بِاسْمِهٖ سُبْحَانَهُ

بِسْمِ اللّٰهِ الرَّحْمٰنِ الرَّحٖیمِ

اهل ایمان آخرت همشیرەلرم اولان قادینلر طائفەسیلە بر محاورەدر.

بعض ولایتلردە طائفۀ نسادن صمیمی و حرارتلی بر صورتدە نورلرە قارشو علاقەلرینی كوردیگم.. و حدّمدن پك زیادە، اونلرڭ نورلرە عائد درسلریمە اعتمادلرینی بیلدیگم صیرەلردە، مبارك اسپارطەیە و معنوی [مدرسة الزّهرایە ] اوچنجی دفعە كلدیگم زمان ایشیتدمكە، او مبارك آخرت همشیرەلرم اولان طائفۀ نسا، بندن بر درس بكلەیورلرمش. كویا وعظ صورتندە جامعلردە اونلرە بر درسم اولاجق. حالبوكە بن درت بش وجهلە خستەیم. و هم ذهنم پریشان. حتّی قونوشمەیە و دوشونمەیە اقتدارسز بولوندیغم حالدە، بو كیجە شدّتلی بر اخطار ایلە قلبمە كلدیكە، مادام اون بش سنە اوّل كنچلرڭ ایستەمەلریلە [كنچلك رهبرینی] اونلر ایچون یازدق. و پك چوق استفادە ایدیلدی. حالبوكە خانملر طائفەسی، كنچلردن داها زیادە بو زماندە اویلە

بر رهبرە محتاجدرلر. بن دە بو اخطارە قارشو غایت پریشان و ضعف و عجزملە برابر [اوچ نكتە] ایلە غایت مختصر بعض لزوملی مادّەلری، او مبارك همشیرەلریمە و معنوی كنچ اولادلریمە بیان ایدییورم.

[برنجی نكتە] رسالۀ نورڭ اڭ مهم بر اساسی شفقت اولمەسندن، نسا طائفەسی شفقت قهرمانلری بولونمەلری جهتیلە داها زیادە رسالۀ نورلە فطرتًا علاقەداردرلر. [وَلِلّٰهِ الْحَمْدُ] بو فطری علاقەدارلق چوق یرلردە حسّ ایدیلییور. بو شفقتدەكی فداكارلق، حقیقی بر اخلاص و مقابلەسز بر فداكارلق معناسنی افادە ایتدیگندن، شیمدی بو زماندە پك چوق اهمّیتی وار. اوت بر والدە ولدینی تهلكەدن قورتارمق ایچون هیچ بر اجرت ایستەمدن روحنی فدا ایتمسی و حقیقی بر اخلاص ایلە وظیفۀ فطریەسی اعتباریلە كندینی اولادینە قربان ایتمسی كوسترییوركە؛ خانملردە غایت یوكسك بر قهرمانلق وار. بو قهرمانلغڭ انكشافیلە حیات دنیویەسنی، هم دە حیات ابدیەسنی اونڭلە قورتارابیلیر. فقط بعض فنا جریانلرلە، او قوّتلی و قیمتدار سجیە انكشاف ایتمز. ویاخود سٓوء استعمال ایدیلیر. یوزر نمونەلرندن بر كوچك نمونەسی شودر: او شفقتلی والدە، چوجغنڭ حیات دنیویەدە تهلكەیە كیرمەمسی و استفادە و فائدە كورمسی ایچون هر فداكارلغی نظرە آلیر، اویلە تربیە ایدر.

تهلكەیە كیردیگنی دوشونەمییور. اوغلم پاشا اولسون دییە، بتون مالنی ویرر. حافظ مكتبندن آلیر، آوروپەیە كوندریر. فقط او چوجغڭ حیات ابدیەسی تهلكەیە كیردیگنی دوشونەمییور. و دنیا حپسندن قورتارمغە چالیشییور. جهنّم حپسنە دوشمەسنی نظرە آلمییور. فطری شفقتڭ تام ضدّی اولارق او معصوم چوجغنی، آخرتدە شفاعتجی اولمق لازم كلیركن دعواجی ایدییور. او چوجق، نە ایچون بنم ایمانمی تقویە ایتمدڭ؟ بو هلاكتمە سببیت ویردڭ؟ دییە شكوا ایدەجك. دنیادە دە تربیۀ اسلامیّەیی تام آلمدیغی ایچون والدەسنڭ خارقە شفقتنڭ حقّنە قارشو لایقیلە مقابلە ایدەمز. بلكە دە چوق قصور ایدر.

