[بِاسْمِهٖ سُبْحَانَهُ]

بو سكّۀ غیبیە رسالەلرینی محرم طوتویوردق. یالڭز خاص قرداشلریمە مخصوصدی. بن وفات ایتدكدن صوڭرە نشر ایدیلسین دیمشدم. فقط ضابطە كلدی. عدلیە حسابنە اونلری صاقلادیغمز یردن چیقاردی. ایكی سنە اللرندە قالدی. اوچ محكمە تدقیق ایتدكدن صوڭرە اعادە ایدیلدی. بزە مخالف اولان غایت نامحرملر دخی برابر اوقودیلر. بزە چوق یبانی اولان انسانلر كوردیلر. هم بو ایكی دفعەدر، اسپارطە عدلیەسنڭ النە كچدی. باشقە رسالەلرلە برابر آلمشلردی. هیچ بر اعتراض ایدیلمدن كری ویریلدی.

مادام عمومڭ نظرینە ایستەمدیگمز حالدە كوستریلمش. و مادام رسالۀ نورڭ اهمّیتنی اثبات ایدوب شاكردلرینی شوقە كتیرییور، قوّۀ معنویەلرینی زیادەلشدیرییور.. البتە مدرسة الزّهرا اركانلرینڭ نشرینە قرار ویرمەلرینە بن دە اشتراك ایدرم.

سعید النّورسی

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

[اوّلًا] لیلۀ قدردە قلبە كلن پك اوزون و كنیش بر حقیقتە، پك قیصەجە اشارت ایدەجگز. شویلەكە:

نوع بشرڭ، بو صوڭ حرب عمومیدە اشدّ ظلمی و استبدادی ایلە و مرحمتسز تخریباتی ایلە.. و بر دوشمانڭ یوزندن یوزر معصومی پریشان ایتمەسیلە.. و مغلوبلرڭ دهشتلی مأیوسیتلریلە.. و غالبلرڭ دهشتلی تلاشلریلە.. و حاكمیتلرینی محافظە ایتمكدن و بیوك تخریباتلرینی تعمیر ایدەمەمەلرندن كلن دهشتلی وجدان عذابلریلە.. هم دنیا حیاتنڭ بتون بتون فانی و موقّت اولمسی و مدنیّت فانتازیەلرینڭ آلداتیجی و اویوتوجی اولمسی عمومە كورونمسیلە.. و فطرت بشریەدەكی یوكسك استعداداتڭ و ماهیّت انسانیەنڭ عمومی بر صورتدە دهشتلی یارەلانمەسیلە.. و ابدپرست حسّیات باقیە و فطری عشق انسانینڭ هیجان ایچندە اویانمەسیلە.. و غفلت و ضلالتڭ و اڭ سرت صاغیر اولان طبیعتڭ قرآنڭ الماس قیلیجی آلتندە پارچەلانمسیلە.. و غفلت و ضلالتڭ اڭ بوغوجی و آلداتیجی و اڭ كنیش پردەسی اولان سیاستڭ روی زمیندە پك چركین و پك غدّارانە حقیقی صورتی كورونمسیلە، البتە و البتە هیچ شبهە یوقكە، شمالدە و غربدە و آمریقەدە امارەلری كوروندیگنە بناءً، نوع بشر، معشوق مجازیسی اولان حیات دنیویەیی بویلە چركین و كچیجی

اولدیغنی كورمسیلە، فطرتًا بشرڭ حقیقی سودیگی و آرادیغی حیات باقیەیی بتون قوّتیلە آرایاجقدر.

و البتە و هیچ شبهە یوقكە، بیڭ اوچ یوز آلتمش سنەدە، هر عصردە اوچ یوز اللی میلیون شاكردی بولونان.. و هر حكمنە و دعواسنە میلیونلر اهل حقیقت تصدیق ایلە امضا باصان.. و هر دقیقەدە میلیونلر حافظلرڭ قلبلرندە قدسیت ایلە بولونوب لسانلریلە بشرە درس ویرن.. و هیچ بر كتابدە امثالی بولونمایان بر طرزدە بشر ایچون حیات باقیەیی و سعادت ابدیەیی مژدە ویروب بشرڭ یارەلرینی تداوی ایدن قرآن معجز البیانڭ شدّتلی و قوّتلی و تكرارلی بیڭلر آیاتیلە، بلكە صریحًا و اشارتًا اون بیڭلر دفعە دعوا ایتدیگی و خبر ویردیگی صارصیلماز قطعی دلیللرلە و شبهە كتیرمز حدسز حجّتلرلە حیات باقیەیی قطعیتلە مژدە و سعادت ابدیەیی درس ویرمسی، البتە نوع بشر، بتون بتون عقلنی غائب ایتمزسە، مادّی ویا معنوی بر قیامت باشلرینە قوپمازسە.. ایسوچ، نوروچ، فینلاندیە و اینكیلترەنڭ قرآنڭ قبولنە چالیشان مشهور خطیبلری.. و آمریقەنڭ دین حقّی آرایان اهمّیتلی جمعیتی كبی، روی زمینڭ كنیش قطعەلری و حكومتلری، قرآن معجز البیانی آرایاجقلر. و حقیقتلرینی آڭلادقدن صوڭرە بتون روح و جانلریلە صاریلاجقلر. چونكە بو حقیقت نقطەسندە قطعیًّا قرآنڭ مثلی یوقدر و اولاماز. و هیچ بر شی بو معجزۀ كبرانڭ یرینی طوتاماز.

