[اون سكزنجی لمعە]

[برنجی كرامت علویە ]

[جای دقّت ] شو عجیب لمعەنڭ اهمّیتی اوچ نقطەدن كلییور:

[برنجیسی و اڭ مهمّی] كیزلی قالمش، غیبی مهم بر معجزۀ احمدیّەییؐ (جَوَامِعُ الْكَلِمْ [حاشیە] نوعندن، ایكی جملەدن عبارت بر حدیث شریف )، ایكی صحیفە قدر حقائق تاریخیەیی و ایكی دولت عظیمۀ اسلامیّەنڭ خاتمەلرینی افادە ایدییور.

[ایكنجیسی] كرامات اولیا حق اولدیغنە قطعی بر برهان كوسترن حضرت علی رضی اللّٰە عنهڭ، لاتین حروفنڭ قبولنی تام تاریخیلە و طرز تطبیقنی ایكی كلمە ایلە كوسترمسیدر.

[اوچنجیسی] رسالۀ نور شاكردلرینە و ناشرلرینە قارشو حضرت علی رضی اللّٰە عنهڭ ارشادكارانە و توجّهكارانە باقمەسی و اشارت ایتمەسیدر.

بِسْمِ اللّٰهِ الرَّحْمٰنِ الرَّحٖیمِ

حضرت غوث اعظم شیخ كیلانینڭ؈ صراحت درجەسندەكی كرامت غیبیّەسنی تأیید و تقویە ایدن، حضرت اَسَدُ اللّٰهِ الْغَالِبْ عَلِی ابْنِ اَبیٖ طَالِبْ رضی اللّٰه عنه و كَرَّمَ اللّٰه وَجْهَهُ، قصیدۀ اَرْجُوزَۀ مشهورەسندە عینًا اخبارات غوثیّەیی تصدیق ایدوب اشارت ایدییور.

مجموعة الاحزابڭ ٥٨٢ صحیفەسندن ٥٩٧ نجی صحیفەسنە قدر، او ارجوزەدر. او ارجوزەنڭ موضوعی و ایچندەكی مقصد اصلی، اسم اعظمی تضمّن ایدن آلتی اسمڭ اهمّیتنی بیان ایتمك، هم او مناسبتلە استقبالدەكی بر قسم امور غیبیەیە و تأسیس اسلامیّتدەكی بر قسم مجاهداتنە اشارت ایتمكدر.

اوت، حضرت امام علی رضی اللّٰه عنه استادی اولان حبیب اللّٰه علیە الصّلاة والسّلامدن آلدیغی درسڭ بر قسمنی اشاری بر صورتدە ذكر ایدییور. فتح خیبردەكی هم معجزۀ نبویّە، هم كرامت علویە اولان خارقە واقعەیی بحث ایتدیگی كبی.. تأسیس اسلامیّتە تماس ایدن مهم نقطەلری دە بحث ایدییور. صوڭرە استقبالە باقییور. پیغمبر ذیشان علیە الصّلاة والسّلامدن

آلدیغی درسلە بر قسم اعرابڭ كندیسنە قارشو عصیانلرندن حدّت ایدرك دیمش:

(فٖی عِلْمٍ تِسْعٖینَ حِسَابِ الْفَارِسٖی *مِنْ بَعْدِ قَرْنٍ تَاسِعِ الْمَعَاصٖی *سَتَظْهَرُ الْفُرْسُ عَلَی الْاَعْرَابِ *تَقْتُلُهُمْ كَقَتْلَةِ الدَّوَٓابِّ *تَكُونُ مَبْدَأُ فِتَنِ عَوَابِسِ *مُظْلِمَةً كَظُلْمَةِ الْخَنَادٖیسِ *) یعنی، طقوز قرن صوڭرە (فُرْسُ) یعنی اقوام شرقیە، اعراب اوزرینە هجوم ایدەجك. غلبە ایدوب اعرابی حیوان كبی كسەجك. اویلە مدهش فتنەلر و قراڭلقلی مصیبتلركە، اڭ قراڭلقلی كیجەلردن داها زیادە قراڭلق اولاجق.

ایشتە حضرت علی رضی اللّٰە عنهڭ بر كرامت باهرەسیكە، كندندن بش یوز سنە صوڭرە كلن و عرب دولت عبّاسیەسنی محو ایدن و حدسز كتب اسلامیّەیی نهر فراتە دوكن و اعرابی غایت ظالمانە قتل ایدن هلاكو وقعۀ مشهورەسنی خبر ویرییور. چونكە مشهور اولان قرن، قرق سنە دگل، او زمانڭ اصطلاحنجە اغلب عمر اولان آلتمش سنەدن عبارتدر. چونكە بر دور آلتمش سنەدە دگیشیر.

بو صورتلە امام علی رضی اللّٰە عنهڭ هجرتدن اوتوز سنە صوڭرە كوفەدە یازدیغی بو ارجوزەدەكی طقوز دفعە آلتمش، اوتوزە علاوە ایدیلسە، بش یوز یتمش اولویوركە، جنكیزڭ و هلاكونڭ هجوم و تخریبات زمانیدر.

صوڭرە حضرت جبرائیلڭ، عَلٰی نَبِیِّنَا وَ علیە الصّلاة والسّلام حضور نبویدە كتیروب سكینە نامیلە بر صحیفەدە یازیلی اسم اعظم، حضرت علی رضی اللّٰە عنهڭ قوجاغنە دوشمش. حضرت علی رضی اللّٰه عنه دییور:

بن جبرائیلڭ شخصنی یالڭز علٓائم السّما صورتندە كوردم. سسنی ایشیتدم، صحیفەیی آلدم، بو اسملری ایچندە بولدم دییەرك، بو اسم اعظمدن بحث ایلە بعض حادثاتی ذكردن صوڭرە، تحدیث نعمت صورتندە دییوركە:

(فَكُلُّ مَعْنًا مِنْ عُلُومٍ فَاخِرَةٍ *مِنْ مَبْدَأِ الدُّنْیَا لِیَوْمِ الْاٰخِرَةِ *قَدْ صَارَ كَشْفًا عِنْدَنَا عَیَانًا *فَكُلُّ ذٖی شَكٍّ غَدًا مُهَانًا) یعنی اوّل دنیادن قیامتە قدر علوم اسرار مهمّە بزە شهود درجەسندە انكشاف ایتدی. كیم نە ایسترسە صورسون. سوزیمزە شبهە ایدنلر، ذلیل اولور.

