[أ-رسالۀ نور طلبەسنڭ خصوصیتلری]

لاحقە ٧٠: "رسالۀ نور طلبەلری، رسالۀ نورڭ دائرەسی خارجندە نور آرامامەلی و آراماز"

[بر دستور]

رسالۀ نور طلبەلری، رسالۀ نورڭ دائرەسی خارجندە نور آراماملی و آراماز. اگر آرارسە، رسالۀ نورڭ پنجرەسندن ایشیق ویرن معنوی كونشە بدل، بر لامبەیی بولور. بلكە كونشی غائب ایدر.

هم رسالۀ نورڭ دائرەسندەكی خالص و پك قوّتلی.. و هر بر فردینە چوق روحلری قزاندیران.. و صحابەنڭ سرّ وراثت نبوّتلە مشرب اخوتكارانەسنی كوسترن مشرب خلّت و مسلك اخوّت ایسە، خارج دائرەلردە اولان او پدرە و او مرشدە، اوچ جهتلە ضرر ویرمك صورتیلە بر پدری آرامەیە احتیاج بیراقماز. بر تك پدر یرینە، پك چوق آغابگلری بولدیرر. البتە بیوك قرداشلرڭ متعدّد شفقتلری، بر پدرڭ شفقتنی هیچە ایندیرر.

دائرەیە كیرمدن اوّل بولدیغی شیخنی دائرەیە كیردكدن صوڭرە دە هر فرد، او شیخنی و او مرشدینی دائرەدە دخی محافظە ایدەبیلیر. فقط شیخی اولمایانلر، دائرەیە

كیردكدن صوڭرە آنجق دائرە ایچندە مرشد آرایابیلیر. هم رسالۀ نورڭ ولایت كبرا اولان و سرّ وراثت نبوّت فیضنی ویرن درس حقائق دائرەسندەكی علم حقیقت دخی، دائرە خارجندەكی

طریقتلرە احتیاج بیراقماز. مگر طریقتی یاڭلیش آڭلاسین. یعنی كوزل رؤیالرە و خلیالرە و نورلرە و ذوقلرە مبتلا.. و آخرت فضیلتندن آیری اولان دنیوی و هوسی ذوقلری آرزولایان و مرجعیّت مقامنی ایستەین نفسپرستلر اولا!

بو دنیا دار الخدمتدر. دار المكافات دگلدر. اجرت، كلفت و مشقّت ایلە اولچولور. اونڭ ایچوندركە اهل حقیقت، كشف و كرامتلردەكی اذواق و انوارە اهمّیت ویرمییورلر. بلكە بعضًا قاچییورلر، سترینی ایستەیورلر.

هم رسالۀ نورڭ دائرەسی چوق كنیشدر. شاكردلری پك چوقدر. خارجە قاچانلری آرامازلر، اهمّیت ویرمزلر. بلكە داها ایچلرینە آلمازلر. هر انساندە بر قلب وار. بر قلب ایسە هم دائرەدە، هم خارجدە اولاماز.

هم خارجدەكی ارشادە هوسلی ذاتلر، رسالۀ نورڭ شاكردلریلە مشغول اولماملی. چونكە كندیلری اوچ جهتلە ضرر كورمەلری محتملدر. تقوا دائرەسندەكی طلبەلر ارشادە محتاج اولمادقلری كبی، خارجدە كثرتلی نمازسزلر وار. اونلری بیراقوب بونلرلە مشغول اولمق، ارشاد دگلدر. اگر بو شاكردلری سورسە، اوّلًا دائرە ایچنە كیرسین. او شاكردلرە پدر دگل، بلكە قرداش اولسون. فضیلتی وارسە، آغابگلری اولسون.

هم بو حادثەدە كوروندیكە، رسالۀ نورە انتسابڭ چوق اهمّیتی وار. و چوق بهالی یە دوشدی. و بوڭا بو فیئٓاتی ویرن و او یولدە بتون عالم اسلام نامنە دینسزلگە قارشو مجاهد وضعیتنی آلان عقلی باشندە بر آدم، او الماس كبی مسلگنی ترك ایدوب، باشقە مسلكلرە كیرەمز.

