[ج-حضرت استادڭ مجدّدلگی]

لاحقە ٨٧: (هر عصرڭ باشندە گلەجگی مژدەلنن دینڭ یوكسك خادملرینڭ أوزللكلری، رسالۀ نورڭ ماهیتی و حضرت استادڭ حیاتندن بعض خارقە حاللر)

رسالۀ نور نەدر؟ و حقیقتلر قارشوسندە رسالۀ نور و ترجمانی نە ماهیّتدەدرلر؟

دییە بر تقریضنامەدر

هر عصر باشندە حدیثجە كلەجگی تبشیر ایدیلن دینڭ یوكسك خادملری، امر دیندە مبتدع دگللر، مُتَّبعدرلر. یعنی كندیلرندن و یڭیدن بر شی احداث ایتمزلر. یڭی احكام كتیرمزلر. اساسات و احكام دینیەیە و سُنَنِ محمّدیّەیەؐ حرفیًا اتّباع یولیلە دینی تقویم و تحكیم.. و دینڭ حقیقت اصلیّتنی اظهار ایدرلر. و اوڭا قاریشدیریلمق ایستەنیلن اباطیلی رفع و ابطال.. و دینە واقع تجاوزلری رد و امحا.. و اوامر ربّانیّەیی اقامە.. و احكام الٰهیّەنڭ شرافت و علویتنی اظهار و اعلان ایدرلر. آنجق طور اساسی یی بوزمادن و روح اصلی یی رنجیدە ایتمدن یڭی ایضاح طرزلریلە، زمانڭ فهمنە اویغون یڭی اقناع اصوللریلە و یڭی توجیهات و تفصیلات ایلە ایفای وظیفە ایدرلر.

بو مأمورین ربّانیّە فعلیاتلریلە و عمللریلە دە مأموریتلرینڭ مصدِّقی اولورلر. صلابت ایمانیەلرینڭ و اخلاصلرینڭ آیینەدارلغنی بالذّات ایفا ایدرلر. مرتبۀ ایمانلرینی فعلاً اظهار ایدرلر. و اخلاق محمّدیەنڭؐ و مِشْوَار احمدیّەنڭؐ و حِلْیۀ نبویّەنڭؐ حقیقی لابِسی اولدقلرینی كوستریرلر. خلاصە عمل و اخلاق باقیمندن تام عامل.. و سنّت سنیّەیە اتّباع و تمسّك جهتندن امّت محمّدەؐ تام بر حسن مثال، نمونۀ اقتدا تشكیل ایدرلر.

فعلاً اظهار ایدرلر. و اخلاق محمّدیەنڭؐ و مِشْوَار احمدیّەنڭؐ و حِلْیۀ نبویّەنڭؐ حقیقی لابِسی اولدقلرینی كوستریرلر. خلاصە عمل و اخلاق باقیمندن تام عامل.. و سنّت سنیّەیە اتّباع و تمسّك جهتندن امّت محمّدەؐ تام بر حسن مثال، نمونۀ اقتدا تشكیل ایدرلر.

بونلرڭ كتاب اللّهڭ تفسیری و احكام دینیەنڭ ایضاحی و زمانڭ فهمنە و مرتبۀ علمنە كورە طرز توجیهی صددندە یازدقلری اثرلر، كندی تلقای نفسلرینڭ و قریحۀ علویّەلرینڭ محصولی دگلدر. و كندی ذكا و عرفانلرینڭ نتیجەسی دگلدر. بونلر، طوغریدن طوغری یە منبع وحی اولان ذات پاك رسالتڭؐ معنوی الهام و تلقیناتیدرلر. جلجلوتیە، مثنوئ شریف، فتوح الغیب و امثالی آثار، هپ بو نوعدندرلر. بو آثار قدسیّەیە او ذوات عالیشان، آنجق ترجمان حكمندەدرلر. بو ذوات مقدّسەنڭ او آثار بَرْكزیدەنڭ تنظیمندە و طرز بیانندە بر حصّەلری واردر. یعنی بو ذوات قدسیّە، او معنانڭ مظهری، مرآتی و معكسی حكمندەدرلر.