صوڭرە یینە اسم اعظم ایچندە بولونان او آلتی اسمای حسنادن بحث ایدوب، بردنبرە عینًا غوث كیلانینڭ؈ اخبار غیبیسی كبی هلاكو عصرندن بو عصریمزە باقییور و ایكنجی بر كرامت غیبیّەیی اظهار ایدییور. و دییوركە:

(اَحْرُفُ عُجْمٍ سُطِّرَتْ تَسْطٖیرًا [حاشیە] *بِتَّ بِهَا الْاَمٖیرُ وَالْفَقٖیرًا) یعنی، اون دردنجی عصر محمدیدە بیڭ اوچ یوز قرق طوقوز و رومیجە بیڭ اوچ یوز قرق یدیدە عربی حروفنی ترك ایدوب، اجنبی و عجمی حروفنە اسلام ایچندە باشلاناجق. هم عموم فقیر زنكین، امیر و ایشجی، چولوق چوجق كیجە درسلریلە او حروفی جبرًا اوگرنەجكلر. چونكە بر نسخەدە (بَاتَ) در. (بَاتَ) ایسە كیجە چالیشمەسیدر. (بِتَّ) ایسە، قطعی و جبری افادە ایدییور. (اَحْرُفُ عُجْمٍ) فقرەسندەكی (عُجْمٍ) ایسە، او زمانڭ اصطلاحنجە عربڭ غیری، لاتینجە و فرنكی حروف دیمكدر.

صوڭرە دییور: (فَمَنْ اَرَادَ اللّٰهُ اَنْ یُعٖینَهُ *اَتْحَفَهُ بِهٰذِهِ السَّكٖینَةِ) یعنی كیم عنایت الٰهیەیە مظهر ایسە، حضرت جبرائیلڭ تعبیریلە بو سكینۀ قدسیّە اولان اسم اعظمی جناب حق اوڭا هدیە ایدر. اونڭلە او زمانڭ شر و فتنەلرندن قورتاریر.

بو سوزدن درت صحیفە اوّل، یینە دیمش: (فَكُلُّ مَنْ لَاحَتْ لَهُ السَّعَادَةُ *كَانَ لَهُ فِی الْجٖیدِ كَاالْقِلَادَةِ) یعنی كیم سعادتە مظهر ایسە، سعید ایسە، شقی دگلسە، او اسم اعظم اونڭ بوینندە مبارك بر كردانلق حكمندە بر نسخە اولور.

صوڭرە دییور: (ثُمَّ اعْلَمُوا مَعَاشِرَ الْاِخْوَانِ *اَنَّ غُوَاةَ اٰخِرِ الزَّمَانِ *هُمْ عُلَمَٓاءُ ذَوَّقُٓوا اَفْوَاهَهُمْ *ثُمَّ انْثَنُوا وَاتَّبَعُٓوا اَهْوَٓائَهُمْ) یعنی او بدعەلر و عجمی و اجنبی حروفنڭ انتشاری زمانی اولان او آخر زمانڭ فنا آدملری، بر قسم علمٓاء السٓوءدركە: حرص سببیلە بطنلرینی حراملە طولدیرمق ایچون، بدعەلرە یاردیم ایدنلر و فتوا ویرنلردر.

صوڭرە بر قسم علماء السّوئی طوقاتلامقلە برابر بریسیلە قونوشویور. دیر: (فَسْئَلْ لِمَوْلَاكَ الْعَظٖیمِ الشَّأْنِ *یَا مُدْرِكًا لِذٰلِكَ الزَّمَانِ *بِاَنْ یَقٖیكَ شَرَّ تِلْكَ الْفِتْنَةِ *وَشَرَّ كُلِّ كُرْبَةٍ وَمِحْنَةٍ) یعنی او زمانە یتیشن و عالملردن اولان انسان! جناب حقدن او فتنەنڭ شرّندن محافظە ایچون سڭا درس ویردیگم اسم اعظملە دعا ایت.

(فَاِنَّمَا نَحْنُ عَلَی التَّحْقٖیقِ *غَوْثٌ لِكُلِّ كُرْبَةٍ وَضٖیقٍ) یعنی بز آل بیتدن برر غوث چیقوب، هر كربت و شدّت زمانندە امداد ایدییورز.

اَسَدُ اللّٰە الغالب حضرت علی ابن ابی طالب رضی اللّٰه عنه و كَرَّمَ اللّهُ وَجْهَهُ نڭ، اخبارات غیبیەیە عائد شو قصیدەسنڭ بر قسمندە رسالۀ نور شاكردلرینە بالخاصّە باقدیغنە (متعدّد امارەلر) وار. او دە غوث كیلانی كبی، رسالۀ نورڭ مقبولیتنی امضا ایدییور و آلقیشلایور.

[برنجی امارە] لاتین حروفنڭ اسلاملر ایچندە جبرًا قبول ایتدیریلەجگنی تأسّفلە بحث ایدوب و علماء السّوئی طوقاتلادیغی یردە، بردنبرە بریسیلە ارشادكارانە قونوشویور. و دییوركە: (یَا مُدْرِكًا لِذٰلِكَ الزَّمَانِ) سڭا ویردیگم درس ایلە حفظ دعاسنی ایت! ایشتە بو (مُدْرِكْ) عینًا حضرت غوثڭ قصیدۀ مشهورەسندە (مُرٖیدٖی) دیدیگی آدمڭ عینیدر. چونكە ایكیسی دە عین فتنەدن بحث ایدوب، عموم ایچندە خصوصی بر آدمە التفات كوسترییورلر. قصیدۀ غوثیّەدە (مُرٖیدٖی) علم جفر و اون یدی امارە ایلە (مُلَّا سَعٖیدْ) در. هم (اَلْكُرْدٖی) اولدیغی تحقّق ایتمش.