سعید النّورسی

لمعەلر: ٣٠٠

لاحقە ٧١: (خسرو افندینڭ نورلردن آلدیغی فیضی افادە ایتمەسی و رأفتڭ نورلری مطالعە ایتمەنڭ لزومنە اشارت ایتمەسی)

[خسروڭ بر فقرەسیدر]

سوكیلی محترم استادم،

سوزلریڭزڭ یعنی رسالەلریڭزڭ هر بری برر دریای عظیمدر. سوزلریڭزدن پك چوق فیض آلییورم. او قدركە، اوقودقجە تكرار ایتمەیی ایستەیورم. و تكرارندە دویدیغم الٰهی بر ذوقی تعریف ایدەمەیەجگم. بوكون سوزلریڭزدن دگل هپسنی، بر دانەسنی آلان انصاف ایلە اوقورسە، حقّی تسلیمە و منكر ایسە كیتدیگی یولی تركە، فاسق ایسە توبەیە مجبور اولاجغنە قطعیًّا امیدوارم

خسرو

[رأفت بگڭ بر فقرەسیدر]

سوزلریڭز مرشدانە و چوق یوكسك اولدیغندن، غایت دقّتلی و تحلیل ایدرك اوقونمق ایجاب ایدییور. سرد أیلەدیگڭز دلائل عقلیە و منطقیە او قدر طاتلی و حیرت بخشدركە، انسان اوقودقجە اوقویور و نامتناهی بر ذوق معنوی حسّ ایدرك هیچ ألندن بیراقمق ایستەمییور. بو سببلە، بر دفعە اوقومق كافی دگل. هپسی یانندە بولونوب دائما اوقوملیدر

رأفت

بارلە لاحقەسی: ٤١

لاحقە ٧٢: (حضرت استادڭ بهار و یاز موسمندە طلبەلرڭ خدمتدە كوشكلگە دوشمەمەلری ایچون درسلرینە دوام ایتمە سببلرینی بیان ایتمەسی)

عزیز قرداشلرم، بهار و یازڭ مشغلەلری، هم كیجەلرڭ قیصالمسی، هم شهور ثلاثەنڭ كیتمەسی و اكثر قرداشلریمڭ بر درجە حصّە آلمسی و داها سائر بعض اسبابڭ بولونمسی، البتە بر درجە نشئەلی قیش درسنە فتور ویرر. فقط اونلردن كلن فتور سزە فتور ویرمەسین. چونكە او درسلر، علوم ایمانیەدن اولدیغی ایچون، بر انسان یالڭز كندی نفسنە دیڭلتدیرسە یتر. باخصوص، سز دائما بر ایكی حقیقی قرداشی دە بولورسڭز.

هم او درسی دیڭلەینلر یالڭز انسانلر دگل. جناب حقّڭ ذی شعور چوق مخلوقاتی واردركە، حقائق ایمانیەنڭ استماعندن چوق ذوق آلیرلر. سزڭ او قسم آرقداشڭز و مستمعلریڭز چوقدر.

هم متفكّرانە او چشیت صحبت ایمانیە، زمین یوزینڭ بر معنوی زینتی و مدار شرفی اولدیغنە اشارتًا بری دیمش

آسْمَانْ رَشْكْ بَرَدْ بَهَرْ زَمٖینْ كِە دَارَدْ

یَكْ دُوكَسْ یَكْ دُو نَفَسْ بَهْرِخُدَا بَرْ نَشٖینَنْدْ

یعنی سماوات زمینە غبطە ایدركە، زمیندە خالصًا للّٰه صحبت و ذكر و تفكّر ایچون بر ایكی آدم، بر ایكی نفس، یعنی بر ایكی دقیقە برابر اوتورورلر. كندی صانع ذوالجلالنڭ چوق كوزل آثار رحمتنی و چوق حكمتلی و سوسلی آثار صنعتنی بربرینە كوسترەرك صانعلرینی سووب سودیریرلر، دوشونوب دوشوندیررلر.

