[ ١٠]

[مختلف مسئلەلر]

لاحقە ١١٤: (حضرت استادڭ حافظ مصطفینڭ اوغلی ایچون "اونڭ نامی سعید نوری اولملی" دییەرك اسمنی قویمسی)

عزیز، صدّیق، فعّال قرداشلرم، بو دهشتلی عصردە مكمّل تسلّیلرم و وارثلرم،

نور سانترالی و یگرمی یدنجی مكتوبدە چوق اهمّیتلی فقرەلری بولونان صبرینڭ بو دفعەكی مرثیەسنی لاحقەیە كچیردك و سزە دە كوندردك. و چالیشقان مباركلردن و نورلرڭ نشرینە چوق خدمت ایدن حافظ مصطفینڭ یدی یاشندە ایكن آلتنجی شعاعی و بڭا بر مكتوب یازان تام مبارك، معصوم مخدومی، بورادە معصوملر ایچندە نورلرە بر اشتیاق اویاندیراجق. اونڭ نامی [سعید نوری] اولملی. نورسی كویدر، معناسز اولور. (س) اولماسین، یالڭز (ی) اولسون.. تا نورلرە علاقەسنی كوسترسین.

اَلْبَاقٖی هُوَ الْبَاقٖی

قرداشڭز سعید النّورسی

امرطاغ لاحقەسی ١: ٤٠٠

لاحقە ١١٥: (حضرت استادڭ قرآن اوقومەیە دائر معصوم چوجقلرە توصیەلری)

عزیز، معصوم اولادلر،

قرآنی اوگرنمك ایچون درس آلمەیە چالیشییورسڭز. سزڭ بیلدیگڭز یڭی حرفدە نقصانلر اولدیغی ایچون، ممكن اولدقجە یڭی حرفدن اوقونمامق لازم كلیر. هم قرآنی اوقومەنڭ فائدەسی، یالڭز حافظ اولمق و دنیادە اونڭلە بر مقام قزانمق، بر معاش آلمق دگل. بلكە هر بر حرفی، هیچ اولمازسە اون خیرندن تا یوز، تا بیڭە، تا بیڭلرە قدر جنّت میوەلرینی، آخرت فائدەلرینی ویرمەسنی دوشونوب و ابدی حیاتڭ راحتنی و سعادتنی تأمین ایتمك نیّتیلە اوقومق لازمدر.

اوت مكتبلردە دنیا معیشتی یا رتبەلری ایچون فنلری درس اوقومق، بو قیصەجق دنیوی حیاتدە درجەسی، فائدەسی بر ایسە، ابدی حیاتدە قرآن و قرآنڭ قدسی كلمەلرینی و نورلی و ایمانی معنالرینی اوگرنمك، بیڭلر درجە داها قیمتلیدر. اونلر شیشە حكمندە، بونلر الماس حكمندەدر.

هم پدر و والدەڭزە حقیقی و فائدەلی اولادلر اولابیلیرسڭز. سز مادام معصومسڭز، داها كناهڭز یوق. بویلە قدسی بر نیّتلە اوقوسەڭز، سزلری رسالۀ نورڭ معصوم شاكردلری ایچندە قبول ایدوب عموم شاكردلرڭ دعالرندە حصّەدار اولورسڭز و نورلی و مبارك طلبەلر اولورسڭز.

هم استادیڭزی، هم سزی، هم پدر و والدەڭزی، هم مملكتڭزی تبریك ایدییورم.

سعید النّورسی

امرطاغ لاحقەسی ٣: ٢٣٠

لاحقە ١١٦: (رسالۀ نورلردە توافقاتە زیادە اهمّیت ویریلمەسنڭ سرّی)

عالی جناب قرداشلرم،

بوكونلردە تفسیرڭ و اوننجی سوزڭ توافقاتنە باقدم. كندی كندیمە دیدمكە: بو زیادە تفصیلات اسرافدر. اهمّیتلی مسئلەلر چوقدر، وقت ضایع اولماسین. بردن اخطار ایدیلدیكە: او توافق آلتندە چوق اهمّیتلی بر مسئلە واردر. هم مادام توافقدە بر عنایت خاصّە و التفات رحمانیە رسالۀ نورە قارشو تظاهر ایتمش. او التفاتە قارشو حسّ شكران و ممنونیت و متشكّرانە سوینچ، نە قدر افراطكارانە اولسە اسراف اولماز. بو اخطار مجملی [ایكی جهتلە] ایضاح ایدەجگم:

