بِسْمِ اللّٰهِ الرَّحْمٰنِ الرَّح۪يمِ

[ ١]

[رسالۀ نور]

لاحقە ١: (حضرت استادڭ یازدیغی اثرلرە« رسالۀ نور» اسمنی ویرمەسنڭ سببی و حیاتندە« نور» اسمنڭ أونمی)

اوتوز اوچ عدد سوزلرڭ و اوتوز اوچ عدد مكتوبلرڭ مجموعنە رسالة النّور نامی ویریلمەسنڭ سرّی شودركە: بتون حیاتمدە (نور) كلمەسی هر یردە بڭا راست كلمشدر. ازجملە، قریەم نورسدر. مرحومە والدەمڭ اسمی نوریەدر. نقشی استادم سیّد نور محمّددر. قادری استادم نور الدّین، قرآن استادلرمدن نوری، طلبەلرمدن بنملە اڭ زیادە علاقەداری نور اسملی بولونانلردر. كتابلریمی اڭ زیادە ایضاح و تنویر ایدن، نور مثالیدر. قرآن حكیمدەكی اڭ اوّل عقلمە، قلبمە پارلایان و فكریمی مشغول ایدن، [اَللّٰهُ نُورُ السَّمٰوَاتِ وَالْاَرْضِ مَثَلُ نُورِهٖ كَمِشْكٰوةٍ] آیتیدر. هم حقائق الٰهیەدە مشكلاتمڭ اكثریسنی حلّ ایدن اسمای حسنادن نور اسم نورانیسیدر. هم قرآنە شدّت سوق و انحصار خدمتم ایچون خصوصی امامم ذی النّوریندر.

سعید النّورسی

بارلە لاحقەسی: ٣١٥

[ ٢]

[رسالۀ نورڭ غایەسی]

لاحقە ٢: "بو زماندە اڭ بیوك بر احسان، بر وظیفە، ایماننی قورتارمقدر، باشقەلرڭ ایماننە قوّت ویرەجك بر صورتدە چالیشمقدر."

[بیوك بر مقامدە، اهمّیتلی بر ذاتڭ، اهمّیتلی بر مكتوبنە مجبوری بر جوابدر [حاشیە]

بِاسْمِهٖ سُبْحَانَهُ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

عزیز، صدّیق قرداشلرم،

بالمقابلە بز دە رمضانڭزی تبریك ایدییورز. رؤیالریڭز پك چوق مباركدرلر. ان شٓاء اللّٰه، جناب حق سزی بیوك احسانلرە مظهر أیلەیەجك، دییە بر اشارتدر.

بنجە بو زماندە اڭ بیوك بر احسان، بر وظیفە، ایماننی قورتارمقدر، باشقەلرینڭ ایماننە قوّت ویرەجك بر صورتدە چالیشمقدر. صاقین، بنلك و غرورە مدار شیلردن چكین. تواضع، محویّت و ترك انانیت، بو زماندە اهل حقیقتە لازم و

الزمدر. چونكە بو عصردە اڭ بیوك تهلكە، بنلكدن و خودفروشلقدن ایلری كلدیگندن، اهل حق و حقیقت، محویتكارانە دائما قصورینی كورمك و نفسنی اتهام ایتمك كركدر. سزڭ كبیلرڭ آغیر شرائط ایچندە قهرمانجەسنە ایماننی و عبودیتنی محافظە ایتمسی، بیوك بر مقامدر. سنڭ رؤیالریڭڭ بر تعبیری دە، بو نقطەدن سنی تبشیر ایتمكدر.

رسالۀ نور اجزالرندە طریقت حقیقتنە دائر "تلویحات تسعە" نامندەكی رسالەیی الدە ایدوب باقیڭز. هم ذاتڭز كبی متین و ایمانلی و حقیقتلی ذاتلر، رسالۀ نور دائرەسنە كیریڭز. چونكە بو عصردە رسالۀ نور، بتون تهاجماتە قارشو مغلوب اولمدی. اڭ معنّد دوشمانلرینە دە، سربستیتنی رسمًا تسلیم ایتدیردی. حتّی ایكی سنەدنبریدر بیوك مقاماتلر و عدلیەلر، تدقیقات نتیجەسندە، رسالۀ نورڭ سربستیتنی تصدیق و محرم و غیر محرم بتون اجزالرینی صاحبلرینە تسلیمە قرار ویردیلر.

رسالۀ نورڭ مسلگی، سائر طریقتلر، مسلكلر كبی مغلوب اولمایارق، بلكە غلبە ایدرك پك چوق معنّدلری ایمانە كتیرمسی، پك چوق حادثاتڭ شهادتیلە، بو عصردە بر معجزۀ معنویۀ قرآنیە اولدیغنی اثبات ایدر. او دائرەنڭ خارجندە، اكثریتلە بو مملكتدە و خصوصی و جزئی و یالڭز شخصی خدمت ویا مغلوبانە پردە آلتندە ویا بدعەلرە مسامحە صورتندە ویا تأویلات ایلە بر نوع تحریفات ایچندە خدمت دینیە تام اولاماز دییە، حادثات بزە قناعت ویرمش.