[ثانیًا] مادام رسالۀ نور، او معجزۀ كبرانڭ ألندە بر الماس قیلیچ حكمندە خدمتنی كورمش و كوسترمش و اڭ معنّد دوشمانلری تسلیمە مجبور ایتمش. هم قلبی، هم روحی، حتّی حسّیاتی تنویر ایدەجك و علاجلرینی ویرەجك بر طرزدە خزینۀ قرآنیەنڭ دلّاللغنی یاپان و اوندن باشقە مأخذ و مرجعی اولمایان بر معجزۀ معنویەسی بولونان رسالۀ نور، او وظیفەیی یاپییور. و علیهندە اولان دهشتلی پروپاغاندەلرە و غایت معنّد زندیقلرە تام غلبە چالمش. و ضلالتڭ اڭ سرت و قوّتلی قلعەسی اولان طبیعتی، طبیعت رسالەسیلە پارچە پارچە ایتمش. و غفلتڭ اڭ قالین و بوغوجی و كنیش دائرۀ آفاقندە و فنّڭ اڭ كنیش پردەلرندە عصای موسی دەكی میوەنڭ آلتنجی مسئلەسی و برنجی، ایكنجی، اوچنجی و سكزنجی حجّتلریلە غایت پارلاق بر طرزدە غفلتی طاغیتوب نور توحیدی كوسترمش.

البتە بزلرە لازم و ملّتە الزمدركە: شیمدی رسمًا اذن ویریلن دین تدریساتی ایچون خصوصی درسخانەلر آچیلمەسنە اذن ویریلمەسنە بناءً،

نور شاكردلری ممكن اولدیغی قدر هر یردە كوچوجك درسخانۀ نوریە آچمەلری لازمدر. كرچە هركس كندی كندینە بر درجە استفادە ایدر، فقط هركس هر بر مسئلەسنی تام آڭلاماز. هم ایمان حقیقتلرینڭ ایضاحی اولدیغی ایچون، هم علم، هم معرفت، هم عبادتدر. [حاشیە] اسكی مدرسەلردە بش اون سنەیە مقابل، ان شٓاء اللّٰه نور مدرسەلری بش اون هفتەدە عین نتیجەیی تأمین ایدەجك. یگرمی سنەدر ایدییور.

هم حكومت و ملّت و وطنە، هم حیات دنیویەسنە و سیاسیەسنە و اخرویەسنە پك چوق فائدەسی بولونان بو قرآن لمعاتلرینە و دلّالی بولونان رسالۀ نورە، دگل ایلیشمك، بلكە تمامیلە ترویج و نشرینە چالیشمەلری الزمدركە، كچن دهشتلی كناهلرە كفّارت و كلەجك مدهش بلالرە و آنارشیستلگە بر سد اولابیلسین.

[ثالثًا] بو رمضان شریفدە، قرآنی ذوق و شوق ایلە اوقومغە بنم چوق احتیاجم واردی. حالبوكە ألملی خستەلغڭ، مادّی و معنوی صیقینتیلرڭ، یورغونلغڭ و مشغلەلرڭ تأثیریلە تلاش ایتدم. بردن خسروڭ شیرین قلمیلە یازدیغی معجزاتلی جزؤلر.. و معجزاتلی و حافظ علی و طاهری یە پك چوق ثواب قزاندیران پارلاق و كرامتلی حزب الاكبر قرآنی یی بربری آرقەسندن اوقومغە باشلادم. اویلە بر ذوق و شوق ویردیكە، بتون او یورغونلقلریمی هیچە ایندیردی. هیچ بر وسوسەیە میدان ویرمەیەرك پك پارلاق بر صورتدە درس قرآنی یی اونلردن دیڭلركن بتون روح و جانملە آرزو ایتدم و قصد ایتدم و عزم ایتدمكە، ممكن اولدیغی درجەدە عین حزب الاكبر قرآنی كبی، معجزاتلی قرآنمزی فوطوغرافلە طبع ایدەلم. ان شٓاء اللّٰه طبع ایدەجگز

اَلْبَاقٖی هُوَ الْبَاقٖی

قرداشڭز سعید النّورسی

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلًا] نورڭ فوق العادە خالص شاكردلری، مشتملاتیلە برابر نشر ایتمك ایستەدكلری سكّۀ غیبیەیی، اولیای مشهورەدن، قرق كوندە بر دفعە اكمك یییوب قرق كون ییمەین عثمان خالدینڭؒ صریح اخباری و اولادلرینە وصیتی ایلە.. و اسپارطەنڭ مشهور اهل قلب عالملرندن طوپال شكرینڭ ظاهرًا خبر ویرمسیلە چوق اهمّیتلی بر حقیقتی قرداشلرم دعوا ایدوب، فقط ایكی التباس ایچندە، بو بیچارە اهمّیتسز قرداشلری سعیدە بیڭ درجە زیادە حصّە ویرمشلر. اون سنەدنبری قناعتلرینی تعدیلە چالیشدیغم حالدە، او بهادر قرداشلرم قناعتلرندە ایلری كیدییورلر. اوت اونلر، اون سكزنجی مكتوبدەكی ایكی اهل قلب چوبانڭ ماجراسی كبی، حق بر حقیقتی كورمشلر، فقط تعبیرە محتاجدر. او حقیقت دە شودر:

امّتڭ بكلەدیگی آخر زماندە كلەجك ذاتڭ اوچ وظیفەسندن اڭ مهمّی و اڭ بیوگی و اڭ قیمتداری اولان ایمان تحقیقی یی نشر ایدوب، اهل ایمانی ضلالتدن قورتارمق جهتیلە یاپیلان بو اڭ اهمّیتلی وظیفەیی، عینًا بتمامها رسالۀ نوردە كورمشلر. امام علیؓ و غوث اعظم؈ و عثمان خالدیؒ كبی ذاتلر، بو نقطە ایچوندركە، او كلەجك ذاتڭ مقامنی رسالۀ نورڭ شخص معنویسندە كشفًا كورمشلر كبی اشارت ایتمشلر. بعضًا دە او شخص معنوی یی بر خادمنە ویرمشلر، او خادمە ملتفتانە باقمشلر. بو حقیقتدن آڭلاشیلییوركە، صوڭرە كلەجك او مبارك ذات، رسالۀ نوری بر پروغرام اولارق نشر و تطبیق ایدەجك.