[برنجیسی] هر شیدە نە قدر جزئی اولسە دە، بر قصد و ارادەنڭ جلوەسی بولونمەسیدر. تصادف، حقیقی اولارق اولمامسیدر. اوت، كثرتڭ اڭ چوق طاغینیق و اڭ زیادە تصادفە ویریلن، كلماتدەكی حروفاتڭ وضعیتلریدر.

خصوصًا كتابتدە، مادام هیچ مناسبتی اولمایان و اختیار بشری قاریشمایان حروفاتڭ وضعیتلرندە بر تناسب، بر انتظام بولونویور. البتە بر ارادۀ غیبیە تحتندە وضعیتلر ویریلییور. هیچ بر شی دائرۀ علم و قدرتندن خارج اولمدیغی كبی، دائرۀ ارادە و مشیئتندن دخی خارج دگلدركە، بویلە جزئی و طاغینیق شیلردە دخی بر تناسب كوزتیلییور و تنظیم ایدیلییور.

و او تنظیم ایچندە و ارادۀ عامّە جلوەسندە بر عنایت خاصّە صورتندە، رسالۀ نورە بر امتیاز نوعندە خصوصی بر توجّه و التفات كورولمش. بن دە بو درین مسئلەیی

كورمك ایچون، اشارات الاعجاز تفسیرینڭ توافقاتنە دقّت ایتدم. قطعی بر قناعت ایلە او سرّی بیلدم و حسّ ایتدم.

[ایكنجی جهت] ناصلكە چوق مبارك و قدسی بیوك بر ذات، غایت فقیر و محتاج بر آدمە، امید ایدیلمدیگی بر طرزدە، التفاتكارانە، بر قاپدە بعض كاغدلرە صاریلی بر هدیە احسان ایتسە.. البتە او بیچارە آدم، او پك بیوك ذاتە

قارشو هدیەنڭ بیڭلر مثلندن فضلە تشكّر ایتمك ایستر. و بیڭ او هدیە قدر قیمتلی بولونان، او هدیە ایلە كوستریلن التفاتنە قارشو، نە قدر تشكّردە اسراف و افراط ایتسە دە مقبولدر.

و او چوق مبارك ذاتڭ او هدیەسنە صاردیغی كاغدلری دە تبرّك دییوب شكر كبی ییسە، حتّی او هدیە ایچندەكی جویزلرڭ سرت قابوقلرینی دە تبرّك دییە اكمك كبی یوتسە و او هدیەنڭ قابنی مبارك بر كتاب كبی أوپسە و باشنە قویسە، اسراف اولمدیغی كبی.. عینًا اویلە دە، رسالۀ نور یوزندە ارادۀ عامّە، عنایت خاصّە التفاتنی توافق ظرفیلە احسان ایدیلمش. البتە توافقە دائر تفصیلات، تصویرات فعلی تشكّراتڭ بر نوعیدر و سوینجڭ و منّتدارلغڭ هیجانلی ترشّحاتیدر. قصورە باقیلماز. اوت، بویلە بر ذاتڭ التفاتنی كوسترن مادّی قرق پارە احساننە قارشو قرق بیڭ تشكّر ایدیلسە، اسراف دگل.