اگر حقیقی شفقت سٓوء استعمال ایدیلمەیەرك بیچارە ولدینی حپس ابدی اولان جهنّمدن و اعدام ابدی اولان ضلالت ایچندە ئولمكدن قورتارمغە او شفقت سرّیلە چالیشسە، او ولدڭ بتون ایتدیگی حسناتنڭ بر مثلی، والدەسنڭ دفتر اعمالنە كچەجگندن، والدەسنڭ وفاتندن صوڭرە هر وقت حسناتلریلە روحنە نورلر یتیشدیردیگی كبی، آخرتدە دە، دگل دعواجی اولمق، بتون روح و جانیلە شفاعتجی اولوب ابدی حیاتدە اوڭا مبارك بر اولاد اولور. اوت، انسانڭ اڭ برنجی استادی و تأثیرلی

معلّمی، اونڭ والدەسیدر. بو مناسبتلە بن كندی شخصمدە قطعی و دائما حسّ ایتدیگم بو معنایی بیان ایدییورم:

بن بو سكسان سنە عمرمدە، سكسان بیڭ ذاتلردن درس آلدیغم حالدە، قسم ایدییورمكە، اڭ اساسلی و صارصیلماز و هر وقت بڭا درسنی تازەلر كبی مرحوم والدەمدن آلدیغم تلقینات و معنوی درسلردركە.. او درسلر فطرتمدە، عادتا مادّی وجودمدە چكردكلر حكمندە یرلشمش. سائر درسلرم او چكردكلر اوزرینە بنا ایدیلدیگنی، عینًا كورویورم. دیمك بر یاشمدەكی فطرتمە و روحمە، مرحوم والدەمڭ درس و تلقیناتنی، شیمدی بو سكسان یاشمدەكی كوردیگم بیوك حقیقتلر ایچندە برر چكردك اساسیە مشاهدە ایدییورم.

ازجملە؛ مسلك و مشربمڭ درت اساسندن اڭ مهمّی اولان شفقت ایتمك.. و رسالۀ نورڭ دە اڭ بیوك حقیقتی اولان آجیمق و مرحمت ایتمەیی، او والدەمڭ شفقتلی فعل و حالندن و معنوی درسلرندن آلدیغمی یقینًا كورویورم. اوت بو حقیقی اخلاص ایلە حقیقی بر فداكارلق طاشییان والدەلك شفقتی سٓوء استعمال ایدیلوب، معصوم چوجغنڭ الماس خزینەسی حكمندە اولان آخرتنی دوشونمەیەرك، موقّت، فانی شیشەلر حكمندە

اولان دنیایە، او چوجغڭ معصوم یوزینی چویرمك و بو شكلدە اوڭا شفقت كوسترمك، او شفقتی سٓوء استعمال ایتمكدر.

اوت قادینلرڭ شفقت جهتیلە بو قهرمانلقلرینی هیچ بر اجرت و هیچ بر مقابلە ایستەمەیەرك، هیچ بر فائدۀ شخصیە، هیچ بر كوستریش معناسی اولمایارق روحنی فدا ایتدكلرینە، او شفقتڭ كوچوجك بر نمونەسنی طاشییان بر طاووغڭ، یاوروسنی قورتارمق ایچون آرسلانە صالدیرمسی و روحنی فدا ایتمسی اثبات ایدییور.

شیمدی تربیۀ اسلامیەدن و اعمال اخرویەدن اڭ قیمتلی و اڭ لزوملی اساس، اخلاصدر. بو چشید شفقتدەكی قهرمانلقدە او حقیقی اخلاص بولونویور. اگر بو ایكی نقطە او مبارك طائفەدە انكشافە باشلاسە، دائرۀ اسلامیّەدە پك بیوك بر سعادتە مدار اولور. حالبوكە. ارككلرڭ قهرمانلقلری مقابلەسز اولامییور. بلكە، یوز جهتدە مقابلە ایستەیورلر. هیچ اولمازسە، شان و شرف ایستەیورلر. فقط مع التّأسّف بیچارە مبارك طائفۀ نسائیّە، ظالم ارككلرینڭ شرلرندن و تحكّملرندن قورتولمق ایچون، باشقە بر طرزدە، ضعفیّتدن و عجزدن كلن باشقە بر نوعدە ریاكارلغە كیرییورلر.

