[١]

بِاسْمِهٖ سُبْحَانَهُ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

امرطاغندەكی قرداشلرم،

بنم حقّمدە اوهام ایدنلرە دیییڭزكە: بزم خدمتنی ایتدیگمز بو آدمڭ یگرمی سنەلك حیاتنڭ بتون محرم و غیر محرم مكتوبلرینی و كتابلرینی و اسرارینی، حكومت شدّتلە تحرّیلر ایدرك الدە ایتدی. طقوز آی هم اسپارطە، هم دڭزلی، هم آنقرە عدلیەلری تدقیق ایتدكدن صوڭرە، بر تك كون جزایی، بر تك طلبەسنە ویرمەیی موجب بر مادّە، بش صندوق كتابلرندە و اوراقلرندە بولونمدیكە، هم آنقرە اهل وقوفی و دڭزلی محكمەسی اتّفاقلە برائتنە قرار ویردیلر.

هم بو ضروری ایشلرینی اختیارلغنە حرمتًا كوردیگمز آدم، محكمەجە دعوا ایتمش و بتون حاضر آرقداشلرینی شاهد كوستروب تصدیق ایتدیرمشكە، یگرمی سنەدر هیچ بر غزتەیی و سیاسی اثرلری، نە اوقومش و نە صورمش و نە بحث ایتمش. و اون سنەدر حكومتڭ ایكی رئیسندن و بر والی و بر مبعوثندن باشقە هیچ بر اركاننی و بیوك مأمورلرینی بیلمییور و طانیمایور و طانیمغە مراق ایتمەمش. و اوچ سنەدر حرب عمومی یی نە صورمش، نە بیلمش، نە مراق ایتمش، نە رادیویی دیڭلەمش. و انتشار ایدن یوز اوتوز تألیفاتندن یگرمی سنە ظرفندە

یوز بیڭ آدم دقّتلە اوقودقلری حالدە، نە ادارەیە، نە آسایشە، نە وطنە و نە ملّتە هیچ بر ضررینی حكومت كورمەمش. بش ولایتڭ دقّتلی ضابطەلری و تحرّی مأمورلری قید ایتمەمش. و محاكمەسیلە اشتغال ایدن اوچ ولایتڭ و مركز حكومتڭ درت عدلیەلرینڭ آغیر جزا محكمەلری بولمامشكە، تخلیەلرینە مجبور اولدیلر.

اگر بو آدمڭ دنیایە اشتهاسی و سیاستە میلی اولسە ایدی، هیچ بر امكانی وارمیكە، بیڭ ترشّحاتی و امارەلری بولونماسین؟ حالبوكە محكمە صفحاتندە هیچ بر امارە بولمادیلركە، معنّد بر مدّعئ عمومی مجبور اولوب، وقوعات یرندە امكاناتی استعمال ایدرك مكرّرًا ادّعانامەسندە "یاپابیلیر" دیمش، "یاپمش" دییەمەمشدر. "یاپابیلیر" نرەدە، "یاپمش" نرەدە؟ حتّی محكمەدە سعید اوڭا دیمش: "هركس بر قتلی یاپابیلیر. بو ادّعاڭز ایلە هركسی و سزی محكمەیە ویرمك لازم كلییور."

[الحاصل] یا بو آدم تام دیوانەدركە، بو درجە دهشتلی امور دنیایە قارشو لاقید قالییور. ویاخود بو وطن و بو ملّتڭ اڭ بیوك بر سعادتنە اخلاص ایلە چالیشمق ایچون، هیچ بر شیئە تنزّل ایتمز و اهمّیت ویرمز. اویلە ایسە، بو آدمی تعجیز و تضییق ایتمك، وطنە و ملّتە و آسایشە بر نوع اهانتدر. و اونڭ حقّندە بو چشیت اوهام ایتمك بر دیوانەلكدر.

سعید النّورسی

[٢]

بِاسْمِهٖ سُبْحَانَهُ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

مهم بر سؤٓالڭ جوابیدر

بیوك مأمورلردن ایشمزلە علاقەدار اولانلر صوردیلر. دیدیلركە: مصطف كمال سڭا اوچ یوز لیرە معاش ویروب كردستانە و ولایات شرقیّەیە شیخ سُنُوسٖی یرینە سنی واعظ عمومی یاپمق تكلیفنی نە ایچون قبول ایتمدڭ؟ اگر قبول ایتسە ایدڭ، اختلال یوزندن كسیلن یوز بیڭ كردڭ جانلرینی قورتاراجقدڭ.

