[أ-حضرت استادڭ خصوصیتلری]

لاحقە ٩٥: (حضرت استادڭ كندیسندن درس آلان طلبەسنڭ هدیەسنی قبول ایتمەمەسندەكی حكمتی ایضاح ایتمەسی)

عزیز، صدّیق، وفادار آخرت قرداشلرم حاجی نوح بگ، ملّا حمید،

(...)

چوق رجا ایدرمكە، كوجنمەییڭز، هدیەیی قبول ایدەمدم. عدم قبولڭ اسبابی چوقدر. اڭ مهم بر سبب، بنم قرداشلرم و طلبەلرملە اولان مناسبتڭ صمیمیتنی و اخلاصی زدەلەمەمكدر. هم اقتصاد، بركت و قناعت سایەسندە، شدّتلی احتیاجم اولمدیغی حالدە، دنیا مالنە ال اوزاتمق ألمدە دگل، اختیارم خارجندەدر. هم بر مثال ایلە اینجە بر سببی آڭلاتاجغم:

مهم بر تجّار دوستم اوتوز غروشلق بر چای كتیردی، قبول ایتمدم. "استانبولدن سنڭ ایچون كتیردم، بنی قیرما" دیدی. قبول ایتدم، فقط ایكی قات فیئٓاتنی ویردم.

دیدی: نە ایچون بویلە یاپییورسڭ، حكمتی نەدر؟

دیدم: "بندن آلدیغڭ درسی، الماس درجەسندن شیشە درجەسنە ایندیرمەمكدر. سنڭ منفعتڭ ایچون، منفعتمی ترك ایدییورم. چونكە دنیایە تنزّل ایتمز، طمع و ذلّتە دوشمز، حقیقت مقابلندە دنیا مالنی آلماز، تصنّعە مجبور اولماز بر استاددن آلینان درس حقیقت الماس قیمتندە ایسە، صدقە آلمەیە مجبور اولمش، اهل ثروتە

تصنّعە مضطر قالمش، طمع ذلّتیلە عزت علمنی فدا ایتمش، صدقە ویرنلرە خوش كورونمك ایچون ریاكارلغە تمایل ایتمش، آخرت میوەلرینی دنیادە ییمگە جواز كوسترمش بر استاددن آلینان عین درس حقیقت، الماس درجەسندن شیشە درجەسنە اینر. ایشتە معنًا سڭا اوتوز لیرە ضرر ویرمكلە، اوتوز غروشلق منفعتمی آرامق، بڭا آغیر كلییور و وجدانسزلق تلقّی ایدییورم. سن مادام فداكارسڭ.. بن دە او فداكارلغە مقابل، منفعتڭزی منفعتمە ترجیح ایدییورم، كوجنمە. "او دە بو سرّی آڭلادقدن صوڭرە قبول ایتدی، كوجنمدی.

سعید النّورسی

بارلە لاحقەسی: ١٠٦

لاحقە ٩٦: (حضرت استادڭ رسالۀ نور طلبەلری طرفندن كندیسنە ویریلن فوق العادە مقام و كمالاتی قبول ایتمەمەسندەكی حكمتی بیان ایتمەسی)

عزیز، صدّیق قرداشلرم،

(مادّی و معنوی بر سؤٓال مناسبتیلە خاطرە كلن بر جوابدر.)

دینیلییوركە: نەدن نور شاكردلرینڭ قوّتلی حسن ظنلری و قطعی قناعتلری، سنڭ شخصڭ حقّندە نورلرە داها زیادە شوقلرینە مدار اولان بر مقامی و كمالاتی شخصڭە قبول ایتمییورسڭ؟ یالڭز رسالۀ نورە ویروب، كندیڭی چوق قصورلی بر خادم كوسترییورسڭ؟

[الجواب] حدسز حمد و شكر اولسونكە، رسالۀ نورڭ اویلە قوّتلی

و صارصیلماز استناد نقطەلری و اویلە پارلاق و كسكین حجّتلری واركە، بنم شخصمدە ظن ایدیلن مزیتە، استعدادە احتیاجی یوقدر. باشقە اثرلر كبی، مؤلّفڭ