مادام سزدە بیوك بر همّت و قوّتلی بر ایمان وار.. تام بر اخلاص و تام بر محویّتلە، ثباتكارانە رسالۀ نورە شاكرد اول. تا بیڭلر، بلكە یوز بیڭلر شاكردلرڭ شركت معنویۀ اخرویەلرینە حصّەدار اول. تا سنڭ خیرلرڭ، اییلكلرڭ جزئیّتدن چیقوب كلّیلشسین، آخرتدە تام كارلی بر تجارت اولسون

اَلْبَاقٖی هُوَ الْبَاقٖی

سعید النّورسی

امرطاغ لاحقەسی ١: ١٠٠

لاحقە ٣: (قدسی ایمان حقیقتلری درسی ویرن رسالۀ نورلرڭ سائر یوللرە مقابل قیمتی و اهمّیتی)

قرداشلرم،

كُلستان صاحبی شیخ سعدئ شیرازی نقل ایدییور و دییوركە: « بن بر اهل قلبی تكیەدە، سیر و سلوك ایلە مشغول ایكن كورمشدم. برقاچ كون صوڭرە اونی طلبەلر ایچندە، مدرسەدە كوردم. » نە ایچون او فیضلی تكیەیی ترك ایدوب، بو مدرسەیە كلدڭ؟« دیدم. او دیدیكە: » اورادە هركس یالڭز كندی نفسنی، اگر موفّق اولورسە قورتارابیلیر. بورادە ایسە، بو عالی همّت شخصلر كندیلریلە برابر چوقلرینی قورتارمغە چالیشییورلر. علوّ جنابلق و علوّ همّتلك بونلردەدر. فضیلت و همّت بونلردەدر. اونڭ ایچون بورایە كلدم.« شیخ سعدی بو واقعەیی، قیصەجە خلاصەسنی كلستانندە یازمشدر.»

عجبا، طلبەلرڭ، (نَصَرَ، نَصَرُوا، نَصَرَتْ) كبی صرف و نحوڭ كوچوجك مسئلەلری تكیەلردەكی وردلرە راجح كلیرسە، رسالۀ نور، (اٰمَنْتُ بِاللّٰهِ وَمَلٰٓئِكَتِهٖ وَكُتُبِهٖ وَرُسُلِهٖ وَبِالْیَوْمِ الْاٰخِرِ) دەكی حقائق قدسیّۀ ایمانیّەیی اڭ قطعی و واضح بر صورتدە درس ویروب، اڭ معنّد زندیقلری و اڭ متمرّد فیلسوفلری صوصدیرركن، اونی بیراقوب یاخود سكتەیە اوغراتوب ویاخود قناعت ایتمەیوب، طریقت هوسیلە رسالۀ نوردن اذن آلمایارق، قپانمش خانكاهلرە كیرمك، نە درجە یاڭلیش اولدیغنی و بزم بو شفقت طوقادینە نە درجە استحقاق كسب ایتدیگمزی كوسترییور.

سعید النّورسی

لمعالر: ٣٠٦

لاحقە ٤: (رسالۀ نورڭ ایمان حقیقتلرندەكی تحشیداتنڭ سببی)

عزیز، صدّیق قرداشلرم،

ایمان، یالڭز اجمالی و تقلیدی بر تصدیقە منحصر دگلدر. بر چكردكدن طوت، تا بیوك بر خرما آغاجنە قدر.. و الدەكی آیینەدە كورونن مثالی كونشدن طوت، تا دڭز یوزندەكی عكسنە قدر، تا كونشە قدر مرتبەلری و انكشافلری اولدیغی كبی.. ایمانڭ او درجە كثرتلی حقیقتلری واركە، بیڭ بر اسمای الٰهیەنڭ و سائر اركان ایمانیەنڭ كائنات حقیقتلریلە علاقەدار چوق حقیقتلری واركە، "بتون علملرڭ و معرفتلرڭ و كمالات انسانیەنڭ اڭ بیوگی ایماندر و ایمان تحقیقیدن كلن تفصیللی و برهانلی معرفت قدسیەدر" دییە، اهل حقیقت اتّفاق ایتمشلر.