رسالۀ نور و ترجماننە كلنجە.. بو اثر عالیشاندە شیمدی یە قدر امثالنە راستلانمامش بر فیض علوی و بر كمال نامتناهی موجود اولدیغندن.. و هیچ بر اثرڭ نائل اولمدیغی بر شكلدە مشعلۀ الٰهیّە و شمس هدایت و نیّر سعادت اولان حضرت قرآنڭ فیوضاتنە وارث اولدیغی مشهود اولدیغندن، اونڭ اساسی نور محض قرآن اولدیغی و اولیاء اللّٰهڭ آثارندن زیادە فیض انوار محمّدیەییؐ حامل بولوندیغی.. و ذات پاك رسالتڭؐ اوندەكی حصّە و علاقەسی و تصرّف قدسیسی اولیاء اللّٰهڭ

آثارندن زیادە اولدیغی.. و اونڭ مظهری و ترجمانی اولان معنوی ذاتڭ مظهریتی و كمالاتی ایسە،

او نسبتدە عالی و امثالسز اولدیغی كونش كبی آشكار بر حقیقتدر.

اوت، او ذات، داها حال صباوتدە ایكن و هیچ تحصیل یاپمدن ظواهری قورتارمق اوزرە اوچ آیلق بر تحصیل مدّتی ایچندە علوم اوّلین و آخرینە و لَدُنِّیات و حقائق اشیایە و اسرار كائناتە و حكمت الٰهیەیە وارث قیلینمشدركە: شیمدی یە قدر بویلە بر مظهریّت علیایە، كیمسە نائل اولمامشدر. بو خارقۀ علمیّەنڭ أشی، اصلا مسبوق دگلدر. هیچ شبهە ایدیلەمزكە، ترجمان نور بو حالیلە باشدن باشە عفّت مجسّمە و شجاعت خارقە و استغنای مطلق تشكیل ایدن خارق العادە متانت اخلاقیّەسی ایلە بالذّات بر معجزۀ فطرتدر. و تجسّم ایتمش بر عنایتدر. و بر موهبۀ مطلقەدر.

او ذاتِ ذی خوارق، داها حدّ بلوغە ایرمدن بر علّامۀ بی عدیل حالندە بتون جهان علمە میدان اوقومش. مناظرە ایتدیگی ارباب علومی الزام و اسكات ایتمش. هر نرەدە اولورسە اولسون، واقع اولان بتون سؤٓاللرە مطلق بر اصابتلە و اصلا تردّد ایتمدن جواب ویرمش. اون درت یاشندن اعتبارًا استادلق پایەسنی طاشیمش. و متمادیًا اطرافنە فیض علم و نور حكمت صاچمش. ایضاحلرندەكی اینجەلك و درینلك و بیانلرندەكی علویت و متانت و توجیهلرندەكی درین فراست و بصیرت و نور حكمت، ارباب عرفانی شاشیرتمش و حقّیلە كندیسنە بدیع الزّمان عنوان جلیلنی بخش ایتدیرمشدر. مزایای عالیەسیلە و فضائل علمیەسیلە دە

دین محمّدینڭؐ اثبات و نشرندە بر كمال تام حالندە رُونُمَا اولمش اولان بویلە بر ذات، البتە سیّد الانبیاؐ حضرتلرینڭ اڭ یوكسك التفاتنە مظهر.. و اڭ عالی حمایە و همّتنە نائلدر. و شبهەسز او نبیّ اقدسڭؐ امر و فرمانیلە یوروین و تصرّفیلە حركت ایدن و اونڭ انوار و حقائقنە وارث و معكس اولان بر ذات كریم الصّفاتدر.

انوار محمّدیەییؐ و معارف احمدیّەییؐ و فیوضات شمع الٰهی یی اڭ مشعشع بر شكلدە پارلاتمەسی.. و قرآنی و حدیثی اولان اشارات ریاضیەنڭ كندیسندە منتهی اولمسی.. و خطابات نبویّەیی افادە ایدن آیات جلیلەنڭ ریاضی بیانلرینڭ كندی اوزرندە طوپلانمەسی دلالتلریلە او ذات، خدمت ایمانیە نقطەسندە رسالتڭ بر مرآت مجلّاسی و شجرۀ رسالتڭ بر صوڭ میوۀ منوّری و لسان رسالتڭ ارثیّت نقطەسندە صوڭ دَهانِ حقیقتی و شمع الٰهینڭ خدمت ایمانیە جهتندە بر صوڭ حامل ذی سعادتی اولدیغنە شبهە یوقدر.