او ذاتڭ ایكنجی وظیفەسی، شریعتی اجرا و تطبیق ایتمكدر. برنجی وظیفە، مادّی قوّتلە دگل، بلكە قوّتلی اعتقاد و اخلاص و صداقتلە اولدیغی حالدە.. بو ایكنجی وظیفە، غایت بیوك مادّی بر قوّت و حاكمیت لازمدركە، تطبیق ایدیلەبیلسین.

او ذاتڭ اوچنجی وظیفەسی، خلافت اسلامیەیی اتّحاد اسلامە بنا ایدرك، عیسوی روحانیلرلە اتّفاق ایدوب دین اسلامە خدمت ایتمكدر. بو اوچنجی وظیفە، پك بیوك بر سلطنت و قوّتلە و میلیونلر فداكارلرلە تطبیق

ایدیلەبیلیر. برنجی وظیفە، او ایكی وظیفەدن اوچ درت درجە داها قیمتداردر. فقط او ایكنجی و اوچنجی وظیفەلر، پك پارلاق و چوق كنیش بر دائرەدە و شعشعەلی بر طرزدە اولدیغندن عمومڭ و عوامڭ نظرندە داها اهمّیتلی كورونورلر. ایشتە او خاص نورجیلر و بر قسمی اولیا اولان او قرداشلریمزڭ تعبیرە و تأویلە محتاج فكرلرینی اورتەیە آتمق، اهل دنیایی و اهل سیاستی تلاشە ویرر و ویرمش. هجوملرینە وسیلە اولور. چونكە برنجی وظیفەنڭ حقیقتنی و قیمتنی كورەمییورلر. اوتەكی جهتلرە حمل ایدرلر.

قرداشلریمڭ ایكنجی التباسی: فانی و چوروتولەبیلیر بر شخصیتی، بعض جهتلرلە برنجی وظیفەدە پیشدارلق ایدن نور شاكردلرینڭ شخص معنویسنی تمثیل ایدن او عاجز قرداشنە ویرییورلر. حالبوكە بو ایكی التباس دە، رسالۀ نورڭ حقیقی اخلاصنە.. و هیچ بر شیئە، حتّی معنوی و اخروی مقاماتە دخی آلت اولمامسنە بر جهتدە ضرر ویردیگی كبی، اهل سیاستی دە اوهامە دوشوروب رسالۀ نورڭ نشرینە ضرر كلیر. بو زمان، شخص معنوی زمانی اولدیغی ایچون بویلە بیوك و باقی حقیقتلر، فانی و عاجز و سقوط ایدەبیلیر شخصیتلرە بنا ایدیلمز.

[الحاصل] او كلەجك ذاتڭ اسمنی ویرمك، اوچ وظیفەسنی بردن خاطرە كتیرییور، یاڭلیش اولور. هم هیچ بر شیئە آلت اولمایان نوردەكی اخلاص زدەلنیر. عوام مؤمنینڭ نظرندە حقیقتلرڭ قوّتی بر درجە نقصانلاشیر. یقینیّت برهانیّە دخی، قضایای مقبولەدەكی ظنّ غالبە انقلاب ایدر. داها معنّد اهل ضلالتە و متمرّد اهل زندقەیە تام غلبەسی متحیّر اهل ایماندە كورونمەمەیە باشلار. اهل سیاست اوهامە و بر قسم خواجەلر اعتراضە باشلارلر. اونڭ ایچون نورلرە او اسمی ویرمك مناسب كورولمییور. بلكە "مجدّددر، اونڭ پیشداریدر" دینیلەبیلیر.

عموم قرداشلریمزە بیڭلر سلام.

اَلْبَاقٖی هُوَ الْبَاقٖی

قرداشڭز

سعید النّورسی

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق، صارصیلماز، ثباتكار، فداكار، وفادار قرداشلرم،

بیلیرسڭزكە، آنقرە اهل وقوفی، رسالۀ نورە عائد كرامتلری و اشارات غیبیەلری انكار ایدەمەمشلر. یالڭز، یاڭلیش اولارق او كرامتلردە حصّەدار اولدیغمی ظن ایدوب اعتراض ایتمشلر. و "بویلە شیلر كتابدە یازیلماملی ایدی. كرامت اظهار ایدیلمز." دیمشلر. بونلرڭ بو خفیف تنقیدلرینە مقابل مدافعاتمدە اونلرە جوابًا دیمشدمكە، او كرامتلر بڭا عائد دگلدر. و او كرامتلرە صاحب اولمق بنم حدّم دگلدر. بلكە قرآنڭ معجزۀ معنویەسنڭ ترشّحاتی و لمعەلریدركە، حقیقی بر تفسیری اولان رسالۀ نوردە كرامتلر شكلنی آلمشدر. او كرامتلر [رسالۀ نور شاكردلرینڭ قوّۀ معنویەلرینی تقویە ایتمك ایچون] اكرامات الٰهیە نوعندندر. اكرام ایسە، اظهاری بر شكردر، جائزدر، هم مقبولدر.

شیمدی اهمّیتلی بر سببە بناءً جوابی بر پارچە ایضاح ایدەجگم. و نە ایچون اظهار ایدییورم و نە ایچون بو نقطەدە بو قدر تحشیدات یاپییورم و نە ایچون بو برقاچ آیدر بو موضوعدە چوق ایلری كیدییورم و نە ایچون اكثر مكتوبلر او كرامتە باقییور؟ دییە سؤٓال ایدیلدی.