اوت، ایمان تقلیدی، چابوق شبهەلرە مغلوب اولور. اوندن چوق قوّتلی و چوق كنیش اولان ایمان تحقیقیدە پك چوق مراتب وار. او مراتبلردن علم الیقین مرتبەسی، چوق برهانلرینڭ قوّتلریلە بیڭلر شبهەلرە قارشو طایانیر. حالبوكە تقلیدی ایمان ایسە، بر شبهەیە قارشو بعضًا مغلوب اولور. هم ایمان تحقیقینڭ بر مرتبەسی دە عین الیقین درجەسیدركە، پك چوق مرتبەلری وار. بلكە اسمای الٰهیە عددنجە تظاهر درجەلری وار. بتون كائناتی بر قرآن كبی اوقویابیلەجك درجەیە كلیر. هم بر مرتبەسی دە حقّ الیقیندر. اونڭ دە چوق مرتبەلری وار. بویلە ایمانلی ذاتلرە شبهات اوردولری هجوم دە ایتسە، بر خلط ایدەمز. علمای علم كلامڭ عقلە و منطقە استنادًا تألیف ایتدكلری بیڭلر جلد كتابلری، یالڭز او معرفت ایمانیەنڭ برهانلی و عقلی بر یولنی كوسترمشلر. و اهل حقیقتڭ كشفە و ذوقە استنادًا یازدقلری یوزر جلد كتابلری، او معرفت ایمانیەیی داها باشقە بر جهتدە اظهار ایتمشلر.

فقط قرآنڭ معجزەكار جادّۀ كبراسنڭ كوستردیگی حقائق ایمانیە و معرفت قدسیە، او علما و اولیانڭ كتابلرندەكی بیانلرینڭ پك چوق فوقندە بر قوّت و یوكسكلكدەدر.

ایشتە رسالۀ نور، بو جامع و كلّی و یوكسك معرفت جادّەسنی تفسیر ایدوب، بیڭ سنەدنبری قرآن علیهنە و اسلامیت و انسانیّت ضررینە و عدم عالملری حسابنە تخریباتجی كلّی جریانلرە قارشو، قرآن و ایمان نامنە مقابلە ایدییور،

مدافعە ایدییور. البتە حدسز تحشیداتە احتیاجی واردركە، او حدسز دوشمانلرە قارشو طایانوب، اهل ایمانڭ ایماننی محافظەیە قرآن نوریلە وسیلە اولسون.

حدیث شریفدە واردركە: ” بر آدمڭ سنڭلە ایمانە كلمەسی، سڭا صحرا طولوسی قیرمیزی قویونلردن داها خیرلیدر.“ ” بعضًا بر ساعت تفكّر، بر سنە عبادتدن داها خیرلی اولور. “ حتّی نقشیلرڭ خفی ذكرە ویردكلری بیوك اهمّیت، بو نوع تفكّرە یتیشمك ایچوندر.

سعید النّورسی

امرطاغ لاحقەسی ١: ٢٠٣

[ ٣]

[رسالۀ نورڭ ماهیتی]

لاحقە ٥: (رسالۀ نور نە طرز بر تفسیردر؟)

عزیز، صدّیق قرداشلرم،

رسالۀ نور قرآنڭ چوق قوّتلی حقیقی بر تفسیریدر. تكرار ایلە دیدیگمزدن بعض دقّتسزلر تام معناسنی بیلمدكلرندن بر حقیقتی بیان ایتمەیە بر اخطار آلدم. او حقیقت شودر:

تفسیر ایكی قسمدر. بریسی: معلوم تفسیرلردركە، قرآنڭ عبارەسنی و كلمە و جملەلرینڭ معنالرینی بیان و ایضاح و اثبات ایدرلر.

ایكنجی قسم تفسیر ایسە:، قرآنڭ ایمانی اولان حقیقتلرینی قوّتلی حجّتلرلە بیان و اثبات و ایضاح ایتمكدر. بو قسمڭ پك چوق اهمّیتی وار. ظاهردەكی معلوم تفسیرلر، بو قسمی بعضًا مجمل بر طرزدە درج ایدییورلر. فقط رسالۀ نور طوغریدن طوغری یە بو ایكنجی قسمی اساس طوتمش، امثالسز بر طرزدە معنّد فیلسوفلری صوصدیران بر معنوی عالی تفسیردر.

سعید النّورسی

شعاعلر ٢: ٥٤٥

لاحقە ٦: (رسالۀ نورلرڭ یدی مثنوی قدر اهل ایمانە مرشد اولمسی)

قرداشلرم! قلبمە اخطار ایدیلدیكە، ناصلكە مثنوئ شریف، شمس قرآنیّەدن تظاهر ایدن یدی حقیقتدن بر حقیقتڭ آیینەسی اولمش، قدسی بر شرافت آلمش. مولویلردن باشقە، داها چوق اهل قلبڭ لایموت بر مرشدی اولمش. اویلە دە رسالۀ نور، شمس قرآنیّەنڭ ضیاسندەكی الوان سبعەیی و او كونشدەكی رنك رنك و چشید چشید یدی نوری بردن آیینەسندە تمثّل ایتدیردیگندن، ان شٓاء اللّٰه یدی جهتلە شریف و قدسی و یدی مثنوی قدر اهل حقیقتە باقی بر رهبر و لایموت بر مرشد اولاجق.

سعید النّورسی

لمعەلر: ٣٠٤