بن دە اونلرە جوابمدە دیدمكە: یگرمیشر اوتوزر سنەلك حیات دنیویەیی یوز بیڭ آدم حقّندە قورتارامدیغمە بدل، یوز بیڭ وطنداشە، هر بریسنە میلیونلر سنەلك حیاتلرینی قزاندیرمەیە وسیلە اولان رسالۀ نور، او ضایعاتڭ یرینە بیڭلر درجە فوقندە ایش كورمش. اگر بن او تكلیفی قبول ایتسە ایدم، هیچ بر شیئە آلت اولامایان و تابع اولامایان و سرّ اخلاصی طاشییان رسالۀ نور میدانە كلمزدی. اڭ محرم قرداشلریمە یازمشمكە: آنقرەیە كیدن رسالۀ نورڭ شدّتلی طوقاتلری ایچون بنی اعدامە محكوم ایدن ذاتلر، اگر رسالۀ نور ایلە ایمانلرینی قورتاروب اعدام ابدیدن نجات بولسەلر، سز شاهد اولیڭز، بن اونلری دە روح و جانملە حلال ایدرم.

برائتمزدن صوڭرە، بنی ترصّد ایلە تعجیز ایدن پولیس مدیرینە و ایكی ملكیە مفتّشنە و باشقە بیوك آرقداشلرینە قارشو دیدم: رسالۀ نورڭ قابل انكار اولامایان

بر كرامتیدركە، یگرمی سنە مظلومیّت حیاتمدە یوزر رسالە و مكتوبلرمدە و بیڭلر شاكردلرندە هیچ بر جریان ایلە و هیچ بر جمعیّت ایلە و داخلی و خارجی هیچ بر قومیتە ایلە هیچ بر وثیقە و هیچ بر علاقە، طقوز آی تدقیقاتدە بولونمامەسیدر. هیچ بر فكرڭ و تدبیرڭ حدّیمیدركە، بو خارقە وضعیتی ویرسین. بر تك آدمڭ برقاچ سنەدەكی محرم اسراری میدانە چیقسە، البتە اونی مسئول و محجوب ایدەجك یگرمی مادّە بولوناجق.

مادام حقیقت بودر. یا دییەجكسڭزكە: پك خارقە و مغلوب اولماز بر دها بو ایشی چویرییور. ویا دییەجكسڭزكە: عنایتكارانە بر حفظ الٰهیدر. البتە بویلە بر دها ایلە مبارزە خطادر. ملّتە و وطنە بیوك بر ضرردر. و بویلە بر حفظ الٰهی یە و عنایت ربّانیەیە قارشو كلمك، فرعونانە بر تمرّددر. اگر دیسەڭز: سزی سربست بیراقسەق و ترصّد و نظارت ایتمەسەك، درسلرڭلە و كیزلی اسرارڭلە حیات اجتماعیەمزی بولاندیرابیلیرسڭ! بن دە دیرم: بنم درسلرم، بلا استثنا بوتونی حكومتڭ و عدلیەنڭ النە كچمش. بر كون جزایی موجب بر مادّە بولونمامش. قرق اللی بیڭ نسخە رسالە و درسلر دخی ملّتڭ اللرندە دقّتلە و مراقلە كزدیگی حالدە، منفعتدن باشقە هیچ بر ضرری هیچ بر كیمسەیە اولمادیغنە، هم اسكی محكمەنڭ، هم یڭی محكمەنڭ موجب مسئولیّت بر مادّە بولامامەلری جهتیلە یڭیسی اتّفاقلە برائتمزە، اسكیسی بر بیوك آدمڭ خاطری ایچون یوز اوتوز رسالەدن بش اون كلمەیی بهانە ایدوب یالڭز قناعت وجدانیە ایلە، یوز یگرمی موقوف

قرداشلرمدن یالڭز اون بش آدمە آلتیشر آی جزا ویرمسی قطعی بر حجّتدر. هم داها یڭی بر درسم قالمدی. و بر سرّم كیزلی قالمدیكە، نظارتلە تعدیلە چالیشسەڭز. بن شیمدی حرّیتمە چوق محتاجم. یگرمی سنەدنبری لزومسز و حقسز و فائدەسز ترصّدلر، آرتق یتر! بنم صبرم توكندی. اختیارلق ضعفیّتندن، شیمدی یە قدر یاپمدیغم بد دعایی یاپمق احتمالم وار. مظلومڭ آهی عرشە قدر كیدر. بو بر قوّتلی حقیقتدر.