[الجواب] رسالۀ نورڭ خدمت ایمانیەسندە، بو زماندە بیڭلر تخریباتجیلرە مقابل، یوز بیڭلر تعمیراتجی لازم كلیركن.. هم بنملە برابر لا اقل یوزر كاتب و یاردیمجی بولونمەیە احتیاج واركن دگل چكینمك و تماس ایتمەمك، بلكە ملّتڭ و اهل ادارەنڭ تقدیر ایلە و تشویق ایلە یاردیم ایتمەلری و تماس ایتمەلری ضروری ایكن و او خدمت ایمانیە حیات باقیەیە باقدیغی ایچون، حیات فانیەنڭ مشغلەلرینە و فائدەلرینە ترجیح ایتمك اهل ایمانە واجب ایكن كندیمی مثال اولارق دیرمكە، بنی هر شیدن و تماسدن و یاردیمجیلردن منع ایتمك ایلە برابر، علیهمزدە اولانلر بتون قوّتلریلە آرقداشلریمڭ قوّۀ معنویەلرینی قیرمق و بندن و رسالۀ نوردن صوغوتمق.. و بنم كبی اختیار، خستە، ضعیف، غریب، كیمسەسز بیچارەیە، بیڭلر آدمڭ كورەجگی وظیفەیی باشنە یوكلەمك.. و تجرید و تضییقلردە مادّی بر خستەلق نوعندن انسانلرلە تماسدن و اختلاطدن چكیلمەیە مجبور اولمقلغم..

هم او درجە تأثیرلی بر طرزدە خلقلری ئوركوتدیرمك ایلە

قوّۀ معنویەیی قیرمق جهتلرندن و سببلرندن، اختیارم خارجندە بتون او مانعلرە قارشو رسالۀ نور شاكردلرینڭ قوّۀ معنویەلرینڭ تقویەسنە مدار اكرامات الٰهیەیی بیان ایدرك رسالۀ نور اطرافندە تحشیدات یاپدیرمق.. و رسالۀ نور كندی كندینە، تك باشیلە باشقەلرینە محتاج اولمایارق بر اوردو قدر قوّتلی اولدیغنی كوسترمك حكمتیلە بو چشید شیلر بڭا یازدیریلمشدر. یوقسە حاشا، كندیمزی صاتمق و بگندیرمك و تمدّح ایتمك و خودفروشلق ایتمك، رسالۀ نورڭ اهمّیتلی بر اساسی اولان اخلاص سرّینی بوزمقدر. ان شٓاء اللّٰه رسالۀ نور كندی كندینە هم كندینی مدافعە ایتدیگی، هم قیمتنی تام كوستردیگی كبی، بزی دە معنًا مدافعە ایدوب قصورلریمزی عفو ایتدیرمەیە وسیلە اولاجقدر.

عموم قرداشلریمە و همشیرەلریمە، خاصّةً دعالری مقبول مبارك معصوملر طائفەسنە و محترم اختیارلر جماعتندن هر بررلرینە بیڭلر سلام و دعا ایدرك رمضان شریفلرینی تبریك ایدرز. دعالرینی رجا ایدرز.

اَلْبَاقٖی هُوَ الْبَاقٖی

خستە قرداشڭز

سعید النّورسی

[بِاسْمِهٖ سُبْحَانَهُ]

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

[اكرامی اظهار مكتوبنڭ تتمّەسی ]

[رسالۀ نورڭ مقبولیتنە امضا باصان و غیبی اشارتلر ایلە اوندن خبر ویرن سكز پارچەدن برنجی پارچەدر.]

عین مسئلەیە دائر بو برنجی رسالەدە یگرمی طوقوز اشارت وار. سائر پارچەلرلە برابر بیڭە یاقین اشارتلر، رمزلر، ایمالر، امارەلر عین مسئلەیە، عین دعوایە اتّفاقلە باقمەلری صراحت درجەسندەدر. وحدت مسئلە جهتیلە، او امارەلر بربرینە قوّت ویرر، تأیید ایدر. او سكزدن اوچ دانەسی امام علینڭدرؓ. امام علیؓ بو اوچ كرامت غیبیەسیلە رسالۀ نوردن خبر ویرمش.

بو سكز پارچەیی آنقرە اهل وقوفی تدقیق ایتمش، اعتراض ایتمەمشلر. بو كرامتلر یازیلماملی ایدی، كرامت صاحبی كرامتنی یازاماز. دیمشلر.

بن دە اونلرە جواب ویردمكە، "بو كرامتلر بنم دگل، رسالۀ نورڭ كرامتیدر. رسالۀ نور ایسە قرآنڭ مالیدر و تفسیریدر." دیدم. اونلر دە صوصدیلر. دیمك قبول ایتدیلر. كرچە بو چشید اكراملر یازیلماسە ایدی، داها مناسب

اولوردی. فقط بو قدر حدسز معارضلر و چوق قوّتلی و كثرتلی دوشمانلر قارشوسندە آز و ضعیف اولان بزلرە، قوّۀ معنویە و غیبی امداد و تشجیع و ثبات و متانت ویرمك ایچون مجبوریت قطعیە اولدی، بن دە یازدم.

بنم بنلگمە بر خودفروشلق ویروب سقوطمە سبب اولسە دە، اهمّیتی یوق. بو خدمتە یعنی اهل ایمانی ضلالت مطلقەدن قورتارمغە لزوم اولسە، دنیوی حیاتم كبی اخروی حیاتمی دە فدا ایتمەیی بر سعادت بیلیرم. بیڭلر دوستلریمڭ و قرداشلریمڭ جنّتە كیرمەلری ایچون، جهنّمی قبول ایدرم.

سعید النّورسی

[اشارات قرآنیە و اوچ كرامت علویە و كرامت غوثیە حقّندە بر تنبیه و بر اخطار]

[برنجی نقطە] بو غایت محرم رسالەلردن بریسی، هر ناصلسە معنّد بر نامحرمڭ النە كچمش، غایت سطحی و عناد نظری ایلە باقمش. و بر ایكی یرینە حقسز بر اعتراض ایدوب، اهمّیتلی بر حادثەیە سببیت ویردیگندن، بو مجموعە رسالۀ نورڭ خاص طلبەلرینە، بلكە اخصّ الخواصّە مخصوص اولدیغی حالدە و بنم وفاتمدن صوڭرە انتشارینە مساعدە ایدیلمەسیلە برابر، شیمدی مذكور حادثەنڭ سببیلە هركسە دگل، بلكە اهل انصافە و رسالۀ نورلە علاقەدار و طلبەلرندن بولونانلرە (خاصلردن برقاچ شاكردڭ تنسیبیلە) كوستریلەبیلیر فكریلە یازدق. شیمدی ایسە، ایكی سنە ایكی محكمە تدقیقدن صوڭرە بزە اعادە ایتدیلر. بز دە نشرینە مجبور اولدق.