[ایكنجی نكتە] بو سنە انزوادە ایكن و حیات اجتماعیەدن چكیلدیگم حالدە، بعض نورجی قرداشلریمڭ و همشیرەلریمڭ خاطرلری ایچون دنیایە باقدم. بنملە كوروشن اكثر دوستلردن، كندی عائلوی حیاتلرندن شكوالر ایشیتدم، ایواه! دیدم. انسانڭ، خصوصًا مسلمانڭ تحصّنگاهی و بر نوع جنّتی و كوچك بر دنیاسی عائلە حیاتیدر. بو دەمی بوزولمەیە باشلامش؟ دیدم. سببنی آرادم. بیلدمكە: ناصل، اسلامیتڭ حیات اجتماعیەسنە و طولاییسیلە دین اسلامە ضرر ویرمك ایچون كنچلری یولدن چیقارمق و كنچلك هوساتیلە سفاهتە سوق ایتمك ایچون بر ایكی قومیتە چالیشییورمش.

عینًا اویلە دە، بیچارە نسا طائفەسنڭ غافل قسمنی دخی یاڭلیش یوللرە سوق ایتمك ایچون بر ایكی قومیتەنڭ تأثیرلی بر صورتدە پردە آلتندە چالیشدیغنی حسّ ایتدم. و بیلدمكە؛ بو ملّت اسلامە بر دهشتلی ضربە، او جهتدن كلییوردی. بن دە سز همشیرەلریمە و كنچلریڭز اولان معنوی اولادلریمە قطعیًّا بیان ایدییورمكە: قادینلرڭ سعادت اخرویەسی كبی، سعادت دنیویەلری دە و فطرتلرندەكی علوی سجیەلری دە بوزولمقدن قورتولمەنڭ چارۀ یگانەسی، دائرۀ اسلامیەدەكی تربیۀ دینیّەدن باشقە یوقدر!. روسیەدە او بیچارە طائفەنڭ نە حالە كیردیگنی ایشیتییورسڭز، رسالۀ نورڭ

بر پارچەسندە دینیلمشكە: عقلی باشندە اولان بر آدم، رفیقەسنە محبّتنی و سوكیسنی، بش اون سنەلك فانی و ظاهری حسن جمالنە بنا ایتمز. بلكە قادینلرڭ حسن جمالنڭ اڭ كوزلی و دائمیسی، اونڭ شفقتنە و قادینلغە مخصوص حسن سیرتنە سوكیسنی بنا ایتملی. تاكە، او بیچارە اختیارلاندقجە، قوجەسنڭ محبّتی اوڭا دوام ایتسین. چونكە اونڭ رفیقەسی، یالڭز دنیا حیاتندەكی موقّت بر یاردیمجی رفیقە دگل، بلكە حیات ابدیەسندە ابدی و سویملی بر رفیقۀ حیات اولدیغندن، اختیارلاندقجە داها زیادە حرمت و مرحمت ایلە بربرینە محبّت ایتمك لازم كلییور. شیمدیكی تربیۀ مدنیە پردەسی آلتندەكی حیوانجەسنە موقّت بر رفاقتدن صوڭرە، ابدی بر مفارقتە معروض قالان او عائلە حیاتی، اساسیلە بوزولویور.

هم رسالۀ نورڭ بر جزئندە دینیلمشكە: بختیاردر او آدمكە؛ رفیقۀ ابدیەسنی غائب ایتمەمك ایچون صالحە زوجەسنی تقلید ایدر، او دە صالح اولور. هم بختیاردر او قادینكە؛ قوجەسنی متدیّن كورور، ابدی دوستنی و آرقداشنی غائب ایتمەمك ایچون، او دە تام متدیّن اولور، سعادت دنیویەسی ایچندە سعادت اخرویەسنی قزانیر. بدبختدر او آدمكە؛ سفاهتە كیرمش زوجەسنە اتّباع ایدر، واز كچیرمەیە چالیشماز، كندیسی دە اشتراك ایدر.

بدبختدر او قادینكە؛ زوجنڭ فسقنە باقار، اونی باشقە بر صورتدە تقلید ایدر. ویل او زوج و زوجەیەكە بربرینی آتشە آتیلمقدە یاردیم ایدرلر. یعنی مدنیّت فانتازیەلرینە بربرینی تشویق ایدرلر.

ایشتە، رسالۀ نورڭ بو مأٓلدەكی جملەلرینڭ معناسی بودركە: بو زماندە عائلە حیاتنڭ و دنیوی و اخروی سعادتنڭ و قادینلرڭ دە علوی سجیّەلرینڭ انكشافنڭ مسبّبی، یالڭز دائرۀ شریعتدەكی آداب اسلامیتلە اولابیلیر.

شیمدی عائلە حیاتندە اڭ مهم نقطە بودركە؛ قادین، قوجەسندە فنالق و صداقتسزلك كورسە، قوجەسنڭ عنادینە عائلە دوستلغی اولان صداقت و امنیّتی بوزسە، عینًا عسكریەدەكی اطاعتڭ بوزولمەسی كبی، او عائلە حیاتنڭ فابریقەسی دە زیر و زبر اولور. بلكە او قادین، ألندن كلدیگی قدر قوجەسنڭ اصلاحنە چالیشملیدركە، ابدی آرقداشنی قورتارسین. یوقسە او دە، كندینی آچیقلق و صاچیقلقلە باشقەلرە كندینی كوسترمگە و سودیرمگە چالیشسە، هر جهتلە ضرر ایدر. چونكە حقیقی صداقتی بیراقان، دنیادە جزاسنی كورور. چونكە نامحرملرڭ نظرندە فطرتی قورقار، صیقیلیر، چكینیر. نامحرم یگرمی اركگڭ اون سكزینڭ نظرندن استثقال ایدر.

كندینە باقمەلرندن صیقیلیر. اركك ایسە، نامحرم یوز قادیندن، آنجق بریسندن استثقال ایدر، باقمەسندن صیقیلیر. قادین او جهتدە عذاب چكدیگی كبی، صداقتسزلك اتهامی آلتنە كیرر. ضعفیتیلە برابر، حقوقنی محافظە ایدەمز.

[الحاصل] ناصلكە قادینلر قهرمانلقدە، اخلاصدە، شفقت اعتباریلە ارككلرە بڭزەمدكلری كبی، ارككلر دە او قهرمانلقدە اونلرە یتیشەمییورلر. اویلە دە او معصوم خانملر دخی، سفاهتدە هیچ بر وجهلە ارككلرە یتیشەمزلر. اونڭ ایچون فطرتلریلە و ضعیف خلقتلریلە نامحرملردن شدّتلی قورقارلر و چارشاف آلتندە صاقلانمەیە كندیلرینی مجبور بیلیرلر. چونكە اركك، سكز دقیقە ذوق و لذّت ایچون سفاهتە كیرسە، آنجق سكز لیرە قدر بر شی ضرر ایدر. فقط قادین سكز دقیقە سفاهتدەكی ذوقڭ جزاسی اولارق، دنیادە دخی سكز آی آغیر بر یوكی قارنندە طاشیر. و سكز سنە دە او حامیسز چوجغڭ تربیەسنڭ مشقّتنە كیردیگی ایچون سفاهتدە ارككلرە یتیشەمز. یوز درجە فضلە جزاسنی چكر. آز اولمایان بو نوع وقوعات كوسترییوركە؛ مبارك طائفۀ نسائیّە فطرتًا یوكسك اخلاقە منشأ اولدیغی كبی، فسق و سفاهتدە دنیا ذوقی ایچون قابلیتلری یوق حكمندەدر. دیمك اونلر دائرۀ تربیۀ اسلامیە ایچندە

مسعود بر عائلە حیاتنی كچیرمگە مخصوص بر نوع مبارك مخلوقلردر. بو مباركلری افساد ایدن قومیتەلر قهر اولسونلر!.. اللّٰه بو همشیرەلریمی دە بو سرسریلرڭ شرلرندن محافظە أیلەسین. آمین.