هم دە علم ایكی قسمدر: بر نوع علم واركە، بر دفعە بیلینسە و بر ایكی دفعە دوشونولسە كافی كلیر. دیگر بر قسمی اكمك كبی، صو كبی، هر وقت انسان اونی دوشونمەیە محتاج اولور. بر دفعە آڭلادم، یتر، دییەمز. ایشتە علوم ایمانیە بو قسمدندر. الڭزدەكی سوزلر اكثریت اعتباریلە ان شٓاء اللّٰه او جملەدندر.

بتون قرداشلریمزە برر برر سلام ایدییورم. ظن ایدرم مفارقت احتمالندن، ایكیمزدن زیادە حقّی افندی قرداشمز، داها زیادە ثواب قزانمق امارەسی اولارق، داها زیادە متأثّردر. فقط جناب حق حقّمزدە چوق امارەلرلە عنایت و رحمتنی كوستردیگندن، صوری افتراقمز وقوع بولسە، بر اثر عنایت و رحمت اولدیغنی تلقّی ایتملی ییز.

سعید النّورسی

بارلە لاحقەسی: ٣٢٣

لاحقە ٧٣: (اسپارطە قهرمانلرینە بڭزەمك ایستەین تام اونلر كبی اولملی)

[رسالۀ نور شاكردلرندن محمد فیضی و امثالنە خطابًا بیان ایدیلن بر حقیقتدر]

قرداشم فیضی! مادام سن، اسپارطە ولایتندەكی قهرمانلرە بڭزەمك ایستەیورسڭ، تام اونلر كبی اولمەلیسڭ. اسكیشهر حپسخانەسندە اللّٰه رحمت ایتسین، مهم بر شیخ، مرشد و جاذبەدار، نقشی اولیاسندن بر ذات، درت آی متمادیًا رسالۀ نورڭ اللی آلتمش شاكردی ایچندە جلبكارانە اونلرلە صحبت ایتدیگی حالدە، یالڭز بر تك شاكردی موقّتًا كندینە چكەبیلدی. متباقیسی، او جاذبەدار شیخە قارشو مستغنی قالدیلر. رسالۀ نورڭ یوكسك و قیمتدار خدمت ایمانیەسی اونلرە كافی كلییوردی و قناعت ویرییوردی.

او شاكردلرڭ غایت كسكین قلب و بصیرتلری شویلە بر حقیقتی آڭلامشكە، رسالۀ نورە خدمت ایدن، ایماننی قورتارییور. طریقت و شیخلك ایسە، ولایت مرتبەلری قزاندیرییور. بر آدمڭ ایماننی قورتارمق، اون مؤمنی ولایت درجەسنە چیقارمقدن داها مهم و داها ثوابلیدر. چونكە ایمان، سعادت ابدیەیی قزاندیردیغی ایچون، بر مؤمنە كرۀ ارض قدر بر سلطنت باقیەیی تأمین ایدر. ولایت ایسە، مؤمنڭ جنّتنی كنیشلتدیرر، پارلاتدیرر. بر آدمی سلطان یاپمق، اون نفری پاشا یاپمقدن نە قدر یوكسك ایسە، بر آدمڭ ایماننی قورتارمق، اون آدمی ولی یاپمقدن داها ثوابلیدر.

ایشتە بو دقیق سرّی، سنڭ اسپارطەلی قرداشلرڭ بر قسمنڭ عقللری كورمەسە دە، عمومنڭ كسكین قلبلری كورمشكە، بنم كبی بیچارە، كناهكار بر آدمڭ آرقداشلغنی، اولیالرە، بلكە [اگر اولسە ایدی ] مجتهدلرە ترجیح ایتدیلر. بو حقیقتە بناءً، بو شهرە بر قطب و بر غوث اعظم كلسە، دیسە: سنی اون كوندە ولایت درجەسنە چیقاراجغم. سن رسالۀ نوری بیراقوب اونڭ یاننە كیتسەڭ، اسپارطە قهرمانلرینە آرقداش اولامازسڭ!