[ایكنجی نقطە] بو مجموعە باشدن آشاغی یە قدر بر تك نتیجەیە باقییور. بیڭە یاقین امارەلرلە، رسالۀ نورڭ مقبولیتنە غیبی بر امضا باصیلدیغنی اثبات ایدییور. بویلە بر تك دعوایە بو درجە كثرتلی و آیری آیری جهتلردە بیڭلر امارەلر و ایمالر اونی كوسترمسی، علم الیقین دگل، بلكە عین الیقین، بلكە حقّ الیقین درجەسندە او دعوایی اثبات ایدر.

[اوچنجی نقطە] بو مجموعەیی مطالعە ایدن ذاتلرڭ اینجەدن اینجەیە تدقیق ایتمەلرینە، خصوصًا جفری حساباتنە مشغول اولمەلرینە لزوم یوقدر. بر قسمی آڭلاشیلماسە دە، ضرری یوق. هم عمومنی آڭلامق دە لازم دگل. هم كرامت غوثیەنڭ آخرندەكی شاملی حافظ توفیقڭ فقرەسندن باشلایوب آخرە قدر مطالعەدن صوڭرە و باشدەكی مقدّمەیی دە اوقودقدن صوڭرە، ایستەدیگی پارچەیی اوقوسون.

سعید النّورسی

رسالۀ نورڭ تسوید و تبییضندە چوق خدمتی سبقت ایدن شاملی حافظ توفیقڭ رسالۀ نورڭ حقّانیتنە دائر استخراجی بر فقرەسیدر.

[مقدِّمە]

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

معلوم اولسونكە، زُبْدَةُ الرَّسَائِلْ عُمْدَةُ الْوَسَائِلْ نامندە قُطْبُ الْعَارِفٖینْ ضِیَاءُ الدّٖینْ مَوْلَانَا شَیْخْ خَالِدْ قُدِّسَ سِرُّهُ نڭ مكتوبات و رسائل شریفەلرندن مقتبس نصایح قدسیەنڭ ترجمەسنە دائر بر رسالەیی، اون اوچ سنە مقدّم، بروسەدە خواجە حسن افندیدن آلمشدم. ناصلسە مطالعەسنە موفّق اولامامشدم. تا بوكونلردە كتابلریمڭ ایچریسندە بر شی آراركن ألمە كچدی. دیدم: بو حضرت مولانا خالد، استادیمڭ همشهریسیدر. هم امام ربّانیدنؓ صوڭرە طریق نقشینڭ اڭ مهم قهرمانیدر، هم طریق خالدیۀ نقشیەنڭ پیریدر. رسالەیی مطالعە ایدركن حضرت مولانانڭ ترجمۀ حالندن شو فقرەیی كوردم:

اصحاب كُتُبُ سِتَّەدن اِمَامِ حَاكِمْ مُسْتَدْرَكِنْدە و اَبُو دَاوُدْ كِتَابِ سُنَنْدە بَیْهَقٖی شُعَبِ اٖیمَانْدە تخریج بویوردقلری: [اِنَّ اللّٰهَ یَبْعَثُ لِهٰذِهِ الْاُمَّةِ عَلٰی رَأْسِ كُلِّ مِائَةِ سَنَةٍ مَنْ یُجَدِّدُ لَهَا دٖینَهَا] یعنی هر یوز سنەدە جناب حق بر مجدّد دین كوندرییور. حدیث شریفنە مظهر و ماصدق و مظهر تام اولان مولانا الشَّهٖیرْ قُطْبُ الْعَارِفٖینْ غَوْثُ الْوَاصِلٖینْ وَارِثِ مُحَمَّدٖی كَامِلُ الطَّرٖیقَةِ الْعَلِیّةِ وَالْمُجَدِّدِیَّةِ خَالِدِ ذُو الْجَنَاحَیْنَ قُدِّسَ سِرُّهُ الٓخرە..

صوڭرە تاریخچۀ حیاتندە كوردمكە، تولّدی بیڭ یوز طقسان اوچ تاریخندەدر. صوڭرە كوردمكە، بیڭ ایكی یوز یگرمی درت تاریخندە سلطنت هندڭ پای تختی اولان جهان آبادە داخل اولمش، طریق نقشی سلسلەسنە كیروب مجدّدیتە باشلامش. صوڭرە بیڭ ایكی یوز اوتوز سكزدە اهل سیاستڭ نظر دقّتنی جلب ایدوب وطننی ترك ایدرك دیار شامە هجرتلە كیتمشدر. هم ایچندە كوردمكە، حضرت مولانانڭ نسلی حضرت عُثْمَانِ ابْنِ عَفَّانْ رضی اللّٰە عنهە منسوبدر. صوڭرە كوردمكە، ترجمۀ حالندە استعداد فطری و قابلیت خارقە ایلە، سنّی یگرمی یە بالغ اولمادن اوّل اعلم علمای عصر و علّامۀ وقت اولمش، سلیمانیە قصبەسندە تدریس علوم ایلە اشتغال ایتمشدر.

صوڭرە استادیمڭ تاریخچۀ حیاتنی دوشوندم. باقدم (درت مهم نقطەدە) توافق ایدییورلر.

[برنجیسی] حضرت مولانا بیڭ یوز طقسان اوچدە دنیایە كلمش.. استادم ایسە عربی بیڭ ایكی یوز طقسان اوچدە تام مولانا خالدڭ یوز سنەسی ختام بولدقدن صوڭرە دنیایە كلمش.