سعید النّورسی

قسطمونی لاحقەسی: ٨١

لاحقە ١١٧: "نور شاكردلری ممكن اولدیغی قدر هر یردە كوچوجك درسخانۀ نوریە آچمەلری لازمدر"

عزیز، صدّیق قرداشلرم،

[ثانیًا] مادام رسالۀ نور، او معجزۀ كبرانڭ ألندە بر الماس قیلیچ حكمندە خدمتنی كورمش و كوسترمش و اڭ معنّد دوشمانلری تسلیمە مجبور ایتمش. هم قلبی، هم روحی، حتّی حسّیاتی تنویر ایدەجك و علاجلرینی ویرەجك بر طرزدە خزینۀ قرآنیەنڭ دلّاللغنی یاپان و اوندن باشقە مأخذ و مرجعی اولمایان بر معجزۀ معنویەسی بولونان رسالۀ نور، او وظیفەیی یاپییور. و علیهندە اولان دهشتلی پروپاغاندەلرە و غایت معنّد زندیقلرە تام غلبە چالمش. و ضلالتڭ اڭ سرت و قوّتلی قلعەسی اولان طبیعتی، طبیعت رسالەسیلە پارچە پارچە ایتمش. و غفلتڭ اڭ قالین و بوغوجی و كنیش دائرۀ آفاقندە و فنّڭ اڭ كنیش پردەلرندە عصای موسی دەكی میوەنڭ آلتنجی مسئلەسی و برنجی، ایكنجی، اوچنجی و سكزنجی حجّتلریلە غایت پارلاق بر طرزدە غفلتی طاغیتوب نور توحیدی كوسترمش. البتە بزلرە لازم و ملّتە الزم، شیمدی رسمًا اذن ویریلن دین تدریساتی ایچون خصوصی درسخانەلر آچیلمەسنە اذن ویریلمەسنە بناءً، نور شاكردلری ممكن اولدیغی قدر هر یردە كوچوجك درسخانۀ نوریە آچمەلری لازمدر. كرچە هركس كندی كندینە بر درجە استفادە ایدر، فقط هركس هر بر مسئلەسنی تام آڭلاماز. هم ایمان حقیقتلرینڭ ایضاحی اولدیغی ایچون،

هم علم، هم معرفت، هم عبادتدر. [حاشیە] اسكی مدرسەلردە بش اون سنەیە مقابل،

ان شٓاء اللّٰه نور مدرسەلری بش اون هفتەدە عین نتیجەیی تأمین ایدەجك. یگرمی سنەدر ایدییور.

هم حكومت و ملّت و وطنە، هم حیات دنیویەسنە و سیاسیەسنە و اخرویەسنە پك چوق فائدەسی بولونان بو قرآن لمعاتلرینە و دلّالی بولونان رسالۀ نورە، دگل ایلیشمك، بلكە تمامیلە ترویج و نشرینە چالیشمەلری الزمدركە، كچن دهشتلی كناهلرە كفّارت و كلەجك مدهش بلالرە و آنارشیستلگە بر سد اولابیلسین.

سعید النّورسی

امرطاغ لاحقەسی ٣: ٢٨٨

لاحقە ١١٨: (تقوا و عمل صالح بحثی)

عزیز، صدّیق قرداشلرم،

بوكونلردە، قرآن حكیمڭ نظرندە ایماندن صوڭرە اڭ زیادە اساس طوتولان تقوا و عمل صالح اساسلرینی دوشوندم. تقوا، منهیاتدن و كناهلردن اجتناب ایتمك.. و عمل صالح، امر دائرەسندە حركت و خیرات قزانمقدر. هر زمان دفع شر، جلب نفعە راجح اولمقلە برابر، بو تخریبات و سفاهت و جاذبەدار

هوسات زمانندە، بو تقوا اولان دفع مفاسد و ترك كبائر اسّ الاساس اولوب بیوك بر رجحانیت كسب ایتمش.

بو زماندە تخریبات و منفی جریان دهشتلندیگی ایچون، تقوا بو تخریباتە قارشو اڭ بیوك اساسدر. فرضلرینی یاپان، كبیرەلری ایشلەمەین، قورتولور. بویلە كبائر عظیمە ایچندە عمل صالحڭ اخلاصلە موفّقیتی پك آزدر. هم آز بر عمل صالح، بو آغیر شرائط ایچندە چوق حكمندەدر.