للّٰە الحمد، بو زماندە سنّت سنیە دائرەسندە كمال ایمانی قزانان رسالۀ نور شاكردلری، اولیالرڭ، مرشدلرڭ نظر دقّتنی جلب ایدەجك وضعیتی آلدیغندن، هر زماندە بولونان حقیقی مرشدلر، هر حالدە بو زماندە رسالۀ نور شاكردلرینە مشتری اولورلر. بریسنی الدە ایتسەلر، یگرمی مرید قدر قیمت ویررلر. هم ذوقلی و جاذبەدار ولایت ترشّحاتی قارشوسندە رسالۀ نورڭ خدمتندە مشقّت، مجاهدە، كلفت بولوندیغندن، فیضی یە خطابًا بیان ایدیلن بو حقیقت قلمە آلیندی.

اَلْبَاقٖی هُوَ الْبَاقٖی

قرداشڭز سعید النّورسی

قسطمونی لاحقەسی: ١٠٣

لاحقە ٧٤: (بو زماندە خدمت ایمانیەدە بر خالص قرداشمز، بر ولیدن زیادە موقع آلییور)

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

عزیز، صدّیق قرداشلرم،

سزڭ حپس میوەلریڭز، بنم نظرمدە فردوس میوەلری كبی خوشدر، قیمتلیدر. بنم سزلر حقّندە بیوك امیدلریمی و دعوالریمی تصدیق و تحقیق ایتدیگی كبی، تساندڭ قوّتنی پك كوزل كوستردی. او مبارك قلملر برلشدكجە اوچ درت الفڭ برلشمەسی كبی، اوچ یوز درت، یوز قیمتنی بو قدر آغیر تضییقات آلتندە اظهار أیلەدی. و بو مشوّش شرائط ایچندە وحدتڭزی محافظە ایدن حالت روحیە، دونكی پوصلەمدەكی دعوامی اثبات ایدییور.

اوت، (تمثیلدە خطا یوق) بیوك بر ولی، كوچك بر اصحاب قدر (خدمت اسلامیەدە اهل سنّتجە ) موقع آلمدیغی كبی، عینًا اویلە دە: بو زماندە خدمت ایمانیەدە حظّ نفسنی بیراقان و محویّتلە تساند و اتّحادی محافظە ایدن بر خالص قرداشمز، بر ولیدن زیادە موقع آلییور دییە قناعتم كلمش. و سز دائما بو قناعتمی تقویە ایدییورسڭز. جناب حق سزلردن ابدًا راضی اولسون. آمین.

سعید النّورسی

شعاعلر ٢: ٣٨٦

لاحقە ٧٥: (طلبەلر آراسندەكی تساندڭ عوام اهل ایمان ایچون بر نقطۀ استناد اولمسی و ایمانلرینە قوّت ویرمسی)

عزیز، صدّیق قرداشلرم،

سزڭ تساندیڭزە بنم زیادە اهمّیت ویردیگمڭ سببی، یالڭز بزە و رسالۀ نورە منفعتی ایچون دگلدر. بلكە

تحقیقی ایمانڭ دائرەسندە اولمایانلر ایچون.. و نقطۀ استنادە و صارصیلمایان بر جماعتڭ قطعی بولدقلری بر حقیقتە طایانمەیە پك چوق محتاج بولونان عوام اهل ایمان ایچون ضلالت جریانلرینە قارشو ییلماز، ییقیلماز، چكیلمز، بوزولماز، آلدانماز و آلداتماز بر مرجع، بر مرشد، بر حجّت اولمق ایچوندر. سزڭ قوّتلی تساندیڭزی كورن قناعت ایدركە: بر حقیقت وار. هیچ بر شیئە فدا ایدیلمز. اهل ضلالتە باشنی اگمز. مغلوب اولماز دییە قوّۀ معنویەسی و ایمانی قوّت بولور. اهل دنیایە و اهل سفاهتە التحاقدن قورتولور.