[ایكنجیسی] حضرت مولانانڭ تجدید دین مجاهدەسنە باشلانغیجی و مقدّمەسی اولان هندستانڭ پای تختنە بیڭ ایكی یوز یگرمی درتدە كیرمش. استادم ایسە، عینًا یوز سنە صوڭرە، بیڭ اوچ یوز یگرمی درتدە عثمانلی سلطنتنڭ پای تختنە كیرمش، مجاهدۀ معنویەسنە حاضرلانمش.

[اوچنجیسی] اهل سیاست، حضرت مولانانڭ فوق العادە شهرتندن توهّم ایدرك، حضرت مولانانڭ دیار شامە نقل ایتمەسی، بیڭ ایكی یوز اوتوز سكزدە واقع اولمشدر. استادم ایسە، عینًا یوز سنە صوڭرە، بیڭ اوچ یوز اوتوز سكزدە آنقرەیە كیتمش. اونلرلە اویوشامایوب اونلری ردّ ایتمش. كوسەرك تكرار وانە كیتمش. واندە بر طاغدە انزوا ایدركن بیڭ اوچ یوز اوتوز سكز سنەسنی متعاقب، شیخ سعید حادثەسنڭ وقوعی مناسبتیلە اهل سیاستڭ وهمنە طوقونمش، اوندن قورقارق بوردور، اسپارطە، قسطمونی، آفیون ولایتلرندە طقوز سنە، شیمدی یگرمی سنەدر اقامت ایتدیریلمش.

[دردنجیسی] حضرت مولانا، یاشی یگرمی یە بالغ اولمادن اوّل علّامۀ زمان حكمندە فحول علمانڭ اوستندە كورونمش، درس اوقوتمش. استادم ایسە، تاریخچۀ حیاتنی كورنلرە و بیلنلرە معلومدركە، اون درت یاشندە اجازت آلمش، اَعْلَمِ عُلَمَایِ زمانە قارشو معارضەیە كیریشمش، اون درت یاشندە ایكن، اجازت آلمەیە یاقین طلبەلری تدریس ایتمشدر.

هم حضرت مولانا نسلاً حضرت عثماندنؓ اولدیغی و سنّت سنیّەیە بتون قوّتیلە چالیشدیغی كبی.. استادم قرآن حكیمە خدمت نقطەسندە مشربًا حضرت عثمان ذِی النُّورَیْنڭ آرقەسندن كیدوب، حضرت مولانا كبی، رسالۀ نور اجزالریلە بتون قوّتیلە سنّت سنیّەنڭ احیاسنە چالیشدی.

ایشتە بو درت نقطەدەكی توافقات، تام یوز سنە فاصلە ایلە رسالۀ نورڭ تقویۀ دین خصوصندەكی تأثیراتی، حضرت مولانانڭ طریق نقشی واسطەسیلە خدمتی كبی عظیم كورونویور. [حاشیە]

استادم كندینە عائد مدح و ثنایی قبول ایتمز. فقط رسالۀ نور قرآنە عائد اولوب، مدح و ثنا قرآنڭ اسرارینە عائددر.

یالڭز استادم ایلە حضرت مولانانڭ (برقاچ فرقی) وار.

[برنجیسی] حضرت مولانا ذُو الْجَنَاحَیْنْدر. یعنی هم قادری، هم نقشی طریقت صاحبیدر. فقط نقشی طریقتی اوندە داها غالبدر. استادمدە بالعكس قادری مشربی و شاذلی مسلگی داها زیادە حكم ایدییور.

بن استادمدن ایشیتدمكە، حضرت مولانا؈ هندستاندن طریق نقشی یی كتیردیگی وقت، بغداد دائرەسی شاە كیلانینڭ بعد الممات، حیاتدە اولدیغی كبی تصرّفندە ایدی. حضرت مولانا معنًا بو تصرّفی جای قبول كورەمدی. شاە نقشبند ایلە امام ربّانینڭ روحانیتلری بغدادە كلوب شاە كیلانینڭ زیارتنە كیدەرك رجا ایتمشلركە، مولانا خالد سنڭ اولادڭدر، قبول ایت. شاە كیلانی اونلرڭ التماسنی قبول ایدرك مولانا خالدی قبول ایتمش. اوندن صوڭرە مولانا خالد بردن پارلامش. بو واقعە، اهل كشفجە واقع و مشهود اولمشدر. بو حادثۀ روحانیەیی او زمان اهل ولایتڭ بر قسمی مشاهدە ایتمش، بعضیلری دە رؤیا ایلە كورمشلر. استادیمڭ سوزی بورادە تمام اولدی.

[ایكنجی فرق] استادم كندی شخصیّتنی مرجعلكدن عزل ایتمشدر. یالڭز رسالۀ نوری مرجع كوسترییور. حضرت مولانانڭ شخصیتی ایسە، قطب الارشاد و مرجع الخاص والعوام اولمشدر.

[اوچنجی فرق] حضرت مولانا ذُو الْاَجْنِحَەدر. فقط زمانڭ مقتضاسیلە سنّت سنیّەیە چوق قوّت ویرمكلە برابر، علم طریقتی اساس طوتمق جهتیلە طریقتی داها زیادە طوتمش. او نقطەدە صرف همّت ایتمش. استادم ایسە، شو دهشتلی زمانڭ مقتضاسیلە علم حقیقتی و حقائق ایمانیە جهتنی التزام ایدرك، طریقتە اوچنجی درجەدە باقمشلردر.

[الحاصل] باشدەكی حدیث شریفڭ، "هر یوز سنە باشندە دینی تجدید ایدەجك بر مجدّد كوندرییور" وعد الٰهیسنە بناءً، حضرت مولانا خالد اكثر اهل حقیقتجە بیڭ ایكی یوز سنەسنڭ، یعنی اون ایكنجی عصرڭ مجدّدیدر. مادام تام یوز سنە صوڭرە، عینًا درت جهتدە توافق ایدرك رسالۀ نور اجزالری عین وظیفەیی كورمشدر. قناعت ویرركە، نصّ حدیثلە، رسالۀ نور تجدید دین خصوصندە بر مجدّد حكمندەدر.