هم تقوا ایچندە بر نوع عمل صالح وار. چونكە بر حرامڭ تركی، واجبدر. بر واجبی ایشلەمك، چوق سنّتلرە مقابل ثوابی وار. تقوا، بویلە زمانلردە، بیڭلر كناهڭ تهاجمندە بر تك اجتناب، آز بر عمللە یوزر كناه تركندە، یوزر واجب ایشلنمش اولویور. بو اهمّیتلی نقطە نیّتیلە، تقوا نامیلە و كناهدن قاچینمق قصدیلە منفی عبادتدن كلن اهمّیتلی اعمال صالحەدر.

رسالۀ نور شاكردلرینڭ، بو زماندە اڭ مهم وظیفەلری، تخریباتە و كناهلرە قارشو تقوایی اساس طوتوب طاورانمق كركدر. مادام هر دقیقەدە، شیمدیكی طرز حیات اجتماعیەدە یوز كناه انسانە قارشو كلییور. البتە تقوا ایلە و نیت اجتناب ایلە، یوز عمل صالح ایشلەمش حكمندەدر.

معلومدركە، بر آدمڭ بر كوندە خراب ایتدیگی بر سرایی، یگرمی آدم، یگرمی كوندە یاپاماز. و بر آدمڭ تخریباتنە قارشو یگرمی آدم چالیشمق لازم كلیركن، شیمدی بیڭلر تخریباتجی یە مقابل، رسالۀ نور كبی بر تعمیرجینڭ بو درجە مقاومتی و

تأثیراتی پك خارقەدر. اگر بو ایكی متقابل قوّتلر بر سویّەدە اولسە ایدی، اونڭ تعمیرندەكی معجزەواری موفّقیت و فتوحات كورولەجكدی.

[ازجملە] حیات اجتماعیەیی ادارە ایدن اڭ مهم اساس اولان حرمت و مرحمت، غایت صارصیلمش. بعض یرلردە، غایت الیم و بیچارە اختیارلر و پدر و والدەلر حقّندە دهشتلی نتیجەلر ویرییور. جناب حقّە شكركە، رسالۀ نور، بو مدهش تخریباتە قارشو كیردیگی یرلردە مقاومت ایدییور، تعمیر ایدییور. سدّ ذوالقرنینڭ تخریبیلە یأجوج و مأجوجلرڭ دنیایی فسادە ویرمسی كبی، شریعت محمّدیەؐ اولان سدّ قرآنینڭ تزلزلیلە دە یأجوج و مأجوجدن داها مدهش اولارق اخلاقدە و حیاتدە ظلمتلی بر آنارشیلك و ظلملی بر دینسزلك فسادە و افسادە باشلایور.

رسالۀ نورڭ شاكردلری، بویلە بر حادثەدە معنوی مجاهدەلری، ان شٓاء اللّٰه زمان صحابەدەكی كبی آز عمللە، پك چوق بیوك ثواب و اعمال صالحەیە مدار اولور.

عزیز قرداشلرم! ایشتە بویلە بر زماندە، بو دهشتلی حادثاتە قارشو، اخلاص قوّتندن صوڭرە بزم اڭ بیوك قوّتمز، اشتراك اعمال اخرویە دستوریلە بربریمزە قلملر ایلە، هر برینڭ اعمال صالحە دفترینە حسنات یازدیردقلری كبی.. لسانلریلە هر برینڭ تقوا قلعەسنە و سپرینە قوّت و امداد كوندرمكدر. و بالخاصّە فیرطینەلی تهاجمە هدف اولان بو فقیر و عاجز قرداشڭزە، بو مبارك شهور ثلاثەدە و

ایّام مشهورەدە یاردیمنە قوشمق، سزڭ كبی قهرمان و وفادار و شفقتكارلرڭ شأنیدر. بتون روحملە بو امداد معنوی یی سزدن رجا ایدییورم. و بن دخی، ایمان و صداقت شرطلریلە، رسالۀ نور طلبەلرینی بتون دعالریمە و معنوی قزانچلریمە، یگرمی درت ساعتدە، اشتراك اعمال اخرویە دستوریلە، بعضًا یوز دفعەدن زیادە رسالۀ نور طلبەلری عنوانیلە حصّەدار ایدییورم.