سعید النّورسی

شعاعلر ٢: ٣٨٦

لاحقە ٧٦: (حضرت استاد و بر قسم رسالۀ نور طلبەلرینڭ رسالۀ نور خدمتنە حاضرلانمەلرینی، استادڭ حسّ قبل الوقوع ایلە ایضاحی)

عزیز، صدّیق قرداشلرم،

رسالۀ نورڭ ظهوری حسّ قبل الوقوع ایلە كلّی بر صورتدە حسّ ایدیلمەسی كبی، رسالۀ نورڭ خاص طلبەلرینڭ بر قسمنڭ اعترافیلە و بر قسمنڭ طرز حیاتی رسالۀ نور

كبی بر خدمتە نامزدلگنی كوستردیگی جهتلە بو تتمّەیی یازییورم. اوت، حسّ قبل الوقوع هركسدە جزؤی كلّی واردر. حتّی حیواناتدە دخی واردر. حتّی رؤیای صادقەنڭ اهمّیتلی بر قسمی، بو حسّ قبل الوقوعڭ نوعندندر. حتّی بعضیلردە زیادە حسّاسیت جهتیلە كرامت درجەسنە چیقار. بنم اعصابمدەكی حسّاسیتلە یاغموردن

یگرمی درت ساعت اوّلكی رطوبت هوائیە ایلە یاغمورڭ كلمەسنی حسّ ایتمەم، بر جهتدە حسّ قبل الوقوع صاییلابیلیر و بر جهتدە صاییلماز.

بن رسالۀ نورە اهمّیتلی خدمت ایدن قرداشلریمڭ طرز حیاتلرینە دقّت ایتدم، كوردمكە، عین بنم كُذرانِ حیاتم كبی، رسالۀ نور كبی بر نتیجەیە كورە تجهیز ایدیلوب سوق ایدیلمش.

اوت، خسرو، فیضی، حافظ علی، نظیف كبی چوق قرداشلریمزڭ كچن طرز حیاتلری بو خدمت نوریەیە كورە بر وضعیت ویریلدیگنی اونلر حسّ ایتدكلری كبی.. بن دە چوق خاص قرداشلرمدە، حتّی بورادە دە عینًا طرز حیاتم كبی بویلە بر نورانی میوەیی ویرمك ایچون تنظیم ایدیلمش كورویورم. حسّ ایتمەین قسمی، دقّت ایتسەلر حسّ ایدەجكلر. بن كندم، بتون حیاتمڭ خارقە قسمنی، اوّلجە غوث اعظمڭ؈ بر سلسلۀ كرامتی تلقّی ایدییوردم. شیمدی رسالۀ نورڭ بر سلسلۀ اكراماتی اولدیغی تبیّن ایتدی.

[ازجملە] بن حرّیتدن اوّل استانبولە كلیركن، یولدە، بر ایكی مهم علم كلامە عائد كتابلر ألمە كچدی. دقّتلە مطالعە ایتدم. استانبولە كلدكدن صوڭرە،

سببسز اولارق هم علمایی، هم مكتب معلّملرینی مناظرەیە "كیم نە ایسترسە بندن صورسون" دییە اعلان ایتدم. مدار حیرتدركە، مناظرەیە كلنلرڭ بتون صوردقلری سؤآللر، یولدە مطالعە ایتدیگم و حافظەمدە قالدیغی مسئلەلردی. هم فیلسوفلرڭ صوردقلری سؤآللر، حافظەمدە بولونان مسئلەلردی.