همشیرەلرم! محرمجە بو سوزیمی سزە سویلەیورم: معیشت دردی ایچون سرسری، اخلاقسز، فرنك مشرب بر قوجەنڭ تحكّمی آلتنە كیرمكدن ایسە، فطرتڭزدەكی اقتصاد و قناعتلە، كویلی معصوم قادینلرڭ، نفقەلرینی كندیلری چیقارمق ایچون چالیشمەلری نوعندن كندیڭزی ادارەیە چالیشیڭز، صاتمغە چالیشماییڭز. شاید سزە مناسب اولمایان بر اركك قسمت اولسە، سز قسمتڭزە راضی اولیڭز و قناعت ایدیڭز. ان شٓاء اللّٰه رضاڭز و قناعتڭزلە او دە اصلاح اولور. یوقسە شیمدی ایشیتدیگم كبی، محكمەلرە بوشانمق ایچون مراجعت ایدەجكسڭز. بو دە، حیثیت اسلامیەیە و شرف ملّیەمزە یاقیشماز!

[اوچنجی نكتە] عزیز همشیرەلرم! قطعیًّا بیلیڭزكە: دائرۀ مشروعەنڭ خارجندەكی ذوقلردە، لذّتلردە، اون درجە اونلردن زیادە ألملر و زحمتلر بولوندیغنی، رسالۀ نور یوزر قوّتلی دلیللرلە، حادثاتلرلە اثبات ایتمشدر. اوزون تفصیلاتی رسالۀ نوردە بولابیلیرسڭز.

ازجملە: كوچك سوزلردن آلتنجی، یدنجی، سكزنجی سوزلر و كنچلك رهبری بنم بدلمە سزلرە تام بو حقیقتی كوسترەجك. اونڭ ایچون دائرۀ مشروعەدەكی كیفە اكتفا ایدیڭز و قناعت كتیریڭز. سزڭ خانەڭزدەكی معصوم اولادلریڭزلە معصومانە صحبت، یوزر سینامەدن داها زیادە ذوقلیدر.

هم قطعیًّا بیلیڭزكە؛ بو حیات دنیویەدە حقیقی لذّت، ایمان دائرەسندەدر و ایماندەدر. و اعمال صالحەنڭ هر بریسندە بر معنوی لذّت وار. و ضلالت و سفاهتدە، بو دنیادە دخی غایت آجی و چركین ألملر بولوندیغنی، رسالۀ نور یوزر قطعی دلیللرلە اثبات ایتمشدر. عادتا ایماندە بر جنّت چكردگی و ضلالتدە و سفاهتدە بر جهنّم چكردگی بولوندیغنی، بن كندم چوق تجربەلرلە و حادثەلرلە عین الیقین كورمشم. و رسالۀ نوردە بو حقیقت تكرار ایلە یازیلمش. اڭ شدید معنّد و معترضلرڭ النە كیروب، هم رسمی اهل وقوفلر و محكمەلر او حقیقتی جرح ایدەمەمشلر. شیمدی سزڭ كبی مبارك و معصوم همشیرەلریمە و اولادلرم حكمندە كوچكلریڭزە، باشدە تستّر رسالەسی و كنچلك رهبری و كوچك سوزلر بنم بدلمە سزلرە درس ویرسین.

بن ایشیتدمكە، بنم سزە جامعدە درس ویرمكلگمی آرزو ایدییورسڭز. فقط بنم پریشانیتملە برابر خستەلغم

و چوق اسباب، بو وضعیتە مساعدە ایتمییور. بن دە سزڭ ایچون یازدیغم بو درسمی اوقویان و قبول ایدن بتون همشیرەلریمی، بتون معنوی قزانچلریمە و دعالریمە نورڭ شاكردلری كبی داخل ایتمەیە قرار ویردم. اگر سز بنم بدلمە رسالۀ نوری قسمًا الدە ایدوب اوقوسەڭز ویا دیڭلەسەڭز، او وقت قاعدەمز موجبنجە بتون قرداشلریڭز اولان نور شاكردلرینڭ معنوی قزانچلرینە و دعالرینە دە حصّەدار اولورسڭز. بن شیمدی داها زیادە یازاجقدم، فقط چوق خستە و چوق ضعیف و چوق اختیار و تصحیحات كبی چوق وظیفەلرم بولوندیغندن، شیمدیلك بو قدرلە اكتفا ایتدم.