رسالۀ نورڭ بر واسطۀ نشری اولان استادیمزڭ هم اسمی، هم لقبی (مُرٖیدٖی) لفظندە اولدیغی كبی، عینًا حضرت علی رضی اللّٰە عنهڭ (یَا مُدْرِكًا لِذٰلِكَ الزَّمَانِ ) [حاشیە] فقرەسندەكی (مُدْرِكًا) كلمەسی، علم جفر و حساب ابجدلە عینًا هم (مُلَّا سَعٖیدْ) هم (اَلْكُرْدٖی) اولویور. هر ایكیسی دە ایكی یوز آلتمش بش ایدییور.

(مُدْرِكًا) اوستندەكی تنوین وقفدە الفە انقلاب ایتدیگی ایچون (اَلْفٌ) اولویور. (مُدْرِكْ) لفظی میمسز یوقاریدن اوقونمەسیلە (كُرْدْ) اولدیغی كبی، (اَلزَّمَانُ) لفظی دە (بَدٖیعُ الزَّمَانْ) ڭ بر پارچەسنی اوقومقلە بو امارەیی لطافتلندیرییور. دیمك او زمانە یتیشنلرڭ آراسندە حضرت علی رضی اللّٰە عنهڭ خطابنە مظهر چوق افراد ایچندە رسالۀ نور ناشرینە خصوصی بر التفاتی واردر.

[ایكنجی امارە] حضرت امام علی رضی اللّٰه عنه، حرص و طمع یولندە بدعەلرە تابع اولان بر قسم علماء السّوئی طوقاتلادیغی وقت، علما ایچندە بریسیلە مرحمتكارانە قونوشمەیە باشلایور. استادیمزی بیلنلرە معلومدركە: آنقرە رؤساسی اونڭ استانبولدە اینكیلیزلرە قارشو مجاهداتنی تقدیر ایدرك اونی ایستەدیلر. آنقرەیە كیتدی. واندە مدرسة الزّهرا نامندەكی كندی دار الفنوننە یوز اللی بیڭ بانقنوط، (ایكی یوز مبعوثدن یوز آلتمش اوچنڭ امضاسیلە) اعطاسی قرارلاشدیریلان لایحۀ قانونیە قبول ایدیلمكلە برابر.. شیخ سُنُوسٖی مقامندە ولایات شرقیّە واعظ عمومیلگی، هم دار الحكمتڭ اعضالری اورادە دیانت ریاستنڭ اعضالری اولمقلە، او دە اونلر ایچندە بولونمقلە برابر مبعوث اولمق.. و داها نە ایسترسە یاپیلاجق دییە تكلیف ایتدكلری حالدە، صرف سنّت سنیّەیە مخالف

حركت ایتمەمك ایچون او تكلیفلری قبول ایتمەیەرك، اون طقوز سنە، بلكە یگرمی ایكی سنە اشكنجەلی اسارتی قبول ایدن استادیمزە، البتە حضرت امام علی رضی اللّٰە عنهڭ علماء السّوئە حدّت ایتدیگی زمان، اوڭا قارشو خصوصی التفاتی اولاجق.. و او معنوی مجلسدە اونی اوخشایاجق. اونڭ ایچون بو حال بر امارەدركە حضرت علی رضی اللّٰه عنه، حضرت غوث كیلانی؈ كبی عموم مخاطبلری ایچندە رسالۀ نورڭ بر واسطەسی اولان خواجەمزە اشارتًا التفات ایدییور.

(نَحْنُ عَلَی التَّحْقٖیقِ غَوْثٌ لِكُلِّ كُرْبَةٍ) فقرەسندە، غوث لفظیلە، غوث كیلانینڭ مریدینە شفقتلە باقمەسنە، امام علی رضی اللّٰە عنهڭ باقدیغنی ایما ایدییور.

[اوچنجی امارە] علما بحثنڭ اوّلكی سطرندە دییور: (فَمَنْ اَرَادَ اللّٰهُ اَنْ یُعٖینَهُ [حاشیە]*اَتْحَفَهُ بِهٰذِهِ السَّكٖینَةِ [حاشیە]) اسم اعظم بحثندە دییور: (فَكُلُّ مَنْ لَاحَتْ لَهُ السَّعَادَةُ *كَانَ لَهُ فِی الْجٖیدِ كَاالْقِلَادَةِ) یعنی، كیم عنایتە

و سعادتە مظهر ایسە، او آخر زمانڭ فتنەلرندن بو آلتی اسمی ویردیگم درس طرزندە ورد ایدنلر محفوظ قالیر.

حضرت امام علی رضی اللّٰه عنه، حروف اجنبیەیی اسلاملر ایچندە جبرًا قبول ایتدیرمك حادثەسی ایلە علماء السّوئڭ بدعەلرە یاردیملرندن تأسّفلە بحث ایدوب، او ایكی حادثە اورتەسندە ارشادكارانە بعضیلرندن بحث ایدییوركە، او سكینە اولان اسم اعظم ایلە اجنبی حروفنە قارشو مقابلە ایدییور. و هم علماء السّوئە قارشو مخالفت ایدییور. ایشتە بو زماندە او آدملر، رسالۀ نور شاكردلری و ناشرلری اولدقلری شبهەسزدر. چونكە اونلردركە، خطّ قرآنی محافظە ایدییورلر. و بدعەكار بر قسم علمالرە قارشو مقاومت ایدییورلر.

اوت، بز خواجەمزدن آڭلامشزكە، اون اوچ سنە اوّل حضرت علی رضی اللّٰە عنهڭ بو قصیدەسنڭ سرّینی بیلمدن یدی سنە اوّل بو آلتی اسمی امام غزالیدن درس آلارق كندینە ورد ایتمش. هم بتون اورادلری تبدّل و تحوّل ایتدیگی حالدە، بو سكینە تعبیر ایدیلن آلتی اسمە، حضرت علی رضی اللّٰە عنهڭ ویردیگی درس طرزندە متمادیًا ترك ایتمدن دوام ایتمش. بو طرزدە دوام ایدنلری ایشیتمەمشز.

هم خلاف عادت بر طرزدە، یگرمی سنە ظرفندە یگرمی فتنۀ عظیمەیە دوشدیگی كبی، تأثیرلی بر صورتدە حیات اجتماعیۀ اسلامیەیە قاریشدیغی حالدە خارقە بر محفوظیّت آلتندە اولدیغنی كوزیمزلە كوردیگمزدن، حضرت علی رضی اللّٰە عنهڭ آخر زماندەكی خطاب ایتدیگی دوستلری ایچندە بالخاصّە اوڭا روی التفاتی اولدیغنی حسّ ایدییورز.

هم (لَاحَتْ لَهُ السَّعَادَةُ) لفظیلە، یعنی سعید اولدیغنی و علما بحثنە متّصل بریسنڭ عنایتە مظهر اولدیغنی و (یَا مُدْرِكًا لِذٰلِكَ الزَّمَانِ) فقرەسی، حساب ابجدلە اون اوچنجی عصری كوستروب، او عصردە دنیایە كلن علمادن سعید [حاشیە] اسمندە بریسنە لطیفانە بر ایما، بو امارەیی زینتلندیرییور.

[دردنجی امارە] حضرت غوث كیلانی فتنۀ آخر زماندە سنّت سنیّەیی و اسرار قرآنیەیی محافظەیە و نشرە چالیشان بر مریدینە، اون بش امارە ایلە التفات ایدر. و اونڭلە قونوشورسە، البتە اسلامیتڭ تأسیسندە اسد اللّٰه عنواننی آلان.. و علوم اسراریّەدە (اَنَا مَدٖینَةُ الْعِلْمِ وَعَلِیٌّ بَابُهَا) حدیثنە مظهر بولونان.. و كرامات خارقە ایلە اشتهار ایدن.. و وهّابیلرڭ اجدادی اولان خارجیلری قیلیچدن كچیرن.. و غوث اعظمڭ؈ جَدّی

و استادی اولان حضرت امام علی رضی اللّٰه عنه، البتە آل بیتە بر جهتدە دوشمان اولان وهّابیلرڭ حرمین شریفینی استیلاسی هنگامندە.. و خارجیلردن داها برباد بر طرزدە سنّت سنیّەیە مخالفت ایدن بر قسم علماء السوء و ظلمەلرڭ استیلاسی زمانندە رسالۀ نور واسطەسیلە رسالۀ نور شاكردلری بتون قوّتلریلە سنّت سنیّەنڭ محافظەسنە و آل بیتڭ حرمتنە و مودّتنە چالیشدقلری و او مدهش مهالكە قارشو صارصیلمدقلری حالدە امداد روحانیّە و قوّۀ معنویەنڭ تقویەسنە پك چوق محتاج اولدقلری بر زماندە.. او علوم اوّلین و آخرینی بیلدیگنی مفتخرانە ادّعا ایدن حضرت علی رضی اللّٰه عنه، هیچ ممكنمیدركە، اولادندن اولان غوث كیلانیدن كری قالسین؟ شجاعت حیدرانەسیلە رسالۀ نور شاكردلرینڭ امدادینە یتیشمەسین؟ البتە بو صورتلە یتیشیر و یتیشدی.

معلومدركە، مثلا عموم بر جماعت ایچندە بری حركت ایتسە، بری دە دیسە: "ای انسان! بڭا باق." او انسان لفظ عمومیسندە قرینۀ حال ایلە، او حركت ایدن آدمە خطابدر. مادام مقتضای حال و قرینۀ حال ایلە، حضرت امام علی رضی اللّٰە عنهڭ عموم مخاطبلری ایچندە اڭ زیادە محتاج و اڭ زیادە حضرت علی رضی اللّٰە عنهڭ مقصدی لهندە حركت ایدن رسالۀ نور شاكردلریدر. البتە او ذات استقبالە باقوب (یَٓا اَیُّهَا اْلاِخْوَانُ) تعبیریلە قونوشدیغی جماعت ایچندە اڭ زیادە متحرّك و اڭ زیادە قوّۀ معنویەنڭ تقویەسنە محتاج اولانلرە خصوصیّتلە باقار.

[بشنجی امارە] اجنبی حروفاتنی اهل اسلامڭ اڭ مهم حكومتی رسمی بر صورتدە قبول و نشر و جبر ایتدیگی حالدە، رسالۀ نور شاكردلری بتون قوّتلریلە خطّ قرآنی یی خارقە بر صورتدە نشر و تعمیم ایلە محافظەسنە چالیشدقلری بر زماندە حضرت علی رضی اللّٰه عنه، تاریخیلە اوندن خبر ویرمكلە غیبی كراماتی بیان ایتدیگی یردە، علما ایچندە بریسنە التفات كوسترییور. البتە بو التفاتڭ كرچە چوق افرادی اولابیلیر. فقط بو قرینۀ حال كوسترییوركە: رسالۀ نور شاكردلری بر خصوصیت كسب ایتمشكە، حضرت علی رضی اللّٰه عنه التفاتیلە رسالۀ نوری آلقیشلایور.

[آلتنجی امارە]........................ قوّتلیدر، فقط یازاماییز.

[یدنجی امارە]........................ ظاهردر، فقط كوسترەمییورز.

[الحاصل] حضرت علی كَرَّمَ اللّٰهُ وَجْهَهُ، اجنبی حروفنە قارشو شدّتلی تأسّف و حدّت ایتدیگی و بدعەلرە طرفدارلق ایدن بر قسم علماء السّوئە قارشو شدّتلی نفرت و حدّت ایتدیگی یردە ارشادكارانە بعضیلرلە قونوشویور. و حضرت جبریلڭ تعبیریلە، سكینە اسمی ویریلن و اسم اعظم صندوقجەسی اولان اسمای ستەیە

دوام ایدنی ارشاد ایدییور. تلطیف ایدییور. ایشتە او اسمای ستّەنڭ دوامندن ترشّح ایدن و او اسمانڭ لمعاتی اولان رسالۀ نور.. و او رسالۀ نور كندی شاكردلری ایلە لا اقل یوزر قلملە یوزر پارچە رسالۀ نورڭ اجزالریلە و انتشار ایدن یگرمی بیڭ نسخەسیلە لا اقل یوز بیڭ آدمی حروف قرآنیە لهنە و سنّت سنیّەیە اتّباعە و ایمانلرینڭ تقویەسنە.. و حضرت علی رضی اللّٰە عنهڭ حدّت ایتدیگی ایكی جریانە قارشو تمامیلە مقاومت ایتدكلرندن، البتە حضرت علی رضی اللّٰە عنهڭ (یَٓا اَیُّهَا اْلاِخْوَانُ) تعبیر ایتدیگی اخوانلری ایچندە خصوصی بر صورتدە اونلرە باقییور.

اوت، حضرت علی رضی اللّٰە عنهڭ بو ظاهر كرامات غیبیّەسی حضرت پیغمبر علیە الصّلاة والسّلامڭ ارشادیلە اولدیغی ایچون، باشقە شكلدە بر معجزۀ پیغمبریّە اولدیغی مناسبتیلە.. عین كرامت غوثیە و اشارات خارقۀ علویّە كبی بشنجی عصرلە اون دردنجی عصرڭ فتنەلرینە اشارت ایدن و كیزلی قالوب معناسی آڭلاشیلمایان بر معجزۀ غیبیّۀ نبویّەیی بیان ایتمەیە مناسبت كلدی. شویلەكە:

حدیث صحیحدە واردركە، رسول اكرم علیە الصّلاة والسّلام فرمان ایتمش: [اِنِ اسْتَقَامَتْ اُمَّتٖی فَلَهُمْ یَوْمٌ وَاِلَّا فَنِصْفُ یَوْمٍ] اَوْ كَمَا قَالَ.. بو حدیث شریفە هر ناصلسە، قیامتە اشارت ایدییور، صورتندە معنا ویریلمش، معجزۀ نبویّە كیزلنمش، آڭلاشیلمامش. هم شیخ كیلانینڭ، هم حضرت علی رضی اللّٰە عنهڭ ارشاد نبوی ایلە بشنجی و آلتنجی و اون دردنجی عصرلرڭ فتنەلرندن كرامتكارانە بحثلری كوسترییوركە، بو حدیث شریف اونلرڭ بو زمانە باقمق ایچون بر تَلَسْقُوپْلریدركە، بو ایكی عصرە باقییورلر.

اوت، حدیثدە [یوم] تعبیری،〚 اِنَّ یَوْمًا عِنْدَ رَبِّكَ كَاَلْفِ سَنَةٍ مِمَّا تَعُدُّونَ〛 آیتنڭ دلالتیلە بیڭ سنەدن عبارتدر. خلافت اسلامیّەیە و حكومت عربیّەیە، حدیث موجبنجە تام استقامتلە كیتمدیگی ایچون، تام نصف یوم اولان بش یوز كسور سنەدە [حاشیە] هلاكو هجومیلە خاتمە ویریلدی. اوچ درت، عصر زمان فترتدن صوڭرە〚 یَاْتِی اللّٰهُ بِقَوْمٍ یُحِبُّهُمْ وَیُحِبُّونَهُ〛 آیتنڭ سرّینە مظهر اولان عثمانلی عادل پادشاهلری، حدیث شریفدەكی استقامتی یرینە كتیرمگە چالیشدقلرندن، حدیثڭ حكمیلە امّت ایچون بیڭ سنە خلافت اسلامیّەیە و شرع شریف اوزرندە كیدن حكومتڭ ادامەسنە واسطە اولدیلر.

حدیثڭ ایكنجی جهتیكە،

[فَلَهُمْ یَوْمٌ] دە تحقّق ایدییور. و استانبولڭ فتحندن تقریبًا یگرمی سنە اوّل، یینە خلافت اسلامیّەیە زمین احضار ایدیلدی. و تام عموم عالم اسلامڭ مركز حكومتی اولاجق بر وضعیت آلمەیە باشلادی. و مژدە و ثنای پیغمبری یە مظهر اولان فاتحڭ واسطەسیلە استانبولڭ فتحی تاریخندن فترت زماننی طی ایدوب، عبّاسیلر نرەدن بیراقمشلر ایسە اورادن باشلایارق عثمانلیلر بالاستحقاق عالم اسلامڭ باشنە كچدیلر. یینە حدیث شریفڭ حكمیلە اگر استقامتلە كیتسە، خلافت بیڭ سنەدن عبارت اولان بر كون دوام ایدەجك. یوقسە یاریم كون دوام ایدەجك. ایشتە عینًا عبّاسیلر كبی عثمانلیلر دە یاریم كون دوام ایتدی. یعنی بش یوز سنە دوام ایتدی. بو معجزۀ نبویّە پك پارلاق بر صورتدە تظاهر ایتدی.

ایشتە خلافت عربیّە تام استقامتە مظهر اولمدیغندن، یالڭز یاریم كون اولان بش یوز سنەیی آلدی. عثمانلی دولتی دخی، تك باشیلە آخرلرندە اجنبیلرڭ و منافقلرڭ مداخلەلری یوزندن تام استقامتی محافظە ایدەمدیگی ایچون، او دە یاریم كون اولان بش یوز سنەیی آلدی. بو ایكی قرداش اولان ایكی عنصرڭ اتّحادندن تام استقامتە مظهریت سرّی واردركە: بیڭ سنە اولان بر كونی تمام آلدیلر.

[سؤٓال] رؤیای صادقە واسطەسیلە ویا حقیقی كشف جهتیلە، حضرت علی كَرَّمَ اللّٰهُ وَجْهَهُ و غوث اعظم رضی اللّٰە عنهما كبی ذوات قدسیّە، جزئی ایشلرە دائر عامی آدملرلە دە تماس ایدەبیلیرلر. و بعض شیلری خبر ویرییورلر. نەدندركە، بونلرڭ بر اشارت غیبیّەلرینی غایت اهمّیتلە بیڭلر كشف.. و بیڭلر رؤیای صادقە قدر طوتویورسڭز و اهمّیت ویرییورسڭز؟

[الجواب] سكز یوز سنە و بیڭ اوچ یوز سنە مسافەدە، وراثت نبوّت مقامندە عالم اسلامڭ استقبالی نقطۀ نظرندە كلّی بر نظرە او اوزون مسافەدە كورونن حادثاتڭ، البتە چوق اهمّیتی اولاجق و طاغ كبی بر بیوكلگی اولاجقكە، او اوزون مسافەدە و او كلّی نظردە، عالم اسلامڭ منفعتی نقطۀ نظرندە اوزاقدن كورونسون. و اوڭا دقّت ایدیلسین. و وجودە كلمدن اوّل اوندن خبر ویریلسین. رؤیای صادقە و كشف ایسە، جزئی و خصوصیدر. وجودە كلدكدن صوڭرە، یاقیندن باقمقدر. البتە بویلە كشف جهتندە، روحانی تمثّل اعتباریلە یاقیندن باقیلدیغی وقت ذرّەلر دخی كورونەبیلیر.

عادی آدملر دە اونلرڭ روحانی مثاللریلە كوروشەبیلیرلر. و غایت اهمّیتسز شیلر دە مدار نظر اولابیلیر.

فقط بر آیینەدەكی مثالی كونشلە مناسبتدار اولمق و صحبت ایتمك نرەدە؟ حقیقی سمادەكی كونشلە مناسبتدار اولمق نرەدە؟ آیینەدەكی كونشی هركس النە آلابیلیر. التفاتنە مظهر اولابیلیر. قونوشابیلسە، بلكە قونوشدیرابیلیر. فقط سمادەكی كونشڭ التفاتنی جلب ایدن و كندیسیلە قونوشدیران كیمسە، قمرە چیقملی، مقامی قمردە اولملی ویا قمر كبی بر وظیفە كورملی. یوقسە او سلطان سماوی اولان كونشڭ حشمتلی نظری آلتندە هیچ كورونمەیەجك درجەدە كیزلنەجكدر.

رسالۀ نور شاكردلری نامنە

كرد بكر * رحمت اللّٰه علیە عاصم * رحمت اللّٰه علیە مصطفی * رحمت اللّٰه علیە كچەجی مصطفی * رحمت اللّٰه علیە علی * رحمت اللّٰه علیە سلیمان * رحمت اللّٰه علیە رشدی * رحمت اللّٰه علیە عبد اللّٰه * رحمت اللّٰه علیە خسرو * رحمت اللّٰه علیە رأفت * رحمت اللّٰه علیە سلیمان * رحمت اللّٰه علیە صبری * رحمت اللّٰه علیە خلوصی * رحمت اللّٰه علیە باباجان محمد علی * رحمت اللّٰه علیە مسعود * رحمت اللّٰه علیە حسین * رحمت اللّٰه علیە غالب * رحمت اللّٰه علیە حافظ علی * رحمت اللّٰه علیە كوچك لطفی * رحمت اللّٰه علیە ذكائی * رحمت اللّٰه علیە عبد الباقی * رحمت اللّٰه علیە شاملی حافظ توفیق * رحمت اللّٰه علیە یعقوب جمال * رحمت اللّٰه علیە وسائرە...

[سكزنجی لمعە]

غوث اعظمڭ؈ حزب القرآنە دائر كرامت غیبیەسیدر.

شو رسالەنڭ ایچندەكی امضالرلە كوستریلدیگی كبی، بنم دە خدمت قرآنیەدەكی آرقداشلریمە اشتراكم وار. بر قسمی، بنم امضام ایلەدر. بر قسمی، اونلرڭ تصویب و استخراجیلە و تصدیقلریلە اولدیغندن، بڭا عائد حدّمدن فضلە حصّەیی اونلرڭ خاطری ایچون سكوت ایلە قبول ایتدم. یوقسە بو رسالەنڭ باشندە سویلەدیگم كبی، بوندە اویلە بر حصّۀ شرفە حقّم یوقدر. اون سنە مقدّم بو قصیدۀ غیبیّەیی كوردكجە بڭا معنوی بر اخطار كبی، "دقّت ایت!" دییە قلبمە كلییوردی. او خاطرەیی (ایكی جهتلە) دیڭلەمییوردم.

[برنجیسی] بنم كبی اهمّیتلی عمری شان و شرف پردەسی آلتندە كچن بر كیمسەنڭ نفس امّارەسی، حبّ جاه ایلە زهرلنوب ئولدكدن صوڭرە، یڭیدن بو صورتلە نفس امّارەیە دیگر بر شرف قاپوسی آچمق ایستەمەمكدی.

[ایكنجی جهت] بو معنّد زماندە بدیهی دعوالری و ظاهری حجّتلری قبول ایتمەینلرە قارشو، بویلە اشارات غیبیە نوعندن اولان شیلری خودفروشانە بر طرزدە اظهار ایتمك، خوشمە كیتمییوردی.

اڭ نهایت اسارتمڭ سكزنجی سنەسندە، اڭ اشكنجەلی و اڭ صیقینتیلی بر زماندە، غایت قوّتلی بر تسلّی یە و تشویقە محتاج اولدیغمزدن بڭا اخطار ایدیلدیكە: بونی تحدیث نعمت و بر شكر معنوی نوعندن اظهار ایت! هم قورقما! قناعت ویرەجك درجەدە قوّتلیدر.

بو اظهاردە اڭ مهم مقصدم، اسرار قرآنیەیە عائد اولان رسالەلرڭ مقبولیتنە غوث اعظمڭ؈ امضا باصمەسی نوعندن اولدیغیدر.

ایكنجی مقصدم، او قدسی استادیمڭ كرامتنی اظهار ایتمكلە، كرامات اولیایی انكار ایدن ملحدلری اسكات ایدوب، خدمت قرآنیەیە فتور ویرەجك چوق اسبابە معروض و چوق عوائقە هدف اولان آرقداشلریمڭ قوّۀ معنویەلرینی تقویە و شوقلرینی تزیید و فتورلرینی ازالە ایتمك ایدی.

بنم ایچون بر نوع خودفروشلق نوعندن اولدیغی ایچون اهمّیتلی ضرردر. فقط او ضرریمی، او قدسی استادیمڭ و آرقداشلریمڭ خاطری ایچون قبول ایتدم.

شو كرامت غوثیە رسالەسی تدریجًا استخراج ایدیلدیگی ایچون، برقاچ پارچەیە و تتمّەلرە انقسام ایتدی. كیتدكجە، بربرینی تنویر و تأیید ایتدكجە وضوح پیدا ایدییور. اشاراتڭ بعضیسندە ضعف وارسە دە، سائر آرقداشلرینڭ اتّفاقندن آلدیغی قوّت، او ضعفی ازالە ایدر.

[شایان حیرت بر تفأّل و مهم بر اخبار غیبی ]

صبری، سلیمان، بكر، غالب، توفیقڭ فقرەسیدر. هم خسرو، حافظ علی، رأفت، عاصم و قولە اوڭیندن مصطفی لرڭ فقرەسیدر.

[لطیف و مژدەلی بر تفأّل] استاد، غالب و سلیمان.. امّی سنانڭ دیوانندە مسلگمزە و سوزلرە دائر تفأّل ایدیلدی، شو بیتلر چیقدی. باقدق، "سوزلر" بحثی، بتون دیوانندە یالڭز بو قافیەلردە كورونویور. دیمك سوزلر "حق سوز" ، هم "نور سوز" اولویور.

دیرمكە، یاردیمجیم اللّٰه

شفاعتجیم رسول اللّٰه

كە برهانم كتاب اللّٰه

بودر بندەكی حق سوز.

سنڭ قاپوڭدە قول چوقدر

حسابی حدّی هیچ یوقدر

ولكن بر دخی یوقدر

سنان امّی كبی نور سوز.

[مهم بر اخبار غیبی ]

شیخ كیلانینڭ؈ غیب آشنا كوزیلە كندندن سكز یوز سنە صوڭرە وقوعە كلەجگنی كوروب خبر ویردیگی بر حادثۀ قرآنیەدر.

قرآن معجز البیانڭ خدمتندەكی قدسیتە، كرامتكارانە اولارق سكز یوز سنە اوّل غوث اعظم عنوانیلە بحقٍّ اشتهار ایدن قطب اعظم شیخ كیلانی، (نَظَرْتُ بِعَیْنِ الْفِكْرِ فٖی حَانِ حَضْرَتٖی *جَلٖیبًا تَجَلّٰی لِلْقُلُوبِ فَجَنَّتْ) فقرەسیلە باشلایان قصیدەسنڭ آخرندە، مجموعة الاحزابڭ برنجی جلدینڭ ٥٦٢ نجی صحیفەسندە بش سطرلە شو زماندە خدمت قرآنیەدەكی هیئتە و باشدە بولونان استادیمزە بش وجهلە باقییور و كوسترییور. ایشتە او بش سطر شودر:

تَوَسَّلْ بِنَا فٖی كُلِّ هَوْلٍ وَشِدَّةٍ اَغٖیثُكَ فِی الْاَشْیَٓاءِ دَهْرًا بِهِمَّتٖی

اَنَا لِمُرٖیدٖی حَافِظًا مَا یَخَافُهُ وَاَحْرُسُهُ فٖی كُلِّ شَرٍّ وَفِتْنَةٍ

مُرٖیدٖٓی اِذَا مَا كَانَ شَرْقًا وَمَغْرِبًا اَغِثْهُ اِذَا مَا سَارَ فٖٓی اَیِّ بَلْدَةٍ

فَیَا مُنْشِدًا نَظْمٖی فَقُلْهُ وَلَا تَخَفْ فَاِنَّكَ مَحْرُوسٌ بِعَیْنِ الْعِنَایَةِ

وَكُنْ قَادِرِیَّ الْوَقْتِ لِلّٰهِ مُخْلِصًا تَعٖیشُ سَعٖیدًا صَادِقًا بِمَحَبَّتٖی

بشنجی سطردن صوڭرە كلن خاتمۀ قصیدە، (وَجَدّٖی رَسُولُ اللّٰهِ اَعْنٖی مُحَمَّدًا *اَنَا عَبْدُ الْقَادِرِ دَامَ عِزّٖی وَرِفْعَتٖی) در. ایشتە اوّلكی بش سطردە، بش وجهلە و بش توافقلە، شیمدی خدمت قرآنیەنڭ باشندە بولونانی كوسترییور.

[برنجی وجه] آخردەكی سطردە، (تَعٖیشُ سَعٖیدًا) اسمنی صراحتلە خبر ویرمكلە برابر، معیشت خصوصندە عزّت و سعادتلە كچینەجگنی خبر ویرییور. اوت خواجەمز، كوچكلگندنبری فقر حالیلە و استغنای تام ایلە برابر معیشت خصوصندە اڭ مسعود بر ذاتدر.

[ایكنجی وجه] عین سطرڭ باشندە (وَكُنْ قَادِرِیَّ الْوَقْتِ) فقرەسیلە او مریدینە دییوركە: » وقتڭ عبد القادری اول!« بو (قادری) كلمەسی، حساب ابجد ایلە اوچ یوز یگرمی بش ایدر. استادیمزڭ لقبی (نورسی) اولدیغی جهتلە، نورسینڭ مقام ابجدیسی اوچ یوز یگرمی آلتی ایدییور. بر تك فرق وار. او تك [الف] در. بیڭ معناسندە الفە رمز ایدر. دیمك بیڭ اوچ یوز یگرمی بشدە شیخ كیلانی یە منسوب بر ذات، شیخ كیلانی طرزندە حقیقت قرآنیەیی مدافعە ایتمەیە چالیشاجق. حقیقتًا استادیمز، بیڭ اوچ یوز یگرمی آلتی سنەسندە، حرّیتڭ ایكنجی سنەسی، مجاهدۀ معنویەیە آتیلمشدر.

[اوچنجی وجه] اونڭ ایكی اسمی وار. بری سعید، بری بدیع الزّمان. بو ایكی اسمڭ مجموعنڭ مقام ابجدیسی (الزّمان) دەكی شدّە صاییلمازسە، اوچ یوز یگرمی طوقوز ایدییور. ایكی (د) بر صاییلسە، اوچ یوز یگرمی بش ایدر. عینًا (كُنْ قَادِرِیَّ الْوَقْتِ) دەكی مخاطب او اولدیغنە اشارت ایدییور، بلكە دلالت ایدییور. اگر (الزّمان) دەكی اوقونمایان (الف لام) صاییلسە، قاعدةً (قادری) كلمەسندە بر (الف لام) داخل اولمق لازم كلیر. چونكە تعریف ایچون مضاف الیه قالقدقدن صوڭرە (الف لام) كلیر. او حالدە دخی مساوی اولورلر.

"[دردنجی وجه] بو بش سطردە حضرت شیخ استقبالدە بر مریدینە تأمینات ویرییور. (قُلْ وَلَا تَخَفْ) دییور:." قورقما! سوزلریڭی سویلە! "دییور:" سن شرق و غربە كیدەجكسڭ. چوق فتنەلرە و شرلرە كیروب، عمومندە اسباب عادیەنڭ فوقندە بر طرز ایلە قورتولارق محفوظ قالاجقسڭ! "دییور.

اوت، بو خدمت قرآنیە ایچندەكی ذات، حقیقتًا اسارتلە شرقە كیتدی. و یینە عجیب بر اسارتلە آسیەنڭ غربندە اون طقوز سنە قالدی. حضرت شیخڭ دیدیگی كبی، چوق شهرلری كزدی. مجاهدەسی سوزلرلەدر. (قُلْ وَلَا تَخَفْ) حكمیلە چكینمەیەرك حضرت شیخڭ دیدیگی كبی یاپمش. یگرمی سنە ظرفندە یگرمی فتنەیە و مهالك عظیمەیە دوشدیگی حالدە، بر حفظ غیبی ایلە، حضرت شیخڭ دیدیگی كبی محفوظ قالمش.

هم فوق المأمول بر غربت دیارندە فوق العادە عنایتە مظهریتی او

درجەیە كلمشكە، هر بر رسالە، او عنایاتڭ تعدادندە یازیلمشدر. حضرت غوثڭ دیدیگی كبی، بز اونڭ اطرافندە (مَحْرُوسٌ بِعَیْنِ الْعِنَایَةِ) فقرەسنڭ مأٓلنی كوزیمزلە كورویورز.

[بشنجی وجه] استادیمز كندیسی سویلەیوركە: "بن سكز طوقوز، یاشندە ایكن بتون ناحیەمز و اطرافندەكی اهالی نقشی طریقتندە ایدیلر. اوراجە مشهور غَوْثِ هٖیزَانْ نامیلە بر ذاتدن استمداد ایدییورلردی. بن اقربامە و عموم اهالی یە مخالف اولارق » یَا غوث كیلانی! « دیردم. چوجقلق اعتباریلە، المدن جویز كبی اهمّیتسز بر شی غائب اولسە، » یا شیخ! سڭا بر فاتحە، سن بنم بو شیئمی بولدیر« دیردم. عجیبدر و یمین ایدییورم، بیڭ دفعە بویلە حضرت شیخ، همّت و دعاسیلە امدادیمە یتیشمشدر. اونڭ ایچون بتون حیاتمدە عمومیتلە فاتحە و اذكار نە قدر اوقومش ایسەم، ذاتؐ رسالتدن صوڭرە شیخ كیلانی یە هدیە ایدییوردم. بن اوچ درت جهتلە نقشی ایكن، قادری مشربی و محبّتی بندە اختیارسز حكم ایدییوردی. فقط طریقتلە اشتغالە علمڭ مشغولیّتی مانع اولویوردی.

صوڭرە بر عنایت الٰهیە امدادیمە یتیشوب غفلتی طاغیتدیغی بر زماندە، حضرت شیخڭ (فُتُوحُ الْغَیْبْ) نامندەكی كتابی حسن تصادف ألمە كچمشدی. یگرمی سكزنجی مكتوبدە بیان ایدیلدیگی كبی، حضرت شیخڭ همّت و ارشادیلە اسكی سعید یڭی سعیدە انقلاب ایتدی. او فتوح الغیبڭ تفأّلندە اڭ اوّل شو فقرە چیقدی: (اَنْتَ فٖی دَارِ الْحِكْمَةِ فَاطْلُبْ طَبٖیبًا یُدَاوٖی قَلْبَكَ) یعنی » ای بیچارە! سن دار الحكمة الاسلامیّەدە بر اعضا اولمق جهتیلە، كویا بر حكیمسڭ. اهل اسلامڭ معنوی خستەلقلرینی تداوی ایدییورسڭ. حالبوكە اڭ زیادە خستە سنسڭ. سن اوّلا كندیڭە طبیب آرا! شفا بول! صوڭرە باشقەسنڭ شفاسنە چالیش!« دییوردی.

ایشتە او وقت او تفأّل سرّیلە، مادّی خستەلغم كبی، معنوی خستەلغمی دە قطعیًّا آڭلادم. او شیخمە دیدم: » سن طبیبم اول«. الحق، او طبیبم اولدی. فقط چوق شدّتلی عملیات جرّاحیە یاپدی. فتوح الغیب كتابندە » یا غُلَامْ!« تعبیر ایتدیگی طلبەسنە پك مدهش عملیات جرّاحیە یاپییور. بن كندیمی، او غُلَامْ یرینە وضع ایتدم. فقط پك شدّتلی خطاب ایدییوردی. » اَیها الْمُنَافِقْ! « » ای دیننی دنیایە صاتان ریاكار!« دییە دییە لَوْمْ ایدییوردی. كتابڭ یاریسنی آنجق اوقویابیلدم.

صوڭرە او رسالەیی ترك ایتدم. بر هفتە باقامدم. فقط عملیات جرّاحیەنڭ آرقەسندن بر لذّت كلدی. اشتیاقلە او مبارك اثری آجی بر تریاق كبی ویا صولفاتو كبی ایچدم. الحمد للّٰه قباحتلریمی آڭلادم، یارەلریمی حسّ ایتدم، غرور بر درجە قیریلدی. "خواجەمزڭ سوزی بورادە بیتدی.