شیمدی آڭلاشیلدیكە، او فوق العادە موفّقیت و بنم دە حدّمدن چوق زیادە او خودفروشلق و معناسز اظهار فضیلت ایسە، ایلریدە رسالۀ نورڭ استانبولجە و علماجە مقبولیتنە و اهمّیتنە زمین احضار ایتمك ایمش.

[ایكنجیسی] حتّی بن فقیر و محتاج اولدیغم و زاهد و صوفی و ریاضتجی اولمادیغم و بیوك بر شرف و حیثیت و خانَدانلق حیثیتندن، شان و شرفندن حصّەدار اولمادیغم حالدە -تاریخچۀ حیاتمدە یازیلدیغی كبی- كوچكدنبری خلقلرڭ ماللرینی، هدیەلرینی قبول ایدەمییوردم، احتیاجمی اظهارە تنزّل ایدەمییوردم. بنی بیلنلر كبی بن دە چوق حیرت ایدردم. شیمدی خاصّةً برقاچ سنە ظرفندە آڭلاشیلدیكە، رسالۀ نورڭ دهشتلی بر مجاهدەسندە، طمع و مال یوزندن مغلوب اولمامق و اعتراض كلمەمك ایچون او حالت روحیە بزە احسان ایدیلمشدی. یوقسە دوشمانلرم، او جهتدن بیوك بر ضربە ایندیرەجكدیلر.

هم ازجملە، اسكی سعید سیاستدە چوق ایلری كیتدیگی حالدە، یڭی سعید دە طرفدار بولمق ایچون چوق محتاج اولدیغی زماندە بتون انسانلری مراق ایلە مشغول ایدن بو بش آلتی سنەدەكی بشر طوفانلری، سیاست فیرطینەلری ایچندە

قطعا و اصلا بنی مشغول ایتمدی و مراقلە مغلوب ایتمدی و بش سنە، بیلمەیی مراق ایتمدم. بنی بیلنلر كبی بن دە بو حالە چوق حیرت ایدردم. حتّی كندی كندیمە دیر ایدم: عجبا بنمی دیوانە اولمشمكە، بتون دنیایی كندیلە مشغول ایدن بو حادثاتە باقمییورم، اهمّیت ویرمییورم. یوقسە انسانلرمی دیوانە اولمشلر؟ دییە

حیرت ایچندە ایدم. شیمدی هم معنوی اخطارلە، هم مذكور حسّ قبل الوقوعلر ایلە، هم میداندەكی رسالۀ نورڭ غلبە و سربستیتی ایلە تحقّق ایتدیكە، رسالۀ نوردەكی حقیقت اخلاص، رضای الٰهیدن باشقە هیچ بر شیئە آلت و تابع اولاماز. و قرآندن باشقە هیچ بر نقطۀ استنادی اولمدیغنی اثبات ایتمك ایچون او عجیب حالت روحیە ویریلمش.

خسرو مكتوبندە دیمشكە: "یوزیمزدن چكدیگڭ زحمتلردن حقّڭی حلال ایت." بن دە دیرم: یوز بیڭ دفعە حلال ایدییورم. چونكە او زحمتلر بتون رحمتلر اولدی. نقطەلری سیلیندی. فقط بنم خطالر و قصورلرملە سزڭ چكدیگڭز زحمتلر جهتیلە حقّڭزی سز بڭا حلال ایتملیسڭز. بن اعتراف ایدییورمكە، سزڭ كبی خالص، صافی ذاتلرە تام قرداش اولمغە لایق دگلم. ان شٓاء اللّٰه جناب حق مرحمتیلە سزلرڭ یوزندن بنی دە عفو ایدر

اَلْبَاقٖی هُوَ الْبَاقٖی

قرداشڭز سعید النّورسی

امرطاغ لاحقەسی ١: ٧٨

لاحقە ٧٧: (رسالۀ نورڭ اسكیشهر امتحانندە یالڭز بر بوچوق طلبەسنی غائب ایتمەسی)

عزیز، صدّیق قرداشلرم،

اسكی زماندە بر شیخڭ مریدلری پك چوق اولمەسندن، او مملكتڭ حكومتی سیاستجە تلاش ایتمش. اونڭ جماعتنی طاغیتمق ایستەمش. او ذات، او حكومتە دیمش: بنم یالڭز بر بوچوق مریدم وار. باشقە یوق. ایسترسەڭز تجربە ایدەجگز.