اَلْبَاقٖی هُوَ الْبَاقٖی

دعاڭزە محتاج قرداشڭز سعید النّورسی

[محرمدر] شیمدیلك مدرسة الزّهرا اركانلرینە مخصوصدر. اختیار قادینلرە اهمّیتلی بر مژدە و بكار و مجرّد قالمق ایستەین كنچ قیزلرە بر اخطاردر.

حدیث شریفدە [عَلَیْكُمْ بِدٖینِ الْعَجَٓائِزِ] كوسترییوركە؛ آخر زماندە قوّتلی ایمان، اختیار قادینلردە بولونوركە،

دیندار اختیار قادینلرڭ دیننە تابع اولڭ دییە، حدیث فرمان ایتمش. هم رسالۀ نورڭ درت اساسندن بر اساسی شفقت اولدیغندن و قادینلر شفقت قهرمانی بولونمەسندن، حتّی اڭ قورقاغی دە قهرمانجەسنە روحنی یاوروسنە فدا ایدر.

بو زماندە او قیمتدار والدەلر و همشیرەلر، بیوك بر حادثە ایلە قارشولاشییورلر. محرمجە و افشاسی مناسب اولمایان بر حقیقت فطریەسنی نور شاكردلرندن مجرّد قالمق ایستەین ویا مجبور اولان قیزلر قسمنە بیان ایتمك لازم كلدی دییە، روحمە اخطار ایدیلدی. بن دە دیرمكە: قیزلرم و همشیرەلرم! بو زمان، اسكی زمانە بڭزەمییور. تربیۀ اسلامیە یرینە تربیۀ مدنیە یاریم عصرە یاقین حیات اجتماعیەمزە یرلشدیگی ایچون، بر اركك بر قادینی ابدی بر رفیقۀ حیات و سعادت حیات دنیویەیە مدار و سائر كناهلردن كندینی محافظە ایتمك ایچون آلمق لازم كلیركن، او بیچارە ضعیفەیی دائما تحكّم آلتندە، یالڭز دنیوی كنچلگندە سَور. اوڭا ویردیگی راحتڭ بعضًا اون مثلی، اونی زحمتلرە صوقار. اگر شرعًا كفو تعبیر ایدیلن بربرینە دنك اولمازسە، حقوق شرعیّە نظرە آلینمدیغندن حیاتی دائما عذاب ایچندە كچر. قیصقانچلق دە مداخلە ایدرسە، داها برباد اولور. ایشتە بو ازدواجە سوق ایدن [اوچ سبب] وار.

[برنجیسی] تناسلڭ دوامی ایچون، حكمت الٰهیە او فطری خدمتە بر اجرت اولارق بر فطری میل و شوق ویرمش. حالبوكە ارككدە او ذوق اون دقیقەلق بر لذّت ویرسە دە، اگر مشروع ایسە، بر ساعت مشقّت چكەبیلیر.

فقط قادین، اون دقیقەلق او ذوق ایچون اون آی چوجغی كندی وجودندە زحمتنی چكمكلە، اون سنە چوجغڭ حیاتنە یاردیم ایلە مشقّت چكر. دیمك او اون دقیقەلق فطری میل، بو اوزون مشقّتلرە سوق ایتدیگی ایچون اهمّیتی قالماز. حسّ و نفس، اونڭلە اونی ازدواجە تحریك ایتمەملی.

[ایكنجیسی] فطرتًا قادین، ضعفی ایچون معیشت نقطەسندە بر یاردیمجی یە محتاجدر. بو احتیاج ایچون شیمدیكی تربیۀ اسلامیە درسی آلمایان، سرسریلگە، تحكّمە آلیشانلردن او كوچك بر اعاشەسی خاطری ایچون تحكّملری آلتنە كیروب ریاكارانە قوجەسنڭ رضاسنی تحصیل ایتمك یولندە حیات دنیویە و اخرویەسنڭ مداری اولان عبودیتنی و اخلاقنی بوزمق بدلنە، كوی قادینلری كبی كندی نفقەسنی كندی چالیشمەسی ایلە قزانمق، اون دفعە داها قولایدر. رزّاق حقیقی چوجقلرڭ رزقنی سوتلە ویردیگی كبی، اونلرڭ دە رزقنی او خالق كریم