اوچنجی مدرسۀ یوسفیّەنڭ الحجّة الزّهرا و زهرة النّور اولان تك درسنی دیڭلەین

نور شاكردلری نامنە

احمد فیضی احمد نظیف زبیر صلاح الدّین جیلان صونغور طبانجەلی

بنم حصّەمی حدّمدن یوز درجە زیادە ویرن بو امضا صاحبلرینڭ خاطرلرینی قیرمغە جسارت ایدەمدم. سكوت ایدوب او مدحی، رسالۀ نور شاكردلرینڭ شخص معنویسی نامنە قبول ایتدم.

سعید النّورسی

شعاعلر ٢: ٦٢٥

لاحقە ٨٨: (شاملی حافظ توفیقڭ رسالۀ نورڭ حقّانیتنە و استادیمزە دائر استخراجی)

[رسالۀ نورڭ تسوید و تبییضندە چوق خدمتی سبقت ایدن شاملی حافظ توفیقڭ رسالۀ نورڭ حقّانیتنە دائر استخراجی بر فقرەسیدر]

معلوم اولسونكە، زُبْدَةُ الرَّسَائِلْ عُمْدَةُ الْوَسَائِلْ نامندە قُطْبُ الْعَارِفٖینْ ضیَاءُ الدّٖینْ مَوْلَانَا شَیخْ خَالِدْ قُدِّسَ سِرُّهُ نڭ مكتوبات و رسائل شریفەلرندن مقتبس نصایح قدسیەنڭ ترجمەسنە دائر بر رسالەیی، اون اوچ سنە مقدّم، بروسەدە خواجە حسن افندیدن آلمشدم. ناصلسە مطالعەسنە موفّق اولامامشدم. تا بوكونلردە كتابلریمڭ ایچریسندە بر شی آراركن ألمە كچدی. دیدم: بو حضرت مولانا خالد، استادیمڭ همشهریسیدر. هم امام ربّانیدنؓ صوڭرە طریق نقشینڭ اڭ مهم قهرمانیدر، هم طریق خالدیۀ نقشیەنڭ پیریدر. رسالەیی مطالعە ایدركن حضرت مولانانڭ ترجمۀ حالندن شو فقرەیی كوردم:

اصحاب كُتُبُ سِتَّەدن اِمَامِ حَاكِمْ مُسْتَدْرَكِنْدە و اَبُو دَاوُدْ كِتَابِ سُنَنْدە، بَیْهَقٖی شُعَبِ اٖیمَانْدە تخریج بویوردقلری: [اِنَّ اللّٰهَ یَبْعَثُ لِهٰذِهِ الْاُمَّةِ عَلٰی رَأْسِ كُلِّ مِائَةِ سَنَةٍ مَنْ یُجَدِّدُ لَهَا دٖینَهَا] یعنی "هر یوز سنەدە جناب حق بر مجدّد دین كوندرییور." حدیث شریفنە مظهر و ماصدق و مظهر تام اولان مَوْلَانَا الشَّهٖیرْقُطْبُ الْعَارِفٖینْ غَوْثُ الْوَاصِلٖینْ وَارِثِ مُحَمَّدٖی كاَمِلُ الطَّرٖیقَةِ الْعَلِیَّةِ وَالْمُجَدِّدِیَّةِ خَالِدِ ذُو الْجَنَاحَینْ قُدِّسَ سِرُّهُ الٰی آخرە.. صوڭرە تاریخچۀ حیاتندە كوردمكە، تولّدی بیڭ یوز طقسان اوچ تاریخندەدر. صوڭرە كوردمكە، بیڭ ایكی یوز یگرمی درت تاریخندە سلطنت هندڭ پای تختی اولان جهان آبادە داخل اولمش، طریق نقشی سلسلەسنە كیروب مجدّدیتە باشلامش. صوڭرە بیڭ ایكی یوز اوتوز سكزدە اهل سیاستڭ نظر دقّتنی جلب ایدوب وطننی ترك ایدرك دیار شامە هجرتلە كیتمشدر. هم ایچندە كوردمكە، حضرت مولانانڭ نسلی حضرت عثمان اِبْنِ عَفَّانْ

رضی اللّٰە عنهە منسوبدر. صوڭرە كوردمكە، ترجمۀ حالندە استعداد فطری و قابلیت خارقە ایلە، سنّی یگرمی یە بالغ اولمادن اوّل اعلم علمای عصر و علّامۀ وقت اولمش، سلیمانیە قصبەسندە تدریس علوم ایلە اشتغال ایتمشدر.