قابلیتنە باقوب، مقبولیتی و قوّتی اوندن آلمییور. ایشتە میداندە! یگرمی سنەدر قطعی حجّتلرینە طایانوب، شخصمڭ مادّی و معنوی دوشمانلرینی تسلیمە مجبور ایدییور. اگر شخصیتم اوڭا اهمّیتلی بر نقطۀ استناد اولسە ایدی، دینسز دوشمانلرم و انصافسز معارضلرم قصورلی شخصمی چوروتمكلە، نورلرە بیوك ضربە اورابیلیردیلر. حالبوكە او دوشمانلر دیوانەلكلرندن، یینە هر نوع دسیسەلرلە بنی چوروتمەیە و حقّمدە توجّە عامّەیی قیرمغە چالیشدقلری حالدە، نورلرڭ فتوحاتنە و قیمتنە ضرر ویرەمییورلر. یالڭز بعض ضعیف و یڭی مشتاقلری بولاندیرسە دە واز كچیرەمییورلر.

بو حقیقت ایچون، هم بو زماندە انانیت زیادە حكم ایتدیگی ایچون، حدّمدن چوق زیادە اولان حسن ظنلری كندیمە آلمییورم. و بن، قرداشلرم كبی، كندی نفسمە حسن ظن ایتمەیورم. هم قرداشلریمڭ بو بیچارە قرداشلرینە ویردیگی مقام اخروی، حقیقی، دینی مقام ایسە. مكتوباتدن ایكنجی مكتوبڭ آخرندەكی قاعدەیە كورە، شخصمە ویردكلری معنوی هدیە اولان كمالاتی، اگر حاشا بن كندیمی اویلە بیلسەم، اولمامسنە دلیلدر. كندیمی اویلە بیلمەسەم، اونلرڭ او هدیەسنی قبول ایتمەمك لازم كلییور. هم كندینی مقام صاحبی بیلمك جهتندە انانیت مداخلە ایدەبیلیر.

بر شی داها قالدیكە، دنیا جهتندە، حقائق ایمانیەنڭ نشرندەكی وظیفەدارلر مقام صاحبی اولسە، داها أیی تأثیر ایدر دینیلەبیلیر. بوندە دە ایكی مانع وار:

[بریسی] فرضا ولایت اولسە دە، بیلەرك، ایستەیەرك مقام یاپمق طرزندە، ولایتڭ ماهیّتندەكی اخلاص و محویّتە منافیدر. نبوّتڭ ورثەلری اولان صحابەلر كبی اظهار و دعوا ایدەمزلر، اونلرە قیاس ایدیلمز.

[ایكنجی مانع] پك چوق جهتلرلە چوروتولەبیلیر و فانی و جزئی و موقّت و قصورلی بر شخص صاحب اولسە، نورلرە و حقائق ایمانیەنڭ فتوحاتنە ضرر كلیر. فقط بر نقطە واركە، موجب شكراندر: اهل سیاستدەكی دوشمانلرم، مذكور حقیقتلری بیلمدكلری ایچون، شرفلی، عزّتلی اسكی سعیدی دوشونوب، متمادیًا نورلر بدلنە بنم شخصمە اهانت و تنقیص ایتمكلە مشغول اولویورلر. بعض متعصّب، انانیتلی خواجەلری دە شخصمڭ علیهنە چویرییورلر، كویا نورلری سوندیرمگە چالیشییورلر. حالبوكە نورلری داها زیادە پارلاتدیرمغە وسیلە اولویورلر. نورلر، عادی شخصمدن دگل، قرآن كونشنڭ منبعندن نورلری آلییور.

عموم قرداشلریمە پك چوق دعا ایدییورز.