سعید النّورسی

قسطمونی لاحقەسی: ١٩٣

لاحقە ١١٩: (ریایە دائر اوچ نقطە)

عزیز، صدّیق، خالص، مخلص قرداشلرم و خدمت قرآنیەدە جدّی، حقیقی آرقداشلرم،

بو یاقیندە هم اسپارطەدە، هم بو حوالیدە رسالۀ نورڭ اخلاص لمعەلری انتشارە باشلادیغی مناسبتیلە و بر ایكی كوچك حادثە جهتیلە شدّتلی بر اخطار قلبە كلدی. ریایە دائر اوچ نقطە یازیلاجق.

[برنجیسی] فرض و واجبلردە و شعائر اسلامیّەدە و سنّت سنیّەنڭ اتّباعندە و حراملرڭ تركندە ریا كیرەمز. اظهاری، ریا اولاماز. مگر غایت ضعف ایمانلە برابر، فطرتًا ریاكار اولا. بلكە شعائر اسلامیەیە تماس ایدن عبادتلرڭ اظهارلری، اخفاسندن چوق درجە داها ثوابلی اولدیغنی، حجّت الاسلام

امام غزالیؓ كبی ذاتلر بیان ایدییورلر. سائر نوافلڭ اخفاسی چوق ثوابلی اولدیغی حالدە، شعائرە تماس ایدن، خصوصًا بویلە بدعەلر زمانندە اتّباع سنّتڭ شرافتنی كوسترن و بویلە بیوك كبائر ایچندە، حراملرڭ تركندەكی تقوایی اظهار ایتمك، دگل ریا، بلكە اخفاسندن چوق درجە داها ثوابلی و خالصدر.

[ایكنجی نقطە] ریایە انسانلری سوق ایدن اسبابڭ، (برنجیسی: ) ضعف ایماندر. اللّٰهی دوشونمەین، اسبابە پرستش ایدر، خلقلرە خودفروشلقلە ریاكارانە وضعیت آلیر. رسالۀ نور شاكردلری، رسالۀ نوردن آلدقلری قوّتلی ایمان تحقیقی درسیلە اسبابە و ناسە عبودیت نقطەسندە بر قیمت، بر اهمّیت ویرمییوركە، عبودیتلرندە اونلرە كوستریشلە ریا ایتسینلر.

(ایكنجی سبب: ) حرص و طمع، ضعف و فقر نقطەسندە توجّە ناسی جلبنە مدار ریاكارانە وضعیت آلمەیە سوق ایدییور. رسالۀ نور شاكردلری، اقتصاد و قناعت و توكّل و قسمتنە رضا كبی، رسالۀ نورڭ درسندن آلدقلری عزّت ایمانیە، ان شٓاء اللّٰه اونلری ریادن و دنیا منفعتلری ایچون خودفروشلقدن منع ایدر.

(اوچنجی سبب: ) حرص شهرت، حبّ جاه، مقام صاحبی اولمق، امثالنە تفوّق ایتمك كبی حسلر و انسانلرە أیی كورونمك، تصنّعكارانە حدّندن فضلە كندینە اهمّیت ویردیرمك و تكلّفكارانە لایق اولمدیغی یوكسك مقاملردە كورونمك طرزینی طاقینمقلە ریا ایدر.

رسالۀ نور شاكردلری، أنایی، نَحْنُ یە تبدیل ایتدكلری، یعنی انانیتی بیراقوب، رسالۀ نور دائرەسنڭ شخص معنویسنڭ حسابنە چالیشمەسی، بن یرینە بز دیمەلری.. و اهل طریقتڭ فنا فی الشیخ و فنا فی الرّسول و نفس امّارەیی ئولدیرمك كبی ریادن قورتاران واسطەلرڭ بو زماندە بریسی دە فنا فی الاخوان، یعنی شخصیّتنی قرداشلرینڭ شخص معنویسی ایچندە اریتوب اویلە طاوراندیغی ایچون، ان شٓاء اللّٰه اهل حقیقتڭ ریادن قورتولمەلری كبی، بو سرّ ایلە اونلر دە قورتولورلر.