صوڭرە استادیمڭ تاریخچۀ حیاتنی دوشوندم. باقدم [درت مهم نقطەدە] توافق ایدییورلر.

[برنجیسی] حضرت مولانا بیڭ یوز طقسان اوچدە دنیایە كلمش.. استادم ایسە عربی بیڭ ایكی یوز طقسان اوچدە تام مولانا خالدڭ یوز سنەسی ختام بولدقدن صوڭرە دنیایە كلمش.

[ایكنجیسی] حضرت مولانانڭ تجدید دین مجاهدەسنە باشلانغیجی و مقدّمەسی اولان هندستانڭ پای تختنە بیڭ ایكی یوز یگرمی درتدە كیرمش. استادم ایسە، عینًا یوز سنە صوڭرە، بیڭ اوچ یوز یگرمی درتدە عثمانلی سلطنتنڭ پای تختنە كیرمش، مجاهدۀ معنویەسنە حاضرلانمش.

[اوچنجیسی] اهل سیاست، حضرت مولانانڭ فوق العادە شهرتندن توهّم ایدرك، حضرت مولانانڭ دیار شامە نقل ایتمەسی، بیڭ ایكی یوز اوتوز سكزدە واقع اولمشدر. استادم ایسە، عینًا یوز سنە صوڭرە، بیڭ اوچ یوز اوتوز سكزدە آنقرەیە كیتمش. اونلرلە اویوشامایوب اونلری ردّ ایتمش. كوسەرك تكرار وانە كیتمش. واندە بر طاغدە انزوا ایدركن بیڭ اوچ یوز اوتوز سكز سنەسنی متعاقب، شیخ سعید حادثەسنڭ وقوعی مناسبتیلە اهل سیاستڭ وهمنە طوقونمش، اوندن قورقارق بوردور، اسپارطە، قسطمونی، آفیون ولایتلرندە طقوز سنە، شیمدی یگرمی سنەدر اقامت ایتدیریلمش.

[دردنجیسی] حضرت مولانا، یاشی یگرمی یە بالغ اولمادن اوّل علّامۀ زمان حكمندە فحول علمانڭ اوستندە كورونمش، درس اوقوتمش. استادم ایسە، تاریخچۀ حیاتنی كورنلرە و بیلنلرە معلومدركە، اون درت یاشندە اجازت آلمش، اَعْلَمِ عُلَمَایِ زمانە قارشو معارضەیە كیریشمش، اون درت یاشندە ایكن، اجازت آلمەیە یاقین طلبەلری تدریس ایتمشدر. هم حضرت مولانا نسلاً حضرت عثماندنؓ اولدیغی و سنّت سنیّەیە بتون قوّتیلە چالیشدیغی كبی.. استادم قرآن حكیمە خدمت نقطەسندە، مشربًا حضرت عثمان ذِی النُّورَیْنڭ آرقەسندن كیدوب، حضرت مولانا كبی، رسالۀ نور اجزالریلە -بتون قوّتیلە- سنّت سنیّەنڭ احیاسنە چالیشدی.

ایشتە بو درت نقطەدەكی توافقات، تام یوز سنە فاصلە ایلە رسالۀ نورڭ تقویۀ دین خصوصندەكی تأثیراتی، حضرت مولانانڭ طریق نقشی واسطەسیلە خدمتی كبی عظیم كورونویور. [حاشیە]

استادم كندینە عائد مدح و ثنایی قبول ایتمز. فقط رسالۀ نور قرآنە عائد اولوب، مدح و ثنا قرآنڭ اسرارینە عائددر. یالڭز استادم ایلە حضرت مولانانڭ [برقاچ فرقی] وار.

[برنجیسی] حضرت مولانا ذُو الْجَنَاحَیْنْدر. یعنی هم قادری، هم نقشی طریقت صاحبیدر. فقط نقشی طریقتی اوندە داها غالبدر. استادمدە بالعكس قادری مشربی و شاذلی مسلگی داها زیادە حكم ایدییور.