صوڭرە او ظالم و دنیاجە بیوك مقاملردە بولونانلر دیدیلر: سن یگرمی سنەدر بر تك دفعە تاكیەمزی باشڭە كییمدڭ. و اسكی و یڭی محكمەلرڭ حضورندە باشڭی آچمدڭ. اسكی قیافتڭلە بولوندڭ. حالبوكە اون یدی میلیون، بو قیافتە كیردی. بن دە دیدم: اون یدی میلیون دگل، بلكە یدی میلیون دە دگل، بلكە رضاسیلە و قلب قبوللگیلە آنجق یدی بیڭ آوروپەپرست سرخوشلرڭ قیافتلرینە رخصت شرعیّە و جبر قانونی جهتیلە كیرمكدن ایسە، عزیمت و تقوای شرعیە حیثیتیلە یدی میلیار ذاتلرڭ قیافتلرینە كیرن بنم كبی اوتوز سنەدنبری حیات اجتماعیەیی ترك ایدن آدمە: عناد ایدییور، بزە مخالفدر، دینیلمز. هایدی عناد دخی اولسە، مادام مصطف كمال او عنادی قیرامدی. و ایكی محكمە قیرمدی. و اوچ ولایتڭ حكومتلری اونی بوزمدی. سز نەجی اولویورسڭزكە، بیهودە هم ملّتڭ، هم حكومتڭ ضررینە او عنادی قیرمغە چالیشییورسڭز؟ هایدی سیاسی مخالف دە اولسە، مادام تصدیقڭزلە یگرمی سنەدر دنیا ایلە علاقەمی كسمشم.

و معنًا یگرمی سنەدنبری ئولمش بر آدمم. یڭیدن دیریلوب فائدەسز و كندیمە چوق ضررلی اولارق حیات سیاسیەیە كیرەرك، سزڭلە اوغراشمام. البتە بنم مخالفتمدن توهّم ایتمك دیوانەلكدر. دیوانەلرلە جدّی قونوشمق دخی بر دیوانەلك اولدیغندن، سزڭ كبیلرلە قونوشمەیی ترك ایدییورم. نە یاپارسەڭز یاپیڭز، منّت چكمم دیدم. اونلری هم قیزدیردم، هم صوصدیردم.

صوڭ سوزم:

حَسْبُنَا اللّٰهُ وَنِعْمَ الْوَكٖیلُ ٭حَسْبِیَ اللّٰهُ لَٓا اِلٰهَ اِلَّا هُوَعَلَیْهِ تَوَكَّلْتُ وَهُوَ رَبُّ الْعَرْشِ الْعَظٖیمِ ٭

سعید النّورسی

[٣]

بِاسْمِهٖ سُبْحَانَهُ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

كندی كندیمە بر حسب حالدر.

(بو حسب حالی آنقرە مقاماتنە ایشیتدیرمەیی، اصلاحدن صوڭرە سزڭ تنسیبڭزە حوالە ایدرم.)

حاكم كندیسی مدّعی اولسە، البتە "كیمدن كیمە شكوا ایدەیم، بن دخی شاشدم" بنم كبی بیچارەلرە دیدیرتیر. اوت، شیمدیكی وضعیتم حپسدن چوق زیادە صیقینتیلیدر. بر كونی بر آی حپس منفرد قدر بنی صیقییور. بو غربت و

اختیارلق و خستەلق و یوقسوللق و ضعفیّتملە قیشڭ شدّتی ایچندە هر شیدن منع ایدیلدم. بر چوجقلە، بر خستەلقلی آدمدن باشقە كیمسە ایلە كوروشەمم. ذاتًا بن تام بر حپس منفرددە یگرمی سنەدنبری عذاب چكییورم. بو حالدن فضلە بڭا تجرید و ترصّدلرلە صیقینتی ویرمك ایسە، غیرت اللّٰهە طوقونوب بر بلایە وسیلە اولمەسندن قورقولور. محكمەدە دیدیگم كبی، ناصلكە درت دفعە دهشتلی زلزلەلر، بزە ظلمًا تعرّضڭ عین زمانندە كلمەسی كبی پك چوق وقوعات وار. حتّی تخمین ایدرمكە، بنم حقوقمی محافظە و بنی حمایە ایتمك ایچون چوق كووندیگم آفیون عدلیەسی، دڭزلی محكمەسندەكی رسالۀ نور حقّندە مراجعتمە، بالعكس اهمّیت ویرمدی، بنی مأیوس ایتدی. عدلیەنڭ یانمەسنە بر وسیلە اولدی، احتمالی وار.

بن دیرمكە: بنم حقّمدە وجدانلی و انسانیّتلی اولان بو قضانڭ حكومتنڭ، ضابطە و عدلیەسیلە برابر بنی تام حمایە ایتمك، اڭ اهمّیتلی بر وظیفەسیدر. چونكە یگرمی سنەلك بتون اثرلریمی و مكتوبلریمی، اوچ عدلیە و مركز حكومت طقوز آی تدقیقدن صوڭرە برائتمزە و تخلیەمزە قرار ویردیلر. فقط اجنبی منفعتی حسابنە بو ملّت و بو وطنڭ پك بیوك ضررینە چالیشان بر كیزلی قومیتە، بزم برائتمزی بوزمق ایچون هر طرفدە حبّەیی قبّە یاپارق بر قسم مأمورلری علیهمە اوهاملاندیرییورلر. بر مقصدلری، بنم صبرم توكنسین، آرتق یتر، دیدیرتسینلر. ذاتًا اونلرڭ شیمدی بندن قیزدقلرینڭ بر سببی، سكوتمدر. دنیایە قاریشمامقلغمدر.

عادتا، نە ایچون دنیایە قاریشمییورسڭ؟ تا قاریشسین، مقصدیمز یرینە كلسین، دییورلر.

علیهمە حكومتڭ بر قسم مأمورلرینی اوهاملاندیرمقدە استعمال ایتدكلری بر ایكی دسیسەلرینی بیان ایدییورم. دیرلر: سعیدڭ نفوذی وار. اثرلری هم تأثیرلی، هم كثرتلیدر. اوڭا تماس ایدن، اوڭا دوست اولور. اویلە ایسە، اونی هر شیدن تجرید ایتمك.. و اهانت ایتمك ایلە و اهمّیت ویرمەمكلە و هركسی اوندن قاچیرمقلە و دوستلرینی ئوركوتمكلە نفوذینی قیرمق لازمدر دییە، حكومتی شاشیرتیرلر. بنی دە دهشتلی صیقینتیلرە صوقارلر.

بن دە دیرم:

ای بو ملّت و وطنی سَون قرداشلر! اوت، او منافقلرڭ دیدكلری كبی نفوذ وار، فقط بنم دگل. بلكە رسالۀ نورڭدر. و او قیریلماز. و اوڭا ایلیشیلدكجە قوّتلشیر. و ملّت و وطن علیهندە هیچ بر وقت استعمال ایدیلمەمش و ایدیلمز و ایدیلەمز. ایكی عدلیە اون سنە فاصلە ایلە یگرمی سنەلك اوراقلریمی شدّتلی و حدّتلی تدقیقات نتیجەسندە جزامزە بر حقیقی سبب بولمامەسی، بو دعوایە جرح ایدیلمز بر شاهددر.

اوت، اثرلر تأثیرلیدر. فقط ملّت و وطنڭ تام منفعتنە و هیچ بر ضرر طوقوندیرمدن یوز بیڭ آدمە قوّتلی ایمان تحقیقی درسی ویرمكلە سعادت و حیات ابدیەلرینە تام خدمتدە تأثیرلیدر. دڭزلی حپسندە قسمًا آغیر جزا ایلە