[اوچنجی نقطە] وظیفۀ دینیە اعتباریلە، ناسە حسن قبول ایتدیرمك، او مقامڭ اقتضا ایتدیگی یوكسك طورلر و وضعیتلر، خودفروشلق و ریا صاییلماز و صاییلماملی. مگر او آدم، او وظیفەیی كندی انانیتنە تابع ایدوب استعمال ایدە.

اوت، بر امام، امامت وظیفەسندە تسبیحاتلری اظهار ایدر، اسماع ایدر. هیچ بر جهتلە ریا اولاماز. فقط وظیفە خارجندە او تسبیحاتلری آشكارە خلقلرە ایشیتدیرمگە ریا كیرەبیلدیگی ایچون، كیزلیسی داها ثوابلیدر.

رسالۀ نورڭ شاكردلری، نشریات دینیەلرندە و اتّباع سنّتدەكی عبادتلرندە و اجتناب كبائردەكی تقوالرندە، قرآن حسابنە وظیفەدار صاییلیرلر. ان شٓاء اللّٰه ریا اولماز. مگركە، رسالۀ نورە باشقە بر مقصد دنیوی ایچون كیرمش اولا.

سعید النّورسی

قسطمونی لاحقەسی: ٢٣٤

لاحقە ١٢٠: ( "كرامت اظهار ایدیلمزسە داها اوْلا اولدیغی حالدە، نەدن سن اعلان ایدییورسڭ" سؤٓالنە حضرت استادڭ ویردیگی جواب)

[ایكنجی سؤٓال] كرامت اظهار ایدیلمزسە داها أولا اولدیغی حالدە، نەدن سن اعلان ایدییورسڭ؟

[الجواب] بو بڭا عائد بر كرامت دگلدر. بلكە قرآنڭ اعجاز معنویسندن ترشّح ایدرك خاص بر تفسیرندن كرامت صورتندە بزلرە و اهل ایمانە بر اكرام ربّانی و بر انعام الٰهیدر. البتە معجزۀ قرآنیە و اونڭ لمعەلری اظهار ایدیلیر. نعمتی ایسە، شكر نیّتیلە اعلان ایتمك، بر تحدیث نعمتدر. 〚 وَاَمَّا بِنِعْمَةِ رَبِّكَ فَحَدِّثْ〛 آیتی، نعمتڭ اظهارینی امر ایدر.

بنم ایچون مدار فخر و غرور اولاجق بر لیاقتم و استحقاقم اولمدیغنی قسملە اعتراف ایدییورم. بن چكردك كبی چورودم و قورودم. بتون قیمت و حیات و شرف او چكردكدن چیقان شجرۀ رسالۀ نورە و معجزۀ معنویۀ قرآنیەیە كچمش بیلییورم. و اویلە اعتقاد ایتدیگمدن، كرامتی اعجاز قرآنی حسابنە اظهار ایدرم. بتون قیمت بر معجزۀ قرآنیە اولان رسالۀ نوردەدر. حتّی اسكیدنبری طاشیدیغم بدیع الزّمان اسمی اونڭ ایمش. یینە اوڭا

اعادە ایدیلدی. رسالۀ نور ایسە، قرآنڭ مالیدر.

بو رمزدە خصوصی قناعتمی تأیید ایدن كندیمە مخصوص چوق امارەلر و قرینەلر وار. فقط باشقەلرە اثبات ایدەمدیگمدن یازامییورم. یالڭز ایكی اوچنە اشارت ایتمەیە مناسبت كلدیگی ایچون یازییورم.

[برنجیسی] بن جلجلوتیەیی اوقودیغم وقت، سائر مناجاتلرە مخالف اولارق، كندم بالذّات حسّیاتملە مناجات ایدییورم، دییە حسّ ایدییورم. و اونی اوقوركن باشقەسنڭ لسانیلە تقلیدكارانە اوقویور كبی اولمییوردی. بنم ایچون غایت فطری و دردلرملە علاقەدار و تفكّرات روحیّەمە خوش بر زمین اولویوردی. برقاچ سنە صوڭرە كرامتنی و رسالۀ نور ایلە مناسبتنی كوردم. و آڭلادمكە، او حالت بو مناسبتدن كلمش.