بن استادمدن ایشیتدمكە، "حضرت مولانا؈ هندستاندن طریق نقشی یی كتیردیگی وقت، بغداد دائرەسی شاە كیلانینڭ بعد الممات، حیاتدە اولدیغی كبی تصرّفندە ایدی. حضرت مولانا معنًا بو تصرّفی جای قبول كورەمدی. شاە نقشبند ایلە امام ربّانینڭ روحانیتلری بغدادە كلوب شاە كیلانینڭ زیارتنە كیدەرك رجا ایتمشلركە، » مولانا خالد سنڭ اولادڭدر، قبول ایت.« شاە كیلانی اونلرڭ

التماسنی قبول ایدرك مولانا خالدی قبول ایتمش. اوندن صوڭرە مولانا خالد بردن پارلامش. بو واقعە، اهل كشفجە واقع و مشهود اولمشدر. بو حادثۀ روحانیەیی او زمان اهل ولایتڭ بر قسمی مشاهدە ایتمش، بعضیلری دە رؤیا ایلە كورمشلر. "استادیمڭ سوزی بورادە تمام اولدی.

[ایكنجی فرق] استادم كندی شخصیّتنی مرجعلكدن عزل ایتمشدر. یالڭز رسالۀ نوری مرجع كوسترییور. حضرت مولانانڭ شخصیتی ایسە، قطب الارشاد و مرجع الخاص والعوام اولمشدر.

[اوچنجی فرق] حضرت مولانا ذُو الْاَجْنِحَەدر. فقط زمانڭ مقتضاسیلە سنّت سنیّەیە چوق قوّت ویرمكلە برابر، -علم طریقتی اساس طوتمق جهتیلە- طریقتی داها زیادە طوتمش، او نقطەدە صرف همّت ایتمش. استادم ایسە، شو دهشتلی زمانڭ مقتضاسیلە علم حقیقتی و حقائق ایمانیە جهتنی التزام ایدرك، طریقتە اوچنجی درجەدە باقمشلردر.

[الحاصل] باشدەكی حدیث شریفڭ، "هر یوز سنە باشندە دینی تجدید ایدەجك بر مجدّد كوندرییور" وعد الٰهیسنە بناءً، حضرت مولانا خالد اكثر اهل حقیقتجە بیڭ ایكی یوز سنەسنڭ، یعنی اون ایكنجی عصرڭ مجدّدیدر. مادام تام یوز سنە صوڭرە، عینًا درت جهتدە توافق ایدرك رسالۀ نور اجزالری عین وظیفەیی كورمشدر. قناعت ویرركە، نصّ حدیثلە، رسالۀ نور تجدید دین خصوصندە بر مجدّد حكمندەدر.

بنم استادم دائما دییوركە، "بن بر نفرم، فقط مشیر خدمتنی كورویورم. یعنی قیمت بندە دگلدر. قرآن حكیمڭ فیضندن ترشّح ایدن رسالۀ نور اجزالری بر مشیریت معنویە خدمتنی كورویورلر." استادیمی قیزدیرمامق ایچون شخصنی ثنا ایتمەیورم.

شاملی حافظ توفیق

بارلە لاحقەسی: ٢٢٨

لاحقە ٨٩: (مولانا خالدڭ جبّەسنڭ حضرت استادە تسلیم ایدیلمسی)

اسكی زماندە، اون درت یاشندە ایكن اجازت آلمەنڭ علامتی اولان استاد طرفندن صاریق صاردیرمق، بر جبّە بڭا كییدیرمك وضعیتنە مانعلر بولوندی. یاشمڭ كوچكلگی، مملكتمزدە بیوك خواجەلرە

مخصوص كسوەیی كییمك یاقیشمدیغی.. ثانیًا، او زماندە بیوك عالملر، بڭا قارشو استادلق وضعیتی دگل، یا رقیب ویاخود تسلیمیت درجەسنە كیردكلری ایچون، بڭا جبّە كییدیرەجك و استادلق وضعیتنی آلاجق كندیلرینە كووننلر بولونمدی. و اولیای عظیمەدن درت بش ذاتڭ وفات ایتمەلری جهتندە، اللی آلتی سنەدر اجازتڭ ظاهر علامتی اولان جبّەیی كییمك و بر استادڭ ألنی اوپمك، استادلغنی قبول ایتمك حقّمی بوكونلردە، یوز سنەلك بر مسافەدە حضرت مولانا ذوالجناحین خالد ضیاء الدّین؈، او جبّەیە صاریلان بر صاریق ایلە پك غریب بر طرزدە كندی جبّەسنی بڭا كییدیرمك ایچون كوندردیگنی بعض امارەلرلە بڭا قناعت كلدی.

