭ ایكی یوز اوتوز سكزدە اهل سیاستڭ نظر دقّتنی جلب ایدوب وطننی ترك ایدرك دیار شامە هجرتلە كیتمشدر. هم ایچندە كوردمكە، حضرت مولانانڭ نسلی حضرت عثمان اِبْنِ عَفَّانْ