اَلْبَاقٖی هُوَ الْبَاقٖی

قرداشڭز سعید النّورسی

امرطاغ لاحقەسی ٣: ١١٦

لاحقە ٩٧: (حضرت استادڭ بر قسم اهمّیتلی طلبەلرڭ كندیسنی آل بیتڭ بیوك بر مرشدی اولارق قبول ایتمەلرینە بناءً آخر زماندە كلەجك ذاتڭ اوچ وظیفەسنی ایضاحلە لایق كورولن مقامی نەدن قبول ایتمەدیگنی بیان ایتمەسی)

عزیز، صدّیق قرداشلرم،

[اوّلًا] نورڭ اهمّیتلی و چوق خیرلی بر شاكردی، چوقلرڭ نامنە بندن صوردیكە: نورڭ خالص و اهمّیتلی بر قسم شاكردلری، پك مصرّانە اولارق آخر زماندە كلن آل بیتڭ بیوك بر مرشدی سنی ظن ایدییورلر و او قدر چكیندیگڭ حالدە اونلر اصرار ایدییورلر. سن دە بو قدر مصرّانە اونلرڭ فكرلرینی قبول ایتمییورسڭ، چكینییورسڭ. البتە اونلرڭ ألندە بر حقیقت و قطعی بر حجّت وار. و سن دە بر حكمت و حقیقتە بناءً اونلرە موافقت ایتمییورسڭ. بو ایسە بر تضاددر، هر حالدە حلّنی ایستەیورز.

بن دە بو ذاتڭ تمثیل ایتدیگی چوق سائللرە جوابًا دیرمكە: او خاص نورجیلرڭ اللرندە بر حقیقت وار. فقط ایكی جهتدە بر تعبیر و تأویل لازم:

[برنجیسی] چوق دفعە مكتوبلرمدە اشارت ایتدیگم كبی، مهدئ آل رسولڭ تمثیل ایتدیگی قدسی جماعتنڭ شخص معنویسنڭ اوچ وظیفەسی وار. اگر چابوق قیامت قوپمازسە و بشر بتون بتون یولدن چیقمازسە، او وظیفەلری اونڭ جمعیتی و سیّدلر جماعتی یاپاجغنی رحمت الٰهیەدن بكلەیورز. و اونڭ اوچ بیوك وظیفەسی اولاجق:

[برنجیسی] فن و فلسفەنڭ تسلّطی ایلە و مادّیون و طبیعیّون طاعونی بشر

ایچنە انتشار ایتمەسیلە، هر شیدن اوّل فلسفەیی و مادّیون فكرینی تام صوصدیراجق بر طرزدە ایمانی قورتارمقدر. اهل ایمانی ضلالتدن محافظە ایتمك و بو وظیفە هم دنیایی، هم هر شیئی بیراقمقلە، چوق زمان تدقیقات ایلە مشغولیتی اقتضا ایتدیگندن، حضرت مهدینڭ او وظیفەسنی بالذّات كندیسی كورمگە وقت و حال مساعدە ایدەمز. چونكە خلافت محمّدیەؐ جهتندەكی سلطنتی، اونڭ ایلە اشتغالە وقت بیراقمییور. هر حالدە او وظیفەیی اوندن اوّل بر طائفە بر جهتدە كورەجك. او ذات، او طائفەنڭ اوزون تدقیقاتی ایلە یازدقلری اثری كندینە حاضر بر پروغرام یاپاجق، اونڭ ایلە او برنجی وظیفەیی تام یاپمش اولاجق. بو وظیفەنڭ استناد ایتدیگی قوّت و معنوی اوردوسی، یالڭز اخلاص و صداقت و تساند صفتلرینە تام صاحب اولان بر قسم شاكردلردر. نە قدر دە آز دە اولسەلر، معنًا بر اوردو قدر قوّتلی و قیمتلی صاییلیر.

[ایكنجی وظیفەسی] خلافت محمّدیە علیە الصّلاة والسّلام عنوانی ایلە شعائر اسلامیەیی احیا ایتمكدر. عالم اسلامڭ وحدتنی نقطۀ استناد ایدوب بشریتی مادّی و معنوی تهلكەلردن و غضب الٰهیدن قورتارمقدر. بو وظیفەنڭ نقطۀ استنادی و خادملری، میلیونلرلە افرادی بولونان اوردولر لازمدر.