بن دە او مبارك و یوز یاشندە جبّەیی كیییورم. [حاشیە]جناب حقّە یوز بیڭلر شكر ایدییورم. عموم قرداشلریمزە برر برر سلام و دعا و استدعا ایدییورز. ان شٓاء اللّٰه بو كونلردە یازدیرمش اولدیغمز حزب الاعظم قرآنی یی پوستە واسطەسیلە كوندرەجگز.

سعید النّورسی

قسطمونی لاحقەسی: ١٢٠

لاحقە ٩٠: (عثمان خالدی حضرتلرینڭ استقبالدە كلەجك ذاتە دائر اخباراتی)

[رسالۀ نورڭ بش طلبەسنڭ بر فقرەسیدر.]

اسپارطەنڭ صاف منابع علمیەسندن بر ذاتكە، طریقت علیّۀ نقشیە رؤساسندندر. بیڭ ایكی یوز طقسان ایكی ویا اوچ تاریخلرندە دار بقایە تشریف بویورمشلردر. بو ذات بش قضالی زادە عثمان خالدی؈ حضرتلریدر. بو ذات مسلكِ علمیّە و عملیّەسیلە علاقەدارانە كشفیّاتنی و حادثاتنی بر حجّت قاطعە كبی وارثلرینە وصیت أیلەمش. و محض تبشیراتلری شویلەجە توارث ایدیلمشدر. حتّی استاد محترممزڭ تولّدینە تام اصابتلی اولارق او تاریخ مذكوردە: [ایمانی قورتاران بر مجدّد چیقاجق. او دە بو سنە تولّد ایتمشدر.] دیمشدر. بوندن باشقە، درت اولادندن بریسنڭ او ذات ایلە مشرّف و ملاقی اولاجغنی علاوە ایتمشدر.

بو بیانات حقیقیّە شویلەجە جریان ایتمشدر:

بیڭ اوچ یوز یگرمی یدی رومی سنەسی آتابگدە سنّت و حافظ جمعیتلرندن برندە، مُشَارٌ اِلَیْهْ عثمان خالدی حضرتلرینڭ اولادلرندن صوڭنجیسی اولان احمد افندی مرحومدن: "مجدّد، مجدّد دییورسڭز. نرەدە و كیمدر؟" دییە ایراد اولونان سؤٓالە جوابًا احمد افندی: "اوت، شیمدی موجوددر. هم اوتوز بش یاشلرندەدر" دیمشدر.

(ثانیًا) اسپارطەنڭ یڭیجە محلّەسندن و قرداشلریمزدن نوری افندی، مرحوم مُومٰی اِلَیْهْ احمد افندیدن صورمش: "پدریڭز، بنم اولادمدن بریسی او مجدّدلە مكالمە و مصافحەدە اولاجقدر، دیمش، بو ناصلدر؟" جوابًا احمد افندی مرحوم: "اوت، طوغریدر. بن اونڭلە كوروشدم" جوابندە بولونمسی، اشبو كشفیات و بیاناتە مدار اولمشدر.

مشار الیه عثمان خالدی حضرتلرینڭ مستثنا تسبیحات و تحمیداتنڭ بریسی〚 وَاَنْ لَیْسَ لِلْاِنْسَانِ اِلَّا مَا سَعٰی〛 آیت كریمەسنڭ فضل توفیقنە صیغینارق، اسپارطەنڭ جنوبندە، طاغدە، سِدْرَە نام موقعدە اربعین ایّام مباركەسنی تسعید و حصر تسبیحاتە نیّتلە قرق كونلك اعاشەیە تخصیص ایتدیگی یییەجگنی، هر بر كون ایچون اللی درهم مقدارندە بر یوفقە اكمگندن قرق دانە اولان تخصیصاتنی بر ایكی كوندە ییر و قرق كون داها ییمك ییمەدن او موقع مخصوصەدە امرار اوقات و تسبیحاتدە بولونور. قرق كونی اكمالندە كری عودتلرندە مبارك طوداقلری بربرینە یاپیشیر، بیچاقلە تكرار آچارلر. براز ایلریدە شو عصر حاضرڭ اوغرادیغی و اوغرایاجغی