او ذات بر یردە چادیر قوردی. كندی بیڭلر مریدلرینی اورایە طوپلادی. امر ایتدی: بن بر امتحان یاپاجغم. هر كیم بنم مریدم ایسە: و امریمی قبول ایتسە، جنّتە كیدەجك. چادیرڭ یاننە برر برر چاغیردی. چادیرڭ ایچندە كیزلی بر قویون كسدی. كویا، خاص بر مریدینی كسدی، جنّتە كوندردی. او قانی كورن بیڭلر مریدلر، داها هیچ بری شیخی دیڭلەمدیلر. انكارە باشلادیلر. یالڭز بر آدم دیدی: باشم فدا اولسون. یاننە كیتدی. صوڭرە بر قادین داها كیتدی. باشقەلری طاغیلدیلر. او ذات، حكومت آدملرینە دیدی: ایشتە بنم یالڭز بر بوچوق مریدم بولوندیغنی كوردیڭز. جناب حقّە یوز بیڭلر شكر اولسونكە: رسالۀ نور اسكیشهر امتحان و محكمەسندە شاكردلرندن یالڭز بر بوچوق غائب ایتدی. او اسكی شیخڭ عكسنە اولارق، اسپارطە و جوار قهرمانلرینڭ همّتیلە او ضایع اولان بر بوچوق آدم یرینە اون بیڭ علاوە اولدی. ان شٓاء اللّٰه بو امتحاندە دخی هم شرق،

هم غربڭ قهرمانلرینڭ همّتلریلە چوقلری غائب ایدیلمەیەجك. و بر كیدن یرندە، اون كیرەجك.

سعید النّورسی

شعاعلر ٢: ٣٨٧

لاحقە ٧٨: (رسالۀ نور شاكردلری معارضلری حدّت و تهوّرلە و مقابلۀ بالمثل ایلە قارشیلاماملی)

عزیز، صدّیق، مستقیم قرداشلرم،

غایت جدّی بر اخطار ایلە بر حقیقتی بیان ایتمەیە لزوم وار. شویلەكە:

[لَا یَعْلَمُ الْغَیْبَ اِلَّا اللّٰهُ] سرّیلە، اهل ولایت، غیبی اولان شیلری بیلدیریلمزسە بیلمزلر. اڭ بیوك بر ولی دخی، خصمنڭ حقیقی حالنی بیلمدكلری ایچون حقسز اولارق مبارزە ایتمسی، عشرۀ مبشّرەنڭ مابینندەكی محاربە كوسترییور. دیمك ایكی ولی و ایكی اهل حقیقت بربرینی انكار ایتمكلە مقاملرندن سقوط ایتمزلر. مگر بتون بتون ظاهر شریعتە مخالف و خطا بر اجتهاد ایلە حركت ایدیلمش اولا. بو سرّە بناءً [ وَالْكَاظِمٖینَ الْغَیْظَ وَالْعَافٖینَ عَنِ النَّاسِ] دەكی علوّ جنابلق دستورینە اتّباعًا و عوام مؤمنینڭ شیخلرینە قارشو حسن ظنلرینی قیرمامقلە برابر، ایمانلرینی صارصیلمادن محافظە ایتمك و رسالۀ نورڭ اركانلرینڭ حقسز اعتراضلرە قارشو حقلی و فقط ضررلی حدّتلرندن قورتارمق لزومنە بناءً.. و اهل الحادڭ ایكی طائفۀ اهل حقیقتڭ مابینندەكی خصومتدن