[اوچنجی وظیفەسی] انقلابات زمانیە ایلە چوق احكام قرآنیەنڭ زدەلنمەسیلە و شریعت محمّدیەنڭؐ قانونلری بر درجە تعطیلە اوغرامسیلە، او ذات بتون اهل ایمانڭ

معنوی یاردیملریلە و اتّحاد اسلامڭ معاونتیلە و بتون علما و اولیانڭ و بالخاصّە

آل بیتڭ نسلندن هر عصردە قوّتلی و كثرتلی بولونان میلیونلر فداكار سیّدلرڭ التحاقلریلە او وظیفۀ عظمایی یاپمغە چالیشیر.

شیمدی حقیقت حال بویلە اولدیغی حالدە، اڭ برنجی وظیفەسی و اڭ اهمّیتلیسی و اڭ یوكسك مسلگی اولان ایمانی قورتارمق و ایمانی تحقیقی بر صورتدە عمومە درس ویرمك، حتّی عوامڭ دە ایماننی تحقیقی یاپمق وظیفەسی ایسە، معنًا و حقیقتًا هدایت ایدیجی، ارشاد ایدیجی معناسنڭ تام صراحتنی افادە ایتدیگی ایچون، نور شاكردلری بو وظیفەیی تمامیلە رسالۀ نوردە كوردكلرندن، ایكنجی و اوچنجی وظیفەلر بوڭا نسبتًا ایكنجی و اوچنجی درجەدر دییە، رسالۀ نورڭ شخص معنویسنی حقلی اولارق بر نوع مهدی تلقّی ایدییورلر. او شخص معنوینڭ دە بر ممثّلی، نور شاكردلرینڭ تساندندن كلن بر شخص معنویسی و او شخص معنویدە بر نوع ممثّلی اولان بیچارە ترجماننی ظن ایتدكلرندن، بعضًا او اسمی اوڭا دە ویرییورلر. كرچە بو بر التباس و بر سهودر، فقط اونلر اوندە مسئول دگللر. چونكە زیادە حسن ظن، اسكیدنبری جریان ایدییور و اعتراض ایدیلمز. بن دە او قرداشلریمڭ پك زیادە حسن ظنلرینی بر نوع دعا و بر تمنّی و نور طلبەلرینڭ كمال اعتقادلرینڭ بر ترشّحی كوردیگمدن اونلرە چوق ایلیشمزدم. حتّی اسكی اولیانڭ بر قسمی، كرامت غیبیەلرندە رسالۀ نوری عین او آخر زمانڭ هدایت ایدیجیسی

اولدیغی دییە كشفلری، بو تحقیقات ایلە تأویلی آڭلاشیلیر. دیمك ایكی نقطەدە بر التباس وار، تأویل لازمدر:

[برنجیسی] آخردەكی ایكی وظیفە، كرچە حقیقت نقطەسندە برنجی وظیفە درجەسندە دگللر، فقط خلافت محمّدیە علیە الصّلاة والسّلام و اتّحاد اسلام اوردولریلە زمین یوزندە سلطنت اسلامیەیی سورمك جهتندە هركسدە، خصوصًا عوامدە، خصوصًا اهل سیاستدە، خصوصًا بو عصرڭ افكارندە او برنجی وظیفەدن بیڭ درجە كنیش كورونویور. و بو اسم بر آدمە ویریلدیگی وقت، بو ایكی وظیفە خاطرە كلییور. سیاست معناسنی احساس ایدر، بلكە دە بر خودفروشلق معناسنی خاطرە كتیریر، بلكە بر شان و شرف و مقام پرستلك و شهرتپرستلك آرزولرینی كوستریر. و اسكیدنبری و شیمدی دە چوق صاف دل و مقام پرست ذاتلر، مهدی اولاجغم دییە دعوا ایدرلر. كرچە هر عصردە هدایت ایدیجی بر نوع مهدی و مجدّد كلییور و كلمش، فقط هر بری اوچ وظیفەلردن بریسنی بر جهتدە یاپمەسی اعتباریلە، آخر زمانڭ بیوك مهدی عنواننی آلمامشلر.