قویًا مأمول و ملحوظ اولان سفاهت و عطالتە رغمًا دستور شُیُوخَتِنی تحدید.. و آنجق عناصر مجروحە جراحنی اونوتمایارق و اهمال دخی ایتمەیەرك، شهادت قطعیّەسنی كوستروب،

صحیفۀ حیاتنی بیڭ ایكی یوز طقسان ایكی ویا اوچدە امضالامشدر.

واندە تأسیسنە باشلانان و تأخیر ایدیلن مدرسة الزّهرا ایچون، [دوقتور خستەیە الزمدر] فحواسیلە، اون طقوز بیڭ آلتون تخصیصات، و آرقەسندە سلطان رشاد داها بریدە ایكی یوز مبعوثدن یوز آلتمش كسور مبعوثڭ انضمام رأییلە یوز اللی بیڭ بانقنوط قبول ایتدكلری حالدە، موقع فعلە ایصال ایدیلەمەمش. هر حالدە حكیم مطلق و قدیر مطلق داها احسن صورتنی دیلەمشكە، او سلطان ازلینڭ لطفیلە، مادّیاتە منّت ایتمدن، هٰذَا مِنْ فَضْلِ رَبّٖی الحمد للّٰه، اسپارطە رسالۀ نورڭ تألیفنە منبع اولمسی و معنوی مدرسة الزّهرا حكمنە كچمەسی، پایانسز قصورلریمزڭ عفوینە و سترینە ان شٓاء اللّٰه وسیلە اولور دوشونجەسیلە، جناب ارحم الرّاحمیندن دیلەیەرك اشبو دستگاە معنوی یی تحكیمًا عثمان خالدینڭ؈ قیمتدار و معنیدار، صادق و مشهور اخباراتنڭ هدف و مَصْرُوفٌ لَهیٖ كوندن داها آشكار بر حالدە ظهور ایتمشدر.

شو متوالی وقایع مثبتە، بز عاجز خدمتجیلرە وظیفۀ اصلیەمزدە آیریجە نظر دقّتی جلب ایتدیگنە مطّلع اولدقدن صوڭرە، بیڭ حمد و ثنا ایلە حضور استادە برر برر وجود معنویمزلە عرض اندام ایدر، مبارك اللرینی أوپر، عین غایەیە یاردیمە قوشان

و عین دستگاهڭ علاقەدارلری اولان كوچك خسرو فیضی، نظیف، امین، تحسین، توفیق، حلمی كبی قرداشلریمزە عرض ایدرز.

رسالۀ نور شاكردلرندن

حسن عثمان طاهری عبد اللّٰه خلوصئ ثانی صبری

سكّۀ تصدیق غیبی: ٣٨

لاحقە ٩١: (آخر زماندە كلەجك ذاتڭ اوچ مهم وظیفەسی و ایضاحلری)

عزیز، صدّیق قرداشلرم،

[اوّلًا] نورڭ فوق العادە خالص شاكردلری، مشتملاتیلە برابر نشر ایتمك ایستەدكلری سكّۀ غیبیەیی، اولیای مشهورەدن، قرق كوندە بر دفعە اكمك یییوب قرق كون ییمەین عثمان خالدینڭؒ صریح اخباری و اولادلرینە وصیتی ایلە.. و اسپارطەنڭ مشهور اهل قلب عالملرندن طوپال شكرینڭ ظاهرًا خبر ویرمسیلە چوق اهمّیتلی بر حقیقتی قرداشلرم دعوا ایدوب، فقط ایكی التباس ایچندە، بو بیچارە اهمّیتسز قرداشلری سعیدە بیڭ درجە زیادە حصّە ویرمشلر. اون سنەدنبری قناعتلرینی تعدیلە چالیشدیغم حالدە، او بهادر قرداشلرم قناعتلرندە ایلری كیدییورلر. اوت، اونلر، اون سكزنجی مكتوبدەكی ایكی اهل قلب چوبانڭ ماجراسی كبی، حق بر حقیقتی كورمشلر. فقط تعبیرە محتاجدر. او حقیقت دە شودر: