و چوق اسباب، بو وضعیتە مساعدە ایتمییور. بن دە سزڭ ایچون یازدیغم بو درسمی اوقویان و قبول ایدن بتون همشیرەلریمی، بتون معنوی قزانچلریمە و دعالریمە نورڭ شاكردلری كبی داخل ایتمەیە قرار ویردم. اگر سز بنم بدلمە رسالۀ نوری قسمًا الدە ایدوب اوقوسەڭز ویا دیڭلەسەڭز، او وقت قاعدەمز موجبنجە بتون قرداشلریڭز اولان نور شاكردلرینڭ معنوی قزانچلرینە و دعالرینە دە حصّەدار اولورسڭز. بن شیمدی داها زیادە یازاجقدم، فقط چوق خستە و چوق ضعیف و چوق اختیار و تصحیحات كبی چوق وظیفەلرم بولوندیغندن، شیمدیلك بو قدرلە اكتفا ایتدم.

اَلْبَاقٖی هُوَ الْبَاقٖی

دعاڭزە محتاج قرداشڭز سعید النّورسی

[محرمدر] شیمدیلك مدرسة الزّهرا اركانلرینە مخصوصدر. اختیار قادینلرە اهمّیتلی بر مژدە و بكار و مجرّد قالمق ایستەین كنچ قیزلرە بر اخطاردر.

حدیث شریفدە [عَلَیْكُمْ بِدٖینِ الْعَجَٓائِزِ] كوسترییوركە؛ آخر زماندە قوّتلی ایمان، اختیار قادینلردە بولونوركە،

دیندار اختیار قادینلرڭ دیننە تابع اولڭ دییە، حدیث فرمان ایتمش. هم رسالۀ نورڭ درت اساسندن بر اساسی شفقت اولدیغندن و قادینلر شفقت قهرمانی بولونمەسندن، حتّی اڭ قورقاغی دە قهرمانجەسنە روحنی یاوروسنە فدا ایدر.

بو زماندە او قیمتدار والدەلر و همشیرەلر، بیوك بر حادثە ایلە قارشولاشییورلر. محرمجە و افشاسی مناسب اولمایان بر حقیقت فطریەسنی نور شاكردلرندن مجرّد قالمق ایستەین ویا مجبور اولان قیزلر قسمنە بیان ایتمك لازم كلدی دییە، روحمە اخطار ایدیلدی. بن دە دیرمكە: قیزلرم و همشیرەلرم! بو زمان، اسكی زمانە بڭزەمییور. تربیۀ اسلامیە یرینە تربیۀ مدنیە یاریم عصرە یاقین حیات اجتماعیەمزە یرلشدیگی ایچون، بر اركك بر قادینی ابدی بر رفیقۀ حیات و سعادت حیات دنیویەیە مدار و سائر كناهلردن كندینی محافظە ایتمك ایچون آلمق لازم كلیركن، او بیچارە ضعیفەیی دائما تحكّم آلتندە، یالڭز دنیوی كنچلگندە سَور. اوڭا ویردیگی راحتڭ بعضًا اون مثلی، اونی زحمتلرە صوقار. اگر شرعًا كفو تعبیر ایدیلن بربرینە دنك اولمازسە، حقوق شرعیّە نظرە آلینمدیغندن حیاتی دائما عذاب ایچندە كچر. قیصقانچلق دە مداخلە ایدرسە، داها برباد اولور. ایشتە بو ازدواجە سوق ایدن [اوچ سبب] وار.

[برنجیسی] تناسلڭ دوامی ایچون، حكمت الٰهیە او فطری خدمتە بر اجرت اولارق بر فطری میل و شوق ویرمش. حالبوكە ارككدە او ذوق اون دقیقەلق بر لذّت ویرسە دە، اگر مشروع ایسە، بر ساعت مشقّت چكەبیلیر.

فقط قادین، اون دقیقەلق او ذوق ایچون اون آی چوجغی كندی وجودندە زحمتنی چكمكلە، اون سنە چوجغڭ حیاتنە یاردیم ایلە مشقّت چكر. دیمك او اون دقیقەلق فطری میل، بو اوزون مشقّتلرە سوق ایتدیگی ایچون اهمّیتی قالماز. حسّ و نفس، اونڭلە اونی ازدواجە تحریك ایتمەملی.

[ایكنجیسی] فطرتًا قادین، ضعفی ایچون معیشت نقطەسندە بر یاردیمجی یە محتاجدر. بو احتیاج ایچون شیمدیكی تربیۀ اسلامیە درسی آلمایان، سرسریلگە، تحكّمە آلیشانلردن او كوچك بر اعاشەسی خاطری ایچون تحكّملری آلتنە كیروب ریاكارانە قوجەسنڭ رضاسنی تحصیل ایتمك یولندە حیات دنیویە و اخرویەسنڭ مداری اولان عبودیتنی و اخلاقنی بوزمق بدلنە، كوی قادینلری كبی كندی نفقەسنی كندی چالیشمەسی ایلە قزانمق، اون دفعە داها قولایدر. رزّاق حقیقی چوجقلرڭ رزقنی سوتلە ویردیگی كبی، اونلرڭ دە رزقنی او خالق كریم

ویرییور. او رزق خاطری ایچون نمازسز و اخلاقنی غائب ایتمش بر زوج آرامق، ریاكارانە چالیشوب تحكّمی آلتنە كیرمك، البتە نور طلبەسنڭ كاری دگلدر.

[اوچنجیسی] قادینلغڭ فطرتندە چوجق اوخشامق و سومك میلانی وار. و اولادینڭ دنیادە اوڭا خدمتی و آخرتدە شفاعتی و والدەسی ئولدكدن صوڭرە اوڭا حسناتی ایلە یاردیمی، او میل فطری یی قوّتلندیروب أولندیرمەیە سوق ایتمش. حالبوكە شیمدی تربیۀ اسلامیە یرینە كیرن تربیۀ مدنیە ایلە، اون دانەدن بر ایكی حقیقی اولاد، كندی والدەسنڭ شفقتنە مقابل فداكارانە خدمت و دیندارانە دعالری ایلە و حسناتلری ایلە والدەسنڭ دفتر اعمالنە حسنەلر یازدیرمق و آخرتدە دە صالح ایسە، والدەسنە شفاعت ایتمك احتمالنە مقابل، اوندن سكزی او حالتی كوسترمدیگندن، بو فطری میل و نفسانی شوق ایلە او بیچارە ضعیفەلر بویلە آغیر بر حیاتە قطعی مجبور اولمادن كیرمەمك كركدر.

ایشتە بو اشارت ایتدیگمز حقیقتە بناءً، بكار قالمق ایستەین نور شاكردلرندن اولان قیزلرە دیرمكە: تام موافق و دیندار و اخلاقلی بر زوج بولمادن كندینی آچیق صاچیقلقلە صاتماسینلر. اگر بولونمدی، نورڭ بر قسم

فداكار شاكردلری كبی مجرّد قالوب، تا اوڭا لایق و ابدی بر آرقداش اولاجق و تربیۀ اسلامیّەیی آلمش وجدانلی بر مشتری اوڭا چیقسین و سعادت ابدیەسی، موقّت بر كیف دنیوی ایچون بوزولماسین و مدنیتڭ سیّئٓاتی ایچندە بوغولماسین. [حاشیە]

سعید النّورسی

كنچ نورجی قیزلرە عائد مكتوبە اكدر.

وقتیلە سزە كوندریلن بر مكتوبدن بر پارچەدر.

بو شهردە رسالۀ نورە انتساب ایدن اختیار خانملر ثبات ایتدكلرینی و باشقەلری كبی صارصیلمدقلرینی دوشوندم. بردن بو حدیث شریف اخطار ایدیلدی:

[عَلَیْكُمْ بِدٖینِ الْعَجَٓائِزِ] یعنی، آخر زماندە اختیار قادینلرڭ، فطرتًا ضعیفە و حسّاسە و شفقتلی اولمەلرندن هركسدن زیادە دیندەكی تسلّی و نورە محتاج اولدقلری كبی، هركسدن زیادە فطرتلرندە شفقت جهتیلە، دیندە بولدیغی نهایتسز شفقتپرورانە بر نور تسلّی یە و التفات و مرحمت و رحمتە و نقطۀ استنادە و نقطۀ استمدادە احتیاجلری واردر. و تام ثبات ایتمك، فطرتلرینڭ مقتضاسیدر. اونڭ ایچون بو زماندە او حاجاتی تام یرینە كتیرن رسالۀ نور، هر شیدن زیادە اونلرڭ روحلرینە خوش كلییور و قلبلرینە یاپیشییور.

سعید النّورسی

غایت اهمّیتلی بر حقیقتە غایت قیصە بر اشارت

بعض احادیث شریفە ایلە اشارت واركە؛ آخر زماندە قادینلر طائفەسندە حقائق ایمانیە زیادە انكشاف ایدەجك. او زمانڭ ضلالت تهلكەلرندن بر درجە محفوظ قالاجقدر. بر حدیث شریف فرمان ایدركە: [عَلَیْكُمْ بِدٖینِ الْعَجَٓائِزِ] یعنی آخر زماندە اختیار قادینلرڭ دینلرینە اقتدا ایدیڭز. دیمك شفقت قهرمانلری اولان قادینلر، او سجیۀ شفقتدن چیقان صمیمیت و اخلاص ایلە، او زمانڭ ریاكارانە ضلالت تهلكەلرندن قورتولمغە وسیلە اولور. اسلامیتنی محافظە ایدر.

هم بر حدیث شریف فرمان ایدییوركە: [اَبُو الْبَنَاتِ مَرْزُوقٌ] یعنی قیزلرڭ باباسنڭ رزقنە بركت دوشر. دیمك قیز چوجقلری آخر زماندە چوغالیر. هم مبارك و رزقلری بركتلی اولور. بن چوق زمان اوّل بو نوع حدیثلرڭ سرّینی بیلمییوردم. جناب حقّە شكركە، بو آخردە بر درجە او سرّی آڭلادم. غایت قیصەجە بر اشارت ایدەجگز. نوع بشردە یاورولر، سائر حیوانلر كبی چابوق كندی كندینە مالك اولمدیغندن، یاشامقدە حیوانڭ ایكی اوچ آی یرینە، اون سنە، بلكە داها زیادە شفقتلی بر حمایتە محتاج اولدقلرندن، بو سرّ ایچون جنس حیوانە

مخالف اولارق انساندەكی ولدلرینە قارشو شفقتی، بر سجیۀ فطریە اولارق دوام ایتمك لازم كلمش. هم اقتدارسز یاورولرە و ضعیف والدەلرینە تام یاردیم و حمایە ایتمك حكمتیلە ارككلردە دە حیثیت، ناموس سجیّەسی فطرتندە درج ایدیلمش. بو ناموسدە خالص و اجرتسز، مقابلەسز، صمیمی بر قهرمانلق درج ایدیلمش. فقط او سجیە بعض اسباب ایلە بر درجە بوزولدیغی ایچون، صمیمی و خالص قهرمانلق سجیّەسی اكثریتلە ضعیفلامش. فقط قادینلردە او سجیۀ فطریە اولان شفقت قهرمانلغی بوزولمامش. بو سجیۀ فطریە اهل اسلامدە، آخر زماندە بیوك بر خدمت.. و حیات اجتماعیەدە، اسلامیت دائرەسندە بر اساس اولاجغنە او كبی حدیث شریفلر اشارت ایدوب رمزًا خبر ویرییورلر.

سعید النّورسی

[بِاسْمِهٖ سُبْحَانَهُ]

[وَاِنْ مِنْ شَیْءٍ اِلَّا یُسَبِّحُ بِحَمْدِهٖ]

[اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا]

باشقە خارج مملكتدە مهم یرلردە جریدەلرلە صورولان [نەدن سنّت سنیّەیە مخالف اولارق مجرّد قالدڭ؟] سؤٓالنە بر جوابدر.

[اوّلًا] مكتوبڭزی غایت خستە اولان استادیمزە اوقودق. استادیمز ایسە، بن شدّتلی خستە اولماسە ایدم، بو چوق قیمتدار و مدقّق و مبارك قرداشلریمە تفصیلاتلی بر جواب یازاجقدم. فقط بو شدّتلی وضعیتم مساعدە ایتمدیگندن غایت قیصە، برقاچ نقطەیە او مبارك و صمیمی قرداشلریمە و خدمت قرآنیەدە آرقداشلریمە یازارسڭز، دیدی.

[برنجیسی] قرق سنەدنبری غایت دهشتلی بر زندقە هجومی قارشوسندە، هر شیئنی فدا ایدەجك حقیقی فداكارلر لازم كلدیگی بر زماندە، قرآن حكیمڭ حقیقتنە، دگل دنیا سعادتمی، بلكە لزوم اولسە آخرت

سعادتمی دخی فدا ایتمەیە قرار ویردم. دگل بر سنّت اولان موقّت دنیا زوجەلرینی آلمق، بلكە بو دنیادە اون حوری دە بڭا ویریلسە ایدی، بیراقمەیە مجبوردمكە؛ اخلاص حقیقی ایلە حقیقت قرآنیەیە خدمت ایدەبیلەیم. چونكە بو دهشتلی دینسزلك قومیتەلری، اویلە دهشتلی هجوملری و دسیسەلری یاپییورلردیكە، بونلرە قارشو كلمك ایچون اعظمی فداكارلق یاپمق و حركات دینیّەسنی رضای الٰهیدن باشقە هیچ بر شیئە آلت یاپمامق لازم كلییوردی. بیچارە بر قسم عالملر و اهل تقوا انسانلر، چولوق چوجغنڭ معیشت دردی ایچون بدعەلرە فتوا ویردیلر ویا طرفدار كوروندیلر. خصوصًا دین درسلرینی قالدیروب اذان محمّدی ییؐ قالدیرمق كبی دهشتلی هجوملرە قارشو، اعظمی فداكارلق و اعظمی ثبات و متانت و هر شیدن استغنا ایتمك لزومی قارشوسندە، بن بر سنّت سنیە اولان أولنمك عادتنی ترك ایتدمكە؛ تا چوق حراملرە كیرمەیەیم و چوق واجبلری و فرضلری یاپابیلەیم. بر سنّت یوزندن یوز كناهە كیریلمز. چونكە او قرق سنە ظرفندە بر تك سنّتی یرینە كتیرن بعض خواجەلر، اون كبائرە و حراملرە كیرمگە، بر قسم سنّت و فرضلری بیراقمەیە كندیلرینی مجبور بیلدیلر.

[ثانیًا] آیت كریمەدە [فَانْكِحُوا مَا طَابَ لَكُمْ] و حدیث شریفدەكی [تَنَاكَحُوا تَكَاثَرُوا] كبی امرلر، امر دائمی

و وجوبی دگلدرلر. بلكە استحبابی و سنّت امرلریدر. هم شرطلرە باغلیدر. هم دە هركس ایچون هر وقت دگلدر. هم دە [لَا رَهْبَانِیَّةَ فِی الْاِسْلَامِ] رهبانیت اسلامیتدە یوقدر، معناسی، رهبانیلر كبی تجرّد مردوددر، حقیقتسزدر، حرامدر دیمك دگلدر. بلكە [خَیْرُ النَّاسِ مَنْ یَنْفَعُ النَّاسَ] حدیثنڭ سرّی ایلە حیات اجتماعیەیە خدمت ایتمك ایچون، اجتماعی بر عادت اسلامیّەیە ترویجدر. یوقسە سلف صالحیندن بیڭلرلە اهل حقیقت انزوایە، مغارەلرە موقّتًا كیرمشلر. دنیانڭ فانی مزیناتندن استغنا و تجرّد ایتمشلر. تاكە، حیات ابدیەلرینە تام خدمت ایتسینلر.

مادام شخصی و خصوصی كمالات باقیەسی ایچون دنیایی ترك ایدنلر، سلف صالحیندن چوق وار. البتە خصوصی دگل، كلّی و عمومی اولارق چوق بیچارەلرڭ سعادت باقیەلری ایچون و ضلالتە دوشمەمەلری و ایمانلرینی تقویە ایدوب قورتارمەلری ایچون و حقیقت قرآنیە و ایمانیەیە تام خدمت ایتمك و خارجدن كلن و داخلدن چیقان دینسزلرە قارشو طایانمق ایچون، زائل و فانی دنیاسنی ترك ایتمك، البتە سنّت سنیّەیە مخالفت دگل، بلكە حقیقت سنتە مطابقتدر. و صدّیق اكبرڭؓ "جهنّمدە وجودم بویوسون، تا اهل ایمانە یر بولونماسین."

دییە فداكارلقدە اعظمی صداقتڭ بر ذرّەسنی قزانمق فكریلە، بیچارە سعیدؓ بتون عمرندە تجردی، استغنایی اختیار ایتمش.

[ثالثًا] رسالۀ نورڭ طلبەلرینە، باشقەلری اولنییورلر، سز تزوجدن واز كچیڭز، دینیلمەمش، دینیلمز. فقط طلبەلر برقاچ طبقەدر. بر طبقەنڭ حقیقی اخلاصی غائب ایتمەمك و حقیقی فداكارلق و اعظمی بر صداقت طاشیمق ایچون، دنیا احتیاجلرینە ممكن اولدیغی قدر عمرینڭ موقّت بر قسمندە باغلانمامسی بو زماندە لازم كلییور. اگر خدمت قرآنیە و ایمانیەدە یاردیمجی بر خانم بولسە آلیر. خدمتنە ضرر ویرمز. للّٰە الحمد بو نوعدن چوق نور طلبەلری وار، زوجەلری اونلردن كری قالمییورلر. بلكە قادینلردەكی شفقتدن كلن اجرتسز فطری قهرمانلق و حقیقی اخلاص جهتیلە زوجندن داها ایلری كیدەبیلیر. نور طلبەلرینڭ یتیشمش قسملرندن اكثریسی اولنمشلر، بو سنّتی یرینە كتیرمشلردر.

رسالۀ نور اونلرە دیركە: خانەلریڭز بر كوچك مدرسۀ نوریە، بر مكتب عرفان اولسونكە؛ بو سنّت تام یرینە كلسین. سنّت سنیّەنڭ میوەسی اولان چوجقلر، آخرتدە سزە شفاعتجی اولسونلر. دنیادە دە ایمان درسنی آلوب سزە

حقیقی اولاد اولسونلر. یوقسە بو اوتوز سنەدە قسمًا اولدیغی كبی، او چوجقلرە یالڭز تربیۀ مدنیە ویریلسە، بر جهتدە او چوجقلر دنیادە فائدەسز و آخرتدە دعواجی اولارق، نە ایچون ایمانمی قورتارمدیڭز؟ دییەجكلرندن پدر و والدەلرینی محزون ایتمك، سنّت سنیّەنڭ حكمتنە منافی اولور.

سعید النّورسی

[بِاسْمِهٖ سُبْحَانَهُ]

خانملرڭ رهبرندە ایكی اوچ دفعە ذكر ایدیلن [عَلَیْكُمْ بِدٖینِ الْعَجَٓائِزِ] حدیث شریفنڭ سرّی مناسبتیلە، اختیارلر رسالەسندن [یدی رجا] اوڭا ذیل ایدیلدی.

[برنجی رجا] ای سنّ كمالە كلن، محترم اختیار قرداشلر و اختیارە همشیرەلر! بن دە سزڭ كبی اختیارم. اختیارلق زمانمدە آرا صیرە بولدیغم رجالری.. و او رجالردەكی تسلّی نورینە سزی دە تشریك ایتمك آرزوسیلە باشمدن كچن بعض حالاتی یازاجغم. كوردیگم ضیالر و راست كلدیگم رجا قاپولری، بنم ناقص و مشوّش استعدادیمە كورە كورولمش و آچیلمش. ان شٓاء اللّٰه سزلرڭ صافی و خالص استعدادلریڭز، كوردیگم ضیایی پارلاتدیراجق. بولدیغم رجایی داها زیادە قوّتلشدیرەجك. ایشتە كلەجك او رجالرڭ و ضیالرڭ منبعی، معدنی و چشمەسی ایماندر.

[ایكنجی رجا] اختیارلغمە كیردیگم زمان، بر كون كوز موسمندە، ایكیندی وقتندە یوكسك بر طاغدە دنیایە باقدم. بردن غایت رقّتلی و حزین و بر جهتدە قراڭلقلی بر حالت بڭا كلدی. كوردمكە؛ بن اختیارلاندم.