هم محكمەدە دڭزلی اهل وقوفی، بعض شاكردلرڭ بو اعتقادلرینە كورە، بڭا قارشو دیمشلركە: اگر مهدیلك دعوا ایتسە، بتون شاكردلری قبول ایدەجكلر. بن دە اونلرە دیمشدم: بن، كندیمی سیّد بیلەمییورم. بو زماندە نسللر بیلینمییور. حالبوكە آخر زمانڭ او بیوك شخصی، آل بیتدن اولاجقدر. كرچە معنًا بن حضرت علینڭؓ بر ولد معنویسی حكمندە اوندن حقیقت درسنی آلدم.

و آل محمّد علیە السّلام بر معنادە حقیقی نور شاكردلرینە شامل اولمەسندن، بن دە آل بیتدن صاییلابیلیرم. فقط بو زمان شخص معنوی زمانی اولمەسندن

و نورڭ مسلگندە هیچ بر جهتدە بنلك و شخصیّت و شخصی مقاملری آرزو ایتمك و شان شرف قزانمق اولماز و سرّ اخلاصە تام مخالف اولمەسندن، جناب حقّە حدسز شكر ایدییورمكە، بنی كندیمە بگندیرمەمسندن، بن اویلە شخصی و حدّمدن حدسز درجە فضلە مقاماتە كوزیمی دیكمم و نوردەكی اخلاصی بوزمامق ایچون، اخروی مقامات دخی بڭا ویریلسە، بیراقمەیە كندیمی مجبور بیلییورم دیدم. او اهل وقوف صوصدی.

سعید النّورسی

امرطاغ لاحقەسی ٣: ٤٠٨

لاحقە ٩٨: (حضرت استادڭ قرداشی ملّا عبد اللّٰه ایلە بر قونوشمەسندن حركتلە بر قسم نور طلبەلرینڭ كندیسی حقّندەكی زیادە حسن ظنّلرینی تعدیل ایتمەسی)

[اهمّیتلیدر]

[رسالۀ نور طلبەلرندن بر قسم قرداشلریمڭ بنم حدّیمڭ چوق فوقندە حسن ظنلرینی و افراطلرینی تعدیل ایتمك ایچون اخطار ایدیلن بر محاورەدر]

بوندن قرق اللی سنە اوّل، بیوك قرداشم ملّا عبد اللّٰهؒ ایلە بر محاورەمی حكایە ایدییورم:

او مرحوم قرداشم، اولیای عظیمەدن اولان حضرت ضیاء الدّینڭ؈ خاص مریدی ایدی. اهل طریقتجە، مرشدینڭ حقّندە مفرطانە محبّت و حسن ظن ایتسە دە مقبول كوردكلری ایچون، او مرحوم قرداشم دیدیكە:

حضرت ضیاء الدّین بتون علومی بیلییور. كائناتدە، قطب اعظم كبی هر شیئە اطّلاعی وار. بنی، اونڭلە ربط ایتمك ایچون چوق خارقە مقاملرینی بیان ایتدی.

بن دە او قرداشمە دیدمكە: سن مبالغە ایدییورسڭ. بن اونی كورسەم، چوق مسئلەلردە الزام ایدەبیلیرم. هم سن، بنم قدر اونی حقیقی سومییورسڭ. چونكە كائناتدەكی علوملری بیلیر بر قطب اعظم صورتندە تخیّل ایتدیگڭ بر ضیاء الدّینی سورسڭ. یعنی او عنوان ایلە باغلیسڭ، محبّت ایدرسڭ. اگر پردۀ غیب آچیلسە و حقیقت كورونسە، سنڭ محبّتڭ یا زائل اولور ویاخود درتدن بریسنە اینر.

فقط بن او ذات مباركی، سنڭ كبی پك جدّی سَورم، تقدیر ایدرم. چونكە سنّت سنیە دائرەسندە، حقیقت مسلگندە، اهل ایمانە خالص و تأثیرلی و اهمّیتلی بر رهبردر. شخصی مقامی نە اولورسە اولسون، بو خدمتی ایچون روحمی اوڭا فدا ایدرم. پردە آچیلسە و حقیقی مقامی كورولسە، دگل كری چكیلمك، واز كچمك، محبّتدە نقصان اولمق.. بالعكس داها زیادە حرمت و تقدیر ایلە باغلاناجغم. دیمك بن حقیقی بر ضیاء الدّینی، سن دە خیالی بر ضیاء الدّینی سورسڭ. [حاشیە]