[ایكنجیسی] حضرت امام علی رضی اللّٰه عنه، باشدە (رُوحٖی بِهِ اهْتَدَتْ *اِلٰی كَشْفِ اَسْرَارٍ بِبَاطِنِهِ انْطَوَتْ) و اورتەلرندە (وَامْنَحَنّٖی یَا ذَ الْجَلَالِ كَرَامَةً *بِاَسْرَارِ عِلْمٍ یَا حَلٖیمُ بِكَ انْجَلَتْ) و آخرندە (مَقَالُ عَلِیٍّ وَابْنِ عَمِّ مُحَمَّدٍ *وَسِرُّ عُلُومٍ لِلْخَلَٓائِقِ جُمِّعَتْ) دییەرك جلجلوتیەیی بر خزینۀ علوم اولارق كوسترییور. حالبوكە، ظاهرندە یالڭز بر مناجاتدر. حتّی امام علی رضی اللّٰە عنهڭ حقیقت فشان سائر قصیدەلرینڭ و علملی باشقە مناجاتلرینڭ جلجلوتیە كبی اسرار علمیّە ایلە تام مناسبتی كورونمییور. بنم خصوصی قناعتم شودركە، جلجلوتیە مادام رسالۀ نوری ایچنە آلمش و سینەسنە باصوب معنوی ولد كبی قبول ایتمش. البتە (وَسِرُّ عُلُومٍ لِلْخَلَٓائِقِ جُمِّعَتْ) فقرەسیلە، كندی خزینەسنڭ بر قسم پیرلانطەلرینی آخر زماندە نشر ایدن رسالۀ نوری شاهد كوستروب، جلجلوتیەیی بر خزینۀ علوم و بر دفینۀ علمیّەدر دییە، بحقٍّ مدح و ثنا ایدەبیلیر.

[اوچنجیسی] معلومدركە، بعضًا غایت كوچك بر امارە بعض شرائط داخلندە غایت قوّتلی بر دلیل حكمنە كچر. یقین درجەسندە قناعت ویرر. بڭا بویلە قناعت ویرن چوق مثاللرندن، یالڭز سابقًا بیان ایتدیگم بر تك مثال بڭا كافی كلییور. شویلەكە:

حضرت امام علی رضی اللّٰه عنه، (تُقَادُ سِرَاجُ النُّورِ) فقرەسیلە رسالۀ نوری تاریخیلە و اسمیلە و ماهیتیلە و اساسلریلە و خدمتیلە و وظیفەسیلە كوستردكدن صوڭرە، سریانیجە اسملری تعداد ایدرك مناجات ایدر. اوتوز ایكی ویا اوتوز اوچ عدد اسملردە ایكی دفعە دە (بَعْدَهَا) كلمەسنی تكرار ایدر. بری، یگرمی یدنجیدە (وَذَیْمُوخٍ بَعْدَهَا) در. دیگری، اوتوز بردە (وَبَازُوخٍ بَعْدَهَا) در.

ایشتە رسالۀ نورڭ سوزلری اوتوز اوچ و بر جهتدە اوتوز ایكیدر. و مكتوبات نامندەكی رسالەلر دخی، بر جهتدە اوتوز ایكی و بر جهتدە اوتوز اوچ اولوب، بو مناجاتلە مطابق اولمسی.. و دیگر رسالە شكلندە ایكی عدد ذیللری بولونمسی.. و او ذیللرڭ

بریسی یگرمی یدنجی سوزڭ اهمّیتلی ذیلی، دیگری اوتوز برنجی سوزڭ قیمتدار ذیلی اولمسی.. و او ایكی ذیل رسالەلرینڭ مستقل مرتبە و نومرولری بولونمامەسی.. و (بَعْدَهَا) كلمەسی دخی، عین یردە و عین معنادە توافق ایتمسی بڭا ایكی كرّە ایكی درت ایدر درجەسندە قناعت ویرییوركە، حضرت امام علی رضی اللّٰه عنه تبعی بر معنا ایلە و اشاری بر مفهوم ایلە رسالۀ نورە، حتّی ذیللرینە