بنم استادم دائما دییوركە، بن بر نفرم، فقط مشیر خدمتنی كورویورم. یعنی قیمت بندە دگلدر. قرآن حكیمڭ فیضندن ترشّح ایدن رسالۀ نور اجزالری بر مشیریت معنویە خدمتنی كورویورلر.

استادیمی قیزدیرمامق ایچون شخصنی ثنا ایتمەیورم.

شاملی حافظ توفیق

رأفت بگ، خسرو و رشدی كبی رسالۀ نور شاكردلرینڭ رسالۀ نورڭ بركتنە اشارت ایدن بولدقلری بر توافق لطیفدر. و رسالۀ نورڭ اسپارطەیە نە درجە رحمت اولدیغنە دلالت ایدن بر توافق عجیبدر.

رسالۀ نورڭ مظهر اولدیغی عنایاتڭ كلّیتندن مهم بر فردی دە شودر: اسپارطە ولایتی سكز سنەدنبری رسالۀ نورڭ مؤلّفنی سینەسندە صاقلامشدی. و بارلە كبی شیرین بر ناحیەسندە جناب حقّڭ لطف و كرمیلە محافظە ایتمشدی. بو مدّت ظرفندە یاواش یاواش انتشار ایدن رسالۀ نوردن اسپارطەدە بیڭلر آدم ایمانلرینی تقویە ایتدیلر. بالخاصّە كنچلر پك چوق استفادە و استفاضە ایتدیلر.

وقتاكە، استادیمزڭ بارلە كبی لطیف و شیرین بر محلدەكی صیقینتیلی و پك آجیقلی و اڭ قاتی قلبلری آغلاتان اشكنجەلی اسارتی بیتدی. رسالۀ نورڭ مؤلّفی اولان استادیمزڭ نظری جناب حقّڭ عنایتیلە اسپارطەیە متوجّه اولدی. اوهامە دوشن بعض ظالم اهل دنیانڭ تشبّثكارانە حركات ظاهریەسی بر سبب عادی اولدی.. استادیمز اسپارطەیە كتیریلدی.

فقط استادیمز تشریف ایتدیگی زمان یاز موسمنڭ اڭ حرارتلی زمانی ایدی. یاغمورلر كسیلمش، اسپارطەیی اسقا ایدن صولر آزالمش، بر قسم مهمّنڭ منبعی كسیلمشدی. آغاچلر صارارمغە، اوتلر قورومغە، چیچكلر بوروشمغە باشلامشدی.

رسالۀ نورڭ اڭ زیادە انتشار ایتدیگی محل اسپارطە ولایتی اولدیغی ایچون، رسالۀ نور حقّندەكی عنایات ربّانیەیی پك یاقیندن تماشا ایدن رسالۀ نورڭ شاكردلری اولان بزلر، بر وقعەیە داها شاهد اولدق.

بو حادثە ایسە، استادیمزڭ اسپارطەیە تشریفنی متعاقب، بر عصر ایچندە بر ویا ایكی دفعە وقوعە كلن بو یاز موسمندەكی یاغمورڭ كثرتلە یاغمەسی اولمشدر. پك خارقە بر صورتدە یاغان بو یاغمور، اسپارطەنڭ هر طرفنی تمامًا اسقا ایتمش، نباتاتە یڭیدن حیات بخش ایدیلمش.. باغلر باغچەلر كوزللشمش، اكثریسی همن همن زراعتلە اشتغال ایدن خلقڭ یوزلری رسالۀ نورڭ نائل اولدیغی عنایتدن و بركتندن اولان بو یاغموردن استفادە ایدرك كولمش، روحلری انبساط ایتمشدی. جناب حق كمال رحمتیلە، بو یاز موسمنڭ بو شدّتلی و حرارتلی وضعیتنی، بهارڭ اڭ لطافتلی، اڭ شیرین و اڭ خوش وضعیتنە تبدیل ایتدی. كویا رسالۀ نور، یوز اون طقوز پارچەسیلە مؤلّفی اولان استادیمزە بر طرفدن خوش آمدی ایتمك و محزون اولان قلبنە تسلّی ویرمك و غَمْنَاكْ روحنی تطییب ایتمك.. دیگر طرفدن دە سكز سنەدنبری یاشادیغی بارلەیی اونوتدیرمق و او محتشم چینار آغاجنی و دوستلرینی و علاقەدار اولدیغی شیلردن كلن فراق حزننی خاطرلاتمامق ایچون، جناب حقدن یوز اون طقوز رسالەنڭ اللریلە یوز اون طقوز بیڭ

كلمەلری دیلیلە دعا ایتدی و یاغمور ایستەدی. جناب حق اویلە بركتلی بر یاغمور احسان ایتدیكە، بر مثلی طقسان اوچ تاریخندە یاغدیغنی اختیارلریمزدن ایشیتییورز. بو تاریخ ایسە، استادیمزڭ تاریخ ولادتنە تصادف ایتمكلە برابر، بو عمومی حادثۀ رحمت اولان كثرتلی یاغمورڭ خصوصی بر شكلدە رسالۀ نورە باقدیغنە بر دلیلی شودر:

رسالۀ نورڭ نشرینە واسطە اولان استادیمز كلدیگی كون، اسپارطەیی غایت صیجاق و یاغمورسزلقدن توز طوپراق ایچندە كورمش، "بارلە كبی بر یایلادن كلوب بویلە بر یردە طایانامایاجغم" دییە تلاش ایدییوردی. اوچنجی و دردنجی كونی باغچەلری قسمًا كزدیگی وقت، سبزەلرڭ، اوت و چیچكلرڭ صوسزلقدن بوروشمش اولدقلرینی كوردی. غایت متأثّر اولدی. جناب حقدن یاغمور طلب ایدییوردی. آرقداشمز بكر بگدن دگرمنلری چویرن صویی كوسترەرك "اسپارطەنڭ صویی بو قدرمیدر؟" دییە صوردی. بكر بگ دە: "كُولْجُك صویی كسیلمش، كلمییور. اسپارطەنڭ درتدە برینی صولایان بو صودن باشقە یوقدر." دییە جواب ویردی.