بنم او قرداشم انصافلی و مدقّق بر عالم اولدیغی ایچون، بنم نقطۀ نظریمی قبول ایدوب تقدیر ایتدی. ای رسالۀ نورڭ قیمتدار طلبەلری و بندن داها بختیار و فداكار قرداشلرم! شخصیتم اعتباریلە سزڭ زیادە حسن ظنّڭز، بلكە سزە ضرر ویرمز. فقط سزڭ كبی حقیقت بین ذاتلر وظیفەیە، خدمتە باقوب، او نقطەدە باقملیسڭز. پردە آچیلسە، بنم باشدن آشاغی یە قدر قصورات ایلە آلودە ماهیتم كورونسە، بندن قاچمغە بر وسیلە اولور. سزی قرداشلگمدن قاچیرمامق، پیشمان ایتمەمك ایچون، شخصیتمە قارشو حدّیمڭ پك فوقندە تصوّر ایتدیگڭز مقاملرە ارتباطڭزی باغلاماییڭز.

بن سزە نسبتًا قرداشم، مرشدلك حدّم دگل. استاد دە دگلم، بلكە درس آرقداشی یم. بن سزڭ، قصوراتمە قارشو شفقتكارانە دعا و همّتلریڭزە محتاجم. بندن همّت بكلەمەڭز دگل، بڭا همّت ایتمەڭزە استحقاقم وار. جناب حقّڭ احسان و كرمیلە سزلرلە غایت قدسی و غایت اهمّیتلی و غایت قیمتدار و هر اهل ایمانە منفعتلی بر خدمتدە، تقسیم المساعی قاعدەسیلە اشتراك ایتمشز. تساندیمزدن حاصل اولان بر شخص معنوینڭ فوق العادە اهمّیت و قیمتی و استادلغی و ارشادی بزە كافیدر.

هم مادام بو زماندە هر شیئڭ فوقندە خدمت ایمانیە اڭ اهمّیتلی بر وظیفەدر. هم كمیّت ایسە كیفیتە نسبتًا اهمّیتی آزدر. هم موقّت و متحوّل سیاست عالملری ابدی، دائمی، ثابت خدمات ایمانیەیە نسبتًا اهمّیتسزدر، مقیاس اولاماز،

مدار دە اولاماز. رسالۀ نورڭ تعلیماتی دائرەسندە و بزلرە بخش ایتدیگی خدمت نقطەسندە فیضلی مقاملرە قناعت ایتملی ییز. حدّندن فضلە فوق العادە حسن ظن و مفرطانە عالی مقام ویرمك یرینە، فوق العادە صداقت و ثبات و مفرطانە ارتباط و اخلاص لازمدر. اوندە ترقّی ایتملی ییز.

سعید النّورسی

قسطمونی لاحقەسی: ١٠٩

لاحقە ٩٩: ( "سعید یانندە باشقە كتابلر بولوندیرمییور؟" دییە اعتراضدە بولونانلرە حضرت استادڭ جوابی)

عزیز، صدّیق قرداشلرم،

(...)

شیمدی، بیچارە بعض خواجەلری و صوفیلری رسالۀ نورە قارشو بر چكینمك، بر صوغوقلق ویرمك ایچون هیچ خاطرە كلمەین بر وسیلەیی بولمشلر. شویلەكە:

دییورلر: سعید یانندە باشقە كتابلری بولوندیرمییور. دیمك اونلری بگنمییور. و امام غزالی یی دەؓ تام بگنمییوركە، اثرلرینی یاننە كتیرمییور. ایشتە بو عجیب، معناسز سوزلرلە بولانتی ویرییورلر. بو نوع حیلەلری یاپان، پردە آلتندە اهل زندقەدر.. فقط صاف دل خواجەلری و بعض صوفیلری واسطە یاپییورلر.

بوڭا قارشو دیرزكە: حاشا، یوز دفعە حاشا! رسالۀ نور شاكردلری حجّت الاسلام امام غزالیؓ و بنی حضرت علیؓ ایلە باغلایان یگانە استادیمی بگنمەمك دگل، بلكە

بتون قوّتلریلە اونلرڭ تعقیب ایتدیگی مسلگی اهل ضلالتڭ هجومندن قورتارمق و محافظە ایتمكدر.