استادیمزڭ اسپارطەدە چوق طلبەلری بولوندیغندن، روحًا یاغمورڭ كلمەسنی ایستەیوردی. عین كوندە اویلە بر یاغمور كلدیكە، اللی سنەدنبری اسپارطە بویلە بر حادثەیی كورمەمش. او یاغمور یوزدە طقسان طقوز منفعت ویرمشدر.

بوندن آڭلاشیلییوركە، او توافق تصادفی دگل.. بو رحمت، اسپارطەیە رحمت اولان رسالۀ نورە باقییور. للّٰە الحمد، بو كرم الٰهی نتیجەسی اولارق استادیمز: "بڭا بارلەیی اونوتدیردی. اونوتامایاجغم بر شی وارسە، او دە هر یردە اولدیغی كبی، بارلەدە بولونان جدّی دوست و طلبەلرمدر." دییور.

مصطفی لطفی رشدی خسرو بكر بگ رأفت

رسالۀ نورڭ بركتنە عائد یاغمور حادثەسنی تأیید ایدن مهاجر حافظ احمد، سلیمان، مصطفی چاووش، بكر بگ و شمعینڭ بر فقرەسیدر

اسپارطەدەكی قرداشلرینڭ فقرەسندەكی دعوایی اثبات ایدن قوّتلی ایكی دلیلی كوسترییور.

رأفت بگ و خسرو كبی قرداشلریمزڭ یازدقلری خارقە بر صورتدە یاغان یاغمورڭ رسالۀ نورڭ بركتنە خصوصی باقدیغنە قناعتمز كلییور. چونكە یاغمور حادثەسنڭ، خصوصی بر شكلدە خدمت قرآنە و رسالۀ نورە ایكی صورتلە باقدیغنی

كوزیمزلە كوردك.

[برنجی صورت] رسالۀ نورڭ واسطۀ نشری اولان استادیمزڭ جامعی سد ایدیلدی. رسالۀ نوری یازاجق خارجدەكی طلبەلرینڭ یاننە كلمەلری منع ایدیلدی. او صیرەدە قوراقلق باشلادی. یاغمورە احتیاج شدید اولدی. صوڭرە یاغمور باشلادی، هر طرفدە یاغدی. یالڭز قرەجە احمد سلطاندن اعتبارًا، بر دائرە ایچندە قالان بارلە منطقەسنە یاغمور كلمدی. استادیمز بوندن پك متأثّر اولارق دعا ایدییوردی. صوڭرە دیدیكە: "قرآنڭ خدمتنە سد چكیلدی. بو كویدەكی مسجدیمز قاپاندی. بوندە بر اثر عتاب واركە یاغمور كلمییور. اویلە ایسە، مادام قرآنڭ عتابی وار، یٰسٓ سورەسنی شفاعتجی یاپوب قرآنڭ فیضنی و بركتنی ایستەیەجگز."

استادیمز، مهاجر حافظ احمد افندی یە دیدیكە: "سن قرق بر یٰسٓ شریف اوقو." مهاجر حافظ احمد افندی بر قامیشە اوقودی. او قامیشی صویە قویدیلر. داها یاغمور علامتی كورونمزكن، ایكیندی نمازی وقتندە استادیمز دائما اعتماد ایتدیگی بر خاطرەسنە بناءً مهاجر حافظ احمد افندی یە سویلەدیكە: "یٰسٓ لر طلسمی آچدی. یاغمور كلەجك."

عین كیجەدە اوّلجە یاغمدیغی بارلە دائرەسی ایچنە اویلە یاغدیكە، استادیمزڭ اوطەسنڭ آلتندەكی چوبان احمدڭ باغچەسنڭ دیواری یاغموردن ییقیلدی. حالبوكە قرەجە احمد سلطانڭ آرقەسندە و دڭز كنارندە بالیق آولامقلە مشغول اولان شمعی ایلە آرقداشلری بر طاملە یاغمور كورمدیلر.

ایشتە بو حادثە قطعیًّا دلالت ایدییوركە، او یاغمور خدمت قرآن ایلە مناسبتداردر. او رحمت عامّە ایچندە بر خصوصیتی وار. سورۀ یٰسٓ آناختار و شفاعتجی اولدی و یاغمور دە كافی مقداردە یاغدی.

[ایكنجی صورت] قوراقلق زمانندە، یگرمی اوتوز كون ایچندە یاغمور بارلەیە یاغمامش ایكن، یوقوش باشی چشمەسی یاپیلدیغی بر زماندە، منبعنە یاقین استادیمز، بن یعنی سلیمان و بن یعنی مصطفی چاووش و احمد چاووش و عَبَّاسْ، محمد، فلان فلان برابر جماعتلە نماز قیلدق. تسبیحاتدن صوڭرە دعا ایچون ألمزی قالدیردق. استادیمز یاغمور دعاسی ایتدی. قرآنی شفاعتجی یاپدی. بردن او كونش آلتندە، هر بریمزڭ اللرینە یدی سكز طاملە یاغمور دوشدی. ألمزی ایندیردك، یاغمور كسیلدی. جملەمز بو حالە حیرت ایتدك. او وقتە قدر یگرمی اوتوز كوندر یاغمور كلمەمشدی. یالڭز او یاغمور دعاسی آنندە دعا ایدن هر الە یدی سكز طاملە دوشمەسی كوسترییوركە، بوندە بر سرّ وار. استادیمز دیدیكە: "بو بر اشارت الٰهیەدر. جناب حق معنًا دییوركە، بن دعایی قبول ایدییورم، فقط شیمدی یاغمور ویرمییورم" دیمك صوڭرە سورۀ یٰسٓ شفاعت ایدەجك. و نیتەكیم دە اویلە اولمشدر.