فقط اونلرڭ زمانندە بو دهشتلی زندقە هجومی، اركان ایمانیەیی صارصمییوردی. او محقِّق و علّامە و مجتهد ذاتلرڭ عصرلرینە كورە مناظرۀ علمیەدە و دینیەدە استعمال ایتدكلری سلاحلر، هم كیچ الدە ایدیلیر، هم بو زمان دوشمانلرینە بردن غلبە ایدەمدیگندن، رسالۀ نور قرآن معجز البیاندن هم چابوق، هم كسكین، هم تام دوشمانلرڭ باشنی طاغیتاجق سلاحلری بولدیغی ایچون، او مبارك و قدسی ذاتلرڭ تزگاهلرینە

مراجعت ایتمییور. چونكە عموم اونلرڭ مرجعلری و منبعلری و استادلری اولان قرآن، رسالۀ نورە تام مكمّل بر استاد اولمشدر. و هم وقت طار، هم بزلر آز اولدیغمز ایچون وقت بولامییورزكە، او نورانی اثرلردن استفادە ایتسەك.

هم رسالۀ نور شاكردلرینڭ یوز مثلندن زیادە ذاتلر، او كتابلرلە مشغولدرلر و او وظیفەیی یاپییورلر. بز دە او وظیفەیی اونلرە بیراقمشز. یوقسە حاشا و كلّا، او قدسی استادلریمزڭ مبارك اثرلرینی روح و جانمز قدر سورز. فقط هر بریمزڭ برر قفاسی، برر ألی، برر دیلی وار. قارشومزدە دە بیڭلر متجاوز وار. وقتمز طار. اڭ صوڭ سلاح، میترالیوز كبی، رسالۀ نور برهانلرینی كوردیگمزدن، مجبوریتلە اوڭا صاریلوب اكتفا ایدییورز.

سعید النّورسی

قسطمونی لاحقەسی: ٢٣١

لاحقە ١٠٠: (حضرت استادڭ كندیسیلە كوروشمك ایستەینلرە تصنیف ایتمەسی و كندیسیلە معنًا كوروشمەنڭ اوچ میوەسنی افادە ایتمەسی)

بنملە كوروشن ویا كوروشمك آرزو ایدن دوستلرە بر دستوردركە، اوزاقدە بولونان بر قسم قرداشلرە یازیلمشدر.

بنملە كوروشمك آرزوڭزی حسّ ایتدم. قرداشلرم، بنملە كوروشمك ایكی جهتلە اولور: یا دنیا جهتیلە، یعنی حیات اجتماعیۀ انسانیە اعتباریلەدر. شو جهتدەكی قاپویی قپامشم. ویا حیات اخرویە و حیات معنویە جهتیلەدر. او دە ایكی وجهلە در.

[بری] شخصمە حدّمدن فضلە حسن ظن ایدوب، شخصمدن بر استفادۀ معنویەیی نیت ایتمكدر. شو وجهی دە قبول ایتمم. چونكە بن قرآن حكیمڭ صرف بر خدمتكاری یم، او مقدّس دكّانڭ بر دلّالی یم. شخصی دكاّنمدەكی پریشان، اهمّیتسز شیلری صاتیشە چیقارمایاجغم و چیقارمق ایستەمییورم. چونكە قرآن حكیمڭ قدسی الماسلرینڭ قیمتلرینە شبهە ایراث ایتمەمك ایچون، پریشان و شخصی دكّانمدە بولونان قیریق جام پارچەلرینی صاتسەم، حقیقی صرّاف اولمایان مشتریلر، دلّاللق وقتندە ألمدە كوردكلری الماسلرە دە شیشە نظریلە باقابیلیرلر. ذهنلرینە بر التباس، بر شبهە كلیر. اونڭ ایچون شخصی دكاّنمی قطعیًّا قپامشم. بڭا او مقدّس دكّانڭ خدمتكارلغی یتر. مفلس بر خدمتكار اولسەم، داها خوشمە كیدییور.